Gjykata e Apelit: Vula e Partisë Demokratike i takon Sali Berishës, turpi Lulzim Bashës

[Albo]

Gjykata e Apelit jep Sali Berishës vulën e PD-së, Basha me gisht në gojë!



Gjykata e Apelit ka marrë vendimin final. Vula e Partisë Demokratike të Shqipërisë i takon liderit historik të demokratëve, Sali Berisha.

VIDEO

Ky vendim i rëndësishëm vjen pas afro 3 vitesh përplasje në kampin opozitar.

Tanimë, kryetari legjitim i partisë më të madhe opozitare në vend është ish-kryeministri. Ky i fundit u rikthye fuqishëm në politikë pas vendimit të Lulzim Bashës për përjashtimin e tij nga grupi parlamentar i PD-së në 2021-in.

Ndërsa nga sot Lulzim Basha mbetet pa vulë e pa nishan.

Pra ka marrë fund përplasja e gjatë mes palëve në Partinë Demokratike se kush e përfaqësonte atë zyrtarisht. Gjykata e Apelit vendosi sot të mos pranojë ankimimin e bërë nga pjesa e drejtuar nga zoti Lulzim Basha, duke lënë kështu automatikisht në fuqi, vendimin e shkallës së parë i cili njohu Kuvendin e thirrur nga ish kryeministri Sali Berisha dhe mbështetësit e tij, në dhjetor të vitit 2021, si dhe vendimet që pasuan me ngritjen e strukturave të reja partiake dhe një proces votimi që zgjodhi në krye si drejtues, zotin Berisha.

Trupa gjykuese nuk dha shpjegime mbi vendimin e marrë, i cili pritet të zbardhet me vonë, por duket se anëtarët e saj nuk kanë patur shumë dilema. Pasi u tërhoqën, ata e njoftuan verdiktin në më pak se një orë. Gjatë seancës gjyqësore, përfaqësuesi ligjor i Rithemelimit, Ivi Kaso, kërkoi pikërisht që të mos pranohej ankimimi i bërë nga zoti Enkelejd Alibeaj, duke arsyetuar se procesi në shkallën e parë kishte qenë pa palë, e për këtë arsye nuk legjitimohej në kërkesën drejtuar Apelit.

Zoti Berisha, i cili ndodhet në arrest shtëpe, reagoi përmes një postimi në Facebook. “Këtij vendimi historia do ti njohë meritën e madhe të parandalimit të një mënxyre të vërtetë për vendin, kapjen e pluralizmit politik nga partia shtet”, shkruajti ai.

Me vendimin e sotëm të Gjykatës së Apelit, pozitat e zotit Basha dobësohen edhe më tej, pas rezultatit zhgënjyes që grupi i tij, i cili mbante siglën e PD-së, mori në zgjedhjet për pushtetin vendor më 14 maj të vitit të kaluar, e më tej kur në shtator humbi mbështetjen dhe të grupit parlamentar. Nën drejtimin e Gazmend Bardhit, pjesa dërrmuese e deputetëve u bashkua me mbështetësit e zotit Berisha në parlament.

Ish kryeministri Berisha, nuk humbi kohë për t’iu drejtuar me një thirrje të gjithë demokratëve që të bashkohen. “Sot është ditë e mirë edhe për çdo demokrat e demokrate që nuk është me Sali Berishën, por që është me Partinë Demokratike, me Flamurin e saj, pasi ky moment u heq atyre hendekun e ndarjes me shumicën e vëllezërve dhe motrave të tyre! Sot dera për ta është e hapur dhe respekti për kontributet dhe mendimin ndryshe është i garantuar”, shkruajti zoti Berisha.

Koha Jonë

[Albo]

Apeli i kthen grupimit të drejtuar nga Berisha vulën dhe logon e PD

Emri, logoja dhe vula e Partisë Demokratike iu rikthyen të martën grupimit më të madh të opozitës që drejtohet nga ish-kryeministri Sali Berisha, pasi Gjykata e Apelit rrëzoi një ankimim të grupimit tjetër me në krye Lulzim Bashën.

Nga Blerina Gjoka


Deputetët Gazmend Bardhi, Agron Gjekmarkaj dhe Flamur Noka pas vendimit të Gjykatës së Apelit. Foto: LSA.

Trupa gjykuese e përbërë nga gjyqtarët Alma Ahmeti, Elona Toro dhe Iliba Bezati, pasi dëgjoi pretendimet e palëve, vendosi të mos pranojë ankimimin e firmosur nga deputeti Enkelejd Alibeaj, duke lënë në fuqi një vendim të gjyqtarit Agron Zhukri të shkallës së parë.

Gjyqtari Zhukri kishte njohur vendimet e Kuvendit Kombëtar të PD-së të mbledhur nga Berisha me firmat e ¼ së anëtarëve, ku u shkarkua nga detyra e kryetarit të partisë Lulzim Basha dhe organet drejtuese dhe partia do të drejtohej nga një organ i quajtur “Komision i Rithemelimit”.

Por, një ankimim i bërë në Apel nga deputeti Alibeaj, i cili në atë kohë u autorizua si kryetar partie pas dorëheqjes së përkohshme të Lulzim Bashës, bëri që çështja të zvarritej ligjërisht deri në Gjykatë të Lartë, e cila në dhjetor 2023 zhbëri vendimin e parë të Apelit, që e njihte Alibeajn si palë në proces, duke kthyer çështjen për rishqyrtim.

Me vendimin e fundit të Apelit duket se përfundon dhe saga ligjore më shumë se 3-vjeçare e partisë më të madhe opozitare, e cila që prej vjeshtës 2021 është e përçarë në dy grupime kundërshtare.

Beteja ligjore për vulën dhe emrin e partisë bëri që Partia Demokratike të futej e përçarë dhe të përjetonte një humbje të thellë në dy palë zgjedhje vendore, ato të pjesshmet në mars 2022 si dhe zgjedhjet e majit 2023.

Organet vendimmarrëse të procesit zgjedhor i njohën Bashës të drejtën për të përdorur vulën dhe logon, si dhe të përfitonte fondet e buxhetit të shtetit për zgjedhjet, ndërsa grupimi i Berishës garoi nën siglën e një koalicioni me partinë e aleate të ish-presidentit Ilir Meta.

Konflikti mes dy grupimeve lindi në shtator të vitit 2021, kur ish-kryetari i PD-së Lulzim Basha vendosi përjashtimin e Berishës nga grupi parlamentar, pasi ky i fundit u emërtua si person i përfshirë në korrupsion madhor nga Departamenti Amerikan i Shtetit.

Por, Berisha nisi një fushatë brenda partisë që kulmoi në janar të 2022-it me një sulm fizik kundër selisë së partisë, e cila u pasua nga ndërhyrja e policisë. Pas sulmit, kryesia e PD-së vendosi përjashtimin e Berishës dhe mbështetësve të tij nga partia.

Aktualisht “Rithemelimi” kontrollon pjesë më të madhe të partisë në terren dhe të grupit parlamentar, pasi shumë prej kundërshtarëve të dikurshëm u bashkuan rreth Berishës në këto vite.

Pas vendimit të gjykatës së Apelit, deputeti Flamur Noka u bëri thirrje demokratëve që të rikthehen tek partia e tyre. Sipas tij, “..megjithëse në oazin e padrejtësisë, u gjetën gjyqtarë me integritet që i dhanë zë të vërtetës, e cila po zvarritej prej tre vitesh”.

BIRN

[Albo]

Vendimi i Apelit/ Bylykbashi: Basha dhe Alibeaj ilegalë, nuk mund të përdorin më PD-në

Nënkryetari i PD-së, Oerd Bylykbashi është shprehur se vendimi i sotëm i Gjykatës së Apelit është i ekzekutueshëm dhe njeh Kuvendin e Jashtëzakonshëm të datës 11 Dhjetor 2021.

I ftuar në 'Opinion', Bylykbashi theksoi se Lulzim Basha dhe Enkelejd Alibeaj nuk mund të përdorin më emrin e PD-së.

Debati në studio:

Bylykbashi: Vendimi i sotëm njeh Kuvendin e Jashtazakonshëm të PD-së të datë 11 Dhjetor 2021 me të gjitha vendimet e tij. Basha ka deklaruar se do të pranojë vendimin dhe nuk do të ketë ankimim. Unë uroj që për të mirën e demokratëve nuk e vazhdon këtë sagë, që ai është autor prej 2 vitesh e gjysëm.

Fevziu: Ju keni pasur një vendim të Shkallës së Parë që njihte Kuvendin e 11 Dhjetorit, por nuk regjistrohej në gjykatë. Tani çfarë garancish kemi që do të regjistrohet?

Bylykbashi: Ishte gjëja më normale që ai vendim të regjistrohej siç ka qenë praktika më herët, vendosën të mos e bënin këtë gjë. Ky është vendim i formës së prerë, është i ekzekutueshëm. Nga sot regjistrohet PD. Njihet Komisioni i Rithemelimit. Më pas ka akte të tjera, siç është zgjedhja e Sali Berishës dhe të gjitha këto regjistrohen në gjykatë. Të gjitha janë akte që depozitohen për t’u regjistruar. Përsa kohë që të gjithë pranojmë që PD është kjo, këto janë procese të thjeshta. Gjykata mblidhet pa palë dhe shqyrton, dhe regjistrohen me radhë të gjitha aktet që vijojnë.

Fevziu: Domethënë Basha me Alibeaj janë ilegalë tani? Ata nuk mund të përdorin më emrin PD-ja dhe as logot?

Bylykbashi: Ata nuk mund të përdorin më PD-në. PD me vulë dhe PD pa vulë nuk qëndron bashkë. Sot janë bashkë si simbolet, ashtu edhe organet. Lulzim Basha dhe pak vetë, këtë përpjekje për ta çarë e bënë dhe 2 vite e gjysëm ata janë autorët e kësaj situate që nga 11 Dhjetori. 3 vjet qëkur filloi një lëvizje politike e paprecedentë.


Syri

[Albo]

Media e Bashës: Berishës ja dhanë vulën amerikanët



Media e financuar nga Lulzim Basha, portali Faktor.al, ka bërë një reagim të çuditshëm pas vendimit të Gjykatës së Apelit, e cila riktheu vulën dhe simbolet në Partinë Demokratike të drejtuar nga Sali Berisha.

Në një postim në Facebook, Faktor.al thekson se Sali Berishës ja dhanë vulën amerikanët dhe se Basha është tradhtuar jo vetëm nga drejtësia, por edhe nga njerëzit e amerikanëve në drejtësinë e vetuar.

Postimi i plotë i Faktor.al:

Lulzim Basha u tradhtua nga drejtësia. Ai u tradhtua nga një gjyqtare e zonës së parë operative, kunata e motrës së zv.kryeministres, një gjyqtare që ka burrin shef policie të Edi Ramës dhe një gjyqtare që e ka burrin referent të US Justice.

Pra, Lulzim Basha është tradhtuar jo vetëm nga drejtësia, por edhe nga njerëzit e amerikanëve në drejtësi vetuar. U tradhtua dy herë nga amerikanët sepse punonjësit e OPDAT nuk ishin në sallë siç ishin në Apelin e mëparshëm.

E kishte marrë vesh gjysma e Tiranës që gjykatësit kërkonin takim me njerëzit e Rithemelimit. E kishte marrë vesh sistemi i drejtësisë si ishte vendimi që kanë shkruar me qetësi pasi Gazment Bardhi e kishte bërë detyrën e tij. Ankimi i PD ishte bërë ditën e 12 të kur ligji e kërkonte brenda 10 ditëve…

Le të mos komentojë Lulzim Basha vendimet e gjykatës sepse ka standard të lartë.

E vërteta është që ai është tradhtuar si politikan nga drejtësia dhe amerikanët.

Ata duan që Edi Rama të marrë edhe një mandat tjetër sepse projekti ‘PS 2030’ është i mirë për interesat e tyre dhe ata që kërkojnë që të ketë shtrëngim të vidave të sistemit nuk janë të dëshirueshëm. Ata duan që Shqipëria të ecë kështu siç është, një lavatriçe e madhe ndërkombëtare, ku vrima e zezë të zgjerohet.

Megjithatë këtu ka një problem me llogaritë. Lulzim Basha ka një ide për shtetin dhe program për Shqipërinë që nuk ia marrin dot. Çuditërisht ka edhe njerëz prapa tij që besojnë se shtrëngimi i vidave të shtetit është ajo që meriton Shqipëria.

PD e ka humbur vokacionin maxhoritar në shoqëri dhe zgjidhja është një formulë tjetër që po eksperimentohet në Hungari, në Francë dhe gjetkë. Është çështje kohe.


Syri

[Albo]

Rikthimi i vulës te Berisha/ Argita Malltezi: Çdo derë e PD-së e mbyllur për Bashën



'Ftesa për bashkimin e PD-së është ndaj çdo demokrati dhe demokrateje, por dera për Lulzim Bashën është e mbyllur'.

Kështu u shpreh Argita Malltezi pas vendimit të Apelit që i dha vulën e Partisë Demokratike Sali Berishës.

Në një intervistë dhënë A2 CNN, Malltezi theksoi se Basha ka kontribuar në shkatërrimin e PD-së në vite.

“Mendoj që PD ka bërë gjithnjë ftesë për bashkim. Dyert janë të hapura për çdo demokrat. Basha nuk ka kontribut për këtë ditë, ka kontribut për kapjen e opozitës dhe shkatërrimin e saj në vite. Nuk duhen harruar gabimet se ndryshe përsëriten. Mendoj që i ka mbyllur vetes çdo derë”.

E pyetur se pas kësaj a duhet të largohet Berisha si kreu i PD-së dhe t’i hapë rrugë garës së saj në krye të PD, Malltezi u përgjigj: “Unë pjesë e PD kam qenë që në ‘90. Qëndrestarët nuk luftojnë për t’u larguar në momentin që fituan një betejë. Ne fituam një betejë, kemi beteja të tjera për të fituar deri sa të fitojmë luftën, që është rrëzimi i Ramës. Pas kësaj Berisha ka thënë referendum për kryeministër”.

Pa fshehur emocionet për rikthimin e vulës së PD, Malltezi tha se ky është një vendim i një drejtësie që reflekton normalitet, përkundër vendimeve të tjera, për të cilat ajo u qëndron deklaratave për gjyqësor të kapur.

“Është një vendim i thjeshtë, por rikthimi i normalitetit në prizmin juridik është shumë i rëndësishëm. Të gjithë njerëzit që vijnë te rruga dhe kjo atmosferë e tregon. Ne kemi detyrë si qytetarë të thjeshtë të denoncojmë çdo gjë që devijon nga rruga e ligjit dhe tregon kapjen e drejtësisë. Drejtësia mund të mos jetë e kapur, mund të jetë e gabuar, por kur gabimi është persistent ajo është drejtësi e kapur. Unë u qëndroj atyre që kam thënë, janë vendime të një drejtësie të kapur. Ky është vendimi i një drejtësie që reflekton normalitet. Ka edhe gjyqësor të pakapur nga Rama”.

Syri

[Albo]

VIDEO/ Berisha: Sot gjyqtaret guximtare kryen aktin më të madh të trimërisë; ato guxuan dhe thanë të vërtetën

VIDEO

Lideri i opozitës, Sali Berisha ka vlerësuar guximin dhe integritetin e tre gjyqtareve të Gjykatës së Apelit, të cilat vendosën që vula dhe logo të rikthehen në Partinë Demokratike.

‘Sot gjyqtaret guximtare kryen aktin më të madh të trimërisë; ato guxuan dhe thanë të vërtetën’, u shpreh Berisha.

Berisha: Miqtë e mi!

Sot gjyqtare guximtare kryen aktin më të madh të trimërisë; ato guxuan dhe thanë të vërtetën.

Xhorxh Oruell thotë se: “Të thuash të vërtetën në një kohë mashtrimi, është një akt revolucionar”.

Këtij vendimi, historia do t’i njohë meritën e madhe të parandalimit të një mynxyre të vërtetë për vendin, kapjen e pluralizmit politik nga partia.

Nuk kam dyshuar kurrë se kudo ka burra dhe gra, djem dhe vajza të ndershëm.

Ka njerëz, të cilët jetojnë për nderin, dinjitetin e tyre.

Por këto gjykatëse, me vendimin e tyre iu përbajtën ligjit dhe vetëm ligjit.

Sali Berisha, bashkëpunëtorët e tij, nga shtatori i vitit 1991 gjer sot, kanë bazuar ligjin dhe vetëm ligji,

Ndaj dhe dua të shpreh një mirënjohje të thellë ndaj tyre, por edhe ndaj gjyqtarëve të tjerë,të cilët nuk pranuan, pavarësisht bindjeve që mund të kenë, të marrin peng pluralizmin politik.

Patriotë të vërtetë, injoruan çdo vendim dhe vendosën në përputhje me ligjet dhe Kushtetutën.

Syri

[Albo]

Vula/ Berisha: “Sot e mundëm Ramën”. A është e vërtetë?



Në fjalimi që mbajti për militantët e mbledhur poshtë shtëpisë së tij, me rastin e vendimit të Gjykatës së Apelit që i riktheu vulën shumicës së cilës i takonte, Sali Berisha e përshkroi këtë ngjarje si një humbje për kryeministrin Rama. “Edi Rama sot flet me vete, ai sot nuk fle”, i tha kreu i PD militantëve, duke falenderuar për këtë akt tre gjykatëset që morrën vendimin se grupimi i Lulzim Bashës nuk mund të ishte pjesë e procesit, në rolin e ankuesit, në sagën për vulën.

Edhe të pranishmit e tjerë që morën fjalën e konsideruan vendimin e sotëm si fitore ndaj regjimit, në një nga betejat me të. “A do të ishim ne në këtë ditë, nëse nuk do të ishin mbushur sheshet në mitingjet e mëdha dhe në protestat e tjera?! E pamundur. Regjimi thjesht u mund në një nga betejat e shumta” i tha të pranishmëve analisti Artan Hoxha.

Ndërsa gjatë një inteviste për emisionin Task Force të Sonila Meços, numri 2 pas Berishës, Flamur Noka u shpreh: “merr fund e gjithë loja e Edi Ramës dhe regjimit për të mbajtur peng forcën tonë politike. Zëri i demokratëve më në fund u dëgjua, në oazin e drejtësisë politike u pa që ka filiza që lindin mbi rrënjët e së drejtës dhe jo mbi politikë. Dhe kjo e dëshmoi këtë sot. U referohem të treja zonjave gjyqtare që shqyrtuan këtë vendim dhe treguan që në këtë oaz politik të drejtësië politike ka dhe filiza që rrënjët i kanë te ligji dhe jo te urdhrat”.

Pra, po të të rekesh të kuptosh qëndrimin politik të PD-së pas kësaj ngjarjeje ai është i tillë: Atij që ata e konsiderojnë regjim, i ka ndodhur një incident, i kanë shpëtuar tre gjyqtare të ndershme dhe të pa kapuara, që kanë bërë drejtësinë e vërtetë.

Ata bëjnë sikur harrojnë se askush nga sekserët e mazhorancës nuk është parë këto ditë pranë apelit të Tiranës dhe zërat për një trysni politike kanë munguar. Ata gjoja nuk e vënë re se, që pasi Gjykata e Lartë e riktheu çështjen, duke kërkuar përjashtimin e seksionit Basha- Alibeaj si palë, sinjali ishte dhënë. Ata nuk duan të kuptojnë se, për herë të parë në sagën mbi dy vjeçare të këtij procesi, përfaqësuesi i ambasadës amerikane nuk e pa të arsyeshme të ishte prezent në sallë.

Të gjitha këto “përkime” mund të bëjnë të mendosh edhe për një hipotezë tjetër: Se çështja e mbajtjes peng të vulës u bë aq diskredituese, sa ai që PD e etiketon si regjim, ka vendosur të përdorë armë të tjera brenda sistemit të drejtësisë për të luftuar opozitën. Ky version duket më i besueshëm kur mendon se në regjim nuk mund të ketë incidente të rastësishme.

Pra opozita, para se të dalë me linjë politike për këtë çështje, duhet ti japë përgjigje një dileme: ose jemi në një sistem autokratik me drejtësi të kapur, ose kjo nuk është e vërtetë dhe prandaj në sallat e gjyqit mund të jepet edhe drejtësi. PD kësaj dileme nuk i ka dhënë ende përgjigje. Dhe për ironi të fatit, kreu i saj, që shpalli sot mposhtjen e Ramës përmes tre gjykatseve, e kumtonte këtë nga ballkoni i izolimit, ku pretendon se e ka mbyllur kryeministri, përmes mashave të tij në drejtësi.

Lapsi

[Albo]

Çfarë fshihet pas “dhurimit” të vulës

Nga Andi Bushati

Vendimi i gjykatës së apelit për të legjitimuar edhe “de jure” opozitën reale të vendit ka ringjallur iluzionin se në drejtësinë e re mund të ekzistojnë edhe ishuj lirie dhe pavarësie. Rikthimi i vulës tek Sali Berisha, në një këndvështrim sipërfaqësor, mund të duket si një sfidë, në të kundërt të gjithë asaj çka donte dhe kërkonte regjimi i Tiranës.

Edi Rama ka patur si sllogan mosnjohjen e opozitës së non gratës, gjykata e çertifikoi atë si legjitime. Ai kërkon zgjedhje me një rival pa financim, pa komisionerë dhe pa emër kryetari në fletën e votimit (si në 14 maj), drejtësia i’a pamundësoi këtej e tutje këtë ëndër. Ai do në të djathtë të tij, një grup parlamentar demokrat, deputetët e të cilit i cakton vetë, ndërsa zhveshja e Lulzim Bashës nga sigla e PD-së i’a vrau këtë shpresë.

Pra, po e pe nga ky këndvështrim, të krijohet përshtypja se sot është zbrapsur autokracia dhe ka fituar drejtësia. Kjo u duk edhe në reagimet e para të disa prej eksponentëve të PD-së që ngritën dy gishtat lart, i’a morrën valles tek selia dhe filluan të lëshojnë parrulla emtuziaste për fundin e lojës së Ramës dhe fitoren e afërt të demokratëve.

Por, sado e bukur të tingëllojë kjo përrallë, sa do që të kenë nevojë për optimizëm idhëtarët e persekutuar të opozitës, fatkeqësisht e gjitha është vetëm një mirazh zhgënjyes. Një analizë e ftohtë të kthjellon se nuk ka vend për të shikuar dritë në fund të tunelit.

E para, sepse nuk mund të kesh shpresë, kur sheh se për një vendim kaq të thjeshtë forca kryesore e opozitës u sorollat në dyert e gjykatave për dy vite e gjysëm. Ajo u paraqit e çarmatosur në dy palë zgjedhje, në ato të pjesshme të 6 marsit dhe në ato të përgjithshme bashkiake të 14 majit, falë kalkulimeve të drejtësisë së re. Vendimi udhërrëfyes i Gjykatës së Lartë sipas të cilit, një palë që nuk është pjesë e procesit (Basha- Alibeaj) nuk mund të ketë të drejtë ankimimi dhe zbatimi i tij, këtë 11 qershor prej apelit, dëshmuan se gjithçka qe krejt e kollajshme dhe se e gjithë zvarritja ka pasur prapavijë politike. Rilindja e ka përdorur drejtësinë si një faktor të rëndësishëm të ndikimit mbi zgjedhjet.

Pavarësisht se në këtë moment, e la të lirë gjykatën të lëshojnë vulën, partia në pushtet njësoj si ujku ka ndryshuar vetëm qimen. Ajo nuk ka hequr dorë nga zakoni i përdorimit të prokurorëve dhe togave të zeza. Kjo fitore e vogël e berishistëve u lejua vetëm pasi drejtësia e kaloi provën gjenerale se mund të shërbejë si mashë për penalizime të reja kundër opozitës.

Së pari, në zgjedhjet e 12 majit, pushteti tregoi-, me një rast që do të njolloste çdo demokraci-, se mund të prangosë një kundërshtar vetëm dy ditë para zgjedhjeve dhe se mund të përdorë SPAK dhe GJKKO, për të penguar betimin e një kryebashkiaku të zgjedhur nga populli. Tashmë për zgjedhjet e ardhshme precedenti është i gatshëm.

E dyta dhe më kryesorja, duke i rikthyer vulën PD-së reale, duket sikur bashkë me të drejtën për të përdorur flamurin, financat dhe për të pasur komisionerë në zgjedhjet e ardhshme, gjykata i’a zgjidhi gjymtyrët asaj për të vepruar e lirshme në zgjedhje. Por nuk është kështu. Përpara së ti “dhuronte” këtë karrotë Prokuroria dhe Gjykata e Posatçme e goditën PD-në me shkop. Ato e izoluan, ende pa i shpallur dot as akuzën liderit të opozitës, duke përdorur trukun e zhveshjes së tij prej mandatit të deputetit pa kaluar përmes kuvendit.

Kështu pra, kjo drejtësi ndërsa me njërën dorë i dha atë që i takonte, me tjetrën e kish zhveshur ndërkohë nga diçka tjetër. Vertet në garën e ardhshme elektorale demokratët mund të mos privohen më nga pasja e emrit të liderit të tyre në fletën e votimit, por ama, ata nuk do ta kenë atë prezent në fushatë. Pushteti dhe drejtësia i falën atyre vulën, por i rëmbyen Berishën.

Prandaj në këto kushte, të flasësh për ishuj të pavarur drejtësie, nëse nuk është manipulim, përbën naivitet. Edhe pas këtij vendimi të Apelit, pavarësisht nga mjetet që përdoren asgjë nuk ka ndryshuar: pushteti vijon ti përdorë “heronjtë e fëmijve” tanë si leva të shkatërrimit të lojës së barabartë politike.

Lapsi

[Albo]

Basha: Beteja vazhdon



Lulzim Basha, i cili ka thirrur një mbledhje të strukturave të grupimit që drejton, ndërsa Gjykata e Apelit, i hoqi të drejtën e vulës dhe logos së PD-së, tha se nuk ka ndërmend të komentojë vendimet e Gjykatave, duke e cilësuar këtë si një standard.

Ai tha se betejën nuk e kemi as për vulë, as për logo dhe as për karrige. Basha u shpreh se Shqipëria meriton më shumë dhe do të bëjmë gjithçka që kemi në dorë. Ai u shpreh se do të vazhdojë betejën.

Basha tha se gjithçka do të diskutohet me strukturat, ndërsa theksoi se përkushtimi i tij është për një Shqipëri që meriton më shumë.

“E thashë më parë, nuk komentoj vendimin e gjykatës, kemi vendosur një standard të tillë.

Hapat do ti diskutojmë me kolegët. Do të jem në përputhje me angazhimin për ata qindra demokratë dhe synimi është largimi i qeverisë.

Nuk e kam ndjerë veten ndryshe prej titujve dhe ofiqeve. Kam qenë Lulzim Basha para se të hyja në politikë , jam Lulzim Basha sot dhe do të jem Lulzim Basha.

Përkushtimi im është për një Shqipëri që meriton më shumë”, tha Basha. Ai paralajmëroi se beteja ligjore do të vazhdojë në emër të asaj që e konsideroi si qindra mijëra shpirtra që besojnë në atë se çfarë përfaqëson PD.

Lapsi

[Albo]

Basha nuk dorëzohet: Vendimi për vulën tërësisht i padrejtë, do bëjmë rekurs në Gjykatën e Lartë

VIDEO

Lulzim Basha, në një deklaratë për mediat tha se vendimi i Gjykatës së Apelit më 11 qershor për vulën e Partisë Demokratike ka qenë tërësisht i padrejtë.

Basha shprehet se grupi i tij i demokratëve do të bëjë rekurs në Gjykatën e Lartë. Sipas Bashës, vula e PD nuk mund t’i jepet një grupimi (grupi i Berishës) që është kundër aleatëve perëndimorë të Shqipërisë. Lulzim Basha tha gjithashtu se grupimi i tij politik do jetë në zgjedhje dhe se shqiptarët do kenë alternativë për të votuar.

Lulzim Basha: Shqiptarët do të kenë alternativën e tyre dhe alternativën e tyre do ta kenë tek ne. Vendimi i 11 qershorit është tërësisht i padrejtë dhe do bëjmë rekurs. Nuk kemi marrë akoma vendim për parti të re.

Ne besojmë se PD duhet të kthehet aty ku duhet të jetë dhe vendi i PD është në vlerat me të cilat ka lindur. Nuk mundet PD të jetë kundër aleatëve, përmes rekursit PD do t’ju kthehet demokratëve, për të bërë një betejë me Ramën. Berisha nuk është zgjidhja për të larguar Ramën. Përmes rekursit, do kërkojmë që PD të kthehet tek vlerat.

ORA NEWS