Në rast se dëshironi të dini se cilët janë vendet që kanë ecur më përpara gjatë viteve të fundit, se cilat kanë mbetur vend numëro dhe cilat kanë bërë prapaktheu, për këtë mjafton të ndjekësh çdo vit Raportin e Zhvillimit Njerëzor që harton Programi i Kombeve të Bashkuara për Zhvillimin i njohur sipas fillesave në frëngjisht apo anglisht edhe si PNUD apo UNDP. Ndryshe nga sa mund të besohet SHBA në këtë raport nuk rradhitet në vend të parë. Pasi ekspertët e Kombeve të Bashkuara kur hartojnë listën e vendeve ku jetohet më mirë nuk marrin parasysh vetëm GDP për frymë, pra prodhimin e brendshëm kombëtar përpjestuar me numrin e popullsisë, por kanë parasysh në rradhë të parë nivelin e pagave për shumicën e popullsisë, forcën e saj blerëse, shpenzimet publike për arsimin, shëndetësinë, mbrojtjen sociale etj. etj. Kjo është edhe arsyeja që në raportin e PNUD-it të sapobotuar, në krye të listës të vendeve ku popullsia jeton më së miri këtë vit renditet Norvegjia,e ndjekur nga Islanda, Suedia, Australia, Hollanda dhe Belgjika. SHBA renditet në vendin e 7-të, para Kanadasë, Japonisë, Zvicrës dhe Danimarkës. Gjermania në këtë renditje shtetesh vjen e 18-ta, Italia zë vendin e 21 dhe Greqia të 24. Si në të gjitha klasifikimet dhe anketat serioze, renditja e pjesëmarrësve në këtë garë të pashpallur ndryshon vazhdimisht. Në klasifikimin e vitit 2003 vihet re se Shqipëria ka vazhduar rrëshqitjen e ngadalshme por të pandërprerë gjatë këtyre viteve të fundit. Tani ajo renditet e 95 ndër 175 vendet që analizohen nga ekspertët e Kombeve të Bashkuara. 3 vjet më parë ajo ishte 10 vende më lart. Për fat që ekziston edhe Moldavia e cila në fakt nuk ka rrëshqitur, por është rrokullisur vit pas viti, duke ngecur këtë vit në vendin e 108. Moldavia përbën një ngushëllim të vogël, pasi nuk është më Shqipëria tani që konsiderohet si vendi më i varfër i Europës. Nga vendet e Europës Juglindore, Kroacia shquhet edhe kësaj rradhe midis shoqeve. Në klasifikimin e PNUD-it ajo renditet e 47-ta, dhjetë vende para Bullgarisë që rradhitet e 57, Maqedonisë që zë vendin e 60-të në listë, Rumanisë të 72-in, etj. Para Shqipërisë tani kanë dalë edhe Kazakhistani (76), Omani (79), Turkmenistani, Gjeorgjia, Azerbajxhani, Jordania e Tunizia që renditen nga vendi i 87 në të 91. Ndërkohë që Shqipëria duket se afrohet me Turqinë edhe përsa i takon nivelit të jetës të popullsisë së saj, pasi republika e Bosforit renditet në raportin e fundit një shkallë më poshtë se Shqipëria duke zënë vendin e 96. Fundin e listës, pra vendin e 175 e zë këtë vit Sierra Leone, që ka zëvendësuar Nigerinë si vendi më i varfër i botës. Në raportin e organizatës së Kombeve të Bashkuara vërehej po ashtu se në 54 vende të botës gjendja e përgjithshme ekonomiko - sociale është përkeqësuar dukshëm gjatë 10 vjetëve të fundit, ndërsa në 30 vende të tjera ka pasur rritje të prodhimit me një mesatare prej mbi 3% në vit. « Gjendja e zhvillimit të njerëzimit në Botë është sa e pabarabartë aq edhe e ndryshme. Disa vende dhe rajone realizojnë përparime të mahnitshme, ndërsa disa të tjera ose mbesin në vend ose zhyten më keq në mizerje dhe varfëri. «Planeti nuk mund të arrijë dot ekuilibrin dhe stabilitetin e nevojshëm, veçse në rast se të gjitha vendet, të pasura dhe varfëra, arrijnë të hartojnë një marrëveshje botërore, e cila do të përmirësojë jetën e të gjithë qënieve njerëzore » - ky është konkluzioni kryesor në të cilin kanë arritur hartuesit e raportit më të fundit të Kombeve të Bashkuara për Zhvillimin.
Përgjigju Duke Cituar
Krijoni Kontakt