OKB: Kosova ka arritur sukses ne 4 nga 8 standarde

[Albo]

Këshilli i Sigurimit i OKB-së mban seancën e rregullt tremujore për Kosovën

KS: Kosova ka arritur sukses në 4 nga 8 standarde

F. Osmani

OKB- Sekretari i përgjithshëm i Kombeve të Bashkuara, Kofi Anan, në raportin e tij të rregullt për Kosovën, vlerësoi për herë të parë se në katër nga tetë standarde, institucionet kosovare kanë arritur lëvizje pozitive të konsiderueshme, ndërsa në standardet e tjera thuhet se ka pak lëvizje pozitive, ose edhe ngecje. Në raportin, të cilin e lexoi para anëtarëve të Këshillit të Sigurimit, ndihmëssekretari i OKB-së për Operacione Paqeruajtëse, Hedi Anabi, thuhet se në standardin e parë “Institucionet demokratike funksionale”, kishte përparime por edhe ngecje. Kuvendi i Kosovës kritikohet se ka punuar jashtë kompetencave të veta në rastin e propozimit për ndryshimin e 38 neneve të Kornizës Kushtetuese. Po ashtu, Kuvendi thuhet se ka bërë hapa pozitivë në miratimin e ligjeve dhe është lavdëruar në punën transparente. Lidhur me standardin e parë, raporti i Ananit e vlerëson pozitivisht reformimin e administratës lokale dhe shton se ky “është procesi më i rëndësishëm politik, i cili do të ndikojë në të ardhmen e komunitetit serb në Kosovë”.

“Sundimi i ligjit” është edhe një arritje e institucioneve kosovare, për të cilin raporti konkludon se “ka arritur progres” në sjelljen para drejtësisë të personave përgjegjës për trazirat e marsit. “Njollë e zezë” i vihet “frenimit dhe ngecjes së krijimit të sistemit juridik multietnik”, shkaku i largimit të disa prokurorëve dhe gjyqtarëve serbë nga ky sistem, pas trazirave të marsit. “Pas trazirave të marsit, liria e lëvizjes së minoriteteve, në esencë është keqësuar. Tani minoritetet duhet të udhëtojnë më larg në mënyrë që të gëzojnë të drejtat e shërbimeve të ndryshme, që janë shkatërruar tërësisht ose janë dëmtuar pjesërisht si rezultat i dhunës së marsit”, - thuhet në raport. Institucionet e Përkohshme Vetëqeverisëse (IPVQ) në këtë raport janë kritikuar edhe për nga aspekti i “mosadresimit të mjaftueshëm të çështjes së kthimit, por që për nga rindërtimi i dëmeve të marsit ajo ka lëvizur në mënyrë të konsiderueshme”.

Ekonomia

Ekonomia e Kosovës vazhdon të jetë larg “vetëqëndrueshmërisë”, edhe pse është arritur që të miratohen disa ligje ekonomike, por që IPVQ-ve u mungojnë mekanizmat vlerësues dhe zbatues. Edhe në aspektin e “Të drejtave pronësore”, raporti thekson se përveç ca arritjeve, asnjë lëvizje tjetër nuk është bërë.

Trupat Mbrojtëse të Kosovës (TMK), thuhet në raport, e kanë shumicën e pjesëtarëve jo të trajnuar në nivel të duhur për t’u përballur me situata emergjente. Megjithatë, raporti veçon se “TMK-ja ka shënuar arritje në rekrutimin e minoriteteve, me 149 anëtarë të pakicave dhe ka shënuar përmirësime në kodin disiplinor”.

Rritja e vëzhgimit ndërkombëtar të proceseve ka për qëllim lehtësimin e marrëdhënieve ndërmjet komuniteteve pas trazirave të marsit dhe kjo ka ndihmuar në përmirësimin e dialogut ndërmjet shqiptarëve dhe serbëve të Kosovës, thuhet në këtë raport. Sipas raportit, dhuna e marsit dhe pasojat e saj kanë prishur fillimin e dialogut ndërmjet Prishtinës dhe Beogradit në nivel të grupeve punuese, i cili pati një fillim të mirë disa ditë para trazirave.

Që nga plublikimi i “Standardeve për Kosovën” në dhjetor të vitit të kaluar dhe përfundimit të planit për implementimin e tyre i publikuar në fund të marsit, por i kompletuar tre muaj më vonë, asnjëherë nuk është bërë ndonjë vlerësim zyrtar nga OKB-ja lidhur me (mos)përmbushjen e këtyre standardeve. Vlerësimin e implementimit të standardeve në Kosovë është duke e bërë çdo 6 javë Grupi i Kontaktit, por vlerësimi i tyre do të bëhet edhe nga Kombet e Bashkuara për çdo tre muaj, deri në mesin e vitit 2005, kur pritet të bëhet vlerësimi përfundimtar për nisjen ose jo të diskutimeve mbi statusin e vendit.

[StormAngel]

Kosova reagonë ndaj raportit në OKB

- 06/08/2004 Institucionet e Kosovës vlerësojnë raportin e ndihmësit të Kofi Ananit në Këshillin e Sigurimit për përparimet në Kosovë, por theksojnë mungesën që në raport nuk janë prezentuar rekomandimet e ambasadorit Kai Aide, për ristrukturimin e UNMIK-ut. Ndërkaq, në reagimin e Trupave të Mbrojtjes së Kosovë rreth raportit në fjalë thuhet se ai nuk është objektiv sa i përket plotësimit të standardit të tetë. Përfaqësuesit e institucioneve të Kosovës e vlerësuan si pozitiv raportin e fundit për Kosovën në takimin e Këshillit të Sigurimit, megjithë mangësitë që kishte raporti. Presidenca u shpreh se në raportin e Heri Anabes, ndihmës i sekretarit të OKB-së, raportit i mungon pjesa që ka të bëjë me ndryshimin e rolit të UNMIK-ut. Kryeministria nënvizoi mangësitë që ka raporti duke theksuar në këtë drejtim mospjesëmarjen e përfaqësuesve të institucionev të Kosovës dhe vetë UNMIK-ut. Shefi i Zyrës për Informim Publik të TMK-së, nënkolonel Enver Dugolli tha se TMK ka dëshmuar në shumë raste se është një institucion i gatshëm për t'i ndihmuar qytetarët në çdo kohë kur kërkohet nevoja, ndaj mendohet se Anan pjesërisht është keqinformuar.

[StormAngel]

Kofi Anan e vlerëson gjendjen në Kosovë

“Periudha pas dhunës së marsit ka treguar përparime të kufizuara, por shpresëdhënëse.”

"Periudha pas dhunës së marsit ka treguar përparime të kufizuara, por shpresëdhënëse. Populli i Kosovës ka një rrugë të vështirë përpara, për përmbushjen e standardeve, për ripajtimin etnik, për forcimin e institucioneve demokratike dhe për krijimin e një shoqërie të përparuar", thuhet në raportin e z. Anan, të paraqitur para KS të OKB-së nga ndihmës-sekretari i përgjithshëm për operacione paqeruajtëse, Hedi Anabi.

Nju Jork, 6 gusht - Këshilli i Sigurimit i Organizatës së Kombeve të Bashkuara diskutoi dje rreth gjendjes në Kosovë. Diskutimit i parapriu raporti i sekretarit të përgjithshëm Kofi Anan, në të cilin vlerësohet se në Kosovë është vërejtur një progras i kufizuar por shpresëdhënës, pas trazirave të marsit.

"Periudha pas dhunës së marsit ka treguar përparime të kufizuara, por shpresëdhënëse. Populli i Kosovës ka një rrugë të vështirë përpara, për përmbushjen e standardeve, për ripajtimin etnik, për forcimin e institucioneve demokratike dhe për krijimin e një shoqërie të përparuar", thuhet në raportin e z. Anan, të paraqitur para KS të OKB-së nga ndihmës-sekretari i përgjithshëm për operacione paqeruajtëse, Hedi Anabi.

"Zhvillimet pas dhunës së marsit kanë dëshmuar se, megjithëse përgjegjësia për përparimin në Kosovë u takon përfaqësuesve të Kosovës dhe popullit të saj, angazhimi i komunitetit ndërkombëtar ka rëndësi jetike për suksesin e këtyre përpjekjeve", theksohet në raportin e z. Anan.

Në raport vlerësohet angazhimi i udhëheqësve të komuniteteve etnike në Kosovë për fillimin e dialogut të brendshëm politik dhe se angazhimi i bashkësisë ndërkombëtare ka rëndësi jetike për avancimin e proceseve në Kosovë. Në të vlerësohen përpjekjet për riparimin e dëmeve të shkaktuara gjatë trazirave të marsit, për krijimin e kushteve për kthimin e personave të zhvendosur gjatë këtyre trazirave dhe për avancimin e procesit të përmbushjes së standardeve.
Por, në raportin e sekretarit Anan vlerësohet se përparimet e bëra janë ende të kufizuara. Në të thuhet se pakicat etnike në Kosovë ballafaqohen ende me probleme të sigurisë dhe me kufizim të lëvizjes.

"Udhëheqësit e Kosovës kanë bërë përpjekje shpresëdhënëse të ndreqin dëmin e shkaktuar në komunikimin ndërmjet komuniteteve nga dhuna e marsit, duke zhvilluar takime me pakicat etnike në Kosovë. Këto përpjekje duhet të pasohen me masa konkrete për të bërë realitet procesin e vështirë të ripajtimit, thuhet në raportin e z. Anan.

Në raport vlerësohet gjithashtu se fillimi i dialogut politik ndërmjet udhëheqësve të komuniteteve të Kosovës ka rëndësi jetike.

"Më14 korrik, udhëheqësit e dy komuniteteve u angazhuan të bashkëpunojnë në disa drejtime. Ky ishte një hap pozitiv që duhet të shoqërohet me masa konkrete", thuhet në raportin e z. Anan.

Raporti vlerëson përpjekjet e institucioneve të Kosovës për përmbushjen e standardeve, për marrjen e më shumë përgjegjësive dhe për reforma në qeverisje.