Samiti i Selanikut

[SUPERSTAR_N1]

Gjithcka mbi Samitin e Selanikut

[SUPERSTAR_N1]

BE, ndihma me kushte Shqipërisë

Bashkimi Evropian u ka kërkuar vendeve të Ballkanit Perëndimor të rrisin luftën kundër krimit të organizuar, në mënyrë që të përfitojnë sa më shumë ndihma ekonomike. Këtë e ka deklaruar edhe presidenti i Komisionit Evropian, Romano Prodi, por edhe në deklaratën përfundimtare të Samitit është nënvizuar se vendet kandidate të Ballkanit Perëndimor duhet të rrisin bashkëpunimin mes tyre në luftën kundër trafiqeve, sigurimin e kufijve, si dhe në bashkëpunimin ekonomik dhe në stabilitetin e rajonit. Në deklaratën përfundimtare prej 10 pikash paraqiten kushtet e vëna ndaj 5 vendeve të Ballkanit për procesin e integrimit. Europa ka qenë e bashkuar në qëndrimin e saj për hyrjen e saj në BE. Në deklaratën përfundimtare, BE-ja thekson përkrahjen e saj të qartë ndaj perspektivës evropiane të vendeve të Ballkanit Perëndimor. Por, tashmë, thuhet në deklaratë, sfida e madhe që kemi përpara është përgatitja për integrim në strukturat evropiane dhe anëtarësimi përfundimtar në Bashkimin Evropian, nëpërmjet miratimit të standardeve evropiane. “Shpejtësia e lëvizjes përpara ndodhet në duart e vendeve të rajonit”, theksohet në dokumentin përfundimtar. Progresi i secilit vend drejt BE-së, nënvizohet më tej, varet nga meritat e tij në përmbushjen e kritereve dhe kushteve të Kopenhagës vendosur për procesin e SAP dhe konfirmuar në deklaratën përfundimtare të Samitit të Zagrebit, nëntor 2000. Vendet e Ballkanit Perëndimor ndajnë plotësisht objektivat e bashkimit ekonomik dhe politik dhe presin me padurim bashkimin në një BE që është më e fuqishme në ndjekjen e objektivave thelbësore dhe më e pranishme në botë, citohet në deklaratë. “Procesi i unifikimit të Evropës nuk do të jetë i plotë nëse vendet e Ballkanit nuk do të jenë anëtare të BE-së”,-tha në konferencën e djeshme për shtyp presidenti i KE-së, Romano Prodi. Sipas tij, këto vende kanë marrë një mesazh politik të qartë nga ky samit i Selanikut se “Ballkani do të bëjë pjesë në Evropën e unifikuar”. “Procesi i integrimit është nisur dhe është i pakthyeshëm”. “Procesi i integrimit rajonal të Ballkanit është i pandashëm, por gjithsesi çdo vend do të vlerësohet mbi bazën e kapaciteteve për kriteret e fiksuara për hyrjen në BE”,-theksoi Prodi. Ndërkohë që si Prodi, kryeministri grek Simitis në konferencën e djeshme nënvizoi faktin e kooperimi të përbashkët në luftën kundër krimit të organizuar dhe të gjitha llojeve të trafiqeve. Kryeministri grek, Simitis, u shpreh se vendet e Ballkanit duhet të plotësojnë kriteret konstitucionale evropiane. Ai bëri të ditur se është përcaktuar një rrugë në të cilën Shqipëria dhe vendet e tjera të Ballkanit duhet të ndjekin deri në anëtarësimin e tyre. Stabiliteti i rajonit ka qenë një nga çështjet kryesore. Ndërsa Prodi u fokusua në rëndësinë që ka lufta ndaj krimit të organizuar, si dhe kooperimi politik dhe ekonomik mes vendeve të Ballkanit. “Vendet e Ballkanit Perëndimor duhet të rrisin luftën kundër krimit të organizuar, në mënyrë që të përfitojnë sa më shumë ndihma ekonomike”,-tha Prodi. Ndërsa Solana në fjalën e tij ka përshëndetur faktin se mes Prishtinës dhe Beogradit do të nisë një dialog në muajin korrik, duke e cilësuar si një shenjë mjaft pozitive për zhvillimet në këtë rajon.

[SUPERSTAR_N1]

Moisiu: Anëtarësim të diferencuar për Shqipërinë


Presidenti i Republikës, Alfred Moisiu në diskutimin e tij në Samitin e Selanikut ka kërkuar që të ndiqet një proces i diferencuar për anëtarësimin e vendeve të Ballkanit, sipas specifikave të çdo shteti. “Shqipëria dhe faktori shqiptar kanë luajtur dhe do të vazhdojnë të luajnë një rol me rëndësi në paqen dhe stabilitetin e Ballkanit dhe do të mbeten faktorë aktivë në protestë bashkëpunuese e integruese në rajon, por ne gjykojmë se duke u nisur nga veçoritë specifike dhe problemet e veçanta të secilit vend, edhe ndihma e BE-së lipset të jetë në përputhje dhe në harmoni me këto specifika dhe e diferencuar për çdo vend. Vetëm kështu mund të shkurtohej hapësira mes periudhës së AS-së dhe kandidimit tonë”,-tha në fjalën e tij, Moisiu. Presidenti në fjalimin e tij, tre minutësh, ka theksuar se është koha që të mos ndërtohen mure izoluese, por të mundësohet lëvizja e lirë e njerëzve në rajon dhe më gjerë në Evropë. “Nuk ka asnjë dyshim se vendet tona do të vazhdojnë të punojnë së bashku dhe veçmas për të përmbushur të gjitha standardet dhe kërkesat e BE-së. Shqipëria do të thellojë refomat e përgjithshme demokratike dhe do të synojë arritjen e rezultateve konkrete, në konsolidimin e shtetit të së drejtës, duke intensifikuar luftën kundër korrupsionit, trafiqeve, krimit të organizuar, plagë të theksuara të shoqërive postkomuniste”,-theksoi Moisiu. Presidenti shqiptar u ka shpjeguar evropianëve edhe diçka mbi firmosjen e marrëveshjes me SHBA. “Ne e firmosën marrëveshjen me SHBA, sepse rajoni i Ballkanit ka ende probleme sigurie e stabiliteti dhe ne kemi vepruar në interes të sigurisë dhe paqes, por edhe në interesin tonë”, -është shprehur Moisiu.
Gjithashtu kreu i shtetit, njëkohësisht edhe delegacionit shqiptar në këtë samit, u shpreh se gjykon se lëvizja e lirë e njerëzve mes vendeve të Ballkanit dhe më pas vendeve të BE-së përbën një premisë për nxitjen e zhvillimit të rajonit dhe futjen e një fryme të lirë evropiane për qytetarët e Ballkanit Perëndimor.

[SUPERSTAR_N1]

Moisiu, prania ime normale


(Porto Palas)-Presidenti i Republikës, Alfred Moisiu e ka cilësuar normale praninë e tij në këtë samit, duke sjellë shembuj të tjerë të prezantimit nga shtetet e tjera të Ballkanit. Moisiu, në konferencën e djeshme për shtyp, pas takimit të përbashkët me liderët e BE-së, është fokusuar më tepër në debatin e zhurmshëm për mënyrën e përfaqësimit, se sa për vendimet e fundit të Samitit të Selanikut. Presidenti është shprehur mjaft i indinjuar për mënyrën e trajtimit nga media të përfaqësimit. Pyetjes së gazetarëve për këtë përplasje institucionale, iu përgjigj: “Nuk është aspak e vërtetë ajo çfarë deklaroni ju. Nuk ishte vetëm Shqipëria e përfaqësuar nga presidenti dhe kryeministri, kishte edhe vende të tjera. Unë kam marrëdhënie të mira me kryeministrin, kryetarin e Kuvendit, si dhe me krerët e partive parlamentare”,-tha Moisiu
Ndërkohë që “skandali” i fotove të prezantimit të zyrtarëve të lartë shqiptarë ka vazhduar edhe në ditën e tretë dhe të fundit të samitit të BE-së, këtu në hotel “Porto Karas”. Këtë radhë fotoja e presidentit Moisiu ka qenë prezent, së bashku me atë të kryeministrit Nano, e shoqëruar si gjithmonë me atë të ministrit të Jashtëm, Ilir Meta. Këtë radhë pasqyra e personaliteteve të Ballkanit përmbante në mënyrë të plotë dhe të saktë të tre emrat e zyrtarëve të lartë shqiptarë Moisiu, Nano dhe Meta, por ky i fundit nuk figuron në listën zyrtare të qeverisë shqiptare në këtë samit. Në vend të Metës ka qenë ministri i Integrimit, Sokol Nako, i përzgjedhur nga kryeministri Nano. Ndërkohë që në panelin e konferencës së përbashkët me Solanën, Prodin dhe Simitisin, në emër të Shqipërisë është prezantuar presidenti i Moisiu si kryetar i delegacionit zyrtar shqiptar. Ndërsa në foton finale, me familjen e madhe europiane kanë dalë si Moisiu, ashtu edhe Nano, duke iu bashkëngjitur përfaqësuesve të pesë vendeve të Ballkanit Perëndimor.

[SUPERSTAR_N1]

Ne, Krerët e shteteve ose të qeverive të shteteve anëtare të Bashkimit Evropian, shtetet e pranuara dhe kandidate, Shqipëria, Bosnjë-Hercegovina, Kroacia, Ish -Republika Federale e Maqedonisë, Serbia dhe Mali i Zi, si kandidate potenciale, dhe Presidenti i Komisionit Evropian, në prani të Presidentit të Parlamentit Evropian, Sekretarit të Përgjithshëm të Këshillit/Përfaqësuesit të Lartë, Përfaqësuesit të Posaçëm të Sekretarit të Përgjithshëm të Kombeve Bashkuara në Kosovë, Koordinatorit të Posaçëm të Paktit të Stabilitetit për Evropën Juglindore dhe Përfaqësuesit të Lartë për Bosnjë-Hercegovinë, u takuam në Selanik dhe ramë dakord sot për sa më poshtë:

1. Ne ndajmë vlerat e demokracisë, shtetit ligjor, respektimit të të drejtave të njeriut dhe minoriteteve, solidaritetit dhe ekonomisë së tregut, në dijeni të plotë se ato përbëjnë themelet e Bashkimit Evropian. Ne dënojmë fuqimisht ekstremizmin, terrorizmin dhe dhunën, qofshin ato të motivuara etnikisht, politikisht apo kriminalisht.
2. BE-ja thekson përkrahjen e saj të qartë ndaj perspektivës evropiane të vendeve të Ballkanit Perëndimor. E ardhmja e Ballkanit është në Bashkimin Evropian. Zgjerimi i vazhdueshëm dhe nënshkrimi i Traktatit të Athinës, në prill 2003, frymëzoi dhe nxiti vendet e Ballkanit Perëndimor për të ndjekur të njëjtën rrugë të suksesshme.
3. Ne njohim se Procesi i Stabilizimit dhe Asociimit (SAP) do të mbetet kuadri i drejtimit evropian të vendeve të Ballkanit Perëndimor, deri në një anëtarësim të ardhshëm. Progresi i secilit vend drejt BE-së, varet nga meritat e tij në përmbushjen e kritereve dhe kushteve të Kopenhagës vendosur për procesin e SAP dhe konfirmuar në deklaratën përfundimtare të Samitit të Zagrebit, nëntor 2000. Vendet e Ballkanit Perëndimor vlerësojnë së tepërmi mekanizmin e raportit vjetor të SAP-it, bazuar mbi raportet e Komisionit, dhe përkushtohen të zbatojnë rekomandimet e tij.

4. Ne përkrahim zbatimin e plotë të Rezolutës 1244 të Këshillit të Sigurimit të Kombeve të Bashkuara lidhur me Kosovën dhe politikën e UNMIK-ut të “standardeve para statusit”, ne qëndrojmë të përkushtuar ndaj marrëveshjeve të Dejton/Parisit dhe nxisim zbatimin e plotë të marrëveshjes së Ohrit dhe Beogradit. 5.Vendet e BE-së dhe Ballkanit Perëndimor përkrahin plotësisht Gjykatën Kriminale Ndërkombëtare, duke kujtuar vendimet përkatëse të BE-së. Vendet e Ballkanit Perëndimor premtojnë bashkëpunim të plotë e të qartë me Gjykatën Kriminale Ndërkombëtare për ish -Jugosllavinë.
6. Kthimi i vazhdueshëm i refugjatëve dhe të shpërngulurve është kritike për ripajtime etnike dhe një tregues i një pjekurie demokratike: ajo është ndër prioritetet më të mëdha të axhendës sonë. Ne theksojmë rolin e arsimit dhe kulturës në nxitjen e tolerancës, sigurimin e bashkëjetesës etnike dhe fetare e ndërtimit të shoqërive demokratike moderne.
7. Fragmentarizimi dhe ndarjet sipas kufijve etnikë nuk janë në përputhje me perspektivën evropiane, e cila duhet të veprojë si një katalizator për problemet në rajon.
8. Krimi i organizuar dhe korrupsioni përbëjnë një pengesë reale të stabilitetit demokratik, shtetit ligjor, zhvillimit ekonomik dhe zhvillimit të shoqërisë civile në rajon, si dhe një burim shqetësimesh të rënda për BE-në. Luftimi i tyre përbën një prioritet madhor.
9. Ne pranojmë rëndësinë që popujt e Ballkanit Perëndimor i kanë dhënë perspektivës së liberalizimit të regjimit të vizave nga BE-ja. Ne njohim se progresi varet nga zbatimi i reformave madhore në fusha të tilla si përforcimi i shtetit ligjor, luftimi i krimit të organizuar, korrupsionit dhe migracionit të paligjshëm, dhe forcimit të kapacitetit administrativ në kontrollin e kufirit dhe sigurisë së dokumentacioneve.
10. Begatia ekonomike është thelbësore për stabilitetin dhe demokracinë afatgjatë në rajon. Kërkohet që përpjekjet këmbëngulëse dhe reformat strukturore të vendosin funksionimin e ekonomisë së tregut, të arrijnë zhvillim të vazhdueshëm dhe të sigurojnë punësim. Vendet e Ballkanit Perëndimor mirëpresin vendimet e BE-së për të shqyrtuar masa të mëtejshme për rritjen e tregtisë me to, për të zgjeruar Tregun e Energjisë së Brendshme në rajon dhe për të vendosur një dialog të rregullt ekonomik me secilin vend të rajonit.

[SUPERSTAR_N1]

Koçi: Gafë mungesa e Metës në Selanik

TIRANË – Deputeti socialist Petro Koçi, i njohur si një nga drejtuesit e lëvizjes për politikë të pastër brenda PS-së deklaroi dje se, “rivaliteti për pushtet midis Nanos dhe Metës mund të krijojë një situatë konfliktuale”. Koçi tha gjithashtu se mungesa e Metës në punimet e Samitit të Selanikut është pikërisht pasqyrë e marrëdhënieve të ftohta mes tij dhe Nanos. “Rivalitetet për pushtet, projektet për të centralizuar më shumë pushtet zoti Nano dhe ndoshta projektet për revansh politik nga zoti Meta mund të krijojnë një situatë konfliktuale të rrezikshme dhe besoj se faktorët e tjerë politikë në PS do të arrijnë që të mos lejojnë gjelat e përhershëm në PS që ta shndërrojnë atë në pamje fushe lufte apo pazari”, -deklaroi Koçi për gazetarët. Ai tha se “mungesa e zotit Meta në funksionet e Ministrit të Jashtëm është një nga gafat e politikës shqiptare”. “Gjykoj që kjo është si pasojë e marrëdhënieve të tensionuara të brendshme në forcën tonë politike që mesa duket po përvijohet në qëndrime me dimensione infantile. Gjykoj që nëse protagonistët e politikës socialiste, në këtë rast zoti Nano apo zoti Meta apo edhe të tjerë, do të mbajnë qëndrime përjashtuese ndaj njëri-tjetrit, atëherë mund të krijohen pasoja të pariparueshme për stabilitetin përfaqësues të maxhorancës”, -theksoi Koçi. Ndërkohë pritet që në ditët në vazhdim të mblidhet kryesia e PS-së e cila në rendin e ditës do të ketë diskutimin e problemeve të ngritura nga zv/kryeministri Meta në letrën dërguar kryetarit të partisë dhe sekretariatit.