Sali Berisha: Janë vjedhur 130 milion euro për djegësin e plehrave të Tiranës, që nuk ekziston fare!

[Albo]

Projekti i inceneratorit të Tiranës u propozua nga Erion Veliaj, thotë SPAK

Dosja hetimore e Prokurorisë së Posaçme tregon se projekti koncesionar i trajtimit të mbetjeve në Tiranë ishte një nismë e kryebashkiakut Erion Veliaj, e cila u kundërshtua nga ministri i Financave, Arben Ahmetaj. Pas projektit qëndronin sërish Klodian Zoto dhe Mirel Mërtiri.

Nga Ola Xama



Në janar të vitit 2016, kryetari i Bashkisë së Tiranës, Erion Veliaj i dërgoi një propozim qeverisë për mundësinë e përfshirjes së sektorit privat në fushën e menaxhimit dhe trajtimit të mbetjeve urbane të kryeqytetit, përmes një kontrate të partneritetit publik-privat, PPP.

Përmes një shkrese të dërguar në adresë të ministrit të atëhershëm të Financave, Shkëlqim Cani, Veliaj e mbështet idenë në një studim fizibiliteti të hartuar nga Korporata Financiare Ndërkombëtare, IFC, për PPP dhe një studim të Korporatës Ndërkombëtare Japoneze, JICA, për zgjerimin e venddepozitmit të mbetjeve në Sharrë.

“…kërkohet miratimi i Ministrisë së Financave për këtë nismë, e cila do të sigurojë një shërbim cilësor dhe sipas standardeve europiane për qytetarët dhe mjedisin në Tiranë,” thuhet në shkresën e kryebashkiakut Veliaj.

Kryebashkiaku Veliaj ka mohuar publikisht në të shkuarën se ka pasur rol aktiv në procedurat e koncesionit të mbetjeve në Tiranë, por dokumentet hetimore të Prokurorisë së Posaçme, të siguruara nga BIRN, tregojnë se Veliaj ishte nismëtari i këtij projekti dhe se propozimi i tij i hapi dritën jeshile koncesionit të inceneratorit të Tiranës.

Gjithsesi, propozimi i Veliajt u prit fillimisht me rrudhje vetullash në qeveri.

Hetimet e Prokurorisë tregojnë se fllimisht ministri Shkëlqim Cani dhe më pas Arben Ahmetaj u bënë barrikadë ndaj propozimit të bashkisë së Tiranës, duke sjellë si rezultat përfshirjen e Ministrisë së Mjedisit në procedura. Bashkë me Ministrinë e Mjedisit, në projekt u përfshi edhe Klodian Zoto.

Veliaj nuk iu përgjigj pyetjeve të BIRN deri në publikimin e këtij shkrimi.* Në një reagim dërguar 24 orë pas publikimit të shkrimit, kryetari bashkisë së Tiranës Erion Veliaj pretendoi se propozimi tij për PPP për trajtimin e mbetjeve në Sharrë ishte i bazuar në projektin e IFC-së ‘që ka nisur në kohën e Lulit' dhe nuk ka lidhje me kontratën koncesionare që po hetohet aktualisht nga SPAK.

“Për projektin e IFC, që e gjeta të kryer në Bashki me 37eu toni, i kam shkruar qeverisë dhe e ka refuzuar. Me të drejtë! Kohë më pas vjen propozimi i pakërkuar në qeveri i kësaj që sot është në SPAK!” shkruan Veliaj.

Refuzimi i Ahmetajt

Shkëlqim Cani u largua nga detyra e ministrit të Financave në shkurt të vitit 2016 dhe u zëvendësua nga Arben Ahmetaj. Kryebashkiaku i Tiranës, Erion Veliaj i dërgon shkresën me propozimin për ndërtimin me PPP të inceneratorit ministrit të ri.

Dosja hetimore zbulon se shkresa ka të njëjtën përmbajtje me atë të janarit, me shtesën e vetme ku thuhet se është dërguar edhe një studim fizibiliteti. Ahmetaj nuk e miraton propozimin pasi sipas tij: “mungon argumentimi nëse projekti i propozuar me PPP ka kosto më të lirë se në rastin se do të bëhej me prokurim publik me fondet e shtetit.”

Negociatat për miratimin e projektit i merr më pas në dorë Ministria e Mjedisit.

Një email i datës 2 mars 2016, i sekuestruar nga prokuroria në komjuterin e Klodian Zotos tregon se një punonjës i Ministrisë së Mjedisit, Vladimir Bezhani, i kishte dërguar atij një dokument me titull “Bashkia Tiranë”.

Dokumenti është një shkresë e ish-ministrit të Mjedisit, Lefter Koka drejtuar Erion Veliajt ku shpreh dakordësinë me propozimin e bashkisë së Tiranës dhe sugjeron ngritjen e një grupi pune të përbashkët. Bezhani i drejtohet Zotos me fjalët: “Shikoje dhe më thuaj nëse je dakord.”

Ministria e Mjedisit dërgon sërish në Ministrinë e Financave një argument se pse varianti PPP do të ishte më i lirë sesa prokurimi me fondet e shtetit, por refuzohet sërish. Sipas SPAK, argumenti u shkrua nga Klodian Zoto.

Drejtorja e Përgjithsme e Buxhetit në Ministrinë e Financave, Mimoza Dhëmbi argumentoi se projekt-vendimi kishte karakter individual dhe si i tillë ishte jashtë fushës së përgjegjësisë së Drejtorisë së Përgjithshme të Buxhetit.” Të njëjtin argumentim në refuzim përdori dhe ministri Ahmetaj në përgjigjen që i dërgon Ministrisë së Mjedisit.

Ahmetaj refuzon disa herë të tjera dhënien e miratimit si ministri përgjegjëse për tavanet buxhetore dhe implikimet financiare të projekteve në partneritet publik- privat me argumentin se nuk është e qartë se kush do të bëjë pagesat, me çfarë fondesh do të bëhet shpronësimi i tokës për zgjerimin e landfillit dhe se norma e kthimit të përhershëm të investimit (IRR) është llogaritur gabim 5%, kur në fakt rezulton të jetë 8%.

Këtë shkresë, punonjësja e Ministrisë së Mjedisit, Alba Thoma ia dërgon ish-sekretarit të Përgjithshëm të Ministrisë së Mjedisit, Alqi Bllako shoqëruar me tekstin “Ufffffffff”. Shkresën e dërgon më pas në emailin personal të saj dhe ia dërgon Klodian Zotos.

Zoto i dërgon më pas një email Alba Thomës në janar 2017, ku shkruhet “Përgjigje përfundimtare MF nga MM”.

Kjo përgjigje e shkruar nga Zoto do të përdorej për t'u dërguar në Ministrinë e Financave nga Ministria e Mjedisit dhe sqaronte se mbështetjen buxhetore për impiantin ta mbante qeveria qëndrore, duke qënë se bashkitë në qarkun Tiranë nuk kishin mundësi të përballon kostot.

Ministria e Financave refuzon sërish dhënien e miratimit.

Pas kësaj ideje, ministri Koka i dërgon një letër tjetër Arben Ahmetajt, ku sqaron se shpenzimet për shpronësimin e tokës dhe pagesat për mbetjet që përpunohen do të përballohen nga vetë bashkia me fondet e transfertave të pakushtëzuara që bën buxheti.

Ahmetaj kërkon shkresën e miratimit me shkrim nga qarku Tiranë, sipas modelit financiar që kishte dërguar Ministria e Mjedisit. Më 27 mars 2017, Erion Veliaj i dërgon miratimin sekretarit të Përgjithshëm të Ministrisë së Mjedisit, Alqi Bllako.

Ahmetaj refuzon ta miratojë derisa Ministria e Mjedisit ia dërgon me email shkresën e dhënies së miratimit nga Erion Veliaj. Ai më pas i hap rrugë procedurës duke u shprehur “pa komente”. Përgjigjja dërgohet 16 minuta më vonë nga Alba Thoma në adresën e emailit të Klodian Zotos. Sipas hetimit të SPAK, “Ahmetaj nuk e pengon këtë procedurë pavarësisht problemeve që ajo paraqiste”.

Zoto dhe Mërtiri pas inceneratorit të Tiranës

Dokumentat hetimore të Prokurorisë së Posaçme sugjerojnë se e gjithë procedura për marrjen e koncesionit të inceneratorit të Tiranës është drejtuar dhe koordinuar nga Klodian Zoto dhe Mirel Mërtiri dhe se pas premtimit të marrë nga zyrtarët, ata kanë nisur kërkimet për gjetjen e kompanive “prestigjoze” në fushën e menaxhimit të mbetjeve.

Gjatë administrimit të materialeve të gjetura në kompjuterin e Klodian Zotos, hetuesit kanë hasur një dokument të krijuar në datën 15 qershor 2016 me autor Vladimir Bezhanin, punonjës i Ministrisë së Mjedisit. Bëhet fjalë për një letër në gjuhën angleze, që pasi e kishte punuar Bezhani, Zoto e kishte modifikuar.

“Letra iu drejtohej Ministrit të Mjedisit, Lefter Koka dhe kryetarit të Bashkisë Tiranë, Erion Veliaj, ku parashtrohej se shoqëritë Energy Recuperator S.p.a; Demare S.r.l; Arcadis S.r.l; Paul Wurth S.a dhe ITS sh.p.k, të specializuara në ndërtimin e landfilleve, ndërtimin e inceneratorëve etj., paraqesin letër interesi për menaxhimin e integruar të mbetjeve të bashkisë Tiranë,” thuhet në dosje.

Dosja tregon se Zoto nuk hartoi vetëm letrën e interesit në emër të kompanive, por edhe kriteret që do të vendoseshin në garë, edhe pse oferta e pakërkuar kishte marrë pikë bonus. Në një email drejtuar Alba Thomës në prill 2017, Zoto shkruan: “Kam lënë disa komente, sepse duhet të plotësohen nga ju. S'kanë të bëjnë me kriteret.” Më pas Zoto angazhohet në gjetjen e kompanisë që do të mbushë kriteret e tenderit dhe ia dërgon miqve të tij të huaj.

Sipas SPAK, kompania koncesionare “Integrated Energy BV SPV ka ortak të vetëm kompaninë hollandeze “Integrated Energy BV” dhe në vitin 2017, drejtues kryesorë të saj ishin Klodian Zoto dhe Giuseppe Ciaffaglione, ky i fundit i shpallur në kërkim na drejtësia për aferën e inceneratorit të Fierit.

Oferta e kompanisë Integrated Energy BV SPV u klasifikua nga komisioni i Vlerësimit të Ofertave me 100 pikë nga 100 të mundshmet.

Dosja tregon rrugën se si Klodian Zoto dërgonte me email nenet e kontratës dhe përditësonte ish-sekretarin e Përgjithshëm, Alqi Bllako me vendime që merrte Këshilli Bashkiak Tiranë për kontratën.

Më 21 shtator 2017, në emailin e Zotos mbërrin një email me materiale nga Këshilli Bashkiak i Tiranës.

“Në brendësi ndodhej një shkresë – draft e Këshillit Bashkiak Tiranë, që autorizon kreun e bashkisë së Tiranës të firmosë angazhimet e njësive vendore të qarkut Tiranë konfrom kontratës së koncesionit të firmosur nga ministri i Mjedisit,” thuhet në dosje.


BIRN

[ATMAN]

o komandant , milionat e eurove jane zhdukur ne parasja fiskale ,keta edhe sikur te shkojne ne burg milionate vjedhura nuk gjinden me

[SERAFIM DILO]

Dmth nuk qenka fajtor Rama,fajtor na qenka Lali Eri, qe edhe ne banjo nuk shkon dot pa lejen e Rames. Pa perfshirjen e Rames çeshtja eshte pothuajse e mbyllur (eshte si per 21 janarin ku nuk u perfshi Berisha)

Milionat ATMAN gjinden pernjehere po te duan,gjen edhe me teper se çjan vjedhur per inceneratoret. Problemi eshte se po gjurmove milionat fillon e plas dinamiti

[ATMAN]

Dmth nuk qenka fajtor Rama,fajtor na qenka Lali Eri, qe edhe ne banjo nuk shkon dot pa lejen e Rames. Pa perfshirjen e Rames çeshtja eshte pothuajse e mbyllur (eshte si per 21 janarin ku nuk u perfshi Berisha)

Milionat ATMAN gjinden pernjehere po te duan,gjen edhe me teper se çjan vjedhur per inceneratoret. Problemi eshte se po gjurmove milionat fillon e plas dinamiti

Nuk ishte budalla enver hoxha qe I fuste plumbin ketyre qe kane vjedhur leket e popullit

[Albo]

VIDEO/ Elvi Fundo nxjerr dokumentet: Inceneratori i Tiranës ka ‘ngrënë’ 110 mln euro deri më tani

Gazetari Elvi Fundo, i ftuar në ‘A Shoë’ me Adi Krastën në SYRI TV ka treguar se fillimisht kontrata e inceneratorit të Tiranës ka qenë 10 mln dollarë në vit, por deri më tani për 6 vite janë paguar 110 mln euro.

Fundo ka prezantuar edhe një dokument që tregon se, Mirel Mërtiri dhe Stela Gugallja kanë krijuar një kompani me seli në Maltë, që ka në pronësi inceneratorin e Elbasanit.

‘Fillimisht kontrata e inceneratorit të Tiranës ka qenë 10 mln dollarë në vit, nga transferta e pakushtëzuar që qeveria i jep bashkisë së Tiranës. Pra rreth 300 mln do paguante shteti shqiptar në 30 vite.

Në fakt, të ardhurat në 6 vite sipas deklarimeve nga vetë kompania, edhe pse janë në fazë investimi janë rreth 105-110 milionë euro, sipas atyre që ka deklaruar vetë kompani, 26 mln euro janë vetëm në vitin 2021. Nëse do bëjmë një llogari të thjeshtë, vetëm nga qeveria janë marrë 60 mln dollarë dhe 50 të tjera janë paguar nga biznesi.

Kompania Polwurth ka një kontratë me kusht me Klodian Zoton, që do ti kthejë aksionet sapo të merret koncesioni. Pra është përdorur një markë për të marrë aksionet dhe me një kontratë tjetër ajo ja kthen në dhjetor.

Këtu kam një marrëveshje të Mirel Mërtirit me bashkëjetuesen e tij Stela Gugallja, që del sot për herë të parë. Ky është një dokument që tregon se si Stela Gugallja dhe Mërtiri, bëjnë një kompani e cila ‘CNGroup LTD’ e cila regjistrohet në Maltë e cila është në pronësi të Mirel Mërtirit. Inceneratori i Elbasanit shkon në Maltë tek Mireli, siç shkon Fieri, me radhë dhe Tirana.

Sot në QKB ka disa shtetas të huaj. Dokumentet tregojnë se gjithmonë pas tyre kanë qenë Klodi dhe Mireli. Italianët sot dalin pronarë, sërish si Polwurth e kanë kontratën me kusht. Sërish duhet të gjejnë një investim ‘x’ dhe pas shumë vitesh ikin’, tha Elvi Fundo në SYRI TV.



Video

Syri

[Albo]

Kulisat/ Si filloi përplasja Veliaj- Ahmetaj për Inceneratorin



Nëse termi vëllezërit armiq në PS do të përdorej për dikë, ai do t’i shkonte para së gjithash Erion Veliajt dhe Arben Ahmetajt. Brenda rrethit të ngushtë të rilindjes nuk ishte sekret se të dy politikanët urreheshin deri në neveri dhe i ruheshin si djalli temjanit njëri- tjetrit.

Por kjo ndjenjë armiqësie u bë më e fortë pasi u hapën fjalët se Ahmetaj qëndronte pas ‘tradhëtimit të shokëve’, e që nxirrte abuzimet tek inceneratori i Tiranës. Diku para zgjedhjeve të vitit 2021, ish presidenti Meta dhe bashkëshortja e tij në krye të LSI, Monika Kryemadhi, filluan të nxjerrin dokumenta të panjohura deri më atëhere që rrëfënin abuzimin e madh me inceneratorët. Njëri prej tyre ishte edhe ai që tregonte se kryebashkiaku i Tiranës kishte firmosur në tejkalim të kompetencave, duke anashkaluar Këshillin Bashkiak për t’i hapur dritën jeshile djegësit që do të ndërtohej në Sharrë.

Por megjithë këtë, ende para zgjedhjeve të përgjithshme, dyshimet nuk kishin rënë mbi Ahmetajn. Dhe megjithëse Erion Veliaj e urrente ministrin e Rindërtimit, ashtu sikurse e tregon edhe videoja e mëposhte ata i ruanin aparencat. Në një video në fushatë, kryebashkiaku ngre lart punën e socialistit, tashmë të shpallur në kërkim, për rindërtimin nga tërmeti dhe për sigurimin e vaksinave (këtu poshtë).

As Rama, dhe si rrjedhim as të tjerët, nuk kishin prova se tradhëtia kishte ardhur nga brenda. Kjo shpjegon dhe faktin se në kabinetin e tretë socialist, Arben Ahmetaj, me gjithë dyshimet, u gradua si numri dy i qeverisë. Pikërisht me këtë kohë përkon edhe tratativa e ish bosëve të inceneratorëve për t’u hakmarrë kundër Ahmetajt. Nuk dihet se në ç’mënyrë ata arritën ta bindin Ramën, por pa mbushur as një vit në detyrë, zv kryeministri u shkarkua në mënyrë të beftë.

Nga ky moment, të dirigjuara nga Viena, media shumë pranë qeverisë dhe bashkisë nisën denoncimin e Arben Ahmetajt. Ata zhvilluan një fushatë të ashpër mediatike për të goditur njeriun që për të “ruajtur prapanicën e vet kishte shitur shokët”. Pikërisht në këtë kohë, edhe Erion Veliaj doli hapur në urrejtjen që për shumë kohë e pati mbajtur përbrenda. Ai filloi të zbusë marrëdhëniet e vështira që kishte pasur me Belinda Ballukun, Damian Gjiknurin, madje dhe me Saimir Tahirin, vetëm për t’u përqëndruar tek armiku kryesor.

Kur në mars të këtij viti Saimir Tahiri doli përkohësisht nga burgu për të marrë pjesë në varrimin e të atit, Veliaj i shkoi për ngushëllim. Dëshmitarët e këtij takimi i kanë treguar Lapsi.al se të dy rivalët e dikurshëm i kishin hedhur pas krahëve kohët e vjetra sepse ishin bashkuar në pikturimin me ngjyra të errëta që i bënin Ahmetajt. Edhe ky i fundit e pati kuptuar këtë. Kur në një intervistë në “Opinion” ai u pyet nga Fevziu për inceneratorin e Tiranës, përgjigjja ishte plot helm: “për Veliajn pyesni kryeministrin”.

Edhe sot kur Ahmetaj është shpallur në kërkim ndërkombëtar dhe fati i tij politik duket se nuk ka më kthim pas, beteja nuk ka mbaruar. Në oborrin e afërt të Veliajt janë të bindur se ish miku që tradhëtoi Zoton dhe Mërtirin po përdor influencën e tij nga larg për të çuar vëmendjen drejt abuzimeve që janë kryer në inceneratorin e Tiranës. Madje mediat që mbrojnë Veliajn po akuzojnë edhe disa opozitarë dhe gazetarë se luajnë për llogari të Ahmetajt dhe përqëndrohen vetëm te Tirana.

Klanet e rilindjes janë ndarë në dysh. Njëra palë pompon vetëm një gjysëm të vërtetë: atë se Ahmetaj e kundërshtoi inceneratorin e Tiranës dhe se garancinë për ta paguar atë e mori përsipër Veliaj. Pala tjetër pretendon një gjysëm të vërtetë të kundërt: atë se gjithçka është iniciuar nga shoku i dikurshëm i Zotos dhe Mërtirit. Dhe kjo betejë Veliaj- Ahmetaj duket se do vazhdojë, jo për të debatuar nëse është vjedhur apo jo, po për të treguar se cili është hajduti më i madh në majën e pushtetit.

Lapsi

[Albo]

Skandali/ Veliaj gënjen nën betim për firmën e hedhur pro inceneratorit



Kryebashkiaku i Tiranës Erjon Veliaj është kapur sot në krim që dënohet deri me dy vjet burg, duke gënjyer në dëshminë e tij para komisionit hetimor. Në debatin e tij me kryetaren e komisionit Jorida Tabaku, ai është munduar të dredhojë gjatë duke përmendur proceset që ka fituar ndaj Tabakut, duke nxjerrë kontratat e Lulzim Bashës kur drejtonte Tiranën, duke u fshehur për dy standartet e drejtuesve lokalë demokratë në qytete të tjera, por duke refuzuar më shumë se gjysëm ore ti përgjigjet një pyetje të thjeshtë: “Pse ka tejkaluar kompetencat e këshillit Bashkiak, për ti hapur rrugë ndërtimit të inceneratorit të Tiranës dhe duke firmosur vetë ersonalisht për një gjë që nuk i takonte”.

Dhe i gozhduar pasi kjo pyetje iu përsërit mbi 20 herë ai u detyrua të nxirrte një dokument tjetër, në vend të atij që i kërkoohej për të thënë që si kruebashkiak kishte vepruar me miratimin e këshillit.

Kur mbaroi debati i zjarrtë Jorida Tabaku tha: “Veliaj genjeu ne betim. Gjatë përgjigjeve ai iu refererua një vendimi te Keshilli Bashkiak të muajit shtator 2017, nderkohe qe me nënshkrimin e tij i ka hapur rruge Inceneratorit që në mars 2017 (shiko poshtë dokumentin origjinal)”.

Pra për të mbrojtur firmën e tij të paligjshme Erion Veliaj lexoi një dokument tjetër që kishte lidhje me buxhetin e bashkisë dhe jo me miratimin e projektit për inceneratorin.



Nisur nga ky debat i nxehtë, Lapsi.al është përpjekur të spjegojë se pse kjo shkresë dhe ky nënshkrim u kthyen në mollë sherri?

Për të kuptuar këtë duhet njohur pak historia e kësaj afere. Kompania ‘Integrated Energy BV u angazhua që do të ndërtonte djegësin e Tiranës i cili do të financohej nëpërmjet një tarife për incenerimin e mbetjeve nga njësitë e qeverisjes vendore të qarkut Tiranë.

Sipas të dhënave të mëvonshme që nxori Kontrolli i Lartë i Shtetit dhe i bëri publike opozita, kjo qe një ndërmarrje korruptive që do ti kushtonte publikut shqiptar tre fish më shtrenjtë. Po cili qe roli i Veliajt në këtë ‘grup të strukturuar” që dyshohet se ka ndyer duart në një grabitje?

Me qëllim përshpejtimin e ndërtimit të kësaj vepre, që i jepte më shumë para të arrestuarve që sot janë në kërkim, Stela Gugalla dhe Klodian Zoto Erion Veliaj ka tejkaluar kompetencat e tij duke marrë edhe ato të këshillit bashkiak. Sipas raportit të Kontrollit të Lartë të Shtetit, që ka lexuar Lapsi.al, Veliaj nuk e ka tagrin për ta miratuar projektin, pasi ai vetëm e propozon buxhetin e bashkisë, i cili miratohet nga Këshilli Bashkiak. “Angazhimi për dakordësinë duhet të përfshijë marrjen e vendimit nga Këshilli Bashkiak përkatës, si autoriteti kompetent për miratimin e buxhetit, ndërkohë që aprovimi është dhënë nga autoriteti i kryetarit të Bashkisë që ka për kompetencë vetëm propozimin e buxhetit në këshill,” thekson KLSH.

Pra për akuzën se ka firmosur në një shkresë pa marrë miratimin e Këshillit bashkiak Veliaj del krejtësisht zbuluar dhe ky ekspozim i tij bëhet edhe më i rëndë, kur ai mundohet, që për të mbrojtur këtë shkelje, gënjen në dëshminë para komisionit hetimor parlamentar.

“Pra ju keni nënshkruar personalisht dhe firma juaj është bërë shkak që të ngrihet një koncesion që kushton 90 milionë euro për 30 vjet. pa e pyetur këshillin bashkiak. Ju pretendoni se e kane marrë miratimin e tij në shtator, por atëherë kjo nuk kishte asnjë vlerë, sepse atëhere kontrata për inceneratorin qe firmosur dhe ngritja e tij ishte bërë fakt” i tha deputeti Belind Këlliçi.

Kaq do të mjaftonte që po të kishim një SPAK të pavarur dhe një një drejtësi që kryebashkiaku e përdor si pas nevojave të tij, prokurorët të trokisnin në zyrën një derën njeriu që është bërë pjesë në një mega aferë që do ti kushtojë publikut diçka më pak se 500 milionë euro. Këtij nënshkrimi Erion Veliaj i shtoi këtë të martë edhe një gënjeshtër nën dëshmi.

Lapsi

[Albo]

Inceneratori i Tiranës/ Dyshimet që ngre vonesa e SPAK



Vendimi i SPAK për vënien në sekuestro të inceneratorit të Tiranës, pas gati 6 vitesh nga operimi i tij, ka ngjallur reagime të ndryshme mbi fatin e mega aferës korruptive më të madhe në historinë e Shqipërisë dhe kokave që e projektuan atë.

Nisur nga disa lëvizje të forta të kohëve të fundit, të shumtë janë ata që shpresojnë se me hetimin për djegësin e Tiranës, SPAK më në fund po shkon drejt kupolës që ideoi, bashkë me disa biznemsmenë tashmë të shpallur në kërkim, grabitjen spektakolare të dhjetra milionë eurove. Ka të tjerë, më pak entuziastë, që këtë vendim të vonuar të SPAK e shohin si një veprim “më mirë vonë se kurrë”, i cili së paku po i vë një tampon hemoragjisë financiare që po rëndon buxhetin dhe taksapaguesit. Deri tani, shuma totale e pagesave për dy bosët në kërkim, Zoto e Mërtiri, ka shkuar në mbi 100 milion euro.

Pikërisht vonesa e SPAK për të ndalur sa më parë këtë hemoragji të frikshme, ndërkohë që faktet dhe indiciet për një aferë korruptive ishin evidente dhe pronarët e vërtetë të shpallur në kërkim, ka ngritur dyshimin tek pjesa skeptike që vendimin për sekuestro e lexojnë si një hetim që mund të mbyllet tek gropa e Sharrës pa shkuar tek përgjegjësit e vërtetë.

Përveç denoncimeve nga opozita dhe media, SPAK ka patur në duar, të paktën prej një viti e gjysëm, një raport të KLSH që hedh dyshime të forta dhe rendit fakte, se inceneratori i Tiranës ka qenë që në gjenezë një vepër korruptive. KLSH ka konstatuar se projekti ka rezultuar që në fillim i papërballueshëm për buxhetin e shtetit, ndërsa bashkisë Tiranë nga viti 2018 i janë dyfishuar kostot e pastrimit të qytetit, pikërisht për shkak të pagesave që ajo duhet t’u bënte inceneratorëve. Bashkia Tiranë ka paguar vetëm për periudhën 2018- 2020, 26.5 milionë euro) shtesë, krahas kostos së pastrimi prej 3.9 miliardë lekësh.

Sipas këtij raporti, prej vitit 2018 deri aktualisht, bashkia Tiranë dhe ministria e Industrisë dhe Energjisë janë duke paguar tarifën prej 29 euro/ton mbetje urbane për incenerimin e mbetjeve për një shërbim ende të pakryer, duke qene se inceneratori ende nuk është përfunduar si objekt industrial për djegien e mbetjeve urbane. “Aktualisht çmimi i paguar 29 euro/ton nuk është çmimi real i shërbimit që kryhet, pasi kjo tarifë përfshin edhe incenerimin e mbetjeve, proces i cili nuk është kryer deri me sot. Pavarësisht mos kryerjes të procesit të trajtimit të mbetjeve, Bashkia Tiranë ka vijuar të kryejë pagesat e plota të tarifës për këtë shërbim”, thotë KLSH.

Do të mjaftonte ky fakt, që SPAK të kishte ndërhyrë shumë kohë më parë, për më tepër kur bosët e djegësave të Elbasanit dhe Fierit ishin të njëjtët që qëndronin edhe pas inceneratorit të Tiranës. Atë që e dinin të gjithë, SPAK e deklaroi sot si zbulim të hetimit që kishte kryer.

Nuk ka qenë aq e vështirë për të kuptuar lëvizjet e bosëve të inceneratorëve për të kamufluar pronësinë mbi djegësin e Tiranës, që ende nuk është ndërtuar. Në 31 korrik 2017, kontrata u lidh mes qeverisë shqiptare dhe kompanisë Integrated Energy BV SPV shpk, e themeluar vetëm 24 orë përpara nënshkrimit të kontratës. Kjo shoqëri zotërohej nga një shoqëri e regjistruar ne Regjistrin Tregtar Holandez. Klodian Zoto rezultonte Administrator dhe Përfaqësues i Shoqërisë Holandeze për periudhën 2016 deri 2018. Shoqëria zotëruese (e regjistruar në Holandë) ka ndryshuar emrin në 2020 nga Integrates Energy BV ne Geonix BV.

Pronar përfitues, Kompania e Biznesit që zbaton kontratën koncesioanre është shoqëria Integrates Energy BV SPV, e themeluar në 30 gusht 2017. Shoqëria zotërohet nga një Shoqëri e regjistruar në Regjistrin Tregtar në Holandë. Në ekstraktin e pronarit përfitues të dorëzuar pranë Qendrës Kombëtarë të Biznesit zotërues të shoqërisë rezultojnë tre shtetas italianë dhe francezë. Pronesia finale nga 2016 deri 2022 reflekton disa ndryshime me konfigurim final të ndryshëm nga konfigurimi 2016.

Të gjitha këto të dhëna janë të dokumentuara dhe SPAK-ut do t’i mjaftonte të hetonte se përse autoriteti përgjegjës nuk kishte reaguar mbi ndryshimin e pronësisë së kompanisë që kishte fituar një kontratë 30 vjeçare me Propozim të Pakërkuar, me një vlerë 336.6 milion euro.

Veç faktit evident se bashkia Tiranë vazhdon e paguan koncesionin me 29 euro për ton, ndërkohë që nuk bëhet procesi i incenerimit, veç faktit se ndryshimi i pronësisë për të humbur gjurmët e përfituesve të vërtetë është neglizhuar nga ministria përkatëse, SPAK mund t’i referohej raportit të KLSH edhe mbi një shkelje të rëndë, ajo e miratimit të projektit pavarësisht kostove të papërballueshme buxhetore.

KLSH, një vit e gjysëm më parë, arriti në përfundimin se mungesa e vendimmarrjes së ministrisë së Ekonomisë dhe Financave, në cilësinë e vlerësuesit dhe miratuesit paaraprakisht të të gjitha projekteve koncesionare nga pikëpamja e implikimeve fiskale, për rastin e “Integrated Energy B.V” shpk, për incineratorin e Tiranës, “shpreh në mënyrë eksplicite papërballueshmërinë dhe/ose paqëndrueshmërinë si edhe ndërmarrjen e angazhimeve publike që rrezikojnë në mënyrë të konsiderueshme përballueshmërinë dhe efektivitetin e projektit”. Dhe këtu është fjala për refuzimin e dy ministrave të Financave, Cani dhe Ahmetaj. Ky i fundit refuzoi disa herë të tjera dhënien e miratimit si ministri përgjegjëse për tavanet buxhetore dhe implikimet financiare të projekteve në partneritet publik- privat me argumentin se nuk është e qartë se kush do të bëjë pagesat, me çfarë fondesh do të bëhet shpronësimi i tokës për zgjerimin e landfillit dhe se norma e kthimit të përhershëm të investimit (IRR) është llogaritur gabim 5%, kur në fakt rezulton të jetë 8%.

Sipas vetë hetimeve të SPAK për “dosjen Ahmetaj”, pas refuzimit të këtij të fundit, ministri Koka i dërgon një tjetër letër, ku sqaron se shpenzimet për shpronësimin e tokës dhe pagesat për mbetjet që përpunohen do të përballohen nga vetë bashkia me fondet e transfertave të pakushtëzuara që bën buxheti. Ahmetaj kërkon shkresën e miratimit me shkrim nga të gjitha njësitë bashkiake të qarkut Tiranë, sipas modelit financiar që kishte dërguar ministria e Mjedisit dhe më 27 mars 2017, Erion Veliaj i dërgon miratimin sekretarit të Përgjithshëm të Ministrisë së Mjedisit, Alqi Bllako. Ahmetaj refuzon ta miratojë derisa ministria e Mjedisit ia dërgon me email shkresën e dhënies së miratimit nga Erion Veliaj. Ai më pas i hap rrugë procedurës duke u shprehur “pa komente”.

Pra është e qartë prej fillimit, se aktorët e përfshirë në këtë mega aferë, kanë qenë në dijeni të plotë të shkeljeve ligjore dhe implikimeve financiare. Ato fillojnë që me mënyrën se si u bë gara për djegësin e Tiranës, si iu dha bonusi kompanisë fituese që u regjistrua një ditë para lidhjes së kontratës, si u pranua monopoli i “dy klodërve” që kishin marrë me PPP edhe Elbasanin e Fierin. Pastaj vazhdojnë me gjetjen e rrugëve abuzive për të garantuar pagesat kolosale nga bashkitë e qarkut Tiranë dhe me pagesën grabitqare të 29 eurove për ton, ndërkohë që procesi i incenerimit nuk ndodh as sot, gjashtë vite pas lidhjes së kontratës. Dhe në fund, me mbylljen e syve përpara kompanive guackë të Hollandës, me qëllimin që paratë të vazhdonin të rridhnin drejt pronarëve në kërkim dhe bosëve të vërtetë të kësaj vjedhje epike.

Fiks gjashtë vite më pas, SPAK zbuloi sot se “nga provat e marra gjatë hetimit ka rezultuar se, shtetasit Klodian Zoto dhe Mirel Mërtiri kanë përdorur persona dhe shoqëri të tjera për të fshehur gjurmët si pronarët e vërtetë të shoqërisë koncesionare “Integrated Energy B.V SPV” shpk”. Eshtë pikërisht kjo zvarritje e gjatë, ndërkohë që të gjitha indiciet e grabitjes ishin të ekspozuara publikisht, që ngre dyshimet se për inceneratorin e Tiranës, SPAK është treguar më i “kujdesshëm” seç duhet deri në vendosjen e sekuestros, pavarësisht hemoragjisë financiare. A kanë bërë llogari politike prokurorët, duke parashikuar se afera e Tiranës mund të shkaktojë tronditje fatale për mazhorancën? A e kanë shtyrë ata “sekuestron preventive” pas zgjedhjeve të 14 majit (ndërkohë që vetëm këtë vit kanë rrjedhur dhe plot 16 milion euro të tjera në Sharrë)? A do ta çojnë tashmë ata këtë hetim deri në fund apo ai do qëndrojë pezull vetëm mbi sekuestron, për t’u keqpërdorur kësisoj në luftën politike brenda organizatës së Rilindjes?

Siç ka treguar sot se Klodian Zoto dhe Mirel Mërtiri janë pronarët pas koncesionit të Tiranës, SPAK ka sfidën t’u zbulojë shqiptarëve se kush janë pronarët e vërtetë të vetë Zotos dhe Mërtirit.

Lapsi

[Albo]

Si e mbrojti Rama me Veliajn djegien e miliona eurove tek inceneratori i Tiranës



Me sekuestrimin e inceneratorit të Tiranës, prokurorët e SPAK nuk ndalin djegien e plehrave, sepse kjo nuk ka ndodhur asnjëherë, por kanë ndalur “djegien” e parave që paguheshin për gjoja djegien e plehrave. Shumat e parave të paguara deri tani nga buxheti i shtetit janë marramendëse.

Qytetarët e Tiranës paguajnë 29 euro për një ton të groposjes së plehrave. Pagesa është e lartë sepse llogarit kostot sikur plehrat digjen dhe sikur në Sharrë prodhohet energji, gjë që nuk ka ndodhur asnjëherë.

Që nga fillimi, pagesat progresive për të tre inceneratorët, Elbasanit, Fierit dhe Tiranës, kapin vlerën totale 11 miliardë lekë ose (103 mln euro) deri në fund të qershorit 2023, sipas të dhënave zyrtare nga Thesari i Ministrisë së Financave që janë raportuar nga “Open Data Albania”.

Financimi progresiv për inceneratorin e Tiranës ka arritur deri në fund të qershorit te këtij viti 5,6 miliardë lekë, ose “52.6 mln euro”.

Disa muaj më parë, kur gazetarët e pyetën se përse nuk e sekuestronte inceneratorin, për të ndalur paratë që paguheshin, kreu i SPAK, Altin Dumani u përgjigj se nuk ishin identifikuar ende pronarët realë të inceneratorit. Një ndërhyrje e prokurorisë mund të kishte kosto në arbitrazh, sqaroi ai.

Por dosja për Arben Ahmetajn i ka dhënë përgjigje shumë enigmave mbi inceneratorin e Tiranës. Që në fillim, pas kësaj afere kanë qenë të njëjtët njerëz, Lefter Koka, Arben Ahmetaj, Klodian Zoto, Mirel Mërtiri etj. Gjatë procedurave shtohet edhe Erjon Veliaj që e nxit projektin edhe duke firmosur vetë një dokument kontrovers.



Gjetjet e prokurorëve për inceneratorin e Tiranës

Dosja e arrestimit të Arben Ahmetajt ka një kapitull të veçantë që trajton shkeljet e koncensionit për inceneratorin e Tiranës. Aty saktësohet se si devijoi kërkesa fillestare e Veliajt për ngritjen e një landfilli tek vendimi i përbashkët me Lefter Kokën për të ndërtuar një incenerator. Hetimet zbulojnë se si pas procedurave për ngritjen e inceneratorit të Tiranës ishte gjithnjë Klodian Zoto që mbante marrëdhënie të ngushta me Klodian Mërtirin dhe Arben Ahmetajn.

Dosja zbulon se Klodian Zoto ishte në komunikim fillimisht me vartësit e Lefter Kokës dhe më pas me vartësit e Erjon Veliajt për vendimet e Këshillit Bashkiak të Tiranës në lidhje me inceneratorin. Në dosje thuhet se drejtori i bashkisë, Taulant Tusha, bashkëpuntor i ngushtë i Veliajt komunikoi direkt me Klodian Zoton për procedurat e inceneratorit. “Më datë 17:5:2018 në orën 16:30 shtetësja Jonida Halili i ka përcjellë email shtetasit Taulant Tusha me titull “landfill” dhe ky email i është përcjellë nga Taulant Tusha shtetasit Klodian Zoto më datë 21:05:2018 ora 10.12. Bashkalidhur është një dokument tabelor me emërtimin “Plani i financimit të landfillit të Sharrës”.

SPAK trajton edhe firmën e Veliajt në dokumentin e Marsit të vitit 2017, me të cilën Kryetari i Bashkisë jep miratimin për të paguar 91 milion euro pa marrë më parë miratimin e Këshillit Bashkiak. Mbi bazë të atij dokumenti u bë edhe miratimi i kontratës.

Kur Ahmetaj mori dokumentin me firmën e Veliajt ai e kaloi konçensionin duke shkruar aty “pa koment”. Por në dosjen e SPAK, prokurorët kanë shkruar se “personi nën hetim, Arben Ahmetaj nuk e pengon këtë procedurë pavarësisht problemeve që ajo paraqiste”.

Në dosje trajtohet edhe procedura se si kompania e Klodian Zotos “Integrated Energy B.V sh.p.k” mori një bonus nga komisioni për koncensionin dhe ky bonus u miratua pastaj nga disa ministri, u miratua edhe me vendim të Këshillit të Ministrave edhe pse kompania nuk ekzistonte fare.

Kontrolli i Lartë i Shtetit ka konstatuar se projekti i inceneratorit të Tiranës ka rezultuar që në fillim i papërballueshëm për buxhetin e shtetit, ndërsa Bashkisë së Tiranës nga viti 2018 i janë dyfishuar kostot e pastrimit të qytetit, pikërisht për shkak të pagesave që ajo duhet t’u bënte inceneratorëve.

Klodian Zoto, Klodian Mërtiri dhe Arben Ahmetaj janë shpallur në kërkim dhe kontratat e nënshkruara janë thyer tashmë pasi nuk i kanë zbatuar afatet për ndërtimin e impianteve. Kompanitë që deri dje paguheshin sistematikisht me taksat e shqiptarëve ka ngritur skema pastrimi krejtësisht të pasofistikuara kanë zbuluar hetimet e SPAK.



Si e mbrojti Rama dhe Veliaj vjedhjen tek inceneratori i Tiranës

Veliaj dhe Rama kanë qenë gjithnjë dakort se pagesat për inceneratorin e Tiranës duhet të vazhdojnë pavarësisht se dihej botërisht se kjo ishte një skemë korrupsioni. Kur deputetët e opozitës i kujtonin se paratë shkonin tek personat në kërkim, Rama mjaftohej duke thënë se “Tirana paguan shërbimin”. “Tirana është befasisht e pastër. Doni të bëjmë një provë. Është një provë që se bëjmë dot. Të ndalojmë pagesat për tre ditë e të shihni se ca ndodh me Tiranën. Sepse atje zhvillohet operacion i përditshëm i grumbullimit dhe trajtimit të mbetjeve. Paguajmë shërbimin”, shprehej Rama.

Kur Klodian Zoto, Mirel Mërtiri dhe Stela Gugallja u shpallën në kërkim, atëherë Ministrja e Infrastrukturës Belinda Balluku tha se pagesat do të vazhdojnë me arsyetimin se: “Në rast se ne nuk zbatojmë kontratat, nga ana e ligjit tregtar të kontratës, ne do t’i krijonim Republikës së Shqipërisë një dëm të tillë që me siguri do të përgjigjeshim në Arbitrazh”.

Ministrja e Financace Delina Ibrahimaj po ashtu ka thënë se pagesat do të vazhdojnë sepse nuk ka një vendim gjyqësor për përfituesit e inceneratorëve. “Pjesë e tyre kanë qenë edhe nënkontraktorë që janë në proces hetimi dhe nuk janë dërguar në gjykatë. Këto janë subjekte të hetimit. Nuk ka vendim përfundimtar. Ne respektojmë kontratën dhe do të vijojmë ta bëjmë” tha Ministrja e Financave Delina Ibrahimi.

Ndërkohë Erjon Veliaj ka qenë njësoj shpërfillës për faktin se paratë paguheshin por vidheshin sepse në Sharrë as nuk bëhej djegie e plehrave, as nuk kishte incenerator.

“Cili është në kërkim dhe kush është pronari s’është problemi im”, tha Veliaj. “Ka një supervizor privat, sot është në burg, se ai duhet ta kontrollonte. Kontratën ka detyrë supervizori ta monitorojë. A është Tirana më e pastër? A paguajmë më pak, kaq i intereson qytetarët”, shprehej Veliaj në prill të këtij viti në një emision televiziv.

Por vendimi i Altin Dumanit për të ndalur kalimin e parave për një shërbim që nuk paguhej, tashmë i ka vënë para faktit të kryer si Ramën dhe Veliajn, që duhet të shpjegojnë se përse e kanë mbrojtur kalimin e parave tek Klodian Zoto.

Lapsi

[Albo]

SPAK “gjen” pronarët e inceneratorit të Tiranës. Vendos sekuestron. Veliaj në telashe



Më në fund Kutia e Pandorës është hapur dhe SPAK ka “zbuluar” se pronarët e inceneratorit të Tiranës janë të njëjtët Klodë, Zoto dhe Mërtiri, që tashmë janë shpallur në kërkim për dy djegësit e Elbasanit dhe Fierit. Me kërkesë të Prokurorisë së Posaçme, gjykata ka vendosur sekuestron edhe mbi veprën e tretë korruptive të pastrimit të mbetjeve.

Prokuroria e Posaçme Antikorrupsion bëri me dije në një komunikatë se po heton në kuadër të procedimit penal për veprat penale të “Mashtrimi me pasoja të rënda”, në bashkëpunim, “Shpërdorimi i detyrës”, “Korrupsioni pasiv i funksionarëve të lartë shtetërorë ose i të zgjedhurve vendorë”, ndërsa bën me dije se “de facto” biznesmenët në kërkim Mirel Mërtiri dhe Klodian Zoto janë pronarët e inceneratorit. “Nga provat e marra gjatë hetimit ka rezultuar se, shtetasit Klodian Zoto dhe Mirel Mërtiri kanë përdorur persona dhe shoqëri të tjera për të fshehur gjurmët si pronarët e vërtetë të shoqërisë koncesionare “Integrated Energy B.V SPV” sh.p.k” thuhet në njoftimin e shpërndarë për mediat.

SPAK vë në sekuestro inceneratorin e Tiranës
Pak ditë më parë një investigim i BIRN, nxori në dritë edhe rolin që pati luajtur kryebashkiaku Erion Veliaj në këtë konçesion duke u berë iniciuesi, mbështetësi dhe financuesi i tij nga fondet e bashkisë. Burime të Lapsi.al bënë me dije se pasditen e së mërkurës, në 26 korrik, kryebashkiaku është thirrur dhe është marrë në pyetje për tre orë nga prokurorët e SPAK. Ende nuk dihet se cili ka qenë interesi i hetuesve sepse e gjitha është mbajtur “Top sekret” dhe larg syrit të mediave sipas një “deal-i” paraprak të bërë mes shefave të SPAK dhe Veliajt.

Dosja e SPAK/ Si u fut Erion Veliaj në skemën e inceneratorëve
Reporterët e Lapsi.al e patën të pamundur të merrnin një konfirmim mbi këtë temë dhe prandaj lajmi nuk u botua deri më sot. Por në njoftimin e sotëm të SPAK thuhet shprehimisht se mbi këtë çështje po hetohen edhe të zgjedhurit lokalë të bashkisë së Tiranës. Prokuroria po heton krimet e mundshme si “Shpërdorimi i detyrës”, “Korrupsioni pasiv i funksionarëve të lartë shtetërorë ose i të zgjedhurve vendorë”, gjë që e komplikon situatën e Veliajt.

Komenti nga Andi Bushati ne Lapsi Videos



Inceneratori i Tiranës ka qenë deri më tani një mollë e ndaluar për drejtësinë. Ndonëse media dhe opozita e kanë ngritur zërin me forcë për rreth 80 mijë euro në ditë (shuma totale e pagesave ka vajtur mbi 100 milionë) që vazhdonin t’i paguheshin dy bosëve në kërkim, Zoto dhe Mërtiri, prokuroria nuk e kishte vënë ujin në zjarr. Ngritja në krye të institucionit e Altin Dumanit duket se i ka përshpejtuar gjërat, dhe tani kështjella e korrupsionit të cilën e mbronin me fanatizëm rilindasit është vënë më në fund në sekuestro.


Lapsi

[Albo]

Dumani si vartës i Ramës/ Inceneratorit fantazmë të Tiranës nuk i ndalet pagesa



29 euro për ton. Kaq paguajmë për procesin e trajtimit të mbetjeve në inceneratorin e Tiranës, në Sharrë. Teorikisht mbetjet riciklohen, kapsulohen dhe digjen në temperatura shumë të larta.

Praktikisht, inceneratori nuk ekziston. Mbetjet thjesht groposen në Sharrë dhe mbulohen me dhe.

Meqënëse i paguajmë paratë kot dhe meqënëse janë futur në burg ish-ministra, ish-deputetë, zyrtarë shtetërorë dhe janë shpallur në kërkim pronarët e inceneratorëve, gazetarët interesohen të dinë, nëse do ndërhyhet për t’i dhënë fund pagesave të larta.

Kur u pyet për këtë çështje në një takim që pati këtë të premte me gazetarët, kreu i SPAK, Altin Dumani u shpreh se “ka shoqëri pas shoqërie dhe duhet të gjendet pronari real, se të çon në arbitrazh”.

Kjo përgjigje e Altin Dumanit për një nga çështjet më të mëdha të korrupsionit të regjistruara ndonjëherë nga prokuroria, ngjan me pohimet që bëhen nga ministrat e Ramës për të njëjtën temë. Edhe qeveria këtë mendim ka. Që pagesat duhet të vazhdojnë.

Kur Klodian Zoto, Mirel Mërtiri dhe Stela Gugallja u shpallën në kërkim, atëherë Ministrja e Infrastrukturës Belinda Balluku tha se pagesat do të vazhdojnë me arsyetimin se: “Në rast se ne nuk zbatojmë kontratat, nga ana e ligjit tregtar të kontratës, ne do t’i krijonim Republikës së Shqipërisë një dëm të tillë që me siguri do të përgjigjeshim në Arbitrazh”.

Është i njëjti arsyetim si i Dumanit sot, me diferencën se kur foli Balluku doli edhe Rama dhe e përshëndeti.

“Përgjigjia e ministres është përgjigjia e duhur sepse janë marrëdhënie kontraktuale të cilat imponohen nga ligji për të vazhduar deri kur të ketë vendime të formës së prerë nga gjykatat. Janë marrëdhënie kontraktuale që duhet të zbatohen derisa të flasë drejtësia”, deklaroi Rama atëherë.

Afera e inceneratorëve ka çuar në burg ish-Ministrin e Mjedisit Lefter Koka, ish-deputetin e PS-së, Alqi Bllako, ndërsa hetimet kanë nisur për ish-zv.kryeministrin Arben Ahmetaj. Të shpallur në kërkim janë pronarët e inceneratorëve Stela Gugallja, Mirel Mërtiri dhe Klodian Zoto, ndërsa disa zyrtarë të tjerë janë në burg.

Nuk ështe e qartë se kush janë pronarët e inceneratorit të Tiranës, por kontrata nuk është respektuar pavarësisht se pagesat janë bërë rregullisht nga shteti shqiptar.

Kryebashkiaku Erion Veliaj firmosi për kalimin e fondit për inceneratorin e Tiranës pa mbledhur Këshillin Bashkiak dhe kjo nuk është e vetmja shkelje e regjistruar në këtë aferë. Në korrespondencën me Alqi Bllakon, ish-deputetin që është në burg, erion Veliaj firmosi në emër të qarkut të Tiranës, megjithëse është vetëm kryetar bashkie.

Altin Dumani u zgjodh me këmbënguljen e posaçme të ambasadores amerikane në krye të SPAK. Gjatë prezantimit të tij, ai i inkurajoi prokurorët “të procedojmë penalisht çdo shkelës ligji pavarësisht pozitës”, ndërsa u shpreh se “detyrën e shoh si mision dhe jo si vend pune”.

Me gjithë këto deklarata nuk pritej që Altin Dumani të shndërrohej në hero, por nuk pritej as që të fliste si vartës i Edi Ramës.

Lapsi

[Albo]

Video/ Ku kapet Veliaj te inceneratori i Tiranes



Kryetari i bashkisë së Tiranës, Erion Veliaj ka miratuar inceneratorin e Tiranës dhe ka firmosur dhënien e 91.8 mln eurove, pa mbledhur Këshillin Bashkiak. Kjo është akuza e kryetares së Komisionit Hetimor për Inceneratorët, Jorida Tabaku, e cila ka publikuar një video me fakte që sipas saj provojnë se kryebashkiaku i Tiranës se ai ka qenë i informuar per projektin e inceneratorit të Tiranes që në qershor të vitit 2016. Në videon denoncuese sqarohet se në përgjigje të kërkesës së kompanisë që fiton koncesionin, kryebashkiaku njoftohet për një koston që i takon Bashkisë Tiranë për të paguar. Në muajin mars të vitit 2017, në kundërshtim me ligjin (sqarim: sipas raportit të Kontrollit të Lartë të Shtetit, që ka lexuar Lapsi.al, Veliaj nuk e ka tagrin për ta miratuar projektin, pasi ai vetëm e propozon buxhetin e bashkisë, i cili miratohet nga Këshilli Bashkiak), Veliaj ka kthyer përgjigjen duke marrë marrë përsipër angazhimin financiar prej 91.8 mln euro, pa mbledhur Këshillin Bashkiak për miratimin e këtij buxheti.



Më pas në 28 shtator 2017, një muaj pasi kontrata koncesionare është firmosur, Veliaj kalon në Këshillin Bashkiak buxhetin e ndryshuar për mbetjet.




Lapsi

[Albo]

Sekuestrimi i inceneratorit, VOA: Akti i parë i drejtësisë për rastin e Tiranës



Në Shqipëri, Prokuroria e Posaçme kundër krimit të organizuar dhe Korrupsionit, njoftoi sot se Gjykata kishte pranuar kërkesën e saj për vënien nën sekuestro të kompanisë e cila kontrollon inceneratorin e Tiranës. Sipas prokurorisë dy sipërmarrësit Klodian Zoto dhe Mirel Mërtiri, të përfshirë dhe në ndërtimin e dy impianteve të tjerë të ngjashëm për trajtimin e mbetjeve, në Elbasan dhe Fier, rezultojnë të jenë “pronarët “de facto” të shoqërisë “Integrated Energy B.V SPV” sh.p.k, e cila ka fituar kontratën koncesionare “Ndërtim landfilli, inceneratori dhe rehabilitimi i vendepozitimeve ekzistuese, Tiranë”, si dhe janë pronarët “de facto” të shoqërisë mëmë të saj, të themeluar në Hollandë, “Integrated Energy B.V”, ndryshuar më pas me emrin “Geogenix B.V””.

Prokuroria e posaçme deklaron se “nga provat e marra gjatë hetimit ka rezultuar se, Zoto dhe Mërtiri kanë përdorur persona dhe shoqëri të tjera për të fshehur gjurmët si pronarët e vërtetë të shoqërisë koncesionare “Integrated Energy B.V SPV” sh.p.k.” duke shpjeguar se “është evidentuar fakti se Zoto dhe Mërtiri, janë personat që kanë udhëzuar dhe kanë marrë vendimet në lidhje me shoqërinë koncesionare “Integrated Energy B.V SPV” sh.p.k. dhe shoqërinë mëmë në Hollandë me emrin e mëparshëm “Integrated Energy B.V.”, aktualisht “Geogenix B.V.”.

Sipas prokurorisë, dy sipërmarrësit kanë përfituar po ashtu afro 4 milion euro duke përdorur fatura të flasifikuara tatimore. “Shtetasi Klodian Zoto është paraqitur dhe ka deklaruar fatura të falsifikuara për punime të kryera nëpërmjet shoqërisë tjetër të tij “Integrated Energy Services” sh.p.k., si nënkontraktor i shoqërisë koncesionare “Integrated Energy B.V. S.P.V.” sh.p.k. Në kohën e lëshimit të këtyre faturave të falsifikuara, provohet se aksionerë “de facto” kanë qenë shtetasit Zoto dhe Mërtiri”.

Në njoftimin e sotëm Prokuroria bën të ditur, se në sekuestro preventive, është vendosur dhe një sipërfaqe prej 611 m2 me vlerë 1 milion euro, e cila është në emër të shoqërisë “F.M.O”. Sipas prokurorisë “është evidentuar fakti se shtetasit Klodian Zoto dhe Mirel Mërtiri zotërojnë në mënyrë indirekte shoqërinë “F.M.O.” sh.p.k”, dhe se blerja e pasurisë për llogari të kësaj kompania është realizuar përmes të ardhurave të siguruara nga përfitime të paligjshme.

Kontrata për ndërtimin e impiantit të trajtimit të mbetjeve të kryeqytetit, me kosto të investimit të parashikuar prej 128 milion euro (pa TVSH) u firmos nga kompania “Integrated Energy B.V. S.P.V.” sh.p.k dhe Ministria e Mjedisit, në vitin 2017. Por ende sot e kësaj dite, inceneratori nuk është ndërtuar. Kjo kontratë ka qenë në qendër të akuzave të shumta publike dhe politike. Opozita ka drejtuar gishtin, ndër të tjera, dhe ndaj drejtuesit aktual të Bashkisë së Tiranës Erion Veliaj.

Vënia nën sekuestro është akti i parë i ndërmarrë nga drejtësia për rastin e Tiranës, ndërsa për Elbasanin dhe Fierin, hetimet janë mbyllur dhe çështjet janë drejt përfundimit dhe në Gjykatën e posaçme të shkallës së parë.

Po ashtu, është evidentuar fakti se shtetasit Klodian Zoto dhe Mirel Mërtiri zotërojnë në mënyrë indirekte shoqërinë “F.M.O.” sh.p.k. Nga hetimi janë mbledhur prova se këta shtetas, duke shfrytëzuar perfitimet e paligjshme kanë blerë për llogari të subjektit “F.M.O.” sh.p.k., një pasuri të paluajtshme, me sipërfaqe 611 m2, me vlerë 1 000 000 Euro, e ndodhur në qytetin e Durrësit.

Zëri i Amerikës

[Albo]

SPAK i sekuestroi inceneratorin/ Erion Veliaj shpërthen në mllef kundër gazetarëve



Kryebashkiaku Erjon Veliaj, një nga kandidatët më të mundshëm të dosjes së SPAK për inceneratorin e Tiranës ka reaguar për herë të parë pas vendimit të sekuestros. Ajo që bie në sy në reagimin e Veliajt është se ai vazhdon të flasë me të njëjtën gjuhë për projektin e inceneratorëve edhe pse tashmë është e konfirmuar katërcipërisht se kjo është një aferë korrupsioni.

“Një Tirane qe sot eshte pasqyre pastertie edhe si rezultat i transformimit te Sharres nga nje kancer urban ne nje fushe sanitare me standardet e duhura mjedisore” shkruan Veliaj në një mesazh në Tëitter, duke shpërfillur malin e abuzimeve prej dhjetëra miliona eurosh që është zbuluar nga media dhe nga SPAK.

Gjithsesi në reagimin e tij ka edhe mllef ndaj mediave për të cilat thotë se janë të përfshira nga “histeria” dhe se i përkasin “baltës”, ndërsa gazetarët i quan “baltaxhinj të udhëhequr nga non grata”. Nuk kuptohet se përse Veliaj përmend “non gratën” duke iu referuar Sali Berishës, ndërkohë që sulmi ndaj gazetarëve është po kaq i vështirë për t’u kuptuar, kur Veliaj është një nga politikanët më të përkëdhelur nga mediat që i ushqen me leje ndërtimi dhe favore.

Në dosjen për arrestimin e Arben Ahmetajt, një kapitull i veçantë i kushtohej inceneratorit të Tiranës dhe përfshirjes së zyrtarëve të Bashkisë së Tiranës në marrëdhënie direkte me Klodian Zoton. Një prej tyre ishte drejtori i bashkisë Taulant Tusha që i ka dërguar Zotos draftin e vendimit të Këshillit Bashkiak për inceneratorin. Vetë Veliaj përmendet për shkresën me të cilën mori përsipër angazhimin financiar për inceneratorin e Tiranës megjithëse çdo qindarkë që lëviz nga buxheti është kompetencë e Këshillit Bashkiak.



Mesazhi i plotë i Veliajt pas sekuestrimit të inceneratorit

“Histeria e portaleve te baltes tregon vetem qe baltaxhinjte e udhehequr nga Non Gratat s’e kane marr vesh akoma qe jemi ne epoke tjeter! Sekuestrimi dhe heqja nga duart e subjektit privat te impiantit te mbetjeve te Tiranes si rezultat i hetimeve te SPAK eshte mese i mirepritur ne rrugen e zbardhjes se veprimtarise se paligjshme te kujtdo qe ka abuzuar ne dem te interesit publik.

Bashkia e Tiranes nderkohe do te vazhdoje pa u ndalur punen per nje Tirane qe sot eshte pasqyre pastertie edhe si rezultat i transformimit te Sharres nga nje kancer urban ne nje fushe sanitare me standardet e duhura mjedisore. Koha punon per Tiranen dhe Shqiperine Europiane, jo per kandilet e Non Gratave qe do te shkojne drejt shuarjes”

Lapsi

[Albo]

Videokomenti/Tre arsye se përse sekuestrimi i inceneratorit i djeg Ramës e Veliajt



Lajmi për sekuestrimin e inceneratorit të Tiranës ka efektin e një bombe. Dhe ka së paku tre arsye se përse kjo që ka ndodhur nuk është një gjë e zakonshme. Janë këto arsyet se përse rilindja nuk donte në asnjë mënyrë që kjo dosje të hapej.

Arsyeja e parë ka të bëjë me paratë e humbura nga buxheti i shtetit që vazhdoi ti paguajë Mërtirin dhe Zoton edhe 18 muaj pasi ata u shpallën në kërkim.

Arsyeja e dytë lidhet me bonusin prej 8 pikësh që i dha qeveria Rama një kompanie të pa regjistruar dhe që e bëri këtë vetëm 9 muaj pasi e kishte marë këtë privilegj.

Arsyeja e tretë ka të bëjë me implikimin e Veliajt që ka firmosur personalisht për të marë përsipër kostot duke anashkaluar këshillin bashkiak.

Pikërisht për këto arsye sekuestrimi i inceneratorit të Tiranës u pengua kaq shumë duka vazhduar pagesat deri mbi 100 milionë euro, vetëm që mos hapej kutia e Pandorës.

Komenti nga Andi Bushati ne Lapsi Videos



Lapsi

[Albo]

SPAK sekuestron kompaninë e incineratorit të Tiranës, i mori shqiptarëve 100 milionë euro

Prokuroria e Posaçme ka identifikuar miliona euro fatura të falsifikuara për projektin e incineratorit të Tiranës, duke urdhëruar rë martën sekuestrimin e kompanisë Integrated Energy B.V. S.P.V dhe duke i kursyer në këtë mënyrë miliona euro çdo muaj taksapaguesve shqiptarë.

Nga Gjergj Erebara


Incneratori i Sharrës është një kontratë PPP e fituar nga kompania Integrated Energy BV

Prokuroria e Posaçme Kundër Krimit të Organizuar dhe Korrupsionit urdhëroi të martën sekuestrimin e kompanisë që operon kontratën kontroverse të incineratorit të Tiranës, pasi njoftoi se hetimi paraprak ka zbuluar se Klodian Zoto dhe Mirel Mërtiri janë pronarët e vërtetë të projektit dhe se kompania ka lëshuar miliona euro fatura të falsifikuara, të paguara nga taksapaguesit e Tiranës, Durrësit e bashkive fqinje me të.

Sipas prokurorisë, nga hetimi “ka rezultuar se shtetasit Klodian Zoto dhe Mirel Mërtiri janë pronarët “de facto” të shoqërisë “Integrated Energy B.V SPV” sh.p.k, e cila ka fituar kontratën koncesionare “Ndërtim landfilli, inceneratori dhe rehabilitimi i vendepozitimeve ekzistuese, Tiranë”, si dhe janë pronarët “de facto” të shoqërisë mëmë të saj, të themeluar në Hollandë, “Integrated Energy B.V”, ndryshuar më pas me emrin “Geogenix B.V”.”

“Nga provat e marra gjatë hetimit ka rezultuar se, shtetasit Klodian Zoto dhe Mirel Mërtiri kanë përdorur persona dhe shoqëri të tjera për të fshehur gjurmët si pronarët e vërtetë të shoqërisë koncesionare “Integrated Energy B.V SPV” sh.p.k,” thuhet në njoftimin e SPAK.

Qeveria shqiptare e kryeministrit Edi Rama ka dhënë tre kontrata koncesionare për këta biznesmenë, dy prej të cilëve janë sekuestruar më herët nga SPAK ndërsa për të tretin dhe më të madhin, hetimet vijojnë. Kompania fituese e koncesionit është regjistruar në Holandë ndërsa pronarët e saj të regjistruar në regjistrim e pronarëve përfitues janë disa shtetas italianë e francezë, të cilët dyshohen se janë fasadë për të fshehur pronarët e vërtetë.

“Është evidentuar fakti se shtetasit Klodian Zoto dhe Mirel Mërtiri, janë personat që kanë udhëzuar dhe kanë marrë vendimet në lidhje me shoqërinë koncesionare “Integrated Energy B.V SPV” sh.p.k. dhe shoqërinë mëmë në Hollandë me emrin e mëparshëm “Integrated Energy B.V.”, aktualisht “Geogenix B.V.”, që përkon nga momenti i themelimit të këtyre shoqërive e në vijimësi”, thuhet në njoftimin e SPAK.

“Nga aktet e administruara deri në këtë fazë të hetimeve, rezulton se shtetasi Klodian Zoto, në bashkëpunim me shtetasin Mirel Mërtiri, kanë përfituar në sajë të faturave tatimore të falsifikuara, vlerën monetare 409,428,000 (katërqind e nëntë milion e katërqind e njëzet e tetë mijë) lekë, ku shtetasi Klodian Zoto është paraqitur dhe ka deklaruar fatura të falsifikuara për punime të kryera nëpërmjet shoqërisë tjetër të tij “Integrated Energy Services” sh.p.k., si nënkontraktor i shoqërisë koncesionare “Integrated Energy B.V. S.P.V.” sh.p.k. Në kohën e lëshimit të këtyre faturave të falsifikuara, provohet se aksionerë “de facto” kanë qenë shtetasit Klodian Zoto dhe Mirel Mërtiri,” thuhet më tej në njoftim.

Kompania Integrated Energy B.V u themelua në vitin 2017 dhe që nga ajo kohë, ka faturuar qytetarët shqiptarë në mënyra të ndryshme, përfshirë përmes sistemit fiskal për qeverinë apo përmes tarifave të detyrueshme për depozitim mbetjesh.

Të dhënat e bilancit të kompanisë të publikuara në Qendrën Kombëtare të Biznesit, tregojnë se mes viteve 2017 dhe 2021, qytetarët i paguan Integrated Energy BV së paku 7.9 miliardë lekë në formën e tarifave koncesionare dhe tarifave të shërbimit të depozitimit. Në vitin 2021, të ardhurat e kompanisë arritën në 2.6 miliardë lekë. Bilanci i vitit 2022 nuk është depozituar deri më tani në QKB, por të dhënat e pagesave të thesarit të buxhetit të shtetit tregojnë se nga 1 janari 2022 deri më sot, kompania ka përfituar edhe 2 miliardë lekë të tjera. Duke marrë parasysh këtë, dhe të ardhura të tjera që kompania faturon për depozitimet, deri në kohën e sekuestrimit në gusht 2023, fusha e mbetjeve të Tiranës duket se u ka kushtuar taksapaguesve minimalisht 100 milionë euro.

Incineratorët e Fierit dhe Elbasanit i kanë kushtuar veçmas sëbashku rreth 50 milionë euro.


BIRN

[Albo]

‘Dominotë kanë filluar të bien/ Kryemadhi rinxjerr faktet nga inceneratori i Tiranës që fundosin Veliajn



Deputetja e PL-së Monika Kryemadhi ka risjellë një video të 27 korrikut 2022, ku tregon se përse duhet të merret i pandehur Erion Veliaj për inceneratorin e Tiranës.

‘Shkresat që sot qarkullojnë në media, mbi rolin e Erion Veliajt në procedurën e inceneratorit të Tiranës, ne i kemi denoncuar që në momentin e parë që kam dorëzuar kallëzimin penal. Atëherë këto media dhe figura publike nuk e shikonin të volitshme ti konsideronin të rëndësishme zbulimet tona. Ndoshta prisnin nga do të frynte era, apo nëse SPAK do të pranonte ndonjë përqindje në bashkëpunim...’, shkruan Kryemadhi në Facebook.

Postimi i plotë:

Pse duhet të merret i pandehur Erion Veliaj për Inceneratorin e Tiranës.

Kështu u titullua kjo video e imja e postuar në 27 Korrik 2022.

Ua solla si rikujtesë sot, që frytet e punës tonë të palodhur, për të denoncuar pa kompromis korrupsionin, nuk u mbyt dot as nga koha e madhe që ka kaluar, e as nga komisionet fallso që bashkëqeverisësit e 17 Majit orkestruan për ti hedhur hi syve shqiptarëve.

Shkresat që sot qarkullojnë në media, mbi rolin e Erion Veliajt në procedurën e inceneratorit të Tiranës, ne i kemi denoncuar që në momentin e parë që kam dorëzuar kallëzimin penal. Atëherë këto media dhe figura publike nuk e shikonin të volitshme ti konsideronin të rëndësishme zbulimet tona. Ndoshta prisnin nga do të frynte era, apo nëse SPAK do të pranonte ndonjë përqindje në bashkëpunim...

Nejse, pak rëndësi ka tani që domino-të kanë filluar të bien...

Rishikojeni miq këtë video dhe ato shumë të tjera që me përkujdesje kemi përgatitur për ju që nga momenti që kam kallëzuar mafien Rilindase të inceneratorëve.

Djalli fshihet në detaje. Deri në videon tjetër ��


Syri

[Albo]

Ylli Manjani: Inceneratorët, Erion Veliajt duhet të arrestohet



Nga Ylli Manjani

Për shkaqe profesionale nuk jam e as mbështes arrestime për show.

Ligji bolshevik i arrestimeve nuk ndihmon por e shkatërron drejtësinë.

Pa asnjë dyshim është kështu. Dhe nuk do rresht së artikuluari këtë gjë.

Mirëpo nëse arrestohet Lefteri dy herë, Arbeni që s’ka lidhje direkte kërkohet të arrestohet familjarisht dhe një mori zyrtarësh janë harruar në paraburgim, për të njëjtat arsye dhe për barazi para ligjit, Erion Veliaj duhet të jetë nën arrest gjithashtu.

Minimalisht ka përvetësuar detyrat ligjore të Këshillit Bashkiak dhe të bashkive të tjera të qarkut Tiranë. Ka marrë vendim të shpenzojë 100 milionë Euro që nuk i ka patur në buxhetin e bashkisë.

Madje Erioni duke qenë në detyrë rrezikon seriozisht dëmtimin e hetimeve.

Ai i ka të gjitha mundësitë të fshehë prova dhe të dëmtojë hetimin, duke qenë aktiv në detyrë, duke administruar arkiva dhe interesa.

Shto këtu edhe manipulimin e përditshëm të opinionit publik.

Asnjë nga të arrestuarit e derisotëm nuk është më i rrezikshëm se Erion Veliaj.

E përsëris nëse duan ta zbatojnë praktikën e arrestimeve siç e zbatojnë për të tjerët, Erioni s’ka pse të bëjë përjashtim.

Përjashtimi i tij nga hetimi dhe arresti vendos nën akuzë drejtësinë për trajtim të pabarabartë.

Kaq.


Syri

[Albo]

Çollaku: SPAK ka frikë të hetojë Veliajn, ai është pjesë e vjedhjes me inceneratorët



I ftuar në emisionin Syri Digjital me moderatorin Bled Marku për të komentuar zhvillimet e fundit të drejtësisë ishte gazetari, Basir Çollaku.

Çollaku është shprehur se në dosjet me të cilët është i implikuar ish zv-kryeministri AHmetaj janë shumë funksionar të lartë të pushtetit që shkon deri te zyra e Edi Ramës.

Ajo që u paralajmëruar më herët nga drejtuesi i SPAK në lidhje me ish zvkryeministrin ahmetajn une prita se drejtësia do të hetonte me thellë në dosjen e inceneratorëve pasi aty ka shumë persona nga qeveria që janë përfshirë në këtë vjedhje të madhe dhe jo të merrej me pjekjen e bukëve.

Ka një lloj tendence që SPAK po merr vendin e ILDKP sigurisht që nuk duhet të shkojmë të mbivendosje dhe duhet të hetohet kjo dosje pasi pritshmëritë janë shumë të mëdha.

Dosja Buka ka qenë një dosje e më hershme në prokurorinë e Tiranës ku në Shkallën e Parë është pushuar dhe Gjykata e Apelit ka kërkuar që të rikthen hetimet.

Vë re në momentet e deri tanishme ka një lloj ngërçi në dojet që lidhen me Ahmetajn pasi aty janë shumë zyrtarë të përfshirë pasi në dosjen e privatizimit janë të implikuar kryetari i Bashkisë Tiranë që shkon zinxhir deri në Kryeministri. Kryetari i bashkisë së Tiranës është i përfshirë me firmë në vjedhjen e inceneratorëve dhe sa herë hetimi shkon deri te dera e Veliat prokurorët i kthejnë shpinën këtij hetimi dhe nuk merren me këtë funksionar . Sa herë shkon emri i Veliajt prokurorët kanë frikë dhe nuk e hetojnë.

Video


Syri

[Albo]

Provat shkresore/ Erion Veliaj jepte urdhëra si pronar i inceneratorëve



Dalin prova të reja me shkresa dhe dokumenta që provojnë se Erion Veliaj sillej si pronar real i inceneratorëve dhe jepte urdhra se kush duhet të paguante për depozitim në lanfillin e Sharës dhe kush duhet ti merrte shërbimet falas.

Nga selia e PD-së ish rivali i tij në zgjedhjet e Tiranës, Belind Këlliçi, ka bërë sot publike dy emaile, që tregojnë për depozitim të inerteve pa pagesë në inceneratorin e Tiranës. Njëri prej tyre i përket kompanisë “Arlis ndërtim”, që u bë e famshme për 7 katet pa leje të ngritur në qendër tek reklamat e dikurshme të kinemave, në krah të Bankës së Shqipërisë.

Në datën 18 qershor 2018, në një komunikim mes punonjësve të inceneratorit dhe bashkisë Tiranë, këta të fundit urdhërojnë shmangjen e pagesës për depozitimin e dherave, me justifikimin se kjo kompani do të ndërtonte zyra në favor të Bashkisë Tiranë (faksimilja poshtë).



Sipër email i derguar nga Bashkia Tiranë për të favorizuar pa pagesë Arlis Ndërtim

“Arlis ndërtim” do të ndërtojë një kullë tek ish policia bashkiake e Tiranës dhe e ka marrë këtë tokë me marrëveshje për të dhene në fund tre kate për përdorim të Bashkisë.

Duke u nisur nga prezumimi se qëllimi është ngritja e një ndërtese publike, bashkia Tiranë ka urdhëruar që kjo kompani ti depozitojë inetret dhe dherat e saj falas. Por kjo alibi është flagrante. E para se për atë që do ti japë publikut për zyra, “Arlis ndërtim”, që thuhet se është e lidhur me një ish ministër të rëndësishëm socialist, ka përfituar një leje ndërtimi shumëkatshe. E dyta sepse edhe kompani të tjera private, që kanë ngritur vepra publike, kanë paguar si gjithë të tjerët për depozitimin e mbejteve të tyre. E treta, sepse bashki të tjera, që kishin marëdhënie me inceneratorin e Tiranës nuk e kanë pasur avantazhin që të japin të tilla urdhëra për shërbime pa pagesë.

Pikërisht janë këto që e kanë bërë Belind Këlliçin të depozitojë dokumenta e reja në SPAK, si provë se Erion Veliaj është pronari real i inceneratorëve.

Për ta bërë më të besueshëm këtë dyshim, departamenti anti korrupsion në PD ka publikuar edhe një kontratë të bërë mes tre drejtorive shtetërore dhe bosëve të inceneratorit për kontrollin e depozitimit të inerteve nga biznesi i së cilave, Klodian Mërtiri dhe Klodian Zoto kanë përfituar deri më tani 40 milionë euro. Në këtë kontratë, ku së bashku me inceneratorin e Tiranës ka firmosur si drejtor bashkie edhe njeriu i afërt i Veliajt, Taulant Tusha palët zotohen që të kontrollojnë, të mbikqyrin dhe të shkëmbejnë informacion për depozitimin e dherave.



Dhe në bazë të kësaj marëdhënie nga Bashkia jepej urdhër për kompani si Alris, të cilës duhet ti shërbehej falas. Duke qenë se personi që ka nënshkruar urdhërin e favorizimit varej dikekt nga kryebashkiaku, Këlliçi ka paraqitur edhe një organigramë të funksionimit të bashkisë ku tregohet se varësia e atij që ka dhënë urdhërin, pra punonjësit të Taulant Tushës është drejtpërdrejt nga “Lali”.



Organigrama e funksionimit të Bashkisë Tiranë e cila tregon se drejtoria e Punëve Publike e Taulant Tushës të njëjtit që nënshkroi marëveshjen dhe urdhëroi depozitimin e interteve falas varet direkt nga Veliaj.
Në përforcim të idesë se për interesa të Bashkisë inceneratori jepte shërbime falas është publikuar edhe një email i dytë, ku gjithashtu mbetejet e ngelura nga shkaterrimi i Teatrit Kombëtar, Mirel Mërtiri urdhëronte që të depozitoheshin falas (poshtë).



Pra sipas këtyre dokumentave del qartë e bashkia e Erion Velisë luan rolin e pronarit mbi pronarët “de jure”. të inceneratorëve. Asnjë kryebashkiak tjetër, i Durrësit, Kavajës apo gjetkë nuk e kishte forcën ti urdhëronte dy Klodët. Dhe kur i shton kësaj edhe fuqinë për të vendosur se cila kompani private mund ti merrte shërbimet pa lekë, pozita e Eroon Veliajt në këtë aferë errësohet shumë.

©Lapsi.al