Koço Devole lirohet nga burgu italian

[FATJON SOFTA]

Fatkeqesi qe me tronditi pa mase.
Koco Devole eshte nje njeri i cili nuk mund te merret kurre me kete ceshtje.Une mendoj me disa kontakte te pakta qe kam pasur me artistin se vertet eshte ne gjendje te veshtire ekonomike por karakteri dhe shpirti i tij nuk mund te gaboje asnjehere.Koco eshte perdorur si personalitet dhe si natyre ai beson tek emigrantet.Ai ka pasur disa ide dhe projekte te punonte ne emigracion me rolet e tij dhe ne vecanti me nje gazete ku pervec te ardhurave modeste qe kerkonte ,deshironte qe me humorin e tij te kontriboje sadopak ne zbutjen e halleve te emigracionit tone.
E verteta nuk eshte larg,ajo do te zbardhet.Bota e krimit vepron,ajo kerkon te perdore kedo per te mbuluar veprimet e sajUne mendoj se eshte nje rastesiu dhe policia shqiptare sic aludon nje sjkrues nuk ka dore ne kete kombinacion.Koco mund te mos kete dashamiresine e pushtetareve,por te pakten nuk ka dashakeqesine e tyre.
Politika nuk ka te majte dhe te djathte,por ka klane ashtu dhe arti eshte sot i tille,artisti varfer qe mbi supe ka nje kariere te tere dhe personalitet nuk e di se si prodhojne art me 6000 leke,por mgjth ajo eshte masa e madhe e pasurise sone kombetare ku te gjithe ne brenda vetes na vjen keq dhe ndjehemi te turperuar me keto ironi te fatit,ku analoget e tyre ne bote jane milionere.
Uroj qe Koco Devole te kthehet sa me pare ne familje dhe une do ta kerkoj per dinjitetin e tij te jape nje shfaqje ne Piazza Barberini me ftese te Komunitetit te Shqiptareve te Italise.
Mund ti ndodhi te gjitheve,le te sherbeje ky mesim per te gjithe ne.

[ALBA]

Pasditen e djeshme humoristi i njohur ka qënë në shtëpinë e djalit të tij Enos ku do të qëndrojë deri në fund të procesit



Gjykata e Barit ka vendosur masën e sigurisë, detyrim paraqitjeje. Në rast se ai e thyen do të rikthehet në qeli

Ened Janina
Koço Devole, humoristi i njohur i arrestuar në Itali për trafik heroine, del nga burgu. Paraditen e djeshme Gjykata e Barit ka vendosur masën e sigurisë detyrim paraqitje në organin e prokurorisë duke e lënë Devolen që qendrojë në shtëpinë e djalit në Milano. Oficerët e policisë italiane janë paraqitur mëngjesin e djeshëm në qelinë ku qëndronte humoristi Devole dhe i kanë komunikuar atij që është i lirë të shkojë në shtëpinë e djalit Eno që ka në Milano. “Gjykata ka vendosur që ti je i lirë të shkosh në shtëpinë e djalit. Ne do të na lësh adresën e saktë të shtëpisë si dhe do të na lësh një numër telefoni. Këto i duam që të të kontaktojmë kur të kemi nevojë. Kjo nuk do të thotë se ndaj teje është pushuar procedimi penal por vetëm se është ndryshuar masa e sigurisë”, - i kanë thënë oficerët italiane Devoles. Menjëherë pas kësaj, Koço Devole ka lënë qelinë e burgut italian dhe është drejtuar për në stacionin e trenit. Aty ka prerë biletat për në qytetin e Milanos, ku ndodhet djali i tij Eno. Ai ka pritur trenin dhe deri kur ka ardhur orari ka riprovuar shijen e një birre në liri. Në orët e para të pasdites Devole ka qënë në shtëpinë e djalit në Milano.
Arrestimi
Koço Devole, humoristi i njohur i arrestuar në Rimini pasi në makinën në të cilën udhëtonte ai u gjetën tre kilogram drogë, do të gjykohet në shtetin italian. Ai do të përballet me gjykatën italiane për akuzën e trafikut të heroinës. Devole u arrestua së bashku me dy shqiptarë të tjerë, Llasko Lubonjën si dhe një mikun e këtij të fundit. Pasi të marrin dënimin, tre të arrestuarit mund të transferohen për në burgjet shqiptare. Dosja hetimore në ngarkim të tyre është drejt përfundimit dhe pas pak kohësh do të fillojë procesi në gjykatën e Riminit. Sipas burimeve të prokurorisë shqiptare nuk kanë filluar ende bisedimet për ekstradimin e humoristit të njohur. Ai dhe dy shqiptarët e tjerë do të gjykohen aty ku kanë kryer veprën penale. Koço Devole është prangosur nga policia italiane më 26 nëntor të vitit të kaluar pasi në makinën me të cilën ai udhëtonte u gjetën tre kilogram heroinë. Rastësisht policia e Riminit në Itali ka ushtruar një kontroll në makinën e tre shqiptarëve. Kur ka parë policinë humoristi i njohur nuk ka demonstruar shënja nervozizmi pasi nuk kishte dijeni për drogën që ndodhej në makinë. Gjatë kontrollit është gjetur edhe sasia e drogës, e cila ishte fshehur në motorin e makinës. Burimet zyrtare të policisë në atë kohë pohuan se Koço Devole mund të mos ketë lidhje me drogën dhe mund të ketë qënë rastësisht në makinë. Edhe vetë Koçoja ka thënë përpara policisë italiane se nuk kishte lidhje me trafikun e drogës dhe se ishte thjesht një pasagjer në makinë. Prova që ka “fundosur” humoristin tonë ka qënë telekomanda e makinës, të cilët në momentin e arrestimit e kishte ai. Ndërkohë familjarët e tij kanë deklaruar se Koçoja ishte nisur për të takuar djemtë e tij në Milamo të Italisë dhe se nuk ka lidhje me trafikun e drogës. Çështja i kaloi Prokurorisë së Barit në Itali, e cila i mbajti në burg të tre “udhëtarët” e makinës dhe po përgatit dërgimin e çështjes për gjykim. Ndërkohë dje gjykata ka vendosur që të ndryshoje masën e sigurisë për Devolen nga arrest me burg në detyrim paraqitje. Kjo do të thotë se Koço Devole mund të qëndrojë në shtëpinë e djalit të tij dhe do të paraqitet në prokurorinë italiane sa herë ta kërkojë hetuesit e çështjes. Ai është i lirë që të lëvizë në qytetin e Milanos dhe të takojë miqtë e tij. Në rast se Devole nuk do ti përgjigjet thirrjes së prokurorisë për t’u paraqitur atëherë ai do të arrestohet përsëri dhe do të qëndrojë në burg deri kur ta gjykojë të arsyeshme gjykata.
Hetimi
Droga që u kap në makinën e Devoles ishte nisur nga porti i Durrësit dhe nuk dihet destinacioni i saktë i saj. Makina ishte në pronësi të Llasko Lubonjës. Megjithëse të gjithë kanë dëshmuar kundër implikimit të Koço Devoles në trafikun e lëndëve narkotike, prokuroria italiane nuk ka qënë e atij mendimi. Ajo është e vendosur që të dërgojë çështjen në gjykatë dhe më pas të jetë trupi gjykues ai që do të vlerësojë fajësinë e të arrestuarve. Rreth dy muaj më parë zv/ shefi i antimafias italiane, Francesko Mandoi ka deklaruar se urdhër-arresti për Devolen është dhënë nga gjykat që ka vlerësuar provat. Sipas tij, provat e Prokurorisë së Barit ia kanë mbushur mendjen gjykatës për fajësinë e shqiptarit. Pasi të shqyrtohen të gjitha këto prova dhe të dëgjohen deklarimet e të akuzuarve do të vendoset edhe dënimi për të arrestuarit. Koço Devole, vetëm pak ditë pas arrestimit të tij, ka marrë një avokat italian që ka ndjekur hap pas hapi çështjen. Në ndihmë të Devoles janë angazhuar dhe disa politikanë të lartë shqiptarë dhe funksionarë shtetërorë, por drejtësia italiane nuk ka toleruar. Mediat italiane pas ngjarjes publikuan lajmin se Lubonja kishte qenë në gjurmim nga policia fqinje, dhe nëpërmjet telefonatave të tij është bërë e mundur dhe kapja e ngarkesës. Policia italiane dyshonte në lidhje me aktivitetin e këtij personi dhe prandaj ka kryer edhe arrestimin. Makina me drogën kishte arritur që t’u shpëtonte kontrolleve të policisë në Portin e Durrësit dhe në atë të Barit për t’u kapur më pas në Rimini. Përpara se të kapeshin nga policia italiane, Devole dhe dy personat e tjerë kanë fjetur një natë në banesën e një njeriu të afërt të humoristit në jug të Italisë. Të tre shqiptarët ndodhen përpara faktit të pakundërshtueshëm se në makinën e tyre është gjetur një sasi jo e vogël heroine. Prania e aktorit të njohur Devole, dyshohet të ketë shërbyer si garanci për Lubonjën dhe bashkëpunëtorin e tij, për të kaluar heroinën pa u vënë re nga policia, sidomos në Portin e Durrësit.

PROTAGONISTI
Kush është humoristi Koço Devole
Koço Devole është një nga personalitetet më të njohura të humorit shqiptar. Përveçse aktor i shkëlqyer humori, Devole është karrikaturist, skenarist, regjisor dhe prezantues spektaklesh. Rolet e tij në skeçe dhe komedi janë nga më të njohurit për publikun shqiptar. Koço Devole ka lindur në Kuçovë më 28 nëntor 1945, nga një familje me origjinë nga Poloska e Korçës. Në vitin 1946 familja e Koço Devoles është zhvendosur në Tiranë. Koço Devole ka studiuar dy vjet për inxhinieri mekanike në Universitetin e Tiranës, por në vitin e dytë të shkollës së lartë konkurroi për dramë në Akademinë e Arteve, ku nuk fitoi, pasi e cilësuan si të patalentuar. Më 1966 shkoi ushtar, ku së bashku me aktorë të tjerë të njohur si Aleko Prodani, Sejfulla Myftari etj krijoi estradën e ushtarit. Më pas ka punuar edhe në revistën “Hosteni” me emrat më të spikatur të humorit shqiptar si Spiro Çomora, Dionis Bubani, Niko Nikolla, Filip Çakuli etj. Gjatë viteve1072-1989 Devole është dërguar 10 herë në punë të detyruar. Pas viteve ’90 Devole ka punuar si regjisor në TVSH, ku aktiviteti i tij artistik ka qenë mjaft i ngjeshur. Në vitin 1997 është shkarkuar nga TVSH duke u detyruar të emigrojë me familjen në SHBA. Në dhjetor të vitit 2000 është rikthyer në Tiranë, por aktiviteti i tij artistik nuk ka njohur ritmet e mëparshme.
E.Janina

[ALBA]

Ne fillim kujtova se ishte shaka pastaj kur pashë armët e vërteta e kuptova

Devole: Miqtë më kanë braktisur

Zoti Devole, si ndiheni tani pas lirimit nga burgu?
Unë e kam pak të vështirë të flas tani për momentin. Jam shumë i lodhur dhe i turbullt. Kam tërë ditën që flas në telefon. Deri tani kam marrë telefonata urimi nga të gjithë. Kam folur me familjen time, me miqtë e mi këtu në Romë, në Shqipëri, në Angli. Kam marrë telefonata nga e gjithë bota.
Ju jeni arrestuar në një makinë ku u gjetën tre kilogram heroinë. Çfarë lidhjeje kishit me këtë makinë?
Unë hipa në një makinë për të shkuar tek djali dhe makina kishte brenda drogë. Unë nuk dija asgjë në lidhje me të. Faktin që në makinë kishte drogë e mora vesh vetëm kur e gjeti policia italiane. Në fillim kujtova se ishte shaka, pastaj kur pashë armët e vërteta e kuptova. Nuk merrem me atë punë unë. Unë nuk transportoj drogë. (Duke qeshur) Pastaj nuk ishte ndonjë gjë e madhe për të cilën mund të rrezikoja. Po pse o kam moshë të trafikoj drogë unë, 54 vjeç, inxhinier dhe humorist… Më vjen të qesh me ato që dëgjoj kur thonë që mund të trafikoja drogë. Këtu dëgjoj që shqiptarët bëjnë shumë hile me drogërat që sjellin në Itali. Droga që u kap në makinën që isha unë ishte shumë e keqe. Ishte përzjerë me lëndë të tjera.
Po me Llasko Lubonjën, pronarin e drogës çfarë lidhjeje kishit?
Llasko kishte lidhje me shumë artistë. Ai ishte një dashamirës i artit dhe si i tillë njihte shumë artistë. Unë e njihja si të tillë, si një dashamirës të artit.
Po në procesin gjyqësor që do të fillojë pas një muaji, me çfarë provash do të mbroheni?
Unë do të mbrohem duke thënë se nuk kam asnjë lidhje me drogën. As prokuroria italiane nuk ka prova për të më fajësuar mua. Unë jam i pafajshëm. Ata nuk kanë asgjë që të më lidhë mua me sasinë e drogës. Do të dal i pafajshëm.
Si kanë qenë marrëdhëniet me miqtë tuaj?
Shumë prej tyre më kanë braktisur. Ata janë sjellë sikur nuk më njihnin dhe kjo më ka habitur tej mase. Miku që më ka qëndruar më pranë ka qenë Filip Çakuli. Atij ia di për shumë faleminderit, përsa i përket të tjerëve …
Kur të mbarojë procesi a do të riktheheni në Shqipëri?
E kam menduar edhe këtë gjë. Nuk di ende se çfarë do të bëj. Dëshiroj të kthehem dhe të bëj humor dhe humor i një cilësie të lartë, si dikur. Do të mendohem mirë kur të dal përpara publikut, do të bëj ndonjë gjë të fortë.

[ALBA]

LUBONJA MORI PERSIPER DROGEN"

Devole: Trafikanti nga grackë në alibi


--------------------------------------------------------------------------------

Basir Çollaku

Koço Devole, pas lirimit nga burgu flet për Gazetën, për kurthin e drogës që e dërgoi tetë muaj në qeli. Llasko Lubonja, pronari i një lokali tek ura e Lanës, ku mblidheshin artistët, ai që e futi Devolen në makinën ku ishin 5 kile heroinë, është dhe alibia që e nxori nga burgu. Burime nga ekspertët e hetimit konfirmojnë se Lubonja ka pasur probleme me drejtësinë dhe kështu ka qenë në përgjim. Nën survejimin e antimafies, i vënë përballë provave, Llasko më në fund ka pranuar pronësinë e 5 kileve heroinë.

Për 8 muaj në qeli ju kanë pyetur prokurorë italianë?
Po, tre ditë pas arrestimit ka ardhur gjyqtari dhe dy javë më pas prokurori. Ata më kanë pyetur për njeriun me të cilin isha, njohjet me të, lidhjet, drogën e sekuestruar në makinë, si thoshin ata. Unë kam thënë të njëtën gjë si ditën e arrestimit deri sa kam dalë. Nuk di asgjë për këtë histori.

Po Llasko çfarë ju thoshte pas arrestimit?
Ai mundohej ta mbante veten dhe më thoshte të rri i qetë, se do dalësh për dy tre ditë. Fillimisht e mora me shaka: do jetë ndonjë ngatërresë. Pastaj pas disa ditësh ai më thotë se "në makinë ka qenë një plaçkë e vjedhur, po ti mos u mërzit, rri i qetë, se do të dalësh shpejt".

Kur filluan telashet gjatë udhëtimit në Itali?
Na u prish makina sa dolëm nga Bari. Aty takuam shqiptarë që mua më njihnin dhe na ndihmuan. Shkuam te një servis. Takuam dhe dy shqiptarë që merren me tregtinë e kafesë dhe hëngrëm një drekë dhe fjetëm atë natë aty. Makina u rregullua dhe të nesërmen u nisëm për në Milano.

Nuk patët më probleme?
Difekti u përsërit dhe u detyruam të flemë në rrugë, sapo kishim kaluar Barletën. Vjen karrotresa na e merr makinën dhe e çojnë në një servis. Në atë qytet unë kisha motrën. Lajmëroj djalin se do vonohem. Qëndruam tri ditë aty. U nisëm. Llasko më tha se kam një punë në Rimini, vetëm pesë minuta.

Ndaluat?
U ndaluam të pimë një shishe birrë. Lubonja ishte i shqetësuar dhe lëvizte shumë. Doli jashtë. Vjen policia civile, pyetën për orën e diçka tjetër dhe nxorën revolet drejt nesh. Thashë mos ishte shaka, se Llasko doli jashtë. Por koburët nuk të linin këtë përshtypje. Na morën dhe na çuan në qeli.

Reaguat?
U shokova, i kthehem Lubonjës për t'i kërkuar shpjegim, ç'kemi bërë, por ai më tha se "do jetë ndonjë ngatërresë. Mos e ça kokën do dalësh menjëherë".

Takoheshit në burg?
Po, ai më pyeti se çfarë u kisha thënë prokurorëve dhe pastaj më thotë se "më duket se është diçka e vjedhur në makinë, por unë s'di gjë, do ma kenë futur". Vajti dy muaj kjo "rri i qetë se do dalësh, jo ma kanë futur, nuk di gjë"…

Si e morët vesh të vërtetën?
Dy muaj më vonë unë nuk flisja më me të. Pastaj u mor vesh se në makinë kishte pasur drogë.

Tregoi Lubonja se Koço ishte i rastësishëm në makinë?
Avokatët më kanë thënë se Llasko kishte pasur probleme të tjera të mëparshme. Ndoshta kjo e ka vënë përballë faktesh të tjera dhe ka treguar. Avokatët tanë kanë diskutuar gjatë derisa me sa më kanë thënë ata, Llasko ka deklaruar në prokurori se Koço ka qenë pasagjer në makinë e do shkonte tek i biri. Kjo ka shërbyer për të bindur të njëjtin gjykatës që më la në burg, se jam i pafajshëm dhe të më nxjerrë të lirë.

Do paraqiteni në gjyq?
Avokati më ka thënë se ka prova e fakte që provojnë pafajësinë time dhe para gjyqit, mund të më japin përfundimisht pafajësinë.

Do të udhëtoni më me makinë?
Nuk e di pas kësaj që ndodhi do kërkoj që më parë mjeti të kontrollohet nga qentë e antidrogës dhe pastaj të udhëtoj me atë makinë. Si ka vajtur puna, nuk i zë besë as këmishës më tani.