Kosova në marrëdhëniet ndërkombëtare

[Llapi]

"Shkunde pemën" ("Shake the tree")!-Shkruan Agim Vuniçi







Përpjekja e Thaçit për të lëkundur pozicionin politik të faktorit politik shqiptar që është statik dhe pa invencion përputhet me modelin amerikan "shake the tree" "shkunde pemën" që përmendi këshilltarja për siguri nacionale dr. Condoleezza Rice gjatë dëshmisë nën betim para Komisionit të Pavarur Nacional, gjatë dëgjimit lidhur me ngjarjet gjatë shtatorit 2001 dhe ngjarjet politike në botë. Një propozim i tillë edhe pse nuk ka ofertën koncensuale të institucioneve të Kosovës sfidon jo vetëm palën shqiptare, atë serbe, por edhe bashkësinë ndërkombëtare, për të ndërruar kursin e deritanishëm politik që bazohet në bisedimet e shpeshta të UNMIK-ut me qeverinë serbe, duke përçuar zërin e zyrtarëve të Beogradit dhe të UNMIK-ut në OKB, e aspak të palës shqiptare.

Nuk është aspak e arsyeshme që në Kosovë të vazhdojë gjendja e tanishme e status quos, ngase stabiliteti politik është shumë vështirë të mbahet, meqë situata shumë e vështirë ekonomike mund të gjenerojë krizë sociale me efekte të përshkallëzimit konfliktuoz të marrëdhënieve në shoqëri, duke mos anashkaluar aspak përkeqësimin e mundshëm të raporteve ndëretnike.

Është plotësisht e qartë që pa ndërhyrjen e drejtpërdrejtë të diplomacisë amerikane nuk do të ketë zgjidhje të asnjë problemi në botë e aq më pak të Kosovës, meqë SHBA-ja ka investuar kredibilitetin politik, ushtarak dhe moral në ndërtimin e demokracisë së njëmendët në Kosovë.

Meqë diplomacia amerikane dalngadalë do të shkarkohet nga problemi në Irak me transferimin e kompetencave, nga administrata zyrtare e partnerëve të koalicionit në këshillin e përkohshëm qeveritar të Irakut dhe njëherit rivendosjen e sovranitetit shtetëror në Irak, do të hapë mundësitë që Uashingtoni zyrtar të rikthejë vëmendjen edhe në Ballkanin gjithnjë të trazuar në përgjithësi dhe Kosovën në veçanti.

Dorëheqja e Holkerit edhe pse i referohet përkeqësimit të gjendjes së tij shëndetësore, nuk mund të mbetet jashtë kontekstit politik meqë "pushimi" politik i finlandezit finok arsyetohet me çertifikatën mjekësore-politike, edhe pse për dorëheqjen e të cilit nuk është deklaruar ende shefi i tij, Anan.

Edhe pse nuk ka ndonjë domethënie të veçantë distanca gjeografike në mes të Prishtinës, Shkupit, Tiranës, Beogradit me Athinën, para dhe gjatë lojërave olimpike fiton nje dimension të ri politik. Athina që ka investuar shumë në këto lojëra, angazhohet që të ketë qetësi në rajon, ngaqë kështu do të rriteshin gjasat për një siguri me të madhe gjatë lojërave olimpike. Për këtë qëllim kanë siguruar edhe përkrahjen e forcave të NATO-s, sigurisht që nuk do të mungojë edhe prezenca e përkushtuar e amerikanëve. Prandaj sigurisht që brenda këtij konteksti politiko-diplomatik do të përcillen edhe lëvizjet politike dhe ngjarjet në Kosovë.

Pozicioni i paqartë politik i shqiptarëve domosdo determinon edhe marrjen e inciativave për të ndryshuar gjendjen apatike në të cilen gjenden shqiptarët dhe Kosova. Iniciativa e re e Thaçit është më tepër zgjim nga letargjia politike dhe ofertë që u drejtohet serbëve vendorë për të relaksuar marrëdhëniet ndëretnike, pas ngjarjeve të përgjakshme të marsit. Një propozim i tillë edhe pse nuk ka ofertën koncensuale të institucioneve të Kosovës sfidon jo vetëm palën shqiptare, atë serbe, por edhe bashkësinë ndërkombëtare, për të ndërruar kursin e deritanishëm politik që bazohet në bisedimet e shpeshta të UNMIK-ut me qeverinë serbe, duke përçuar zërin e zyrtarëve të Beogradit dhe të UNMIK-ut në OKB, e aspak të palës shqiptare.

Sigurisht që edhe Thaçi e ka të qartë se Marrëveshja e Ohrit nuk është model për zgjidhjen e problemit të Kosovës që më tepër është problem kolonial se sa ndëretnik. Në këtë kontekst nuk kishtë ndonjë peshë politike deklarata e kryeparlamentarit Daci para kryebashkiakëve të Kosovës, se problemi i Kosovës nuk mund të zgjidhet me modele ballkanike, përkundrazi modeli i Ohrit ishtë sponsoruar nga amerikanët dhe BE-ja, dhe kishte për qëllim uljen e tensioneve ndëretnike dhe ndërprerjen e menjëhershme të luftimeve në mes të forcave të ligjshme vetëmbrojtëse të shqiptarëve dhe forcave qeveritare të VMRO-DPMNE-së. Oferta e Thaçit drejtuar serbëve vendorë, por edhe të gjitha palëve të interesuara përmban edhe diç pozitive, meqë në këtë rast do të duhej pranuar subjektiviteti ndërkombëtar i Kosovës, pastaj çfarëdo marrëveshje që do të nënshkruhej do të kishtë karakter ndërkombëtar, dhe se një marrëveshje e tillë do t'ia lehtësonte punën edhe bashkësisë ndërkombëtare për zgjidhjen e statusit politik të Kosovës. Kuptohet që një marrëveshje e tillë e mundshme do të largonte ndikimin politik të Beogradit nga Kosova dhe do t'i linte hapësirë Serbisë për t'u demokratizuar, dhe për të përmbushur kushtet e parashtruara, bashkëpunimin me Gjykatën e Hagës dhe reformat ekonomike në vend.

Sigurisht që edhe kjo ofertë nuk do t'i entuziazmojë shumë qytetarët e Kosovës, të cilët edhe ashtu janë të margjinalizuar, por dosido bile i ka nxitur zyrtarët politikë të japin deklarata mohuese ndaj kësaj inciative për të ripërsëritur slloganin e pranimit formal të pavarësisë, pa bërë asnjëherë operacionalizimin kohor dhe politik.

Përpjekja e Thaçit per të lëkundur pozicionin politik të faktorit politik shqiptar që është statik dhe pa invencion përputhet me modelin amerikan "shake the tree"- "shkunde pemën" që përmendi këshilltarja për siguri nacionale Condoleezza Rice gjatë dëshmisë nën betim para Komisionit të Pavarur Nacional, gjatë dëgjimit lidhur me ngjarjet gjatë shtatorit 2001 dhe ngjarjet politike në botë (burimi: transkripti i dëshmisë së dr. Rice para komisionit) të publikuar në CNN.
*(burimi: http://www.cnn.com/2004/ALLPOLITICS/...ce.transcript/)

[Llapi]

MALOKU:MODELI I OHRIT-OFERTË SERIOZE PËR SERBËT



Fadil Maloku, kryetar i Institutit Demokratik për Relacione Etnike


RADIO EVROPA E LIRË
Zoti Maloku, cila është sipas jush gjendja aktuale e marrëdhënieve ndëretnike në Kosovë?

FADIL MALOKU
Mendoj që 17 marsi gjithsesi komunitetit serb i ka krijuar një pretekst të ri për të krijuar këtë distancë ndëretnike mes shqiptarëve dhe serbëve. Raportet janë të ngrira, në kuptimin që nuk ka komunikim institucional. Serbët, në njëfarë mënyre kanë bojkotuar të gjitha institucionet dhe në këtë gjendje, unë mendoj që diskursi politik shqiptar do duhej të bënte një ofertë të re në kuptimin e integrimit, apo të shqyrtimit të mundësive të integrimit të komunitetit serb në institucionet e Kosovës.

RADIO EVROPA E LIRË
Serbët ndërkohë kanë vazhduar të bojkotojnë institucionet e Kosovës dhe ky bojkot ka filluar edhe para 17 marsit për shkak të pikturave në Kuvendin e Kosovës. Cila sipas jush është rruga për rikthimin e tyre edhe në institucione, por edhe në proceset e tjera të përgjithshme?

FADIL MALOKU
Unë konsideroj vetë faktin që as nga ana e institucioneve të Kosovës, as nga administrata e UNMIK-ut, e as nga diskursi politik kosovar, nuk ka patur ndonjë ofertë serioze. Unë mendoj që oferta për integrimin e serbëve duhet të jetë një ofertë serioze, e cila dosido do t'u mundësonte integrimin në këtë konfiguracionin e ri i cili është projektuar përmes standardeve. Mirëpo ne kohëve të fundit kemi dhe një ofertë, e cila unë mendoj se është oferta e parë serioze e dalë nga diskursi politik i PDK-së, konkretisht nga lidershipi i saj zoti Hashim Thaçi.

RADIO EVROPA E LIRË
Meqë përmendët këtë propozim të fundit, në disa raste është përmendur rregullimi i raporteve sipas modelit të Marrëveshjes së Ohrit. Cili është mendimi juaj për këtë?

FADIL MALOKU
Sikur nga ky aspekt, projekti apo ideja e integrimit të brendshëm të grupimeve nacionale sipas modelit të Ohrit, nuk do të mund të ishte jashtëkohor dhe i pandryshuar në përputhje me cilësitë apo kriteret të ashtuquajtura kulturore, besimeve, vlerave, normave, simboleve, gjuhës, etj, që unë mendoj në këtë fazë nuk ka të bëjë me autonominë kulturore, ashtu siç trumbeton establishmenti politik i Koshtunicës dhe disa mediume serbe. Nëse analizohet ky projekt, unë mendoj se është projekt serioz, jo në kuptimin e imitimit të çdo paragrafi të kësaj marrëveshjeje, por në kuptimin e ofertës. Aty unë mendoj që qëndron madhështia e këtij propozimi. Marrëveshja e Ohrit nëse bëhet një analogji me Kosovën, unë mendoj se së pari, tërësisht dhe pakushte pretendon ta hedhë dhunën për realizimin e qëllimeve politike, që në rrethanat tona i eleminon ato paradispozitat të një klime dhe situate të pasigurisë, jostabilitetit dhe kthimit kah vetvetja që i ka përcjellë shqiptarët, qytetarët e Kosovës gjatë kësaj periudhe pas luftës. Së dyti mendoj argumentin e diskriminimit pozitiv etnik që favorizoi korniza kushtetuese, tani sa vjen do të mund ta minimizonte deri në ato masa që përfaqësimi i grupimit etnik serb më nuk mund të prejudikohet përmes llogjikës së diskriminimit pozitiv, por tani do të vijnë shprehjet një votë një qytetar.
Së treti favori i Marrëveshjes së Ohrit në rastin e Kosovës për mendimin tim do ta zhbënte apo eleminonte praktikën e deritanishme të emërimeve dhe shkarkimeve të anëtarëve të asamblesë komunale, jashtë dhe pavarësisht protokollit të institucionit apo mekanizmit të zgjedhjeve. Së katërti ofertën për kantonizim nga ana e serbëve do ta bënte të padiskutueshme, edhe me vetë faktin se administrata qëndrore dhe jo ajo periferike, do të ishte alfa dhe omega e zhvillimeve të mëtejme demokratike të Kosovës. Së pesti konsideroj që sovraniteti, i cili në periudha të ardhshme të integrimeve globale dhe kompaktësia territoriale së bashku me tërësinë etnike, do të mund të konservoheshin edhe për një kohë të gjatë, domethënë është fjala për anën e diskursit politik kosovar. Së gjashti mendoj aplikimi i formulës së shtetit qytetar, sundimit të ligjit dhe rendit demokratik, do të afronte Kosovën shumë më afër derës së integrimeve rajonale dhe sidomos atij synimit të përgjithshëm që e kanë të gjitha shtetet postkomuniste, integrimit në bashkësinë evropiane.

RADIO EVROPA E LIRË
Zoti Maloku, po sipas jush sa do të mund të ishte e pranueshme një ofertë e tillë për serbët e Kosovës dhe cilat janë favoret që ata mund të nxjerrin nga kjo?

FADIL MALOKU
Unë konsideroj reagimet e opinionit publik me vetë faktin që ata konsiderojnë edhe mediumet, edhe diskursi politik serb konsiderojnë që oferta e Marrëveshjes së Ohrit është një ofertë që është shumë serioze. Unë mendoj që kjo është një ofertë e mirë. Jo ofertë që të merret çdo paragraf i Marrëveshjes së Ohrit edhe të vendoset këtu në Kosovë. Por mendoj se deri tani është oferta më serioze që është bërë nga ana e palës shqiptare në raport edhe me administratën e UNMIK-ut, edhe me faktorin ndërkombëtar, edhe me establishmentin politik të serbëve lokalë. Serbët insistojnë, kanë projektin e decentralizimit, e kishin më herët dhe të kantonizimit. Decentralizimi unë mendoj është një derë e vogël që është de fakto mos them dhe de jure autonomi territoriale. Autonomia territoriale është një koncept tjetër, një projekt tjetër, që nuk u ofron të njëjtin trajtim dhe status, as politik, as juridik, as ekonomik, serbëve lokal në integrimet e ardhshme në identitetin shtetëror, të cilin po e pretendojmë ta ndërtojmë ne të gjithë në Kosovë.

RADIO EVROPA E LIRË
Si do të ndikojnë sipas jush marrëdhëniet aktuale ndërmjet serbëve të Kosovës dhe institucioneve të Kosovës, për përmbushjen e standardeve si rrugë drejt statusit përfundimtar?

FADIL MALOKU
Unë kam thënë disa herë që çështja e standardeve është vetëm blerja e kohës nga ana e bashkësisë ndërkombëtare. Bashkësia ndërkombëtare për mendimin tim nuk e ka të qartë ende, por unë konsideroj që definitivisht çështja e standardeve para statusit është një blerje kohe për ta arritur integrimin. Konkretisht unë mendoj që ky është aludimi tek integrimi i serbëve, për shkak se në kuadër të standardeve, të tetë standardeve, pjesa më e rëndësishme është integrimi i serbëve në identitetin e ri, të cilin do ta ndërtojë Kosova.

Intervistoi Rrahman Paçarizi

[Llapi]

Gentilini: Propozimi i Thaçit një model i frytëshm


Prishtinë, 1 qershor (Kosovapress) Time: 11 : 14

Modeli i propozuar nga Thaçi paraqet një model të frytshëm. Mendoj se elemente nga Marrëveshja e Ohrit do të mund të përdoren edhe në Kosovë, deklaroi për të përditshmën “Zëri”, Fernando Gentilini, i dërguar i posaçëm për Kosovë i përfaqësuesit për Politikë dhe Siguri të Jashtme të BE-së, Havier Solana

[Llapi]

Senatori Kerri është i angazhuar për zgjidhjen e statusit përfundimtar të Kosovës

Isabela Çoçoli
2 qershor 2004


James Rubin tha se Kosova është shembull i suksesit të një aleance të gjerë me pjesëmarrjen e Kombeve të Bashkuara dhe veçanërisht në NATO-s, që ndali spastrimin etnik atje dhe dëboi prej andej forcat shtypëse ushtarake dhe të sigurimit sërb. Në qoftë se zgjidhet President, Senatori Kerry, do të zbatojë pikërisht atë model edhe në Irak, ku NATO-ja do të ishte një organizatë që do të garantonte sigurinë, ndërsa komuniteti ndërkombëtar do të bashkëpunonte për të dhënë mbështetje politike dhe ekonomike në zhvillimin e Irakut. Zoti Rubin tha më tej se Senatori Kerry ka bindjen se prania amerikane në rajonin e trazuar të Ballkanit duhet të vazhdojë.
"Kur ai shikon problemet në Evropën jugore, është i bindur se udhëheqja dhe angazhimi amerikan në bashkëpunim me partnerët tanë evropianë, me NATO-n dhe me institucionet evropiane si Bashkimi Evropian, duhet të vazhdojnë me synimin e qartë për një Evropë të integruar, të lirë dhe paqësore. Vetëm në një Evropë tillë vendet e Ballkanit dhe të Evropës Jugore e Lindore mund të hynë në institucionet evropiane".

Lidhur me kohëzgjatjen e pranisë së trupave amerikane në Kosovë, James Rubin tha se Senatori Kerry është kundër prirjeve të Pentagonit për të gjetur një justifikin që trupat të kthehen në Shtetet e Bashkuara.

"Senatori Kerry do të donte që trupat e NATO-s të qendrojnë në Kosovë për sa kohë që të jetë e nevojshme për vendosjen e stabilitetit, ndërtimin e institucioneve demokratike dhe integrimin me institucionet evropiane. Ai do që Shtetet e Bashkura të kenë rolin udhëheqës në realizimin e këtij objektivi, për të mos lejuar që problemet, të cilat vërehen tani në Ballkan të marrin përpjestime të gjera dhe të shndërohen në një konflikt të rëndë".

James Rubin tha se Shtetet e Bashkuara kanë shënuar një sukses të madh në atë rajon dhe në asnjë mënyrë nuk duhet ta dëmtojnë atë duke u larguar para kohe nga Kosova. Lidhur me statusin përfundimtar, zoti Rubin tha se Senatori Kerry është i mendimit se Kosova duhet të ketë të drejtën të vetvendosë dhe se Shtetet e Bashkuara duhet të udhëheqin botën në zgjidhjen e statusit të saj përfundimtar.

[Llapi]

FLET EKSKLUZIVISHT PER GAZETEN KREU I PDK-SE

Hashim Thaçi:UNMIK të tërhiqet -
"Ja si funksionon pakti i Ohrit për Kosovën"



Elira Çanga


Kosova duhet të jetë tokë e sigurtë edhe për pakicat etnike të saj. Ndaj, një marrëveshje e ngjashme me atë të Ohrit, që i solli paqen etnike Maqedonisë këtu e tre vjet më parë, është e nevojshme të aplikohet edhe në Kosovën e pasluftës. Kështu ka deklaruar dje ish-lideri i UÇK-së dhe kreu i Partisë Demokratike të Kosovës, Hashim Thaçi. Në një intervistë ekskluzive për "Gazetën Shqiptare" ai shpjegon tezën e tij, të propozuar si zgjidhje për Kosovën në takimin e Lucernës, që mblodhi pak javë më parë në një tryezë të përbashkët liderët e shqiptarëve në Ballkan.

Cila është platforma e propozuar prej jush për një "Marrëveshje të Ohrit" për Kosovën?
Në fakt, nuk bëhet fjalë për një Marrëveshje të Ohrit për Kosovën si tërësi. Ajo që kam propozuar unë ka të bëjë me pranimin e disa elementeve nga kjo marrëveshje, që do të mund të jenë të dobishme për trajtimin e problemit të pakicave etnike në Kosovë, probleme që janë bërë pengesë shumë serioze për ecjen përpara të proceseve në vend. Fokusi ka qenë në parimin themelor të modelit të Ohrit, i cili ka të bëjë me respektimin e tërësisë territoriale të Kosovës, unitetit të saj dhe përqasje të minoritetit serb me të gjitha të drejtat që njihen për pakicat etnike në standardet Perëndimore.

A mendoni se mund të gjejë zbatim praktik kjo ide për Kosovën? Në ç'vështirësi mund të hasë ajo?
Po të mos mund të gjente zbatim, unë as që do ta ofroja. Unë nuk merrem me teorizime politike siç bëjnë disa, por me zgjidhje praktike dhe pragmatike të problemeve politike. Në anën tjetër e di se, si çdo projekt politik, edhe ky do t'i ketë pengesat e veta, të arsyeshme dhe të paarsyeshme.

Por, a është e gatshme Kosova për t'i siguruar të drejta edhe minoritetit serb që jeton atje?
Kjo gadishmëri është e plotë. Institucionet e Kosovës e kanë dëshmuar kushedi sa herë këtë gadishmëri. Kësaj gadishmërie i bashkohet edhe vullneti i shumicës për të ndërtuar një shoqëri demokratike. ku pakicat i gëzojnë të drejtat politike, civile e kulturore, si e gjithë pjesa tjetër e popullatës.

Ideja juaj nxiti reagime të shumta në Kosovë dhe rajon, dhe, madje, shkaktoi edhe polemika. Ç'ju shtyn të mendoni se ajo mund të jetë e suksesshme?
Kjo është një shenjë e mirë. Diskutimet dhe polemikat nxjerrin në shesh të mirat dhe dobësitë e një zgjidhjeje politike.
Mbështetja për propozimin tim ishte më e madhe se sa refuzimet e bëra kryesisht nga këndi i interesave të ngushta partiake. Unë jam i bindur se elemente të caktuara nga marrëveshja në fjalë, me vullnetin e mirë, konstruktiv, të të gjitha palëve do të funksiononin edhe në Kosovë.

Si e gjykoni gjendjen aktuale në Kosovë ?
E vërteta e parë për gjendjen aktuale në Kosovë është e vërteta për bllokimin e procesit politik dhe atij ekonomik, dy procese themelore për perspektivën e vendit. Përgjegjësia për këtë bllokadë bie mbi UNMIK-un, i cili është zhytur në paqartësi rreth punës së mëtejshme të tij në Kosovë. UNMIK-u është bërë ruajtës i status kuo-së, e cila paraqitet shumë e rëndë për shumicën absolute të qytetarëve të vendit. Kjo është një situatë që mund të çojë sërish në zemërime massive, siç ishin ato të marsit.

Cili mund të jetë shefi i ri i UNMIK-ut, pas largimit të Holkerit?
Unë pres që pasardhësi i Holkerit të ketë në rend të ditës reformimin e UNMIK-ut, që unë e kuptoj si zvogëlim të tij në funksion të fuqizimit të institucioneve kosovare të dala nga vota e lirë e qytetarëve. UNMIK-u duhet ë lëvizë me hapa të shpejtë drejt rolit të tij si këshilldhënës në Kosovë.

A është Kosova gati për të diskutuar statusin përfundimtar në mesin e vitit të ardhshëm?
Afati i paraparë është i arsyeshëm dhe Kosova do të jetë e përgatitur të hyjë në atë proces, përfundimi i të cilit ka vetëm një rrugë, atë të pavarësisë së Kosovës. Të gjitha alternativat e tjera kanë një emërues të përbashkët: nuk çojnë absolutisht në zgjidhje.

[Llapi]

Thaçi: "Kombet e Bashkuara në Kosovë kanë dështuar, UNMIK-u ka humbur besueshmërinë"


Prishtinë, 12 qershor - Lideri i PDK-së, Hashim Thaçi, në një intervistë për agjencinë Reuters, ka thënë se Kombet e Bashkuara në Kosovë kanë dështuar derisa misioni i UNMIK-ut ka humbur besueshmërinë. UNMIK-u duhet të shndërrohet në një mision këshilldhënës, pas zgjedhjeve parlamentare të tetorit, ka thënë Thaçi. "Shumica e punonjësve të UNMIK-ut janë këtu të flenë, të shohin dhe të bllokojnë nismat tona", ka thënë ai. Statusi i pazgjidhur i Kosovës nuk po lejon zbatimin e projekteve nga ana e institucioneve, ka përmbyllur zoti Thaçi intervistën për agjencinë e lajmeve Reuters.

radio21

[Llapi]

Flet ekskluzivisht për “Shekullin” Hashim Thaçi ish -shefi politik i UCK-së së Kosovës, aktualisht kryetar i PDK-së

KOSOVA E PAVARUR DHE DHE TË DREJTAT PËR SERBËT


Ylber Lili

Lideri i Partisë Demokratike të Kosovës Hashim Thaçi përmes intervistës enkas për “Shekullin” shpjegon motivet e ofertës që hodhi në Lucernë i cili ofroi elemente të modelit të Marrëveshjes së Ohrit për të zgjidhur njëherë e përgjithmonë të ashtuquajturin problem të monoriteti serb në Kosovë. Ish-lideri i Ushtrisë Clirimtare të Kosovës pohon se udhëheqja politike e Ushtrisë Çlirimtare të Kosovës, pas periudhës së transformimit të UÇK-së në vjeshtë të 1999-ës, nuk ka zhvilluar dhe as që ka ndërtuar ndonjë platformë për luftë në Maqedoni dhe as në ndonjë vend tjetër. Kjo me tepër ka qenë një shpikje e atyre që mendonin dhe mendojnë ta bëjnë fajtor kujdestar ish- UÇK-në, për disa zhvillime jashtë Kosovës.

Kryeministri serb Koshtunica para se të shtronte strategjinë e tij të qeverisjes me Serbinë nxitoi të dalë me projektin e tij për decentralizim, apo kantonizim të Kosovës. A thua me këtë ai synon që ta bartë vëmendjen e opinionit nga problemet reale të Serbisë në problemet fiktive si është çështja e Kosovës?

Thaçi: Qeveritarët në Beograd, sa herë që kanë probleme të brendshme me krizat ekonomike, apo sociale, që rrezikojnë ta trondisin Serbinë, tentojnë ta zhvendosin vëmendjen e opinionit të tyre publik në Kosovë, në mënyrë që të shpëtojnë nga humbja e legjitimitetit të brendshëm. Kështu kanë vepruar gati të gjithë në Serbi që nga ardhja e Milosheviqit në pushtet. Por, duke ikur nga problemet reale Beogradi zyrtar, e duke u mbështetur në politikë nacionalizmit agresiv, vetëm sa i ka shkaktuar shumë të këqija vetvetes dhe të tjerëve. Është e vërtetë se qeveria serbe doli me propozimin për kantonizimin e Kosovës, një projekt i cili nuk gjeti mbështetje ndërkombëtare, por, në aspektin e efektit politik, gjeti një vakuum, në mungesë të kundërofertës konkrete të Kosovës. Decentralizimi i kuptuar sipas Beogradit nuk mund dhe nuk do të ndodh në Kosovë. Kosova do të integrohet e assesi të kantonizohet. Do të ndodhë reformimi i pushtetit lokal sipas standardeve perëndimore, pra reforma e pushtetit lokal të bëhet sipas rekomandimeve të Këshillit të Evropës, që kanë për bazë respektimin e intersave të të gjithë qytetareve, por jo decentralizimi i motivuar ne baza etnike apo politike, i propozuara nga fqinjë yni, Serbia.

Politikanët shqiptarë në një kohë të gjatë po kënaqen me refuzimin verbal të projekteve serbe dhe nuk ofrojnë projektet e tyre për zgjidhjen e çështjeve të hapura. Sipas pohimit të disa politikanëve dhe mediave evropiane, përjashtimin në kontekstin e ofertës reale jeni Ju. Në Lucernë ofruat elemente të modelit të Marrëveshjes së Ohrit për të zgjidhur njëherë e përgjithmonë të ashtuquajturin problem të monoriteti serb në Kosovë. Çka deshironi të arrini me këtë?

Thaçi: Politikën shqiptare në Kosovë, shpeshherë, për fat të keq e karakterizon sindromi i pasivitetit kronik përballë zhvillimeve dinamike që i duhen asaj. Partia Demokratike e Kosovës është distancuar në mënyrë të prerë nga një paudhësi dhe çorientim i tillë. PDK-ja ka ndërtuar konceptin e qartë politik për udhëhqjen e proceseve të gjithmbarshme në Kosovë. Problemet nuk zgjidhen duke qëndruar në bisht të ngjarjeve, apo duke u vetëmjaftuar me distancime stereotipe, reagime emocionale, gjumashe e primitive, tipike ballkanase, ndaj propozimeve racionale, aktive dhe moderne. Kosova ka nevojë ta mbyllë kohën inerte të politikës së status-kuosë. UNMIK-u duhet të ndryshoj substancialisht qasjen ndaj Kosovës dhe vetë statusin e tij. Prishtina, me legjitimitetin e votës së elektoratit të qytetarëve do të vendosë se kush duhet të qeveris në Kosovë. Propozimi im në Lucern është ide që paraqet exit-strategji nga gjendja e status-kuosë, një model i vlerave perëdimore për Kosovën, e cila, mjerisht ende sfidohet nga psikologjia e sjelljes ballkanase. Ideja nuk është drejtuar kundër askujt, përkundarazi, është në interes të të gjithëve në Kosovë: shqiptarëve, serbëve dhe të qytetarëve tjerë. Propozimi i këtij modeli është edhe në favor të lehtësimit të angazhimeve ndërkombëtare në Kosovë dhe rajon.

Çfarë mund të zgjidhet më konkretisht me propozimin e Marrëveshjes se Ohrit për Kosovën?
Thaçi: Unë kam propzuar që elemente të caktuara të marrëveshjës së Ohrit mund të jenë të zbatueshme në Kosovë, dhe jo zbatim të tërësishëm të saj.Dihet se procesi i pavarësisë së Kosovës është i pandalshëm, dhe për dallim nga të tjerët që pavarësinë e kanë vetëm si nocion, ne kemi vizion për Kosovën si do të jetë edhe në atë fazë. Ky vizion duhet të akceptohet drejt dhe të jetë i pranueshëm prej vetë qytetarëve të Kosovës, nga qytetarët minoritarë dhe nga bashkësia ndërkombëtare. Partia të cilën e drejtoj është duke vepruar seriozisht në realizimin e vizionit politik për Kosovën shtet të pavarur, sovran dhe të integruar, shtet qytetar sipas parimeve civilizuese, ku do të arrihej pajtimi shoqëror do të shëroheshin plagët e së kaluarës. Kjo nënkupton para së gjithash fillimin e zhvillimit ekonomik, funksionimin e drejtësisë për të gjithë pa dallim etnie, krijimin e paqes dhe bashkëjetësës së qëndrueshme, dhe mbi të gjitha respektimin e
integritetit territorial të Kosovës pra integrimin e jo ndarjen. Ruajtja e integritetit dhe jo ndarja, është parimi dhe vlera universale e Marrëveshjes së Ohrit. Një nga vlerat e saj, është edhe fakti se ajo është e njohur ndërkombëtarisht. Përmes zbatimit fleksibël të elementeve të saj do të arrihej shpërbërja e plotë të strukturave paralele dhe enklavave serbe, respektimi i parimit demokratik një qytetar një votë, funksionimi i pushtetit lokal brenda integritetit territorial të shtetit të Kosovës, pamundësia e çdo procesi të suksesionit të tyre (minoriteteve) ose cenimit të rendit unik juridik, përdormi zyrtar i gjuhës së komunitetit që përfaqeson 20% të numrit të popullsisë së përgjithshme etj.

Oferta juaj mori jehonë të madhe që tregon se ka prekur disa interesa dhe ka zbuluar disa pozicione. Reagimi i Solanës mbase zbulon një qëndrim të diskutueshëm të institucioneve ndërkombëtare për Kosovën që duhet të marret parasysh, por reagimi refuzues i z. Ali Ahmeti duket i pashpjegueshem, apo edhe ai mbase ka dashur t’ju dërgojë ndonjë mesazh. Si i shpjegoni këto reagime qoftë mbështetës, apo refuzues?

Thaçi : Fillimisht dua të theksoj se reagimet refuzuese ishin të menjëhershme, të ngutshme dhe tregonin për qasjen tejet joracionale të atyre që i bënin ato. Si mund të refuzohet një ide, apo propozim pa e menduar dhe analizuar fare se për çka është fjala. Çdo ide politike, propozim a nismë duhet debatuar së pari dhe pastaj të konstatohen anët e mira dhe të metat, e jo të hidhet poshtë me automatizëm dhe nervozë. Automatizmi në të reaguar nuk është logjikë e qëndrueshme dhe aq më pak reagim demokratik. Refuzuesit e idesë sime treguan të kundërtën e kësaj logjike. Ata treguan se janë të rrënjosur shumë thellë në traditën
ballkanike të refuzimit të ideve të tjetrit për të vetmen arsye: - se vijnë prej tjetrit. Kjo është një formë e intolerancës politike. Një shoqëri që ka frikë, hezitim dhe reagime refezuese ndaj ideve, duhet ta rishikojë vetveten, sepse edhe në mendësinë tonë politike ka perënduar koha e një ideje, një partie dhe një lideri.

Shekulli: Ju keni qenë drejtuesi politik i UÇK-së në Kosovë, ndërkaq z Ali
Ahmeti i UÇK-së së Maqedonisë. Sipas logjikës ju do të duhej të kishit
politikë sinkrone, por në realitet shpesh herë paraqiteni me pozicione
divergjente. A kanë pasur të dy UÇK-të strategji të njëjtë, apo ishin
formacione që vepruan me motive të ndryshme, dhe rrjedhimisht kanë arritur
rezultate të ndryshme?

Thaçi: Do të dëshiroja të bëja të qartë një fakt të qëndrueshëm: udhëheqja
politike e Ushtrisë Çlirimtare të Kosovës, pas periudhës së transformimit të
UÇK-së në vjeshtë të 1999-ës, nuk ka zhvilluar dhe as që ka ndërtuar ndonjë
platformë për luftë në Maqedoni dhe as në ndonjë vend tjetër. Kjo me tepër
ka qenë një shpikje e atyre që mendonin dhe mendojnë ta bëjnë fajtor
kujdestar ish- UÇK-në, për disa zhvillime jashtë Kosovës.
Nuk ka qenë as synim as ide jona sakrifikimi i bashkëkombasëve tanë për
promovime politike në Maqedoni të çfardo individi apo force të re politike.
Për mua gjithmonë ka qenë dhe është i papranueshëm përdorimi apo krijimi
situatave të krizave të luftës për marrjen e pushtetit. Që të jem edhe më i
qartë, Shtabi i Përgjithshëm dhe Drejtoria Politike e Ushtrisë Çlirimtare të
Kosovës në gushtin evitit 1998 ne bashkërendim me miqtë tanë ndërkombëtarë
kanë treguar publikisht përcaktimin e qartë të luftës për çlirimin e
Kosovës, pra largimin e forcave agresore serbe nga Kosova, qëllim të cilin
edhe e arritëm.
Kosova, duke qenë e pavarur, do t’i respektonte shtetet fqinje, në te cilat
shtete qytetaret shqiptarë që jetojne atje, nuk do të nëpërkëmbëshin apo
cenoheshin fizikisht dhe kombëtarisht, por do ta ndienin veten qytetarë të
lirë, të barabartë, me të gjitha të drejtat, që do të duhej ligjshmërisht
t’i gëzonin.

Shekulli : Reagimi i shpejtë, i menjëhershëm, i z Rugova, i z. Haradinaj, i
z. Ahmeti ishte në vijë të interesave partiake, apo në vete ngërthenin
projekte të përbashkëta?

Thaçi: Këto reagime nuk ngërthejnë ndonjë projekt serioz dhe as të
përbashkët. Ishin refuzime të pakonceptuara, të shkapërderdhura e të
shthurura politikisht. Unë nuk jam rob i skemave demagogjike të përfitimeve
partiake. Ideja ime lidhet me interesat e Kosovës dhe të qytetarëve të saj.
Mendoj se politikës në Kosovë i duhen ide e vlera të hapur që i hapin
perspektivë dhe jo mbyllje, veprime të njëanshme dhe statuskuo.



Shekulli : Reagimet nga Shqipëria janë të paktën deri më tani të matura, të
balancuara dhe do të thosha të ndrojtura .Si e shpjegoni këtë?

Thaçi: Në Shqipëri nuk ekziston frika nga idetë e reja e të hapura. Duhet
marrë parasysh fakti se tanimë në Shqipëri ekziston një traditë e formimit
të politikave përmes dialogut, debatit dhe shoqërisë aktive civile.

Shekulli : Deri më tani serbët tregojnë një ofensivë sa i përket zgjidhjes
së çështjes së Kosovës. Politikanët kosovarë i refuzojnë ato, apo si
përgjigje dalin më kundëroferta, siç ishte rasti juaj në Lucernë. Kur do të
fillojnë politikanët kosovarë të marrin iniciativë pa i pyetur serbët për
zgjidhjen e çështjeve të hapura?

Thaçi: Politika kosovare dhe institucionet e Kosovës përfundimisht duhet të
braktisin psikologjinë dhe kursin e asaj politike që mbështetet vetëm në
distancime dhe reagime ndaj projekteve të të tjerëve. Ne duhet të marrim
përgjegjësi për problemet tona dhe të dëshmojmë se dijmë t’i zgjidhim ato.
Kjo bëhet përmes projekteve konkrete. Nuk ka nevojë vetëm të reagojmë
emocionalisht ndaj asaj që ndërmerr Beogradi. Ne duhet të kemi oferten tonë
të zgjidhjes se çështjes së minoritarëve.
Serbët që jetojnë në Kosovë janë qytetarë të Kosovës dhe problemet e tyre
duhet të zgjidhen në Prishtinë. Unë ndiej obligime qytetare dhe
institucionale ndaj të gjithë qytetarëve pa dallim përkatësie etnike apo
besimi. Kjo është filozofia ime politike dhe përkushtimi im njërëzor. Askush
nuk duhet t’i frikësohet lirisë së minoritarëve, në veçanti atyre serb.
Kosova nuk rrezikohet nga integrimi i 5% serbëve në institucione e
shoqëri, por nga pasiviteti negativ i liderëve refuzues të cilët pretendojnë
se udhëhqin 95% të qytetarëve. Përfundimisht nesër të gjithë qytetarët
Kosovës: shqiptarët, serbët, malazezët, boshnjakët, turqit, etj., do të jenë
shtetas të Kosovës.

Shekulli: Analitikët serioze botërorë pohojnë se UÇK-ja është kryengritja me
e suksesshme në historinë e njerëzimit. Këtij konstatimi i shtoj edhe
mendimin se në Kosovë opozita, pra ju, jeni konstruktiv. Në parlament
mungon debati. Pra ju jeni jashtë parlamentit më aktivë me propozime të
ndryshme sesa brenda në parlament. Si e shpjegoni këtë?

Thaçi: Nuk dyshoj se ajo strukturë politike që arriti ta çlirojë vendin, di
të ndërtojë rendin demokratik dhe do ta pavarësoj Kosovën. Në Kosovë
PDK-ja prinë me ide, debate dhe projekte. Organet politike të PDK-së
vazhdojnë të mbesin i vetmi institucion i debatit dhe mendimit kritik e të
hapur politik në Kosovë.

Shekulli: Në dy parlamentet shqiptare mbretërojnë klima të kundërta,
parlamenti shqiptar është hiperaktiv me debate të fuqishme, me obstruksione
imagjinative, ndërkaq parlamenti kosovar është hiperpasiv. Si i shpjegoni
këto dallime në kulturën politike të një populli?

Thaçi: Hiperpasiviteti i Parlamentit të Kosovës mund të shpjegohet nga shumë
anë, duke nisur nga kompetencat shumë të kufizuara që ka ai në fushën e
krijimit dhe miratimit të ligjeve, e deri te mungesa e traditës së
parlamentarizmit. Tërë këtyre dobësive i shtohet edhe të drejtuarit e
Parlamentit të Kosovës në mënyrë pothuajse autoritare. Ndërsa Parlamentin e
Shqipërisë, me gjithë respektin për debatet e hapura, po e përcjell
agresiviteti dhe armiqësia e theksuar ndërpartiake, që po e dëmton forcimin
e shtetit, zhvillimin e shoqërisë shqiptare dhe integrimet evropiane.

Shekulli: Në të gjitha shtetet e Lindjes që janë në tranzicion e sipër
shtrohet nevoja e ngutshme për formim të rrugës së tretë. A ka nevojë Kosova
për rrugë të tretë?

Thaçi: Kosova ka hyrë e vonuar në procesin e tranzicionit nga sistemi i
dështuar i socializmit drejt ndërtimit të demokracisë liberale dhe ekonomisë
së tregut. Ne nuk kemi alternativë. Duhet ta kryejmë këtë proces. Mirëpo ajo
që duhet bërë është që të punojmë në mënyrë që ky proces të mos zgjatet
tejmase. Synimi ynë është të ndërtojmë një shoqëri të mirëqenies për
qytetarët, një shtet funksional dhe në shërbim të të gjithë qytetarëve të
vendit.

Shekulli: Raportet tuaja me oponentët tuaj politikë Rugovën , Haradinajn
janë shumë më të buta, sesa ato në mes të Berishës dhe Nanos, apo Nanos dhe
Metës. Çka ndikon që të paraqiten dallime në sjelljen politike të liderëve
që burojnë nga e njëjta traditë kombëtare?

Thaçi: Debati politik përveç traditës politike kombëtare ndikohet shumë edhe
prej rrethanave aktuale politike që janë prezente në një shoqëri. Këto
rrethana në Shqipëri dhe Kosovë dallojnë shumë nga njëra - tjetra dhe kjo
ndikon që edhe debati politik në mes forcave kryesore politike të jetë i
ndryshëm.

Shekulli: Ku i shikon Thaçi shqiptarët në vitin 2010?

Thaçi: Shqipëria e pranuar në NATO dhe në rrugë të mbarë për integrim në
Bashkim Evropian, Kosova e pavarur e sovrane, shqiptarët në Maqedoni,
Preshevë dhe Mal të Zi më të drejta të plota kombëtare e demokratike.

[Llapi]

Rexhepi: Nëse OKB zvarrit çështjen e pavarësisë, s'do dimë të ruajmë kontrollin

Lajmi i ores 8:10 PM



PRISHTINE (21 Qershor) - Nga mesi i vitit 2005 duhet të zgjidhet statusi përfundimtar i Kosovës, deklaroi sot kryeministri i Kosovës, Bajram Rexhepi, duke shtuar se zgjidhja finale është kryesore për rimëkëmbjen ekonomike të rajonit. Rexhepi theksoi se "pavarësia e kufizuar si zgjidhje kalimtare është një variant krejtësisht i pranueshëm", duke shtuar se statusi i Kosovës është kryesor për zhvillimin ekonomik të Kosovës. "Pavarësia e kufizuar" e Kosovës parashikon që Kosova të fitojë sovranitetin e plotë pasi t'i plotësojë standardet demokratike të caktuara nga bashkësia ndërkombëtare, të cilat veçanërisht kanë të bëjnë me sigurinë dhe lirinë e lëvizjes të grupeve të pakicave. Rexhepi edhe një herë tha se Qeveria e Kosovës kërkon më tepër kompetenca nga ato që i ofron tani administrata e OKB dhe theksoi nevojën e ndryshimeve në Kushtetutën e Kosovës, si parakusht për pavarësinë. Ai paralajmëroi se nëse OKB do vazhdojë të zvarrisë pavarësinë e Kosovës, kjo do t'i përforcojë elementet radikale në rajon. "Nuk e parashikoj se si do ta ruajmë kontrollin atëherë", paralajmëroi Rexhepi. bm/bm (RTK/Balkanweb)

[Llapi]

PARLAMENTI EVROPIAN DHE KOSOVA

Shkruan: Mr. Sabri Kiçmari

Të dielën e kaluar përfunduan zgjedhjet për Parlamentin Evropian. Megjithë

pjesëmarrjen jo të kënaqshme të qytetarëve në zgjedhje, mund të konstatohet

se demokracia evropiane e kaloi me sukses edhe këtë provim jo të lehtë pas

rizgjerimit të BE në majin e këtij viti. Fitore solide në zgjedhje shënoi

krahu konservator i partive evropiane (276 vende), i pasuar nga e majta

socialdemokrate (me 200 vende), liberalët (66 vende) dhe të gjelbërtit (42

vende). Qytetarët e Kosovës dhe elita politike kosovare duket t'i kenë

përcjellur zgjedhjet për Parlamentin Evropian pa ndonjë interesim të

veqantë. Subjektet politike kosovare kanë përcaktuar si qëllim strategjik

integrimin e vendit në BE. Rrugën drejt integrimit e ka hapur edhe BE në

Samitin e Selanikut qershorin e viti të kaluar. Kosova dhe Evropa do të

detyrohen, deshën a nuk deshën, të kenë të bëjnë me njëra tjetrën edhe në të

ardhmen. Eshtë interes i dyanshëm plotësimi sa më parë i kushteve për

integrim. Interesi i Kosovës është zhvillimi më i shpejtë ekonomik, i cili

është pothuajse i pamundur pa investimet dhe përkrahjen evropiane, kurse

interes i BE është stabilizimi i gjendjes së sigurisë dhe paqes në këtë

pjesë ende të papaqëtuar të Evropës. Por, Kosova dhe BE kanë pasur të bëjnë

me njëra tjetrën edhe në të kaluarën e afërt! Ja disa momente të raporteve

mes tyre, të përjetuara edhe personalisht nga autori i këtyre rreshtave.



*

Kur në mesditën e 30 majit të vitit 1989 po thërrisnim me sa zë që kishim

parullën „Europe help“, së bashku me një numër bashkëveprimtarësh e

bashkëmendimtarësh demonstrues, në qendër të qytezës së vendlindjes sime,

nuk isha shumë i sigurtë, nëse delegacioni i Parlamentit Evropian vërtetë do

ta kuptonte krejt atë që ndodhte në Kosovë dhe rreth saj. Duke thirrur me

forcë parullat „Kosova Republikë“ dhe „Liri, Demokraci, Vetëvendosje!“

dëshironim t'i bënim me dije delegacionit të PE, i cili vizitonte atë ditë

Kosovën, vullnetin e ndrydhur të popullit të Kosovës, të drejtën dhe

gjakimin e tij. Dëshironim të njoftonim për të vërtetën tjetër të Kosovës,

të cilën mundoheshin ta mbulonin LKJ dhe një pjesë e aktivistëve të saj në

Kosovë. Gjatë demonstratës u vra një nga organizatorët dhe veprimtarët e

shquar të lëvizjes sonë për liri, dëshmori Ali Ajeti. Delegacioni i PE u

takua me dy intelektualë të Kosovës, që mendonin ndryshe nga LKJ, dhe u

kthye në Bruksel. Pak ditë më vonë Parlamenti Evropian miratoi një Rezolutë,

përmes të cilës dënonte dhunën që ushtronte regjimi jugosllav mbi qytetarët

e Kosovës. Ky ishte akti i parë i përkrahjes serioze të së drejtës së

qytetarëve të Kosovës për liri nga një institucion i lartë ndërkombëtar.



*

Nëntë vite më vonë, në tetor të vitit 1998, së bashku me Bardhyl Mahmutin,

si anëtar të një delegacioni përfaqësues të UÇK, merrnim pjesë në një takim

me anëtarët e Komisionit për Politikë të Jashtme të PE. Në fjalimin e tij

para Komisionit kolegu Mahmuti i paralajmëroi deputetët e PE për metodat

fashiste, me të cilat regjimi i Millosheviqit synonte të zhdukë shqiptarët

dhe të spastrojë Kosovën. Ishte hera e parë, që një institucion i tillë i

lartë evropian, denjoi të dëgjonte argumentet politike të lëvizjes

çlirimtare të Kosovës, të etiketuar pa të drejtë me vite të tëra për

ekstremizëm. Deputetëve të PE ua shpërndamë një material dokumentues- faktik

mbi rastet e thyerjes së armëpushimit, krimeve dhe vrasjeve të civilëve në

Kosovë nga ushtria dhe poliica serbe. Si gjatë këtij takimi, ashtu edhe në

takimet e mëvonshme me disa nga anëtarët e PE, m'u bë e qartë se sa shumë

mund diplomatik nevojitet për të mënjanuar keqinformimet që i ishin bërë PE

nga diplomacia serbe. Dhe pikërisht këtu u binda plotësisht edhe për

mjerimin në të cilin e kishte zhytyr përfaqësimin e Kosovës udhëheqja

konservative e LDK. Muaj më vonë Parlamenti Evropian përkrahu intervenimin e

NATO-së dhe i dha dritën e gjelbër investimeve të shumta humanitare për

tejkalimin e katastrofës humanitare në Kosovë. Për herë të parë Evropa e

Bashkuar veproi praktikisht në krah të çështjes së Kosovës, në krah të së

drejtës dhe lirisë, për hir të humanizmit, të drejtave të njeriut dhe

dinjitetit njerëzor.

Pikërisht gjatë ditëve kur trupat e NATO-s po futeshin në Kosovë u mbajtën

zgjedhjet për Parlamentin Evropian, më 13.qershor 1999. Ato mbetën nën

hijen e zhvillimeve pozitive në dhe rreth Kosovës. Pas luftës heroike të UÇK

dhe ndërhyrjes ushtarake të NATO-s, makineria ushtarake e Millosheviqit u

detyrua të largohej me bisht ndër shalë nga Kosova, ushtarët e UÇK zbrisnin

ngadalë nga malet, kurse tanket e NATO-s mësynin rrugët e Kosovës.

Njoftimet e shumta, që shënonin këtë moment të rëndësishëm për lirinë dhe

njerëzishmërinë, të përcjella me pamje emocionale nga pritja që ju bëhej

trupave të NATO-s, nga vargu masiv dhe i papritur i njerëzve që ktheheshin

në shtëpitë e tyre të djegura, kishin fituar prioritet të theksuar në pjesën

dërmuese të mediave ndërkombëtare në krahasim me zgjedhjet për Parlamentin

Evropian.



*

Pesë vite më vonë Kosova gjendet „jo pesë vjet, por një shekull larg

qershorit të vitit 1999“ - konstatoj me plot të drejt një publicist i

njohur kosovar. Dhe për të shkuar kaq larg nga viti 1999 një rol të dorës së

parë ka luajtur edhe Parlamenti Evropian. Prandaj, nuk pata asnjë hamendje

për t'ju përgjigjur pozitivisht ofertës së një zyrtarje të njërës nga

partitë parlamentare gjermane për të marrë pjesë në komisionin zgjedhor për

zgjedhjet e Parlamentit Evropian (përkundër faktit se nuk jam fare anëtar

partie). E ndjeva si obligim të pranoja këtë ofertë jo vetëm për të kryer

një obligim qytetar në përkrahje të bashkimit evropian, por edhe për të

mbështetur praktikisht një institucion të tillë, i cili i është gjendur krah

në disa momente të rëndësishme Atdheut tim që vuante nën dhunën e

shovinizmit serbomadh. Kështu të dielën e 13 qershorit 2004 e kalova duke

ndihmuar mbarëvajtjen e zgjedhjeve për Parlamentin Evropian dhe duke

numëruar votat. Në bazë të Marrëveshjes së Nizzas PE do të ketë 732

deputetë, 99 prej të cilëve do të jenë të zgjedhur nga RFGJ. Pas zgjedhjeve

do të emërohen anëtarët e ri të Komisionit Evropian dhe Presidenti i tij.

Rezultati i zgjedhjeve do të jetë një nga faktorët me rëndësi në përcaktimin

e drejtuesit të qeverisë së re evropiane.

A thua kur do të vijë dita kur Kosova do të fitojë të drejtën për të

zgjedhur deputetët e saj në Parlamentin Evropian? Shumçka varet nga sjellja

politike e diplomatike e përfaqësuesve të institucioneve tona, elitës

politike e intelektuale dhe vetë qytetarëve të Kosovës.



Botuar ne javoren "zëri", më 18.06.2004

[Llapi]

Rajner Shtajner, propozon statusin Territor Mandatar për Kosovën

Kryetari i Kuvendit të Kosovës, Nexhat Daci dhe deputeti i Bundestagut gjerman Rajner Shtajner biseduan sot rreth ideve për të ardhmen e Kosovës. Deputeti Shtajner tha pas takimit se ideja më e mirë në kohën e tanishme do të ishte integrimi i Kosovës në Unionin Evropian si Territor Mandatar.


Anëtari i Bundestagut, Rajner Shtajner, propozon statusin Territor Mandatar për Kosovën në kuadër të Unionit Evropian. Sipas tij, kjo formë është një hap i madh për të çuar tërë rajonin në drejtimi të Evropës. Rajner mendon se opcionet tjera për zgjidhjen e problemeve në Kosovë, në këtë moment janë të parealizueshme. Ai tha se as pavarësia e menjëhershme e Kosovës apo edhe kantonizimi i saj nuk kanë shumë aleatë në botën perëndimore. Po ashtu, tha Shtajner nuk është opcion as mbajtja e situatës së status kuos:” Unë mendoj që propozimi për drejtimin e Kosovës në kuadër të një Territori Mandatar të Unionit Evropian mund të jetë një hap potencial për ta çuar tërë rajonin në drejtim të Evropës. Nëse i tërë rajoni në mënyrë graduale i ofrohet Evropës, do të kemi zhdukjen graduale të problemeve etnike, sikurse që janë zhdukur në pjesët tjera të Evropës”. Sipas deputetit gjerman Evropa dëshiron në gjirin e saj vende të cilat janë në fqinjësi të mirë. Ai ka përmenduar rastin e Francës dhe Gjermanisë dhe tha se modeli i pajtimit në mes këtyre dy vendeve duhet të transferohet edhe në Evropën Juglindore.


RTK