Tokat e Bregut

[Brari]

g 55

-----------


Vullkani "Bregdet" në shpërthim

(Nga aktivi i Himarës për pronat)

V.Lazeri, gazetar

Salla e kinemasë ishte plot e përplot, kishte edhe në këmbë. Doktorit të shkencave Polo Cakalli, që hapi e drejtoi me kulturë aktivin, nuk i erdhi radha të ulej në shesh.

- Ju lutem zotni, shumë mirë i thatë, por... lëreni të flasë edhe ai shoku.... Ju lutem, përmbahuni, prona - është jeta, identiteti, atdheu, për zemërimin ndaj hajdutëve të pronave tona, do vendosim bashkarisht ç'duhet të bëjmë... Ju lutem... ju lutem, lerini të flasin dhe të tjerët!

Kështu, nga fillimi deri në mbarim, drejtuesi u la kohë të lirë mbi 22 diskutimeve të thonë fjalën e tyre për mohimin, grabitjen e tjetërsimin e pronave, të mundit, djersës e gjakut të derdhur, për t'i bërë mbi gurë e për t'i mbrojtur me gjak në shekuj, nga breza të tërë.

Salla nuk u qetësua për asnjë minutë. Në atë zhurmë e acarim të paparë ndaj qeveritarëve e pushtetarëve vendorë, Polua, drejtuesi, dëgjoi nga larg: "Djalo... lermë dhe mua, jeto, të të thom ca fjalë!" Dhe shami e rroba të zeza për të rënët e mynxyrat, baraku i bregut, me mbi të 80-tat mbi supe, por pa rrudha e ballëlartë, nënë Harikli Bixha nga Dhërmiu, tha:... "More, ç'janë këto qeveri dhe mbi këto rripa vënë dorë, që kemi ngritur dheun ngarkuar me thasë, e ngjitëm lart e bëmë shkalla (tarraca), i mbollëm me ullinj e portokalle e i lulëzuam? Jazëk! Këta hajdutë që vijnë firi-firi, në det do t'i hedhim".

Dhe Aleksandra Zoto nga Vunoi, me kulturë, por edhe e indinjuar, plotësoi mendimin e tha: "Qeveritarët si lukuni, të ndihmuar nga rrugaçët e bashkisë së Himarës, u turrën mbi pronat tona për t'i shitur e pasuruar. Tre dynym që kisha në Jalë, dy njerëzit e Gramoz Ruçit po ngrenë vila. Kur vate burri im e tha, -"ajo është toka ime", kriminelët i treguan kallashnikovin e i thanë: do të ikësh, apo...? E pra, kjo qeveri është e hajdutëve, jo e bregasve të ndershëm, punëtorë, por edhe trima, prandaj"...

Nuk u ul fare i riu Spiro Fotiadhi nga Dhërmiu. Me duar, me gjeste, i revoltuar në kulm, sikur t'i kishte përpara qeveritarët hajdutë, thua se do t'i shqyente.

- Mirë more djalë, ke të drejtë, por...

- Çfarë por... ata të na marrin pronën, jetën, ne të rrimë? Ku është qeveria, pse bëhet ortak me hajdutët e jo me ne, punëtorët e ndershëm? Nuk do t'ia falim! Edhe Presidenti na premtoi. Pse nuk i detyron? Kushtetutën e ka.

Një shpërthim i vërtetë u ndie aty nga rreshti i dytë. Me mend, me argumente, i revoltuar, gazetari Ideal Serjani nga Sasai, tha: "Kush e lë të livadhisë pa fre në pronat tona, "Millosheviçin e Bregut", kryetarin e komunës Lukovë, Ferdinand Dhramin? Patjetër që prapa tij qëndrojnë kryetari i qarkut, prefekti me mbështetësin kryesor, deputetin e zonës Sabit Brokaj, që vjen, shkel, piketon e ngre fshatin turistik në Lumë-Bunec mbi pronat tona, të Piqerasit, Sasait, Lukovës. Ku e ka gjetur këtë forcë Ferdinand Dhrami, që u ndan tokë të prurëve nga ana e anës për interesa elektorale, apo Gramoz Ruçi, në Dhërmi e Sarandë? Mbahen nga ligji 7501, që ka nxjerrë shteti, i cili nuk ka titull pronësie, as për vete. Si na mbajnë pronën, dheun e babait, atdheun? Ferdinand Dhrami, bregasit nuk kanë vdekur, ata janë gjallë! Ka ardhur koha, ja vdekje, ja liri!"

Si uragan shpërtheu Kiço Qesari nga Qeparoi, përfaqësues i mbi 25 mijë emigrantëve bregdetarë në Athinë, ai tha: "Banda qeveritarësh me pushtetarët vendorë po grabisin pa pushim bregun. Ata po mbjellin farën e përçarjes, por bregasit janë të fortë si shkëmbi. Ky aktiv sot të piketojë goditjet ndaj hajdutëve qeveritarë. Ne nuk do rrimë në Greqi, do kthehemi në vendin tonë, ta lulëzojmë. Vaj halli po nuk na kthejnë pronat tona grabitësit qeveritarë! Bregun nuk e kanë mposhtur mbretëri e perandori të tëra. Le t'i vënë me mirë gishtin kokës! Presidenti të mbajë premtimin."

Diskutime të zjarrta e propozime konkrete për ditët që vijnë për kthimin e pronave të Zotit, bënë Kristaq Vera e Paskal Nesturi nga Palasa, të cilët propozuan që çdo fshat, me një komision të posaçëm, të penalizojë cilindo qeveritar nga qendra në bazë, që ka vënë dorë në pronat e veçanta e të përbashkëta të fshatit. Ata popozuan bashkëfshatarin e tyre Milo Petromilo, nënkryetarin e bashkisë Himarë, i cili ka vënë dorë në pronat e shumë fshatarëve të Himarës e më flagrantja, ka grabitur tokë edhe në varrezat e fshatit të tyre, Palasë. Koço Koka nga Qeparoi, duke treguar paudhësitë e bëra nga disa kryepleq në ndarjen e tokave, sipas ligjit famëkeq 7501 dhe vazhdimin edhe sot të grabitjeve të pronave të përbashkëta, i kanë acaruar shumë fshatarët. "Të mos të guxojë njeri të shkelë, se ne do t'iu tregojmë vendin!

Për kryetarn e komunës Lukovë, foli edhe arsimtari nga Shën Vasili Koço Vjero, i cili tha se "Ferdinandi u jep të ardhurve nga pronat tona, se pasurohet për vete". Ky duhet të penalizohet se ka vjedhur, kurse Petro Rondo nga Himara dhe të tjerë, akuzuan Lefter Xanin, punonjës kadastre në bashki, që ka kthyer 44 ha, nga kullotë në tokë bujqësore, për t'i ndarë e shitur sipas ligjit fashist 7501, që të bëjë regjistrimin e pronave me këtë bazë, për të përligjur vjedhjet. Këto ai do t'i vjedhë nga populli i Himarës, po nuk mblodhi mendjen. I revoltuar, por me mend foli edhe kryetari i shoqatës "Bregdeti", Sarandë, ing.Hitro Zhupa, i cili tha: "Kthimi i pronës të zotit, kushtëzon zhvillimin e bregdetit. Qeveria t'i bëjë mirë llogaritë me krahinën tonë!"

Metlli Shehu nga Borshi, i revoltuar tha: "Mjaft më me fjalë, premtime e mashtrime. Tashti duhet me veprimet konkrete, të fillojmë me bllokimin e rrugëve"{. Pas diskutimesh të shumta e të zjarrta, e mori fjalën edhe kryetari i PBDNJ-së për Himarën z.Vasil Bollano, i cili përmbledhtas tërhoqi vëmendjen:

- Për specifikën që ka krahina, qeveria duhet të legalizojë kthimin e pronës të zotit, sipas kadastrës së para vitit 1945.

- Rakordimet e fshehta të dokumenteve pa bazë kadastrën, janë tentativë për humbjen e identitetit të pronës private, me pasoja të rrezikshme.

- Unë solidarizohem me vendimet konkrete të këtij aktivi të mençur e burrëror të bregut.

Në atë shpërthim të sallës që sinjalizonte fundin, u pranua të thoshte fjalën e tij, si një përmbledhje konçize të atyre çka u thanë, z.Milto Nasti nga Lukova, i cili, sikur i vuri vulën të gjitha propozimeve të pjesëmarrësve, duke thënë: "Të paralajmërojmë më parë shtetin e qeverinë, që po nuk na kthyen pronat, ne do të bllokojmë rrugët nacionale gjatë korrikut!"

Duartrokitjet ishin miratimi i propozimeve unanime të kuvendit, që u konkretizuan si më poshtë:

Protestë paralajmëruese

Mbi moskthimin dhe vazhdimin e grabitjes të pronave në bregdetin Jon, Palasë-Sarandë



Drejtuar: Presidentit të Republikës, zotit Alfred Moisiu

Kryetarit të Kuvendit, zotit Servet Pëllumbi

Kryeministrit të Shqipërisë, zotit Fatos Nano

Tiranë

Dyqind përfaqësuesit e popullit të 17 fshatrave të bregdetit Palasë-Sarandë, të mbledhur në Aktivin e Himarës më 14 qeshor, tepër të revoltuar, protestuan ashpër ndaj qeveritarëve të të gjitha niveleve dhe pushtetarëve vendorë, për moskthimin dhe vazhdimin e grabitjes së pronave të tyre të trashëguara.

Burra, gra dhe të moshuar, me lot në sy, të acaruar dhe të papërmbajtur në shkallën më të skajshme, shfaqnin me zë të lartë, me duar e me gjeste, urrejtjen ndaj qeverisë, që bën veshin e shurdhër dhe mban qëndrim indiferent e mospërfillës ndaj kërkesave e protestave të bregdetasve, që kanë ditur gjatë gjithë kohërave të nderojnë e respektojnë udhëheqjet e ndershme, por po me kaq ashpërsi, janë vërsulur e do të vërsulen edhe sot ndaj qeveritarëve mafiozë, që me ligjin 7501 dhe ligje të tjera çnjerëzore, grabisin e bëjnë biznes me pronat tona dhe pasurohen, kurse djemtë tanë rropaten nëpër botë për bukën e gojës.

Përfaqësuesit e popullit të bregdetit në Aktivin e Himarës, në zbatim të detyrave të Kuvendit Mbarëbregdetar e të mitingjeve masive të Himarës e Sarandës për zgjidhjen e problemit të pronës, që e çoi bregdetin në katastrofë të plotë dhe popullin e saj drejt shpërbërjes, paralamërojnë qeverinë:

Në qoftëse nuk legalizon vendimin e Kuvendit Mbarëbregdetar, që mbështetur në Kushtetutë, me konsensusin e shumicës, kuvendi i çdo fshati t'i kthejë pronën çdo trungu familjar, kulteve fetare dhe pronat e përbashkëta çdo fshati, sipas kadastrës së para vitit 1945, populli i bregdetit, si një trup i vetëm, do të zbatojë këto veprime:

1. Çdo fshat me një përfaqësi të organizuar, do të fillojë penalizimin e qeveritarëve, kryetarëve të bashkisë, komisioneve, kryepleqtë, kryetarët e komisioneve të tokave dhe punonjës kadastre që, duke shfrytëzuar poste e ligje të caktuara, kanë vënë e vazhdojnë të vënë dorë, me çfarëdo maske, mbi pronën private të çdo kategorie.

2. Çdo tentativë e qeverisë, Ministrisë së Bujqësisë, qarkut e prefekturës, apo pushtetit vendor: bashki, komunë, për të rekomanduar shifrat e pronave të shpërndara dhe grabitura, me totalin që figuron në kadastër, me qëllim që t'ia paraqesin si të rregullta për t'ia dorëzuar USAID-it për të bërë regjistrimin, pa vajtur prona e kadastruar para 1945 tek i zoti, do të ndalohet nga populli dhe do të ketë pasoja.

3. Nga fillimi i korrikut e në vazhdim, populli i bregdetit do të bllokojë rrugën nacionale Vlorë-Himarë-Sarandë, derisa qeveria të legalizojë kthimin e pronës private, sipas kadastrës së para vitit 1945.

U bëjmë thirrje presidentit, Kuvendit, qeverisë që me një mendje të kthjellët, përgjegjësi të shtetit ligjor, detyrimit Kushtetues dhe konventave ndërkombëtare të ratifikuara edhe prej tyre, të legalizojnë zgjidhjen e pronës pa kosto dhe eksese në bregdet, për t'i hapur rrugën e bllokuar për zhvillime turizmi, në dobi të popullit të bregdetit dhe të ekonomisë së vendit. Veprimet e kundërta do të kenë pasoja të paparashikuara nga bregdetasit tejet të revoltuar, për të cilat ju do të mbani përgjegjësi!

Përfaqësia e popullit të bregdetit në Aktivin e Himarës.

Më 14 qershor 2003

Shënim: Vendimet e Aktivit të Himarës do t'i bëhen të njohura Bashkimit Europian, SHBA-ve dhe forumeve të politikës ndërkombëtare, me përfaqësi në Republikën e Shqipërisë.

- Firmat e përfaqësuesve e aderuesve në vendimin e Aktivit të Himarës, ruhen në arkivin e shoqatës "Bregdeti"



Për kryesinë e Shoqatës AK "Bregdeti"

Kryetari

Vangjel Llazari

------

[BOKE]

Nga aktivi mbarëkombëtar në Himarë për grabitjen e pronave nga pushtetarët hajdutë

Tensionohet në nivele tepër kritike revolta e bregdetit Sarandë-Vlorë për grabitjen e pronave

* Moskthimi i pronave instalon terrorizmin shtetëror

* Ambasadorit të SHBA-ve në Tiranë, z.Xhefri!

* Ambasadorit të OSBE-së, z.Liponen!

* Kryetarit të Parlamentit, z.S.Pëllumbi!

* Kryeministrit z.F.Nano!

* Avokatit të Popullit, z.E.Dobjani!

* Prokurorit të Përgjithshëm, z.Th.Sollaku

Z.të nderuar! Më datën 14 qershor 2003, në Himarë u zhvillua një aktiv mbarëbregdetar, me pjesëmarrjen e të gjitha fshatrave nga Nivica e Sarandës deri në Palasë të Vlorës, nga Shoqata AK "Bregdeti". Si më parë, edhe në këtë tubim, u shfaq hapur me tone shumë të ashpra, revolta ndaj qeverisë dhe parlamentit për zvarritjen e qëllimshme për problemin e pronave në bregdet.

Ju keni kaluar të gjithë përgjatë bregdetit dhe jeni befasuar nga bukuria e tij. Bukuritë e kësaj natyre janë falur nga Zoti për bregdetasit në radhë të parë dhe janë krijuar edhe po nga ata, me gjak e djersë në shekuj. A ju shkon mendja të revoltoheni dhe ju, kur përpara hundëve tuaja po grabiten tokat e tyre? A nuk ju dhimbsen nënat, baballarët dhe fëmijët e bregdetasve, që kanë mbetur dhe do të mbeten me gisht në gojë për të ardhmen? Si mund të ngrihet lumturia e çdonjërit mbi fatkeqësinë e tjetrit? Si mund të bredhin hamshorët deputetë që banojnë nëpër qytete dhe në Tiranë, të grabitin pronat e të tjerëve, kur edhe me ligjin e inkuizicionit 7501, nuk u takon? Ç'janë këta bajlozë, pushtues që vijnë nga deti dhe nga toka, dhe pushtojnë kopshtet dhe bahçet e bregasve, deri edhe rërën? Si mund të mos revoltohen, që nga të moshuarit dhe deri tek fëmijët, kur nga njëra anë shohim çnderimin që bëjnë zyrtarët, kur kryeministri e ka mendjen me ziafete, davete e orgjira, me mish, pilaf e "xhin" dhe nga ana tjetër, të tjerët vuajnë? Ju lutem zotërinj, jepini fund ligjit dhe veprimeve të xhunglës, në të kundërt, populli i bregdetit është i vendosur të shkallëzojë protestat me mjete demokratike, deri në bllokimin e rrugëve, duke mos marrë parasysh asnjë sakrificë dhe pasojë! Ju lutemi, mos u bëni shkaktarë që të derdhet gjak! Më hapur se kaq, nuk flitet!

***

Më datën 14 qershor 2003, shoqata AK "Bregdeti" organizoi në Himarë një tubim me pjesëmarrjen e të gjitha fshatrave nga Nivica e Sarandës, në Palasë të Vlorës. Po e themi me plot vërtetësi e ndjenjë të lartë përgjegjësie, se të gjithë ata që e morën fjalën, goditën ashpër, me tone tejet të nervozuar piraterinë, paturpësinë dhe pashpirtësinë e deputetëve dhe pushtetarëve, që me manovrat e tyre mafioze dhe të fshehta, po grabisin pronat, ashtu siç u do qejfi dhe ku u do qejfi. Dhe kuptohet, se sa i ndjeshëm është njeriu i ndershëm e punëtor me qejflinj të tillë!!!

Prona është e barabartë me jetën, sepse pronat në bregdet nuk janë zabele që t'i mbjellësh në nëntor, e t'i korrësh në qershor.

Ato janë ullishte, vreshta e pemishte që janë ngritur me gjak e sakrifica, duke ndërtuar tarraca e duke marrë dheun e kuq e gurët nga të gjitha anët, me mijëra e mijëra vjet. Asnjë qeveri dhe asnjë pushtues nuk vuri dorë mbi pronat e bregasve, as i dogji dhe as i shkatërroi. Sepse pushtuesit kanë punë vetëm me kundërshtarët politikë. Kurse tek ne, me "kapso" demokracinë, vjen shqiptari dhe grabit dhe vret shqiptari-shqiptarin. Vallë, populli i bregdetit është kundërshtar politik? Aspak! Këta janë kundërshtarë politikë të popullit, sepse vështrojnë që ta zhveshin dalëngadalë deri tek rroba e fundit e trupit. Kënga himariote, aq e rrallë në botë thotë: "Kush është lulja e Vilajetit/ që i kanë bota sevdanë?" E këtë lule të virgjër, ne nuk mund ta lëmë në duar të kriminelëve e hajdutëve. Qeveritë, dy të Meksit, gjashtë të Nanos, dy të Metës dhe dy të Majkos e të djallit me të birin, na kanë përcjellë, duke na thënë: "Keni të drejtë, do ta shikojmë". Po kur? Kur të hipë e ëma e Zeqos në majë të thanës?! Si mund të durohet paturpësia e Skënder Gjinushit (ish-kryeparlamentari) dhe e Ilir Metës (ish-kryeministër), kur ndaj përfaqësuesve të shoqatës, u sollën në mënyrë të pahijshme, si xhahilë të vërtetë? Në feudalizëm jemi kur shteti shpërblente komandantët ushtarakë, me toka ku u donte qejfi? Kush nuk e do te bukurën, të madhërishmen? Jo zotërinj! Atë e kemi ndërtuar, trashëguar ne bregasit dhe ne do ta gëzojmë e trashëgojmë. Si mund të durohet që deputeti Sabit Brokaj, bashkë me sejmenin e tij, kryetarin e komunës së Lukovës, Ferdinand Dhrami, piketojnë fshat turistik në Bunec? Po do Sabiti, të vejë dhe ta bëjë këtë tek bregu i Borshit në Brataj, në vendlindjen e tij. Apo mos i duket i tillë Buneci dhe Borshi i Sarandës? Edhe Ferdinand Dhrami të vejë të bëjë fshat turistik në Rrëzë të Vakes, apo në Harapë, në Çorraj dhe të mos futë hundët në mullarë të botës! Janë rrëmbyer nga pushtetarët, pronat dhe objektet ushtarake në Himarë dhe në Palermo. Janë grabitur pronat në Jalë të Vunoit, në Jaliskoi të Dhërmiut dhe në Palasë. Po kështu, në Himarë dhe në Kudhës. Diskutantët M.Zhupa, P.Çakalli, V.Lazri, I.Hajdini, A.Konomi, P.Vera e mjaft të tjerë, me lot në sy me dhimbje të thellë, por edhe me një urrejtje të tejskajshme, vunë në dukje se diktatura komuniste po ushtrohet në shkallë absolute, më shumë se kudo në bregdetin Vlorë - Sarandë. Pushtetarët, jo vetëm duan të grabisin pasuritë tona dhe t'ua lënë trashëgim fëmijëve të tyre, por të ardhurit apo të prurët nga diktatura në bregdet, dhe të zgjedhurit e tyre, i përdorin si mashë për të fituar votat në zgjedhjet e ardhshme. Djemtë e deputetëve bëjnë alegri dhe hashariten ditën më drekë, duke pirë e duke terrorizuar në lokalet e Ksamilit dhe prefekturën e Durrësit dhe s'u hyn gjemb në këmbë. Merre me mend sikur këtë ta bënte një qytetar i thjeshtë dhe do shihnim se si do e kishin shkuar në rrip të dyfekut, duke i varur lëkurën në majë të karamanjollës! Se komunizmi, vërtetë krijoi fermat, kooperativat, etj, por me pronat tona. Pronat tona i kemi krijuar ne dhe jo komunistët. Të shkakton alergji thënia e Spartak Brahos në një emision në "Vizion plus", se Gjiri i Lalzit mund të ketë qenë pronë e ndokujt që nga koha e Skënderbeut, kurse sot nuk ka pronar!!! Por atëhere, me që nuk ka pronar, pse futen hundët e batakçinjve atje?

Z.të nderuar! Në një kohë kur rezoluta e parlamentit dhe vendimi i qeverisë ndalojnë çdo veprim me pronat derisa të zgjidhet ky problem, atëhere, përse veprohet? A e dini se një proverb thotë: "Sa të mendohet i mençuri, budallai ka mbaruar punë?!" Përsa dhe deri kur do të mendoheni t'u jepni përgjigje këtyre budallenjve, këtyre shejtanë-budallenjve?! Kaq syleshë jeni, kur këta ndodhen, edhe para jush edhe para nesh?! Ka shtet, apo nuk ka? Ka institucione, apo nuk ka? Ç'janë këta derdimenë, more?! Ç'janë këta deputetë, more?! Këta janë harbutë nga radha e poshtme, siç më thosh një plakë nga Konispoli. Komunizmi, duke qenë ideologjia, filozofia dhe praktika e të varfërit, është njëkohësisht e tillë dhe në një shkallë tepër histerike edhe ndaj të pasurve, pronarëve. Por zotëri, këto prona që kemi ne, i kemi ndërtuar me gjak e me djersë dhe nuk ia kemi grabitur askujt. Përkundrazi, ju po grabitni, ju po terrorizoni, ju jeni talebanët pa çallma, mjekër e robdishambër, ju jeni kamikazët dhe Al Kaeda në Shqipëri!

As që bëhet më fjalë për diktaturë. Kjo i ka caqet. As që bëhet fjalë për shtet, kushtetutë, të drejta njerëzore në standarde europiane. Moskthimi i pronave po instalon terrorizmin shtetëror, i cili do të çojë me dhimbje, por me siguri në vëllavrasje: do të përsëritet 1943.

Bregdeti qeveriset nga komuna e Lukovës dhe bashkia e Himarës, mirëpo asnjë nga këta nuk u qas në mbledhje. Përgjegjësi të rëndë ka qarku dhe prefektura e Vlorës, z.Bashkim Habilaj dhe Shpëtim Gjika, që miratojnë marshet funeber të kompozitorëve mortorë!

Një reagim të fuqishëm ka nga djemtë e bregut në emigracion. Dhe nuk janë pak, por mbi 25.000 vetë. Përveç kusureve që kanë si gjithë emigrantët, këta i kanë ndjekur të gjitha zhvillimet me vëmendje dhe kanë sakrifikuar nga të ardhurat e tyre, për mbështetjen e proceseve demokratike. Por acarimin më të madh e ka shkaktuar F.Dhrami, kur thotë që nga fshatrat e bregdetit kanë ikur të gjithë dhe s'ka mbetur njeri, prandaj i detyron ata që janë në fshatra dhe veglat e tyre, të ndajnë tokën me urdhër, me pahir. Ky është i sëmurë psiqik dhe miqtë e tij do t'i bëjnë nder ta shtrojnë në çmendinën e Vlorës, që ta kenë afër për hyzmet qarku dhe prefektura!

Duke parë veprimet e mësipërme, në kuvendin mbarëbregdetar, mafia e tokës ka mundur dhe po punon për përçarjen e fshatrave. Deputetët dhe pushtetarët në bregdet kanë veglat e tyre nëpër kryepleqësi dhe komisionet e tokës në fshatra. Hapur dhe me tone të ashpra u demaskuan disa elementë, sidomos në fshatrat Palasë, Dhërmi, Himarë, Borsh, Qeparo, Kudhës, etj.

Z.Xhefri e Liponen! Siç shihet, në mbarë vendin demokracia për 12 vjet rresht, ende nuk ka filluar. Këta nuk e duan demokracinë dhe faktorin ndërkombëtar.

Këta nuk duan mbikqyrës dhe vëzhgues të huaj. Këta nuk e duan Europën dhe Amerikën, paçka se e bëjnë gojën çorape për dashurinë për ta. Këta që qeverisin sot, nuk e duan OSBE-në. Këta, është shprehur ish-ministrja e Jashtme Arta Dade. Pra, këta nuk duan njeri mbi kokë. Këta duan të jenë të lirë për t'i vënë litarin në grykë ish-pronarëve dhe mbarë popullit. Kjo qeveri erdhi në pushtet me gënjeshtra, me mashtrime dhe me ndihmën e kallashnikovëve, karabinave dhe helmetave ruse. Prandaj edhe me forcë, me dhunë, duhen larguar nga pushteti. Sepse faktori i brendshëm, ende nuk është në standardet europiane, nuk mund të vendosë demokracinë, nuk mund ta shpjerë vendin drejt Europës, por drejt gropës. Dhe kur faktori i brendshëm nuk është në gjendje të vendosë demokracinë, por krijon konflikte sociale, korrupsion, hakmarrje e vëllavrasje, atëhere ndërhyn faktori ndërkombëtar dhe veçanërisht, Shtetet e Bashkuara.

Në fund, Kuvendi mbarëbregdetar vendosi të përshkallëzojë protestat deri në bllokimin e rrugës automobilistike Sarandë-Vlorë.

Nga g.55