Tomor Osmani, 40 vjet gjurmim në Albanologji

[drini_në_TR]

Brikena Shllaku
Trëndafile Visha

SHKODËR - Është një ndër figurat më të spikatura të inteligjencës shkodrane. Pinjoll i një familjeje arsimdashëse që ka kontribuar për më shumë se dy shekuj në arsim, prof. dr.Tomor Osmani, me të drejtë cilësohet si krenaria e qytetit të Shkodrës. Falë kontributit të tij në fushën e Gjuhësisë (ka botuar mbi 200 studime dhe artikuj në shtypin shkencor), profesori i njohur është nderuar një vit më parë nga presidenti i Republikës, Alfred Moisiu me medaljen "Mjeshtër i Madh".

Gjuhëtari

Shkodranët ndihen mirë kur tregojnë se janë pjesë e një tradite dhe kulture të vjetër, se Shkodra gjatë gjithë historisë ka nxjerrë emra të nderuar. Por në fakt, ndjesia është akoma më e fuqishme për ta kur shohin se mes tyre ka sërish emra vezullues dhe po aq modestë, të cilët me kontributin e tyre të përditshëm shkencor dhe intelektual, janë kthyer natyrshëm në pjesë të asaj tradite të vyer, të mbartur ndër shekuj. Puna e bërë gjatë 40 viteve në arsimin e lartë, botimet dhe gradat shkencore, figura e kompletuar prej intelektuali, janë të gjitha këto arësyet mëse të mjaftueshme që profesor. dr. Tomor Osmani të jetë njëri prej tyre. Ky i fundit ka mbi 40 vjet në arsimin e lartë e duket se është në kulmin e aktivitetit të tij. Profesor Osmani drejton sektorin shkencor të Albanologjisë pranë Universitetit të Shkodrës (një nga meritat e tij është krijimi dhe arritjet në sektorin e Albanologjisë). Dera e zyrës në katin e dytë të Universitetit "Luigj Gurakuqi", Fakulteti i Shkencave Shoqërore, qëndron gjithjë e hapur. Pranë një morie librash dhe letrash, profesori i vjetër dhe i nderuar është i gatshëm të ndihmojë jo vetëm studentët, por edhe pedagogët e rinj. Çdo ditë në aktivitet të plotë, duke përgatitur materiale për botim, apo dhe materiale të tjera, të cilat sektori shkencor i Albanologjisë ka marrë përsipër të botojë. Ndërkohë, profesor Tomor Osmani është titullar i lëndës "Morfologjia e Gjuhës Shqipe". E gjithë puna e bërë ndër këto vite është vlerësuar. Vetëm një vit më parë (24 tetor 2002) presidenti i Republikës, Alfred Moisiu e ka nderuar me medaljen "Mjeshtër i Madh". Megjithëse Shkodra ka një numër intelektualësh dhe figurash të shquara, titulli në fjalë u është akorduar vetëm katër prej tyre: profesor. dr. Jup Kastratit, shkrimtarit Fadil Kraja, përkthyesit Gjon Shllaku dhe prof. dr. Tomor Osmanit.

Familja

Profesor Tomor Osmani rrjedh nga një familje e vjetër shkodrane, me tradita të veçanta në mësimdhënie. Babai i tij, Ethem Osmani dhe kunata, Urti Osmani, janë nderuar me titullin "Mësues i Popullit". Ndërsa vëllai, Shefik Osmani është nderuar me titullin "Mësues i Merituar" (gruaja e këtij të fundit, Liria ka punuar gjithë jetën mësuese dhe drejtuese në arsim). E gjithë familja së bashku ka kontribuar plot 220 vjet në arsim. Shtëpia e familjes Osmani ndodhet në një nga rrugicat e vjetra të Shkodrës. Mbrujtur brenda këtij gjaku mësuesish, profesor Osmani vijon përgatitjen e një brezi të talentuar mësuesish e studiuesish. "Krenohem kur dëgjoj se studentët që kemi përgatitur ne brezi i pedagogëve të vjetër kanë ecur shumë përpara, kanë bërë emër në gjuhë, letërsi, gazetari dhe politikë", thotë profesori i vjetër.


Gjuhëtari ka kryer mbi 200 studime

Ja botimet ndër vite të profesorit
SHKODËR - "Profesor Tomor Osmani është studiuesi më kompetent për problematikën e alfabeteve të gjuhës shqipe". Kështu është shprehur prof. dr. Gjovalin Shkurtaj. Ndërkohë, drejtuesi i sektorit shkencor të Albanologjisë, Osmani ka botuar monografi (si "Historia e alfabetit të gjuhës shqipe", "Udha e Shkronjave" "Eufemizma", "Universiteti i Shkodrës ndër vite"), si dhe një sërë tekstesh mësimore. Profesori i njohur shkodran ka shkruar mbi 200 studime dhe artikuj në shtypin shkencor dhe periodik si "Studime Filologjike", "Kultura Popullore", "Gjuha Jonë", "Buletin Shkencor", "Gjurmime Albanologjike", "Gjuha Shqipe" etj. Shumë prej këtyre studimeve janë botuar edhe në Prishtinë, Tetovë dhe Ulqin. Për planet në të ardhmen, profesor Osmani shprehet: "Përveç studimeve të ndryshme po përgatis në një ose dy vëllime studimin "Vështrime Gjuhësore", në të cilin përfshihen disa prej veprave të autorëve të Rilindjes dhe të kohës së sotme. Janë gjithsej 500 faqe shtypi".

(marrë nga gazeta Balkanweb)