Qeveria shqiptare mban peng zgjedhjet e tetorit

[Albo]

Ushtarët e Gardës kishin marrë urdhër t'i ndalonin anëtarët e KZQV-së, të cilët brenda ditës së sotme duhet të marrin një vendim ku të shpallin zyrtarisht kandidatë: Edi Ramën, Spartak Ngjelën etj

SOT SKADON AFATI, KZQV E TIRANES PA ZYRA

Garda bllokon komisionin, rrezikohen kandidatët

TIRANE

Garda e Republikës ndaloi dje anëtarët e Komisionit Zgjedhor të Qeverisjes Vendore të Tiranës që të hyjnë në ambientet e KQZ-së në Pallatin e Kongreseve. Në këtë mënyrë, 24 orë para afatit të marrjes së vendimit për regjistrimin e kandidatëve për kryetar bashkie, KZQV-ja ende nuk ka një zyrë ku të zhvillojë mbledhjet e veta. Ushtarët e Gardës kishin marrë urdhër t'i ndalonin anëtarët e KZQV-së, të cilët brenda ditës së sotme duhet të marrin një vendim ku të shpallin zyrtarisht kandidatë: Edi Ramën, Spartak Ngjelën dhe të gjithë pretendentët e tjerë në garën e 12 tetorit.

Incidenti

Kryetari i KZQV-së së Tiranës, Perikli Dhales, akuzoi dje Gardën e Republikës se pengoi punën e këtij komisioni duke mos i lejuar hyrjen në ambientet e KQZ-së. "Garda na largoi me forcë duke thënë se nuk kishin urdhër të na lejonin. KQZ-ja dhe Bashkia e Tiranës duhet të na krijojnë kushte sepse ne nuk kemi marrë ende vendim për regjistrimin e kandidatëve për kryetar bashkie ose për këshilltarë", paralajmëroi Dhales. "Unë jam i indinjuar pasi autoritetet që duhet të angazhohen për zgjidhjen e kësaj çështjeje -Komisioni Qendror i Zgje-dhjeve dhe Bashkia e Tiranës- nuk kanë gjetur ende një vend të përshtatshëm ku ne të punojmë me të gjitha kushtet", u shpreh ai.
Ndërkohë zëdhënësi i KQZ-së, Erton Sinani, pohoi dje se ky institucion po bën të pamundurën për t'i siguruar KZQV-së së Tiranës zyra dhe kushte optimale pune. "Nuk është normale që mbledhjet e këtij komisioni të zhvillohen në ambientet e KQZ-së. Kështu, ne u ofruam atyre zyra te shkolla "Sabaudin Gabrani", por ata nuk pranuan me arsyetimin se është larg. Ata kërkuan telefona, fakse dhe kasafortë", deklaroi Sinani. Sipas tij, KZQV-ja e Tiranës duhet që brenda orës 24 të ditës së sotme të marrë vendimin për regjistrimin e kandidatëve për kryetar bashkie. Anëtarët e KZQV-së kanë kërkuar që zyrat e tyre duhet të vendosen te Piramida ose në Drejtorinë e Arsimit të kryeqytetit. Regjistrimi i kandidatëve për kryetar bashkie rrezikohet seriozisht duke pasur parasysh që KZQV-ja, e cila ende nuk ka zyra pune, duhet të bëjë verifikimin e firmave që kanë mbledhur 10 kandidatët që pretendojnë të konkurrojnë më 12 tetor.


Partitë nisin betejën elektorale me arkën bosh

Qeveria vonon paratë për fushatën
Megjithëse fushata elektorale ka 48 orë që ka nisur zyrtarisht, qeveria ende nuk ka marrë një vendim për t'i financuar partitë, siç parashikohet në ligj. Ministria e Financave ka lëvruar fondin prej 60 milionë lekësh për t'ua shpërndarë partive që konkurrojnë në zgjedhjet e 12 tetorit. Këshilli i Ministrave duhet të ishte mbledhur përpara nisjes së fushatës, për ta kthyer propozimin në vendim, por asnjë version zyrtar nuk është dhënë për bllokimin e financimeve. Në mbledhjen e fundit të qeverisë, Ylli Manjani, këshilltari juridik i kryeministrit Nano, argumentoi se ka një problem ligjor me këtë proces, por nuk dha argumente të tjera. Vonesa e shpërndarjes së parave që akordohen nga qeveria, do ta dëmtojë fushatën elektorale të partive politike. 49 forca politike do të konkurrojnë në zgjedhjet e pushtetit vendor: vonesa e financimit nga qeveria do të dëmtojë kryesisht partitë e vogla, pasi partitë e mëdha parlamentare kanë burime të ardhurash nga kuotizacionet që paguan anëtarësia e këtyre partive.

[Brari]

EDITORIALI
Hije(na) mbi zgjedhje

Nga Mero Baze

Tre nga skandalet që shteti shqiptar nuk arriti t'i fshihte dot në zgjedhjet e 24 Qershorit, ishin Komisioni i njëanshëm i Zgjedhjeve, Policia që mbushte kutitë e votimit dhe SHIK-u, që komandonte gjithë nëntokën e botës së krimit për të vjedhur vota. Pas një maratonte mbi dyvjeçare të opozitës, për t'i mposhtur këto deformime të mëdha të procesit zgjedhor, duke bashkëpunuar me Komunitetin Ndërkombëtar, 25 ditë para zgjedhjeve, rezultati është sërish zero. Me një vendim në formën e një akti normativ me fuqi ligjore, Fatos Nano ka vendosur dje, në kundërshtim me Kodin Zgjedhor të miratuar me konsensus në parlament që në zgjedhje të mos përdoret vetëm policia e rendit dhe ajo e objekteve, por të gjitha llojet e policive, përfshi forcat speciale, batalionet antiterror, policia kriminale dhe pse jo, segmente të SHISH-it e Gardës. E gjithë puna e Komisionit Bipartizan u shfry me një vendim të qeverisë dje pasdite, i cili vulosi kontrollin policor në zgjedhje.

Deformimi i dytë i madh është KQZ-ja. Duke qenë i kritikuar qysh nga zgjedhjet e Tetorit të vitit 2000, balancimi i KQZ-së mbeti një problem i hapur edhe në vitin 2001. Vërejtet e bëra në raportin e ODIHR-it dhe angazhimi i Komisionit Bipartizan për një Komision të besueshëm dhe të balancuar, u hodhën poshtë nga një bashkëpunim i dyshimtë mes zyrës së Presidentit dhe Kryeministrit, e cila çoi në zgjedhjen e një fanatikeje socialiste në krye të KQZ-së, në vend të anëtarit të tretë që i takonte opozitës.

Deformimi i tretë, ai i angazhimit të SHIK-ut për të mobilizuar nëntokën politike të krimit në Shqipëri, në favor të vjedhjes së votave, u shmang në rrugë zyrtare me zëvendësimin e Fatos Klosit, por faktikisht nuk është bërë asnjë reformë. Kërcëllitjet e dhëmbëve të Fatos Klosit ndaj Presidentit, më shumë se sa të polemizojnë me Presidentin, janë një inkurajim për ato stuktura të paprekura të SHIK-ut që të vazhdojnë të veprojnë njësoj si më parë. Egërsia e Fatos Klosit ndaj Moisiut nuk synon të trembë Moisiun, por të trimërojë njerëzit e SHIK-ut, të specializuar për destabilizimin e zgjedhjeve. Me këto tone që flet ish shefi i SHIK-ut ndaj Presidentit, do të tregojë se Pushtetin nuk e ka Presidenti, por dikush tjetër që nuk kontrollohet prej tij.

Pra, tre vjet më pas, zgjedhjet janë sërish në fatin e hijenave që i copëtuan ato në pesë raunde dhe i dhanë parlamentit 40 mandate të dyshimta.

Vendimi i djeshëm i qeverisë ka rikthyer hijen dhe hijenat mbi zgjedhjet e 12 Tetorit. Tani dikush duhet t'i ndalë.


..........Nga TEMA ..........

[Albo]

Berisha: Nano po tenton të manipulojë zgjedhjet me policë

Kreu i PD-së denoncon dy ndërhyrjet e qeverisë, ndryshimin në ligjin “Për Policinë e Shtetit” dhe aktin normativ për fondet e partive

Shekulli

“Qeveria gënjen kur thotë se nuk ka policë rendi për 12 Tetorin, paratë e fushatës nuk po jepen dhe listat po manipulohen”
TIRANE-Lideri i opozitës Sali Berisha akuzoi dje kryeministrin Fatos Nano se po tenton të manipulojë zgjedhjet e ardhshme përmes listave, mosdhënies së fondeve për partitë dhe angazhimit të forcave policore jo të ligjshme në ditën e zgjedhjeve. Për këtë arsye, mbrëmë vonë kryetari i demokratëve ka zhvilluar një takim edhe me presidentin Alfred Moisiu. “Do të takoj ditën e hënë përfaqësuesit kryesorë të komunitetit ndërkombëtar dhe paralajmëroj Fatos Nanon se do të përballet me pasoja shumë serioze. Ai po e çon vendin drejt një situate tejet të rëndë. Kjo është një qeveri e padenjë”, -tha Berisha. Kryetari i opozitës i kërkoi kryeministrit Fatos Nano që të anullojë vendimin për disa ndryshime në ligjin për policinë. “Pretendimi i qeverisë shqiptare dhe i Nanos se policia e rendit dhe ajo e objekteve nuk mjaftojnë për garantimin e 4100 qendrave të votimit është një mashtrim i paskrupullt, i denjë vetëm për padrinot. Informoj me përgjegjësi të plotë se burimet i pohuan sot PD se efektivi aktual i Ministrisë së Brendshme përbëhet nga 12.300 punonjës të kësaj ministrie, pra përfshi këtu policë dhe oficerë. Nga ky efektiv 1242 janë efektiv i policisë kriminale, 1000 forca speciale të grupuara në katër njësi, 763 janë efektiv i policisë rrugore kurse 9295 është efektivi i policisë së rendit dhe asaj të objekteve dhe gjysma e këtij efektivi mjafton për të kryer shërbimet në 4100 qendra votimi pra deklarata e qeverisë se policia e rendit dhe e objekteve është e pamjaftueshme ndaj dhe duhen angazhuar policitë e tjera që janë angazhuar për vjedhjen dhe manipulimin e votave është dëshmi flagrante e vullnetit të Padrinos”, -tha Berisha.
Fondet e partive
Kryetari i demokratëve kërkoi gjithashtu që të mblidhet urgjentisht Kuvendi për miratimin e aktit normativ që dy ditë më parë nxori qeveria lidhur me shpërndarjen e fondeve për partitë politike në prag të zgjedhjeve lokale. “Ne do të kërkojmë mbledhjen me urgjencë të Kuvendit. Nuk ka asnjë vendim që qeveria të nxjerrë akte normative në një kohë kur Kuvendi është në funksionim të plotë. Kuvendi ka të drejtën e miratimit të ligjit që hyn në fuqi të menjëhershme”, -tha ai. Për të njëjtat çështje, dje kryetari i PD-së, Sali Berisha ka zhvilluar një takim edhe me shefen e Misionit të Vëzhguesve Ndërkombëtarë, Viktoria Uoker. “Së pari, shtrova çështjen e financimit në të cilën Fatos Nano kërkon të vendosë një manipulim total mbasi po përdor të gjitha resurset në mënyrë të paligjshme qeveritare për fushatën e vet dhe të ministrave të tij dhe nuk ka dhënë asnjë qindarkë për fushatën e partive opozitare në përputhje me kodin e Venecias. Ky është një dënim për zgjedhjet dhe është një nga kriteret thelbësore për zgjedhje të lira dhe të ndershme. Fakti që s’mbledhin Parlamentin dhe lëshon gjoja vendimin njëlloj siç dhunoi mbrëmë Kushtetutën me policinë, është përsëri një dhunim i ligjit themelar. Së dyti denoncova problemin e listave. Vetëm në Tiranë Edvin Rama ka përjashtuar 12 mijë zgjedhës, anëtarë dhe simpatizantë të PD-së dhe këto lista do t’i dorëzohen komunitetit ndërkombëtar”, -tha Berisha pas takimit.

Shekulli

[Albo]

Socialistët pas bojkotit të demokratëve nuk votojnë aktin normativ. Kërkojnë kompromisin

Policia në zgjedhje, PS tërhiqet nga votimi

Ruçi: PD le të sjellë variantin e saj dhe maxhoranca do ta miratojë atë”

Bledar Hoti

TIRANË - Partia Socialiste tërheq aktin normativ të qeverisë për Policinë nga votimi në Kuvend. Në seancën e djeshme të Kuvendit, kreu i grupit parlamentar të PS-së, Gramoz Ruçi, bëri publike kërkesën për mosvotimin e këtij akti normativ, duke kërkuar gjetjen e një konsensusi mes PS-së dhe PD-së për shtimin e numrit të policisë gjatë ditës së zgjedhjeve të 12 Tetorit. Sekretari socialist kërkoi edhe ndërhyrjen e OSBE-së dhe të ODIHR-it për zgjidhjen e këtij konflikti të ri politik pozitë-opozitë.
Vendimi i Ruçit erdhi menjëherë pas qëndrimit të opozitës, ku deputetët e PD-së e kishin bojkotuar seancën e djeshme. Në sallë ka qenë vetëm kryetari i grupit parlamentar të PD-së, Bamir Topi, së bashku me tetë deputetë të opozitës, PDr, PLL, PBK.


PD
Deputeti i PD-së, Bamir Topi tha dje se akti normativ i qeverisë i paraqitur në zemër të fushatës kërkon “t’i kthejë zgjedhjet në një monstër”. “Një veprim i tillë është totalisht i paramenduar dhe do të ketë shumë pasoja, çka do të rëndojë klimën politike në vend. Kryetari i qeverisë nuk duhet ta fusë në impas 12 Tetorin, por duhet ta sillte atë për votim përpara një muaji. Paraqitja tani është një atakim gjenetik i Kodit dhe kjo do të sillte zgjedhje monstër, prandaj kthejeni atë sa nuk jeni vonë”,-tha dje Topi. Ndërsa ministri i Rendit, Luan Rama ka deklaruar se pas miratimit të ndryshimit në ligjin e Policisë, nga dy bashkëkryetarët Gjana dhe Ruka, drejtori i përgjithshëm i Policisë, Bajram Ibraj ka zhvilluar takime me presidentin, organizmat ndërkombëtare për të kryer amendimet e nevojshme, por ka patur vetëm heshtje institucionale. “Të vijë opozita dhe të na e thotë se si e do formulimin e nenit dhe ne si qeveri do ta miratojmë atë”,-tha dje Rama. Ndërsa kryeparlamentari Pëllumbi në fjalën e tij nuk e cilësoi si të drejtë veprimin e opozitës për të braktisur seancën. “Shpreh keqardhjen për bojkotin e opozitës, PD-ja duhet ta kuptojë se nuk zgjidhet çështja me bojkot. I bëj të ditur opozitës se qeveria ka miratuar aktin normativ, por ato marrin fuqi ligjore vetëm kur i miraton Parlamenti”,-tha dje Pëllumbi.


Ruçi
Socialisti Gramoz Ruçi tha dje se PD-ja po sulmon aktin normativ për ta patur si alibi të sajën për humbjen e zgjedhjeve. “Nisur nga debatet unë propozoj ndërprerjen e diskutimeve. Të mblidhet byroja e kuvendit, OSBE-ja të thërrasë pozitën dhe opozitën dhe të gjejë një zgjidhje. Opozita të paraqesë mendimin e saj për aktin normativ dhe unë shpreh qëndrimin e PS-së se do ta miratojmë atë”,-tha Ruçi.

[Albo]

Publikohet raporti paraprak 10- 21 shtator i misionit të vëzhguesve të zgjedhjeve

ODHIR: KQZ, listat e policia, problemet e zgjedhjeve

“ Zgjedhja e një anëtari të KQZ-së s’u bë sipas marrëveshjes PD-PS. Shumë kandidatë duket se e financojnë fushatën me fondet e tyre”

Shekulli

TIRANE - Në një raport paraprak të Misionit të vëzhguesve të zgjedhjeve mbi periudhën nga 10 deri në 21 shtator të botuar dje në faqen e internetit të ODIHR-it, edhe pse tonet kritike nuk janë shumë të forta shqetësimet për balancën politike në KQZ, rolin e policisë, mangësitë në listat e zgjedhësve zënë goxha vend. Më poshtë po japim gati të plotë raportin paraprak të vëzhguesve ndërkombëtarë.


Administrata Zgjedhore
Kodi Zgjedhor siguron një formulë të veçantë për caktimin e anëtarëve të KQZ-së; megjithatë vetëm tre prej anëtarëve aktualë janë caktuar sipas dispozitave të reja. Katër anëtarët e tjerë kanë në duar mandatin e dhënë nën legjislacionin e vjetër. Nga tri anëtarët e rinj, njëri prej tyre u caktua nga presidenti dhe një tjetër u zgjodh nga Parlamenti. Anëtari i tretë u zgjodh në 05 shtator duke pasuar një votë të Këshillit të Lartë të Drejtësisë. Ka një kundërshtim të konsiderueshëm në lidhje me këtë caktim të fundit pasi duket se nuk është në një linjë me marrëveshjen dypalëshe mes PS e PD për anëtarët e komisionit të zgjedhjeve. PD pretendon se caktimi i personit në fjalë e prish barazpeshën e përfaqësimit duke favorizuar së tepërmi PS-në, duke minuar kështu besimin në KQZ.
KQZ është teknikisht i mirorganizuar dhe operon në mënyrë të hapur e tepër kolegjiale. Të gjitha partitë
politike dhe koalicionet e regjistruara kanë të drejtën të kenë një përfaqësues pa të drejtë vote në takimet e
KQZ. KQZ nuk ka mundur të rekrutojë një sekretar/e për të siguruar një operim më efikas.


Lista e votuesve
Megjithëse cilësia e listave të votuesve është përmirësuar së tepërmi në vitet e fundit, disa prej faktorëve vazhdojnë të pretendojnë për një nivel të lartë pasaktësie në to. Kodi Zgjedhor u kërkon KZQV-ve të jenë përgjegjëse për rishikimin e listave të votuesve, një proces që mund të përfshijë kërkesa nga partitë politike për të shtuar ose hequr emra nga kjo listë. Vëzhguesit e MVZ raportojnë pretendime të PD se 12 000 emra mungojnë në listat paraprake të votuesve në Tiranë dhe shkojnë më tej se po bëhen përpjekje për të ndryshuar barazpeshën politike në disa prej 11 njësive bashkiake të kryeqytetit duke ndryshuar adresat e regjistruara të mbështetësve të njohur të partisë. Partitë politike duket se po paraqesin një numër të konsiderueshëm kërkesash për shtesa dhe heqje të emrave. Lista përfundimtare e votuesve duhet të botohet deri në 02 tetor 2003.


Policia
Për shkak të dispozitave të Kodit të ri Zgjedhor, qeveria ka shprehur shqetësim se mund të mos ketë numrin e mjaftueshëm të oficerëve të policisë për të siguruar materialet e zgjedhjeve dhe qendrat e votimit. Qeveria ka vendosur të zgjerojë gamën e oficerëve të kualifikuar të policisë që do të jenë në shërbim ditën e zgjedhjeve, duke përfshirë edhe p.sh. policinë e qarkullimit rrugor. Kjo gjë është kundërshtuar fuqishëm nga PD që pretendon se edhe pa këtë vendim kanë patur të gatshme forca të mjaftueshme të policisë. Roli i policisë në procesin zgjedhor vazhdon të jetë një temë debati mbështetur edhe në përvojat e mëparshme. Në vijim të takimit të tij me presidentin, drejtori i Policisë ka dhënë udhëzimet e nevojshme për veprimtarinë e forcave të policisë gjatë periudhës së zgjedhjeve.


Mjedisi i fushatës
Fushata zgjedhore u hap zyrtarisht më 12 shtator, edhe pse veprimtaritë zgjedhore ishin zhvilluar që prej disa muajsh. Deri tani fushata ka qenë e qetë e pa shumë bujë por me një shtim të veprimtarive ku rivalitetet e zakonshme ridalin në sipërfaqe pas periudhës së konsensusit. Ndërsa nga njëra anë gara për kryebashkiakun e Tiranës ka mbërthyer pjesën më të madhe të vëmendjes së medias dhe publikut, fokusi i fushatës shpesh kalon në çështjet kombëtare ku veprimtaritë dhe materialet e fushatës kanë në qendër figurat udhëheqëse partiake. Në nivel vendor, garuesit e të gjitha palëve ngrenë akuza duke pretenduar për korrupsion në palën kundërshtare.
Partitë politike të opozitës janë ankuar se vonesa në lëvrimin e fondeve qeveritare të dhëna sipas Kodit
Zgjedhor ka kufizuar mundësitë e tyre në fushatë dhe presupozojnë se vonesa ka qenë e qëllimshme. Këto
fonde po shpërndahen edhe pse me vonesë. MVZ vëren se disa kandidatë, shumë prej të cilëve biznesmenë, po financojnë fushatën me fondet e tyre. Gjithashtu ekzistojnë edhe presupozime për përdorimin e fondeve qeveritare për kryetarët që rikandidojnë. Në Durrës, kandidati socialist ka marrë me qira pallatin e kulturës të qytetit si qendër të shtabit të tij zgjedhor. MVZ po i kushton vëmendje raporteve të kësaj natyre.


Media
Mbulimi i fushatës zgjedhore nga media elektronike rregullohet nga Kodi Zgjedhor. Koha pa pagesë e
transmetimit është shpërndarë për gjithë partitë politike të regjistruara në transmetuesin publik, RTSH, në raport me numrin e vendeve në Parlament, ku deri tani pjesa më e madhe e kohës i është dhënë PS e PD.
Kodi zgjedhor kërkon gjithashtu që transmetimet e lajmeve të kenë raport të barabartë përsëri sipas vendeve që zënë në Parlament. MVZ ka marrë disa ankesa se formula për shpërndarjen e kohës së transmetimit diskriminon partitë e vogla politike. Raportet për veprimtarinë e qeverisë lidhur me zgjedhjet përfshihen në sasinë e kohës në lajme dhënë për partinë në pushtet. Media elektronike private po transmeton një fushatë me pagesë. Për median e shkruar nuk ka ndonjë rregull të ngjashëm që të kërkojë barazpeshë të mbulimit të fushatës.
Një video muzikore me pjesëmarrjen e kandidatit për kryetarin e Bashkisë së Tiranës është gjykuar nga BMM si një formë fushate; sidoqoftë ajo vazhdon të shfaqet në veprimtari muzikore.


Në 12 shtator, MVZ nisi monitorimin e tre kanaleve televizive kombëtare si dhe shtatë gazetave të
përditshme. Mbulimi në televizione deri tani ka qenë në përgjithësi i barazpeshuar, ku lajmet janë ose
pozitive ose neutrale. Mbulimi në median e shkruar është e polarizuar sipas parapëlqimeve partiake dhe
shpesh ka qenë agresive në tonin e vet me sulme të drejtpërdrejta ose të nënkuptuara mbi kandidatët.




26/09/2003

[Albo]

Ambasadori i OSBE-së kërkon nga maxhoranca vendosjen e balancës politike në Komisionin Qendror të Zgjedhjeve

Osmo Lipponen: Të ekuilibrohet KQZ-ja


Darina Tanushi

TIRANË – Kryetari i Përfaqësisë së OSBE-së në Tiranë Osmo Lipponen ka kërkuar dje, nga përfaqësuesit e partive politike shqiptare të gjejnë ekuilibrin si në Komisionin Qendror të Zgjedhjeve dhe në të gjithë procesin elektoral. Në një intervistë për “TV Klan”, Lipponen ka thënë se “pa konsensus nuk ka më besim për zgjedhje të lira si dhe vihet në rrezik ajo frymë e re që ne krijuam mes partive politike”. Sipas tij, “nëse nuk arrihet zgjidhja për çështjet kryesore me ç’kam dëgjuar flitet për një KQZ të paekuilibruar, çështjet e tjera si vonesa e financimit apo policia shndërrohen në probleme të mëdha”. Ambasadori i OSBE-së Lipponen tha se në ligjin për Policinë e Shtetit nuk është operuar me konsensus nga partitë parlamentare. Kjo, sipas tij, solli nevojën për ndryshime në mes të fushatës elektorale, gjë që duhet të ishte kontrolluar më përpara. Reagimi i ambasadorit të OSBE-së ka ardhur në një ditë, kur deputetët në seancën e djeshme plenare nuk kanë arritur të shqyrtojnë ndryshimet që u bënë në ligjin për Policinë e Shtetit. Mendohet që në ditët që do të vijnë përfaqësuesit e dy partive politike, PS-së dhe PD-së do të negociojnë edhe në bashkëpunim me OSBE/ODIHR-in, ndoshta edhe për hartimin e një varianti tjetër për rolin e policisë në zgjedhje. Ambasadori i OSBE-së, Lipponen ka uruar dje, që Parlamenti të gjejë zgjidhjen duke garantuar asistencën e OSBE-së për përmirësimin e Kodit pas zgjedhjeve të vjeshtës 2003. Sipas tij, sistemi zgjedhor duhet ndryshuar sërish për dy arsye: së pari për të zgjidhur problemet e financimit në kohë të partive politike, duke ndryshuar edhe disnivelin në fonde mes asaj partie që ka marrë 51% me atë që ka përfituar vetëm 49% të votave të përgjithshme. Problemi i dytë është rritja e rolit të grave, të cilat humbasin me sistemin maxhoritar. Lipponen vuri në dukje se “OSBE-ja asistoi komisionin bipartizan pozitë-opozitë, por garancinë e Kodit Zgjedhor e jep vetëm Parlamenti dhe qeveria shqiptare”. Ky Kod, tha ai, nuk u bë vetëm për të kënaqur dy partitë kryesore, pas kontestimit të zgjedhjeve të fundit parlamentare, por u ndërtua mbi standardet evropiane. Problemi qëndron se ai nuk është kuptuar siç duhet, sidomos në nivelin lokal.

[Albo]

BALANCIMI I ANETARESISE SE KQZ

Ruçi kundërshton OSBE
"Respektoni vetëm Kushtetutën"

Partia Socialiste replikoi dje me kryetarin e prezencës së OSBE-së në Tiranë, Osmo Liponen, pas kritikës së tij se mosbalancimi i Komisionit Qendror të Zgjedhjeve mund të shkaktojë krizë në vend. Sekretari i përgjithshëm socialist, Gramoz Ruçi deklaroi se tashmë nuk mund të bëhet fjalë për balancim për KQZ-së, pasi ky institucion nuk është i disbalancuar. "Anëtarët e Komisionit Qendror të Zgjedhjeve janë votuar sipas Kushtetutës dhe ligjeve, përfshirë edhe zonjën Subashi e cila u votua nga Këshilli i Lartë i Drejtësisë. Prandaj, mendoj se nuk mund të flitet për balancim kur nuk ekziston disbalancimi", deklaroi Ruçi. Ai shtoi se të gjithë faktorët politikë në vend duhet të mësohen të respektojnë vendimet e organeve legjitime dhe ligjet në vend. "Partitë e krahut të mazhorancës po kështu edhe ato të opozitës duhet të mësohen të respektojnë institucionet që votohen në bazë të Kushtetutës dhe ligjeve në fuqi", deklaroi Ruçi.

Reagimi

Kryeministri Nano mblodhi dje stafin e këshilltarëve politikë për të diskutuar situatën e krijuar pas deklaratës së kreut të OSBE-së, Liponen se mazhoranca duhet të angazhohet për të balancuar KQZ-në. Nano u konsultua me stafin e tij për një reagim të mundshëm ndaj kësaj deklarate dhe pati kontakte telefonike edhe me sekretarin e përgjithshëm socialist, Gramoz Ruçi. Një orë pas bisedës me Nanon, Ruçi përsëriti në media qëndrimin e Partisë Socialiste se nuk ka ndërmend të ndërhyjë për të kthyer vendimin e KLD-së që emëroi Dëshira Subashin si anëtaren më të re të Komisionit Qendror të Zgjedhjeve. Opozita parlamentare ka kërkuar ditët e fundit që KLD-ja të anulojë vendimin e vet për Subashin dhe të emërojë në KQZ njërin prej propozimeve të Partisë Demokratike.


Ruçi e Topi s'bien dakord për "Policinë në zgjedhje"

Kryetari i grupit parlamentar të PD-së, Bamir Topi mori dje kontaktet e para me homologun e tij socialist, Gramoz Ruçi për të gjetur një zgjidhje rreth çështjes së pjesëmarrjes së forcave të policisë në zgjedhje. Negociatat do të vazhodojnë edhe ditët e ardhshme, ndërkohë që Topi pohoi dje se opozita nuk do të paraqesë asnjë akt normativ në Parlament për policinë në zgjedhje. "Kam përshtypjen që kjo çështje do të zgjidhet në mbledhjen e byrosë, sepse ne nuk marrim iniciativa më vete në këtë drejtim. Sigurisht që ne do të parashtrojmë alternativat në mbledhjen e byrosë", tha Topi. Ndërsa socialisti Ruçi deklaroi se kjo çështje do të zgjidhet me ndërmjetësimin e OSBE-së para datës 2 tetor.


Berisha: S'bëjmë propozime, të respektohet Kodi Zgjedhor

"Ftesës së Gramoz Ruçit do t'i përgjigjemi vetëm me një nen", u shpreh dje kreu demokrat, Berisha, në lidhje me debatin e bërë një ditë më parë në Parlament dhe bojkotimit të votimit të Aktit Normativ për Policinë nga ana e opozitës. "Akti ynë do të formulohet dhe do të ketë vetëm një nen, në të cilin shkruhet: 'Qeveria të zbatojë Kodin Elektoral konsensual'. Më pas do të shohim a do të firmoset apo jo", tha Berisha në përgjigje të ftesës së Ruçit. Pas bojkotimit të opozitës për miratimin e Aktit Normativ mbi Policinë e Shtetit dhe pjesëmarrjen e saj në zgjedhjet vendore të 12 tetorit, ministri i Rendit, Luan Rama dhe kryetari i grupit parlamentar socialist, Gramoz Ruçi, e ftuan opozitën ta formulojë, sipas dëshirës së saj, aktin normativ për pjesëmarrjen e Policisë së Shtetit në këto zgjedhje. Socialistët u shprehën dakors për ta votuar variatin që do të paraqesë opozita, duke përdorur kështu konsensusin, për të zhbllokuar situatën e krijuar nga mospranimi i Aktit Normativ qeveritar nga opozita.

[Albo]

PS: Nuk tolerojme per KQZ-ne

Socialistet jane te vendosur ne qendrimin e tyre persa i perket kerkesave per ndryshime ne anetaresine e Komisionit Qendror te Zgjedhjeve. PS shprehet se nuk do te toleroje per ndryshimin e kesaj perberjeje, pavaresisht nga deklaratat e faktorit nderkombetar dhe Presidentit te Republikes, si dhe kerkesave te herpasehershme te opozites. Kryetari i Komisioni parlamentar te Ligjeve, deputeti socialist, Spartak Braho shprehet se per KQZ eshte zbatuar ligji. Por sipas tij, nje nderhyrje e mundshme mund te realizohet vetem nese institucionet nderkombetare do te rekomandojne qe te shkelet ligji dhe Kushtetuta shqiptare, gje qe eshte e pamundur te ndodhe, atehere natyrisht ajo do te kete pergjegjesi per moszbatimin e ligjit dhe Kushtetutes. Por, Partia Socialiste eshte e vendosur te zbatoje ligjin dhe Kushtetuten. Deputeti socialist Braho, thekson faktin se kerkesa per balancim te KQZ-se eshte nje kerkese antiligjore, antikushtetuese, nuk ka te beje fare me qetesim te situates politike. Nderkohe, pak dite me pare, vet Sekretari i Pergjithshem i PS-se, Gramoz Ruci ka shprehur qarte qendrimin e PS-se qe nuk ka vend per ndryshime ne KQZ.

[Albo]

Intervistë me kryetaren e Komisionit Europarlamentar për Evropën Juglindore, Doris Pack


Pack: Alarm! Zgjedhjet rrezikohen nga PS


Erisa Zykaj
Korrespondente nga Brukseli



Sipas Pack nuk është e sigurt nëse do të kemi një proces zgjedhor të rregullt pas krizave që ka provokuar forca politike në pushtet. Ajo ka lëshuar akuza të ashpra ndaj qeverisë, e cila sipas saj nuk e vuri ujin në zjarr për kritikat e ashpra që bëri kreu i Parlamentit Evropian Pat Koks, por nxitoi të miratonte një akt normativ të parregullt, menjëherë pas largimit të tij. Pack ka deklaruar se zgjedhjet kushtëzojnë në mënyrë absolute ecurinë e reformave të vendit tonë.



Intervista



Komisioni Evropian ka deklaruar para disa kohësh shqetësimin e tij për një përsëritje të mundshme, në zgjedhjet lokale të së dielës, të problemeve që janë hasur edhe gjatë zgjedhjeve të mëparshme. Ju si kryetare e komisionit të jashtëm për Evropën Juglindore, a keni të njëjtin shqetësim?



Duke u nisur nga numri i tepërt i parregullsive dhe problemeve që janë hasur në zgjedhjet e mëparshme në Shqipëri dhe deri tek domosdoshmëria e ndryshimit të sistemit elektoral për evitimin e këtyre parregullsive, duhet të isha medoemos optimiste për zgjedhjet lokale. Ndaj kam shpresuar që në fillim të këtij viti, që mos të ketë probleme me zgjedhjet lokale në Shqipëri. Edhe deri para pak kohësh e kam mbajtur veten me shpresë, se gjërat mund të ndryshonin, por duke parë se ç'po ndodh pak ditë përpara zgjedhjeve, nuk jam e sigurt se këto zgjedhje do të shkojnë si duhet.

Ashtu siç është shprehur edhe nga Komisioni Evropian, ekziston një shqetësim i vërtetë për disa faktorë. Kur them disa faktorë, mendoj së pari për problemin e Komisionit Qendror të Zgjedhjeve në Shqipëri, i cili ka mbetur ende pezull. Së dyti, mendoj për financimin e fushatës elektorale që për partinë opozitare dhe për të tjerat është bërë shumë me vonesë. Së treti mendoj për faktin, se vetëm disa minuta pas largimit nga Parlamenti Shqiptar të presidentit të Parlamentit Evropian, mazhoranca ka votuar ligjin për rolin e policisë në sigurinë e procesit zgjedhor, pa respektuar mendimin e opozitës. Kjo nuk është mënyra e duhur për të përballuar situatën. Të them drejtën kam frikë për zgjedhjet lokale, pasi nuk besoj se do të kalojnë pa parregullsi. Dhe kjo do të rëndojë shumë rëndë mbi shpatullat e politikanëve shqiptarë, pasi nëse ata nuk janë në gjendje të zhvillojnë zgjedhje lokale që respektojnë standardet evropiane, atëherë rruga për në integrimin evropian do të jetë shumë larg.





Presidenti i Parlamentit Evropian, Pat Cox ka qenë shumë i qartë gjatë vizitës së tij në Shqipëri. Ai ka bërë thirrje për gjetjen e një konsensusi para votimit të ligjit për policinë, por kjo këshillë ka rënë në vesh të shurdhër. Sipas jush kjo tregon një moskokëçarje të politikës shqiptare për qëndrimin e Bashkimit Evropian, apo bëhet fjalë për probleme të brendshme të politikës shqiptare?



Unë mendoj që janë të dyja. Nëse kryetari i Parlamentit Evropian Pat Cox ka dhënë një këshillë, kjo do të thotë që ai duhej të merrej seriozisht, aq më tepër kur bëhej fjalë për një ligj mbi policinë që lidhet me zgjedhjet lokale të të dielës. Është për të ardhur keq, pasi kjo tregon se politikanët shqiptarë nuk e kanë kuptuar se sa serioze ishte këshilla e presidentit të Parlamentit Evropian. Në realitet, kur bëhet fjalë për të dëgjuar Bashkimin Evropian, ai dëgjohet kur ka interes për të kërkuar ndihma financiare apo kontribute të tjera të këtij lloji. Por, kur Bashkimi Evropian mban një qëndrim kritik, atëherë kjo quhet përzierje në punët e brendshme. Po, nëse në Shqipëri nuk mbizotëron ende një politikë demokratike, ashtu siç është rasti i tanishëm, ne jemi të detyruar të ndërhyjmë, pasi në rast të kundërt Shqipëria do të mbetej gjithnjë e më larg anëtarësimit në Bashkimit Evropian. Megjithatë, shpresoj që të dielën të mos ketë incidente.





Përfaqësuesi i OSBE në Shqipëri ka thënë, se nëse edhe këtë radhë zgjedhjet nuk shkojnë si duhet, atëherë votuesit shqiptarë rrezikojnë të humbin besimin në zgjedhjet e lira. Ai ka thënë gjithashtu, se pasojat e një situate të tillë do të çonin drejt një formulimi të ri të Kodit Elektoral? Ç'mendoni ju rreth kësaj?



Dëgjoni, unë nuk dua ta mendoj si fakt të kryer që zgjedhjet lokale do të përfundojnë keq. Por mund të them, se nëse politikanët e një shteti nuk janë në gjendje që të bëjnë zgjedhje lokale në mënyrë korrekte, atëherë ku mbeti demokracia në Shqipëri? Politikanët duhet të tregohen të kujdesshëm për të mos humbur kredibilitetin që i ka mbetur në BE.





Nëse supozojmë një skenar të hidhur të dielën, ku parregullsitë dhe tensionet nuk do të mungojnë, atëherë cili do të jetë qëndrimi i BE ndaj Shqipërisë? Ju do të tregoheni të rreptë ndaj integrimit të saj në Bashkimin Evropian?



Unë shpresoj me të vërtetë që kjo të mos ndodhë, por në rastin e kundërt, atëherë kjo do të jetë një shenjë e qartë, që Shqipëria nuk është ende e gatshme për të përballuar dhe përmbushur angazhimet që rrjedhin për nënshkrimin e marrëveshjes së asocimit dhe stabilizimit, që janë angazhimet e një shteti që aspiron integrimin në Bashkimin Evropian.





Si kryetare e komisionit të jashtëm të Parlamentit Evropian ju i keni mbështetur shumë shqiptarët. Mendoni që do të gjeni përsëri forcën për t'i mbështetur, nëse zgjedhjet nuk shkojnë si duhet?



Nëse nuk do të kisha forcën të filloja dhe të rifilloja nga e para, nuk do të isha politikane. Mendoj që Shqipëria, ka nevojë për miq, për miq të vërtetë. Nëse politikanët shqiptarë nuk janë miqtë e vërtetë të shqiptarëve, atëherë duhet të jenë miqtë e jashtëm që të nxisin politikanët shqiptarë në drejtimin e duhur. Ne do të vijmë me komisionin e jashtëm të Evropës Juglindore në takimin e nëntë apo të dhjetë ndërparlamentar në Tiranë në fillim të nëntorit.

Shpresoj që të mos kemi të njëjtin debat që kemi patur edhe pas zgjedhjeve të mëparshme. U bëj thirrje sinqerisht politikanëve që të mos bëjnë të njëjtat gabime që kanë bërë edhe herët e shkuara.

[Albo]

BE: Do ndërpresim ndihmat nëse nuk respektoni angazhimet

Erisa Zykaj
Korrespondente nga Brukseli

Paralelisht me përgatitjen e takimit të dhjetë ndërparlamentar të Parlamentit Evropian me përfaqësuesit shqiptarë në Tiranë, Komisioni i Jashtëm i Parlamentit Evropian ka diskutuar edhe për perspektivën e procesit të marrëveshjes së asocimit dhe stabilizimit të vendeve të Ballkanit. Raportuesi Joost Lagendijk, i cili ka përgatitur një draft raport për këtë çështje, është ndalur në analizën e problemeve për secilin vend të rajonit.

Për Shqipërinë problemi kryesor që ka dalë në pah është ai i ndryshimit të marrëveshjes me Shtetet e Bashkuara të Amerikës për Gjykatën Penale Ndërkombëtare. Së dyti, qeveria shqiptare duhet të përqëndrohet në politikën e brendshme të saj dhe të sjellë progrese konkrete në fushën e krimit të organizuar dhe të trafiqeve të ndryshme. Ajo duhet të angazhohet për zbatimin e legjislacionit të adoptuar si dhe kryerjen konkrete të reformave në vend. Për të disatën herë në Bruksel është përsëritur e njëjta vërejtje për qeverinë shqiptare "Autoritetet shqiptare duhet të tregojnë se ato zotërojnë kapacitetin e duhur për të vënë në zbatim reformat që u kërkohen në kuadrin e marrëveshjes së asocimit dhe stabilizimit," është shprehur Reinhard Priebe, drejtori i zyrës së marrëdhënieve me jashtë të Komisionit Evropian për Ballkanin. Ai ka vënë në pah para gjithë komisionit të jashtëm të Parlamentit Evropian, se në Shqipëri nuk ekziston ende një kulturë demokratike dhe se skena politike shqiptare shndërrohet vazhdimisht në një arenë përplasjesh interesash të forcave të ndryshme politike shqiptare, duke minuar interesin e përgjithshëm për zhvillimin përpara të vendit.

Përveç këtyre pikave, me insistimin e europarlamentarëve të tjerë, do të shtohet edhe një paragraf për zhvillimin e zgjedhjeve lokale në Shqipëri. Raportuesi Joost Lagendijk ka konfirmuar se kjo do të bëjë një pikë të veçantë të raportit për Shqipërinë. Ai ka thënë se Parlamenti Evropian, ashtu si dhe Komisioni, kanë konstatuar më parë që ka patur shumë probleme midis dy forcave kryesore politike në Shqipëri, që nuk kanë respektuar mënyrën evropiane të zhvillimit të procesit zgjedhor. "Unë shpresoj që këtë radhë në zgjedhjet lokale të shikojmë një proces zgjedhor të ndershëm dhe demokratik, ku të gjitha partitë shqiptare të respektojnë njëra-tjetrën. Nuk ka problem nëse të dyja partitë e mëdha në Shqipëri zhvillojnë një luftë në planin politik midis tyre. E rëndësishme është që ato të bëjnë të mundur që shqiptarët të votojnë për partinë që duan, pa kaluar në incidente midis njëri-tjetrit, pasi kjo nuk mund të quhet mënyrë demokratike për të zhvilluar zgjedhjet.


--------------------------------------------------------------------------------

Flet eurodeputeti Joost Lagendijk

Raportuesi Lagendijk: Mund të ketë dënime financiare për ju

Në raportin tuaj, ju keni të gjithë mbështetjen e kolegëve tuaj për të kundërshtuar marrëveshjet bilaterale me Shtetet e Bashkuara të Amerikës rreth statusit të Gjykatës Ndërkombëtare Penale. A do të tregoheni me të vërtetë kategorikë me vendet e Ballkanit në këtë pikë?

Ky është qëndrimi im dhe i kolegëve të mi dhe ne jemi të vendosur për këtë. Eshtë një çështje principi, pasi Bashkimi Evropian ka një qëndrim të ndryshëm nga ai i Shteteve të Bashkuara të Amerikës. Më duket mëse normale, që shtetet si Shqipëria, të cilat duan të bëhen në të ardhmen anëtare të BE, nuk bashkohen me qëndrimin e Bashkimit Evropian, përsa i përket Gjykatës Ndërkombëtare të Hagës, i cili nuk pranon një përjashtim për Shtetet e Bashkuara të Amerikës. Unë e di që nuk është e lehtë për këto shtete, pasi ato janë nën presion, por mesazhi ynë, është që ato duhet t'i ndryshojnë këto marrëveshje, nëse duan të bëhen anëtare të Bashkimit Evropian.



Por me shtete si Shqipëria që e kanë nënshkuar tashmë këtë marrëveshje, si do të silleni?

Shqipëria dhe shtete të tjera si Bosnjë dhe Hercegovina kanë mjaft kohë për të ndryshuar këto marrëveshje. Mesazhi ynë për autoritetet shqiptare, është që ato duhet të konsiderojnë faktin, se edhe për pak vjet, kur ato të jenë në nivelin e kandidateve, duhet të kenë ndryshuar marrëveshjet për t'u bërë anëtarë të kësaj organizate. Ne nuk pranojmë përjashtim për Shtetet e Bashkuara të Amerikës.



Çfarë do bëni në rastin ku Shqipëria nuk do të respektojë pikat që janë renditur në raportin tuaj për Marrëveshjen e Asocimit dhe Stabilizimit?

Raporti im do të paraqitet për aprovim në seancën e dytë plenare të nëntorit të Parlamentit Evropian. Nëse ky raport aprovohet, Parlamenti evropian ka të drejtën të ndërpresë financimin për Shqipërinë apo për vendet e tjera, pasi për rubrikën e 4 të buxhetit në lidhje me politikën e jashtme, Parlamenti vendos së bashku me Këshillin e ministrave. Pra, nëse ne kemi ankesa, këto mund të përkthehen me dënime financiare.