Vetëm 6 të arrestuar, ku shkuan 24 terroristët serbë? Eksperti zbulon të vërtetën
Euronews Albania
Sep 25, 2023
Vetëm 6 të arrestuar, ku shkuan 24 terroristët serbë? Eksperti zbulon të vërtetën
Euronews Albania
Sep 25, 2023
Gjithçka duhet të dini për përleshjen e armatosur në veri të Kosovës
Një polic ka mbetur i vrarë dhe një tjetër është plagosur nga të shtënat me armë në veri të Kosovës, gjatë një sulmi terrorist që ndodhi në fshatin Banjskë në Zveçan. Nga sulmi mbeti i vrarë rreshteri i policisë Afrim Bunjaku, ndërsa i plagosur mbeti polici Alban Reshiti.
Të dielën, autoritetet kosovare thanë se tre terrorriste u vranë gjatë sulmit, ndërsa gjashtë persona, që dyshohet se ishin në kontakt me ta, u arrestuan.
të hënën Prokuroria e Kosovës ka konfirmuar se gjeti edhe trupin e pajetë të një sulmuesi të dyshuar në veri të vendit, duke e çuar në katër numrin e të vrarëve.
Trupi i pajetë është gjetur rreth 1.5 kilometra larg “vendit të incidentit”, një ditë pasi një grup prej dhjetëra personave të armatosur e sulmuan Policinë e Kosovës.
Polici i vrare ne Kosove, Afrim Bunjaku
Përfaqësuesi i Lartë i BE-së, Josep Borrell, bëri të dielën një reagim fillestar lidhur me ngjarjet në veri të Kosovës, duke i cilësuar ato vetëm si “akt të shëmtuar të një bande të armatosur kundër policëve të Kosovës”. Megjithatë në një njoftim të lëshuar nga zyra e tij pak kohë më vonë, Borell e ashpërsoi gjuhën dhe Bashkimi Evropian e ka emëruar ngjarjen në veri edhe si “sulm qyqar terrorist kundër Policisë së Kosovës”.
Edhe Sekretari amerikan i Shtetit, Antony Blinken, ka deklaruar se Shtetet e Bashkuara të Amerikës dënojnë fuqishëm sulmin ndaj Policisë së Kosovës në veri të vendit, ku u vra polici Afrim Bunjaku.
Ai ka thënë se autorët e krimit duhet të mbahen përgjegjës nëpërmjet një procesi hetimor transparent.
Ndryshe nga udhëheqësit perendimorë presidenti i Serbisë, Aleksandar Vuçiç, ndonëse e dënoi vrasjen e policit kosovar tha se incidenti ishte shkaktuar nga rebelimi i serbëve të Kosovës, pasi ata “nuk donin të vuanin më nën terrorin e Kurtit” dhe se ishte çështje kohe se kur do të ndodhte diçka e tillë.
Sipas tij, i vetmi fajtor për atë që po ndodh në veri, “është Albin Kurti”.
Ai i bëri thirrje komunitetit ndërkombëtar që ta formojë Asociacionin e komunave me shumicë serbe dhe tha se në veri të Kosovës, policët duhet të jenë serbë.
Vuçiç tha se Serbia nuk do ta njohë kurrë Kosovën “as formalisht, as joformalisht”, por shtoi se është i gatshëm të bisedojë.
Personat që sulmuan policët e Kosovës mendohet se janë një skuadër prej 30 vetash, profesionistë ushtarakë, të armatosur rëndë. në orët e para të së dielës, ata tentuan të ngrinin barrikada dhe kur policët e Kosovës tentuan ti pengonin ata qëlluan me armë. Ata u strehuan brenda oborrit të Manastirit të Banjskës, që normalisht ka një lloj eskstrateritorialiteti nga ku janë dëgjuar herë pas here të shtëna armësh.
Dioqeza Rashkë-Prizren ka konfirmuar për mediat e Kosovës se brenda Manastirit të Banjskës u mbyllën një grup besimtarësh nga Novi Sadi dhe igumeni Danilo. Por ata thanë se njerëzit e arrmatosur ishin futur forcërisht në manastir.
Kryeministri i Kosovës Albin Kurti tha se sulmi në fshatin Banjska të Zveçanit përfshinte “profesionistë” që përdorin armë të rënda. Në një konference për mediat, Kurti shfaqi disa foto të personave që kanë vepruar në veri. Ata duket që janë të armatosur dhe të veshur me uniforma kamuflazh.
“Janë së paku 30 persona të armatosur rëndë, profesionistë, ushtarakë a policë, që ndodhen nën rrethimin e forcave tona policore dhe që i ftoj të dorëzohen te organet tona të sigurisë. Ata janë që po i sulmojnë policinë tonë, edhe pasi e kanë vrarë Afrim Bunjakun e e kanë plagosur Alban Rashitin”, tha Kurti gjatë konferencës.
Duke përshkruar pamjet, Kurti tha se ata janë vendosur pranë Manastirit në Banjskë të Zveçanit.
“Organet e sigurisë dhe prokuroria do të zhvillojnë hetimet për t’i kuptuar këto uniforma të cilat siç shihet përveç xhipave, kanë edhe një autoblindë aty. E vëreni se ka një gjoksore që është tipike për uniformën dhe pajisjet në vendluftime. Është paraqitur një formacion i organizuar që ka ardhur të luftojë në Kosovë”, është shprehur ai.
Ndërkohë gazetarët janë interesuar nëse ka dyshime se personat që kanë hyrë të armatosur në Kosovë janë pjestarë të grupit Vagner dhe për këtë është përgjigjur zv.drejtori i policisë, Fehmi Hoti.
“Kemi pas informacione se individë të grupit Vagner mund të jenë përfshirë, por nuk e kemi të faktuar se janë aty. Si informacion jemi duke e trajtuar. Jemi në koordinim të vazhdueshëm me KFOR” tha Hoti.
Ndërsa sot autoritetet e sigurisë në Kosovë kanë akuzuar nënkryetarin e Listës Serbe, Millan Radoiçiqin, për organizim dhe pjesëmarrje në sulmit ndaj Policisë së Kosovës më 24 shtator.
Gjatë një konference për media, ministri i Punëve të Brendshme i Kosovës, Xhelal Sveçla, tha se autoritetet kanë gjetur harta dhe plane për sulmin ndaj Policisë së Kosovës në veri më 24 shtator. Ai argumentoi se sulmi nuk ishte ad-hoc, por ishte planifikuar për muaj të tërë.
Ai tha se në bazë të dokumenteve që kanë gjetur Radoiçiq, është i lidhur me sulmin.
“Në këto materiale, po ashtu kemi gjetur edhe dokumente të kriminelit që, po ashtu, është në listën e zezë të SHBA-së, Millan Radoiçiq, dokumente këto që dëshmojnë lidhjen apo pjesëmarrjen e tij të drejtpërdrejtë në këtë aksion. Kjo është lista e armëve apo lejeve të institucioneve të Serbisë dhënë Millan Radoiçiqit ku është edhe lista me armët që ai posedon, me numra, me të gjitha që janë gjetur në veturën e parë në radhë atje dhe patjetër që dokumenti origjinal është në dorën e forenzikës”, tha Sveçla gjatë konferencës për media në kampin e njësive speciale policore në Mitrovicë të Jugut, ku policia ekspozoi armët dhe pajisjet që ka gjetur në vendin e ngjarjes.
Sipas tij, në bazë të armëve që kanë gjetur, besohet se ka pasur plan që në sulm të përfshiheshin “qindra persona për destabilizimin e vendit tonë”.
Sveçla tha se, sipas informatave të deritashme, “gjashtë terroristë po trajtohen në spitalin e Novi Pazarit [qytet në Serbi]”, ndërsa i bëri thirrje Serbisë që t’ia dorëzojë Kosovës. Ai tha se përveç tyre, edhe pjesëtarë të tjerë të grupit që mund të kenë ikur për në Serbi, duhet t’i dorëzohen Kosovës që të përballen me drejtësinë.
Ai tha se në bazë të informatave, disa nga pjesëtarët e grupit që sulmuan policinë ishin pjesëtarë të “Brigadës së Veriut” dhe “Mbrojtjes Civile”, që Kosova i ka shpallur si organizata terroriste më herët gjatë vitit.
Sulmi ndaj policisë së Kosovës vjen pas dështimit të dialogut politik në lidhje me zbatimin e planit franko-gjerman. Bashkësia ndërkombëtare fajëson Albin Kurtin që nuk pranon asosacionin e komunave serbe në veri të Kosovës dhe për këtë ka mbajtur qëndrime më të zbutura ndaj Serbisë.
Për pasojë, kur serbët sulmuan ushtarët e KFOR gjatë përleshjeve të dhunshme në veri, reagimi ishte i mekur. Kur serbët rrëmbyen tre policë të Kosovës, reagimi i bashkësisë ndërkombëtare ishte i vonuar dhe i paqartë, duke lënë hapësira për ndërhyrje të natyrës terroriste në veri të Kosovës që e destabilizojnë situatën.
NATO ka dislokuar 700 trupa shtesë për t’u marrë me trazirat në veri të Kosovës, që pas përleshjeve të dhunshme që ndodhën atje pas zgjedhjeve.
Lapsi.al
Sulmi terrorist në Kosovë/ Dy reagimet e tredhura nga Tirana zyrtare
Vrasja e një polici në detyrë dhe lëvizja e një grupi personash të armatosur në veri ka rikthyer kujtimet e luftës dhe pasigurinë mes shqiptarëve që jetojnë në Kosovë. Në një konferencë me gazetarët, kryeministri Albin Kurti u pa teksa përpiqet të japin një përgjigje dinjitoze ndaj këtij akti që kërkon drejtësi, por edhe të jetë i kujdesshëm, që situata të mos degradojë, siç do t’i interesonte Beogradit.
Sepse është e qartë që sulmi është organizuar dhe dirigjohet nga Beogradi, njësoj siç ka ndodhur më parë me bojkotin e serbëve në veri, me protestat e dhunshme pas zgjedhjeve apo me rrëmbimin e tre policëve shqiptarë nga skuadrat speciale të Serbisë.
Dhe në këtë situatë, kur Prishtinës i duhet mbështetja, nga Tirana zyrtare vijnë disa reagime sterile. Të tredhura deri në paturpësi nga një president dhe një kryeministër, që nuk guxojnë as t’i përmendin serbët në reagimin e tyre.
Nëse e vë re me kujdes në mesazhin që shpërndau zyra e shtypit e presidentit Bajram Begaj nuk gjendet në asnjë rresht, fjala “Serbi”. Begaj e quan sulmin “një akt i organizuar kriminal” dhe “cënim i rëndë i rendit dhe sigurisë së Republikës së Kosovës”, ndërsa i bën thirrje ndërkombëtarëve të reagojnë ndaj “urdhëruesve dhe zbatuesve të këtij akti tejet të rëndë për stabilitetin e Kosovës”.
Që Begaj nuk e përmend dot Serbinë, nuk është rastësi. Në të njëjtën linjë është edhe kryeministri i Shqipërisë, Edi Rama që në asnjë rresht të reagimit të tij nuk përmend dot Serbinë, si shteti që qëndron pas sulmit që i mori jetën policit shqiptar dhe që po kërkon destabilizimin e Kosovës.
Përkundrazi, kryeministrit të Shqipërisë Edi Rama i duket zgjidhje një konferencë ndërkombëtare e jashtëzakonshme, një propozim i vjetër ky i Serbisë që synon të sfidojë, të zhvlerësojë dhe të vërë në diskutim faktin që Kosova është tashmë shtet i pavarur dhe që duhet respektuar si i tillë.
Sipas Ramës, zgjidhja nuk është t’i bëhet thirrje Serbisë të ndalet dhe të mos hedhë në territorin e Kosovës skuadra speciale që rrëmbejnë dhe vrasin policë, por “thirrja e një konference të jashtëzakonshme paqeje, nën mbikqyrjen e garancinë e Bashkimit Europian dhe Shteteve të Bashkuara”.
Reagimet e Ramës dhe të Begajt janë edhe një herë tjetër në vazhdën e politikës servile dhe të gjunjëzuar të Tiranës ndaj SHBA dhe Bashkimit Europian, që në këtë periudhë kanë qenë të ashpër me Albin Kurtin dhe tolerantë ndaj Aleksandër Vuçiçit. Pikërisht se ndjekin me përulësi politikat e ndërkombëtarëve, Rama dhe Begaj vetëcensurohen në reagimet e tyre, duke mbajtur qëndrime të turpshme sikur të ishin zëdhënës të organizmave ndërkombëtare.
Reagimi i Bajrom Begajt
Dënoj me forcë sulmin ndaj policisë së Kosovës në komunën e Leposaviqit, ku mbeti i vrarë një polic dhe u plagosën dy të tjerë.
Ky akt i organizuar kriminal është cënim i rëndë i rendit dhe sigurisë së Republikës së Kosovës.
I bëj thirrje komunitetit ndërkombëtar të reagojë me vendosmëri ndaj urdhëruesve dhe zbatuesve të këtij akti tejet të rëndë për stabilitetin e Kosovës dhe paqen në rajonin e Ballkanit Perëndimor.
Shpreh ngushëllimet e mia të sinqerta për familjen e policit të vrarë dhe uroj shërim të shpejtë për policët e plagosur.
Në këto momente nevojitet më shumë se kurrë qetësi, maturi dhe bashkëpunim i ngushtë me KFOR dhe aleatët. Shqipëria është gjithmonë në mbështetje të Kosovës.
Reagimi i Edi Rames
Tragjedia e humbjes së jetës së efektivit të Policisë së Kosovës është këmbana më e madhe e alarmit deri më sot për rrezikun e vazhdueshëm të eskalimit të krizës së zgjatur në një konflikt të armatosur. Kriminelët që i morën jetën një njeriu të pafajshëm, i cili shërbente nën uniformën shtetëtore të forcave të rendit të Republikës së Kosovës, duhet të dalin përpara drejtësisë.
Komuniteti euroatlantik duhet të mbledhë të gjithë forcën e tij imponuese dhe të ulë pa kthim, Kosovën dhe Serbinë në tryezën e Dialogut të Normalizimit. Thirrja e një konference të jashtëzakonshme paqeje, nën mbikqyrjen e garancinë e Bashkimit Europian dhe Shteteve të Bashkuara, e njëkohësisht marrja e të gjitha masave të jashtëzakonshme me KFOR-in, për moslejimin e eskalimit të mëtejshëm të situatës, janë një domosdoshmëri strategjike jo vetëm për rendin e sigurinë në Kosovë sot, po edhe për paqen e të ardhmen e rajonit nesër, përpara sesa kriza e zgjatur në Veriun e Kosovës të dalë jashtë kontrollit e të kthehet në një zjarr destabilizues për krejt rajonin.
Lapsi.al
Berisha: Vuçiçi duhet dërguar në Hagë, ndryshe nuk ka paqe në rajon. Rama reagoi si argati i tij!
Kryetari demokrat, Sali Berisha i bëri thirrje komunitetit ndërkombëtar që të dërgojë në Hagë presidentin e Serbisë, Aleksandër Vuçiç.
Reagimi i tij erdhi pas sulmit terrorist në veri të Kosovës.
“Si me komandë nga Beogradi, reagoi ndaj sulmit të grupit terrorist të përbërë nga oficerë të ushtrisë serbe, argati i Vuçicit në Tiranë, Edi Rama.
Në reagimin e tij në platformën X, Edi Rama nuk shprehu ngushëllime për policin e rënë në krye të detyrës, sikur në Banjskë po ndodhte një përleshje mes bandash dhe banditësh.
Së dyti, duke besuar se kryengritja nuk do të shtypej nga policia e Kosovës, përsëriti kërkesën e Beogradit për konferencë ndërkombëtare për të zhbërë arritjet 23-vjeçare të Kosovës në rrugën e lirisë dhe pavarësisë dhe për të hapur dyert për uljen e Rusisë në këtë tavolinë, kërkesë kjo e Serbisë.
PD mbështet pa rezervë të drejtën e autoriteteve të Kosovës për mbrojtjen e integritetit territorial dhe sovranitetit të vendit.
Ajo përgëzon dhe përshëndet policinë e Kosovës për guximin, vendosmërinë dhe trimërinë që dëshmoi, profesionalizmin e lartë në shtypjen e kryengritjes së armatosur.
PD u bën thirrje autoriteteve të Kosovës të bëjnë më të mirën që në bashkëpunim me partnerët ndërkombëtarë, të finalizojnë me dialog, marrëveshjen me Serbinë.
PD dënon me forcën më të madhe organizimin nga Beogradit të kryengritjes së armatosur në Kosovë.
Për PD-në, organizimi nga Beogradi i kryengritjes tregon qartë se Vuçiç është një Millosheviç i ri.
PD i bën thirrje komunitetit ndërkombëtar të dorëzojë sa më parë Aleksandër Vuçiçin në gjykatën e Hagës për pjesëmarrjen e tij thelbësore në gjenocid dhe krime shfarosëse ndaj njerëzimit të kryera nga Beogradi ndaj boshnjakëve dhe shqiptarëve pak vite më parë.
Dorëzimi i Millosheviçit të ri në Hagë, do ishte jo vetëm përmbushje e detyrimit ligjor dhe moral ndaj viktimave të pafajshme të gjenocidit dhe krimeve kundër njerëzimit, por edhe kushti i të gjitha kushteve për paqen dhe bashkëpunimin në rajon.
Me Aleksandër Vuçiç në Beograd, rajoni nuk do gjejë paqe, por vetëm konflikte dhe trazira,” tha Berisha.
Syri
E bija e policit hero që e vranë përlot me fjalimin: Flijove jetën për liri
Sot Kosova është në zi kombëtare. E bija e policit të vrarë Afrim Bunjakut, dha mesazhin e saj të lamtumirës, në homazhet që po mbahen këtë të hënë në Prishtinë.
”Heroi im babai im. Sa të vështirë e kam të shkruaj për ty babi! Ikja jote na la një plagë të madhe në zemrat tona. Babi nuk e di si jetoj pa ty, pa heroin tim. Vendin tënd në shtëpi s’e zë askush. Flijove jetën për liri! Ne e Kosova jemi krenarë për ty”,-tha ajo.
Në fund të fjalës së saj ajo i dha edhe një premtim babit të ndjerë. “Të premtoj që do të jem gjithmonë krenare me ty dhe do të ndjekim gjithmonë rrugën tënde. Me mall dhe dhimbje do të përkujtojmë gjithmonë”.
Koha Jone
Pamje ekskluzive, terroristet serbe duke ikur nga Manastiri - Klan Kosova
“KFORI dhe EULEX, ndihmuan terroristët të largohen në Serbi”
FIVE - A MUND TË ARRESTOHET MILAN RADOJÇIQ?
Terroristi Radoiçiç merr përgjegjësinë për sulmet në Banjskë, veri të Kosovës
-Botuar në radion “Europa e Lirë”-
Millan Radoiçiç e ka marrë përgjegjësinë për sulmet ndaj Policisë së Kosovës në fshatin Banjskë të Zveçanit më 24 shtator, ku është vrarë një zyrtar policor, dhe ka thënë se i ka bërë të gjitha përgatitjet logjistike për ngjarjet e asaj dite.
Ai e ka bërë këtë deklaratë të premten përmes një letre të lexuar nga avokati i tij Goran Petronijeviç për publikun, nga Beogradi.
Si pasojë e përleshjeve të Policisë me një grup të armatosur në këtë pjesë në veri të Kosovës – të banuar me shumicë serbe – kanë mbetur të vrarë edhe tre sulmues.
“Po i njoftoj të gjithë persekutorët vigjilentë të popullit serb, prej Kurtit e te ndihmësit e tij të shumtë të huaj, se unë personalisht i kam bërë të gjitha përgatitjet logjistike për mbrojtjen e popullit tonë kundër pushtuesit dhe ky akt i imi nuk ka asnjë karakter apo qëllim tjetër, dhe nuk ka të bëjë fare me të kaluarën time”, ka thënë ai, duke iu referuar kryeministrit të Kosovës, Albin Kurti.
Avokati, duke e lexuar letrën e Radoiçiçit, ka thënë se për veprimet e tij, Radoiçiç nuk e ka njoftuar askënd prej strukturave qeveritare serbe apo atyre politike lokale në veri të Kosovës, dhe as nuk e ka pranuar “ndonjë ndihmë” prej tyre.
Radoiçiç ka thënë se me ta ka pasur qëndrime të ndryshme në lidhje me “metodat e mëparshme të rezistencës ndaj terrorit të Kurtit”, dhe se atyre u është kërkuar “të tërhiqen pa arritur ndonjë rezultat të dukshëm”.
“Sepse na u tha se në këtë mënyrë do të kontribuojmë në ulje të shtensionimit, dhe se bashkësia ndërkombëtare dhe KFOR-i do të bëjnë gjithçka për të mbrojtur popullin tonë. Pala tjetër nuk e ka perceptuar qetësimin tonë të situatës si vullnet të mirë dhe krijimin e kushteve për negociatat, por si dobësi”, është thënë mes tjerash në letër.
Radoiçiçi i ka akuzuar autoritetet në Prishtinë, të udhëhequra nga kryeministri i Kosovës, Albin Kurti, për “pushtim të paligjshëm të veriut të Kosovës”.
“Arsyeja e kthimit tonë ishte inkurajimi i serbëve, popullit të asaj zone, për t’i rezistuar terrorit të regjimit të Kurtit, duke mbrojtur njerëzit tanë, që çdo ditë i ekspozohen atij terrori”, ka thënë ai.
Në letër, Radoiçiç ka theksuar se vrasja e policit të Kosovës ka qenë “aksidentale”, pas së cilës ka nisur “një përleshje e ashpër nga të dyja palët”.
Ai e ka njoftuar opinionin se po jep dorëheqje nga pozita e tij në Listën Serbe, duke theksuar se përfshirja e tij politike në Listën Serbe “nuk kishte të bënte me kthimin e tij në Kosovë”.
Ai ka thënë, mes tjerash, në letër se do t’i përgjigjet ftesës së autoriteteve të Republikës së Serbisë.
I pyetur se nga kanë ardhur të gjitha armët dhe pajisjet e përdorura në aksionin e 24 shtatorit, avokati ka thënë se nuk mund të flasë se çfarë do të kishte thënë Radoiçiq, nëse do të kishte bisedime për këtë gjë me autoritetet kompetente të Serbisë.
Petronijeviç e ka mohuar se Radoiçiç është plagosur në Banjskë apo që është trajtuar në spitalin ushtarak në Beograd.
Avokati ka thënë se nuk e ka parë videon e publikuar nga Policia e Kosovës, e cila pretendohet se tregon Radoiçiçin të armatosur, andaj “nuk mund të gjykojë për këtë”.
I pyetur nga gazetarët se kush e ka qëlluar zyrtarin policor të Kosovës dhe pse janë vendosur barrikadat, avokati ka thënë se “nuk ishte aty” dhe se “nuk mund t’i thotë ato detaje”.
Ai ka pretenduar se zyrtari policor është vrarë ”nga një shpërthim, jo nga plumbi”.
Në pyetjen e gazetarëve se ku ndodhet Millan Radoiçiç, pse nuk i është drejtuar vetë publikut dhe prej kujt fshihet, avokati ka pyetur: “Kush ka thënë që fshihet?”
“Ndoshta e di, ndoshta nuk e di”, ka thënë ai, duke mos dhënë më shumë hollësi nëse e di vendndodhjen e tij.
Kjo është hera e parë që Radoiçiçi reagon publikisht, pas sulmeve të 24 shtatorit.
Koha Jone
Vrasja e policit në veri të Kosovës, Sveçla për REL: Do të kërkojmë ekstradimin e Radoiçiçit dhe jo vetëm
Ministri i Brendshëm i Kosovës, Xhelal Sveçla, thotë në një intervistë për Radion Evropa e Lirë se autoritetet përgjegjëse, përmes partnerëve ndërkombëtarë, do të kërkojnë ekstradimin nga Serbia në Kosovë “të të gjithë atyre që kanë qenë të përfshirë në planifikimin dhe realizimin e aksioni terrorist” në Banjskë.
Më 24 shtator, grupe të armatosura në këtë fshat të pjesës veriore të Kosovës sulmuan forcat policore të Kosovës, duke vrarë rreshterin Afrim Bunjaku.
Pesë ditë pas sulmit, përgjegjësinë për organizimin e sulmit e mori Millan Radoiçiç, nënkryetar i deritashëm i Listës Serbe, partisë më të madhe të serbëve në Kosovë.
Në intervistën dhënë REL-it, ministri Sveçla thotë se Radoiçiç nuk ka vepruar i vetëm siç ka thënë, por i mbështetur nga presidenti i Serbisë, Aleksandar Vuçiç.
Ai thotë se hetimet e deritashme kanë treguar si “mbi 80 terroristë” kanë qenë të përfshirë në sulmin në Banjskë.
Sveçla flet edhe për përfshirjen e dyshuar ruse, si dhe për rreziqet e sigurisë që vazhdojnë t’i kanosen Kosovës.
“Vuçiç, Qeveria serbe të përfshirë”
Radio Evropa e Lirë: Zoti ministër, Millan Radoiçiq ka pranuar sot [29 shtator] se ka organizuar sulmin në Banjskë. Si e komentoni këtë veprim të tijin dhe a mendoni se ka vepruar i vetëm në përgatitjen e sulmit, ashtu siç ka thënë?
Xhelal Sveçla: Absolutisht nuk është e vërtetë. Millan Radoiçiq e ka pranuar një fakt, pasi është dëshmuar pjesëmarrja e tij në këtë sulm terrorist. Por, të gjitha faktet tregojnë se Millan Radoiçiq nuk ka vepruar kokë më vete, nuk ka punuar vetë. Ai ka qenë në vazhdimësi i mbështetur nga [presidenti i Serbisë] Aleksandar Vuçiq, nga Qeveria e Serbisë dhe nga të gjitha instrumentet që ai shtet ka.
Ne e dimë shumë mirë se ai ka qenë jashtëzakonisht i afërt me Aleksandar Vuçiqin, i cili ka qenë ministër i propagandës në kohën e qeverisjes së Millosheviqit. Ai, edhe pse është president i Serbisë, vazhdon të jetë ministër i propagandës.
Tendenca e tyre tash është që ta minimizojnë presionin ndaj Serbisë, duke dashur që ta lokalizojnë fajtorin. Fajtori dihet, ai është Aleksandar Vuçiq dhe idetë e tij ekstremiste në raport me gjithë rajonin, jo vetëm me Kosovën.
Sasia dhe llojet e armatimeve që janë zënë më 24 shtator në Banjskë është e pamundur të mblidhen nga një individ, edhe nëse ai është jashtëzakonisht i fuqishëm, siç është Millan Radoiçiq. Ka armatim ushtarak, ka armatim të vitit të prodhimit më 2021, 2022 – gjë që tregon se nuk janë mbetje të luftës së viteve 1998/99, apo edhe më herët në Ballkan, por janë armatime të dala drejtpërdrejt nga magazinat e ushtrisë së Serbisë. Këtë e kemi dëshmuar, duke prezantuar dokumente, të cilat i kemi zënë, ku bëhet pranim-dorëzimi i këtij armatimi.
Po ashtu, nuk është rast i izoluar, meqenëse armatime të ngjashme, me seri prodhimi të përafërta, ne kemi zënë edhe më herët në Zveçan, më 23 qershor, pastaj edhe më 7 gusht dhe më 5 shtator – qoftë në Zveçan, qoftë në Mitrovicë të Veriut. Do të thotë, ka qenë një plan i mirorganizuar, detajisht i përpunuar, i cili iu ka dështuar falë vendosmërisë, gatishmërisë për sakrificë dhe profesionalizmit të policisë së Kosovës. Por, plani ka qenë shumë më i madh. Vuçiqi është i përfshirë. Është edhe Qeveria e Serbisë e përfshirë. Siç duket, edhe vetë Rusia është e përfshirë në këtë skenar.
Radio Evropa e Lirë: Cilët do të jenë hapat e ardhshëm të Kosovës pas daljes së Radoiçiçit sot?
Xhelal Sveçla: Ne do të vazhdojmë ta hetojmë këtë sulm në detaje, t’i identifikojmë të gjithë terroristët që kanë marrë pjesë në këtë sulm, ta hetojmë gjithë hierarkinë e dy organizatave që ne tashmë i kemi shpallur terroriste – Severna Brigada dhe Civilna Zashtita [Brigada e Veriut dhe Mbrojtja Civile] – por edhe t’i dokumentojmë lidhjet e drejtpërdrejta me Qeverinë e Serbisë.
Në të njëjtën kohë, ne do të kërkojmë nga Serbia – patjetër përmes partnerëve tanë – që të gjithë të plagosurit që kanë arritur të ikin nga Kosova, si dhe ata që kanë ikur pa dëmtime, t’i dorëzohen drejtësisë së Kosovës, duke qenë se vetëm kështu, realisht, mund të sjellim një normalizim të situatës në Kosovë.
Po ashtu, do të kërkojmë që të gjitha inkursionet apo agresionet e Serbisë të ndalen njëherë e përgjithmonë, përfshirë edhe tërheqjen e ushtrisë nga afërsia e kufirit tonë.
Mendojmë se ka rreziqe. Ne jemi vigjilentë. Po përgatitemi që të përballemi dhe t’i përgjigjemi suksesshëm çfarëdolloj sfide, duke qenë se kemi përvoja tashmë jashtëzakonisht të këqija, qoftë me Serbinë, qoftë me presidentin e saj, Aleksandar Vuçiç.
Radio Evropa e Lirë: A do të kërkoni ekstradimin e Radoiçiçit dhe përfshirjen e komunitetit ndërkombëtar në këtë mes, marrë parasysh që Kosova dhe Serbia nuk kanë marrëveshje ekstradimi?
Xhelal Sveçla: Po, patjetër. Të Radoiçiqit dhe jo vetëm, të të gjithë atyre që kanë qenë të përfshirë në planifikimin dhe realizimin e këtij aksioni terrorist.
Radio Evropa e Lirë: Bazuar në informacionet që mund t’i ndani me ne – sa njerëz janë të përfshirë në hetimet që po bëni?
Xhelal Sveçla: Në fillim është menduar se janë diku mes 30 dhe 40 terroristë. Tashmë mund të themi se numri është më i madh, gjë që dëshmon suksesin edhe më të madh të policisë së Kosovës.
Policia e Kosovës ka qenë edhe në numër më të vogël, edhe me armatim më të dobët sesa ky grup terrorist, por ia ka dalë që pas humbjes së jetës së rreshterit Afrim Bunjaku, pas përfundimit të kësaj prite, të realizojë gjatë gjithë ditës një betejë të suksesshme – për të cilën po marrim përgëzime nga të gjithë aleatët tanë – dhe ta mundë këtë grup terrorist. Por, numri është i madh. Tash mund të themi se është mbi 80.
Radio Evropa e Lirë: A keni pasur ndonjë kontakt me Policinë e Serbisë ose me Agjencinë e Informacionit dhe Sigurisë atje, pas sulmit në Banjskë?
Xhelal Sveçla: Jo, nuk kemi pasur ndonjë kontakt. Ne mendojmë që ata janë të përfshirë drejtpërdrejt. Njëri ndër të vrarët është ish-truprojë e Aleksandar Vulinit, i cili është kreu i Agjencisë së Inteligjencës në Serbi, i cili, në të njëjtën kohë, është në listën e zezë të Shteteve të Bashkuara dhe të Britanisë së Madhe. Do të thotë, jemi në një situatë paradoksale, kur ti realisht ke të bësh me figura, të cilat jo vetëm se janë kriminelë, por janë edhe të sanksionuar nga bota demokratike.
Radio Evropa e Lirë: Presidenti i Serbisë, Aleksandar Vuçiq, ka thënë se do ta hetojë vrasjen e policit kosovar, Afrim Bunjaku. Cili është komenti juaj?
Xhelal Sveçla: Po si do ta hetojë ai vrasjen kur shpalli tri ditë zie për vdekjen e terroristëve gjatë sulmit të tyre në një shtet sovran? Do të thotë, ky grup terrorist vrau policin në detyrë, në pritë. Nuk ishte Afrim Bunjaku… nuk ishte pjesë e betejës, ai u vra në pritë, në momentin e parë të arritjes së patrullës sonë policore për të hetuar lidhur me barrikadën që këta terroristë kishin vendosur… dhe ai politikisht po i mbron këta, shpalli ditë zie.
Nuk është duke i arrestuar terroristët, të cilët janë kthyer në Serbi. Prandaj, nuk i besoj kësaj qasjeje cinike të presidentit të Serbisë, kur thotë se ai do ta hetojë vdekjen e policit. Ai po mundohet që ta zbusë realisht këtë presionin që mund t’i vijë apo duhet t’i vijë nga bota demokratike.
Radio Evropa e Lirë: E përmendët edhe më herët që po hetoni përfshirjen e mundshme ruse. Çfarë provash keni mbledhur deri më tani?
Xhelal Sveçla: Po, ne në një nga veturat… janë 24 vetura të terrenit, të cilat janë zënë në këtë fshat të mbushura me municione dhe materiale. Në njërën nga këto vetura kemi gjetur materiale ruse, po ashtu janë dy motorë katër-rrotësh për terrene të vështira, prodhim i Rusisë, që i janë dhënë donacion ushtrisë së Serbisë. Ka edhe informata të inteligjencës për përfshirjen e elementeve që janë drejtpërdrejt të lidhura me Rusinë.
Radio Evropa e Lirë: A e keni identitetin e ndonjë rusi të përfshirë, që dyshohet se është i përfshirë?
Xhelal Sveçla: Ne, në vazhdimësi, po punojmë në identifikimin e të gjithë këtyre terroristëve. Është fakt që disa prej tyre nuk kanë komunikuar me pjesëtarët tjerë të grupit dhe në asnjë moment nuk kanë hequr maskat nga koka e tyre. Kjo na bën shumë për të dyshuar në këta individë. Por, unë besoj që shumë shpejt, njësitë tona të specializuara të policisë së Kosovës, por edhe të agjencisë kosovare të inteligjencës, në bashkëpunim me aleatët tanë, do t’i identifikojnë edhe ata.
Radio Evropa e Lirë: Dyshoni se janë mercenarë apo hetimet janë në vazhdim…
Xhelal Sveçla: Unë, t’ju them të drejtën, nuk besoj shumë në mercenarë, në kuptimin e pagesave. Ky është projekt politik i Serbisë dhe Rusisë dhe ata shfrytëzojnë struktura të besuara të tyre. Do të thotë, ne jemi dëshmitarë se në Nish ka një qendër kinse humanitare ruse, e cila dihet botërisht se është qendër inteligjence, përmes së cilës ata përgjojnë të gjithë rajonin dhe në të cilën ka edhe ushtrime të ndryshme – qoftë për inteligjencë, qoftë për veprime në terren – dhe besojmë se edhe kjo qendër është e përfshirë në këtë sulm.
Çdo veprim agresiv ndaj Kosovës “do ta marrë përgjigjen e duhur”
Radio Evropa e Lirë: Përmendët më herët rrezikun për përshkallëzime të reja. Çfarë jeni duke bërë për t’i ulur kërcënimet e tilla?
Xhelal Sveçla: Po, patjetër se vërehen shenja të grumbullimit edhe të forcave ushtarake, por edhe të grupeve të ndryshme përreth kufirit të Kosovës. Ne, në vazhdimësi, jemi duke bashkëpunuar dhe duke u koordinuar me [misionin e BE-së për sundim të ligjit në Kosovë] EULEX-in dhe [misionin e NATO-s në Kosovë] KFOR-in, si përgjegjës të dytë dhe të tretë për sigurinë në Kosovë.
Po ashtu, jemi duke u konsoliduar si polici e Kosovës në mënyrë që çfarëdo veprimi agresiv ndaj Republikës së Kosovës, i çfarëdolloj përmase, ta marrë përgjigjen e duhur.
Radio Evropa e Lirë: Si e komentoni vendimin e NATO-s për të shtuar praninë e forcave të KFOR-it në Kosovë?
Xhelal Sveçla: Ky është i mirëseardhur. Ne kemi kontakte të vazhdueshme me udhëheqësit, përfaqësuesit e NATO-s. Ne, po ashtu, kemi kërkuar patrullime të përbashkëta të vijës kufitare mes Kosovës dhe Serbisë. Ju e dini shumë mirë se kemi një vijë shumë të gjatë të kufirit që ndan këto dy vende. Po ashtu, terreni është goxha i vështirë, na duhet të kemi edhe pajisje të veçanta për të vëzhguar çfarëdolloj lëvizjeje rreth kufirit. Dhe ky mendoj se është lajm i mirë.
Radio Evropa e Lirë: Cili do të ishte një mesazh i juaji për qytetarët në veri të Kosovës?
Xhelal Sveçla: Qytetarët në veri të Kosovës, në vazhdimësi, marrin mesazhe pozitive nga Qeveria e Republikës së Kosovës. Do të thotë, këta qytetarë janë shtetas të barabartë në vendin e tyre të Republikës së Kosovës. Institucionet e Republikës së Kosovës janë aty për t’iu shërbyer dhe për t’i mbrojtur ata. Kjo u dëshmua edhe më 24 shtator, kur ne kishim një betejë shumë intensive me terroristët, por, në asnjë moment, asnjë qytetar i yni civil as nuk është rrezikuar nga ne, as nuk është dëmtuar.
Për më shumë, nuk kemi ankesa nga këta qytetarë drejtuar sjelljes së zyrtarëve tanë policorë. Më lejoni t’ju përmend edhe një fakt: UNPD-ja ka bërë një vlerësim të besueshmërisë së qytetarëve ndaj policisë së Kosovës në atë zonë – në fakt, ka bërë më shumë se një – në kohën kur ne kishim policë të ish-strukturave paralele të integruar në policinë e Kosovës, do të thotë para dorëheqjes së tyre, para dorëheqjes së 547 policëve…
Besueshmëria në policinë e Kosovës në atë zonë ka qenë 15 për qind, për dallim prej pjesës tjetër të Kosovës. Tash është bërë edhe një matje, po ashtu nga UNDP-ja, dhe besueshmëria është rritur për 33.8 për qind.
Do të thotë, është më shumë se dyfishuar besueshmëria e qytetarëve në ato komuna veriore ndaj policisë së Kosovës. Unë jam i bindur që kjo besueshmëri do të rritet, për shkak se edhe bashkëpunimi me qytetarët atje është duke u rritur në vazhdimësi.
REL
Radoiçiç pranoi se organizoi sulmin terrorist në Veri, reagon për herë të parë Vuçiç: Ai duhet të….
Presidenti i Serbisë, Aleksandar Vuçiç, deklaroi se Millan Radoiçiçi “do të duhet t’i përgjigjet” ftesës së organeve kompetente shtetërore. Ky është reagimi i parë i Vuçiçit pasi Radoiçiçi mori përgjegjësi për organizimin e sulmit në Banjskë të Zveçanit.
Në këtë sulm u vra rreshteri Afrim Bunjaku, ndërkaq në përleshje me Policinë u vranë edhe tre sulmues.
“Unë jam i sigurt se autoritetet kanë arsye të bëjnë pyetje, dhe se a do ta ndjekë penalisht prokurori dhe për çfarë krimi, kjo nuk është pyetje për mua. Është pyetje për prokurorin dhe organet e tjera kompetente shtetërore”, tha Vuçiç.
“Nëse dikush mendonte se ai [Radoiçiçi] do të ikte ose do të fshihej, ai nuk do ta bëjë”, shtoi ai.
Ai gjithashtu vlerësoi se Radoiçiçi është “krenar” për rolin e tij në sulmin e armatosur dhe se “ai dhe djemtë që morën pjesë në të [sulm], e shohin atë [sulmin] në një mënyrë tjetër”.
“Nuk mendoj se dikush ka të drejtë ta vrasë dikë, do të duhet të bëhen disa pyetje, ndoshta ai nuk ka pasur rol në atë pjesë, pra prokurori do të gjejë diçka tjetër, ose nuk do të gjejë gjë, kjo është një pyetje për prokurorinë. E di që policia duhet të mbledhë informacione, pastaj vjen prokurori dhe merr vendim”, tha Vuçiçi.
Më 29 shtator, Millan Radoiçiq, që tha se po jep dorëheqje nga Lista Serbe – partia kryesore e serbëve në Kosovë që gëzon mbështetjen e Beogradit – përmes avokatit të tij e pranoi se ka organizuar dhe ka marrë pjesë në sulmin në Banjskë.
Më herët, autoritetet në Kosovë kanë publikuar dëshmi, sikurse një video të incizuar me dron, ku shihej Radoiçiçi i armatosur dhe i veshur me uniformë në Banjskë.
Kosova, përmes një rezolute të miratuar në Kuvend, ka bërë thirrje për hetim ndërkombëtar për Serbinë lidhur me rolin e saj në këtë sulm.
Sulmi ndaj Policisë së Kosovës është dënuar ashpër nga Shtetet e Bashkuara dhe Bashkimi Evropian.
REL
Arrestohet Milan Radoiçiç, organizatori i sulmit në veri të Kosovës
Ministria e Punëve të Brendshme të Serbisë tha të martën se ka arrestuar ish nënkryetarin e Listës Serbe, Milan Radoiçiçin, disa ditë pasi mori përsipër sulmin e 24 shtatorit mbi policinë e Kosovës në fshatin Banjskë në veri.
Në një njoftim të ministrisë së Brendshme serbe thuhet se atij i është caktuar masa e paraburgimit prej 48 orësh dhe ai i është dorëzuar Prokurorisë së Lartë në Beograd. Në njoftim thuhet se janë kryer bastisje në pronat e tij, por nuk jepen më shumë hollësi.
Më 29 shtator ai mori përgjegjësinë për përgatitjen dhe udhëheqjen e grupit të armatosur që sulmoi policinë e Kosovës, duke vrarë një oficer policie. Tre pjesëtarë të grupit të tij mbetën të vrarë pas përleshjeve që zgjatën pothuajse tërë ditën e 24 shtatorit.
Sulmi u cilësua si terrorist nga autoritetet në Prishtinë, Bashkimi Evropian dhe diplomatët perëndimorë të cilët kërkuan vënien e sulmuesve para drejtësisë. Prishtina akuzoi Beogradin për mbështetjen dhe pajisjen e grupit që kreu sulmin.
Milan Radoiçiç, i cili është i sanksionuar nga Shtetet e Bashkuara që nga dhjetori i vitit 2021, tha të premten në një deklaratë të transmetuar nga avokati i tij se “nuk e ka njoftuar askënd nga strukturat qeveritare të Serbisë, strukturat politike lokale nga veriu i Kosovës dhe se nuk ka marrë asnjë ndihmë prej tyre”, për sulmin.
Presidenti i Serbisë, Aleksandar Vuçiç i cili mohoi lidhjet me grupin e armatosur, tha se organet përgjegjëse serbe do të ndërmarrin veprime ndaj Milan Radoiçiçit dhe do të hetojnë ngjarjet e së dielës, duke akuzuar Prishtinën zyrtare për nxitje të dhunës në veri.
Sulmi i 24 shtatorit është ngjarja më e rëndë që nga shpallja e pavarësisë së Kosovës dhe ka nxitur shqetësime për qëndrueshmërinë në rajon.
Shtetet e Bashkuara dhe Bashkimi Evropian gjatë fundjavës shprehën shqetësimin për atë që e cilësuan si “një grumbullim të shtuar ushtarak serb në kufi me Kosovën”, ndërsa i kërkuan Beogradit që urgjentisht të tërheqë trupat ushtarake.
Beogradi mohoi të ketë ngritur shkallën e gatishmërisë së trupave, por pohoi se e ka ulur praninë e tyre në zonën përreth kufirit të Kosovës.
Koha Jone
Lirohet Millan Radoiçiç, i ndalohet hyrja në Kosovë
-Botuar në radion “Europa e Lirë”-
Gjykata në Beograd e ka liruar Millan Radoiçiçin nga mbajtja, një ditë pas marrjes në pyetje, ka njoftuar Gjykata e Lartë në Beograd.
Gjyqtari i procedurës paraprake e ka refuzuar propozimin e Prokurorisë së Lartë Publike në Beograd për caktimin e masës së paraburgimit për Radoiçiçin, pas intervistimit.
Prokuroria e ka kërkuar paraburgimin me arsyetimin e rrezikut të arratisjes.
Me vendimin e 4 tetorit, atij i është ndaluar largimi prej territorit të Serbisë, pa miratim të gjykatës dhe i është ndaluar të shkojë në territorin e Kosovës.
Sipas këtij vendimi, ai do të duhet të paraqitet në stacionin policor kompetent në datat 1 dhe 15 të çdo muaji.
Është thënë se atij i është konfiskuar përkohësisht dokumenti i udhëtimit, përkatësisht pasaporta e Republikës së Serbisë, dhe ai është paralajmëruar se mund t’i shqiptohet paraburgimi nëse i shkel të drejtat dhe detyrimet.
Ai akuzohet për blerje të armëve, municioneve dhe mjeteve shpërthyese me fuqi të madhe shkatërruese nga Tuzlla në Bosnje dhe Hercegovinë, nga janari 2023 deri më 24 shtator.
Radoiçiq e ka mohuar kryerjen e këtyre krimeve
Rama si Nikola Pashiqi.
“Skenari i terroristëve” - "Brenda bazave të paramilitarëve serbë në Veri" - Inside Story
Kërkesa e madhe - Kurti: Ma dorëzo Milanin! Vuçiq hesht - 16.05.2024
Regullat e Postimit
Përgjigju Duke Cituar
Krijoni Kontakt