Bujar Rama mposht me gjyq ish-presidentin Meidani dhe mban gradën gjeneral

[Orku]

Tema


Gjeneral Bujar Rama, nëpërmjet një proçesi gjyqësor, ka anulluar dekretin e ish-presidentit Meidani në bazë të të cilit kërkohej që zotit Rama t'i hiqej grada e gjeneralit. Vendimi ka marrë formë të prerë duke u bazuar në nenin nr. 856 dt. 04. 03. 2003, të

Gjykatës së Shkallës së Parë Tiranë. Sipas zoti Rama, dekreti i ish-presidentit Meidani për heqjen e gradave, veç të tjerave kishte dhe mangësi ligjore

Bujar Rama mposht me gjyq ish-presidentin Meidani dhe mban gradën gjeneral

Rama: Dekreti i Meidanit vetëm motiv politik

Ju tashmë me të drejtën që ju ka dhënë gjykata jeni Gjeneral-Brigate në dizpozicion të Presidentit të Republikës. Si e keni përjetuar këtë fitore do ta quaja?

Në radhë të parë kjo nuk është një fitore e imja, por është një fitore e dinjitetit të nëpërkëmbur të ushtarakëve në përgjithësi dhe e imja në veçanti. Ushtarakët kanë qenë e vazhdojnë të jenë zyrtarët më të diskriminuar në shoqërinë shqiptare e sidomos nga goditjet që i ka dhënë politika. Gjej rastin të falënderoj gjyqtarët e kësaj çeshtjeje që me drejtësi dhe me kurajo qytetare dhe profesionale, gjykuan këtë çështje dhe më dhanë të drejtë, megjithëse ka qenë një proçes që ka zgjatur gjatë. Dekreti i ish presidentit kishte mangësi si në bazueshmërinë ligjore, por dhe në konceptimin e tij.

Kështu dua të përmend dy probleme: ligji nuk ka heqje të gradave por ulje të gradës që nuk zgjat më shumë se gjashtë muaj, kur kemi të bëjmë me një thyerje shumë të rëndë të disiplinës dhe, së dyti, unë nuk kisha punuar asnjë ditë me ish Presidentin, kjo bënte që motivacioni të ishte absurd dhe i pambështetur ne ligj. Kjo tregonte se motivi ka qenë vetëm politik.



Po nuk keni qenë i vetëm që ju janë hequr gradat, ka qenë një listë me gjeneralë që u janë hequr gradat?!

Po është e vërtetë, pothuajse të gjithë ushtarakëve të graduar në kohën e qeverisë demokratike, nga ish presidenti Sali Berisha u janë hequr gradat me të njëjtin motivacion "Për paaftësi në detyrë dhe thyerje të rëndë të disiplinës" gjë që flet për një hakmarrje të verbër politike, hakmarrje kjo që do të zbriste deri tek fshesaxhiu i zyrave. Fakti sot që administrata shtetërore është me mbi 80% e zëvendësuar me militantë të partisë në pushtet. Por ajo që doja të theksoja se kur Presidenti i Republikës shkel ligjet për të cilat ai duhet të ishte garant, vaj-halli për zyrtarin e ulët të administratës shtetërore se çfarë mund të bëjë! Une mendoj se zyrtarë të tillë të lartë që bëjnë të tilla veprime pa të drejtë dhe kur kjo vërtetohet dhe me gjykatë, duhet të paguajnë një gjobë për paaftësinë e tyre, pasi nga sa di unë, shteti ka humbur miliona lekë me këto gjyqe dhe askush nuk është ndëshkuar.



Cilat kanë qenë të ardhurat tuaja financiare dhe ç'përfituat si ushtarak nga shteti që nga koha e lirimit tuaj?

Pas lirimit tim nuk përfitova asnjë ndihmesë, përkundrazi motivacioni i lirimit ishte i frikshëm për këdo që i kërkoje punë, megjithëse kisha dy arsimime të larta dhe titullin e Doktorit të Shkencave. Në këto kushte në vitin 1998, fillova punë private si kasap, me vonë banakier, magazinier deri sa kam arritur tani të drejtoj një biznes të vogël si dhe një organizatë joqeveritare për luftën kundër krimit të organizuar dhe mafien.

Imagjinoni që ky rast mund të jetë unikal në botën demokratike që gjenerali të mos përfitojë asnjë të drejtë dhe të flaket kaq brutalisht, megjithëse mbi të rëndojne 25 vjet karrierë ushtarake dhe një pozicion delikat në administratën shtetërore.



Cilat janë planet tuaja për të ardhmen?

Unë i kam nisur një kërkesë Presidentit të Republikës për të bërë dekretimin për daljen si gjeneral në rezervë. E rëndësishme ishte mbrojtja e dinjitetit tim. Do të vazhdoj të merrem me biznesin tim të vogël dhe me kontributin tim në shoqërinë civile.