Opozita: Vëllai i Edi Ramës koka e grupit të kokainës së Xibrakës, prokuroria nuk e hetoi

[Albo]

VIDEO/ Vezaj: Në hetimin e Xibrakës çuditërisht policia nuk ka dorëzuar asnjë video apo foto, veç materiale me shkrim

VIDEO

Gazetari Flamur Vezaj, në një lidhje direkt nga SHBA me emisionin ‘Task Force’ me Sonila Meçon në SYRI TV, ka treguar detaje nga hetimi i dosjes ‘Xibraka’.

Sipas Vezajt, pas urdhrit të prokurorit ndaj forcave operacione të policisë, këta të fundit kanë nisur vëzhgimet në terren, dhe në prokurori kanë dorëzuar vetëm materiale me shkrim dhe asnjë material me video apo me foto, siç edhe ndodh gjithmonë nga veprimet operacionale të policisë.

‘Veprimet e para janë kryer me urdhër të prokurorit Henri Ligori, i cili ka vendosur numrat në përgjim të personave po merreshin me këtë biznes dhe për ti identifikuar bashkëpunëtorët e tyre. Ilir Hyseni bashkë me një person tjetër, po kërkonin nëpër Gjermani blerës të rinj të kokainës dhe për këtë fakt autoritetet gjermane janë alarmuar.

Në momentin që ka ardhur informacioni, prokuroria i kërkon policisë, forcave operacionale që të nisë vëzhgimin në terren.

Ligjërisht sipas rregullit operacionalja funksionon me video, foto dhe raporte me shkrim. Çuditërisht në dosjen ‘Xibraka’, ka vetëm raporte me shkrim të dorëzuara në prokurori, nuk ka asnjë video dhe asnjë foto.

Pasi filluan të gjithë veprimet për tu goditur, goditja ka ndodhur në datat 14 janar 2015 rreth pasdites, ku u bë ndërhyrja brenda laboratorit. Oficeri i kontaktit i policisë gjermane kishte kontakte direkte me prokurorët. Ditën e aksionit ka qenë oficeri gjerman i cili i thotë operacionales se në derën e majtë në veriperëndim, disa nga personat brenda po derdhin disa kova me lëndë.

Edhe në rastin tjetër, ka qenë po oficeri i policisë gjermane që ju thotë se, makina me këto targa po transportonte drogë, kapeni.

Fillimisht forcat operacionale ka ndërhyrë në një magazinë boshe dhe kanë thënë se nuk ka gjë. Më pas kanë qenë autoritetet gjermane që kanë drejtuar ndërhyrjen, duke dhënë informacione të sakta.

Për autoritetet gjermane ka qenë e papranueshme që nga ora 10:00-11:00 e paradites, është njoftuar Genci Xhixha në telefon, i ndjekur nga oficerët e policisë, ishte duke ikur në laborator, ka bërë dy rrotullime tek rrethi i TEG dhe është kthyer për Tiranë, duke u zhdukur. Oficerët thanë se, u ka humbur nga sytë sepse eci shumë shpejt.

Në atë kohë është identifikuar numri se kush e ka njoftuar, por jo personi, sipas prokurorisë së atëhershme, por kishte dyshime se ishte një nga fëmijët e një titulli të lartë të ish komunizmit. Meqenëse numri nuk ishte identifikuar nuk mund ta lidhnin me personin’, tha ndër të tjera gazetari Flamur Vezaj, në SYRI TV.

Syri

[Albo]

FOTO/ ‘Rasti Xibraka’, Gazment Bardhi kërkesë për mocion me debat parlamentar



Grupi Parlamentar i Partisë Demokratike, pas refuzimit të interpelancës nga Kryeministri Edi Rama për denoncimin mbi përfshirje e vëllait të tij Olsi Rama në Laboratorin e drogës në Xibrakë, nuk heq dorë nga llogaridhënia mbi këtë çështje.

Kryetari i Grupit Gazment Bardhi ka paraqitur mocion për zhvillimin e debatit parlamentar mbi problematikën e prodhimit, shitjes dhe trafikimit të lëndëve narkotike në vendin tonë.

Në kërkesë e Bardhit specifikohet se nga viti 2014 e në vijim, Shqipëria u bë vendi i parë në Evropë sa i përket kultivimit dhe trafikimit të lëndëve narkotike. Agjencitë ligjzbatuese evropiane dhe raportet ndërkombëtare evidentuan faktin se grupet kriminale të angazhuar në prodhimin dhe shitjen e lëndëve narkotike, kishin bashkëpunëtorë të ngushtë në nivelet më të larta të Policisë së Shtetit dhe Qeverisë, të cilët përbënin garancinë e tyre për vijimin normalisht të aktivitetit kriminal.

Ashtu si në rastin e hetimeve për kanabisin, agjencive ligjzbatuese shqiptare do t’u vinin në ndihmë autoritetet e drejtësisë evropiane. Konkretisht, në Dhjetor 2014, Prokuroria e Hanoverit do të informonte Prokurorinë shqiptare së një grup kriminal kishte filluar prodhimin e kokainës, me qëllim trafikimin e saj në territorin gjerman.

Hetimet e mëtejshme do të zbulonin një fabrikë prodhimi dhe përpunimi të kokainës në fshatin Xibrakë të Elbasanit, si dhe do të zbardhte identitetin e një grupi të strukturuar kriminal që drejtohej nga Genci Xhixha, Ilir Hyseni dhe Gentian Gjonaj, dhe kishte në përbërje gjashtë shtetas të tjerë, në role të ndryshme, përfshirë dy shtetas kolumbianë që merreshin me prodhimin e lëndës narkotike.

Nëntë shtetasit e identifikuar u dënuan për kryerjen e veprave penale të prodhimit dhe shitjes së narkotikëve në formën e grupit të strukturuar kriminal, por siç del nga vendimet gjyqësore për shkak të gabimeve të kryera gjatë hetimeve nga Policia e Shtetit, si dhe dekonspirimit të operacionit, nuk u arrit të provohej trafikimi i kokainës, për të cilën kishte nisur hetimi fillimisht.

‘Policia dhe Prokuroria nuk arritën gjithashtu të zbardhnin të plotë identitetin e të gjithë bashkëpunëtorëve, të lidhur me grupin kriminal, për të cilët Prokuroria do të regjistronte procedimin penal nr. 335/1 i vitit 2016. Por, dy vite më pas ky procedim penal do të pezullohej pasi Prokuroria do të shpallte pamundësinë për identifikimin e këtyre individëve. Dokumentet zyrtare nga dosja gjyqësore dhe sistemi TIMS ngrenë dyshime serioze se një prej këtyre bashkëpunëtorëve të paidentifikuar mund të jetë Olsi Rama, vëllai i kryeministrit Edi Rama. Këto dyshime bazohen në faktin se një prej bashkëpunëtorëve të paidentifikuar është një shtetas 45 vjec, me flokë të shkurtër, përdorues i automjetit AA 653 DM. Olsi Rama asokohe ishte 45 vjec, me flokë të shkurtra dhe përdorues i automjetit AA 653 DM, i përdorur edhe nga pjesëtarët e grupit të strukturuar kriminal Genci Xhixha, Gentian Gjonaj dhe Ermal Hoxha. Sipas të dhënave të sistemit TIMS nga 18 hyrje-dalje të makinës, 7 prej tyre i përkasin Olsi Ramës. Sipas gjykatës, policia dhe prokuroria kanë kryer hetime të mangëta dhe nuk kanë identifikuar bashkëpunëtorët e grupit. Përdorimin e këtij automjeti dhe njohjen me eksponentët e grupit kriminal do ta pohonte edhe vetë Olsi Rama ditën e publikimit të denoncimit, 28 Mars 2024.’ - thuhet në kërkesën e grupit parlamentar të PD.

Më tej Gazment Bardhi shprehet se është detyra jonë si deputet të Kuvendit të Shqipërisë, që të shqyrtojmë me përparësi këtë problematikë dhe të kërkojmë nga qeveria marrjen e masave të menjëhershme.

‘Prandaj, duke pasur parasysh sa më sipër, në mbështetje të nenit 98, pika 1, të Rregullores së Kuvendit, kërkojmë mocion për zhvillimin e debatit parlamentar mbi problematikën e prodhimit, shitjes dhe trafikimit të lëndëve narkotike në vendin tonë.’- përfundon shkresa e Bardhit.







Syri

[Albo]

Bardhi: Nuk i ndahemi mocionit me debat për Xibrakën



Kryetari i Grupit Parlamentar të PD, Gazment Bardhi tha në një deklaratë për mediat se demokratët do t’i qëndrojnë idesë për mocion me debat për çështjen e Xibrakës, ku ai pretendon se është i përfshirë vëllai i kryeministrit Rama, Olsi Rama.

Bardhi theksoi se mocion me debat është i detyrueshëm, ndërsa shtoi se kryetarja e Parlamentit duhet të propozojë një datë dhe brenda 30 ditëve nga momenti i paraqitjes duhet të zhvillohet.

“Mocioni jonë bazohej në të dhëna konkrete të raporteve ndërkombëtare që e listojnë Shqipërinë në krye të vendeve problematike, për transport droge, ishte terezish i bazuar në të drejtën për të kërkuar mocion në përputhje me rregulloren. Kur bëhet fjalë për drogë qytetarëve i shkon mendja tek vëllai i kryeministrit Rama, Olsi Rama dhe kur bëhet fjalë për Olsi Ramën janë gati të shkrijnë kuvendin e Shqipërisë, rregulloren e Kuvendit dhe kushtetutën. Sic shkrinë javën e kaluar për llogari të Olta Xhaçkës, shkrinë gjykatën kushtetuese.

Ne do t’i qëndrojmë mocionit që kemi paraqitur. E vetmja kompetencë që ka kryetarja e Kuvendit është të propozojnë një datë, por mocioni është i detyrueshëm brenda 30 ditëve nga momenti i paraqitjes.” – u shpreh Bardhi.

LAPSI

[Albo]

Olsi Rama paditi Bardhin pas akuzave për Xibrakën, SPAK nuk pranon kallëzimin: Nuk ka shpifje



SPAK nuk e ka pranuar kallëzimin e Olsi Ramës, vëllait të kryeministrit Edi Rama ndaj kreut të Grupit Parlamentar të PD-së, Gazment Bardhit. Prokuroria e Posaçme ka konstatuar se nuk ka asnjë shpifje dhe asnjë kallëzim të rremë. Për këtë arsye, Prokurori i Posaçëm Elvin Gokaj, ka vendosur mosfillimin e procedimit penal, për kallëzimin e paraqitur nga Olsi Rama. Ky i fundit kallëzoi Bardhin me pretendimin se ka shpifur ndaj tij, dhe se akuzat e demokratit janë në kontekst politik.

Disa javë më parë, Bardhi solli në vëmendje laboratorin e drogës që u zbulua në 2015 në Xibrakë, ku i bëri thirrje SPAK të rihapë hetimet, pasi ishte i përfshirë edhe Olsi Rama. Kreu i Grupit të PD në deklaratat e tij për çështjen, tha se automjeti me targa AA653DM, është përdorur disa herë, bashkë dhe veçmas nga Olsi Rama, vëllai i kryeministrit dhe anëtarët kryesorë të grupit kriminal të Xibrakës, Genci Xhixha, Ermal Hoxha dhe Gentjan Gjonaj.

Gjithashtu, Bardhi thotë se referuar të dhënave të TIMS, Rama e ka kaluar kufirin me të njëjtin automjet, 40minuta pas arrestimeve nga policia në Divjakë, dhe dyshohet se ka qenë ai që ka nxjerrë jashtë Shqipërisë, kryetrafikantin e drogës, Genci Xhixhën. Bardhi ka thënë se denoncimi dhe faktet e paraqitura nga ai nuk janë aspak politike por janë pjesë e dosjeve hetimore. Ai tha se referuar dosjes, përveç të arrestuarve, në hetime flitet edhe për një tjetër person të paidentifikuar, por që i përshkruhet mosha, pamja dhe targat e automjetit që përdor. Sipas tij të gjitha përkojnë me të dhënat e Olsi Ramës. Gjithashtu ai e akuzon edhe se ka sjellë në Shqipëri asokohe dy kolumbianëy Cesar Adolfo Avila Gutierrez dhe Walther Moren Morena, të cilët me njohuritë e tyre kimike bënë të mundur fillimin e procesit të përpunimit të kokainës.

LAPSI

[Albo]

Dosja Xibraka, sipas SPAK Gazment Bardhi nuk ka bërë kallëzim ndaj Olsi Ramës

Kallëzimi i Olsi Ramës ndaj Gazment Bardhit për shpifje bie pasi ky i fundit nuk ka bërë kallëzim penal ndaj vëllait të kryeministrit për lidhje me trafikantët e drogës.

Nga Blerina Gjoka


Deputeti Gazment Bardhi duke folur për gazetarët | Foto: LSA

Prokuroria e Posaçme Kundër Korrupsionit dhe Krimit të Organizuar (SPAK) ka marrë vendim për mosfillimin e hetimeve për kallëzimin e bërë nga vëllai i kryeministrit Edi Rama, Olsi Rama, ndaj deputetit Gazment Bardhi për “kallëzim të rremë” me arsyetimin se nuk provohet që Bardhi të ketë kryer një kallëzim ndaj tij.

“Nuk rezulton që nga ana e shtetasit Gazment Bardhi apo ndonjë përfaqësues i tij të jetë depozituar kallëzim penal pranë prokurorisë apo oficerit të policisë gjyqësore që të konsiderohet se është paraqitur kallëzim…” – thuhet në vendimin datës 17 prill të prokurorit Elvin Gokaj.

“Në këto kushte, përderisa nuk provohet se i kallëzuari e ka kryer faktin që është kallëzuar, atëherë nuk provohet as faji…”- arsyeton më tej prokurori.

Në fund të muajit mars Bardhi pretendoi publikisht se kishte kallëzuar penalisht Olsi Ramën për përfshirjen e tij në dosjen “Xibraka” duke publikuar dhe një shkresë dërguar Prokurorisë së Posaçme me titullin “informacion për fillimin e hetimeve penale ndaj shtetasit Olsi Rama”.

Sipas Bardhit njoftimi i organeve kompetente mbi një vepër penale përbën një kallëzim penal.

“Kallëzimi është njoftimi apo informimi i institucionit zyrtar nga një person për sjelljen e një personi tjetër”- tha ai gjatë një dalje për mediat duke shtuar se “unë mbaj përgjegjësi nëse kam çuar kallëzim të rremë”.

Duke iu referuar vendimit të SPAK për mosfillimin e hetimeve për kallëzimin e Olsi Ramës, Bardhi sugjeroi të enjten se ky vendim “konstatonte se nuk ka asnjë shpifje dhe asnjë kallëzim të rremë” nga ana e tij.

“Nuk ka ndodhur kurrë të kem bërë denoncim të pabazuar në të dhëna konkrete, fakte konkrete apo dokumente zyrtare”- tha ai në një njoftim publik, duke i kërkuar publikisht SPAK-ut që të nisë hetimet ndaj vëllait të Ramës mbi faktet e publikuara prej tij.

Lidhur me konstatimin e SPAK-ut se në fakt nuk kishte një kallëzim ndaj Olsi Ramës, një zëdhënës i Bardhit iu referua sërish shkresës së 29 marsit, nëpërmjet së cilës sipas tij “i dërgohet informacion SPAK për fillimin e hetimeve ndaj shtetasit Olsi Rama me qellim rihapjen e procedimit penal 335/1”.

“Pra dosja ekziston dhe provat janë në prokurori. Nuk regjistrohet kallëzim i ri në regjistrin e veprave penale, por merret vendim për heqjen e pezullimit ndaj procedimit 335/1 që ekziston”- tha në një njoftim, zëdhënësi Everest Dedaj.

Pak javë më parë Bardhi e akuzoi publikisht Olsi Ramën për lidhje me një organizatë kriminale të trafikut ndërkombëtar të kokainës në vitin 2014 dhe i bëri thirrje Prokurorisë që të rihapë hetimet për të verifikuar rolin e tij në dosjen e njohur të laboratorit të kokainës në Xibrakë.

Ai iu referua dokumenteve të Prokurorisë së Krimeve të Rënda dhe të dhënave të sistemit TIMS për të provuar, sipas tij, faktin se Olsi Rama ka përdorur gjatë vitit 2014 të njëjtën makinë me të dënuarit e tjerë të dosjes “Xibraka”, ku policia zbuloi atë kohë një laborator të përpunimit të kokainës në fshatin me të njëjtin emër.

Në mars të vitit 2016, Prokuroria e Krimeve të Rënda e ka ndarë më vete procedimin për bashkëpunëtorët e paidentifikuar, që sipas Bardhit, ishte vetëm një i tillë, i diktuar nga shërbimet e vëzhgimit si drejtues i makinës së mësipërme dhe i përshkruar në dokumentet e prokurorisë si “45-vjeçar me flokë të shkurtra”.

Vëllai i kryeministrit pretendoi në kallëzimin e tij kundër Bardhit se, akuzat ishin të pavërteta dhe se i kanë dëmtuar imazhin atij dhe familjarëve, por nga ana tjetër ai pranon se njihet me një prej anëtarëve të bandës të përmendur në akuzat publike të Bardhit.

Hetimi për grupin e përfshirë në laboratorin e prodhimit të kokainës në Xibrakë nisi në dhjetor 2014, pas informacioneve të mbërritura në Shqipëri nga autoritetet gjermane. Në janar 2015, Prokuroria e Krimeve të Rënda vuri nën akuzë 9 persona për trafikim të lëndëve narkotike dhe krijim të grupit të strukturuar kriminal.

Prokuroria e Krimeve të Rënda akuzoi Genci Xhixën si drejtues të grupit kriminal të përfshirë në laboratorin e kokainës, por ai nuk u arrestua asnjëherë nga policia. Anëtarët e grupit u dënuan me 104 vjet burg nga Gjykata e Krimeve të Rënda, por dënimet u lehtësuan në Apel dhe disa prej tyre, si në rastin e Ermal Hoxhës dolën më herët nga burgu për “sjellje të mirë”.

Në kërkesën e tij për SPAK, Bardhi kërkon rihapjen e procedimit penal të veçuar për të verifikuar “dyshimet e arsyeshme për përfshirjen në veprimtari të paligjshme të shtetasit Olsi Rama”.

BIRN

[Albo]

SPAK njofton rezultatet e një hetimi ndërkombëtar për mashtrime me Call Center

Në bashkëpunim me autoritetet e drejtësive të pesë vendeve të tjera, janë zbuluar 10 mijë raste mashtrimi me 'Call Center' të kryer nga një grup i strukturuar kriminal me qendër në Tiranë, që u ka sjellë qytetarëve evropianë një dëm prej 10 milionë euro.

Nga Edmond Hoxha


Ilustrim nga Jurgena Tahiri/BIRN

Prokuroria e Posaçme kundër Korrupsionit dhe Krimit të Organizuar, SPAK njoftoi të enjten më 2 maj se dy javë më parë është finalizuar një operacion ndërkombëtar i koordinuar në disa shtete evropiane, kundër krimeve të mashtrimit kompjuterik, nëpërmjet qendrave të thirrjeve Call Center.

“Hetimi ka filluar në dhjetor 2023, pasi policia gjermane, ka parandaluar një tentativë mashtrimi me dëm të mundshëm prej mbi 100,000 Euro, përmes një punonjësi të vëmendshëm të bankës. Nga numrat e telefonit të grupit të strukturuar kriminal, ka rezultuar në mbi dhjetë mijë raste të mashtrimit, me dëme në mbi 10 milionë Euro. Autoritetet hetuese nga Baden-Württemberg, kanë zbuluar me sukses atë që është ndoshta mashtrimi më i madh në Evropë në qendrat e thirrjeve”, citohet në njoftimin e SPAK.

Mbi bazën e kërkesës për ndihme juridike, SPAK ka regjistruar procedim penal në shkurt të këtij viti, ku nga hetimet e kryera janë identifikuar dy adresat e qendrës së thirrjeve dhe banesës së E.S., personit që dyshohet si drejtues i këtij aktiviteti, si pjesë e një rrjeti të qendrave të thirrjeve në katër shtete në Ballkan dhe Liban.

Nga kontrolli i qendrave të thirrjes dhe banesës së të dyshuarit si drejtues i aktivitetit në Tiranë, janë gjetur dhe sekuestruar gjashtë njësi kompjuterike Laptop; një njësi kompjuterike PC; 11 aparate telefoni celularë; dy monitorë kompjuteri; një USB; një pajisje monitorimi kamera sigurie; 10 110 Euro; tre Automjete; dy ora të markës “Ademars Piguet”; dokumente të ndryshme me të dhëna të viktimave dhe të funksionimit të këtij aktiviteti të kundërligjshëm; si dhe sasi lënde narkotike. Në njoftim sqarohet se me lëndë narkotike janë kapur dy shtetas të cilët po hetohen nga prokuroria e Tiranës.

Në këtë operacion janë përfshirë Eurojust; Europol; autoritetet e drejtësisë gjermane, shqiptare, kosovare, libaneze, serbe dhe të Bosnjë e Hercegovinës.

BIRN

[Albo]

I vëllai pranon që ka përdorur makinën e trafikantëve/ Rama: Fatmirësisht u rihap dosja për Olsin



Vëllai i Edi Ramës është paraqitur ditën e sotme në SPAK ku edhe ka pranuar para mediave se ka përdorur makinën e njërit prej trafikantëve të larobarit të kokainë së Xibrrakë.

Kryeministri në një reagim në X ka pranuar, pikërisht atë që pati deklaruar kreu i Grupit Parlamentar të PD, Gazment Bardhi, nisjen e hetimve ndaj Olsi Ramës. Hetime të cilat deri në momentin që Partia Demokratike kërkoi publikisht hapjen e tyre, ishin lënë pezull nga drejtësia dhe vëllait të Ramë i referoheshin si i “paidentifikuari rreth 45 vjeç”.

Në reagimin e tij, kryeministri Rama ka sulmuar sërish Gazment Bardhin se nuk ka bërë kallëzim për Olsin, por se fatmirësisht SPAK ka rihapur dosjen në të cilën flitet për “të paidentifikuarin 45 vjeçar” që tashmë e di gjithë Shqipëria se është vëllai i Edi Ramës.

Postimi i Ramës në X:

A ju kujtohet kur thoshte “kallzim more kallzim kam bërë” duke tundur ndenjësen mbi karrige?!

Kishte zbuluar një narkotrafikant në familjen time, që e kishte kallzuar në SPAK dhe aq shumë e bëri ajrin vrimë me gisht sa e detyroi narkosin e kallzuar, t’i bënte kallzim për kallzim të rremë.

Mirëpo ja që s’paska qenë kallzim i rremë sepse s’paska qenë fare hiç kallzim, po një tjetër kërcim i çingijes në prehërin e tutorit të ri lart në ballkon.

Orë të tëra në parlament, intervista të tëra nëpër kanale, tituj e fjali të tëra nëpër portale, pa asnjë turp e asnjë respekt për miletin që e kanë bërë si mish në pazarin e neveritshëm të kujeve e kuisjeve të tyre, dhe si përfundim një tallje e madhe për një kallzim që nuk ekziston!

Fatmirësisht SPAK-u megjithatë e ka rihapur dosjen e tundur nga çingija si dajre mbi prehërin e tutorit dhe le të presim deri në fund nëse do të gjejë provat e pretenduara nga çingija do të duhet t’i gjejë vendin gishtit të akuzës që e ka mbajtur aq shumë në ajër, për të argumentuar kallzimin e paqenë!



Syri

[Albo]

Thirrja në SPAK e Olsi Ramës, reagon Bardhi: Konfirmoi njohjen me trafikantët



Kryetari i grupit parlamentar të PD-së, Gazment Bardhi ka reaguar pas thirrjes së Olsi Ramës në SPAK.

Me anë të një reagimi në Facebook, Bardhi shkruan se, ‘Olsi Rama konfirmoi gjithçka që kam denoncuar’.

REAGIMI I KRYETARIT TË GRUPIT PARLAMENTAR TË PD, GAZMENT BARDHI

Të sillesh si budalla përpara derës së SPAK-u është një strategji e gabuar që nuk të shpëton nga e vërteta! Të thuash që ke përdorur makinën e trafikantëve të drogës, por trafikantët nuk i njeh, është një gënjeshtër banale.

Olsi Rama konfirmoi përpara derës së SPAK gjithçka kam denoncuar për të. Deklarimet e tij publike janë e vërteta më e madhe e kësaj çështjeje: “Një herë deklaroi se njeh njërin nga trafikantët, sot tha nuk njoh asnjërin. Një herë s’kam udhëtuar me narkomakinën, sot tha kam udhëtuar vetëm një herë”.

Por, sot vëllai i vogël i Edi Ramës gënjeu sërish publikisht kur tha se e ka përdorur vetëm njëherë narkomakinën AA 653 DM. Të dhënat zyrtare të sistemit TIMS dokumentojnë të kundërtën, se ai ka përdorur të paktën 7 herë narkoautomjetin AA 653 DM për daljet e tij jashtë vendit gjatë periudhës kur ndërtohej laboratori i drogës në Xibrakë.

Gënjeshtra e ditës dhe alibitë nuk janë as mjet mbrojtës dhe as zgjidhje. E vërteta ndodhet në procedimin penal 335/1-2016 që u tentua të varrosej nga prokuroria, por që sot mban numrin 88-2024! Inkurajoj SPAK t’i shkojë me guxim deri në fund të vërtetës, duke na provuar se në Shqipëri nuk ka persona të paprekshëm!

Syri

[Albo]

VIDEO/ Olsi Rama del nga SPAK: Makinën e mora për dy ditë të bëjë udhëtime, por nuk i njoh trafikantët e Xibrakës

Vëllai i kryeministrit Rama, Olsi Rama ka dalë nga ambiente e SPAK pak çaste më parë dhe ka dhënë një deklaratë për media ku është shprehur se nuk i njeh trafikantët e drogës së Xibrakës .

Rama ka akuzuar Gazmend Bardhin se ka manipuluar faktet, në lidhje me provat e nxjerra disa kohë më parë në media ku e implikonin me një grup kriminal të trafikut të drogërave të forta.

Disa javë më parë, Kreu i Grupit Parlamentar në Partinë Demokratike Gazmend Bardhi solli në vëmendje laboratorin e drogës që u zbulua në 2015 në Xibrakë, ku i bëri thirrje SPAK të rihapë hetimet, pasi ishte i përfshirë edhe Olsi Rama.

Kreu i Grupit të PD në deklaratat e tij për çështjen, tha se automjeti me targa AA653DM, është përdorur disa herë, bashkë dhe veçmas nga Olsi Rama, vëllai i kryeministrit dhe anëtarët kryesorë të grupit kriminal të Xibrakës, Genci Xhixha, Ermal Hoxha dhe Gentjan Gjonaj.

"Kam bërë kallëzim pasi kam konstatuar manipulim të fakteve në lidhje me akuzat ndaj meje. Unë nuk i njoh trafikantët e drogës së Xibrakës.

Unë ja kam marrë automjetin një e personi në atë kohë dhe kam shkuar në Selanik për dy ditë dhe vetëm aq.

Jam i gatshëm të vij në SPAK kurdo që të jetë nevoja." - U shpreh Rama.

Gazetari i SYRI TV, Fatjon Gjinaj në raportimin e tij është shprehur se bëhet fjalë se ka ardhur në SPAK për të marrë një material i vënë në dispozicion akte të cilat mund të jenë nga kallëzimet që ka bërë ndaj Bardhit për shpifje. Ai ka qëndruar jo më shumë se 5-6 minuta. Në hyrje të SPAK ai nuk kishte asnjë material por kur doli në dorë mbante një dosje e cila kishte mbishkrimin e SPAK.

Syri

[Albo]

SPAK, pushon për herë të dytë kallëzimin e Olsi Ramës kundër Bardhit. Vëllai i Ramës u njoh sot me vendimin

Është pushuar për herë të dytë radhazi kallëzimi penal që Olsi Rama, depozitoi në SPAK kundër kryetarit të Grupit Parlamentar të Rithemelimit Gazment Bardhi, të cilin e akuzonte për “Kallëzim të rremë”.

Gazment Bardhi, disa kohë më parë ka çuar në SPAK në formën e indicies një material hetimor të ish-Prokurorisë së Krimeve të Rënda, kur raportet e vëzhgimit të policisë kriminale kishin kapur vëllain e Edi Ramës, Olsi Ramës, që lëvizte me një automjet i cili besohej se përdorej dhe nga disa persona të përfshirë në trafikun e drogës.

“Ora News” ka mësuar nga burime brenda SPAK, se vendimi për mosfillimin e hetimeve është marrë nga prokurori, Sotir Kllapi, i cili mësohet se këtë vendimmarrje ia ka depozituar sot dhe Olsi Ramës, vëllait të kryeministrit Edi Rama.

Për herë të parë kallëzimi i Olsi Ramës kundër Bardhit, është mosfilluar në datën 17 Prill 2024, ku prokuropri i SPAK Elvin Gogaj, ka vendosur mosfillimin e procedimit penal.

Arsyetimi i prokurorisë së posaçme, ka qenë se Gazment Bardhi nuk ka bërë kallëzim, dhe në rast se nuk ka një kallëzim, nuk është targetin e SPAK, pasi kjo mund të zgjidhet në rrugë gjyqësore për shpifje apo cenim të imazhit.

Sipas Prokurorisë së Posaçme kjo çështje është kompetencë e gjykatës nëse një palë i drejtohet.

Olsi Rama kallëzoi Gazment Bardhin me pretendimin se ka shpifur ndaj tij në lidhje me përfshirjen e tij në grupin e kokainës së “Xibrakës”.

Por sapo është njohur me mosfillimin e hetimeve sërish Olsi Rama, i është drejtuar me një kallëzim të dytë, duke pretenduar dhe futur një provë të re që lidhet me një status të Gazment Bardhit të bërë më 8 maj në “Facebook”, ku kryetari i Grupit Parlamentar të Partisë Demokratike, thotë se SPAK e ka njoftuar zyrtarisht për rinisjen e hetimeve.

Por edhe pas këtij pretendimi prokurori i çështjes Sotir Kllapi, ka vendosur të mosfillojë hetimet lidhur me kallëzimin penal që Olsi Rama, kishte depozituar kundër Gazmend Bardhit.

VIDEO




ORA NEWS