Qamili Nuk Pranoi Graden E Re

[Beqari002]

QAMILI NUK PRANOI GRADEN E RE

Gradat, largohet polici që protestoi
Ndëshkimi i ministrit Rama pse foli për Gazetën


Gerti Xhaja

TIRANE

Ishte ora e turnit të tij, por ai nuk ishte në shërbim. Qamil Hajdari ecte në rrugën përballë portës së postës së policisë te Medreseja dhe shihte me keqardhje nga vendi i tij i shërbimit ku mungonte. Kishte shërbyer 35 vjet në Polici dhe shefat e kishin flakur pse kishte shprehur fjalën e lirë.
Vetëm një ditë më parë kishte denoncuar në shtyp padrejtësinë që i bëhej në konvertimin e gradës dhe, si një hakmarrje ordinere, shefat kishin firmosur pezullimin e tij. Përpara rreshtit kishte dalë eprori i tij dhe me tone kërcënuese kishte paralajmërur për pasojat që do të kishin të gjithë ata policë që nuk do të pranonin të merrnin gradat e reja dhe që do të guxonin të shprehnin pakënaqësi për skandalin që përfshiu konvertimi i gradave. Pas kësaj Qamili është thirrur në zyrë dhe eprori i ka komunikuar urdhrin e pezullimit policit 55-vjeçar, duke e motivuar me daljen e tij në shtyp. Qamili është bindur dhe pas 35 vitesh punë në Polici është detyruar t'i dorëzojë simbolet dhe armët e shërbimit. Por ai nuk ishte ende i bindur nëse ajo që bënte ishte e drejtë. Në një vend ku thuhet se ekziston fjala e lirë, eprori i tregonte një urdhër të një kryeministri, i cili e pengonte arbitrarisht atë. Qemali nuk kishte nxjerrë sekrete të profesionit të tij dhe nuk kishte dhënë ndonjë informacion të ndaluar, por vetëm pse kishte thënë të vërtetën për një padrejtësi që i bëhej atij në mënyrë personale, ishte detyruar ta linte Policinë ku shërbente prej vitit 1967.

Kthimi te tezga
Në krye të rrugës e priste gruaja e tij, e cila shiste te tezga pranë shtëpisë. Teksa e shikonte në orarin e punës të vinte drejt saj, gruaja e kuptoi se Qemalin e kishin larguar nga policia. Për familjen e tyre rroga e Qamilit zinte një vend të konsiderueshëm. Me ta jeton djali dhe vajza me dy fëmijët jetimë. Ajo ka mbetur e ve që prej fatkeqësisë që i mori jetën bashkëshortit të saj. Tashmë tezga pranë shtëpisë mbetet i vetmi burim financiar për familjen e thjeshtë, pasi vetë bashkëshortja e Qamilit ka dalë prej 7 vitesh në asistencë dhe merr vetëm 2280 lekë.

Avokati i Popullit, shpresa e Qamilit
Ndërsa kishte humbur të gjitha shpresat për të gjetur një zgjidhje tek eprorët e tij, Qamili është drejtuar për te zyra e Avokatit të Popullit. Me shpresë të madhe te ky institucion, 55-vjeçari ka shkuar të bëjë ankesë. Njëri prej komisionerëve të Dobjanit e ka takuar vetë Qamilin dhe, pasi e ka dëgjuar me kujdes pretendimin e tij, e ka quajtur të padrejtë vendimin për pezullimin e policit. Ai i ka premtuar se do të përdorë të gjitha veprimet ligjore për ta zgjidhur këtë padrejtësi.


Ministria e Rendit: Qamili u pezullua se foli në media

Ministria e Rendit pohon zyrtarisht se motivacioni i pezullimit të policit Qamil Hajdari është komunikimi i tij me organet e medias së shkruar dhe elektronike. Sipas njoftimit për shtyp të ministrisë, policit i është komunikuar pezullimi nga puna, pasi është shprehur në organin e medias vizive, duke thënë se i është bërë padrejtësi në dhënien e gradës. Njoftimi përmend një urdhër të kryeministrit që daton më 20 gusht 2002, për mënyrat e dhënies së infomacioneve dhe të deklaratave në shtyp, ku bazohet edhe urdhri i pezullimit. Gjithsesi, Ministria e Rendit fton të gjithë ata punonjës të policisë, të pakanaqur me gradën e dhënë, që t'i drejtohen institucionalisht komisionit të gradave. Ankesat fillimisht do të kryhen në repartet përkatëse të policisë deri në caktimin e një komisioni të ankesave.

---------------------
-----------------------------
Oj sharki e lehte si era , a ka ardhur ne Shqiperi pranvera?

[angeldust]

I drejte apo i padrejte qofte konvertimi i grades se ketij polici, une mendoj se ai kurrsesi s'duhet te ishte larguar nga puna per ankesat qe kishte bere. Nqs. eproreve s'ju kishin pelqyer ankesat, le t'i zgjidhin problemet me reputacionin e tyre po ne media, dhe te justifikojne veprimin e tyre. Meqe nuk qenkan ne gjendje apo te zotet te bejne kete, ata perjeshtokan nje polic? C'llogjike eshte kjo? Administrata jone duhet te shpetoje nga kthetrat e diktatures, se akoma ju duket sikur duhet te veprojne me te njejten burokraci dhe imponim qe shihej ne spiunet e komunizmit... pa diferencuar fare ne socialiste apo demokrate biles... se pak a shume qe te dyja palet kane nje lloj te ngjashem menyre per te fshehur gabimet e shtetit... mbylljauni gojet te gjitheve...

Shpresoj qe shtypi apo gazetaret t'i denoncojne dhe ne te ardhmen gjera te tilla, dhe me behet qejfi qe te pakten kohet e fundit kam vene re tendenca te tilla ne median shqiptare, kuptohet ato te papolitizuarat.