Albanistan: Kuvendi shpërfill Gjykatën Kushtetuese për mandatin e deputetes Olta Xhaçka

[Albo]

VOA: PS nuk i bindet dhe shpërfill Gjykatën Kushtetuese për Xhaçkën



Në Shqipëri, shumica e majtë vendosi sot të mos i bindet një vendimi të Gjykatës Kushtetuese, duke shënuar rastin e parë të shpërfilljes së institucionit më të rëndësishëm të Drejtësisë në vend. Ishin 72 deputetë socialistë, të cilët votuan kundër dërgimit në këtë Gjykatë të çështjes së papajtueshmërisë së mandatit të deputetes dhe ish-ministres së Jashtme, Olta Xhaçka. Një akt i cili u interpretua nga opozita si një “puç ndaj Kushtetutës dhe Gjykatës Kushtetuese”.

Socialistët nuk dhanë asnjë shpjegim konkret se përse nuk pranuan dërgimin e rastit në Gjykatë, por u përpoqën të bëjnë interpretime rreth dy vendimeve të Gjykatës për këtë çështje. Njëri që kishte të bënte me kërkesën e një të pestës së deputetëve, ku kërkohej gjykimi në themel i papajtueshmërisë së mandatit të zonjës Xhaçka, dhe tjetri që kërkonte zgjidhjen e konfliktit mes një të dhjetës së deputetëve të opozitës dhe Kuvendit, për rrëzimin e mocionit të tyre për dërgimin e rastit në Gjykatë.

Ndërsa në rastin e parë Gjykata vendoi pushimin e çështjes, në rastin e dytë, ajo vlerësoi se Parlamenti kishte vepruar në shkelje duke rrëzuar kërkesën për t’ja çuar gjykatës rastin e zonjës Xhaçka, si i vetmi organ kompetent për këtë. “Gjykata Kushtetuese vlerëson se në rastin konkret, Kuvendi duhet të kishte pranuar mocionin e kërkuesit dhe të dërgonte çështjen për shqyrtim në këtë Gjykatë në mënyrë që aspektet e pretenduara si papajtueshmëri të mandatit të deputetes Olta Xhaçka, t’i nënshtroheshin vlerësimit kushtetues, pasi gjatë gjykimit kushtetues, nuk u verifikua ndonjë pengesë juridiko-formale që mocioni të pengohej nga Kuvendi”, – shprehej Gjykata në venndimin e saj.

Por pavarësisht se e cituan dhe në seancë këtë vlerësim të Gjykatës, socialistët sërish e penguan dërgimin e çështjes së mandatit të zonjës Xhaçka. Sipas tyre vetëm në rastin e Komisioneve hetimore, Gjykata e bën “detyruese” ngritjen e tyre, ndërsa në këtë rast “është parlamenti që vendos”.

Sipas opozitës, zonja Xhaçka është në konflikt interesi, duke qenë se bashkëshorti i saj, ish-deputeti socialist Artan Gaçi, ka përfituar statusin e investitorit strategjik, për ndërtimin e një hoteli në bregdetin e Dhërmiut. Vetë zonja Xhaçka deklaroi sot se ajo nuk ka përfituar asnjë qindarkë nga fondet publike, dhe se statusi që ka përfituar bashkëshorti i saj nuk parashikon që diçka e tillë të ndodhë. Zonja Xhaçka akuzoi opozitën se e ka përdorur çështjen politikisht, me të pavërteta dhe shpifje.

Por kryetari i grupit parlamentar demokrat Gazmend Bardhi, u kundërpërgjigj duke u shprehur se nëse zonja Xhaçka është e bindur se nuk është në konflikt interesi, nuk ka pse i druhet Gjykatës Kushtetuese, duke saktësuar se opozita po kërkon vetëm që të jetë Gjykata ajo që duhet ta vlerësojë.

Pas vendimit të parlamentit, zoti Bardhi foli për “një ditë të zezë për Shqipërinë dhe për parlamentin. Me këtë vendim ka humbur ekzistenca e Gjykatës Kushtetuese e cila u ekzekutua me votë në parlament. Nëse Xhaçka nuk zbaton një vendim të Gjykatës Kushtetuese, për çfarë do duhet shqiptarët e thjeshtë të zbatojnë një vendim të një gjykate të zakonshme?”.

Nga Gjykata Kushtetuese nuk ka një reagim mbi vendimin e marrë në mbrëmje nga parlamenti. Më herët, e pyetur për zvarritjen e rastit Xhaçka nga ana e parlamentit, kryetarja e Gjykatës, Holta Zaçaj, kishte deklaruar gjatë një interviste për Zërin e Amerikës se “është vërtet një situatë e pazakontë dhe e pamundur që të ndodhë në një shtet demokratik”.

Sipas saj “vendimet e Gjykatës duhet të zbatohen, vendimet e Gjykatës nuk kanë ekuivok, nuk është lënë në çmim të politikës të vendosi se si dhe në ç‘mënyrë duhet të zbatojë vendimet. Vendimet janë të vetëzbatueshme. Kështu që çdo veprim që nuk përkon me atë që është thënë në vendimin e Gjykatës Kushtetuese, besoj që nuk është vendimi i duhur ose nuk janë veprime të duhura”.

Çështja e mandatit të zonjës Xhacka u rikthye në vëmendje ditët e fundit, edhe për një fakt tjetër që lidhej me bashkëshortin e saj dhe projektin e ndërtimit të hotelit në Dhërmi. Gjykata e Posaçme vuri nën sekuestro mbi 10 mijë metra katrorë sipërfaqe mbi të cilën parashikohet të ngrihet hoteli. Trualli i blerë nga zoti Gaçi, prej personave privatë, rezulton të jetë përfituar prej këtyre të fundit, përmes falsifikimit të dokumentave dhe se sipërfaqja ka qenë në pronësi të shtetit. Për rastin, pak javë më parë u arrestua dhe ish kryebashkiaku i Himarës Jorgo Goro.

VOA

[Albo]

Rama del kundër drejtësisë së re/ Refuzon Gjykatën Kushtetuese për Xhaçkën



Socialistët kanë refuzuar të zbatojnë vendimin e Gjykatës Kushtetuese për mandatin e Olta Xhaçkës me një votim që mori 72 vota pro në parlament. Ata rrëzuan kërkesën e opozitës që kërkoi shqyrtimin e mandatit të Xhaçkës, për vendimin e qeverisë në 29 Mars të vitit 2021, që i dha statusin e investitorit strategjik bashkëshortit të ministres, Artan Gaçit për një hotel me 5 yje në Dhërmi.

Votimi në parlament këtë të enjte është refuzimi i parë i hapur i mazhorancës për të zbatuar vendimin e një institucioni të drejtësisë së re, në këtë rast Gjykata Kushtetuese. Pasi e zvarritën për më shumë se një vit, socialistët u detyruan të dalin hapur duke refuzuar ta zbatojnë vendimin, që mund t’i kushtonte Olta Xhaçkës mandatin e deputetes.

Gjatë fjalimit në parlament, Xhaçka sulmoi mediat dhe opozitën për sulme të padrejta, ndërsa tha se Gjykata Kushtetuese e kishte shqyrtuar një herë çështjen e saj dhe nuk ishte e nevojshme që të vihej sërish në lëvizje.

Sipas saj në vendimin e parë, Kushtetuesja “shqyrtoi provat reale, jo ato të gjyqeve të ekraneve politike…,”.

Ish-ministrja e jashtme iu referua seancave gjyqësore të Kushtetueses, që shqyrtuan thjesht procedurat dhe jo çështjen e saj në themel.

“Sot Kuvendi s’ka çfarë voton fare për mua, se çështjen time GJK e ka pasur dhe e ka pushuar,” u shpreh Xhaçka duke spekuluar për vendimet e mëparshme të Gjykatës.

Çarja e opozitës dhe si e shfrytëzoi Rama



E vërteta është që Xhaçka arriti të përfitojë edhe nga përçarja e opozitës. Pas denoncimit të skandalit për statusin e investitorit strategjik që përfitoi bashkëshorti i ministres, opozita e përçarë iu drejtua Gjykatës Kushteuese me dy nisma.

Nisma e parë e Rithemelimit të Sali Berishës kërkoi shqyrtimin e çështjes dhe një vendim nëse Olta Xhaçkës duhej t’i hiqej mandati apo jo.

Nisma e dytë e PD-së së Vulës kërkoi rishqyrtimin e procedurave, pasi Partia Socialiste kishte rrëzuar raportin e opozitës për papajtueshmërinë e mandatit të Xhaçkës.

Gjykata u shpreh në Janar të vitit të kaluar dhe i dha të drejtë në procedura opozitës, duke kërkuar që kërkesa të vinte edhe një herë.

Socialistët përfituan për ta zvarritur për një vit çështjen, deri kur kryetarja e Gjykatës Kushtetuese, Holta Zaçaj u shpreh se ishte e paimagjinueshme që parlamenti të mos e zbatonte vendimin e Gjykatës gjatë një interviste në Zërin e Amerikës.

Mbledhja e qeverisë dhe konflikti i interesit



Xhaçka mbante detyrën e Ministres së Jashtme në kohën kur Komiteti i Vendimeve Strategjike i drejtuar nga kryeministri Edi Rama miratoi statusin e “investitorit strategjik” për bashkëshortin e saj, Artan Gaçi, i cili nisi të ndërtonte një hotel në Dhërmi.

Hoteli do të ishte me 5 yje dhe me kapacitet prej 106 suitash në Dhërmi, të quajtur “Dreamades Luxury Suites”. Mbledhja e Komitetit u zhvillua në 29 mars 2021.

Një vit më pas, në 2 mars 2022 qeveria u mblodh për t’i hapur rrugën e përdorimit afatgjatë të brigjeve të detit dhe plazhit përballë hotelit të tij kompanisë ‘AGTCC Hotel Management’ që kishte lidhur marrëveshje me kompaninë e Gaçit.

Në këtë mbledhje qeveria, Xhaçka mungoi, e ndërgjegjshme se ishte në konflikt interesi me vendimin që po merrej aty.

Lapsi.al

[Albo]

Olta Xhaçka në Kuvend: Shpifje, familja ime s’ka përfituar asgjë! Gjykata Kushtetuese ka pushuar çështjen



Deputetja e Partisë Socialiste, Olta Xhaçka, ka folur në Kuvend lidhur me akuzat që opozita i bën se bashkëshorti i saj është favorizuar si investitor strategjik, duke kërkuar edhe heqjen e mandatit të saj si deputetë.

“U bë një kohë e gjatë shpifje, je një gënjeshtar i rëndomtë. Shpifje. U bë një kohë e gjatë që emri im lidhte me paligjshmëri dhe abuzim me mandatin e deputetes. Nuk jam përgjigjur, jam menduar të rri në këtë detyrë apo të iki, të merrem me politikë apo të dorëzoj mandatin dhe të shpëtoj nga ky linç, ku faktet janë interesa politike e mediatike. Jam menduar se ku kam gabuar për të mbajtur në kurriz këtë furi balte, as kam ushtruar influencën time për të përfituar asgjë nga ato që janë bërë fakte të kryera, as nuk kam përfituar asgjë. Si për t’i vënë kapakun një tallje, diskutohen këtu nga leckat e topit të opozitës sikur po votohet për të mbajtur nëpër këmbë, Kuvendi s’ka ca voton fare se çështjen time Gjykata Kushtetuese e ka pasur e ka shqyrtuar dhe e ka pushuar me vendim. Sot këtu duhet të votohet, që është shkalla e sovraniteti të parlamentit dhe lira e votës së çdo deputet. Por gjithsesi, u arrit për shkak të akuzave të ngritura ndaj meje, meqë vendimi i sotëm lidhet sërish me mandatin tim, s’do komentoj më tej, kolegët le të diskutojnë dhe të vendosin të lirë. Por nuk mund të hesht për fajësinë që më është dhënë në tribunat e opozitave dhe portalet e gjobave. Çështja ime u shqyrtua nga Gjykata Kushtetuese, duke administruar provat dhe faktet konkrete, jo gjyqet në ekranet politike. Pasi shqyrtoi më shumë se 500 faqe prova, vendosi ta pushojë me vendim këtë çështje absurde. Kjo ka shkak vetëm njërën prej 1500 lejet e dhëna për përdorimin e plazhit nga subjekte turistike nga Velipoja në Ksamil. Flitet për toka shtetërore të falura, flitet për statuse të veçanta personale, kur në fakt e gjitha nga fillimi n ëfund është një leje për përdorim plazhi nga një sipërmarrje private pjesë e të cilës është edhe bashkëshorti im, që është sipërmarrës para se të bëhej deputet dhe u kthye në punën private pasi mbaroi mandatin e deputetit. As unë, as bashkëshorti, as nga shteti nuk është dhënë aspak status ekskluziv, por një status ligjor si dhjetëra sipërmarrje të tjera, nuk është shkelur asnjë ligj dhe nuk është bërë favorizim. Skam qenë në konflikt interesi në asnjë rast, e ka thënë Gjykata Kushtetuese”, tha Xhaçka.

Koha Jone

[Albo]

”Ishte ëndrra e tim shoqi, do merrte kredi”, Olta Xhaçka: Nuk bëj avokatinë e tij, por nuk e dija që…



Deputetja e Partisë Socialiste, Olta Xhaçka, është vendosur në qendër të akuzave të opozitës prej marsit 2022. Vendimi i Këshillit të Ministrave për t’i dhënë bashkëshortit të saj, biznesmenit Artan Gaçi, statusin e investitorit strategjik në jug të vendit ka vendosur në pikëpyetje mandatin e saj si deputete.

Si është e vërteta sipas ish-ministres socialiste? Pse ka vendosur të heshtë për një kohë të gjatë? Deputetja sqaroi sonte në Top Story se nuk kishte asnjë favorizim për projektin e të shoqit, për të cilin tha se “ishte ëndrra e tij”.

”Unë dhe im shoq i kemi pasur punët e ndara, nuk dua ti bëj avokatinë sipërmarrjes së tij, por ai është shkëputur në momentin që ne kemi krijuar një familje bashkë. Është marrë me biznes që në vitin 1991. Nuk bëhet fjalë për dikë të pasuruar nga politike”,-tha Xhaçka.

Keni folur për këto investime në detaje?

Kemi folur patjetër se ky projekt ka qenë ëndrra e tij. Ka qenë në partneritet me kompani të rëndësishme të huaja që mund të menaxhonin këtë investim. Ka qenë ëndrra e tij sepse ka dashur të realizojë një gjë të rëndësishme për ekonominë atje. Duke besuar që e ardhmja e këtij vendi është turizmi, kursimet, me kreditë bankare.

Nuk jam naive, por nuk e kam ditur, nuk e di sa mund të më besojnë, por nuk e kam ditur që statusi i investitorit të asistuar, përcaktimi i koordinatave do ishte në mbledhjen e Këshillit të Ministrave. Kam menduar që nuk mund të votoja një vendimmarrje që e dija që kishte të bënte me familjarët e mi.

Kam qenë prezente në mbledhjen dhe kam lajmëruar që ndodhet kjo pikë që mendoj se nuk duhet të votoj dhe nuk jam paraqitur në atë votim. Ishte përgjegjësi etike. Nuk ishte thjesht çështja e konfliktit të interesit, ishte kjo ngacmim etik që nuk duhet të merrja pjesë në atë votim. Nuk pyeta Ramën, thjesht ia deklarova sekretarit të përgjithshëm.

Koha Jone

[Albo]

PS refuzon të zbatojë vendimin e Gjykatës Kushtetuese për Xhaçkën

Socialistët vendosin të sfidojnë për herë të dytë vendimet e Gjykatës Kushtetuese në mbrojtje të koleges së tyre Olta Xhaçka, pasi kjo gjykatë e “detyroi” Kuvendin të dërgojë për interpretim pranë kësaj gjykate mandatin e saj.

Nga Gjergj Erebara


Kryetari i Grupit Parlamentar Socialist Bledi Çuçi. Foto: LSA

Ndaj Xhaçkës është inicuar një mocion për shkelje të Kushtetutës nga opozita pasi bashkëshorti i saj biznesmen u shpall investitor strategjik nga qeveria dhe iu dha po me vendim qeverie bregu i detit para hotelit në Dhërmi në përdorim.

Kryetari i grupit parlamentar socialist, Bledi Çuçi, e cilësoi “të paqartë” vendimin e ri të GJK-së dhe njoftoi se Kuvendi do të kërkojë opinionin e Komisionit Evropian për Demokraci, i cili njihet si Komisioni i Venecias.

Në një dalje për mediat, Çuçi mbajti një qëndrim kundërshtues ndaj formulimeve të vendimit të gjykatës ku u kërkohet deputetëve “të votojnë në përputhje me urdhërimin e Gjykatës”, duke e cilësuar këtë formulim si anti-kushtetues.

“Do të votoj si t'ma dojë mendja mua, jam i pavarur”- u përgjigj ai duke iu referuar disa herë formulimeve kushtetuese që garantojnë sipas tij që, deputeti është i pavarur dhe nuk mban përgjegjësi në vendimmarrjen e tij.

I pyetur nga BIRN nëse ky një qëndrim i mazhorancës cënonte balancën e pushteteve, besueshmërinë e Gjykatës Kushtetuese dhe krijonte një precedet të rrezikshëm në marrëdhënien mes Kuvendit dhe kësaj gjykate, ai tha “nuk ka një vendim politik, por ka një thirrje për të votuar si deputet”.

Ai aludoi se GJk e ka pasur mundësinë për ta trajtuar çështjen e papajtueshmërisë së mandatit kur e dërguan 1/5 e deputetëve dhe i cilësoi vendimet e saj si “cic-mice” juridike.

“Që të mos kalohet në një marrëdhënie kuazi perverse, që unë të çoj shokun tim, po ka instrumente që i jep opozitës të drejtën për të adresuar interesin publik në GJK dhe 1/5 e ka bërë këtë”- komentoi ai.

Mandati i deputetes socialiste u mbrojt politikisht në të gjithë hallkat proceduriale parlamentare që prej qershorit 2022 kur u dorëzua mocioni i opozitës.

Socialistët e rrëzuan këtë mocion në nëntor 2022 por Gjykata Kushtetuese e vlerësoi këtë vendim si shkelje të kushtetutës dhe i kërkoi dërgimin e mocionit në këtë gjykatë.

Në një votim të paprecedentë mazhoranca socialiste votoi në prill kundër vendimit të Gjykatës Kushtetuese, duke argumentuar se deputetët ishin të pavarur dhe nuk i detyronte vendimi i gjykatës si të votonin.

Dy javë më parë Gjykata Kushtetuese për herë të dytë e konsideroi vendimin e mazhorancës si anti-kushtetues dhe vendosi që të “detyrojë” Kuvendin që të rivotojë “pa vonesë” për dërgimin e mandatit të Xhaçkës për interpretim pranë këtij organi.

Gjatë njoftimit të vendimmarrjes kryetarja e kësaj gjykate, Olta Zaçaj, duke lexuar këtë vendim para mediave tha se “në kuadër të kësaj vendimmarrjeje, Gjykata thekson se Kuvendi mbart detyrimin për ekzekutimin pa vonesë të këtij vendimi”.

Ajo i kujtoi deputetëve se nuk mund të vihej në diskutim fuqia detyruese e vendimeve të Gjykatës Kushtetuese, të cilat “janë përfundimtare dhe të detyrueshme për zbatim”.

BIRN

[Albo]

Mandati Olta Xhaçkës: Gjykata Kushtetuese shprehet se Socialistët cenuan themelet e shtetit

Gjykata Kushtetuese arsyetoi se votimi i deputetëve të Partisë Socialiste për të mos zbatuar vendimin e saj në rastin e deputetes Olta Xhaçka, ka krijuar një krizë kushtetuese që jo vetëm cenon themelet e shtetit demokratik por minon dhe besimin e publikut te shteti dhe organet e tij.

Nga Vladimir Karaj


Kryeministri Edi Rama dhe deputetja Olta Xhaçka gjatë festimeve të organizuara ne afersi te selise se Partise Socialiste, me rastin e 33 vjetorit të themelimit të kësaj partie. | Foto: LSA


Vendimi i arsyetuar i Gjykatës Kushtetuese në lidhje me vendimmarrjen e Kuvendit sa i përket mandatit të deputetes Olta Xhaçka, kritikon ashpër shumicën parlamentare për shkelje kushtetuese me pasoja të rënda.

Në vendimin e zbardhur në 30 korrik, Gjykata Kushtetuese arsyeton se Kuvendi nuk ka respektuar vendimmarrjen e gjykatës në shkelje të detyrimeve kushtetuese dhe se kjo shkelje e kushtetutës kishte prodhuar një krizë të re, që veç të tjerash cenon vetë themelet e shtetit.

“Ky refuzim i Kuvendit për zbatimin e vendimit të Gjykatës ka çuar në krijimin e një krize kushtetuese që jo vetëm cenon themelet e shtetit demokratik dhe humb besimin e publikut te shteti dhe organet e tij, por vë në diskutim edhe vetë rolin dhe funksionin e Gjykatës”, shkruhet e bardhë në të zezë në vendimin e arsyetuar të Gjykatës.

Vendimi i Gjykatës u mor më 10 korrik me shumicë 8 me 1 dhe është i dyti në radhë që e gjen shumicën në Kuvend në shkelje të kushtetutës sa i përket mandatit të deputetes Olta Xhaçka. Në vendim Kushtetuesja e urdhëron Kuvendin të dërgojë për shqyrtim para saj kërkesën e opozitës për të shqyrtuar “papajtueshmërinë e mandatit të deputetes Olta Xhaçka”.

Xhaçka akuzohet se gjatë kohës kur mbante detyrën e Ministres së Jashtme, Komiteti i Vendimeve Strategjike i drejtuar nga kryeministri Edi Rama miratoi statusin e “investitorit strategjik” për bashkëshortin e saj, Artan Gaçi, i cili po ndërton një hotel në Dhërmi. Më pas, përmes një vendimi qeverie hotelit iu dha e drejta e përdorimit afatgjatë të brigjeve të detit.

Xhaçka këmbëngul se nuk është në konflikt interesi, nuk kishte përfituar asnjë centimetër tokë shtetërore dhe asnjë lloj përfitimi tjetër publik.

Përplasja mes Kuvendit dhe Gjykatës Kushtetuese vijon prej gati dy vjetësh, pasi shumica parlamentare ka zvarritur vazhdimisht vendimmarrjen për këtë çështje, duke refuzuar të dërgojë në Gjykatë për shqyrtim mocionin për shqyrtimin e kushtetutshmërisë së mandatit të Xhaçkës. Në fjalën e saj gjatë votimit në Kuvend në prill të këtij viti Xhaçka fajësoi mediat dhe pretendoi se Gjykata Kushtetuese e kishte pushuar çështjen.

Por vendimi i ri i Gjykatës i ka përgënjeshtruar këto qëndrime, duke e cilësuar sjelljen e shumicës parlamentare si antikushtetuese dhe duke urdhëruar që çështja të shkojë para saj për shqyrtim në themel.

Gjykata Kushtetuese arsyeton se edhe fakti që Kuvendi ia ka nënshtruar vendimin e saj shqyrtimit të Këshillit për Legjislacionin dhe Këshillit për Mandatet është cenim i kushtetutës që vë në dyshim rolin e vetë gjykatës.

“Struktura në të cilat shumica parlamentare ka vënë në dyshim fuqinë detyruese të vendimit të Gjykatës, ka thirrur ekspert të jashtëm dhe, më pas, ka vlerësuar se çështja duhet t'i përcillet për votim seancës plenare, votim në të cilin gjente zbatim parimi i mandatit jodetyrues”, thuhet në vendim.

Gjykata, e cila e mori në shqyrtim çështjen me kërkesë të deputetëve të opozitës, ka arsyetuar ndër të tjera se pretendimi i shumicës se deputetët ishin të lirë të votonin në këtë rast ashtu si edhe në vendimmarrje të tjera, është shkelje e parimeve kushtetuese.

Gjykata shprehet se rasti në fjalë nuk i nënshtrohet dhe nuk përligjet me parimin e “mandatit jodetyrues të deputetit, për shkak se zbatimi i vendimit të Gjykatës nuk është një çështje politike”.

Gjykata arsyeton se zbatimi i vendimit të saj në rastin konkret nuk është një procedurë e zakonshme parlamentare, “por një procedurë për ekzekutimin e një detyrimi konkret të lindur prej tij, sikurse është ai për dërgimin asaj të çështjes së papajtueshmërisë në ushtrimin e mandatit të deputetes Olta Xhaçka të ngritur mbi mocionin e 1/10-ës së deputetëve, ndaj qëndrimi i Kuvendit në këtë drejtim është i pabazuar”.

Në vendimin e arsyetuar gjykata po ashtu vlerëson se shumica parlamentare ka përvetësuar rolin e saj duke marrë përsipër analizimin e çështjes në themel, duke pretenduar se Xhaçka nuk kishte ndërmarrë veprime konkrete në shkelje të Kushtetutës.

“Gjykata ka vërejtur se çështja e vlerësimit të papajtueshmërisë në ushtrimin e mandatit të deputetes, e cila nëpërmjet bashkëshortit mund të ketë ushtruar veprimtari fitimprurëse që burojnë nga pasuria e shtetit ose e pushtetit vendor dhe të ketë fituar pasuri të këtyre, referuar fakteve, nuk i takon vlerësimit të Kuvendit, por vlerësimit të kësaj Gjykate”, thuhet në vendimmarrje.

Në mendim pakice gjyqtarja Sonila Bejtja, ka arsyetuar se Gjykata Kushtetuese duhej të merrte direkt në shqyrtim çështjen në themel, pa pritur votimin e parlamentit por duke u nisur nga padia e opozitës.

Para zbardhjes së vendimit të Gjykatës Kushtetuese, përfaqësues të shumicës e sulmuan atë si të “paqartë”. Ish-kreu i grupit parlamentar socialist, Bledi Çuçi, tha më 24 korrik se Kuvendi do të kërkojë opinionin e Komisionit të Venecias për çështjen.

Në një dalje për mediat, Çuçi mbajti një qëndrim kundërshtues ndaj formulimeve të vendimit të gjykatës ku u kërkohet deputetëve “të votojnë në përputhje me urdhërimin e Gjykatës”, duke e cilësuar këtë formulim si anti-kushtetues.

“Do të votoj si t'ma dojë mendja mua, jam i pavarur”, u përgjigj ai.


BIRN

[Albo]

“Mbrojtën Olta Xhaçkën që lumturoi burrin me 11,000 m2 në Himarë”/ Berisha deklaratë nga shtëpia: Kushtetuta po trajtohet si statuti i PS, Presidenti i Republikës hesht sepse…



Kreu i Partisë Demokratike, Sali Berisha përmes një deklarate ka denoncuar dhe lëshuar akuza drejt Olta Xhaçkës ndaj së cilës pretendon se bashkëshorti i saj ka përfituarnjë tokë në Hmarë, të konsiderueshme.

Sipas Berishës, Kushtetuta po trajtohet si statut i Partisë Socialiste teksa në këtë situatë, Prsidenti i vendit Bajram Begaj hesht.

Berisha thot se Kushtetuta e vendit është kthyer thjesht në një leter pa vlerë apo në statutin e Partisë Socialiste, nenet e të cilës zbatohen dhe interpretohen nga vet partia në pushtet.

Deklarat e kreut të PD, Sali Berisha:

”Kushtetuta e Shqiperisë ka rënë dhe kjo për të shumtën herë. Ajo është kthyer thjesht në një leter pa vlerë apo në statutin e Partisë Socialiste, nenet e të cilës zbatohen dhe interpretohen nga kreu i narko-shtetit shqiptar Edvin Kristaq Gjipea sipas vullnetit të tij malinj personal. Vendimet e Gjykatës Kushtetuese, e cila sipas nenit 124 të Kushtetutës zgjidh mosmarrëveshjet kushtetuese dhe bën interpretimin përfundimtar të Kushtetutës zbatohen në narkoshtetin e Edi Ramës vetëm në rastin kur ato shprehin vullnetin e këtij të fundit dhe narko-mazhorancës së tij. Në rast të kundërt këto vendime të cilat në doktrinë kanë vlerën e normës kushtetuese, kurrë nuk zbatohen, por hidhen në kosh si leter pa vlerë dhe së bashku me to de-facto hidhet vetë Kushtetuta dhe rendi i bazuar në librin themelor të shtetit. Kjo ndodhi me vendimin e Gjykatës Kushtetuese për prishjen Teatrit Kombëtar, i cili nga Edi Rama nuk u zbatua, por u hodh në koshin e plehrave. Ky precedent i rrezikshëm i cili faktoi se mbi Gjykatën dhe Kushtetutën qëndron Edvin Gjipea me interesat e tij mafioze, çeli rrugën për akte të tilla të tjera të ngjashme. Kjo ndodhi me vendimin e Gjykatës Kushtetuese të lidhur me mandatin e Olta Xhaçkës, te cilin perseri Edi Rama per intersa te tij mafioze e hodhi ne kosh te plehrave dhe nuk e zbatoi. Ai urdhëroi Lindën e tij të parlamentit të mos zbatojë vendimin e gjykatës për t’i dërguar asaj për shqyrtim legjimitetin e mandatit të saj pasi deputetja dhe ministria Xhaçka kishte lumturuar burrin e vet me 11,000 m2 në Himarë dhe e kishte shpallur me firmën e Edvin Gjipese në kundërshtim të hapur me nenin 70 të Kushtetutës investitor strategjik. Ky vendim i Edi Ramës është një grusht shteti brenda shtetit në të cilin në aparencë narko-mazhoranca, por në fakt Edi Rama, marrin pushtetin gjyqësor në ratin konkret pushtetin e Gjykatës Kushtetuese duke bërë kështu në vend të saj interpretimin përfundimtar të neneve të Kushtetutës dhe vendimeve të Gjykatës Kushtetuese pra duke rrëzuar Kushtetutën dhe marrë pushtetin e Gjykatës Kushtetuese. Ky akt anti-kushtetues shënon përseri zëvendësimin e shtetit ligjor dhe rendit kushtetues me kodin e mafies dhe rendin e narko-shtetit në vendin anëtar të NATO-s dhe qe pretendon te antaresohet ne BE. Heshtja e Presidentit të Republikës, i cili jo në gërmën e Kushtetutës, por në doktrinën kushtetuese është garant i zbatimit të vendimeve të Gjykatës Kushtetuese është dëshmi tjetër e pushtetit absolut të Edi Ramës. Por ky akt është gjithashtu dëshmi flagrant se sa e kontrolluar është në Shqipëri nga Edi Gjipea lufta kundër korrupsionit në raste ku vetë ai haptas apo fshetas është personalisht i përfshirë. Por këto akte dëshmojnë se sa të pashpresë janë qytetarët shqiptarë në paditë e tyre kundër qeverisë për shkeljen e të drejtave të tyre civile dhe penale në një sistem gjyqësor fiktiv që kontrollohet me dorë të hekurt nga Edvin Gjipea. Por këto akte dëshmojnë gjithashtu fytyrën e vërtetë dhe produktet monstruoze të reformës së drejtësisë në Shqipëri. Partia Demokratike si parti e lirive dhe të drejtave të njeriut garanton shqiptarët se rivendosja e shtetit ligjor dhe kushtetutshmërisë në vend, janë objektivat më madhore të saj”, tha Berisha.

Balkanweb

[Albo]

Mandati i Xhaçkës, socialistët rinisin “lojën” me Këshillin e Legjislacionit

Kryetarja e Kuvendit Elisa Spiropali iu përgjigj kërkesës së opozitës për një seancë urgjente parlamentare për të zbatuar vendimin e Gjykatës Kushtetuese, duke e referuar çështjen nga e para në Këshillin e Legjislacionit, një lojë që shumica socialiste e bën prej më shumë se një viti.

Nga Vladimir Karaj


ish-Ministrja për Europën dhe Punët e Jashtme, Olta Xhaçka. Foto: LSA.

Kërkesës së deputetëve të Partisë Demokratike për një seancë të jashtëzakonshme të Kuvendit për të zbatuar vendimin e Gjykatës Kushtetuese, që ka urdhëruar dërgimin në gjykatë për shqyrtim të papajtueshmërisë së mandatit të deputetes Olta Xhaçka, kryetarja e Kuvendit Elisa Spiropali iu përgjigj të premten duke thirrur mbledhje të Këshillit të Legjislacionit.

Spiropali e thirri mbledhjen në fund të muajit Gusht duke shtyrë edhe më tej zgjidhjen e konfliktit mes Kuvendit dhe Gjykatës Kushtetuese, i cili zvarritet në korridoret e parlamentit prej më shumë se një viti. Njëlloj si në qëndrimet e mëparshme shumica parlamentare përmes kryetares Spiropali i kërkon Këshillit të Legjislacionit të “shqyrtojë vendimin e Gjykatës Kushtetuese”.

Një ditë më parë kreu i grupit Parlamentar të Partisë Demokratike Gazmend Bardhi kërkoi mbledhje të “Kuvendit në sesion të jashtëzakonshëm, kur kërkohet nga jo më pak se një e pesta e sesionit ta caktojë brenda periudhës ‘3 ditë nga paraqitja e kërkesës'”. Bardhi tha se kjo e drejtë lindte nga Kushtetuta.

Por në përgjigje të kësaj kërkese Spiropali pretendon se vendimi i Gjykatës Kushtetuese duhej të kalonte më parë në Këshillin e Legjislacionit dhe se ky i fundit duhej të prodhonte një raport për kryetare e kuvendit. Kjo skemë u përdor edhe një vit më parë nga socialistë që më pas e shtynë vendimmarrjen mbi vendimin e Kushtetueses për disa muaj dhe në fund votuan kundër në seancë plenare.

Megjithatë këtë herë shumica gjendet para një vendimi të qartë të gjykatës që i urdhëron ata të dërgojnë mandatin e Xhaçkës për shqyrtim para saj. Kushtetuesja, në vendimmarrjen e saj në fillim të korrikut të këtij viti, u shpreh se sjellja e socialistëve ndaj vendimeve të saj cënonte themelet e shtetit.

“Ky refuzim i Kuvendit për zbatimin e vendimit të Gjykatës ka çuar në krijimin e një krize kushtetuese që jo vetëm cenon themelet e shtetit demokratik dhe humb besimin e publikut te shteti dhe organet e tij, por vë në diskutim edhe vetë rolin dhe funksionin e Gjykatës”, shkruhet e bardhë në të zezë në vendimin e arsyetuar të Gjykatës.

Përplasja mes Kuvendit dhe Gjykatës Kushtetuese vijon prej gati dy vjetësh, pasi shumica parlamentare ka zvarritur vazhdimisht vendimmarrjen për këtë çështje, duke refuzuar të dërgojë në Gjykatë për shqyrtim mocionin për shqyrtimin e kushtetutshmërisë së mandatit të Xhaçkës. Në fjalën e saj gjatë votimit në Kuvend në prill të këtij viti Xhaçka fajësoi mediat dhe pretendoi se Gjykata Kushtetuese e kishte pushuar çështjen.

Por vendimi i ri i Gjykatës i ka përgënjeshtruar këto qëndrime, duke e cilësuar sjelljen e shumicës parlamentare si antikushtetuese dhe duke urdhëruar që çështja të shkojë para saj për shqyrtim në themel.

BIRN

[Albo]

Tërhiqet PS, gati të votojë mocionin për mandatin e deputetes Xhaçka

Në një ndryshim qëndrimi të papritur, mazhoranca pranoi të martën që të futet për votim në seancën më të afërt plenare mocioni për papajtueshmërinë e mandatit të deputetes Olta Xhaçka, pasi votuan në dy herë radhazi kundër dërgimit për interpretim në Gjykatën Kushtetuese.

Nga Blerina Gjoka


ish-Ministrja për Europën dhe Punët e Jashtme, Olta Xhaçka. Foto: LSA.

Xhaçka akuzohet se gjatë kohës kur mbante detyrën e Ministres së Jashtme, Komiteti i Investimeve Strategjike i drejtuar nga kryeministri Edi Rama miratoi statusin e “investitorit strategjik” për bashkëshortin e saj, Artan Gaçi, i cili po ndërton një hotel në Dhërmi. Më pas, përmes një vendimi qeverie hotelit iu dha e drejta e përdorimit afatgjatë të brigjeve të detit.

Amëtarët socialistë në Këshillin e Legjislacionit ranë dakord që vendimi i Gjykatës Kushtetuese, i cili detyron Kuvendin ta votojë pa vonesë dërgimin e mocionit për interpretim, të votohet në seancën e datës 12 shtator, si seanca e parë e punimeve të sesionit të ri parlamentar.

Fillimisht kryetarja e këshillit, deputetja e opozitës Dhurata Çupi, propozoi që kryetares së Kuvendit t'i dërgohej një raport me arsyetim ku i kërkohej asaj që të informonte deputetët për ‘detyrimin'që kanë për të votuar ‘Pro', sipas arsyetimeve të dhëna në vendimin e gjykatës.

Çupi theksoi se për shkak të qëndrimit kundër të mazhorancës për këtë çështje dhe tentativës për të mbrojtur kolegen e tyre, Kuvendi ishte gjetur në shkelje të Kushtetutës në vendimet e tij të mëparshme.

Por deputetja e PS, Klotilda Bushka tha se rekomandimi për kryetaren nuk ka pse të ketë arsyetime shtesë.

“Ky këshill duhet t'i propozojë kryetares së Kuvendit ta përfshijë këtë vendim në rendin e ditës së seancës plenare më të afërt, kjo duke ju referuar vetë arsyetimit të Gjykatës Kushtetuese”- tha Bushka duke shtuar se “nuk ka munguar ndonjëherë vullneti dhe impenjimi për të ekzekutuar vendimin e Gjykatës Kushtetuese”.

Ndryshimi i qëndrimit të mazhorancës ndaj çështjes u komentua me habi nga anëtarët opozitarë në mbledhje, të cilët rikthyen debatin dhe akuzat për mbrojtjen politike që iu dha Xhaçkës në më shumë se dy vite që kur opozita dorëzoi mocionin në Kuvend.

Disa javë më parë ish-kryetari i grupit socialist Bledi Çuçi lajmëroi publikisht se vendimi do të “ankimohej” në Komisionin e Venecias dhe e cilësoi urdhërimin e Kuvendit nga gjykata si anti-kushtetues dhe deklaroi se deputetët votonin si të donin pasi ishin të pavarur.

Vendimi i arsyetuar i Gjykatës Kushtetuese në lidhje me vendimmarrjen kritikon ashpër shumicën parlamentare për shkelje kushtetuese me pasoja të rënda, referuar qëndrimit të prillit kur deputetët socialistë rrëzuan një vendim të mëparshëm të kësaj gjykate për këtë çështje.

Por, sipas Kushtetueses, Kuvendi nuk ka respektuar vendimmarrjen e gjykatës në shkelje të detyrimeve kushtetuese dhe se kjo shkelje e Kushtetutës kishte prodhuar një krizë të re, që veç të tjerash cenon vetë themelet e shtetit.

BIRN

[Albo]

PS rrëzon për herë të dytë Gjykatën Kushtetuese për Xhaçkën

Mazhoranca socialiste ka rrëzuar për herë të dytë një vendim të Gjykatës Kushtetuese që e detyronte Kuvendin të dërgonte për interpretim mandatin e deputetes Olta Xhaçka, ndaj së cilës ka indicie se ka shkelur Kushtetutën pasi bashkëshorti i saj u shpall “investitor strategjik”.

Nga Blerina Gjoka


Deputetja socialiste Olta Xhaçka në Kuvend. Foto: LSA

Shumica e deputetëve socialistë (65) abstenuan, ndërsa 9 votuan kundër të enjten në mesnatë, duke bërë që mocioni të mos merrte votat e mjaftueshme për t’u miratuar pavarësisht 25 votave pro të opozitës. Kjo është hera e dytë që mazhoranca në pushtet del kundër Gjykatës Kushtetuese, përkundër konstatimeve të gjykatës se këto qëndrime “cënojnë themelet e shtetit” dhe janë “shkelje të rënda të Kushtetutës”.

Pas votimit, kryetarja e Kuvendit, Elisa Spiropali, njoftoi iniciativën për dërgimin e çështjes për interpretim në Komisionin Evropian për Demokraci, i cili njihet si “Komisioni i Venecias”. “Për të marrë një mendim të specializuar mbi standardet e zbatueshme në vendimmarrjet e pushtetit legjislativ, raportin dhe konkurrueshmërinë e parimeve të parashikuara në të drejtën kushtetuese dhe për rastet e papajtueshmërisë së mandatit të deputetit”, arsyetoi Spiropali duke e quajtur procedurën parlamentare për rastin të ezauruar.

Çështja e mandatit të Xhaçkës ka krijuar një precedent në marrëdhëniet mes Kuvendit dhe Gjykatës Kushtetuese, pasi është shmangur praktika e mëparshme për dërgimin për interpretim në gjykatë të mandateve të deputetëve, kur ndaj tyre ka pasur akuza apo indicie se kanë shkelur nenin 70 të Kushtetutës, i cili u ndalon deputetëve të përfitojnë pasuri publike.

Xhaçka mbante detyrën e ministres së Jashtme në kabinetin qeveritar, kur Këshilli i Ministrave mori vendim për të dhënë në përdorim për 30 vite brigjet e detit para hotelit në Dhërmi për kompaninë e bashkëshortit të saj, Artan Gaçi, një ish-deputet socialist. Në mars 2021 Komiteti i Investimeve Strategjike që drejtohet nga kryeministri Edi Rama firmosi dhënien e statusit “investitor strategjik” për Gaçin, status që ai ia delegoi një kompanie tjetër të prezantuar si amerikane, por që në të vërtetë rezultoi në emër të një familjari të bashkëshortes, partneres së vëllait të Xhaçkës.

Për tokën ku Gaçi po ndërton ka një hetim nga Prokuroria e Posaçme (SPAK) pasi trualli prej afro 10 mijë metrash katrorë është vënë në sekuestro me dyshimet se u përfitua përmes dokumenteve të falsifikuara. Ndërsa ish-kryebashkiaku i Himarës, Jorgo Goro, akuzohet se mori pjesë në një skemë tjetërsimi pronash që aktualisht janë në zotërim të bashkëshortit të deputetes Olta Xhaçka. Xhaçka është mbrojtur nga akuzat duke pretenduar se bashkëshortit të saj nuk i është bërë asnjë favorizim nga shteti dhe nuk ka përfituar nga pasuria publike.

BIRN