Artur Zheji

[forever]

Artur Zheji, një drejtor dhe një bashkëshort ndryshe

Nga Mirela Sula


Në një ditë të zakonshme vere, në kohën kur të gjithë mendojnë për pushimet diku larg qytetit, pluhurit dhe ngjarjeve të ditës, jo rastësisht i gjetëm të gjithë bashkë ata, gazetarët dhe drejtuesit e televizionit publik shqiptar.

Fillimisht takohemi me drejtorin e aktualitetit të informacionit, Artur Zonja, i cili na ndihmon për të krijuar një ide më të qartë rreth punës dhe ndryshimeve që kanë ardhur bashkë me drejtorin e përgjithshëm Artur Zheji. Në platformën e paraqitur nga Zheji, perpara Këshillit Drejtues, mësojmë se është informacioni i konceptuar ndryshe, një nga përparësitë e punës, përmes së cilës synohet të konkurohet në treg. Dhe jo vetëm kaq. Ajo çfarë të bie në sy ndryshe, është sidomos ngritja e një ambienti të ri pune dhe transmetimi për gazetarët (News Room), përmirësimi i pajisjeve teknike, realizimi i kontratave speciale për gazetarët e informacionit, ku pagat dhe shpërblimet janë gjithmonë e më të barabarta me ato që afron tregu. Ndoshta ka qenë kjo një mënyrë konkrete për të mbajtur dhe motivuar gazetarët më të mirë dhe cilësorë, pse jo dhe për të tërhequr të tjerë po kaq të mirë.
Edhe transmetimet direkte, dukuri kjo e televizioneve të mëdha Perëndimore, nën të famshmen kornizë "live", i emisioneve dhe evenimenteve sociale duket se është një nga prioritetet më kryesore të prezantimit të modelit të ri në RTSH.
Ndoshta edhe kaq mjafton, për të kuptuar se një klimë e mirë dhe shumë e favorshme është krijuar, për të punuar në një institucion të tillë, ku kërkohet mbi të gjitha mobilizimi i një pune në grup dhe gazetarët duket se kanë krijuar identitetin e tyre tashmë. Ajo çfarë së fundi synohet është prirja tek lajmi dhe jo tek pasqyrimi pasiv i tij, konceptimi i rubrikave ekspresive "pa koment" dhe "specialet", pak si tepër të kopjuara nga të tjerët... Në tjetër detaj po kaq për t'u përmendur do të ishte edhe rikthimi i personaliteteve në ekran.
Fakti se drejtori i këtij institucioni z.Zheji, nuk është një funksionar i rastësishëm, por një gazetar i mirëfilltë aktiv bën që ai të gjejë mënyra tepër origjinale dhe funksionale për të nxitur gazetarët dhe punonjësit drejt pasionit. Këtë veç të tjerash e kemi ndjekur të përcjellë sidomos përmes emisioneve të tij "Lufta kundër luftës", një emision tepër special ky për Luftën e Irakut që pati një reflektim të menjëhershëm tek publiku i TVSH-së. Në këtë kontekst u interesuam për të kuptuar në mënyrë më të drejtpërdrejtë, raportet e ngritura mes tij dhe gazetarëve që punojnë në TVSH. Fare qartë, për të kuptuar nga bisedat e tyre mënyrën modeste dhe moderne të bashkëpunimit të tij: "Ai të lë pavarësi, ka një praktikë editoriale që është në shërbim të publikut dhe nuk të ndërhyn në punë" Ky është një nga opinionet që merr sapo ndesh në takimet e para me gazetarët.


Ja çfarë thonë më konkretisht ata:

Eni Vasili-gazetare
Duke patur një eksperiencë të gjatë këtu shoh ndryshime. E para, TVSH-së i është rikthyer publiku, elementi kryesor për të cilin ne punojmë. E dyta, është ndryshimi i ambientit, investimet në teknikë duke të krijuar një komoditet për të punuar. E vlerësoj shumë atë çfarë vetë z. Zheji na ka ofruar qysh në mbledhjen e parë "Kërkoni çfarë doni nga unë dhe do t'i keni!...". Kjo ka qenë mbështetja maksimale që na ka nxitur të punojmë, kjo më bën të ndjehem tepër e privilegjuar për potencialin që kam.

Arjana Qatipi-gazetare
Unë vetë jam marrë kryesisht me parlamentin. Veçanërisht që kur ka ardhur Zheji shoh se është vendosur një raport i drejtë pozitë-opozitë dhe këtë e ndjej çdo ditë në punën time. Është ndjerë kjo barazi gjithashtu edhe nga sondazhet. Personalisht ndjehem mirë, më komode dhe më e motivuar. Janë rritur kryesisht kërkesat për tema sociale dhe kjo është shumë pozitive, prandaj kam filluar edhe vetë të merrem nga pak me probleme të tilla.

Marash Mirashi-gazetar
Personalisht ndjehem më komod, kam më tepër liri që prej ardhjes së Zhejit. Për realizimin e temave sociale bëhet debat ku jemi të gjithë të hapur. Ndjehet një domosdoshmëri dhe një frymë e re që ka sjellë stafi i ri drejtues. Në 12 vjet që punoj në TVSH, për herë të parë shoh drejtorin që zbret tek gazetarët, duke i mbajtur mend kronikat e tyre dhe duke të përgëzuar për ato. Më parë mes drejtorit dhe gazetarit egzistonte një mur tepër i lartë që nuk e kaloje dot. Tani është vendosur një komunikim shumë miqësor mes nesh. Tani shihet se është rikthyer pasioni në TVSH.

Tefta Radi-gazetare
Mendoj se ajo çfarë ka ndryshuar është mënyra e paraqitjes së lajmeve, raportet, siglat e lajmeve politiko-ekonomike-sociale. Mendoj se është një ekran i ekuilibruar, larg skupeve, i tillë mbetet përsa i përket zhvillimeve politike. Ajo çfarë mbetet për t'u përmirësuar është për të sjellë më shumë informacion nga rrethet.

Franko Egro - drejtor i informacionit
Ajo çfarë unë i kam ofruar RTSH-së, ka qenë eksperienca profesionale teknike e veçantë. Gjeta terren të madh për të sjellë konceptet për një gazetari me të avancuar, më moderne qoftë në formë dhe përmbajtje. Këtu gjeta një departament informacioni të rigjeneruar me entuziazmin dhe dëshirën për të qenë më të mirët. Gjeta një vend ku lëvizet në kërkim të aksionit duke patur gjithnjë edhe mbështetjen e Zhejit.


Artur Zhejii: Drejtori që rikthen pasionin e humbur në RTSH

Pas 11 vjet karrierë në Itali si specialist i çështjeve të Evropës dhe Ballkanit në një nga radiot më të mëdha italiane siç është "RadioRadicale", kthehet në Shqipëri për të përcjellë kontributin e tij si gazetar dhe analist tepër i spikatur. Artur Zheji, bir i dy intelektualëve, emrave të njohur në art dhe publicistikë, (Besa Imamit, aktores së mirënjohur të teatrit dhe studiuesit, shqipëruesit të papërsëritshëm Petro Zheji), vazhdon të ndjekë pasionin dhe vullnetin e trashëguar prej tyre drejt karrierës në rrugën e gazetarisë. Babai i një vajze 17 vjeçare e quajtur Geri, e cila jeton në Itali me nënën e saj, pret të bëhet baba për herë të dytë nga martesa e tij e dytë. Kësaj here me një djalë. Bashkëshortja e tij, Klodi, pianiste në Teatrin e Operas dhe Baletit, sjell shumë larmi në atmosferën fantazioze që përjetohet në familjen e tyre. Ja diçka më shumë nga intervista e fokusuar pikërisht në këto momente të jetës së tij.

Ç'mund të na thoni për pozicionin që keni në TVSH. Ishte dëshira juaj apo jua kërkuan?
Ishte një takim në mes të rrugës. Kisha ndjesinë e brendshme që një eksperiencë të akumuluar qoftë në mediat e huaja, qoftë në ato kombëtare, të mund ta plazmoja dhe ta vija në shërbim të publikut në një rrafsh më të madh dhe gjithpërfshirës. Nga ana tjetër, pata nxitje për ta drejtuar këtë institucion, pasi mendoj se është e domosdoshme jo vetëm të flasësh, arsyetosh apo analizosh mbi situata të ndryshme sociale të rënduara, mbi probleme dhe halle që ka Shqipëria, që janë gjithmonë të shumta, por është po aq mire, që ti vesh gjoksin një detyre publike, me të gjitha kostot përkatëse. Mendoj se e kam specializimin e duhur për këtë sektor, prandaj pranova këtë sfidë, që më ka dhuruar dhimbje por edhe grimca lumturije.
Cilat ishin vështirësitë e para më të paparashikuara në fillimet e marrjes së kësaj detyre?
Koncepti që ka egzistuar, që ka mbijetuar këtu e prej 12 vitesh, ka qenë ai i bunkerizimit të RTSH-së. RTSH, presupozohej si një bunker që i takonte fitimtarit, atij që merrte pushtetin. Ky ishte një koncept dhe një realitet shumë i prapambetur i mosemancipimit të këtij institucioni. Rezultatet e sondazhit të nxjerra nga KKRT, ndoshta kanë treguar dhe hapin e parë përsa i përket një depolitizimi gradual. Për të filluar këtë proces kam ndeshur vështirësitë më të mëdha, për t'u mbrojtur nga presionet e titullarëve të niveleve të para, të dyta dhe të treta, që shkrihen pas kronikave të qilimave të kuq dhe protokolleve që s'thonë asgjë. Në një mënyrë a në një tjetër, "ata" kanë humbur komoditetin e dikurshëm në hapësirat televizive të TVSH.
Keni patur ndonjë reagim jo pozitiv kundrejt kësaj "mbylljeje"?
Padyshim. Duke më bojkotuar dhe duke më konsideruar si mish të huaj, që herët a vonë do të shkulet.
Thuhet se jeni ndër të preferuarit e F.Nanos. Sa e vërtetë është kjo?
Kam marrëdhënie të mira edhe me Berishën, Ngjelën e kam mik. Termi i "preferuar" lidhet ndoshta me legjenda mediatike, por jo me realitetin konkret. Unë nuk kam emëruar askënd dhe nuk kam kompllotuar politikisht ndaj askujt. Jam mik me Nanon, një miqësi që ka ngricat dhe stuhitë e veta dhe që ka lindur në fazën kur ai vetë, ishte në një periudhë shumë kritike. Katarsizmi i tij ishte tërheqës dhe ndryn edhe sot vlera mbarëkombëtare. Mundohem të përcjell tek ai, të vërteta që "yesmenët" nuk ja thonë. Unë nuk jam Nanoist dhe as Nano nuk është Zhejist. Kemi një miqësi brenda diferencave të seicilit, që Nano di, së paku në rastin tim ta respektojë me mjaft elegancë.
A mendoni se të qënit mik i Fatos Nanos iu ka ndihmuar edhe ju në punën tuaj?
Nuk mund të mendoj kështu kur qeveria e tij, sapo vura këmbën si Drejtor i Përgjithshëm, i shkurtoi shkurtoi RTSH-së, 1 miliard lekë nga buxheti 2003-shit.
Ç'mendim keni për paraardhësit tuaj...?
Më lejoni të mos shprehem.
Ju patjetër keni ardhur në këtë institucion me projektet tuaja, a duket se kanë filluar të marrin udhë?
Jemi akoma duke punuar në themel, punë më së shumti ende e padukshme. Kur të mbarojmë themelin atëhere do fillojmë e të hedhim katet e larta. Sepse projektet që të realizohen kërkojnë tepër dinamizëm, por sëpari duhet mbyllur themeli dhe një numër jo i vogël reformash strukturore.
Në shtator fillon fushata për zgjedhjet lokale, do të ketë ndonjë model të ri për paraqitjen e fushatave politike?
Zakonisht nuk është e këshillueshme të eksperiementohet para fushatave, Më e mira për të gjithë konkurentët është aksesi i barabartë mediatik në hapësirat e transmetimit të TV publik shqiptar.
Çfarë ka ndryshuar më shumë nga ardhja juaj në këtë institucion?
Ka ndryshuar ajo që, pjesa më e madhe e stafit punonjës, me dëshirë apo shqetësim pret që ky ndryshim të vazhdojë. Ka ndryshuar koncepti se TVSH është e sigurtë për njerëz që nuk punojnë. Pra ka ndryshuar ideja se ishulli i qetësisë dhe papunësisë do ta lodhë apo përgjumë diku më vonë edhe Zhejin.
Si arrini ta ruani raportin mes gazetarisë dhe funksionit që keni?
Gazetaria është dashuria ime e madhe, por mundohem që pozicionin tim të analistit dhe gazetarit ta konsumoj në ekranet e tjera, për arsye se do më dukej e pakonceptueshme ta bëja në ekranin e televizionit publik shqiptar. Sidoqoftë në një eveniment madhor, si përshembull lufta e Irakut, më është dashur të ideoj një emision të domosdoshëm "Lufta kundër Luftës".
Të qenit gazetar i mirëfilltë dhe aktivist a ju ndihmon në punën tuaj? Cilat janë avantazhet?
Si një mullixhi i mirë mundohem që të mos ma kalojnë aq shpesh ujin nën rogoz, sepse si gazetar, unë e di se ku kalon uji.


Jam i martuar, por pëlqej bashkëjetesën

Ç'mund të na thoni diçka për jetën tuaj të re, për martesën tuaj?
Engelsi ka patur të drejtë që e ka quajtur martesën një konvencion borgjez. Nuk kam ndonjë adhurim për martesën si institucion, mendoj se martesa më e madhe është rezonanca shpirtërore, njerëzore me njeriun që do. Unë mendoj se bashkëjetesa është pakti dhe marrëveshja më e qëndrueshme, megjithatë kam kapërcyer bindjen time dhe jam martuar (me letra) të cilat nuk më kanë bërë ta dua më pak apo më shumë gruan time.
Dimë gjithashtu se së shpejti prisni të bëheni baba...?
Po, presim të lindë një djalë të cilin e kemi parë në eko (dhe që me një xhest shumë burrëror gjuante me shqelma).
A ju gëzon fakti që është djalë apo do t'ju gëzonte më shumë një vajzë?
Meqë e kam një vajzë, Gerin, I vinte rradha djalit besoj. Vajzat janë më të ëmbla pa diskutim, por djemtë japin iluzionin e vazhdimësisë.
A mund të na flisni pak për vajzën?
Vajza është një pjesë e trazuar, por edhe e mrekullueshme e jetës sime, e cila jeton me nënën e saj në Itali dhe ndjek aty liceun shkencor. Vjen herë pas herë me pushime në Shqipëri. Ka shumë dëshirë të kthehet në Shqipëri, por unë mendoj që ajo duhet të kthehet këtu pasi të shkollohet më së miri.
Nëna juaj, artiste e njohur, çfarë ka përfaqësuar dhe përfaqëson për ju?
Nëna ime, Besa Imami është një mikja ime e madhe. Për shumë vite të punës sime krijuese artistike, sidomos në ato të teatrit, krijimtarisë artistike ku unë kam shpenzuar shumë energji, ka qenë një busull. Jam shumë i lumtur që kam trashëguar nga ajo qëndrueshmërinë. Ajo ka një qëndrueshmëti të hekurt dhe ndoshta edhe frymëzimi që djalit t'i vemë emrin Hekri, buron nga ajo.
Thonë se jeni shumë të lidhur. Si janë marrëdhëniet tuaja?
Mamasë sime i pëlqen gjithmonë ta thërrasim Loke, siç thërrasin kosovarët. Loke është shumë afër dhe me termin Loçkë (zemër), ç'ka rrëfen se në shqip, lokja është Loçkë.
Po me babain tuaj mbani lidhje po kaq të fuqishme?
Petro Zheji, është një Kapiten vizionesh dhe kalorësie të humbur kohe dhe të pakohë. Jeton në Amerikë dhe pres e përgatis kthimin me tërsëllimë të studimeve të tij.
Nusja juaj gjithashtu merret me art...
Po, dhe më vjen shumë mirë për këtë, është pianiste. Pres me padurim kompozimet e saja, të mëndafshta, të papritura dhe shtegtimtare.

Skeda personale
Mosha: 41 vjeç
Pesha: mbi 100 kg (Dikur kam qenë notar, basketbollist dhe jam marrë shumë me sport. Kjo fibër e fituar në rininë e hershme, mban peshën dhe streset e tanishme).
Gjatësia: 1.82
Ushqimi i preferuar: peshku
Libri që pëlqen: Don Kishoti
Aktor i preferuar shqiptar: Besa Imami
Aktor i huaj: Mel Gibson, Al Paçino
Model në gazetari: Gazetari italian Xhuliano Ferrara, i cili peshon pothuajse 200 kg, një nga gazetarët më autoritar në Itali.

@SPEKTRI

e.

[MI CORAZON]

"Drejtori qe rikthen pasionin e humbur ne RTSH..."

Brenda institucionit edhe mund ta riktheje, por tani qe ka disa televizione private...pasioni i teleshikuesve per ate shteteror nuk besoj te jete si 15- 20 vjet te shkuara...

P.S Marash Mirashi gazetar...o zot...

[BUJAR]

Me mire thoni "drejtori Qe e kthen televizjonin publik ne zedhenes te kryeministrit"