Manipulimet e zgjedhjeve!

[Albo]

Dhërmi: Kutia 110 vota, tabela e KZQV 605 vota

Rezultati i PS, Bollano 41 vota, Goro 519

Kutia me numër 4585 e Dhërmiut do të mbetet e shënuar si rasti më i veçantë i zgjedhjeve në Himarë dhe në gjithë Shqipërinë. Numri i votuesve kishte qenë 605 persona, fletët e gjetura në kuti sipas tabelës së hartuar pas rrahjes së komisionerit të PD-së 519 dhe rezultati 478 për kandidatin Goro dhe vetëm 41 vota për Bollanon. Por hapja e kutisë së votimit ka treguar se në këtë fshat nuk kanë votuar më shumë se 110 persona, çka vërteton thirrjet për manipulime dhe denoncimet e shumta të opozitës për mosnjohje të rezultatave të zgjedhjeve në këto qëndra votimi.


--------------------------------------------------------------------------------

Qeparo: Kutia 71 vota, tabela e KZQV 250 vota

Rezultati i PS, Bollano 0 vota, Goro 250 vota

Qeparo, fletë votimi të gjendura në kuti 250, të pavlefshme 19; rezultati: PS 250, subjektet e tjera 0. Ky ka qenë deklarimi i tabelës së rezultatit të qendrës së votimit në Qeparo fshat nga përfaqësuesi i PBDNJ-së në KQZ, në një kohë që pas hapjes së kutisë janë gjetur vetëm 71 vota brenda saj. Në një moment tejet të ndezur të situatës së pyetjeve mes përfaqësuesve të subjekteve politike dhe anëtarëve të KZQV-së, aritmetika e thjeshtë ishte hartuar kur edhe zbritja e fletëve të pavlefshme të votimit të shënuara në tabelë nuk ishte bërë. Në këtë gjendje ka qenë kutia e votimit të fshatit Qeparo në momentin e mbërritjes në KQZ ku kryetari i KZQV-së së Himarës është shfajësuar vetëm me trajnimin e dobët të komisionerëve dhe ndërrimin e tyre të herë pas hershëm nga partitë politike.

Situata e djeshme në KQZ ka qenë sa qesharake aq edhe tragjike, sepse gabime të tilla kanë patur precedent procesin e Tiranës ku Celibashi dhe katër anëtarë të tjerë të KQZ-së kanë marë si të vlefshme edhe fakte të tilla.


--------------------------------------------------------------------------------

Pilur, kutia 76 vota, tabela e KZQV 140 vota

Rezultati i PS, Bollano 27 vota, Goro 102 vota

Në qendrën e votmit Pilur, që në fillim të procesit zgjedhor nënkryetari i PD-së nuk u lejua që të firmosë fletët e votimit. Në këtë mënyrë të gjitha fletët e votimit të gjendura në kuti kanë vetëm firmën e kreut të QV-së duke e kthyer kështu procesin në një masë fletësh të pavlefshme sipas ligjit. Kjo është bërë për manipulimin e rezultatit që siç rezultoi nga tabela e rezultatit, nga 76 veta që kishin marrë pjesë në votime u gjetën 140 fletë votimi.


--------------------------------------------------------------------------------

KQZ: Rinumërimi nxjerr fitues Bollanon

KQZ është detyruar të shpallë dje kandidatin e PBDNJ-së Vasil Bollanon si kryetar të Himarës dhe të rrëzojë rezultatin e KZQV-së së Himarës që shpall Gjergji Goron, kreun e bashkisë Himarë. Të gjitha rezultatet e nxjerra pas rinumërimit të votave në fshatrat Qeparo, Pilur, Dhërmi kanë treguar një manipulim të frikshëm me rezultatin e tabelave të rezultateve nga ana e PS-së dhe komisionerëve të saj, njëlloj si në rastin e Tiranës.

E rëndësishme dhe vendimtare duket të ketë qenë prania dhe presioni i ndërkombëtarëve ndaj kreut të KQZ-së dhe anëtarëve të tij socialistë për të pranuar hapjen e kutive të votimit në sy të të gjithë të pranishmëve. Hapja e kutive ka nxjerrë në dritë gjithë të vërtetën për Himarën dhe ka zbuluar skandalin shtetëror me zgjedhjet në Himarë që u denoncua dje publikisht nga ballafaqimi i tabelave të rezultatave të hartuara nga KZQV e Himarës me kryetar socialist dhe rezultatit real të gjendur në kuti, pas rinumërimit të votave nga KQZ.

Kështu në Dhërmi para rinumërimit PS kishte marrë 478 vota ndërkohë që pas rinumërimit në kuti u gjetën vetëm 70 fletë votimi të gjitha në favor të Bollanos së PBDNJ-së.

Po kështu në fshatin Qeparo, nga rezultati 250 me 0 që u tregua në tabelat e rezultatit të hartuar në zyrat e KZQV-së Himarë në favor të PS-së, rinumërimi tregoi se asnjë votë nuk ishte për PS-në dhe vetëm disa dhjetëra fletë votimi të gjetura në kuti ishin pro Bollanos. Duke mos patur asnjë kornizë të mundshme ikjeje, KQZ u detyrua të pranojë rezultatin në favor të Bollanos me 1317 vota kundrejt vetëm 882 votave të Goros.

[krokodili_73]

ky eshte nje muhabet i brendshem:.....

Pasi zgjedhjet kishin perfunduar nje grup idhtaresh te tij te merzitur e pyeten avokat Ngjelen: Po si na ndodhi kjo pune o avokat. Ngjela filloi ti shpjegoje per listat, per fletet e votimit etj etj. Po mos na caloi pak edhe fushata, sidomos ne ditet e fundit, e pyeti me pas plot ndrojtje nje nga pasuesit e tij. Ngjela u mendua pak. Pastaj thirri: konstatim i drejte dhe une do tu shpjegoj pse ka ndodhur. Une pashe ne emisionin apostrof Mustafa Nanon te thoshte se : Ngjela ka mundesi ta fitoje Tiranen po aq sa ka mundesi te flere me Xhenifer Lopezin dhe me qe kjo e dyta kishte ndodhur e mblodha mendjen edhe per fushaten.

[krokodili_73]

dhe nje muhabet tjeter i brendeshem qe sapo me erdhi, ky eshte i fundit per sot se agjentet marin pushim per weekend.

Avokat Ngjela po u shpjegonte nje tufe fansash se rivali i tij e kish vjedhur ndjeshem ne zgjedhjet e fundit lokale. U fut si ariu ne dyqanin e qelqurinave dhe la edhe gjurme. Per fatin tim i la vazhdonte avokati, se e bene manipulimin edhe ata ne Durres, po e bene si ne laborator, nuk ke ku tu kapesh asnje shenje. Po si ka mundesi o avokat qe ky Rama me gjithe ata njerez me vete dhe nuk arriti ta beje manipulimin paster e pyeten fansat. U a shpjegoj une vazhdoi avokati. Ai deshtoi se i dha njerezve te tij nje ekuacion me kater te panjohura. 1- Rama duhet te dale njezete pike para Ngjeles. 2- Rama duhet te dale dhjete pike mbi PS. 4- PS dhjete pike mbi PD. Dhe Ngjela duhet te dale dhjete pike poshte PD. A ka hajdut qe di ta zgjidhe kete ekuacion, i pyeti ata qe kishte rrotull vetes avokati.

[Albo]

Tabelat, shpërndarja e votave jashtë logjikës së shifrave

Në tabelat e rezultateve të mbajtuar në qendrat e votimit në Tiranë, shumë shpesh votat e vlefshme që deklarohen për votimin për kryetar dhe për subjekte, janë shumë të ndryshme nga votat që u shpërndahen subjekteve dhe kandidatëve në garë. Madje në disa raste numri i votave të vlefshme është mbi dy herë më i madh se numri i votave që janë shpërndarë.

Qendra e votimit 1969

- Numri i votuesve në listën e qendrës; 1026

- Numri i votuesve që kanë votuar; 482

- Numri i fletëve të gjetura në kuti; 964

- Numri i fletëve të vlefshme; 927

- Numri i votave të vlefshme për kryetar; 221

- Numri i votave të shpërndara për kryetar; 484

Në këtë qendër votimi numri i atyre personave që kanë votuar është shumë më i vogël se numri i votave të vlefshme. Kështu kur aty kanë votuar vetëm 482 persona, numri i fletëve të vlefshme është 927, pra rreth dy herë më shumë se numri i votuesve. Kurse kur deklarohet se janë të vlefshme gjithsej 927 vota, për kryetar shënohet sikur janë të vlefshme vetëm 221 vota pra mungojnë 706 vota. Gjithashtu kur thuhet se janë të vlefshme 221 vota, kandidatëve për kryetar u janë shpërndarë 484, pra 263 vota më shumë.


--------------------------------------------------------------------------------

Qendra e votimit 1704

- Numri i votuesve në listën e qendrës; 1375

- Numri i votuesve që kanë votuar; 413

- Numri i fletëve që janë gjetur në kuti; 1400

- Numri i fletëve të vlefshme; 382

- Numri i fletëve të papërdorura; 970

- Numri i fletëve të dëmtuara; 14

- Numri i votave të vlefshme për kryetar; 382

- Numri i votave të shpërndara për kryetar; 383

- Numri i votave të vlefshme për subjekt; 382

- Numri i votave të shpërndara për subjekt; 413

Në këtë qendër votimi, në kuti është gjetur një numër mjaft i madh fletësh votimi, edhe pse është deklaruar se kanë votuar 413 persona. Kështu në kuti janë gjetur gjithsej 1400 fletë, ndërkohë që janë shpallur të vlefshme, 383 të tilla. Po kështu manipulimi i shifrave del dhe me krahasimin që u bëhet fletëve të përdorura në krahasim me ato që janë marrë në dorëzim. Kështu në dorëzim janë marrë vetëm 1400 fletë, por vetëm në kuti janë gjetur kaq, pa llogaritur këtu numrin e fletëve të papërdorura dhe të dëmtuara. Shpërndarja e votave për kryetar dhe për subjekt është krejt e ndryshme nga votat që janë cilësuar të vlefshme. Pasi deklarohet se janë gjithsej 382 vota të vlefshme, rezulton se janë shpërndarë për kryetar 383 vota dhe për subjekt 413.


--------------------------------------------------------------------------------

Qendra e votimit 1749

- Numri i votuesve në listën e qendrës; 1028

- Numri i votuesve që kanë votuar; 490

- Numri i fletëve që janë gjetur në kuti; 490

- Numri i fletëve të vlefshme; 901

- Numri i fletëve të pavlefshme; 79

- Numri i votave të vlefshme për kryetar; 467

- Numri i votave të vlefshme për subjekt; 434

Në këtë qendër votimi numri i fletëve që janë cilësuar si të vlefshme është shumë më i madh se numri i votuesve që kanë votuar dhe se numri fletëve që janë gjetur në kuti. Kështu kur thuhet se kanë votuar 490 persona dhe se janë gjetur në kuti po 490 vota, në tabelë shënohet se janë të vlefshme gjithsej 901 vota. Edhe votat e vlefshme për subjekt dhe kryetar janë shumë më pak se numri i fletëve që janë cilësuar si të vlefshme në total.


--------------------------------------------------------------------------------

Qendra e votimit 1992

- Numri i votuesve në listën e qendrës; 782

- Numri i votuesve që kanë votuar; 266

- Numri i fletëve të gjetura në kuti; 534

- Numri i fletëve të vlefshme; 532

- Numri i votave të vlefshme për kryetar; 532

- Numri i votave të shpërndara për kryetar 259

Në këtë qendër votimi numri i atyre që kanë votuar është shumë më i vogël se numri i fletëve që janë shpallur të vlefshme dhe se numri i fletëve që janë gjetur në kuti. Shpërndarja e votave dhe këtu është bërë në mënyrë ekstreme. Kështu kur deklarohet se janë gjithsej 532 vota të vlefshme për kryetar, rezulton se janë shpërndarë për kandidatët vetëm 259 vota, pra 273 vota më pak.


--------------------------------------------------------------------------------

Qendra e votimit 1860

- Numri i votuesve në listën e qendrës; 1282

- Numri i votuesve që kanë votuar; 408

- Numri i fletëve të gjetura në kuti; 816

- Numri i fletëve të vlefshme; 708

- Numri i votave të vlefshme për kryetar; 770

- Numri i votave të shpërndara për kryetar; 384

- Numri i votave të vlefshme për subjekt; 711

- Numri i votave të shpërndara për subjekt; 373

Në këtë qendër votimi numri i atyre që kanë votuar është shumë më i vogël se numri i votave që janë gjetur në kuti dhe që janë shpallur të vlefshme. Por numri i votave që janë shpallur të vlefshme në përgjithësi është më i vogël se numri i votave që janë shpallur të vlefshme për kryetar. Pra kur thuhet se janë të vlefshme 708 fletë, rezulton se ka gjithsej të vlefshme për kryetar 770 vota. Por çudia vazhdon dhe më tej, pasi kur thuhet se janë të vlefshme për kryetar 770 vota, u janë shpërndarë kandidatëve 384 vota. Kurse në rastin e votave për subjekt, kur deklarohet se janë gjithsej të vlefshme, të shpallura 711 vota, u shpërndahen subjekteve 373 vota.


--------------------------------------------------------------------------------

Qendra e votimit 1758

- Numri i votuesve në listën e qendrës; 785

- Numri i votuesve që kanë votuar; 289

- Numri i fletëve që janë gjetur në kuti;

- Numri i fletëve të vlefshme; 578

- Numri i votave të vlefshme për kryetar; 578

- Numri i votave të shpërndara për kryetar; 289

Në këtë qendër votimi kanë votuar gjithsej 289 persona, ndërkohë që numri i fletëve të vlefshme është shumë më i madh se numri i atyre që kanë votuar, rreth dy herë më i madh. Çudia e shifrave ndodh dhe më votat që janë shpërndarë për kryetar. Kështu deklarohet se janë gjithsej 578 vota të vlefshme për kryetar, kurse kandidatëve u janë shpërndarë gjithsej 289 vota.

[Albo]

Përsëritje e pjesshme e zgjedhjeve në Tiranë


Kolegji Zgjedhor i Gjykatës së Apelit në Shqipëri ka vendosur përsëritjen e zgjedhjeve për kryetarin e bashkisë së Tiranës në 130 qendra votimi nga 340 qendra ku u votua më 12 tetor të këtij viti.

Ndërsa protestuesit e opozitës kishin mbërritur përpara selisë së kryeministrisë, turma brohoriti fuqishëm.

Sipas vendimit, rezultati i zgjedhjeve në këto qendra është i pavlefshëm pasi ka patur parregullsi në procesin zgjedhor.

Përfaqësuesi i opozitës, Spartak Ngjela i cili ishte ankuar para këtij kolegji tha se ky vendim provoi manipulimin e zgjedhjeve nga ana e maxhorancës.

Por kryetari i PS-së për Tiranën, Musa Ulqini i cili ka drejtuar fushatën e kandidatit të maxhorancës, Edi Rama tha se qendrat e shpallura të pavlefshme janë vepër e opozitës.

Rezultati i zgjedhjeve lokale të 12 Tetorit i cili për shkak të kundërshtimeve midis maxhorancës dhe opozitës u shpall një muaj me vonesë, nxori fitues Edi Ramën me 58 për qind të votave, kundrejt 38 për qind të kundërshtarit të tij, Spartak Ngjela, i cili asnjëherë nuk u pajtua me këtë rezultat.

Sipas disa specialistëve matematikisht ekziston mundësia që rezultati të ndryshojë.

Tashme pritet që Komisioni Qendror i Zgjedhjeve të shpallë datën e përsëritjes së zgjedhjeve, por duket se ka pak gjasa që ato të mbahen brenda këtij viti.

[Albo]

Ata qe manipulojne zgjedhje lokale apo te pergjithshme, nuk e kane per gje te manipulojne edhe zgjedhje brenda organizmave te partise. Kesaj here akuzat per kryesine e socialisteve vine nga vete deputetet socialiste.

Vlorë, Alushi: 100 anëtarë nuk votuan, 90 për qind e fletëve të pavlefshme

Deputeti vlonjat tha se Nano së bashku me Arben Malaj dhe Mezan Malaj kishin organizuar një votim të manipuluar, gjatë të të cilit 90 për qind e fletëve dolën të pavlefshme, ndërkohë që 100 anëtarë lanë sallën pa votuar, pasi u kërcënuan me jetë. Alushi tha se personi që e kishte kërcënuar në sallë ishte dënuar për përdhunimin e një të miture

Deputeti socialist, Eduart Alushi deklaroi se konferenca e qytetit të Vlorës ishte manipuluar në mënyrë të dukshme nga treshja Fatos Nano, Arben Malaj dhe Mezan Malaj. Ai tha se 90 për qind e fletëve të votimit ishin të pavlefshme. "Përfaqësia e konferencës, pasi hoqi padrejtësisht nga lista për t'u votuar përfaqësues në zë të zonave të ndryshme të rrethit të Vlorës, vendosi në shkelje të statutit të pranojë si delegatë të kongresit me konsensus ministrat Arben Malaj dhe Besnik Dervishi. Ministri Dervishi dihet plotësisht që në historinë e socialistëve vlonjatë nuk ka asnjë kontribut dhe asnjë tagër përfaqësimi. Grupi i fundit i delegatëve të Vlorës doli me rreth 53-55 vota, të cilat nga burime të sigurta ishin të plotësuara në kulisa dhe iu shtuan kutisë së votimit. Eshtë verifikuar që 90% e fletëve të votimit të manipuluara si të pavlefshme, ishin fletë që mes të tjerëve votonin edhe deputetët Eduard Alushi dhe Sabit Brokaj," tha Alushi.

"Megjithatë lista e delegatëve të Vlorës denoncon fakte të rënda, si psh., rreth 25% e personave aty kanë lidhje gjaku me njëri-tjetrin dhe rreth 50% e tyre kanë lidhje familjare të afërta me njëri-tjetrin," vazhdoi ai. Sipas tij rreth 100 anëtarë nuk arritën që të votonin pasi të kërcënuar u detyruan që të linin sallën. Alushi tha se personi që kishte synuar që të konfliktohej me të gjatë konferencës, sapo ishte liruar nga burgu, ku ndodhej nën akuzën e përdhunimit të të miturës brenda familjes, dhe quhet Mane Curri.

"Kritikova kryeministrin Nano për mungesën e vullnetit për memorializimin historik të kontributeve dhe sakrificave të Vlorës veçanërisht të vitit 1997, për premtimet spekullative të tipit shou që fillojnë me premtimin për rikthimin 100% të parave të piramidave, deri tek premtimet për investime mbi 1 miliard dollarë në Vlorë për 3 vjet. Theksova gjithashtu se Vlora nuk duhet njollosur duke deklaruar 100 milion dollarë fitime nga trafiku i skafeve, sepse përgjegjësinë nuk e kanë vlonjatët, por qeveritarët e korruptuar që shfrytëzuan Vlorën për interesa të tyre. Përmenda faktin që edhe gjatë qeverisë së tij në 1997-1998, janë mbështetur politikisht shefa policie trafikant si Gjon Abazi dhe Sokol Koçiu," tha Alushi.

[Albo]

Bemat e manipulimeve te turpshme dhe skandaloze te votave ne Shqiperi kane shtangur edhe vete kreret e BE qe e bejne mese te qarte se sa besim kane tek ajo klike qe sot udheheq institucionet shqiptare.

Brukseli humbet durimin me Tiranën

Kris Paten: Zgjedhjet kishin probleme ndërsa reformat janë ngadalësuar. Qeveria shqiptare na ka shpenzuar shumë kohë dhe energji

Priebe: "Në Himarë ne kishim vëzhguesin tonë, i cili numëroi 70 vetë gjithësej që votuan, ndërsa rezultati doli 240 vota për Partinë Socialiste. Në një vend ku ndërrohen pesë drejtorë doganash brenda vitit, duhen shumë arsye të forta për të të bindur se nuk ka probleme”

[Albo]

Vendimi i Kolegjit Zgjedhor ne menyre te drejtperdrejte ben KQZ me faj qe eshte i denueshem moralisht dhe ligjerisht. Por ustallaret e KQZ mundohen qe kete faj qe bie mbi ta tua delegojne KZQV te Tiranes, duke e shkarkuar ate.


Celibashi shkarkon anëtarët e KZQV-së Tiranë

Me anë të formulës 5 me 2, Celibashi vendosi që të shkarkojë dhe të kërkojë ndjekje penale për KZQV-në, pasi kjo e fundit kishte nxjerrë mbi 200 qendra votimi të pavlefshme, kurse Kolegji shpalli të pavlefshme 130 qendra. Celibashi kërcënoi sërish anëtarët opozitarë dhe i quajti rrugeçër protestuesit e opozitës

Komisioni Qendror i Zgjedhjeve me një vendim të posaçëm shkarkoi KZQV-në e Tiranës, dhe kërkoi që ajo të ndiqej penalisht. Argumenti i KQZ për shkarkimin ka qenë vendimi i Kolegjit Zgjedhor, i cili nxori të pavlefshme 130 qendra votimi dhe jo mbi 200 aq sa kishte nxjerrë në vendimin e saj KZQV-ja e Tiranës. Edhe për këtë vendim funksionoi skema e pesëshes, ndërsa me shumicë të thjeshtë katër me tre u vendos që anëtarët e KZQV-së të kalojnë për ndjekje penale. Ilirjan Celibashi në një gjendje shumë të tensionuar ka arritur deri në atë gjendje sa ka fyer protestuesit duke i quajtur ata rrugeçër, që mblidhen para KQZ-së, ndërsa anëtarët e opozitës në KQZ dhe përfaqësuesin e PD-së, Ferdinand Pone, i ka quajtur pjesë të tyre. Ai u ka thënë atyre se po të dojë mund të bëjë që t'u dridhet toka poshtë këmbëve. Kjo ka qenë pika e cila ka derdhur gotën e durimit dhe Pone, në mbështetje të minorancës në KQZ dhe vetes së tij, ka kërkuar dorëheqjen e Celibashit, i cili ka ushtruar terror mbi anëtarët e KQZ-së, KZQV-së së Tiranës dhe kolegët e tij për këmbënguljen dhe votën e tyre kundër dëshirës së tij, pavarësisht se ai në shumicën e kohës ka votuar gjithmonë kundër interesave të opozitës me formulën e vjedhur 5 me 2 dhe për këtë nuk ka patur asnjë personalizim. Pone i ka kujtuar Celibashit se akuzohej si anëtar politik i "Hakmarrjes për Drejtësi", gjë të cilën nuk e ka përgënjeshtruar ende. Kjo fjali e Pones dhe kërkesa e tij për dorëheqje të Celibashit nga kreu i KQZ-së kanë nevrikosutr kaq shumë kreun e KQZ-së sa ai ka kërcënuar si Ponen ashtu edhe anëtarët e tjerë të KQZ-së, të cilët më pas kanë patur edhe vizita nga vëzhguesi ndërkombëtar Dickson Baily që është shokuar nga atmosfera e ndezur e mbledhjes së KQZ-së. Të gjithë anëtarët e KZQV-së së Tiranës janë shprehur dje menjëherë pas vendimit të KQZ-së se nuk ishin aspak të çuditur nga vendimi i KQZ-së, pasi ata shpesh ishin kërcënuar dhe sharë publikisht si "gangsterë" nga kryetari i institucionit që pretendohet të administrojë zgjedhjet, - KQZ-ja. Një tjetër vatër e nxehtë diskutimesh ka qenë problemi i listave zgjedhore, problem i cili ende është lënë pezull nga KQZ. Me një vendim të djeshëm që nuk shkruan se është për lista përfundimtare, KQZ ka vendosur që të bëjë shpalljen e listave të votimit nëpër lagjet e Tiranës ku do të zhvillohet ripërsëritja e 28 dhjetorit.

[Albo]

Kesaj here akuzat per manipulime nuk vijne nga opozita, as nga komuniteti nderkombetar, as mbi zgjedhjet lokale. Akuzat per manipulime vijne nga kreret me te larte te PS dhe behet fjale per votimin e kandidateve per kongresin e PS. Nano serrisht nen akuze per manipulime, kesaj here nga partia e tij.

Nano anullon delegatët e Tiranës

Mark Nikolli njoftoi dje publikisht se po shikon mundësinë e anullimit të rezultatit të votimit në Konferencën e Tiranës, e cila shkatërroi imazhin dhe fuqinë e kryetarit të PS, Fatos Nano. Ai tha se nëse nuk vihen në dispozicion fletët e votimit, do jetë kongresi që do vendosë për fatin e delegatëve. Reagon Ulqini: Ky është manipulim skandaloz. Ago: Presion për të zgjedhur delegat Emin Barçin

Kryetari i Komisionit Qendror të Garancive Statutore, Mark Nikolli, tha dje se është në prag të pezullimit të rezultateve të votimit të delegatëve në konferencën e Tiranës të PS-së. Ai tha se kanë shqyrtuar një ankesë të tre kandidatëve për delegatë në kongres dhe është vendosur që të verifikohen fletët e votimit. Por Nikolli u shpreh se drejtuesit e Partisë Socialiste, dega Tiranë nuk po vënë në dispozicion materialet e nevojshme zgjedhore të konferencës. "Ne morëm në shqyrtim një ankesë që është depozituar që dje nga tre kandidatë për delegatë në kongresin e partisë, të votuar në konferencën e Tiranës. Me gjithë kërkesën e herë pas hershme, grupi i punës, i ngritur në mënyrë të posaçme për verifikimin e këtij problemi është mbledhur tre herë. Në komision në fillim u vendos në dispozicion i deleguari i kryesisë në konferencë Arben Malaj. Ishin prezent kryetari dhe sekretari i komisionit të numërimit të votave, Rajmonda Stefa dhe sekretari Petrit Ago, ndërkohë kur komisioni gjykoi se duhet të vlerësohet pjesa e kontestuar nga tre kandidatët, domethënë verifikimi i fletëve të votimit të pavlefshme, nënkryetari dhe kryetari i Partisë Socialiste të Tiranës, i cili e ka për detyrë të drejtpërdrejtë të vërë në dispozicion materialet e votimit, deri në këtë moment nuk ka asnjë reagim nga ana e trye. Ata nuk i janë përgjigjur me korrektesë procedurave. Në këtë kuptim ne vazhdojmë punën për verifikimin e procedurës së verifikimit të ankesës, dhe jemi në punë e sipër dhe presim verifikimin e drejtuesve të PS-së së Tiranës. Unë do u bëja thirrje të dalin nga bunkeri, të realizojnë detyrat e tyre institucionale. Drejtuesit e PS-së së Tiranës po indikojnë një problem shumë serioz, duke orientuar dhe detyruar komisionin drejt marrjes së këtij vendimi, që do të thotë pezullimin e mandatimit të 54 delegatëve të Tiranës, për pjesëmarrje në kongres. Meqë kongresi është shumë afër, të drejtën e vet KQGS do ia kalojë kongresit të partisë," tha Nikolli.

Menjëherë pas fjalës së Nikollit ka reaguar dhe kryetari i PS-së së Tiranës, Musa Ulqini, i cili është shprehur se nuk është aspak në burg, por ndodhet vetëm pak metra qendrës ku kryen aktivitetin e tij ky komision. Ulqini u shpreh se Nikolli po kërkon që të hedhë baltë mbi konferencën e PS, pasi procedura e votimit ishte e rregullt, dhe rezultatet gjithashtu. Ulqini deklaroi se nuk është i detyruar që të shkojë dhe të takojë Nikollin. Ndërkohë sekretari i komisionit të numërimit të votave, Petrit Ago tha Nikolli po kërkon që të bëjë presion, pasi votimi ishte totalisht i rregullt. Ai u shpreh se e gjithë kjo zhurmë po bëhet që të pranohet dhe të fitojë të drejtën e delegatit Emin Barçi, i cili nuk u zgjodh nga anëtarët e kësaj konference. Ai tha se deri tani është bërë një shkelje mjaft e rëndë pasi fletët e votimit kanë qëndruar në selinë e PS-së, duke mos mohuar në këtë mënyrë dhe tentativat për manipulim. I deleguari i kryesisë në këtë konferencë është shprehur se duhet që kutitë e votimit, të vihen në dispozicion për hetim.

Tema

[Albo]

Braho: Kongresi ka tendenca për manipulim

Nevila Përndoj

TIRANE - Deputeti socialist, Spartak Braho deklaroi dje se procesi i votimit për kryetarin e PS-së kishte tendenca për manipulim. Gjatë një deklarimi për mediat, Braho sqaroi se dy prej anëtarëve të komisionit ishin ata të cilët kishin ushtruar dhunë mbi kryetarin e PS-së së Durrësit, Leonidha Germenji, pak ditë më parë. Për këtë arsye, Braho e la të hapur çështjen nëse ai dhe kolegët e tjerë do të pranonin procesin e votimit për kryetarin e PS-së apo edhe për anëtarët e KPD-së. Braho shtroi se procesi i fillimit të votimit nuk ishte normal. Ai theksoi se nga ana e përfaqësuesve të kryetarit socialist, Fatos Nano pati edhe tendencë për përjashtimin nga komisioni të përfaqësuesve të dy kandidatëve për postin e kryetarit të PS-së, Rexhep Meidani dhe Edi Rama. “U desh ndërhyrja ime tek sekretari i përgjithshëm i PS-së, Gramoz Ruçi që situata të normalizohej”, -shtoi ai. Braho theksoi gjithashtu se mbështetës të kryetarit socialist Fatos Nano po ushtronin presion mbi delegatët lidhur me anëtarët e Komitetit të Përgjithshëm Drejtues. Duke komentuar procesin e votimit të mbrëmshëm, Braho shtoi se pas votimit nuk mund të pritet ndonjë gjë e re nga ajo që është parashikuar kohë më parë. “Nuk pritet ndonjë gjë e re. Tashmë kryetari socialist, Fatos Nano ka një mendim delirant për të fituar me çdo kusht postin e kryetarit të PS-së”, -tha ai. Braho theksoi se, “mendimi ndryshe u fshi në mënyrë arbitrare në kongresin e djeshëm duke sjellë edhe një kongres problematik”. Deputeti socialist shtoi gjithashtu se në kongresin e 6-të socialist kishte rreth 380 nëpunës të lartë të pushtetit socialist.


Bizhga: S’ka manipulime
TIRANE - Ndërsa deputeti socialist, Gazmir Bizhga mohoi dje të jetë manipuluar procesi i votimit. “Procesi i votimit po funksion krejtësisht normal dhe i hapur. Nuk pati gjithashtu kontestime për përbërjen e komisionit”, -tha ai. Bizhga sqaroi se procesi i votimi po paragjykohet nga ata delegatë që, sipas tij, e kanë të sigurtë humbjen. “Paragjykimi i procesit të votimit vjen sepse në rast të humbjes së pritshme ata ta justifikojnë këtë humbje si rrjedhojë e një procesi të manipuluar”, -shtoi ai.