Opozita: "Eja me ne!"

[Albo]

Nevoja për zgjedhje qytetare

Entuziazëm dhe pjesëmarrje e mijëra qytetarëve në Pallatin e Kongreseve. Ngjyra, ritëm, teknikë dhe luk europian i standardeve më të larta i gjithë konfiguracionit opozitar në hapjen e fushatës

Hapja e fushatës ka filluar dje pasdite rreth orës 19:00 dhe është mbyllur pas rreth një orë e gjysëm në sallën e Pallatit të Kongreseve. PD dje është shfaqur me të gjithë drejtuesit e saj të veshur me kostume të zeza me përjashtim të nënkryetares demokrate Topalli, e cila ka qenë e veshur me ngjyra të hapura që korrespondonin edhe me sfondin e sallës së pallatit të Kongreseve ku ishte vendosur një panoramë e madhe me grupin e të rinjve demokratë që hidhnin përpjetë kapelat bardhë e blu me slloganin të shkruar mbi to "Ejani me ne!"

Panorama e madhe e shfaqur me gëzimin e të rinjve dhe qiellin blu në sfond, tregonin optimizëm, festë, qartësi dhe mbi të gjitha siguri në fitore. Kaq i madh ka qenë interesimi i qytetarëve të kryeqytetit sa që shumë përpara kohës së fillimit të hapjes së fushatës, njerëzit kishin mbushur plot e përplot paletet dhe karriget e Pallatit të Kongreseve. Vendet ishin zënë që herët, por organizatorët kishin mundur të mbanin vendet e para të sallës për drejtuesit e PD-së si dhe gjithë kandidatët e PD-së për kryetarë bashkish. Salla u duk se mori flakë në momentin kur brenda saj u shfaq kryetari i PD-së Sali Berisha. "Fitore, fitore, fitore!" ishin parrullat e hedhura në një kor gjigant të mijëra të pranishmëve kur Berisha ngriti dy gishtat e dorës në shenjën e fitores për të përshëndetur qytetarët pjesëmarrës. Ai u prit që në holl të Pallatit të Kongreseve nga të gjithë drejtuesit më të lartë të PD-së përfshirë edhe avokat Ngjelën, ndërsa dy grupet e të rinjve u ndanë në dy pjesë nëpërmjet të së cilëve kaloi kryetari demokrat që shoqërohej nga e shoqja, Liria. Pasi u shtrëngoi dorën drejtuesve të partisë që ishin të gjithë të veshur me kostume të zeza, Berisha pyeti se nga cila anë të hynte në pallat dhe u drejtua për nga e majta duke çarë vetë i pari mes njerëzve që kishin mbushur sallën. Pas tij hynë të gjithë drejtuesit e PD-së ku avokat Ngjela ishte i dyti. Në këtë moment të gjithë të rinjtë e grupit prej 30 vetësh me uniforma dhe lule në dorë u ngjitën në skenën e pallatit të Kongreseve dhe filluan të kërcejnë nën ritmin e këngës "Fitore" të grupit të njohur Modern Talking. Pas një prezantimi të shkurtër të pjesëmarrësve më kryesorë në sallë, filluan të zënë vendet e tyre të gjithë kandidatët kryesorë për bashkitë e vendit duke filluar me Vlorën, Durrësin, Sarandën etj.. Pasi të gjithë kandidatët zunë vendet e tyre, në skenë u ngjit kryetari demokrat Berisha, i cili u kujdes që në të majtë të tij të kishte kreun e republikanëve Mediu dhe atë të PBL-së Teodor Laço, dy partitë aleate me të cilat PD-ja ka marrëveshje të plota paraelektorale. Të vendosur afër kryetarit të PD-së, në të majtë Mediu, Laço dhe të djathtë të tij Ngjela, Kristaq Bisholla, Avni Hoxha etj., të gjithë kandidatët kanë pritur me durim fjalimet e Ngjelës, Berishës, Laços e Mediut për të përfunduar më pas nën ritmet moderne dhe rinore të spektaklit të djeshëm që opozita i dhuroi qytetarëve me mesazhin; Rrini të qetë dhe Ejani me ne të ndryshojmë vendin. Vetë kryetari i PD-së Sali Berisha ka dalë para sallës me një vajzë të vogël të ngritur lart në krahë, e cila ka përshëndetur pjesëmarrësit me flamurin e vogël në ngjyrë blu që mbante mbi vete fjalët, "Ejani me ne!"

[Albo]

Fjala e Sali Berishës

Përse shqiptarët do t’i bashkohen opozitës

Ne hapim në këtë takim fushatën elektorale të Partisë Demokratike dhe aleatëve të saj për zgjedhjen e qytetarëve të parë të bashkive dhe të komunave të Shqipërisë dhe të parlamentarëve lokalë në tërë vendin. Qëllimi ynë themelor në këto zgjedhje është vendosja në piedestalin e merituar të qytetarit shqiptar, vlerave të tij dhe të shoqërisë ku ai jeton, zgjidhja e problemeve të tij ekonomike, sociale, edukative, shëndetësore. Sot në Shqipëri, hendeku më i frikshëm është hendeku që thellohet pandërprerë midis qytetarëve të ndershëm dhe të përgjegjshëm shqiptarë që varfërohen, çpunësohen çdo ditë, që vuajnë për ujë, drita, ushqime, ilaçe, që jetojnë në skamje dhe pasiguri në rritje, dhe qeveritarëve të tyre të babëzitur socialistë që pasurohen çdo ditë, edhe duke fjetur, që shtetin ligjor e kanë zëvendësuar me shtetin ligjor personal, që të ardhurat që mblidhen nga taksat dhe tatimet e qytetarëve nën moton, tashmë famëkeqe punojmë, por vjedhim nga pak, i përdorin jo për shërbime publike të qytetarëve, por për vakanca përrallore, për vila, pallate, orgjira dhe kontot e tyre bankare të pista. Në këto zgjedhje ne do të zëvendësojmë cinizmin, babëzinë, arrogancën e qeveritarëve të sotëm me respektin, dhembsurinë, pastërtinë, përgjegjësinë qytetare, fshehtësinë e hajnave, modelin e Padrinove, me qeverisjen. Ndaj sot ne ftojmë çdo qytetar shqiptar 'Eja me ne'. Ne do fitojmë!

Ne ftojmë do zgjedhës shqiptar, Eja me ne, le të pastrojmë së bashku me votën tonë shtëpitë e para të qyteteve dhe komunave tona nga mashtrimet, abuzimet, nepotizmat, skandalet, vjedhjet, pashpirtësinë e qeveritarëve socialistë, dhe të vendosim aty vlerat më të mira, përgjegjësinë, ndershmërinë, përkushtimin qytetar.


--------------------------------------------------------------------------------

Zonja dhe Zotërinj,

Ne paraqesim në këto zgjedhje si kandidatë për qytetarë të parë të qyteteve dhe komunave të vendit, për parlamentarë vendorë të tyre, jo vetëm individë të aftë por para së gjithash, qytetarë të vlerave të vërteta, të virtyteve më të arrira të individit dhe të familjes shqiptare. Ata nuk vijnë nga malavita, nga klanet kriminale, nuk kanë lidhje me padrinot, as dhe kumbarë të krimit. Mbi ta nuk rëndojnë pronat e pista dhe pasuritë që turpërojnë njeriun me orgjinë e tyre. Jo, ata vijnë nga fondi moral i qyteteve dhe komunave tona. Ata, emra të dashur të shoqërisë dhe komunitetit ku jetojnë, janë mësues të përkushtuar të fëmijëve tuaj, biznesmenë të ndershëm, promotorë të vërtetë të zhvillimit të komuniteteve të tyre, mjekë të talentuar, humanistë të vërtetë, intelektualë të shquar, avoketër të njohur, inxhinierë, agronomë, por para së gjithash, qytetarë me vlerat më të spikatura të shoqërisë shqiptare.

Prandaj dhe sot, me krenari të ligjshme, i drejtohem çdo shqiptari "Eja me ne", voto vlerat, virtytet, ndershmërinë e kandidatit tonë, sepse ai me përkushtimin ndaj teje, me ndershmërinë e tij, do të sjellë ndryshimin e shumë pritur dhe që ti meriton.

Ne jemi ndryshimi! Ne do të fitojmë!


--------------------------------------------------------------------------------

Zonja dhe zotërinj,

Ne hyjmë në këto zgjedhje jo vetëm me kandidatët e kredencialeve dhe vlerave më të mirë qytetare, por edhe me alternativën më të mirë për zgjidhjen e problemeve madhore të jetës së përditshme të qytetarëve tanë, me vizionin më të qartë të zhvillimit të qëndrueshëm dhe perspektiv të komuniteteve në qytetet dhe fshatrat tona. Shqiptarët sot janë banorët e vetëm të kontinentit në vendin më pasuri ujore të pafundme, që vuajnë për ujë të pijshëm dhe përjetojnë tmerret e përmbytjeve ciklike natyrore, që zhyten nga viti në vit gjithnjë e më thellë në terr dhe errësirë, që përjetojnë të ftohtin e dimrit kontinental, që mjekohen me ilaçe të skaduara, shkollohen në klasa pa xhama, udhëtojnë në rrugët e botës së tretë, jetojnë në mjedise ndër më të ndoturit, dhe thithin në sheshet e qyteteve të tyre ajrin më të ndotur të planetit, që iu ofrohen shërbimet publike më të degraduara.

Prandaj dhe Partia Demokratike deklaron se zgjidhja me urgjencë dhe përmirësimi rrënjësor i kushteve të jetës dhe punës së qytetarëve shqiptarë, furnizimi i vazhdueshëm me ujë dhe drita, rindërtimi i rrugëve, shkollave, kopshteve, parqeve të lojërave dhe terreneve sportive për fëmijët dhe të rinjtë, transportit dhe shërbimeve publike, arsimimi i fëmijeve, kujdesi shëndetësor dhe cilësia e tyre, mbrojtja e mjedisit, ushqime dhe ilaçe të sigurta, të denja për njeriun e qytetëruar, spitale të standardeve europiane, punësimi, kujdesi social, do të jenë përparësitë më madhore të programit tonë. Ne shpallim këtë përparësi dhe jemi të bindur se do t'i realizojmë ato. Eja me ne, është ftesa jonë, sepse "Të parët qytetarët" do të jetë motoja e qeverisjes sonë. Decentralizimi dhe autonomia e qeverisjes lokale janë jetike jo vetëm për standardet demokratike në nivelin e qeverisjes lokale, por janë gjithashtu përcaktuese për garantimin e të ardhurave dhe fondeve të domosdoshme për financimin e projekteve infrastrukturore, ekonomike, sociale të bashkive dhe komunave tona.

Ne jemi të bindur se fondet për zgjidhjen e problemeve madhore të qyteteve dhe komunave, sigurohen para se gjithash nga vjelja dhe përdorimi transparent dhe me ndershmëri i taksave dhe tatimeve që paguajnë qytetarët shqiptarë. Sot, nga 60 lekë që ato paguajnë taksa për çdo 100 leke qe shpenzojne, vetëm 20 hyjnë në arkën e shtetit, kurse 40 përfundojnë në xhepat e qeveritarëve. Burimet financiare gjinden në donacionet, grantet dhe kreditë e fondacioneve dhe të institucioneve financiare të vendeve mike.

Të mos harrojmë se për shkak të vjedhjes dhe shpërdorimit, qeveritarëve te sotëm iu lëvrohen vetëm 8 % të fondeve të premtuara.

Ne zotohemi që duke rritur besueshmërinë, efiçencën, transparencën e qeverisjes të shumëfishojmë lëvrimin e fondeve ndërkombëtare për bashkitë dhe komunat tona.

Një përparësi tjetër e madhe e programit tonë do të jetë zhvillimi i turizmit, si rruga kryesore e zhvillimit ekonomik dhe punësimit të qytetarëve. Ne jemi të bindur se me bukuritë e mëdha natyrore, me rrënjët e tyre të lashta historike, qytetet, brigjet dhe alpet shqiptare janë ndër më interesantet, më tërheqëset në rajonin e Ballkanit. Zhvillimi i potencialeve të mëdha turistike të qyteteve të vendit, bashkëpunimi rajonal, në kuadrin e integrimit europian të Shqipërisë përbëjnë mundësi tjera të mëdha në realizimin e projekteve infrastruktutore dhe zhvillimin e qëndrueshëm të bashkive dhe komunave tona.

Ndaj dhe ne ftojmë sot qytetarinë shqiptare, çdo grua, burrë, të ri apo të re 'Eja me ne'. Të ndryshojmë sëbashku jetën tonë.


--------------------------------------------------------------------------------

Zonja dhe zotërinj,

Ndershmëria dhe ligji janë antidot absolut i babëzisë së qeveritarëve. Zëvendësimi i shtetit siçilian të qeveritarëve socialistë, me shtetin ligjor është dhe mbetet objektivi madhor i Partisë Demokratike. Për qeveritarët dhe zyrtarët socialistë dhe administratën e tyre të babëzisë, ligji është thjesht një interpretim politik, them me fjalë të tjera, ai nuk ekziston. Ne zotohemi të zbatojmë ligjin, sepse vetëm kështu mbrohen të drejtat tona, sepse vetëm kështu garantohet jeta, puna dhe investimet tuaja dhe të huaja, sepse vetëm kështu hapet rruga e shkëputjes nga varfëria dhe këputjes së zinxhirit të mafies shtetërore. Vetëm duke zbatuar ligjin i jepet fund masakrës urbanistike. Pa zbatimin e ligjit lumenjtë e Shqipërisë, Drini dhe Vjosa nuk do të mjaftonin për furnizimin me ujë të qytetarëve të Tiranës, pa ligjin asgjë nuk do të garantonte furnizimin me energji elektrike, pa ligj standardet e mjekimit të njerëzve tuaj të dashur, të shkollimit të fëmijëve tuaj. Duke ftuar çdo qytetar të këtij vendi Eja me ne, shpallim se zbatimi i Ligjit dhe shteti ligjor janë diviza jonë.


--------------------------------------------------------------------------------

Zonja dhe Zotërinj,

Programi ynë ekonomik është programi i konkurrencës së lirë, shanseve të barabarta, ekonomisë së tregut të lirë, taksave të ulta, solidaritetit social dhe mbështetjes për qytetarët në pamundësi, është programi i rritjes ekonomike dhe krijimit të vendeve të punës. Prandaj dhe sot, ne ftojmë qytetarin shqiptar: Eja me ne, sepse në këta 6 vjet qeverisje socialiste ke paguar taksat direkte apo indirekte në mallrat që blen, ndër më të lartat në botë dhe 2/3 e tyre u shpërdoruan dhe vodhën nga qeveritarët, dhe ne do të garantojmë transparencë të plotë në përdorimin e do qindarke që ti paguan si taksë dhe heq nga kafshata jote. Kontrolli i shpenzimit do t'ju lihet kundërshtarëve tanë. Eja me ne, sepse përgjysmim taksash do të thotë dy herë për më shumë parà për ty për shpenzime dhe investime që doni, ndërsa për komunitetin do të thotë krijim i pandërprerë i vendeve të reja të punës, për fermerin shqiptar do të thotë përgjysmim i kostos së prodhimit.


--------------------------------------------------------------------------------

Zonja dhe Zotërinj,

Për të gjithë ne që jemi sot në këtë sallë dhe për të gjithë ata që po na ndjekin, këto zgjedhje janë shumë më tepër se sa një garë pluripartiake për qeverisjen lokale. Këto zgjedhje janë para së gjithash, një betejë gjigante midis shoqërisë së ndershme shqiptare, qytetarit të saj që lëngon në skamje, papunësi, pasiguri të përditshme nga njëra anë, dhe korrupsionit qeveritar, krimit të organizuar shtetëror, pra mafies shtetërore shqiptare. Në këtë kontekst, zgjedhjet lokale, si preludi i zgjedhjeve të përgjithshme, janë si të thuash, emergjencë e vërtetë kombëtare, janë momenti që fton të gjithë qytetarët të bashkojnë të gjithë energjitë e tyre, të marrin përgjegjësitë e tyre për të përmbushur një detyrë emergjente për secilin. Historia ka provuar se rruga e vetme për të kontrolluar jetën dhe të ardhmen tënde është të marrësh përgjegjësitë e tua. Ne jemi të bindur se qytetarët shqiptarë do të jenë në lartësinë e këtyre përgjegjësive. Zgjedhjet janë zgjidhje emergjence kombëtare dhe vetiake, mbasi sot krimi shtetëror i organizuar dhe jo ligji, përcakton fatin e qytetarëve shqiptarë. Ai vret çdo ditë në rrugët dhe sheshet e Shqipërisë, ai vendos mjerisht me Gjykatat, prokuroritë, parlamentin, Qeverinë, Këshillat Bashkiake dhe zyrat e tjera të shtetit. Zgjedhjet janë një emergjencë kombëtare dhe individuale, sepse në Shqipëri qeverisja bashkëpunon me krimin dhe të dy së bashku, luftojnë opozitën.

Zgjedhjet janë një emergjencë qytetare, sepse qytetarët shqiptarë duhet të shpëtojnë sa më shpejt nga forma më e tmerrshme e dhunës që është dhuna e varfërisë dhe mjerimit. Ne shqiptarët themi se varfëria është nëna e të gjitha të këqijave dhe askush më shumë se ne nuk e ka provuar këtë. Ajo ndan prindin nga fëmija, detyron burrat dhe gratë të qajnë me lotë të ftohta, merr çdo ditë jetë të pafajshme nga keqmjekimi, kequshqimi, denigron bashkëshortët para njëri-tjetrit dhe fëmijës së tyre, dërrmon njeriun. Mirëpo, për të gjithë ne këtu dhe për çdo shqiptar që sonte po na ndjek, është më e qartë se drita e diellit se nëna e varfërisë është korrupsioni, vjedhja dhe shpërdorimi që iu bëjnë parave të qytetarëve qeveritarët dhe zyrtarët socialistë. Për çdo qytetar është e qartë se në rast se varfëria mjeron, korrupsioni shkatërron. Po, është korrupsioni i qeveritarëve, janë vilat, pallatet, sipërmarrjet dhe monopolet e tyre të ekonomisë kriminale, janë paratë që ato sigurojnë me trafiqe të pista ato që rrënojnë çdo ditë e më shumë qytetarët shqiptarë, jetën, dinjitetin e tyre. Është korrupsioni dhe krimi shtetëror i organizuar që Shqipërinë, vendin e potencialeve të mëdha natyrore dhe njerëzore e kanë shndërruar në një vend për t'u larguar se nuk ka punë, për t'u larguar se jeta bëhet çdo ditë e më e pasigurt, më e shtrenjtë për t'u larguar, se mafia me vendime të Padrinove, ekzekuton në prag të derës apo para Komisariatit të Policisë, qoftë biznesmenë apo komisarë të policisë. Prandaj këto zgjedhje janë një emergjencë e vërtetë qytetare. Se këtejmi dhe thirrja jonë për ju të gjithë, për ty qytetar shqiptar Eja me ne.

Eja me ne, dhe mos harro se zgjedhjet për njeriun e mençur nuk mund të jenë kthim mbrapa, por vetëm vështrim para. Dje, do të më shprehej një student i mençur tani nuk kemi kohë për të humbur duke sharë, mallkuar, denoncuar helodromat e Nanos dhe brigjet turistike të klaneve të tij, monopolet e Dukës, magazinat e Ruçit, pronat piramidale të Malajt, pallatet e Vali-Bules, apo kontot dhe kokainën e Edvinit, financat e Halimit të Nolit. Jo, në këtë moment, sharjet, denoncimet, mallkimet nuk janë zgjidhja. Rrugët e zgjidhjes janë vetëm zgjedhjet. Zgjedhjet janë momenti i veprimit qytetar ndaj dhe ftesa jonë: Eja me ne, t'i japim fund vjedhjes, shpërdorimit, babëzisë së qeveritarëve socialistë ndaj njerëzve më të varfër të kontinentit. Eja me ne, t'i japim fund papunësisë dhe mjerimit, mashtrimit 6-vjeçar të qeveritarëve socialistë, pasurive, monopoleve, pallateve, ekonomisë së tyre kriminale.

Eja me ne, t'i japim fund pasigurisë dhe ekzekutimeve mafioze në rrugët dhe sheshet tona. Eja me ne, sepse si thotë një mendimtar i madh, e keqja, e liga, s'kërkon asgjë tjetër të triumfojë, përveç se indiferencës së njerëzve të mirë. Eja me ne, sepse meritojmë të përcaktojmë vetë fatin tonë dhe jo të jemi viktimë e tij. Eja me ne, t'i japim fund shkretimit të pandërprerë të Shqipërisë dhe shoqërisë shqiptare.

Eja me ne, sepse ne besojmë se Shqipëria nuk është një vend i mallkuar, në të kundërt ajo është një vend i bekuar, por që sot më shumë se kurrë ka nevojë për pak më shumë dashuri nga secili prej nesh, për pak më shumë dhembsuri nga çdo njëri prej nesh, për pak më shumë ndershmëri nga çdo qytetar i saj. Dhembsuria, dashuria, ndershmëria janë forcë dhe jo dobësi. Le ta duam më shumë ne vendin tonë. Eja me ne, se unë dhe ti, si dhe të gjithë ne sëbashku përveç Shqipërisë, nuk kemi vend tjetër ku mund të jetojmë.

Zoti i bekoftë qytetarët shqiptarë dhe vendin e tyre!

Ne do të fitojmë!

[Fredi]

Nuk e pashe por me sa lexova ne gazeta ishte shume bukur dhe me sa duket po fryn ere fitoreje per PD.

[glaukus 001]

Kontraste dhe hije nga Vizionet e kaluara ...

[quote]
PD dje është shfaqur me të gjithë drejtuesit e saj të veshur me kostume të zeza me përjashtim të nënkryetares demokrate Topalli, e cila ka qenë e veshur me ngjyra të hapura që korrespondonin edhe me sfondin e sallës së pallatit të Kongreseve
Panorama e madhe e shfaqur me gëzimin e të rinjve dhe qiellin blu në sfond, tregonin optimizëm, festë, qartësi dhe mbi të gjitha siguri në fitore.
... Në këtë moment të gjithë të rinjtë e grupit prej 30 vetësh me uniforma dhe lule në dorë u ngjitën në skenën e pallatit të Kongreseve dhe filluan të kërcejnë nën ritmin e këngës "Fitore" të grupit të njohur Modern Talking. (Jo vetem ne Shqiperi)

të gjithë kandidatët kanë pritur me durim fjalimet e Ngjelës, Berishës, Laços e Mediut për të përfunduar më pas nën ritmet moderne dhe rinore të spektaklit të djeshëm që opozita i dhuroi qytetarëve me mesazhin; Rrini të qetë dhe Ejani me ne të ndryshojmë vendin. ( rrini te ''qete'' )


Sot në Shqipëri, hendeku më i frikshëm është hendeku që thellohet pandërprerë midis qytetarëve të ndershëm dhe të përgjegjshëm shqiptarë që varfërohen, çpunësohen çdo ditë, që vuajnë për ujë, drita, ushqime, ilaçe, që jetojnë në skamje dhe pasiguri në rritje, dhe qeveritarëve të tyre të babëzitur socialistë që pasurohen çdo ditë, edhe duke fjetur, që shtetin ligjor e kanë zëvendësuar me shtetin ligjor personal, që të ardhurat që mblidhen nga taksat dhe tatimet e qytetarëve nën moton, tashmë famëkeqe punojmë, por vjedhim nga pak, i përdorin jo për shërbime publike të qytetarëve, por për vakanca përrallore, për vila, pallate, orgjira dhe kontot e tyre bankare të pista.
( tani e kemi rrallen ne mjaft u pasuruat ju te kuqt)

.... le të pastrojmë së bashku me votën tonë shtëpitë e para të qyteteve dhe komunave tona
dhe të vendosim aty vlerat më të mira, përgjegjësinë, ndershmërinë, përkushtimin qytetar. ( ah piramidat e shkreta)

Ata nuk vijnë nga malavita, nga klanet kriminale, nuk kanë lidhje me padrinot, (e kuptove o shqypo?)

Ne zotohemi të zbatojmë ligjin, sepse vetëm kështu mbrohen të drejtat tona, sepse vetëm kështu garantohet jeta, puna dhe investimet tuaja dhe të huaja, sepse vetëm kështu hapet rruga e shkëputjes nga varfëria dhe këputjes së zinxhirit të mafies shtetërore. ( po testat do kontrollohen apo s'ka nevoje se njihen te tere?)

Eja me ne, sepse përgjysmim taksash do të thotë dy herë për më shumë parà për ty për shpenzime dhe investime që doni, ndërsa për komunitetin do të thotë krijim i pandërprerë i vendeve të reja të punës, për fermerin shqiptar do të thotë përgjysmim i kostos së prodhimit. (Bushizem?)

Eja me ne, t'i japim fund pasigurisë dhe ekzekutimeve mafioze në rrugët dhe sheshet tona. ( ''the magic stick'')

Eja me ne, se unë dhe ti, si dhe të gjithë ne sëbashku përveç Shqipërisë, nuk kemi vend tjetër ku mund të jetojmë. ( kjo eshte arsye per fitore hm, amin)


Ne do fitojme !

[Honezmi]

Do fitoje populli shqiptar qe do te shpetoje nga keta KUSAR te pa turp, qe e kan shpene popullin ne grahmat e fundit te mjerimit .

Perpara dhe me fitore kundra gjakpirsve pushtetare.
Levizni o shqiptare dhe votoni per kualicjonin opozitar, ne qofte se nuk doni qe te vdisni ne mjerim, te shkelur e te poshteruar nga keta barbare.

[fourstrings]

Amon mer jahu ishalla fitojne demokratet se kur i shof fatos nanon dhe ilir meten ne televizor si kryeministra etj..me vjen me vra veten.Sikur po me hajne buken!!!!!!
Pershendetje.Goni

[SUPERSTAR_N1]

Pogradec:- Kryetari i demokratëve Berisha i shoqëruar edhe nga kryerepblikani Mediu prezantoi dje kandidatin për kryetar Bashkie të Elbasanit Sotiraq Ambo. Në fillimit të takimit, Berisha u shpreh se kishte ardhur në qytetin e djepit të kulturës së Lasgush Poradecit e Mitrush Kutelit. Ai e ka portretizuar kandidatin e PD-së Sotiraq Ambo si pedagogun që përfaqëson ndershmërinë, virtytin seriozitetin dhe pastërtinë e shpirtit pogradecar. 12 Tetori, sipas Berishës, do të jetë dita që do të zbulohen vjedhjet, cinizmi dhe abuzimet e shumta. Berisha e ka quajtur Pogradecin perlë të Evropës që sipas tij është i mbytur nga një papunësi mbi 50% dhe jeton me 1 ose 2 dollarë në ditë. “Është e çuditshme që ky qytet përrallor si Pogradeci kur ka mundësi jo vetëm të punësojë qytetarët e tij por edhe të punësojë Korçën dhe Elbasanin së bashku, të jetë i varfër”, -tha ai. Berisha i vazhdoi akuzat e tij duke theksuar se janë 600 milionë dollarë në vit që në vend që të shkojnë për rrogat e qytetarëve, për ujësjellësa e spitale, shtetarët e sotëm ngrenë hotele e motele në bregdet. Berisha theksooi se, “në do t’ju ulim taksat për t’i dhënë frymëmarrje tjetër këtij qyteti turistik të mrekullueshëm me njerëz të ndershëm e punëtorë që vetëm pak kohë të jetosh në këtë qytet merr vlerat e një qytetari”. “Ejani me ne që të ndëshkojmë vjedhësit, korrupsionin pushtetarët abuzivë sepse qeveritarët aktualë vjedhin dhe shpërdorojnë edhe në gjumë kur flenë”, -tha ai. Meë pas foli edhe kryerepublikani Fatmir Mediu.
“Silleni ju ndryshimin ndaj këtyre njerëzve që janë në pushtet.-Duhet të bashkohet e djathta për të arritur fitoren. Lërni mënjanë ndonjë qejfmbetje se do t’i çoni votat tek socialistët”, -theksoi Mediu.

[BUJAR]

Mire e keni ju po nuk te lene komunistet se jane "Mjeshter "te vertete te mashtrimit dhe te vjedhjes se votave.

[TiLoNcE]

o Albo si perfunim i bi qe ti te jesh me demokratet right? ok ene une me ty jom ,por ne tiron do fitoj Ed Rama.Pak rensi ka i kujt partie o ,Tironen e ka bo Yll .

[Orku]

Postuar më parë nga Tironce_TR
o Albo si perfunim i bi qe ti te jesh me demokratet right? ok ene une me ty jom ,por ne tiron do fitoj Ed Rama.Pak rensi ka i kujt partie o ,Tironen e ka bo Yll .

Dukesh qe je demokrat ..... meqe ra fjala ke pjese te Tirones ka bo yll se edhe une shtepine ne Tirone e kam edhe fare afer qendres sa per dijeni, edhe ashtu si gjithe te tjeret nuk kemi uje, drita, jetojme mes plehrave, rruget me gropa nuk po flasim pastaj per vjedhjet qe ka bere ..... per monopolet apo per bizneset qe ka falimentuar.

Se kush do ta fitoje Tiranen do ta shohim diten e zgjedhjeve.