PS pranohet ne Internacionalen socialiste

[Albo]

Këshilli i IS-së e ka marrë dje vendimin në San Paolo të Brazilit

PS pranohet në Internacionalen Socialiste

D.T.

TIRANË – Këshilli i Internacionales Socialiste, i cili është mbledhur dje rreth orës 15.30 me orën lokale të San Paolos, në Brazil ka miratuar vendimin për t’i kaluar Kongresit XXII të Internacionales pranimin me të drejta të plota të PS-së në këtë organizatë të së majtës botërore. Ky vendim do të bëhet i njohur sot, në ditën e parë të punimeve të Kongresit, bëjnë të ditur burime pranë delegacionit shqiptar atje. Në mbledhjen e Këshillit të Përgjithshëm Drejtues kanë marrë pjesë edhe drejtues të lartë të së majtës evropiane si Shrëder, Toni Bler etj. Vendimin për pranimin si anëtare me të drejta të plota të PS-së e ka përshëndetur edhe nënkryetari i PSD-së, Gaqo Apostoli, i cili përfaqson PSD-në në këtë Kongres që do të zhvillohet për tre ditë me radhë. Ndërsa Partia Socialiste Shqiptare në këtë kongres përfaqësohet nga vetë kryetari dhe kryeministri Fatos Nano, i cili gjatë ditëve të punimeve do të mbajë edhe një fjalë. Ky kongres do t’i zhvillojë punimet në datat 27-29 tetor në San Paolo të Brazilit dhe Partia Socialdemokrate Shqiptare është anëtare me të drejta të plota, ndërsa PS pret anëtarësimin e plotë në këto dy ditë. Punimet e Kongresit do të përqendrohen në lëvizjen botërore socialdemokrate, socialiste e laburiste për zhvillime të tilla si integrimet rajonale dhe programet zhvilluese për këtë qëllim, lëvizjen për paqe dhe zgjidhjen e konflikteve, luftën kundër varfërisë, përfshirjen e gruas në politikë, forcimin e institucioneve demokratike dhe shoqërisë civile, etj. Gjatë punimeve të kongresit pritet që kryetari i PSSH-së, Fatos Nano dhe nënkryetari i PSD-së, Apostoli, të kenë takime të veçanta me personalitete të së majtës botërore. Në Kongresin XXII të Internacionales nuk ka marrë pjesë vetë kryetari i PSD-së, Skënder Gjinushi, për të shmangur një takim të mundshëm me kryetarin socialist Fatos Nano, pas akuzave që ky i fundit bëri për përfshirje në organizimin e 14 shtatorit. Ndërsa Nano ka lënë jashtë delegacionit socialist sekretarin ndërkombëtar Ilir Zela për arsye se ai votoi kundër dy ministrave në Kuvend.