Manipulimet e zgjedhjeve!

[manoklla]

Atehere qe te jemi sa me te informuar rreth 'manipulimeve' si dhe qe te jemi ne gjendje qe japim nje mendim indipendent a ka mundesi te na paraqisni edhe pretendimet e pozites ju lutem? (dhe jo sipas raportit 1-10 shkrime ne favor te opozites). Vetem duke shpalosur vete 'kulture demokratike' do ti rritet kredibiliteti forumit.

[Albo]

Ngjela, padi në Prokurori edhe për socialistët në KZQV

N.P

TIRANE- Kandidati i Partisë Demokratike për Bashkinë e Tiranës, Spartak Ngjela deklaroi dje se ai kishte një shtesë kallëzimi për nënkryetarin e KZQV Tiranë, Aleks Zyba dhe anëtarët Agim Gonxhe, Pirro Sina, dhe Azis Meta. Sipas Ngjelës, anëtarët e përmendur më sipër “kanë dëmtuar rëndë imazhin e gjithë procesit të numërimit në KZQV e Tiranës”. Ai deklaroi dje se ka filluar fushatën legale ndaj atyre që ai i cilëson manipulatorë të votave. “Hetimi i prokurorisë duhet t’u japë përgjigje shumë pyetjeve, duke filluar së pari më shpjegimin se cilat janë arsyet që kutitë e votimit qëndruan dy-tre ditë nëpër KZQV e njësive bashkiake në një kohë që ligji e kërkonte për t’u mbledhur në KZQV e Tiranës ? Pse ato u paraqitën me tre ditë vonesë? Pse është ndërhyrë nëpër kutitë të cilat janë të gjitha të hapura dhe janë jashtë parametrave të kodit ? Pse janë manipuluar procesverbalet ? Ku janë fletët e tepërta ? Ku janë kontrabiletat e fletëve ?”, -tha ai. Sipas Ngjelës, të gjitha këto përbëjnë konceptin e dytë të denoncimeve që ai ka bërë në prokurori për personat që janë anëtar të KZQV të Tiranës. Duke ju drejtuar kryetarit të KQZ-së Ilirjan Celibashi, Ngjela tha se do ta çonte deri në fund kallëzimin penal ndaj tij. “Këto ditë KQZ do të marrë në shqyrtim zgjedhjet e kryeqytetit. Problemi është ky, sa do ta thellojnë krimin këta persona që prishën procesin e votimit në Tiranë ?”, -shtroi pyetjen Ngjela

[Albo]

Ngjela: Informaticieni Angjo manipuloi listën

Avokati tha se tashmë dihet personi që në bashkëpunim me kryetarin e KQZ krijoi çorbën me lista. Ai tha se dihet edhe mënyra se si është operuar dhe rruga që është ndjekur për të kryer përjashtimin

Listat e votimit nuk janë manipuluar nga një person i vetëm. Spartak Ngjela ka dhënë dje detaje të reja rreth fakteve të manipulimit të procesit zgjedhor në Tiranë deri edhe emrat e personave që janë përfshirë në këtë krim, duke u bërë thirrje anëtarëve të KQZ-së që të distancohen nga Celibashi dhe krimet e tij. "Ne e dimë se kush e manipuloi listën e votimit, e dimë se si është involvuar, se si është angazhuar informaticieni i njohur Angjo, çfarë ka marrë, me çfarë programi i ka hequr emrat, të gjitha i dimë dhe jo vetëm. Gjithçka që ka ndodhur me listat, sot është e zbardhur, personave u garantoj se do të shkojnë në bankën e të akuzuarve, biles ju njoftoi se nuk është gjë procesi i pasaportave, çfarë do të dalë me listat. Prokuroria do të çojë këtë çeshtje deri në fund," është shprehur Ngjela. Avokat Ngjela ka sqaruar se aktualisht krimi është i kapur dhe gjendet në KQZ, e cila sipas mendimit të opozitës "duhet të kthejë zgjedhjet, për të zbutur pak përgjegjësinë". Sa më shumë që kalon koha, shtohet përgjegjësia dhe identifikohet përgjegjësia e KQZ-së, nga Celibashi tek anëtarët e tjerë të KQZ-së.Deri tani Celibashi është përgjegjës i vetëm në KQZ," tha Ngjela.

[Albo]

Postuar më parë nga manoklla
Atehere qe te jemi sa me te informuar rreth 'manipulimeve' si dhe qe te jemi ne gjendje qe japim nje mendim indipendent a ka mundesi te na paraqisni edhe pretendimet e pozites ju lutem? (dhe jo sipas raportit 1-10 shkrime ne favor te opozites). Vetem duke shpalosur vete 'kulture demokratike' do ti rritet kredibiliteti forumit.

Manoklla, shiko se mos gjesh ti ne shtyp ndonje fakt nga shtypi i pavarur socialist te ngritur nga partia socialiste dhe sille ketu. Me aq sa e njoh une shtypin, per socialistet zgjedhjet ishin te lira dhe demokratike dhe manipulime te vetme per ta kane ndodhur ne Himare, ku kane kerkuar edhe riberjen e zgjedhjeve.

[Fringo]

Kodheli: Ngjelës t’i vijë turp me skandalin e KZQV-së së Tiranës


D.T.

TIRANË – Bashkia e Tiranës ka reaguar dje nëpërmjet nënkryetares së saj, Mimi Kodheli, pas deklarimit të kandidatit të PD-së, Spartak Ngjela, se do të ngrejë padi ndaj kryetarit Edi Rama dhe drejtoreshës së përgjithshme të burimeve njerëzore në këtë bashki, Keti Treska. Nënkryetarja Kodheli ka vlerësuar se këto janë “inskenime të turpshme”. “Duke qenë tanimë të mësuar me paditë penale si pjesë e luftës politike të Partisë Demokratike ndaj kryetarit dhe institucionit tonë, nuk do të kishim reaguar nëse kjo padi qesharake e radhës nuk do të ishte pjesë e inskenimit të lartpërmendur përmes të cilit zoti Ngjela e të tjera sharlatanë si ai po nëpërkëmbin jo fituesin Edi Rama, por zgjedhësit kryeqytetas të cilësdo parti qofshin”, u shpreh Kodheli në një konferencë për shtyp. I them zotit Ngjela dhe gënjeshtarëve të tjerë si ai se duhet t’u vijë shumë turp, jo vetëm për kontestimin e tyre skandaloz për një rezultat qartësisht të thellë e të padiskutueshëm, po për gjithçka që Partia Demokratike bëri qysh ditën e 12 tetorit për ta penguar daljen e rezultatit të votimit të popullit të Tiranës, tha nënkryetarja e Bashkisë. Sipas saj, “zotit Ngjela dhe gënjeshtarëve të tjerë si ai duhet t’u vijë shumë turp për të gjithë ata komisionerë të opozitës që pa asnjë shkak tjetër përveç thirrjes të të parëve, në shkelje flagrante të vullnetit të popullit dhe të ligjit, braktisën qendrat e votimit, pasi numërimi i votave nxori fitues Edi Ramën, duke shkaktuar konfuzion, vonesa dhe boshllëqe të pajustifikueshme në procesin e nxjerrjes së rezultatit”. “Zoti Ngjela dhe gënjeshtarëve të tjerë si ai duhet t’u vijë shumë turp për të gjithë skandalin e KQZV-së së Tiranës, ku siç u nënvizua edhe nga raporti i Misionit të Vëzhguesve Ndërkombëtarë, komisionerët e PD-së shkaktuan atë vonesë tallëse për të gjithë popullin e Tiranës”,- u shpreh ajo. Por jo vetëm kaq, tha nënkryetarja e Bashkisë, sepse zotit Ngjela dhe gënjeshtarëve të tjerë si ai duhet t’u vijë shumë turp edhe për mënyrën se si në KQZV-në e Tiranës këta komisionerë u tallën jo vetëm me afatet kohore të përcaktuara me ligj, po me vetë ligjin, me çdo normë morale dhe me çdo regull elementar të aritmetikës. Ajo ka ftuar KQZ-në që të veprojë pa ngurrim, larg çdo presioni e makinacioni politik, për t’i dhënë fund këtij inskenimi të turpshëm përmes të cilit humbësit e zgjedhjeve të 12 tetorit në Tiranë po përpiqen të justifikohen përpara elektoratit të tyre duke na turpëruar në fakt të gjithëve si komb, si shoqëri e si qytetarë të këtij vendi. Për sa u përket padive penale, Kodheli tha: “Ne jemi të bindur se ato do të kenë të njëjtin sukses që kanë patur të gjitha tonelatat e baltës së luftës politike të PD-së për të mbyllur rrugën e kryetarit të Bashkisë së Tiranës e të këtij institucioni drejt atyre sukseseve që më 12 tetor u vlerësua me një notë të shkëlqyer nga populli sovran i kryeqytetit”.




27/10/2003

[Albo]

Pavlefshmëria e procesit mund të shpëtojë besimin te vota

Spartak Ngjela

Më lejoni t’ju kujtoj që pastërtia demokratike ka filluar luftën e dytë të madhe për dënimin e uzurpatorëve të votës së lirë në Shqipëri. Më lejoni të sjell faktet dhe me këto fakte të bëj mbrojtjen time për rezultatin e Tiranës. Nga listat e zgjedhësve në qytetin e Tiranës janë hequr 40 mijë zgjedhës, nga këto 6 mijë janë të dokumentuar nga avokati im, të cilët kanë shprehur deklaratën përsonale dhe kanë shprehur edhe votën e tyre. Këta 6 mijë zgjedhës deshën të jenë prezentë këtu, por nuk i kam lejuar unë, pasi pres rrugën institucionale të pavlefshmërisë së votimit në Tiranë. Shmangia nga listat është një problem tjetër i madh, i cili do të jetë i vështirë, por i suksesshëm dhe do të vërë para bankës së të akuzuarve të gjithë ata që i kanë hequr emrat e zgjedhësve nga listat e votimit. Para jush kemi 345 kuti nga këto 72 janë normale. Por dhe sipas komisionit dhe këto të 72 janë me probleme, por nga ky komision janë konsideruar si teknike. Të gjitha kutitë janë të shqyera dhe paraqesin probleme të rënda ligjore. Në këto momente kërkoj nga ky komision që të shohë udhëzimin 2121 ku sipas të cilit është shtyrë afati i mbledhjes së kutive nga qendrat e votimit drejt KZQV të Tiranës. Mjafton të shohësh marrjen në dorëzim të dokumentacionit në administrimin e votës që ka marrë KZQV-ja e Tiranës në dy ose tri ditë rresht. Çfarë tregon ky administrim? Që të gjitha kutitë janë jashtë normave që parashikon neni 109 dhe 110, të cilin e kemi përpara dhe duhet ta respektojmë. Që nga ky moment procesi është nul. Që nga ky moment ne s'duhet të kishim ardhur fare këtu, megjithatë ju bëj thirrje ta shikoni me vëmendje. Nuk ka proces zgjedhor në Tiranë.

Nëpërmjet këtij komisioni kërkoj që me vendim të shpallet për të filluar çështjet penale ndaj të gjithë personave që kanë dorëzuar kutitë e votimit në KZQV e Tiranës, pa përjashtim do të kërkojmë, se 80 e ca përqind e tyre janë manipuluar në komisionet e PS-së. Do të fillojmë procesin penal për ata që kanë shkatërruar kutitë e votimit duke u hequr të gjithë elementët e sigurisë. Kutia numër 1977 ka 277 vota të vlefshme brenda ndër 380 të shpërndara që kanë marrë pjesë në votim. Kutia e votimit 1853, 406 votues, 807 vota procesverbali nga të cilat shumicën e ka marrë përfaqësuesi socialist. Të tilla janë 1839, 1776, 1762, 1759 pra gjithsej 75 kuti ku u zhbalancua rezultati në favor të kandidatit socialist për kryetar bashkie. Merreni dhe shikojeni. Atëherë pse janë shkatërruar këto kuti? Pse këto kuti të paraqitura nga socialistët në komision janë të shkatërruara? Sepse fituesi kam qenë unë z.Kryetar. Sepse të njëjtën gjë ka bërë edhe në 2001 kur ky kryetar bashkie këtu në këtë sallë kishte hequr 978 nga lista ime si kandidat për deputet dhe ka fituar me 320 vota. Kjo ishte mesatarja që kanë lëshuar skifterët natën dhe kanë bërë këtë batërdi, natyrisht duke shfrytëzuar tolerancën tuaj me udhëzimin 2121 që këto kuti të mos vinin direkt në KZQV, por të shkonin përpara në KZQV e vogla të bashkizave. Shikoni se çfarë administrim vote keni përpara. Janë 81 kuti pa tabela të rezultateve për të cilat nuk mund të merret vendim për të shpallur rezultatin, bën të pavlefshëm kjo votat e 76 mijë zgjedhësve të qytetit të Tiranës ose 30% të votuesve. 30 kuti votimi me tabela rezultatesh të kopjuara, të zhubrosura të palexueshme dhe pa firmat e duhura për të shpallur rezultatin. Bën të pavlefshëm 29 300 zgjedhës në Tiranë ose 10 përqind të votuesve. 75 kuti të administruara me tabela rezultatesh që kanë mospërputhje me bilancin të rezultateve, shprehur në vota të vlefshme dhe të shpërndara të kandidatëve. Zarfi i fletëve të votimit i papërdorur që bën të pavlefshme votat 79 mijë zgjedhësve, ose 30 përqind të votuesve të Tiranës. 44 kuti votimi bazuar në nenin 109 dhe 110 të Kodit Zgjedhor nuk mund të shpallen rezultate duke bërë të pavlefshme votat e 24 mijë zgjedhësve, rreth 8 përqind e votuesve.

Në lidhje me mospjesëmarrjen në zgjedhje, ditën e zhvillimit të tyre kam qenë me kryetarin e komisionit dhe i kam kërkuar këtë gjë, në rast se do të ketë diferencë midis vendimeve të KZQV-ve të Tiranës për listat dhe vendimit tuaj përfundimtar, i cili do të jetë në disfavorin tim ose në disfavorin e zgjedhësve çfarë ndodh? Pavlefshmëri absolute e procesit të votimit ishte përgjigjja. E kam të provuar që të gjitha vendimet e KZQV-ve të minibashkive nuk janë marrë në konsideratë në listën përfundimtare të zgjedhësve. Vendimet e KZQV-ve i kam me vete të fotokopjuara dhe po të doni jua dorëzoj. Po nuk ma ha mendja se nuk i keni këtu, përderisa i kam unë. Përfundimisht më lejoni që t'ju bëj të ditur që unë kërkoj pavlefshmëri absolute të zgjedhjeve pavarësisht se fituesi kam qenë unë, se në rast se nuk do të isha unë fituesi, përse duheshin falsifikuar tabelat e rezulatateve që keni në anale në favor të kundërshtarit tim? Pse duhej që 80 përqind e kutive të votimit jashtë standartit ligjor, të paraqiteshin nga socialistët nëpërmjet KZQV-ve, sepse fitues kam qenë unë pavarësisht masakrës ku 40 mijë persona kanë qenë të hequr nga listat e votimit, të cilët i kam zbuluar në reagimet e tyre dhe u kam treguar se ku të votojnë në qendra votimi 3 km larg, sipas parashikimit të ligjit që kanë qenë persona të cilët edhe në zgjedhjet e 2001 kanë votuar në ato qendra votimi.

Duke patur këto të dhëna ju bëj thirrje të nderuar komisionerë, jo në emrin tim, por në emër të ligjit. Ka ardhur koha që Shqipëria do të ketë apo nuk do të ketë më vota të lira në këtë vend. Do të ketë apo jo vota të lira në këtë vend nuk varet nga kjo tavolinë, as nga ne që jemi këtu, por nga sensibiliteti i atyre që masivisht u është hequr e drejta e votës dhe masivisht u është manipuluar procesi ose rezultati nëpërmjet shkatërrimit të kutive të votimit. Për këtë arsye kërkoj drejtësi të saktë në bazë të ligjit, fillimin e mënjëhershëm nëpërmjet jush të procesit penal të të gjithë personave që kanë firmën në KZQV dhe që janë të administruara në dosjet tuaja dhe të gjithë kutive me probleme që kanë paraqitur në KZQV e Tiranës. Që sot në mos nesër këtë çështje do ta ndërmarr vetë. Është në nderin tuaj që këta persona që kanë manipuluar procesin e zgjedhjeve të Tiranës, që kanë futur duart në kutitë e votimit pavarësisht në favorin e kujt, të vihen në bankën e të akuzuarve në mënyrë që në Shqipëri të fillojë frymëmarrja e lirë dhe njerëzit të besojnë se mund të ketë votime.

Është fyer vullneti i popullit të Tiranës në votimet e 12 tetorit. Do mbetet i fyer apo do të zhdëmtohen nga kjo tryezë kjo është në dorën tuaj, për të vënë në vend dinjitetin e tyre ky është një problem, i cili do të vijë shkallë-shkallë në procesin e gjatë për konsolidimin e demokracisë në Shqipëri.

[Albo]

Shkresa zyrtare, Miri Hoti: Ne s'hartuam listat

Pasi kishte pranuar para pak ditësh se Bashkia nuk kishte marrë pjesë në hartimin e listave, kryetari i Bashkisë së Durrësit ka hartuar një shkresë zyrtare ku deklaron se zyrat e gjendjes civile të këtij qyteti nuk kanë hartuar lista. Kështu përgjegjësia për masakrën zgjedhore është zhvendosur në institucionin qendror të zgjedhjeve

Kryetari i Bashkisë së Durrësit, Miri Hoti, i cili para pak ditësh kishte pranuar se listat nuk janë hartuar nga kjo bashki, ka përgatitur një shkresë zyrtare në të cilën thuhet shprehimisht se në hartimin e atyre listave që janë përdorur në ditën e votimit, nuk janë marrë nga zyrat e Gjendjes Civile, ashtu siç e parashikon ligji zgjedhor. Hoti është shprehur se ka ndërmarrë këtë iniciativë për të pohuar dhe zyrtarisht qëndrimin e këtij institucioni për masakrën që është bërë me listat. Kjo deklaratë do të shërbejë nga ana e opozitës si provë për të akuzuar organin qendror të zgjedhjeve për manipulim të listave. Mësohet se shkresa është hartuar pas kërkesës së degës së Partisë Demokratike në qytetin e Durrësit. "Bashkia ka qenë e përjashtuar nga listat e vitit 2003 dhe asnjë nga zyrat e kësaj bashkie të gjendjes civile nuk është marrë me listat," thuhet në shkresë. Ndërkohë burime shumë të sigurta nga Qarku i Durrësit është bërë e ditur se në zyrën e Kryetarit të Këshillit të Qarkut Genci Alizoti, është zhvilluar një takim mes Miri Hotit dhe vëllait të kandidatit socialist Lefter Koka. Bëhet e ditur se Alizoti ka qenë negociatori për këtë takim, i cili ka patur në qendër të tij rolin e Miri Hotit në skandalin e listave. Mësohet se është kërkuar rishikimi i pozicionit të Miri Hotit për deklarimet e tij lidhur me përjashtimin që i është bërë institucionit të tij në hartimin e listave, ndërkohë që Kodi Zgjedhor cilëson si të vetmin institucion në hartimin e listave zyrat e gjendjes civile. Hoti kishte shprehur edhe më parë pozicionin e tij lidhur me këtë fakt, por duket se tashmë ai jo vetëm që ka shmangur përgjegjësinë nga vetja për kaosin e listave në Durrës, por është kthyer edhe në një akuzues të KQZ, i cili është shkaktari i vetëm i asaj që ka ndodhur në ditën e votimit.

[Duke_Of_Arberia]

Edhe kesaj here KQZ-ja ashtu, me nje vesh shurdher dhe me nje sy mbyllur nxori rezultatet e "Manipuluara" te zgjedhjeve. Ekipi i PS-se me Nanon kapiten, diti te shfrytezoj mire listat e votuesve. Ata vodhen dhe kesaj rradhe ne nje menyre te shumtuar votat e lira, votat e Shqiptareve.
T'ju them te drejten revoltohem shume kur shoh qe kemi dhe ketu ne forum simpatizante te kesaj PS-je aktuale. Iku koha e idealeve, ne rradhe te pare eshte e ardhmja e vendit tone. Ne 7-vjet qeverisje kjo PS nuk ka bere gje tjeter veçse ka shtuar problemet e çdo Shqiptari, eshte rritur numri i vrasjeve, hakmarrjeve, i emigrimit, mungesa te theksuara te dritave dhe te ujit, gjithashtu po kerkojne te na "Grekezojne" dhe "Sllavezojne" etj etj. Mos harrojme qe po kthehemi 50-vjet mbrapa, ku po behemi pre e presionit dhe e dhunes se ketyre djajve. Mjaftoni te lexoni keto dy shembuj te ketyre "cubave":
1) Ja sesi i pergjigjet Luan Rama akuzes se Sali Berishes per manipulimin e zgjedhjeve nga PS-ja: "Thuajini Saliut qe nata eshte akoma e gjate".
2) Me te njejten trimeri kerkon kandidati socialist i Durresit Lefter Koka t'i tregoj dhembet nje gazetare e cila po i bente disa pyetje rreth parreullsive te verejtura ne zgjedhje: "Duhet te keni parasysh qe ne Kryebashkiaket e rinj me te ardhur ne fuqi do te na jepet e drejta te zgjedhim edhe per ju gazetaret".
Keto dy deklarata ata i kane bere drejtperdrejte ne televizor.
Ja pra, kjo eshte PS-ja e sotshme, e cila po kalon çdo limit dhe çdo llogjike...
Besoj qe çdo koment rreth zgjedhjeve te tetorit eshte i tepert, mjaftoni te lexoni keto qe shkruajta une.
Me Respekt

[Albo]

Skandali, Njësia 4, kutitë: 80 për qind të parregullta

Pasi kanë marrë në shqyrtim kutitë e votimit në këtë njësi bashkiake, komisionerët e KQZ kanë konstatuar se 80 për qind e kutive janë të parregullta. Një rast ekstrem është vërejtur në një qendër votimi, në kutinë e së cilës janë gjetur 14 procesverbale të qendrave të ndryshme. Por në këtë mes Subashi ka bërë deklarimin bombë, që këto procesverbale të merren parasysh

12 orë pune kanë mbaruar pa ndonjë rezultat për KQZ-në e Tiranës përveçse evidentimit se mbi 80 për qind të kutive të votimit të njësisë bashkiake numër 4 janë të pavlefshme. Megjithatë në mbarim të shqyrtimit të djeshëm KQZ nuk mori vendim, duke shtyrë kështu çështjen e pavlefshmërisë ose të vlefshmërisë së njësisë bashkiake numër 4. Debate, polemika dhe grindje të shoqëruara me fyerje dhe nënkuptime për manipulime u vunë re gjatë ditës së djeshme në mbledhjen e KQZ-së për shqyrtimin e dokumentacionit dhe kutive të votimit të njësisë bashkiake numër 4 të Kinostudios që nuk ishin marrë në shqyrtim nga KZQV për shkak të mungesave dhe parregullsive të theksuara në dokumentacion. KQZ dhe kryetari i saj Celibashi kanë arritur në orët e vona të pasdites në një moment të vështirë ku, të gjendur përballë një kutie pa numër të qendrës së votimit dhe pa asnjë lloj dokumentacioni sqarues, u gjetën rreth 14 proces-verbale të qendrave të ndryshme të votimit. Nga opozita kjo u quajt arkë clandestine, për shkak të origjinës dhe proces verbaleve të gjetura brenda saj. Problemi ka qenë se KQZ kishte marrë dje një vendim për të marrë në shyrtim të gjitha kutitë e 17 qendrave të votimit të njësisë bashkiake numër 4, të cilat nuk ishin marrë në konsideratë nga KZQV. Por kutia e mbushur me proces verbale nuk ka qenë e mundur të klasifikohet si kuti votimi dhe si e tillë është hedhur poshtë nga përfaqësuesit e opozitës. Kryetari i KQZ-së Celibashi ka hedhur mendimin që të shënohen numrat e serisë së proces verbaleve të gjetura në kuti, por kjo është kundërshtuar prerë nga komisionerët e KQZ-së, Dodë Prenga dhe Zguri si dhe përfaqësuesi i PD-së Ferdinand Pone. Argumentimi ka qenë se KQZ kishte marrë një vendim për të administruar vetëm kutitë e votimit dhe kodi nuk parashikonte në asnjë nen të tij që një kuti e ardhur s'dihej se nga, të merrej në administrim apo si provë. Për këtë Celibashi ka dashur të hedhë në votim propozimet e ndryshme ku më interesanti dhe më i kundërshtuari ishte ai i znj.Subashi, e cila propozoi që proces verbalet të merreshin të gjitha në considerate, edhe pse nuk dihej burimi i tyre. Ky propozim u hodh poshtë. Përfundimisht u miratua propozimi i Shimanit që kutia të rimbyllej, proces verbalet të mos shënoheshin dhe të thirrej kryetarja e KZQV-së të njësisë 4 me nënkryetarin për të dhënë sqarime se si u gjetën 14 proces verbale të qendrave të ndryshme të votimit në një kuti.


--------------------------------------------------------------------------------

Qendra e votimit 1805, vetëm kondra fletë

Skandal më pak i bujshëm ka qenë shqyrtimi i një kutie tjetër me numër 1805 në Kinostudio ku brenda kutisë së votimit janë gjetur vetëm kundra fletët që mbajnë numrat serialë të fletëve të votimit dhe asgjë tjetër. Kjo kuti u rimbyll me urdhër të Celibashit nën vëzhgimin e çuditur dhe shpotitës të të pranishmëve në sallën e KQZ-së përfshi vëzhguesit e huaj.



Njësia numër shtatë, akoma pa një përgjigje

Në minibashkinë e Njësisë nr. 7 procesi zgjedhor rrezikohet të lihet pa një përgjigje nga KQZ. Opozita ka kërkuar pavlefshmëri të procesit ndërkohë që KQZ është shprehur në parim për të administruar provat, por kjo do të ndodhë me sa duket vetëm pas mbarimit të shqyrtimit të dokumenteve për bashkinë e madhe të Tiranës. Njësia bashkiake numër 7 ka qenë e paralajmëruar për dje për t'u marë në shqyrtim nga KQZ, por problemet e hasura në njësinë bashkiake numër 4 nuk lejuan KQZ të bëjë një gjë të tillë. Pas vendimit të djeshëm që sot paradite të fillojë të shqyrtohet procesi i bashkisë së madhe, minibashkitë e mbetura mes të cilave edhe njësia numër 7, duket se do të presin pa afat për të kuptuar nëse do të quhet procesi zgjedhor i rregullt apo jo.

[Albo]

Njësia 6: 90 për qind e kutive, të parregullta

Dje është marrë në shqyrtim nga KQZ kjo njësi. Mësohet se nga 30 qendra votimi që ka ajo, 27 janë të parregullta. Në një qendër votimi, atë me numër 1881, nuk është gjetur asnjë fletë votimi në kuti, ndërkohë që në shumë të tjera janë gjetur shifra qesharake fletësh votimi. Në pjesën dërrmuese fletët e papërdorura nuk janë kthyer mbrapsht

Komisioni Qëndror i Zgjedhjeve ka marrë në shqyrtim njësinë bashkiake numër gjashtë, një nga njësitë bashkiake më problematike. Ata kanë shikuar të gjithë qendrat e votimit, për të konstatuar nëse ato kanë tabela rezultatesh dhe fletë votimesh. Në këtë qendër nuk ka asnjë firmë të komisionerëve të opozitës në tabelën e rezultateve përfundimtare pas rinumërimit të votave. Sipas komisionerëve të KZQV-së së kësaj njësie, 90 për qind e qendrave të votimit i kanë dorëzuar fletëvotimet e papërdorura si dhe vulat dorazi dhe jo të mbyllura në kutitë me kapse plastike, të cilat kanë dhe Kodet e Sigurisë. Në këtë njësi janë vërejtuar dhe raste ekstreme të manipulimeve.

Kështu në qendrën e votimit numër 1881 nuk është gjetur asnjë fletë votimi në kutinë e dorëzuar. Numri i votuesve në listën e kësaj qendre votimi është 1060, numri i fletëve të votimit të marra në dorëzim është 1100, numri i fletëve të votimit të papërdorura janë 691 dhe numri i fletëve të votimit të gjetura në kuti është zero, rrjedhimisht dhe rezultati ka duhet të ishte zero për qind.

Në këtë njësi bashkiake ka kandiduar për Partinë Demokratike, Fatmir Nezaj dhe për Partinë Socialiste, kandidati i mëparshëm, Irfan Dashi.

Në një tjetër qendër votimi të marrë shqyrtim, numri i fletëve të vlefshme të votimit ka qenë qesharak. Por nëse në qendrën e votimit të sipërpërmendur nuk ishte gjetur asnjë fletë e vlefshme, këtu ka pasur tri të tilla. Bëhet fjalë për qendrën e votimit numër 1859. Numri i votuesve në këtë njësi është 849, fletët e votimit që janë marrë në dispozicion kanë qenë 900 dhe numri i fletëve të gjetura në kuti ka qenë 3. Sigurisht që rezultati përfundimtar i pjesëmarrjes në votim është shënuar teknikisht me numrin tre që përputhet me proces verbalin e mbajtur nga KZQV e njësisë.

Rastet vijojnë me qendrën e votimit numër 1863, e cila ka gjithsej 1367 votues, dhe ku kanë votuar 31 vetë gjithsej. Gjithashtu në këtë njësi nuk janë kthyer fletët e papërdorura dhe janë cilësuar të pavlefshme kondra-fletët. Në fletoren e proces-verbaleve të kësaj KZQV-je është shënuar se nga 30 qendra votimi që ka kjo njësi, në 27 prej tyre tabelat e rezultateve rezultojnë në mosrakordim midis numrit të fletëve të votimit, e shprehur kjo sipas atyre që komisionerët shkruajnë në procesverbal, me numrin e atyre që kanë votuar. Ndër më problematiket janë vlerësuar qendrat e votimit numër 1872, 1878 dhe 1879 të kësaj njësie. Në të tre këto qendra votimi bie në sy mbushja me mangësi të theksuara e Tabelës së Rezultateve të Votimit, pasi shifrat e shënuara nuk përkojnë me kontrollin që i bëhet numrit të fletëve të papërdorura, numrit të votuesve, fletëve të votimit të gjetura në kuti dhe fletëve të kontestuara. Në të tre këto raste, materialet kanë ardhur dorazi në KZQV vetëm nga anëtari i KZQV, i Partisë Socialiste dhe janë futur në kuti e janë koduar nga prurësi i tyre në prezencë të KZQV. Nuk janë shënuar asnjë prej kodeve të sigurisë së kutive kur janë hapur apo mbyllur në procesin e numërimit të votave. Komisionerët e opozitës të KZQV së njësisë Nr.6 kanë deklaruar se për këto arsye nuk kanë pranuar të firmosin tabelën e rezultateve përfundimtare të zgjedhjeve për kryetar të Njëisë Bashkiake.

Disa nga shkeljet e evidentuara nga KZQV për njësinë bashkiake gjashtë

-Në Qendrat e Votimit Nr.1862, 1864, 1872 mungon lista e zgjedhësve

-Në qendrën e votimit Nr.1866 mungon vula, lista e zgjedhësve dhe 18 fletë të paklasifikuara

-Në qendrën e votimit Nr.1869 mungon libri i procesverbaleve të Qendrës së Votimit, fletët e votimit të papërdorura ndërkohë që kundrafletët janë lënë në fletët e votimit

-Në qendrën e Votimit Nr.1876 mungojnë 21 fletë votimi të paklasifikuara dhe fletët e votimit me të cilat është votuar janë bashkë me kundrafletët

-Në Qendrën e Votimit Nr.1801 mungojnë 54 fletë votimi të klasifikuara "të dëmtuara" nga KQZ

-Në qendrën e Votimit Nr.1859 mungojnë 274 fletë votimi të deklaruara nga KQZ "të votuara"

-Në qendrën e votimit Nr.1863 mungojnë 449 fletë votimi të deklaruara nga KQZ "të votuara"

-Në qendrën e votimit Nr.1858 mungon lista e zgjedhësve dhe dy fletë votimi të paklasifikuara

-Në Qendrën e Votimit Nr.1881 mungojnë 409 fletë votimi të klasifikuara nga KQV si vijon:



- fletë votimi të vlefshme 380

- fletë votimi të pavlefshme 12

- fletë votimi të parregullta 13

- fletë votimi të dëmtuara 3