Universiteti i Tetovës drejt zyrtarizimit

[s0ni]

Harun Ibrahimi
Bashkëpunëtor i BBC-së në Maqedoni
Botuar: E shtunë, 28 qershor 2003 - 14:40 CET


Qeveria maqedonase ka filluar procedurën për legalizimin e Universitetit shqiptar të Tetovës duke i kërkuar parlamentit të bëjë ndryshime dhe plotësime në Ligjin për Arsimin Sipëror.

Me këto ndryshime do të mundësohet që në arsimin sipëror në Maqedoni ligjëratat përveç në gjuhën maqedonase të zhvillohen edhe në gjuhën shqipe.

Ministri i Arsimit, Azis Pollozhani, thotë se këto ndryshime ligjore do të mundësojnë edhe zyrtarizimin e Universitetit të Tetovës.



Me këtë ligj mund të thuhet se hapen rrugët për realizimin e një dëshire.

Aziz Pollozhani, ministër i Arsimit në Maqedoni
"Me këtë ligj mund të thuhet se hapen rrugët për realizimin e një dëshire, nevoje dhe gjithsesi aspiratave tona të kahmotshme," tha zoti Pollozhani për BBC-në.

Ai tha se një nga angazhimet e partisë që ai përfaqëson, Bashkimi Demokratik për Integrim, është që "të krijohen mundësi dhe kushte që Universiteti i Tetovës të jetë në kornizën e aktiviteteve ligjore" të Maqedonisë.

'Ohri' mundëson përparimin

Ky hap i qeverisë maqedonase është në frymën e Marrëveshjes së Ohrit me të cilën parashihet që gjuhë zyrtare në Maqedoni përveç asaj maqedonase është edhe gjuha të cilën e flasin mbi 20 përqind e bashkësive të tjera etnike jo maqedonase.

Universiteti i Tetovës është themeluar në vitin 1994 dhe që atëherë nuk është njohur nga zyrtarët maqedonas.

Ende nuk janë dhënë njoftime të holllësishme se me sa fakultetet do të funksionojë ky Universitet kur të zyrtarizohet.

Nu është e qartë nëse universiteti do të fillojë të financohet që nga ky vit akademik nga shteti, për shkak se nga buxheti i shtetit nuk janë ndarë mjete financiare për këtë viti.

Bëhet e ditur se drejtuesit e Universitetit të Tetovës i kanë dorëzuar tashmë qeverisë plan-programin akademik.

Ndërkaq, që para dy vitesh në Tetovë funksionon edhe Universiteti i Evropës Juglindore i cili financohet nga Bashkimi Evropian dhe donacione tjera dhe ku zhvillohen mësime në gjuhën shqipe.

[babadimri]

Me ne fund duhet qe edhe shiptareve nga Maqedonia tu ndodh dicka e bukur. Mese sinqerisht jam shume i gezuar. Por mendoj se tani kemi pergjegjesi me teper. Dhe hallal u qofte djemve qe luftuan se ata na e sollne Legalizimin e Universitetit te Tetoves