Metabolizmi

[sirena_adria]

Shkencëtari në CNN: Përshpejtimi i metabolizmit s’është çelësi për të humbur peshë, shumë s’e kuptojnë

Mendoni se përshpejtimi i metabolizmit është çelësi për të humbur peshë? Metabolizmi është shndërruar në një nga fjalët më të përdorura në industrinë e mirëqenies – një kod i ndërlikuar që, nëse deshifrohet, besohet se zbulon sekretet e humbjes së peshës dhe shëndetit të përgjithshëm.

Pavarësisht nga përhapja e këtij termi, një shkencëtar thotë se shumë njerëz nuk kuptojnë shumë rreth mënyrës se si funksionon ky proces bazik trupor.

“Ata mendojnë se ka të bëjë me sa shumë ushqim mund të hamë pa shtuar peshë apo diçka të tillë”, i tha Dr. Kevin Hall korrespondentit kryesor mjekësor të CNN, Dr. Sanjay Gupta, kohët e fundit në podcast-in e tij, Chasing Life.

Hall dëshiron që metabolizmi të vlerësohet për arsye të tjera. “Metabolizmi është thjesht ky proces biokimik i jashtëzakonshëm që në thelb shndërron ushqimin që hamë dhe oksigjenin që thithim në thelb … gjithçka që jemi dhe gjithçka që bëjmë”, tha ai.

Shkencëtar kryesor në fushën e ushqyerjes dhe metabolizmit, Hall është i njohur për kërkimet e tij mbi konkurrentët e emisionit televiziv “The Biggest Loser”, që ndihmuan në shpjegimin e asaj që i veçonte pjesëmarrësit që e ruanin peshën e humbur nga ata që e rifitonin atë.

Ai kaloi më shumë se dy dekada në Institutin Kombëtar të Shëndetësisë. Punimi i tij i mëvonshëm mbi ushqimet ultra të përpunuara hetoi lidhjen e tyre me obezitetin, përfshirë një studim që tregoi se ato shkaktonin në mënyrë aktive tepricë në të ngrënë te pjesëmarrësit.

Hall njoftoi pensionimin e tij të hershëm dhe largimin nga NIH në prill, duke përmendur censurimin e mënyrës se si u komunikuan gjetjet e tij kërkimore. Ai është tani bashkautor i librit të ri “Food Intelligence: The Science of How Food Both Nourishes and Harms Us” së bashku me gazetaren Julia Belluz.

Metabolizmi dhe humbja e peshës shpesh përmenden bashkë, por kjo, sipas Hall, mund të jetë një qasje reduktuese.

“E gjej tepër zhgënjyese ndonjëherë faktin që kjo ide e metabolizmit, ky proces vërtet i bukur fiziologjik që është kaq themelor për jetën, përshkruhet disi si, ‘Oh, nëse merr këtë suplement, mund ta përmirësosh metabolizmin dhe të humbasësh peshë’” shpjegoi ai për Guptën.

A është me të vërtetë një metabolizëm më i shpejtë rruga më e shpejtë drejt humbjes së peshës? Hall është këtu për ta sqaruar këtë çështje, duke theksuar tri keqkuptime rreth metabolizmit që tregojnë se ka më shumë se sa duket në pamje të parë.

Miti 1: Njerëzit me obezitet kanë metabolizëm të ngadaltë

Një besim i përhapur është se metabolizmi më i ngadaltë rezulton në një peshë më të lartë trupore. Por, kryesisht, Hall tha se e kundërta është e vërtetë.

“Zakonisht, njerëzit më të mëdhenj kanë metabolizëm më të shpejtë sesa njerëzit më të vegjël”, i tha ai Guptës.

Hall ia atribuoi përhapjen e këtij miti mënyrës se si studiuesit i kanë hartuar studimet e hershme mbi metabolizmin. Shkencëtarët fillimisht u përpoqën ta përputhnin marrjen e kalorive të pjesëmarrësve me peshën e tyre, por nuk morën parasysh faktin se këto të dhëna për kaloritë ishin vetëraportuar.

Rezultoi se ata me obezitet shpesh i raportonin në mënyrë të nënvlerësuar kaloritë që hanin, në krahasim me ata më të dobët. Kjo, tha Hall, “i çoi njerëzit në përfundimin se, mirë, nëse ata po hanë më pak kalori dhe po e ruajnë peshën, atëherë duhet të djegin më pak kalori. Dhe ndoshta arsyeja pse kanë obezitet është sepse kanë metabolizëm të ngadaltë”.

Teknologjia moderne tashmë u lejon studiuesve të mbështeten në të dhëna, e jo në raportimet e pjesëmarrësve. “Kur në fakt e masim drejtpërdrejt metabolizmin e njerëzve, njerëzit me obezitet kanë norma metabolike më të larta mesatarisht sesa njerëzit e dobët”, theksoi Hall.

Por miti se duhet ta rrisim metabolizmin për ta trajtuar obezitetin ka vazhduar me kokëfortësi – dhe ndonjëherë ka çuar në pasoja vdekjeprurëse. Kur studiuesit e Universitetit Stanford zbuluan se përbërja kimike 2,4-dinitrofenol, ose DNP, rrite normën e metabolizmit në vitet 1930, ata e promovuan me entuziazëm si një mjet të sigurt dhe efektiv për trajtimin e obezitetit.

Ndërsa DNP me të vërtetë e rritste metabolizmin, ai gjithashtu shkaktonte efekte anësore që përfshinin verbëri dhe vdekje, duke i detyruar rregullatorët federalë të barnave ta tërhiqnin shpejt atë nga tregu.

“Ndoshta”, sugjeroi Hall, “nuk duhet të jetë befasi e madhe të kuptojmë më vonë se me diçka kaq thelbësore për jetën si metabolizmi, nuk mund ta shtosh ose zvogëlosh me një ilaç farmaceutik dhe të mos presësh efekte anësore të rënda, përfshirë edhe vdekjen”.

Miti 2: Metabolizmi ngadalësohet me kalimin e moshës

Ashtu si me peshën, mosha mund të mos ndikojë në metabolizëm aq sa mund të supozoni.

“Rezulton se deri sa të arrini në moshë shumë të shtyrë, po flasim për të 70-at dhe të 80-at, duket se norma jonë metabolike mbetet përafërsisht konstante”, tha Hall.

Sigurisht që ka ndryshime në trupin që plaket që mund të ndikojnë në normat metabolike.

Njerëzit “pas moshës 30 vjeçare”, tha Hall, “kanë tendencë të humbasin masë muskulore ose masë të dobët trupore, dhe kanë tendencë të shtojnë masë dhjamore. Dhe kjo vetëm pritet të rezultojë në një metabolizëm më të ulët”. Kjo sepse muskujt e dobët djegin më shumë kalori sesa dhjami.

Por janë këto ndryshime të lidhura me moshën – që nuk janë të pashmangshme – dhe jo vetë mosha, ato që ndikojnë në metabolizmin e dikujt.

“Pasi ta eliminosh atë efekt … nuk duket se ekziston ndonjë efekt themelor i plakjes që e ngadalëson metabolizmin me kalimin e kohës”, përfundoi Hall.

Disa mënyra për ta luftuar humbjen e masës muskulore të dobët me kalimin e moshës janë ushtrimet për forcë dy herë në javë dhe marrja e mjaftueshme e proteinave në dietë (por pa e tepruar).

Miti 3: Një metabolizëm i shpejtë është i domosdoshëm për humbjen e peshës

Një tjetër shtyllë e mitologjisë së metabolizmit është ideja se një metabolizëm i ngadaltë është armiku i humbjes së vazhdueshme të peshës. Ndërhyrje si dietat besohet se e ngadalësojnë metabolizmin deri në atë pikë sa që nuk mund të humbisni më peshë.

Por ta parandalosh metabolizmin nga ngadalësimi nuk është çelësi për humbje të qëndrueshme të peshës, tha Hall. Në fakt, është e kundërta.

“Njerëzit që kanë më shumë sukses në humbjen e peshës dhe në ruajtjen e saj janë ata që kanë metabolizmat më të ngadaltë ose reduktimet më të mëdha në metabolizëm”, tha ai. “Është pak a shumë si ta shtrish një sustë, apo jo?”.

Sa më intensivisht që dikush bën dietë ose ushtron, aq më shumë peshë do të humbasë dhe aq më shumë do t’i ngadalësohet metabolizmi, shpjegon ai në librin e tij.

Kërkimi i Hall tregoi se një metabolizëm më i ngadaltë “nuk dukej se përcaktonte aftësinë e dikujt për të humbur peshë ose për ta mbajtur atë afatshkurtër apo afatgjatë”.

Duke e ndarë metabolizmin nga biseda për humbjen e peshës, Hall tha se shpreson që të gjithë ta vlerësojnë këtë fenomen për atë që është në të vërtetë.

Dezinformimi rreth metabolizmit “i ka shpërqendruar vërtet njerëzit, mendoj unë, nga bukuria e vërtetë e asaj që është”, i tha ai Guptës.

“Është shfrytëzimi i rrjedhës së vazhdueshme të lëndëve dhe energjisë në ushqimin tonë dhe në frymëmarrjen tonë dhe fuqizimi i çdo qelize në trupin tonë, si dhe trupat dhe qelizat e pothuajse çdo organizmi që kemi hasur ndonjëherë”, tha Hall. “Është një komponent themelor i jetës, dhe është jashtëzakonisht magjepsës”.


Gazeta Express

https://www.gazetaexpress.com/shkenc...e-se-kuptojne/