Teksti i letrës së dorëheqjes së Pashk Tushës, dërguar ministrit Luan Rama
Artur Qorraj
Drejtori i Policisë së Durrësit i kërkon ministrit Rama lëvizje nga qyteti bregdetar. "Zoti ministër, për arsyet e mëposhtme kërkoj të më caktoni në një detyrë tjetër, por jo në Durrës.
Unë nuk mund të bashkëpunoj me policë të inkriminuar, pjesë e mafias dhe trafiqeve". Kjo ka qenë një pjesë e tekstit të së ashtuquajturës dorëheqje që, Tusha i ka lënë mbi tavolinë ministrit Rama afër mesnatës të së enjtes. Këtë e bëjnë të ditur burime pranë stafit të ministrit Rama. Tusha nuk pranon të japë arsyet, e të bëjë komentet, por përplasjet e tij me disa nga oficerët e komisariateve që ka nën varësi dhe dyshimi për pastërtinë e tyre, deri tek implikimet, ka sjellë ultimatumin e kryekomisarit. "Ka edhe probleme që ministri vendos vetë nëse do i japë zgjidhje", tha ai dje, ndërsa merrte pjesë në ceremoninë mortore të policit të Fushë-Krujës. Mësohet, sipas burimeve nga ministria se, ndër faktet e renditura kanë qenë edhe pengesa gjatë goditjes së trafikut të drogës nga Durrësi, si shkak i implikimeve të policëve. Fill pas përfundimit të mbledhjes maratonë me drejtorët në ministri dhe në qarqe, kreu i bluve të Durrësit ka biseduar me drejtorin e përgjithshëm dhe me ministrin. I gjendur përballë një situate të tillë, ai ka përpiluar një letër të gjatë, ku duke përfituar nga statusi i oficerit të policisë ka bërë një kërkesë për qarkullim. "Kërkesën nuk e kam bërë për t'u larguar nga policia dhe as për ngjarjet e fundit. Unë nuk kam lidhje me to. Por ka shumë arsye të tjera që ia kam parashtruar ministrit në letër dhe ai nëse do mund t´i bëjë publike", është shprehur Tusha për gazetën "Panorama". Por dikasteri blu dje ka heshtur sikur të mos kishte ndodhur gjë. Zyrtarë të lartë që ishin pjesë e mbledhjes thanë se gjatë saj nuk ka patur debate, përveç porosive, kritikave e paralajmërimeve të ministrit për ndryshime e masa të rrepta. "Tusha ka shkuar më vonë tek ministri", thanë këto burime. "Unë jam i gatshëm të shkoj ku të më çojë ministri si pjesë e policisë ku bëj pjesë edhe vetë, qoftë ulje në detyrë, qoftë i njëjti pozicion, por jo më në Durrës", u shpreh kryekomisari. Po kështu, kryekomisari ka patur probleme dhe me një pjesë të efektivit të policisë së Durrësit, Krujës e Fushë-Krujës. Ai ka kërkuar që një pjesë e oficerëve të lëvizin, se me ta nuk mund të punojë. Madje, në një letër që shkruante pak muaj më parë, ai i kërkonte me ngulm realizimin e këtyre kërkesave Ramës.
Ja disa nga arsyet e hedhura në letër nga Pashk Tusha
Implikimi i oficerëve dhe agjentëve të policisë së Durrësit në trafiqe, me kontigjentët kriminalë dhe kërkesa për largimin e tyre
Pamundësia për të hyrë në Fushë-Krujë e Krujë ku situata është më e rënduar dhe ku ka shumë të meta të policisë që bashkëpunon me elementët kriminalë
Mbrojtja e trafikantëve e kriminelëve nga persona të veçantë, duke i ndihmuar me informacione
Pamundësia për të luftuar trafikun e drogës në port, deri ai i klandestinëve, në të cilët kanë qënë drejtues edhe oficerë policie
Moslargimi i oficerëve të inkriminuar nga radhët, për të cilët kërkesa u bë disa muaj më parë
Implikimi në dy ngjarjet e fundit të efektivave të policisë, deri brenda komisariateve me personat që kryen krimet
Mungesa e një mbështetjeje të fuqishme nga ana e ministrisë për të luftuar krimin e organizuar e trafikun e drogës
Mungesa e pajisjeve të premtuara për kontrollin e mjeteve në port dhe apatia që sillte kjo mënyrë e të punuarit në polici
Tusha flet për “Panorama”
Kërkova të lëviz nga Durrësi
Zoti Tusha, cilat janë arsyet e vërteta të dorëheqjes tuaj që ia keni dorëzuar ministrit Luan Rama?
Nuk bëhet fjalë për dorëheqje, por për një kërkesë nga ana ime drejtuar nëpërmjet një letre ministrit Luan Rama. Këtë kërkesë e kam bërë mbrëmjen e së enjtes, fill pas mbledhjes. Aty kam renditur edhe arsyet e vërteta të kësaj kërkese, por që nuk mund t´i them, pasi i vetmi person që mund t´i deklarojë është vetë ministri.
Jeni ndier i kërcënuar, ju kanë bërë presion që të largoheni, apo lidhet me ngjarjet e fundit?
Me dy ngjarjet e fundit nuk ka asnjë lidhje kërkesa që kam bërë. Edhe unë vetë nuk kam lidhje me to. Po kështu, nuk jam ndier i kërcënuar, apo të më kenë bërë presion. Thjesht ka qenë një iniciativë që mua më jep detyra si oficer, pasi dorëheqja nuk është e shkruar me ligj. Unë kam kërkuar të lëviz nga Durrësi.
Keni shprehur ndonjë vend konkret pune?
Për mua nuk ka problem. Mund të kthehem në detyrën që kam qenë më parë në Akademi, qoftë edhe mund të më ulin në detyrë, apo të më lenë përsëri drejtor. Unë dua të lëviz nga qyteti i Durrësit dhe këtë ia kam shkruajtur ministrit së bashku me motivet.
Bëhet fjalë për implikimin e policëve me kontigjentët kriminalë?
Nuk mund të them asgjë, pasi nuk më lejohet. Unë them se do të mirëpres përgjigjen e ministrit që nuk më ka ardhur ende dhe derisa të mbërrijë do të vazhdoj detyrën. Në letër i kam parashtruar ministrit kërkesat e mia. Ai është i lirë të vendosë për to dhe për lëvizjen time. Tjetër gjë nuk mund të them.
Ngjarjet e fundit në Durrës dhe Fushë-Krujë nga hetimet e kryera kanë ngritur versione të besueshme, se një pjesë e policisë ka bashkëpunuar, ose të themi është e implikuar në to. Keni ofruar ndonjë rrugëzgjidhje?
Përsa i përket implikimeve apo informacioneve të tilla, nuk dëshiroj të shprehem dhe nuk mund të them asgjë që i përket hetimeve. Policia, sigurisht që ka probleme që duhen zgjidhur dhe unë kam ofruar zgjidhje, por është vetë ministri që vendos për këtë gjë. Unë kam bërë detyrën time dhe e shpreh mëse një herë që kërkesa për lëvizje nuk ka lidhje me ngjarjet, por me shkaqe të tjera, që pak a shumë janë shqetësuese. Nuk mund të them asgjë rreth letrës, apo të bëj komente.
Përgjigju Duke Cituar
Krijoni Kontakt