Shqipëria/Kriminaliteti/Korrupsioni
Korrupsioni dhe krimi prodhojnë Albtraumën shqiptare
Nga Roland Siegloff, DPA
Tirana (DPA) - Me një gotë verë të kuqe në dorë, Mero Baze tregon për mafien. Nis me vdekjen e dhunshme të njërit prej bosëve të tregtisë së hekurit - «për rrethanat në të cilat ndodhet Shqipëria ai ishte i ndershëm». Për arsye se disa ministra të qeverisë shqiptare kanë gisht në aferat e dyshimta të klaneve - «shumica e qeverisë kontrollohet nga tri grupet më të mëdha të mafies». Befas, një bip në celular ndërpret ligjëratën e kryeredaktorit të gazetës së përditshme «TemA». Baze shikon mbi ekranin e celularit dhe vë re mesazhin që i ka ardhur: «Varri yt ka kohë që është hapur», shkruan dërguesi anonim.
A i ke lajmëruar organet e policisë? Kjo pyetje Bazes, i shkakton të qeshur. «Policia është e lidhur ngushtë me qeverinë dhe këto grupe", thotë drejtori i gazetës. Në tre ditë ai ka marrë 15 mesazhe të tilla. E kanë qëlluar me armë zjarri ndërsa i jepte makinës. Ndërsa arma e tij është fjala në gazetë.
E kanë qëlluar me plumba në Mercedesin e tij, pasi "TemA" ka shkruar për afera të dyshimta të një ministri dhe shoferit të tij nga të cilat fitoheshin 300 000 dollarë. «Pastaj unë shkrova: Ata duhet të më padisin», tregon Baze nga jeta e përditshme në Tiranë.
Përfaqësuesi më i lartë i BE-së në kryeqytetin shqiptar, Lutz Salzmann, i sheh gjërat po kaq kritike. «Problemi kryesor është paaftësia, ose ndoshta mungesa e dëshirës për të luftuar ashpër bandat e krimit të organizuar», thotë Salzmann. Shumë herë, ministrat e brendshëm dhe të drejtësisë së 15 shteteve të BE-së kanë folur gjatë këtij viti mbi korrupsionin, trafikun e drogës dhe të qenieve humane kryesisht nga vendet e lindjes. Unioni ndihmon Shqipërinë në ndërtimin e burgjeve moderne, shkollimin e policëve, gjykatësve dhe prokurorëve. Sigurisht, do të ketë rezultate, nëse - para së gjithash - je i gjithëpushtetshëm.
Në të vërtetë mafia nuk është më një faktor destabilizues për vendin, mendon presidenti i vendit Alfred Moisiu. Por reaksioni i klaneve mbi luftën kundër krimit po bëhet gjithnjë e më i shpeshtë: «Kur dikush është duke u mbytur, lëvizjet e tij bëhen më të forta.» Për këtë, Shqipëria ka nevojë për ndihmë nga Europa, thekson Moisiu, një ish-gjeneral mjaft i njohur.
Sigurisht në një vend, ku një mësues në muaj paguhet me 120 Euro dhe që një polic as nuk mund të quhet se merr rrogë, mbeten problematike korruptueshmëria dhe ekonomia farefisnore. «Korrupsioni vret shpresën», thotë shkrimtari, deputeti opozitar Besnik Mustafaj. Shumë shkencëtarë e studiues kanë braktisur vendin, e po ashtu edhe pjesa më e madhe e investitorëve të Italisë së afërt. Kështu, intelektualët e mbetur si drejtori i Institutit shqiptar të Medias, Remzi Lani, ankohen: «Ne nuk duam të na shohin si problem, por si një vend.»
Tek shumë të vjetër në moshë duket se po përhapet ideja e lëshimit të vetvetes, e njëjta atmosferë e kohës së hekurt të dikaturës së Enver Hoxhës. Të rinjtë që duan të mbrohen nga grimcat e mbetura të regjimit të Hoxhës, kanë ndërmarrë një iniciativë kundër mafies shqiptare. «Ne duam të ndryshojmë çdo gjë», thotë nxënësja e re që studion në shkollën e policisë Daniela Hoxhallari. «Ne duam të luftojmë kundër kriminalitetit dhe të bëjmë diçka për këtë vend.»
Këtë synonte edhe Partia Demokratike me projektimin e një ligji që, sipas modelit gjerman, të hiqnin imunitetin e deputetëve që dyshohen se janë të ngatërruar në afera korruptive dhe janë pjesë e krimit të organizuar. Shumica e deputetëve socialistë të qeverisë së kryesuar nga Fatos Nano e hodhën poshtë miratimin e tij duke votuar kundër. Nanon, lideri i opozitës, ish presidenti Sali Berisha, e sheh si figurën qendrore të ndërthurjes me shtresën e kriminalitetit: «Ai është ideatori dhe arkitekti.» Ministrat e brendshëm të BE-së do të merren pa dyshim edhe për shumë kohë me problemin Shqipëri.
Përgjigju Duke Cituar
Krijoni Kontakt