"Aman! Mbyllini sallat e bixhozit, im shoq la pantallonat

[ALBA]

--------------------------------------------------------------------------------

Ilir Bushi

Të mbyllen urgjentisht të gjitha vatrat e bixhozit në Shqipëri, sepse familjet tona po rrënohen, ndërsa burri im para 3 ditësh ka lënë pantallonat nëpër makinat elektronike të pokerit". Këtë apel e ka bërë dje Margarita Trebicka, bashkëshortja e Kristaqit, e cila banon në Rrugën e Kavajës dhe ka 4 vjet që mallkon pronarët e lojërave të fatit, ku ka nisur tragjedia. "Ishim të pasur dhe tani jemi futur në borxhe dhe kjo është një çmenduri", apelon ajo.

Përse jeni kaq e revoltuar?
Sepse halli im është i madh. Këtë hall ma kuptojnë vetëm ato gra që i kanë burrat mikrobxhinj të bixhozit. Kam ardhur nga emigracioni për të ndërtuar një jetë të lumtur në vendin tim, por vesi i burrit tim, Kristaqit, ma ka rrënuar familjen dhe tani ndihem e shkatërruar. Rruga e vetme është të mbytem dhe të lë kalamajtë rrugëve, ose ndarja.

Çfarë ju ka ndodhur konkretisht?
Kam dy vajza dhe një djalë që duan bukë dhe veshmbathje. Për këtë punuam burrë e grua në Greqi për 6 vjet. Me djersën e ballit bëmë ca parà, por im shoq i shkatërroi duke lozur bixhoz. Shkonte sa në bingo aq edhe në lojërat elektronike. Dhe brenda 4 vjetëve ka humbur rreth 68 mijë dollarë, duke na futur edhe në borxhe.

Si e filloi bixhozin burri juaj?
Nuk e di. Kur erdhëm në Tiranë, më 1999, gjatë vitit të parë më thoshte ndonjëherë se shkonte në bingo për të kaluar kohën, por kjo nuk më shqetësonte. Pastaj iu bë një sëmundje kronike dhe në fund para tri ditësh erdhi në shtëpi pa pantallona dhe kjo nuk mund të durohet më nga asnjë grua.

Përse erdhi pa pantallona?
I kishte lënë peng në një sallë ku luhej me makinat elektronike. Ato pantallona ishin pjesë e një kostumi të shtrenjtë që e patëm blerë kur ishim me pushime në Itali. Pasi kishte lënë 400 mijë lekë në bixhoz im shoq la peng zinxhirin dhe orën. Pastaj në orët e vona la bluzën dhe pantallonat. Sipas tij, ai që ia kishte marrë peng, i kishte bërë nder. Kjo është çmenduri dhe unë do të largohem një sahat e më parë.

Përse nuk jeni alarmuar më parë me vesin e burrit tuaj?
Në fillim nuk ishte shqetësuese, sepse luante me shuma të vogla. Bile thoshte se kishte fat dhe një ditë fitoi në bingo 480 mijë lekë me të cilat bleu një motor të bukur. Por më vonë humbi aq parà, saqë mund të blinim dhjetë makina të shtrenjta.

Çfarë arsimi ka burri juaj?
Ka mbaruar të mesmen, ndërsa unë kam kryer studimet e larta për mësuese. Por në këtë ves të poshtër nuk ka të bëjë shkolla. Ka plot njerëz që kanë mbaruar universitetin dhe e kanë fiksim bixhozin. Këtu duhet të vërë dorë shteti dhe t'i vërë fre bixhozit.

Po në Greqi a luante bixhoz burri juaj?
Atje s'kishte kohë të hante bukë, sepse punonte si kamerier në një klub për 14 orë rresht. Edhe atje kishte disa vende të posaçme bixhozi, por ishin me karar dhe shanset ishin të barabarta për të humbur ose për të fituar. Kurse këtu të gjithë burrat që hyjnë për të luajtur e dinë që do të humbasin. Ndërsa ne gratë po qajmë dhe po shkatërrohemi çdo ditë.

Ju vetë me çfarë merreni?
Kam kërkuar punë si mësuese, por ende nuk kam gjetur. Megjithatë nuk kisha nevojë të merresha me ndonjë punë, sepse paratë na mjaftonin. Por ai i humbi të gjitha, duke më thënë se ia kishte dhënë borxh të vëllait. Në fakt i kishte lënë në bixhoz e tani ka hyrë në borxhe. Kam gjithë ato halle dhe fëmijët duan bukë dhe rroba.


"Dy gra japin gjak për të larë borxhet e burrave të tyre"

"Dy shokë të burrit tim që luajnë bizhoz, i kanë detyruar gratë e tyre që të japin gjak për të siguruar paratë e lojës". Kështu tregon Margarita, e cila shton se rruga e bixhozit e çon familjen drejt shkatërrimit. "Unë i kam njohur të dyja gratë dhe ju them se ato jetojnë çdo ditë me ankth dhe tension, sepse e ardhmja e tyre nuk ka asnjë zgjidhje", vazhdon Margarita. Më tej në lidhje me këtë problem ajo shton: "Njëri prej tyre, pasi humb në bixhoz, bëhet i dhunshëm dhe e rreh gruan duke e detyruar të shkojë në spital për të dhënë gjak, ndërsa tjetri e dërgon duke i premtuar se nuk do të luajë më". Por, sipas saj, të nesërmen gjithçka nis nga e para...


"Shumica e divorceve, shkak kryesor bixhozi"

"Rreth 70 për qind e divorceve kanë si shkak kryesor pasionin e burrave për të luajtur bixhoz". Ky përfundim ka dalë në muajin maj të këtij viti nga statistikat e gjykatës. Sipas këtyre statistikave, numri më i madh i grindjeve familjare dhe i divorceve në Shqipëri është pasojë e vesit të burrave për lojërat e fatit. Këtu përfshihen të gjitha lojërat e fatit, si: bingo, lojërat elektronike, bilardo, poker, lojërat me zara etj. Thelbi i këtyre divorceve ka të bëjë me faktin se shumica e meshkujve luajnë bixhoz me paratë e parashikuara për ushqimin e përditshëm dhe veshmbathjen. Në këtë mënyrë ata humbasin lekët e bukës dhe, përveç kësaj, hyjnë në borxhe. Sipas këtyre statistikave, 20 për qind e këtyre burrave janë detyruar të shesin shtëpitë, duke i lënë pjestëarët e familjes në qiell të hapur ose duke marrë përkohësisht shtëpi me qira. Por si shkak i përhapjes së madhe të bixhozit në Shqipëri përmendet papunësia dhe shpërndarja e gjerë e sallave të bixhozit në të gjithë vendin. Dhe në shumicën e divorceve janë gratë ato që duan të ndahen nga bashkëshortët e tyre.