Po e sjell editorialin e gazetës “JAVA” (17 Korrik 2003) me shkrimin e Migjen Kelmendit mbi 'identitetin kosovar'.
Që në fillim po shprehem se jam kundër 'identitetit kosovar' si tentim të bashkësisë ndërkombëtare për të krijuar një krijesë artificiale, në vazhdën e eksperimenteve 'multietnike' duke u shërbyer me Kosovën si laborator e shqiptarët si minj të bardhë. Sipas mendimit tim, 'identiteti kosovar' nënkupton humbjen e identitetit shqiptar. Fryma e tolerancës ndaj minoriteteve është një gjë, ndërsa asimilimi në një 'identitet' të ri (në emër të bashkëjetesës) është diç tjetër. Asgjë nuk më lidh me një serb përveç afërsisë territoriale, gjersa me një shqiptar nga Shqipëria apo Maqedonia më lidh gjaku, gjuha, kultura, tradita, etj. Prandaj, nuk mund ta identifikoj veten vetëm në bazë të një termi gjeografik. Me pranimin e 'identitetit kosovar' në heshtje do të pranoheshin të gjitha padrejtësitë historike që u janë bërë shqiptareve me copëtimin e trojeve etnike, njëkohësisht duke siguruar justifikim për ato forca politike europiane që janë kundër pavarësisë së Kosovës.
.................................................. .................Tahoxi
Në vijim teksti nga gazeta:
Kur kishim nisë gazetën JAVA, me numrin e parë të saj, Dhetor 2001, nisëm edhe debatim për Identitetin Kosovar. Arsyet janë të shumta. E para, sepse tema e Identitetit Kosovar ishte një temë tabu. Askush asokohe e as sot e kësaj dite nga mediat kosovare nuk i ka hapë faqet e saj ose programet e saj për këte temë. E dyta, sepse ishim thellësisht dhe thelbësisht t’interesuem për t’ardhmen e Kosovës, për parimet që kanë me e përcaktue ate t’ardhme. E ato parime me siguri se ishin dhe mbeten parimet mbi të cilat ndërtohet sot nji shoqni demokratike. Kështu, përpjekja ma e shnoshë, ma e lehtë dhe ma elegante e kapërcimit të urrejtjeve etnike që e sollën luftën në Kosovë, ishte ndërtimi i nji identiteti mbietnik të Kosovës së nesme. Argumenti kryesor që i flitte dhe i rinte në favor jo vetëm këtij debati në JAVA, por edhe kësaj çashtje kruciale të Kosovës sot, ishte përfundimi katastrofik i nji përpjekje me e ndërtue nji shtet etnik të pastër – Serbinë e Madhe të Millosheviqit.
Debakli i atij projekti të Millosheviqit ishte nji porosi për të gjithë nacionalizmat e nacionalistët ballkanik që punonin në projekte shtetesh etnike.
Kontributet që u banë ishin me shumë randësi për momentin politik të Kosovës në vitin 2001. I kujtoj edhe sot mendimet dhe opinionet që i bani publike kryetari i Parlamentit, zoti Nexhat Daci, tue thanë se ky identitet specifik i Kosovës ka ekzistue gjithmonë, por ka mungue guximi qytetar për me e shprehë në mënyrë eksplicite. Njashtu si më kujtohet edhe opinioni i zotit Thaçi që mohonte kategorisht Identitetin Kosovar, si dhe ai i Rada Trajkoviq, i shprehun përmes telefoni se në Kosovë s’ka kosovarë, por vetëm serbë e shqiptarë.
Po çka i bjen me qenë Kosovar? Kush asht Kosovari?
Kjo nuk ishte vetëm pyetje e JAVËS, kjo asht nji çashtje me të cilën çdo qytetar i Kosovës sot ballafaqohet në çdo moment.
Si gjithmonë, çashtja e identitetit nisë me pyetjen: Kush jam une?
Me qenë Kosovar, njashtu si e kuptoj une dhe pa u zgjatë shumë, nuk domethanë mos me qenë shqiptar. Asht mbindërtim i po këtij identiteti. Identiteti Kosovar gjenerohet jo nga etnija, po nga nji element tjetër joetnik: territori.
Përcaktimi joetnik, në rastin e Kosovës – territorial – i identitetit, krijon nji përparësi të madhe për ambiciet shtetformuese të popullatës shqiptare në Kosovë. E para, sepse asht nji parim kompatibil me fundamentet e nji shoqnie demokratike sot. Asht parim që ngërthen, inkludon, që krijon hapsinë për të gjitha etnitë e Kosovës me e konsiderue këte vend njashtu si e kemi konsideru na gjithmonë – shpi. Identiteti Kosovar krijon aftësinë me i rrokë e me i inkludue parimet e nji shoqnie moderne si multietnicitetin, konvivencën, tolerancën, multikonfesionalitetin, multilingualitetin. Njashtu si identiteti etnik ekskludon, në të shumtën e rasteve i përjashton tana këto parime që i përmendëm.
UNMIK këto ditë nisë fushatën me moton: UNË JAM KOSOVA.
Kanë dijtë me qenë të çuditshme, bile shpesh edhe ofenduese fushatat që UNMIK i ka ndërmarrë në Kosovë. Sepse, pikënisja e UNMIKut në Kosovë gjithmonë ka qenë ajo e nji qeverie të gjithdijshme. OmniQeverie. E Kosova dhe qytetarët e saj janë kuptue e adresue si Zulu e Zululand. (Dorën në zemër, jo bash, po jo edhe aq larg të vërtete!)
Fushata UNË JAM KOSOVA më duket se ma në fund e fut UNMIKun në zemër të nji çashtje fundamentale të Kosovës sot e nesër – Identitetit të saj.
Çfarëdo ndihme që lidhet me këte çashtje asht nji ndihmë e madhe që i bahet qytetarëve të Kosovës.
Sepse, pa përgjegjen në pyetjen Kush Jam Une, asht zor me i gjetë përgjegjet edhe në tana pyetjet tjera të Kosovës sot. Andaj, moton UNË JAM KOSOVA e konsideroj dhe kuptoj si nji përgjegje shumë të saktë në pyetjen Kush Jam Une.
Përgjigju Duke Cituar
Krijoni Kontakt