Tubim proteste i emigranteve ne Greqi

[Enri]

Leja për pushime, emigrantët protestë në Athinë

Kërkojnë ndryshime në ligjin 2910 mbi bazën e të cilit edhe po kryhet procesi i legalizimit të emigrantëve

ATHINE- Qindra emigrantë të të gjitha komuniteteve iu përgjigjën thirrjes së organizatave të emigrantëve për të protestuar dje në qendër të Athinës për anulimin e vendimit, të marrë nga Ministria e Brendshme greke që ndalon lëvizjen jashtë kufijëve grekë të emigrantëve, të cilët nuk kanë dorëzuar dokumentat për legalizim brenda datës 30 qershor. Legalizimi i të gjithë emigrantëve pa asnjë kusht, përmirësimi i ligjit 2910 dhe përmirësimi i shërbimit ndaj emigrantëve nga zyrat e komunave dhe bashkive, ishin disa prej kërkesave që parashtruan emigrantët.
Protesta e cila filloi rreth orës 19 30 vazhdoi për mëse një orë e gjysmë, kohë gjatë së cilës pjesëmarrësit u grumbulluan në sheshin “Omonia” me flamuj dhe parulla në të cilat shkruheshin në gjuhë të ndryshme kërkesat e tyre.
Shumica e demonstruesve, emigrantë shqiptarë
Padyshim emigrantët shqiptarë përbënin shumicën e pjesëmarrësve në protestën e djeshme. Përkrah emigrantëve nga pothuajse të gjitha komunitetet që jetojnë dhe punojnë në Greqi, ata protestuan dje për më shumë të drejta dhe për përmirësimin e kushteve për legalizimin jo vetëm të tyre. “Pjesëmarrja e emigrantëve shqiptarë ishte e kënaqshme. Emigrantët shqiptarë jo vetëm tani por në të ardhmen duhet të luajnë rol kryesor në lëvizjet sindikaliste, pasi përbëjnë shumicën në Greqi”, -i tha “Shekullit”, kryetari i Federatës së Sindikatave të Pavarura të Shqipërisë, dega e Athinës, Lefter Marta.
Pas grumbullimit në sheshin “Omonia”, protestuesit u drejtuan drejt Parlamentit grek, ku për më shumë se gjysmë ore hodhën parulla dhe kërkuan nga Parlamenti ndryshime në ligjin 2910 mbi bazën e të cilit edhe po kryhet procesi i legalizimit të emigrantëve në Greqi. Kërkesat e emigrantëve shqiptare kërkojnë në parim përmirësimin e statusit të tyre, por më immediate është çështja e dhënies së lejes për të kaluar pushimet në Shqipëri. Sipas një urdhëri të Ministrisë së brendëshme greke ata emigrantë që nuk kanë dorëzuar dokumentat deri në 30 qershor nuk kanë të drejtë të dalin jashtë kufijëve të Greqisë.
Më pas përfaqësuesit e të gjitha organizatave dorëzuan në zyrën e kryetarit të Parlamentit grek si dhe të të gjitha partive parlamentare greke, listën me kërkesat e tyre. Konfederata shqiptare nuk pranoi që të dorëzonte kërkesat e saj së bashku me ato të Partisë Komuniste greke. “Nuk duam të bëhemi pjesë e asnjë loje politike, dhe jemi kundër politizimit të lëvizjes së emigrantëve”, -tha z. Marta.


Kërkesat që përfaqësuesi shqiptar dorëzoi pranë Parlamentit grek janë:
Të bëhen përmirësime në ligjin 2910
Të bëhet një leja e qëndrimit me atë të punës
Nuk janë vetëm emigrantët fajtorë për vonesat për dorëzimin e dokumenteve, por edhe pala greke ka pjesën e vet të fajit, kështu që organet kompetente të lejojnë lëvizjen e lirë të tyre.
T’u jepet leje qëndrimi pensionistëve ashtu siç parashikohet edhe në ligjin 2910 neni 37 paragrafi 1.
Të përmirësohet shërbimi në zyrat greke, ku shkojnë emigrantët për të dorëzuar dokumentet.
Përkrah emigrantëve protestuan edhe punëtorë të sindikatave greke si dhe organizata të ndryshme për të drejtat e të huajve.