KUR


Atopistët

Kur Sokrati vdekjen të zgjedhë
Esenini do të ngjyejë muret me gjak
Fytin do të presë Mopasani
e Van Gogu do të bëjë veshët dhuratë.


Mesazh

Kur të masturbohet Diogjeni në pazar
dhe Kamy të mos i thotë “jo” askujt
at’herë do të fale tokën Tolstoi
e Dali do të pikturoje vetëm bukë.


Rikthim në fis

Kur Safo të thurë vargje për të shoqin
Frida Kahlo do të lindë një fëmijë
Frojdi do të nevrikoset me Dorën
e Oskar Wilde do të heshtë në gjyq.


Mishi

Kur të humbasin “Rubairat” e K’hajamit
Zvjagu s’do të hedhë trutë ne erë
Çajupi do të qeshë me “Kandarin”
e Heminguej s’do të dalë më për peshk.


Paqe

Kur Ainshtajni të mos i druhet Buxatit
Pikaso s’do te shesë dot as një “Guernicë”
Kamy do te votojë për dënimin me vdekje
e Gandi do të qëllojë me grusht.


Ëndërr mashtruese

Kur Aleksandri të ketë gjakun e Herkulit
Niçja si Vagneri do të kompozojë
Sartri do të pijë kafe me Bukovskin
e Kadareja për Eskilin vërtet do t’aludojë.


Ndërgjegje

Kur Ptolemeu t’i kthejë harkun Filoktetit
Tolstoi do të shkruajë “Haxhi Murat”
Gëtja do te qajë për “Don Kishotin”
E Kafka do të hedhë shkrimet në zjarr.


Ironia e fatit

Kur Pirroja të ruhet nga tjegullat
Kyri do të qëndroje larg uraniumit
Kamy s’do të ngasë më makinën
e Dostojevskit s’do t’i bjerë abazhuri



© Sokol Nika