"Policët" grabisin shefin e Rendit

[ALBA]

TRE KILOMETRA NE AFERSI TE RINASIT

"Bedri Danit i marrin makinën, armën e radion


--------------------------------------------------------------------------------

Ferdinand Dervishi

Bedri Dani, shefi i rendit i Komisariatit numër 4 të Policisë së Tiranës, ishte bindur se ndodhej në botën reale, vetëm kur njeriu i veshur me uniformë policie e qëlloi fort me qytën e automatikut në shpinë. Ishte ora rreth 3 e 30 e mëngjesit të djeshëm dhe shefi i rendit kthehej nga një gosti familjare në Shkodër. Katër përsonat e armatosur, të cilët gjatë gjithë kohës i kishte kujtuar policë, i kishin zënë rrugën me gurë në afërsi të fshatit Budull në rrugën nacionale që bashkon Fushë-Krujën me Vorën, rreth 2-3 kilometra në afërsi të Rinasit. Duke qenë nga natyra një tip që bashkëjeton me humorin dhe duke qenë se në atë moment ndodhej në zonën që ai vetë kontollon me policët që ka në varësi, Dani kishte kujtuar gjatë gjithë kohës se personat e armatosur ishin policë dhe se gjithçka që ata po bënin ishte një shaka.

Prita me gurë në rrugë
Burime të Gazetës nga Policia e Durrësit dhe e Tiranës, që konfirmuan ngjarjen, pohuan se shefi i rendit i Komisariatit numër 4, Bedri Dani, ishte duke udhëtuar në drejtim të Vorës me një makinë private Benz-250, në momentin kur ndodhi grabitja. Ai ishte në shoqërinë e një miku të tij dhe ktheheshin nga një gosti familjare në Shkodër. Teksa kishin mbërritur në afërsi të fshatit Budull, rreth 3 kilometra në afërsi të Rinasit, të dy kishin vënë re rrugën të zënë me një varg gurësh dhe një polic e disa persona të tjerë të armatosur pranë tij. Shefi i rendit kishte ndaluar menjëherë, duke u folur i pari personave të dyshimtë. "Hë, çuna, keni nevojë për ndihmë?!" Gjatë gjithë kohës Dani kishte kujtuar se personat ndanë rrugës ishin policë dhe se kishin një hall për të zgjidhur.

Grabitja
Edhe pas pak çastesh të tjera të kaluara shefi i rendit dhe miku i tij nuk kishin kuptuar si ishte e vërteta. Të katër personat, të armatosur me automatikë "Kallashnikov", i kishin drejtuar tytat duke u thënë të zbrisnin me duart lart nga makina. Ndërsa Dani kishte vazhduar të fliste sipas bindjes së tij, se ata ishin policë, se kishin një problem, mbase edhe pak personal, për të zgjidhur dhe se ishin duke ngatërruar adresë. Por një goditje e fortë me qytën e automatikut në shpinë, ndërsa ishte ende i ulur në ndenjësen e shoferit, e kishte ftilluar shefin e rendit. Në momentin kur kishte kuptuar situatën, zgjidhja e saj për njeriun që gjatë gjithë kohës kishte qenë në pozitë të kundërt, kishte qenë e dhimbshme. Të kundërshtonte katër gryka automatiku drejtuar kokës së tij ishte jashtë çdo logjike, kështu që me pak përtesë ishte bindur. Grabitësit i kishin marrë pistoletën, radion e policisë, celularin dhe makinën, duke i lënë në rrugë. Ndërkohë që kryenin këto veprime, Dani nuk kishte harruar t'i paralajmëronte se ishin duke grabitur shefin e rendit të komisariatit të policisë që mbulon zonën dhe se kjo nuk ishte diçka, që do mbaronte me kaq. Pasi 4 personat ishin larguar me makinën e sapograbitur, shefi i rendit dhe miku i tij kishin ndalur një makinë në rrugë dhe kishin bërë lidhje me policinë, që ishte nisur urgjent në vendngjarje. Në orët e mbrëmjes së djeshme Policia e Durrësit njoftoi gjetjen e makinës së grabitur, Benz, në një fshat të thellë në Krujë, të quajtur Cudhi (në verilindje të qytetit). Makina ishte e padëmtuar, por me targa të hequra dhe dokumente të marra.


Fshehja e ngjarjeve me protagonistë policët

Fshehja e ngjarjeve ku protagonistë janë uniformat blu, mund të quhet një tendencë në policinë shqiptare. Natyrisht që të gjithë e kanë të vështirë të "nxjerrin të palarat" e miqve të tyre, duke pasur mundësinë të bëjnë të kundërtën. Natyrisht që një rast si i shefit të rendit të Komisariatit 4 të Policisë së Tiranës edhe mund të pretendohet të mos bëhet publik. Pasi në të gjithë rrjedhën e ngjarjes, në asnjë moment nuk mund ta bësh fajtor. Por ka raste të tjera kur ngjarjet nuk bëhen publike, pasi tentohet të ruhet në mënyrë artificiale imazhi i mirë i policisë, që nuk është e përzier në "punë të pista" apo më tepër. Kështu, një vit më parë u tentua të mbahej sekret implikimi i dy nënoficerëve të Gardës së Republikës në trafikun e makinave të shtrenjta. Në disa raste në Berat, Skrapar, Vlorë, Kavajë, Tiranë, Elbasan është tentuar të mbahen sekret ngjarje kur oficerë apo policë të ndryshëm kanë dhunuar të drejtat e njeriut, duke rrahur qytetarë të ndryshëm. Natyrisht që publike duhet të bëhen edhe sjellje të ndryshme që nuk i kanë hije uniformës së policit, siç janë për shembull veprime në gjendje të dehur apo veprime për llogari private, duke u paraqitur në emër të shtetit. Natyrisht që të gjitha këto është mirë të bëhen publike me synimin për t'i parandaluar sadopak.


Policia: Kemi identifikuar autorët

Pas një konfirmimi të vështirë të lajmit, një nga drejtuesit e Policisë së Tiranës pohoi ngjarjen dhe identifikimin e autorëve të saj. Sipas interpretimit nga i njëjti burim, ishte zbardhur plotësisht ngjarja dhe ishte vërtetuar se zgjidhja e shefit të rendit të Komisariatit numër 4 kishte qenë shumë e arsyeshme. Ai nuk kishte pasur asnjë mundësi tjetër përballë 4 grykave të armëve të llojit "Kallashnikov". Ndërkohë u pohua edhe se vetë shefi i rendit, Bedri Dani, është duke u marrë, krahas strukturave të tjera, me masat për ngjarjen dhe kapjen e autorëve. Ndërkohë një burim i Policisë së Durrësit pohoi se për ngjarjen ishin mobilizuar edhe disa njësi të saj, pasi ajo kishte ndodhur në kufi të dy rretheve. Drejtues të dy policive konfirmuan gjithashtu se kishin përballë një rast sporadik, pasi në atë zonë nuk ishin regjistruar më parë ngjarje të përafërta. Ndërkohë identifikimi i autorëve është konsideruar sukses.


PRECEDENTET

SHTATOR 1998
Në Tiranë e Fier persona të armatosur çarmatosin disa shefa e policë të thjeshtë, duke u marrë armët dhe mjete të tjera.

NËNTOR 1999
Sokol Koçiu, ish-drejtor i Policisë së Vlorës, merret peng nga skafistët dhe detyrohet të japë urdhër të lëshojnë skafet e tyre.

NËNTOR 2000
Fatmir Fagu, një nga oficerët e lartë të Policisë së Shtetit, çarmatoset pranë selisë së Partisë Demokratike në Tiranë.

SHKURT 2002
Në fshatin Shtiqen të Kukësit disa banorë qëllojnë policinë dhe shkatërrojnë makinën e tyre që kishte ndjekur deri aty disa grabitës.

KORRIK 2002
Janaq Zarka, oficer policie në Fier, goditet dhe çarmatoset nga A.Sh. dhe disa persona të tjerë gjatë një grindjeje për pronësi.