Urime Krishtlindjet!

[Shpresmiri]

Në shumë mënyra Zoti është zbuluar në të kaluarën, dhe në shumë mënyra mund ta zbulojmë, por me anë të Jezu Krishtit është zbuluar përfundimisht. Ai ka ardhë ndër ne. Ai na ka tregu fytyrën e vet me anë të fytyrës njerëzore të Jezu Krishtit. Në këtë mënyrë na është afruar aq afër shikimit tonë, e megjithatë e ka ruajtur misterin që i takon qenies së tij hyjnore. Pikërisht me ngjarjen e mishërimit të Jezu Krishtit, na shpie brenda Misterit të Tij.
Jezusi ka ardhur tek ne për të na treguar sa na do. Kjo është dhurata e tij për ne. Së bashku me të më lehtë do ta kemi në jetë, më lehtë do të arrijmë tek Ati.
Në këtë Ditë përkujtojmë se si Zoti i madh bëhet Zoti i vogël, të cilin nuk e kanë pranuar njerëzit egoistë dhe për këtë arsye ka lindur në varfëri; për këtë arsye është mbështjellë me shpërngëj dhe vendosur në grazhd; që dridhet nga të ftohtit. Nga të ftohtit e natyrës dhe të njerëzve... që të gjithë të vegjëlit të mund të vijnë tek ai, që me vogëlsinë e vet, së bashku me të dhe nëpër të, të bëhemi të mëdhenj: bijtë dhe bijat e Zotit.
Grazhdi, i ftohtë, i ndotur, me erë të rëndë, është vendi në të cilin ka lindur Shëlbuesi i mbarë botës që të jetë sa më i ngjashëm me ne, sa më afër nesh dhe që të na bindë se Ai është gjithmonë i gatshëm që të lindë edhe në grazhdet e zemrave tona të varfëra që shpesh herë janë të ftohta, pa dashuri, të ndotura me mëkate dhe me qelbësirën e egoizmit – me kusht që t`i çelemi dhe ta pranojmë kur të vijë.
Nata e kësaj bote është shndërritur me dritën e Krishtit Zot për të na treguar se Jezu Krishti është për ne të gjithë Dritë në errësirat e të pavërtetave tona, Dritë në errësirat e dyshimeve tona, Dritë në padijenit tona – nëse jemi të gatshëm t`i largojmë veprat e errësirës dhe ta pranojmë dritën e të vërtetës së Krishtit.
Jezu Krishti është mishëruar për shkak meje, që mua të ma zbulojë të vërtetën mbi veten time, mbi botën, mbi jetën e pasosur. Biri i Hyjit u bë njeri, në mënyrë që ne njerëzit të mund ta ndjejmë dashurinë e Hyjit edhe në mënyrë njerëzore, ndijimore, mos ndoshta kështu në ne të nxisë më lehtë dhe më me sukses dashurinë ndaj tij.
Hyji me ardhjen e tij në botë në pamje të njeriut shumë na ka ndihmuar për t’ia shprehur nderimin që e kemi obligim ndaj Tij si krijesa. Tani imagjinata jonë nuk ka nevojë të ia paraqesë vehtes figura ose krahasime, për ta paramenduar Hyjin, as që duhet devotshmëria jonë të drejtohet kah një gjë që është e pakuptueshme dhe e pakonceptueshme. Personi hyjnor i Jezusit i mishëruar zgjon në ne ndjenjën e gëzueshme të realitetit dhe sigurisë. Afërsia e tij e njëmendtë ndër ne mbush zemrën me ngrohtësinë e dashurisë dhe me entuziazëm të dorëzimit të plotësishëm.

Me këto mendime të gjithë atyre që i festojnë ju uroj nga zemra Kërshëndellat, që Jezu Krishti të lindë edhe në zemrat tona!

I juaji
Shpresmiri