Thaci:Rexhepi-Zhvikovic, takimi qe nxit dialogun

[Shijaksi-London]

Thaçi: Rexhepi-Zhivkoviç, takimi që nxit dialogun


-Gazeta Shqiptare.
-------------------------------------------------------------------------------

Muhamed Veliu

LONDER

Takimi midis kryeministrit kosovar dhe atij serb gjatë Samitit të Selanikut është pjesë e procesit të dialogut në rajon". Kështu ka deklaruar kryetari i Partisë Demokratike të Kosovës, Hashim Thaçi, lidhur me takimin Rexhepi-Zhivkoviç, të propozuar nga Shtajneri. Në një intervistë për Gazetën Shqiptare, Thaçi konfirmon se takimi do të zhvillohet gjatë ditëve të supermbledhjes europiane në Selanik. Kreu i PDK-së ndodhet për një vizitë zyrtare në Britaninë e Madhe me ftesë zyrtare, gjatë së cilës është takuar me sekretarin e Shtetit për marrëdhëniet me jashtë, Denis Mekshein, dhe me funksionarë të lartë të diplomacisë britanike për Ballkanin dhe Kosovën. Edhe pse delegacioni i Kosovës ende nuk është përcaktuar, ai deklaron se nuk do ta refuzonte pjesëmarrjen në të.

Kush do ta përfaqësojë Kosovën në Samitin e Selanikut?
Kosova në Samitin e Selanikut do të përfaqësohet nga një grup politik, qeveritar në kuadër të delegacionit të UNMIK-ut.

Personalisht, a do të merrni pjesë në këtë samit?

Varet nga zhvillimet që do të ndodhin ditët e ardhshme në Prishtinë. Po bëhen diskutime rreth çështjeve praktike. Unë jam në favor të asaj që të marrin pjesë njerëz që janë përgjegjës për çështje praktike të zhvillimeve në Kosovë në raport me Beogradin. Unë nuk e refuzoj pjesëmarrjen.

Kryeadministratori Shtajner ka arritur të bindë kryeministrin Bajram Rexhepi që në Samitin e Selanikut të takohet me kryeministrin serb, Zoran Zhivkoviç. Mendoni se është momenti i duhur për ta bërë këtë takim?

Dialogu i autoriteteve të Prishtinës me të gjithë fqinjët, duke mos përjashtuar dhe Beogradin, është një nga prioritetet e dala nga projekti i PDK-së, moratoriumi, kështu që ajo do të ndodhë është një zakonshmëri e proceseve integruese rajonale dhe perëndimore. Unë i shikoj si të domosdoshme takimet dhe dialogun midis kosovarëve me të gjitha vendet e rajonit dhe botën perëndimore, sepse ne s'mund të jetojmë të izoluar.

Ngjarja e 4 qeshorit në Obiliq është cilësuar nga komuniteti ndërkombëtar si një ngjarje shqetësuese në lidhje me sigurinë e kthimit të refugjatëve serbë në Kosovë. Çfarë qëndron mbrapa këtyre sulmeve?

Ne e kemi vlerësuar këtë akt si një akt të tmerrshëm i cili ka ndodhur ndaj një familjeje serbe. Ky sulm është i drejtuar kundër Kosovës dhe kundër qytetarëve dhe prespektivës së tyre pa dallime etnike. Kemi ftuar qytetarët të bashkëpunojnë në drejtim të zbulimit të akteve të dhunshme. Unë mendoj se ky akt është drejtuar kundër procesit të kthimit të refugjatëve, nisjes së dialogut Prishtinë-Beograd, kundër angazhimeve të komunitetit ndërkombëtar, për ta prishur imazhin e mirë të Kosovës.

Sa e vështirë do të jetë për shqiptarët bashkëjetesa me komunitetet e tjera joshqiptare?

Ne s'mund të sillemi sikur s'ka ndodhur gjë në Kosovë. Atje ndodhi një luftë e tmerrshme, ku pati shumë njerëz të vrarë. Ne s'pretendojmë ta harrojmë atë që ndodhi. Ne s'punojmë që të hakmerremi, por mundohemi të punojmë e të ndërtojmë një realitet të ri të komunikimit, bashkëpunimit dhe fqinjësisë së mirë me të gjitha komunitetet. I kemi ftuar refugjatët që të kthehen. E dimë që nuk kemi mundësi për t'u krijuar vende të punës dhe mirëqenie të lartë sociale, por u sigurojmë bashkëpunim dhe fqinjësi të mirë.

Sa i vështirë është bashkëpunimi midis partive politike të Kosovës, kur dihet që divergjencat nga e kaluara janë relativisht të thella?

Kemi dallime konceptuale, kemi divergjenca rreth çështjeve të caktuara, por më e rëndësishmja, do të thosha, është se ne qeverisim në një koalicion shumë partiak dhe shumetnik.