Modelja Arnisa Dervishi

[Albo]

INTERVISTA/ Flet modelja Arnisa Dervishi: Ikja nga dasma me helikopter, një befasi, si ëndërr

Më pëlqejnë shumë fëmijët, ata plotësojnë dashurinë


Albert ZHOLI

S’i ka mbushur ende dy muaj nga martesa, por diskutimet për këtë dasmë të veçantë, vazhdojnë ende....Një martesë interesante, e bukur, plot të papritura. Bëhet fjalë për martesën e modeles së njohur Arnisa Dervishi me muzikologun po të njohur Mc. Arturo . Një dasmë që vezulloi, plot dritë, shkrepje të panumëruara aparatesh fotografikë, kamera në disa pika të lokalit, verë dhe gëzim pa fund. Nga çasti në çast, atmosfera e dasmës ndizej dhe njerëzit e ftuar, befasoheshin me surprizat. Po më shumë befasia ka qenë për vetë Arnisën, e cila dhe pse kishte kohë që bashkëjetonte me Mc Arturo, ai kurrë nuk i kishte treguar për surprizat e dasmës së madhe. Ajo hyri në dasmë, për të parë një dasmë tradicionale, por kur asaj i erdhi fundi, surpriza ishte e paimagjinueshme. Aty disa metra më larg lokalit të dasmës, kur ajo mendonte se do të shkonte në shtëpinë e të dashurit të zemrës, përfundoi në një helikopter të kuq. S’e besonte, ngriti supet, por duart e Mc Arturo ju mbështollën në bel dhe nën fuqinë e atyre duarve ajo e pa veten brenda në helikopter që e kishte ëndërr. Nga darka madhështore, drejt e për pushime me helikopter. Ndoshta është hera e parë që një femër shqiptare përjeton një çast kaq të kënaqshëm, kaq specifik.

Dashuritë janë nga më të ndryshmet. Asnjë nuk i përngjet njëra-tjetrës. Si lindi dashuria juaj me Mc Arturo?

Lindi ashtu si unë nuk e kisha menduar asnjëherë. Një dashuri spontane, e rastësishme, me shikim të parë, të dytë, të tretë. Pas kaq shikimesh na dukej sikur njiheshim prej vitesh. Fjalët sollën takimet, diskutimet, orët e lira, mirëkuptimi, ëndrrat e njëjta, etj...Erdhi dhe u ngjiz dalëngadalë duke sjellë frytet që po shijojmë. Një dashuri as e shpejtë, as e ngadaltë, një dashuri, që kishte në themel sinqeritetin, dashurinë, ëndrra të përbashkëta.

Nga dasma drejt e në helikopter e mendoje?

Kurrë, kurrë. As në ëndërr, aq më tepër që Arturo, s’më kishte bërë me dije. Ishte dita më surprizë e jetës time. Dikur e kisha menduar diçka të tillë, ndoshta e kisha biseduar dhe me Arturon, por kurrë s’e kisha besuar. Ndoshta do të ngelet një nga ditët më pikante të jetës time. Më të befasuar ngelën dasmorët. Pra çdo gjë ishte surprizë e paparashikuar, diçka që të përcjell shumë emocion.

Keni disa muaj martuar si po shkojnë ditët e martesës?

Si mos më mirë. Ikja ishte e mrekullueshme, muaji i mjaltit po ashtu dhe ditët në vazhdim ndjekin të njëjtën rrjedhë bukurie. Dua të theksoj se, ne pas njohjes kishim afërisht dy vjet që bashkëjetonim dhe po aq të celebruar. Celebrimi ynë përkon me datën 11.11.2011. Pavarësisht surprizave, marrëdhëniet tona i kemi përshtatur me traditën shqiptare, pasi të dy familjet tona janë pjesë e kësaj tradite. Njohja jonë ka të veçantat e saj, pas njohjes u fejuam, bashkëjetuam dy vjet, por duke bërë dhe celebrimin njëkohësisht.

Pra dasma ishte një befasi?

Ashtu ishte, ndaj dhe ishte e bukur dhe mua më ngeli në mendje. Mbetet një dasmë e bukur dhe e veçantë. Edhe gjatë muajit të mjaltit ditët kanë qenë po aq të bukura si 4 vjet njohje, fejesë, bashkëjetesë, për të mos thënë më të bukura.

Kjo do të thotë që martesa ishte thjesht një akt formal, nuk ka ndryshuar asgjë mes jush?

Pjesa e dytë e pyetjes ka diçka për t’u përgjigjur. Pra për ne s’ka ndryshuar, asgjë në sensin negativ, por për mirë. Martesa na bëri dhe më të afërt fizikisht, na ka lidhur më shumë me projektet për jetën, të ardhmen, për të folur për ato çka duhet të arrij një çift i ri në perspektivë. Pra diskutojmë më shumë dhe thurnim plane më të detajuara. Familja është përgjegjësi, aq më tepër kur diskutohet për fëmijë.

Dashuritë e forta kanë dhe xhelozi të mëdha, a jeni xheloz ndaj njëri- tjetrit?

Kam dëgjuar xhelozi nga më të ndryshmet, xhelozi dhe nga më absurdet. Edhe tek ne ekziston një xhelozi, por xhelozi që të rimë më shumë afër, që ta kuptojmë dhe me shumë njëri -tjetrin. Ajo që nuk e rëndon xhelozinë tonë është se ne çdo gjë e kemi të hapur ndaj njëri -tjetrit, pra kur nuk ke se çfarë fsheh, xhelozia fashitet. Një xhelozi e mirë, e bukur, e sinqertë që na motivon për një jetë suksesesh.

Çdo mashkull ka të veçantën e vetë, çfarë pëlqeve tek Arturo që të rrëmbeu zemrën fuqishëm?

Gjithmonë kam pasur në mendjen time, që tek mashkulli në radhë të parë të shikoj sjelljen, komunikimin, ndjenjën, respektin, vendosmërinë, çiltërsinë, seriozitetin. Por pas tyre do të ishte patjetër dhe pamja e jashtme. Ai i kishte të gjitha këto dhe për çdo ditë më bënte të lumtur, pra ndjenja ka ardhur duke u forcuar jo duke u zbehur. Ai di të përcjellë emocion dhe të mos e lerë jetën në përgjumje, rutinë, pa energji... E them me bindje që tashmë po e vërtetoj se ka të gjitha cilësitë e një mashkulli që kam apo kisha ideuar në mendjen time.

Në shtëpinë e Arturos ditën e dasmës cili ishte zakoni që të ka bërë më shumë përshtypje?

Ah, po (qesh). Një zakon që s’e kisha parë më parë. Konkretisht ishte derdhja e rakisë para këmbëve të mia (pra të nuses). Ajo pasoi me vendosjen e dorës me mjaltë tek parvazi. Pra çdo vend ka dhe traditat e veçanta. Këto ishin sa të veçanta po aq dhe të bukura. Ishin tradita që përbënin risi në jetën time.

A ka sakrifica sot në dashurinë tuaj?

Për mua sakrificë është që ta mbush jetën e bashkëshortit me gëzim, lumturi duke e mbështetur në të gjitha nismat e tij. Sigurisht që, edhe ai të më mbështesë mua pavarësisht vështirësive që do hasim.

Nuse e re, zakonet shqiptare tregojnë se nusja duhet t’u servirë kafen e mëngjesit, vjehrrit dhe vjehrrës, si vepruat?

Ah, ky ritual ndoshta u mënjanua rastësisht. Ne atë ditë u larguam me helikopter. Pra ikëm me pushime, kështu që nuk pata mundësi

Ndoshta shpejt, por a keni planifikuar të bëni fëmijë?

Sigurisht. Qysh në njohjet tona të para ne kemi menduar. I dua marrëzisht fëmijët po aq sa dhe Arturo. Projektet janë të afërta, fëmija do e shtoj më shumë dashurinë tonë, jam i bindur për këtë.

Dashuria apo karriera kë do zgjidhje?

Keni planifikuar të bëheni nënë tani menjëherë pas martesës?

Mirë është të dyja. Por pa karrierë nuk ka dashuri, pasi nuk ke impuls në jetë.