SPAK arreston njerëzit e Edi Ramës në shëndetësi, vodhën $100 milionët e kontratës së sterilizimit

[Albo]

Emigranti shqiptar fiton koncesionin 100 milion USD të Sterilizimit


Një biznesmen i vogël shqiptar nga Peruxhia, pronar i një agjencie ndërmjetësimi dhe një kompanie ndërtimi qëndron pas tenderit të kontestuar me vlerë 100 milionë USD të Ministrisë së Shëndetësisë për sterilizimin e pajisjeve kirurgjikale dhe sallave të operacionit.

Nga Elton Qyno 13:06 | 24/11/2015


Ilir Rrapaj dhe kryeministri Edi Rama gjatë një takimi në pallatin e Brigadave në kuadrin e nismës “Thuaji Po Shqipërisë” | Foto nga : Facebook


Për më shumë se një dekadë, Ilir Rrapaj drejtoi një kompani të vogël ndërtimi me vetëm një të punësuar, të regjistruar në një zonë të qetë rezidenciale në qytetin e Peruxhias të rajonit Umbria në Itali, të cilën e themeloi së bashku me dy të afërm të tij në vitin 2000 me një kapital të vogël prej 1500 eurosh.

Megjithatë, pas fitores së Partisë Socialiste në zgjedhjet e qershorit 2013, emigranti me origjinë nga fshati Rexhepaj i Vlorës u kthye në Shqipëri dhe vendosi kontakte me kreun e shëndetësisë shqiptare, Ilir Beqaj, me të cilin ka pasur takime të shpeshta ku kanë marrë pjesë edhe biznesmenë italianë, të interesuar në tregun e shërbimeve mjekësore.

Dy vjet pas rikthimit në atdhe, me anë të një kompanie të regjistruar në Kosovë, Rrapaj është shpallur fituesi kryesor i një kontrate koncesionare prej 100 milionë dollarësh në një tender të kontestuar.

Nëpërmjet kompanisë së tij Investital LLC, e cila ka një kapital prej 1000 eurosh dhe është e regjistruar në Prishtinë, Rrapaj zotëron 40 % të aksioneve të një bashkimi kompanish italiane, të cilat fituan tenderin për sterilizimin e pajisjeve kirurgjikale.

Ortakët e Rrapajt në konsorcium janë tre kompani nga rajoni i Umbrias, përfshirë “Servizi Italia”, e cila ka një eksperiencë 35-40 vjeçare në fushën e sterilizimit dhe mbetjeve spitalore, “Tecnosanimed” dhe “U.Jet S.r.l”.

Konkurrent në tender kanë qenë gjithashtu një grup tjetër operatorësh ekonomikë Italianë si:”S.S.I”, “Mario Gugliemo” dhe “Brema Ambiente”, të përfaqësuar nga kompania “Action Laundery” me qendër në Durrës.

Konsorciumi humbës pretendon që shpallja fitues e konsorciumit në të cilin Rrapaj ka shumicën e aksioneve është e paligjshme, pasi ai ka dhënë një ofertë që tejkalon fondin limit. Ajo e ka ankimuar vendimin e Komision të Vlerësimit të Ofertave, KVO të Ministrisë së Shëndetësisë në Komisionin e Prokurimit Publik, KPP.

KPP-ja ka kërkuar rivlerësimin e vendimit fillestar të KVO-së, por kjo e fundit ka marrë një vendim të dytë, duke e shpallur përsëri grupin e kompanive ku përfshihet Investital LLC si fitues. [Kliko këtu për të shkarkuar vendimin e KPP-së]

Të dhënat e mbledhura nga BIRN sugjerojnë se konsorciumi i emigrantit shqiptar, Ilir Rrapaj ka pasur kontakte të vazhdueshme me ministrinë e shëndetësisë dhe ministrin Beqaj që nga viti 2013.

Mbetet e paqartë se çfarë roli luan kompania Invetital Ll.C në konsorcium, duke qenë që ka vetëm 1 të punësuar, kapital minimal dhe në dukje zero eksperiencë në fushën e mjekësisë.

I pyetur nëpërmjet telefonit për marrëdhënien e tij me Ilir Rrapajn, ministri Beqaj në fillim mohoi ta njihte. Pasi BIRN i dërgoi ministrit disa fotografi ku ai shfaqej me biznesmenin nga Peruxhia, Beqajt iu rifreskuar memoria, duke pranuar se “kishte njohje me z.Ilir Rrapaj.”

“Pas interesimit tuaj, nga hulumtimi i dokumentacionit lidhur me koncesionin me objekt ‘Për shërbime të integruara për ofrimin e setit të personalizuar të instrumenteve kirurgjikale…', rezulton se z. Ilir Rrapaj është përfaqësues i një prej kompanive, pjesëtare të një prej konsorciumeve ose Operatorëve Ekonomikë (OE) që kanë paraqitur interes për këtë procedurë prokurimi,” u shpreh Beqaj.

Ndërkohë Ministria e Shëndetësisë mohon që oferta e konsorciumit ku përfshihet Rrapaj të jetë mbi fondin limit të tenderit duke i cilësuar akuzat si “shpifje.”

Rrapaj nga ana tjetër refuzoi t'i komentonte kontaktet e tij me ministrin Beqaj, duke u mjaftuar me pretendimin se procedura e dhënies së koncesionit kishte qenë sipas tij e suksesshme.

Tenderi i dyshimtë


Ilir Rrapaj gjatë nje takimi të ministrit Ilir Beqaj me ambasadorin Italian në Tiranë dhe kreun e Qarkut të Umbrias, znj. Catiuscia Marini, më 11 dhjetor 2014 | Foto nga : Ministria e Shëndetësisë

Procedura e koncesionit 10 vjeçar me vlerë 9.6 miliardë lekë është hapur në 13 shkurt 2015, me një vendim të ministrit Ilir Beqaj.

Objekti i kontratës së partneritetit publik-privat ka për qëllim ofrimin e setit të personalizuar të instrumenteve kirurgjikalë sterilë, furnizimin me material mjekësor steril njëpërdorimësh në sallat kirurgjikale, trajtimin e mbetjeve me rrezik biologjik dhe dezinfektimin e sallave kirurgjikale dhe ambienteve.

Ky shërbim parashikohet të ofrohet në spitalet universitare dhe rajonale të vendit, apo dhe spitale të tjera, sipas planit të racionalizimit spitalor në Republikën e Shqipërisë.

Vlera e fondit limit të koncesionit është arritur pas një studimi fizibiliteti të ndërmarrë nga një komision i posaçëm, i ngritur nga Ministria e Shëndetësisë.

“Është marrë në studim viti 2013 dhe është vlerësuar numri total i ndërhyrjeve kirurgjikale dhe janë përllogaritur përafërsisht shpenzimet e kryera në blloqet operatore, kryesisht në spitalet rajonale dhe ato universitare, të cilët kanë aktivitet të shkuar kirurgjikal,” tha Ministria e Shëndetësisë, në përgjigje të një kërkese për informacion nga BIRN.

“Ky koncesion do të trajtohet sipas formulës “Pay and Use,” e cila nënkupton se, kompania që do të kryejë shërbimin do të paguhet për njësi, që në këtë rast është ndërhyrja kirurgjikale,” shtoi ajo.

Ministria sqaroi më tej se analiza e situatës ishte kryer pasi kishte mbledhur informacion nëpërmjet një pyetësori dhe kishte arritur në përfundimin që sistemi i menaxhimit, sterilizimit dhe mirëmbajtjes së sallave kirurgjikale apo instrumenteve kishte probleme serioze.

Sipas ministrisë, menaxhimi ishte shumë i kushtueshëm për shkak të numrit të lartë të punonjësve të përfshirë dhe shumësisë së makinerive të përdorura në çdo bllok operator.

Me datën 4 Maj 2015, Ministria e Shëndetësisë ka zhvilluar procedurën e prokurimit për koncesionin dhe në datë 26 Maj, autoriteti kontraktues ka publikuar renditjen e operatorëve ekonomikë.

Komisioni i Vlerësimit të Ofertave ka shpallur konsorciumin e përbërë nga Investital Llc, Servizi Italia S.p.a, U.Jet S.r.l dhe Tecnosanimed të parët me 73.89 pikë dhe në vendin e dytë konsorciumin e përbërë nga “Action Laundry,” S.S.I”, “Mario Gugliemo” dhe “Brema Ambiente” me 42.83 pikë.

Sipas “Action Laundry” përllogaritet që konsorciumi i udhëhequr nga “Servizi Italia” S.p.a, që u klasifikua i pari, e ofroi shërbimin për 1 vit në vlerën e 1 miliardë lekë, kundrejt ofertës 753 milion lekë të ofruar nga grupi i operatorëve të udhëhequr nga “Action Laundry”, që u rendit e dyta.

Kompania me qendër në Durrës pretendon se diferenca për 1 vit kap vlerën 250 milion lekë, ose për 10 vjet një vlerë prej 2.5 miliardë (17.8 milionë euro).

Më 8 qershor, bashkimi i operatorëve i udhëhequr nga Action Laundry ka paraqitur një ankesë në KPP duke kundërshtuar renditjen e operatoreve në procedurën e koncesionit si dhe kualifikimin e konsorciumit tjetër, të përfaqësuar nga Servizi Italia S.p.a.

Me datë 22 qershor, KPP-ja pranon pjesërisht ankesën e Action Laundry dhe i kërkon Ministrisë së Shëndetësisë të rivlerësojë ofertat, pasi vëren se mbledhja e pikëve në vlerësimin e parë ka gabime matematikore.

Anëtarët e KPP në vendimin prej 46 faqesh argumentonin se:… “Në respekt të parimit të transparencës dhe barazisë si dy ndër parimet kryesore të zhvillimit të procedurës së dhënies së koncesionit, autoriteti kontraktor (Ministria e Shëndetësisë) ka gabuar në mbledhjen aritmetike të pikëve në total… Sa më sipër, Komisioni i Prokurimit Publik gjykon se autoriteti kontraktues në rivlerësimin e procedurës duhet të kryejë edhe mbledhjen e saktë aritmetike të pikëve dhënë operatorëve ekonomikë pjesëmarrës në këtë procedurë…”

Pas këtij vendimi detyrues, procedura e mbledhjes së pikëve është mbajtur në datën 28 shtator 2015, dhe pikërisht në atë ditë është shpallur fituesi ku sërish ka qenë bashkimi i operatorëve “Servizi Italia”. Por çuditërisht, këtë herë kjo kompani ka marrë më shumë pikë se në vlerësimin e parë.

Nga 73.98 pikë që kishte në vlerësimin e parë, tani ishte vlerësuar me 91.03 pikë. Pra me një diferencë prej 22 pikësh më tepër.

Në anën tjetër, bashkimi i operatorëve që përfaqësohej nga “Action Laundry” ka marrë 45 pikë, nga 42.83 që kishte marrë në rivlerësimin e parë.

Sipas “Action Laundry,” rivlerësimi i dytë i pikëve nga Ministria e Shëndetësisë ka qenë sërish i pasaktë dhe i dyshimtë, pasi pikët akorduar konsorciumit të drejtuar nga Servizi Italia janë rritur ndjeshëm.

“Konkretisht në rivlerësimin e dërguar, oferta e shoqërisë “Servizi Italia” SPA rezulton përsëri e renditur në vendin e parë, por nga 73.98 pikë që kishte në vlerësimin e mëparshëm, tani çuditërisht është vlerësuar me 91.03 pike,” Action Laundry i tha BIRN.

“KVO-ja ka gabuar në vlerësimin me pikë të ofertës tonë, e cila rezulton të jetë oferta fituese e procedurës, sepse në finale shoqëria jonë për të njëjtin shërbim të kërkuar nga Autoriteti Kontraktor ka ofruar vlerën 753.500.000 lekë, ndërkohë që shoqëria ” Servizi Italia” SPA ka ofruar vlerën 1.003.780.000 leke,” shtoi ajo.

Action Laundry gjithashtu nënvizon që oferta e konsorciumit të drejtuar nga Servizi Italia për një periudhë 10-vjeçare tejkalon dhe fondit limit prej 9.6 miliardë lekësh.

E pyetur nga BIRN, Ministria e Shëndetësisë i hodhi poshtë pretendimet e “Action Laundry” si të pavërteta.

“Nuk është e vërtetë që oferta e “Servizi Italia” është mbi fondin limit. Këtë spekulim, e ka bërë konkurrenti tjetër, i cili ka vendosur në mënyrë arbitrare volumet vjetore të çdo grupndarjeje të llojit të ndërhyrjes kirurgjikale,” tha Ministria në një përgjigje me postë elektronike.

“As në realitetin e shërbimit kirurgjikal në Shqipëri, dhe as në dokumentat e tenderit të garës së koncensionit nuk ekziston e dhëna se realizohen çdo vit 15 mijë ndërhyrje kirurgjikale me intesitet të lartë. Në realitet, ndërhyrjet me intesitet të lartë janë disa herë më pak. Rritja artificiale e volumit të grupndërhyrjeve me çmim të lartë për njësi është kryekëput e pasaktë,” shtoi ajo.

Sipas Ministrisë së Shëndetësisë konkurrenti që është ankuar, ka “shpikur qëllimisht një shpërndarje të pavërtetë të ndërhyrjeve kirurgjikale, me qëllim krijimin e një situate të paqenë në vlerën vjetore të furnizimit të set-eve të instrumenteve kirurgjikalë të sterilizuar dhe materieleve mjekësore njëpërdormëshe të ofertës fituese.”

Ajo shtoi që vlera prej 1 miliardë lekë që pretendohet se është kosto e vjetore e shërbimit të ofruar nga Servizi Italia është e pavërtetë, por nuk saktësoi se cila është kosto e këtij shërbimi.

Pas shpalljes së vendimit të KPP-së me datë 10 korrik, kompanitë Investital Llc, Servizi Italia S.p.a, U.Jet S.r.l dhe Tecnosanimed, kanë regjistruar një kompani të re për të operuar me koncesionin, të quajtur SaniService Sh.p.k.

Edhe pse me shumë pak eksperiencë se partnerët e tjerë italianë, kompania e Rrapajt, Investital Llc merr 40 % të aksioneve të kompanisë së re SaniService Sh.p.k, Servizi Italia S.p.a 30 %, Tecnosanimed 15 % dhe U.Jet S.r.l 15 %.

Investimi i Rrapajt nëpërmjet e Investital Llc për të kontrolluar 40 % të kompanisë me koncesionin 100 milionë dollarësh është vetëm 8 mijë euro. [Kliko këtu për ekstraktin e SaniSerice sh.p.k]

Lidhjet midis Ilir Rrapajt dhe Ilir Beqajt


Ilir Rrapaj, ministri Ilir Beqaj dhe z/ministri Klodian Rrjepaj, më dt. 19 Dhjetor 2013, gjatë vizitës zyrtare të Ministrit të Shëndetësisë në Rajonin e Peruxhias, Itali. | Foto nga : Facebook

I lindur në vitin 1972, Rrapaj ka emigruar në Itali në vitet 90' dhe është vendosur në rajonin e Umbrias. Më 17 prill 2000, ai regjistron në Peruxhia kompaninë Ali Pashë Tepelena SAS, një kompani në kategorinë e “artizanatit” me vetëm një të punësuar dhe një kapital prej 3 milionë liretash, të cilat më vonë konvertohen në 1549, 38 euro. [Kliko këtu për të shkarkuar esktraktin e Ali Pashe Tepelena SAS]

Ilir Rrapaj zotëron 50 % të aksioneve të kompanisë dhe 50 për qind kontrollohen nga i afërmi i tij Mitat Rrapaj, i cili në vitin 2007 ia dhuron ato shtetases Italiane Elisa Bulagna.

Lidhja e Rrapajt me fushën e shëndetësisë është e paqartë, edhe pse ai pretendon të këtë mbaruar studimet për mjekësi. Megjithatë, më 22 nëntor të vitit 2013, Rrapaj merr pjesë në nismën “Thuaj Po Shqipërisë”, të mbajtur në pallatin e Brigadave në Tiranë.

Fotot të siguruara nga BIRN tregojnë se në këtë konferencë që mblidhte profesionistët shqiptarë të shëndetësisë në vende të ndryshme të botës, Rrapaj përveç ministrit Beqaj ka takuar dhe kryeministrin Edi Rama.

Mbas konferencës në nëntor të vitit 2013 dhe shpalljes së koncesionit për sterilizimin e seteve dhe sallave kirurgjikale në shkurt të këtij viti, Rrapaj dhe përfaqësues të kompanive të tjera italiane, pjesë të konsorciumit fitues kanë pasur një numër takimesh në Tiranë dhe Itali me ministrin e shëndetësisë Ilir Beqaj.

Në dhjetor të vitit 2013, ministri Beqaj dhe zëvendës ministri i shëndetësisë Klodian Rrjepaj vizitojnë rajonin e Umbrias në Itali me ftesë Qarkut të Umbrias dhe Universitetit Shtetëror të Peruxhias.

Gjatë vizitës, Beqaj nënshkruan një marrëveshje bashkëpunimi me Universitetin e Peruxhias, po ajo që bie në sy është prezenca e Ilir Rrapajt dhe e ortakëve të tij italianë gjatë takimeve.

Beqaj e viziton disa herë rajonin e Umbrias në vitin 2014. Në dhjetor të këtij viti ai nënshkruan një memorandum bashkëpunimi me Qarkun e Umbrias, ku Rrapaj është gjithashtu prezent në takimet zyrtare, në krah të ministrit Ilir Beqaj.

“Modeli i shëndetësisë në disa rajone të Italisë, i cili është rrjedhojë e një reforme që Italia e ka filluar që në vitin 1978 na shërben si pikë referimi,” tha Beqaj gjatë nënshkrimit të Memorandumit në Tiranë me presidenten e Qarkut të Umbrias, znj. Catiuscia Marini.

Beqaj shtoi Memorandum i Bashkëpunimit është paraprirë edhe nga një Protokoll Bashkëpunimi i nënshkruar më 18 dhjetor 2013 mes :”Universitetit të Bologna-s dhe Ministrisë së Shëndetësisë së Republikës së Shqipërisë, në bashkëpunim me “Polo Biomedical Umbria” – e cila numëron më shumë se 20 kompani të Umbria-s të sektorit shëndetësor e biomjekësor – në mënyrë që të zhvillojnë bashkëpunimin dhe kooperimin në sektorët e logjistikës spitalore, të inxhinierisë klinike dhe shkencave veterinare.”

Tre kompanitë fituese të koncesionit për pajisjet kirurgjikale, Servizi Italia S.p.a, U.Jet S.r.l dhe Tecnosanimed janë pjesë e “Polo Biomedical Umbria,” por mbetet e paqartë nëse Protokolli i Bashkëpunimit ka luajtur ndonjë rol në procedurën e prokurimit.

Kompania e Rrapajt, Investital Llc është regjistrua në Prishtinë në korrik të vitit 2014. Në faqen e saj zyrtare, ajo përshkruhet si një agjenci investimesh, me interesa në sektorin e industrisë, turizmit dhe shëndetësisë.

Duke komentuar fotot ku shfaqet përkrah Ilir Rrapajt, ministri Beqaj pranoi që biznesmeni nga Peruxhia në të paktën një okazion zyrtar ishte i ftuar i ministrit të shëndetësisë.

“Fotoja e parë duhet të jetë shkrepur në restorantin “Sofra e Ariut” në Tiranë, në një darkë që Ministri i Shëndetësisë Ilir Beqaj, shtroi për nder të Ambasadorit Italian, z. Massimo Gaiani, dhe një grupi përfaqësuesish të Rajonit të Umbrias, këshillit drejtues akademik të Universitetit Shtetëror të Peruxhias (Università degli Studi di Perugia) dhe dhomës tregtare Confimi Impresa (Konfederata Italiane e Sipërmarrjeve Industriale të Vogla dhe të Mesme),” tha Beqaj.

Ai shtoi në një komunikim të dytë se nga nëntori 2013, deri në dhjetor 2014 ishte takuar katër herë më biznesmenin Ilir Rrapaj, në cilësinë e tij si përfaqësues Confimi Impresa.

I kontaktuar nga BIRN, Ilir Rrapaj u shpreh se fitues të koncesionit për setet kirurgjikale ishin shpallur kompanitë më të mira, duke përmendur “Servizi Italia”.

I pyetur mbi akuzat e Partisë Demokratike se në këtë koncesion një mik i kryeministrit Edi Rama dhe ministrit Beqaj ishte shpallur fitues, Rrapaj tha se: “nuk më interesojnë këto gjëra dhe nuk merret me politikë,” duke shtuar se ky koncesion ka për të qenë “një sukses.”


Ky artikull u prodhua si pjesë e iniciativës “Fuqizimi i Bashkëpunimit mes Shoqërisë Civile dhe Gazetarëve Investigativë,” me mbështetjen e Fondacionit Shoqëria e Hapur për Shqipërinë.


BIRN

[Albo]

Koncesioni i sterilizimit u kushton 3.2 milionë USD shqiptarëve në 10 muajt e parë

Nga Lindita Çela 11:44 | 27/05/2017


Ministri i Shëndetësisë, Ilir Beqaj, ghatë një konference për shtyp në shtator pë recetën elektronike | Foto nga : LSA

Të dhënat e siguruara në Fondin e Sigurimit të Detyrueshëm tregojnë se koncesionari i sterilizimit të pajisjeve kirurgjikale ka mbuluar rreth 14 mijë ndërhyrje kirurgjikale me një kosto prej rreth 320 milionë lekësh gjatë 10 muajve të parë të operimit të tij.

Të dhënat e siguruara nga BIRN tregojnë se koncesioni i sterilizimit të pajisjeve kirurgjikale, i fituar nga konsorciumi Sani Service u ka kushtuar taksapaguesve shqiptarë më shumë se 320 milionë lekë gjatë 10 muajve të parë të operimit.

Pagesa e mësipërme përfshin vetëm setet kirurgjikale të ofruara nga koncesionari për rreth 14 mijë operacione të kompleksitetit të lartë, të mesëm dhe të ulët, të kryera në qendrën universitare “Nënë Tereza” gjatë muajve Maj 2016-Mars 2017.

Përveç seteve sterile kirurgjikale, kontrata koncesionare parashikon që kompania të ofrojë edhe materiale mjekësore një përdorimëshe apo dezinfektimin e sallave kirurgjikale. Por vlera e përfituar nga këto shërbime mbetet ende e panjohur, pasi koncesionari e ka filluar këtë shërbim në Prill 2017.

Fondi i Sigurimit të Detyrueshëm të Kujdesit Shëndetësor i vuri në dispozicion BIRN pasqyrat përmbledhëse të ndërhyrjeve kirurgjikale të mbuluara nga Sani Service për 10 muajt e parë të operimit. Kërkesës për numrin e materialeve të sterilizuara me avull, të destinuara për aktivitete ndihmëse, FSDKSH u përgjigj se “nuk disponon ende informacion statistikor”.

Kontrata e koncesionit për sterilizimin e pajisjeve kirurgjikale u firmos mes Ministrisë së Shëndetësisë dhe Sani Service në dhjetor 2015 për një afat 10 vjeçar me një vlerë të parashikuar prej 9.6 miliardë lekësh.

Kompania koncesionare Sani Service përbëhet nga bashkimi i kompanive Investital Llc, Servizi Italia S.p.a, U.Jet S.r.l dhe Tecnosanimed.

Paketën më të madhe me 40 për qind të aksioneve e zotëron Investital Llc- një kompani e vogël me kapital 1 mijë euro e regjistruar në Kosovë nga Ilir Rrapaj. Në një investigim të mëparshëm, BIRN zbuloi se Rrapaj u kthye në Shqipëri pas zgjedhjeve të vitit 2013 dhe para se të fitonte koncesionin, vendosi kontakte të shpeshta me ish-ministrin e Shëndetësisë, Ilir Beqaj.

Ndërkohë, paketa e mbetur e aksioneve të koncesionit ndahet në 15 për qind për Servizi Italia, 15 për qind për Tecnosanimed dhe 15 për qind për U.Jet S.r.l.

Në dokumentet e tenderimit, Ministria e Shëndetësisë shpjegoi se shërbimi i dhënë me koncesion do të ofrohet në spitalet universitare dhe ato rajonale të vendit. Sipas studimit të fizibilitetit që i parapriu koncesionit, numri i ndërhyrjeve kirurgjikale në këto spitale arriti në 50 mijë gjatë vitit 2013.

Të dhënat e siguruara nga BIRN në Qendrën Kombëtare të Bizneseve tregojnë se deri në fund të marsit 2017, Sani Service e kishte shtrirë aktivitetin e saj vetëm në qendrën spitalore universitare “Nënë Tereza” dhe në maternitetin Koço Gliozheni.

Me shtrirjen e këtij shërbimi në të gjitha spitalet universitare dhe rajonale-siç edhe parashikohet në kontratë, vlera e këtij shërbimi pritet të rritet shumëfish në vitet e ardhshme.

Kontrata koncesionare

I vendosur nën kritika për politikën e dhënies me koncesion të shërbimeve të kushtueshme në shëndetësi, kryeministri Edi Rama është mburrur vazhdimisht se kjo praktikë ka bërë të mundur modernizimin e shërbimeve.

Në qershor 2016, Rama inspektoi funksionimin e koncesionit të sterilizimit të kompanisë Sani Service dhe e quajti atë” një operacion të jashtëzakonshëm…dhe një tjetër hap me rëndësinë funksion të rilindjes së sistemit shëndetësor”.

Megjithatë, kontrata e koncesionit të cilën BIRN e disponon, tregon se shqiptarët do ta paguajnë gjithnjë e më shtrenjtë këtë shërbim. Në kontratën e lidhur, çmimet për njësi për pajisjet e seteve kirurgjikale janë ndarë në tre kategori, atë të kompleksitetit të lartë, të kompleksitetit të mesëm dhe të kompleksitetit të ulët.

Seti kirurgjik për ndërhyrjet e kompleksitetit të lartë do të kushtojë 37.700 lekë, ai për ndërhyrjet me kompleksitet të mesëm 22.300 lekë dhe për ndërhyrjet me kompleksitet të ulët 13.900 lekë.

Sipas FSDKSH, Sani Service ka mbuluar me sete kirurgjikale 14 528 ndërhyrje kirurgjikale gjatë periudhës Maj 2016-Mars 2017. Nga këto, 3217 ndërhyrje kanë qenë të kompleksitetit të lartë, 5024 ndërhyrje të kompleksitetit mesatar dhe 6287 ndërhyrje të kompleksitetit të ulët.

Llogaritë matematikore tregojnë se Sani Service është paguar 320 705 400 lekë për setet kirurgjikale për të trija kategoritë ose rreth 3.2 milionë dollarë nga Fondi i Sigurimit të Detyrueshëm të Kujdesit Shëndetësor.

Kompania koncesionare ka ofruar gjithashtu instrumente të sterilizuara me avull për pacientët ambulantë dhe sterilizim me temperaturë të ulët, të cilat kushtojnë respektivisht 266 dhe 1090 lekë për njësi. Por Fondi sqaroi për BIRN se ky shërbim ka filluar më 8 Prill 2017.

Kontrata koncesionare përcakton që marrëdhënia mes FDSKSH dhe kompanisë të procedohet përmes raporteve ditore dhe atyre mujore të ndërhyrjeve të planifikuara kirurgjikale.

“Personeli spitalor duhet të njoftojnë koncesionarin në lidhje me shërbimet e përfituara duke i dërguar këtij të fundit një informacion ditor dhe mujor. Informacioni ditor do të përfshijë ndër të tjera, numrin identifikues, tipin e ndërhyrjes, datën, klasifikimin e ndërhyrjes, paketime me avull, ose me temperaturë të ulët, të kryera nga struktura spitalore,” thuhet në nenin 5 të kontratës.

Kontrata përcakton penalitete për autoritetin kontraktor, në rastet kur përdoren më shumë materiale sterile se ato të përcaktuara apo kur vonohet disbursimi i pagesave.

Në rastin e parë, kompanisë i lind e drejta të paguhet për çmimin më të lartë plus 40 euro, ndërsa në rastin e pagesave të vonuara, kompania duhet të paguhet bashkë me një interes prej 7 për qind.


BIRN

[Albo]

Kontrata PPP e sterilizimit i kushton shtrenjtë sistemit shëndetësor

Pesë vjet pas nënshkrimit, kontrata e seteve kirurgjikale po i kushton gjithnjë e më shtrenjtë financave të shëndetësisë, ndërkohë që mjekët dhe kirurgët i kanë rikthyer sytë nga autoklavat e vjetra për të kryer detyrën dhe mbajtur kostot nën kontroll.

Nga Anila Hoxha 18:20 | 23/11/2020


Ilustrim grafik nga Jurgena Tahiri/BIRN.

Pas një operacioni rutinë në spitalin Universitar të Traumës në Tiranë, kirurgu kthehet në zyrë me një pajisje në dorë, që sapo e ka marrë fshehurazi nga salla e operacionit. Ai e vendos atë mbi tavolinë, e çmbështjell nga një copë letër higjienike dhe tregon me gisht elektrobisturinë në ngjyrë blu, ende të paketuar në qese.

“Ky instrument do të hidhej në mbeturina,” tha kirurgu, i cili foli me BIRN në kushtet e anonimatit. “Ky është shembulli flagrant sesi shpërdorohen paratë tona,” shtoi ai gjatë bisedës së zhvilluar në zyrën e tij, në mesin e tetorit.

Elektrobisturia mbi tavolinën e kirurgut është pjesë e njërit prej seteve kirurgjikale, që kompania koncesionare “SaniService” i shet Ministrisë së Shëndetësisë për çmime që variojnë nga 16 mijë lekë deri në 45 mijë lekë [me TVSH] për çdo ndërhyrje.

Mjeku thotë se ka për qëllim që ta shpëtojë instrumentin duke e sterilizuar “ilegalisht” atë –në mënyrë që të kursejë para përmes përdorjes në një seri operacionesh të tjera.

Episodi i spitalit të Traumës nuk është një rast i izoluar. Të gjendur nën presionin e çmimeve të shtrenjta të seteve kirurgjikale, mjekët i kanë kthyer sytë tek autoklavat e vjetra, që janë rikthyer tashmë në qarkullim në disa prej spitaleve të rëndësishme të Tiranës.

Kontrata e Partneritetit Publik Privat për sterilizimin e instrumenteve kirurgjikale është në vitin e pestë të operimit, por ka shënuar rritje të kostove të parashikuara me gati 30%. Nga 9.6 miliardë lekë të parashikuara në vitin 2015, sterilizimi pritet tashmë të kushtojë 12.3 miliardë lekë në total.

Pagesat realizohen sipas skemës “përdor dhe paguaj”, ndaj rritja e numrit të ndërhyrjeve sjell rritje “pa tavan” të pagesave. Megjithatë, numri i operacioneve nuk është kalkulimi i vetëm i gabuar që rëndon sot mbi financat e sektorit të shëndetësisë.

BIRN intervistoi mjekë dhe kirurgë të spitave të ndryshme të Tiranës, të cilat pohuan se formula e zgjedhur i rrit shpeshherë kostot edhe fiktivisht. Mjekët pranuan se kishin përdorur sete të shtrenjta për mikrokirurgjitë dhe ishin detyruar shpeshherë që të hapnin dy ose tre sete gjatë një operacioni, për të gjetur instrumentin kirurgjikal që u nevojitej.

Sipas një vlerësimi të Kontrollit të Lartë të Shtetit, kontrata e sterilizimit është hartuar në kushte favorizuese vetëm për koncesionarin dhe pritet të sjellë probleme në vazhdimësi për financimin e saj.

Kontrata PPP është gjithashtu një nga dosjet e para të bujshme që përfundoi në dyert e Prokurorisë së Posaçme kundër Korrupsionit dhe Krimit të Organizuar dhe po hetohet prej 11 muajsh për tre vepra penale që lidhen me korrupsionin.

Ish-ministri i Shëndetësisë, Ilir Beqja e mbrojti kontratën në një përgjigje me shkrim për BIRN, pavarësisht kostove të rritura dhe akuzave të regjistruara nga Prokuroria.

“Kanë kaluar tashmë më shumë se 4 vjet nga ndërhyrja e parë kirurgjikale e realizuar me këtë shërbim të ri, por në dijeninë time asgjë nuk ka shkuar keq,” tha Beqja, firmëtar i kontratës.

“Përkundrazi, tashmë është e provuar se shërbimi kirurgjikal në çdo sallë operacioni të Shqipërisë është ndryshuar radikalisht dhe se çdo kirurg apo obstretër në Shqipëri operon në kushte shumë më të mira steriliteti me instrumenta kirurgjikale të gjeneratës së fundit,” shtoi ai.

Kompania koncesionare, SaniService nuk iu përgjigj pyetjeve të BIRN deri në publikimin e këtij shkrimi.

Dhurimi i stacionit të sterilizimit

Kontrata e sterilizimit të pajisjeve kirurgjikale është një prej 4 projekteve të Partneritetit Publik-Privat me mbështetje buxhetore në sektorin e shëndetësisë, me zanafillë te programi i qeverisjes së kryeministrit Edi Rama pas ngjitjes së tij në në pushtet në vitin 2013.

Kontrata u firmos në dhjetor 2015 mes ish-ministrit të Shëndetësisë, Ilir Beqja dhe kompanisë koncesionare SaniService –aksionerët e së cilës janë Investital LLC dhe kompanitë italiane “Servizi Italia”, “Tecnosanimed” dhe “U.Jet S.r.l”.

Paketën më të madhe me 40 për qind të aksioneve e zotëron Investital LLC- një kompani e vogël e themeluar me kapital 1 mijë euro në Kosovë nga Ilir Rrapaj. Në një investigim të mëparshëm, BIRN zbuloi se Rrapaj u kthye në Shqipëri pas zgjedhjeve të vitit 2013 dhe para se të fitonte koncesionin, vendosi kontakte të shpeshta me ish-ministrin e Shëndetësisë, Ilir Beqaj.

Dokumentet e siguruara nga BIRN përmes një hetimi të zhvilluar në vitin 2016 nga Prokuroria e Tiranës tregojnë se kompania koncesionare e nisi punën nga një stacion modern sterilizimi i ndërtuar në Qendrën Spitalore Universitare “Nënë Tereza” me kredi të qeverisë shqiptare, por që nuk ishte vënë për asnjë ditë në punë.

Sipas një raporti të KLSH, pajisje me vlerë mbi 107 milionë lekë të blera nga qeveria shqiptare iu dhuruan koncesionarit pa pagesë dhe pa asnjë parashikim në kontratë.

Qendra e sterilizimit ishte ndërtuar në vitin 2009 përmes një kredie që qeveria shqiptare kishte marrë në Bankën e Këshillit të Europës –CEB. Transferimi i saj nën administrimin e koncesionarit u bë pjesë e hetimit të kryer nga Prokuroria e Tiranës –i cili u pushua në shtator 2016 pa pasoja.

Anëtarët e komisionit që përgatiti studimin e fizibilitetit për koncesionin e sterilizimit i thanë Prokurorisë se qendra nuk ishte vënë në punë prej tetë vitesh për shkak të mungesës së stafit të trajnuar. Ata e përdorën atë si një argument më shumë se pse shërbimi duhej dhënë me koncesion.

“Ky koncesion pikërisht për të ruajtur këtë investim, parashikon ta jetësojë këtë qendër, duke e vënë në punë atë,” deklaroi në Prokurori një nga anëtaret e komisionit.

Dokumentet e hetimit tregojnë gjithashtu se Ministria e Shëndetësisë e paracaktoi dhënien e shërbimit me koncesion dhe u përball me hezitimin e ish-ministrit të Financave, Shkëlqim Cani për ta miratuar atë.

Dy ish-ministrat shkëmbyen korrespondencë nga tetori 2015 deri në janar 2016, ku Cani kërkoi fillimisht që të argumentohej se pse ishte zgjedhur koncesioni dhe jo prokurimi i zakonshëm.

Ish-ministri i Financave paralajmëroi gjithashtu rritjen e kostove përtej tavaneve buxhetore, por e miratoi kontratën me kushtin që financimi i projektit të respektonte në mënyrë rigoroze limitin buxhetor të parashikuar për këto shërbime.

“Lidhur me riskun e kërkesës, duke qenë dakord me mënyrën e përballimit të tij… do të kërkonim që Ministria e Shëndetësisë të marrë të gjitha masat e duhura, që ky risk të minimizohet sa më shumë që të jetë e mundur përgjatë periudhës së koncesionit,” shkruante Cani në janar 2015.

Prokuroria e Tiranës iu rikthye arsyeve se pse Ministria e Shëndetësisë zgjodhi procedurën PPP përballë prokurimit të zakonshëm në seancën e pyetjeve me anëtarët e komisionit, ndërkohë që këta të fundit dhanë si argument mungesën e fondeve për investim në buxhetin e Ministrisë së Shëndetësisë.

Ish-zv.ministri i Shëndetësisë, Klodian Rrjepaj, i cili ishte edhe kryetar i komisionit i tha Prokurorisë se rinovimi i instrumenteve kirurgjikale kapte shifrat e 11 milionë eurove, ose dyfish e gjysmë mbi zërin që Ministria e Shëndetësisë kishte në dispozicion për investime.

“Skema PPP është më e favorshme për shkak të investimit fillestar të madh, që nuk përballohet nga shteti si dhe për shkak të marrjes së riskut totalisht nga privati,” shton Rrjepaj në dëshmi.

Ndryshe nga parashikimi në studimin e fizibilitetit, Ministria e Shëndetësisë paguan çdo vit një faturë edhe më të shtrenjtë sesa investimi fillestar prej 11 milionë eurosh –me kosto që luhaten në një mesatare vjetore prej 1.6 miliardë lekësh ose gati 13 milionë euro.

Fryrja e kostove


Ministrja e Shëndetësisë, Ogerta Manastirliu dhe ish ministri Ilir Beqaj, gjatë një vizite në shërbimin e Hemodinamikës në QSUT, ku është përuruar një pajisje e re e angiografisë që monitoron enët e gjakut që furnizojnë zemrën. | Foto nga : LSA

Në dy maternitetet e Tiranës, Koço Gliozheni dhe Mbretëresha Geraldinë, janë rikthyer instrumentet tradicionale për një pjesë të madhe të lindjeve natyrale. Metoda e vjetër e sterilizimit me autoklavë funksionin gjithashtu në gjysmë-ilegalitet, pas kërkesave verbale të eprorëve për të ulur përdorimin e seteve.

Një mjek gjinekolog i tha BIRN se setet kirurgjikale janë të panevojshme për lindjet natyrale.

“Ndryshe nga operacionet, një lindje natyrale ka nevojë për dy-tre instrumente ndaj na është kërkuar verbalisht, nën rekomandimin e Ministrisë së Shëndetësisë, që në këto raste të minimizohet përdorimi i paketave me instrumenta të sterilizuar,” tha ai.

Si shumë kolegë të tij, edhe mjeku gjinekolog pranoi të intervistohej nga BIRN me kushtin që të mos i përmendej emri.

“Ne realizojmë mesatarisht 30 ndërhyrje dhe lindje në ditë. Të blesh një set kirugjikal kushton mesatarisht 40 mijë lekë të reja…E kuptoni se sa shumë është rritur kostoja e një ndërhyrjeje kirugjikale?” pyeti ai.

Dy maternitetet e Tiranës u fajësuan pjesërisht për rritjen e kostove në vitin 2018, pasi një grup kontrolli nga Fondi i Sigurimit të Detyrueshëm të Kujdesit Shëndetësor verifikoi se për lindjet natyrale ishin përdorur paketa të kompleksitetit të ulët. Mjekët u këshilluan që për lindjet normale të përdornin sete të sterilizimit me avull, të cilat kushtojnë 319 lekë copa.

Pjesa tjetër i faturohet mikrokirurgjive, të cilat nuk numëroheshin si ndërhyrje përpara dhënies së shërbimit me koncesion.

Kirurgu Arben Gjata, rektor i Universitetit të Mjekësisë dhe pjesë e komisionit që përgatiti studimin e fizibilitetit e mburri koncesionin si “gjëja më e mirë” për sistemin shëndetësor. Megjithatë, Gjata pranoi se një kategori mikrondërhyrjesh nuk deklaroheshin më parë dhe nuk ishin llogaritur. Ai përmendi në këtë kategori ndërhyrje të tilla si rrethprerja (syneti), heqja e një thoi apo e një nishani.

“Pas futjes së koncensionarit duheshin deklaruar, pasi do të përdoren setet kirurgjikale. Kanë rezultuar të jenë rreth 8 mijë të tilla në të gjithë vendin dhe sigurisht kanë rritur numrin e ndërhyrjeve kirurgjikale, duke rritur edhe kostot,” tha kirurgu Gjata.

Lindjet natyrale dhe mikrokirurgjitë nuk janë të vetmet ndërhyrje që sollën rritje të paparashikuar të kostove. Mjekët përmendën si arsye edhe grupimin e instrumenteve brenda një seti apo mungesat e shpeshta të paketës së vogël prej 319 lekësh, që i detyron ata të shpërdorojnë setet kirurgjikale.

“Problemi qëndron se për një ndërhyrje, ne mund të hapim edhe deri në tre sete, sepse nuk gjejmë dot të gjitha instrumentet që na duhen në njërin set,” tha njëri prej kirurgëve. “Unë në sallë operacioni mendoj se si të shpëtoj jetën e pacientit dhe jo sa lekë po harxhoj,” shtoi ai, duke pohuar se presioni mbi kostot rëndon vazhdimisht mbi punën e tyre.

Një ish-drejtues i njërit prej spitaleve universitare u ankua se koncesionari e ofron rrallë paketën e vogël të sterilizuar në avull dhe kjo i detyron mjekët që të shpërdorojnë shpesh sete për të përdorur qoftë edhe vetëm një instrument.

“Kjo mendoj se është kleçka që e rrit shumë koston që duhet t'i paguajmë pastaj në fund,” tha kirurgu, pa dashur që t'i përdoret emri.

Kirurgu urolog, Artan Koni, i cili denoncoi në SPAK kostot e shtrenjta të sterilizimit i tha BIRN se rigrupimi i instrumenteve brenda një seti është një formulë që nuk funksionon.

“…asnjëherë nuk mund të bësh një renditje optimale të seteve, sepse operacioni nuk shkon asnjëherë siç do ti,” tha Koni. “Mund të ndodhë që gjatë operacionit të duhet diçka që nuk e parashikon dhe nuk e planifikon dot. Ndaj do të ketë gjithmonë përdorim të dy ose tre seteve,” shtoi ai.

Cilësi vs. kosto

Cilësia e dobët e instrumentave kirurgjikalë dhe infeksionet e larta spitalore ishin dy argumentet kryesore në favor të dhënies me koncesion të shërbimit të sterilizimit në sallat kirurgjikale. Rinovimi i instrumentarit dhe ulja e infesioneve spitalore mbeten edhe sot argumente në mbrojtje të saj.

Ish-ministri i Shëndetësisë, Ilir Beqja i tha BIRN në një përgjigje me shkrim se kontrata e sterilizimit ishte e nevojshme dhe treguesi më i mirë për këtë është shkurtimi i ditëve të qëndrimit në spital për pacientët që i janë nënshtruar operacioneve.

“Edhe ecuria e infeksioneve prej SARS-CoV-2 në sallat kirurgjikale që prej marsit 2020 e në vijim [zero mjekë apo infermierë të sëmurë me COVID-19] provon se nëpërmjet kësaj kontrate është arritur cilësi maksimale në sterilitetin e sallave operatore,” pretendoi Beqja.

Kirurgu Arben Gjata kujton se në kohën që po jepej koncesioni i sterilizimit, ai përdorte ende një bisturi të markës “Urna”, që ishte donacion i qeverisë amerikane i vitit 1945. Ai thotë se operon sot me instrumente të markës “Martin”, që i konsideron ndër më cilësoret në Europë.

“Të krahasosh kushtet me të cilat operojmë sot, me ato që kishim para dhënies me koncension të sterilizimit, është njësoj si të kesh një supermakinë e të thuash se gazi ‘69 i kohës së Enverit ishte më i mirë se harxhonte pak,” tha Gjata, duke i konsideruar ankesat për koncesionin si politike.

“Sigurisht që kemi debate me koncensionarin, sepse ka vegla që na prishen apo na amortizohen dhe kërkojmë që të na sjellë të reja, por të vësh në dyshim cilësinë më duket e pakuptimtë,” shtoi ai.

Por kirurgu urolog, Artan Koni bën një llogari të thjeshtë matematikore, ndërsa thotë se setet kirurgjikale po blihen “sa frëngu pulën”.

Sipas Konit, sterilizimi i pajisjeve kirurgjikale me autoklavë do të kushtonte rreth 215 mijë euro në vit në rang kombëtar, ndërkohë që koncesionarit i paguhen deri në 16 milionë euro. Mjeku shton në llogari edhe kosto të supozuara të blerjes nga e para të instrumentarit dhe arrin në përfundimin se koncesionari paguhet në një vit aq sa shërbimi kushton në 10 vite.

“Pak a shumë, kirurgët për një operacion marrin 15 mijë lekë të vjetra, por minimalisht i japin [koncesionarit] 130 mijë lekë për setin,' tha Koni për BIRN.

“Mendoj se që kjo kontratë ishte keq që në konceptim, sepse nuk mund t'i jepet me koncension privatit një shërbim i tillë. Nuk ka logjikë, as mjekësore, as ekonomike, asnjë vend në Evropë nuk e ka me koncension,” shtoi ai.

Ulje çmimesh? Jo, ulje ndërhyrjesh

Në vitin 2018, numri i ndërhyrjeve të raportuara nga të gjitha spitalet e vendit kapërceu në 90 mijë, nga 63 mijë të parashikuara në kontratë. Nga 1.6 miliardë lekë të planifikuara për t'u paguar në vitin 2018, vlera u rrit në 2.1 miliardë -duke mbartuar një pjesë të detyrimeve edhe për vitin 2019.

Tejkalimi i tavanit të miratuar buxhetor e detyroi Ministrinë e Shëndetësisë të urdhëronte një “moratorium” të shkurtër për ndërhyrjet e planifikuara si dhe të rinegocionte termat e kontratës me kompaninë koncesionare.

Negociatat me kompaninë SaniService u mbyllën në janar 2020 me amendimin e kontratës. Ministria arriti të reduktonte me 25% çmimet vetëm për setet që tejkalojnë tavanin e parashikuar në kontratë prej 63 mijë ndërhyrjesh. Ministria tha gjithashtu se kjo zbritje shtrihet edhe për paketimet në avull mbi limitin prej 63 mijë setesh.

E pyetur nga BIRN për luhatjen e madhe të numrit të operacioneve nga njëri vit në tjetrin, Ministria e Shëndetësisë u përgjigj se kishte arritur t'i ulte ato përmes programimit më racional nga spitalet si dhe monitorimit në kohë reale të interventeve sipas tipologjisë për çdo repart.

BIRN mësoi se në negociata ishin diskutuar edhe formula të tjera, të cilat nuk ishin pranuar nga Ministria e Shëndetësisë.

Rektori Gjata i tha BIRN se ai vetë kishte sugjeruar shtimin e një seti të katërt në vend të reduktimit të miratuar.

“I sugjerova Ministrisë së Shëndetësisë dhe koncensionarit që të ofrojë edhe një paketë të katërt të instrumenteve të sterilizimit, me një kosto prej 2-3 mijë lekë të reja, që do të përdorej për të realizuar ato që ne i quajmë mikrokirugji apo edhe lindjet natyrale,” tha Gjata.

“Koncensionari ishte dakord, por propozimi u refuzua nga Ministria e Shëndetësisë, pasi juristët e konsiderojnë si ndryshim të termave të kontratës dhe kjo mund të sillte pasoja ligjore,” shtoi ai.

Për kirurgun Artan Koni, rishikimi i kontratës nuk ka prekur asgjë nga fitimet e koncesionarit, por ka shtuar presionin indirekt ndaj mjekëve.

“Thonë që kemi caktuar një numër mesatar operacionesh, por kjo në mënyrë indirekte shkakton një lloj presioni tek mjekët, që u duhet t'i shtyjnë ato,” tha Koni. “Nga këto keqllogaritje buxheti është boshatisur, por në vend që të uleshin kostot, u ulën operacionet,” përfundoi ai.


BIRN

[Albo]

Ish-ministrat Beqja dhe Cani, nën hetim për koncesionin e sterilizimit

Pas hetimeve 4-vjeçare për koncesionin e kushtueshëm të sterilizimit të pajisjeve kirurgjikale, ish.zv.ministri i Shëndetësisë, Klodian Rrjepaj dhe biznesmeni Ilir Rrapaj përfunduan në pranga për veprat penale të shpërdorimit të detyrës dhe mashtrimit, ndërsa zyrtarë të tjerë të lartë janë nën hetim.

Nga Vladimir Karaj 14:42 | 17/08/2023


Ish-ministri Ilir Beqja duke hyre ne nje mbledhje te Asamblese se Partise Socialiste. Foto: LSA.

Ish-ministri i Shëndetësisë, Ilir Beqja dhe ai i Financave, Shkëlqim Cani janë nën hetim nga Prokuroria e Posaçme për koncesionin kontrovers të sterilizimit të pajisjeve kirurgjikale, ndërkohë që ish-zv.ministri Klodian Rrjepaj dhe biznesmeni Ilir Rrapaj u arrestuan të enjten në zbatim të masave të arrestit të firmosura nga Gjykata e Posaçme thuajse dy muaj më parë.

Sipas njoftimit zyrtar të SPAK, Rrjepaj akuzohet për veprat penale të “falsifikimit të dokumenteve” dhe “shpërdorimit të detyrës”, ndërsa biznesmeni Ilir Rrapaj për mashtrim me pasoja të rënda, parashikuar nga neni 143/3 i Kodit Penal.

SPAK njoftoi gjithashtu se ishin ekzekutuar gjashtë masa të tjera sigurie ndaj anëtarëve të komisionit të dhënies së koncesionit, dy prej të cilëve me arrest shtëpie dhe katër të tjerë me detyrim paraqitje pranë oficerit të Policisë Gjyqësore.

Drejtuesit ekonomikë dhe juridikë të ministrisë së Shëndetësisë, Saimir Kadiu dhe Marsela Serjanaj u lanë në arrest shtëpie, ndërsa rektori i Universitetit të Mjekësisë, Arben Gjata dhe tre anëtarët e tjerë të komisionit, Petref Mersini, Genc Burazeri dhe Naile Ajazi do të hetohen në masën e detyrimit të paraqitjes.

Koncesioni i sterilizimit të pajisjeve kirurgjikale është një nga katër projektet e Partneritetit Publik Privat të qeverisë “Rama” në sektorin e shëndetësisë, i cili i ka kushtuar taksapaguesve shqiptarë rreth 7.9 miliardë lekë [76 milionë euro] deri në fund të vitit 2022.

Ajo është një ndër dosjet e para të denoncuara në Prokurorinë e Posaçme që prej vitit 2019, ndërkohë që vendimarrja vjen pas më shumë se katër vitesh hetime.

Në njoftimin për shtyp, SPAK bëri me dije se kishte regjistruar procedimin penal në janar të vitit 2020 dhe se i ishte drejtuar gjykatës për masat e arrestit në qershor 2023, pasi kishte kryer “një numër jashtëzakonisht të madh veprimesh hetimore”. Masat e sigurisë u miratuan nga Gjykata e Posaçme më 23 qershor, por SPAK nuk sqaron në njoftim ekzekutimin e tyre thuajse pas dy muajsh.

I pyetur nga BIRN, prokurori i çështjes, Edvin Kondili e lidhi vonesën e ekzekutimit të masave të sigurisë me faktin që biznesmeni nën akuzë, Ilir Rrapaj nuk ndodhej në Shqipëri.

“Ka qenë një taktikë e jona, sepse e dinim që do të vinte edhe personi tjetër nën hetim,” tha ai, duke nënkuptuar se arrestimi i ish-zv.ministrit Rrjepaj mund të sillte si pasojë largimin e biznesmenit Ilir Rrapaj.

Kërkesa e SPAK për masat e sigurisë ndaj tetë personave nën akuzë, pa përfshirë ish-ministrin e Shëndetësisë, Ilir Beqja dhe atë të Financave, Shkëlqim Cani është vlerësuar si minimale nga gjykata.

“Unë pashë që kishte vepra të tjera penale dhe persona, përfshi edhe dy ish-ministrat dhe e kam orientuar prokurorinë që të hetojë në këtë drejtim,” tha në një bisedë telefonike gjyqtari Erion Bani, i cili shqyrtoi masat e sigurisë.

Prokurori i çështjes, Kondili i tha BIRN se ish-ministrat Ilir Beqja dhe Shkëlqim Cani janë nën hetim për rolin e tyre në dhënien e koncesionit të sterilizimit.

Beqja, i cili drejton sot Agjencinë Shtetërore të Programit Strategjik të Koordinimit të Ndihmës, nuk iu përgjigj një kërkese për koment të BIRN, ndërsa ish-ministri Shkëlqim Cani deklaroi pas një séance pyetjesh në SPAK të enjten se kishte dhënë miratimin pas plotësimit të kërkesave sipas ligjit.

“Unë nuk jam ministri që kam bërë pagesat. Kur ka filluar koncesioni unë jam larguar nga detyra,” tha Cani, ndërsa mohoi të kishte njohje me biznesmenin Rrapaj.

Në një investigim të publikuar në vitin 2015, BIRN zbuloi se Ilir Rrapaj, një ish-emigrant shqiptar në Itali, u bë përfituesi kryesor i koncesionit të sterilizimit pasi vendosi kontakte me ish-ministrin Ilir Beqja dhe zyrtarë të tjerë socialistë.

Përmes kompanisë së tij të vogël me kapital 1 mijë euro të regjistruar në Prishtinë, Investital LLC, Rrapaj mori 40% të aksioneve në konsorciumin që fitoi koncesionin. Aksionet e tjera zotëroheshin nga kompanitë italiane Servizi Italia me 30%, Tecnosanimed me 15% dhe U.Jet me 15%.

Kontrata koncesionare shkaktoi ‘dhimbje koke' në Ministrinë e Shëndetësisë pas nisjes së zbatimit të saj për shkak të kostove të larta, çka e detyroi ministrinë që ta rinegocionte atë.

BIRN

[Albo]

‘Promotori i biznesit’: Si u “amnistua” Ilir Beqaj nga SPAK për shkeljet në koncesionin e sterilizimit

Hetimet 3-vjeçare të prokurorëve Edvin Kondili dhe Ened Nakuçi e mbyllën rrethin e të akuzuarve me ish-zv.ministrin Klodian Rrjepaj dhe anëtarët e komisionit, por gjyqtari Erion Bani arsyeton se ka indicie që ish-ministri Ilir Beqaj paracaktoi fituesit, nuk ndaloi konfliktin e interesit dhe bëri udhëtime me përfituesit e koncesionit – ç’ka sipas tij ngre dyshime edhe për veprat penale të korrupsionit.

Nga Aleksandra Bogdani dhe Klodiana Lala 09:46 | 19/08/2023


Drejtori i Agjencisë Shtetërore të Programit Strategjik dhe Koordinimit të Ndihmës (SASPAC), Ilir Beqaj duke folur gjatë një seance të komisionit për Ekonominë dhe Financat, | Foto: LSA

Tre dekada më parë, Klodian Rrjepaj dhe Ilir Rrapaj ishin dy shokë klase dhe studentë të Fakultetit të Mjekësisë në Tiranë. Ata u takuan sërish në Tiranë njëzet vjet më vonë; i pari si zv.ministër i Shëndetësisë dhe i dyti si sipërmarrës i vogël në Itali, i cili e quante veten një “promotor biznesi”.

Rrapaj u kthye në vendlindje në nëntor 2013 për të marrë pjesë në nismën “Thuaji po Shqipërisë” – një takim me mjekë të diasporës – dhe pozoi përkrah kryeministrit Edi Rama, ministrit të Shëndetësisë, Ilir Beqaj dhe mikut të tij të vjetër, Klodian Rrjepaj.

Më pas, Rrapaj u shfaq në një seri takimesh zyrtare në Umbria të Italisë në vitet 2013-2014 përkrah ministrit Beqaj dhe zv.ministrit Rrjepaj, të trumbetuara në media si “bashkëpunime ndërkombëtare”, por që sipas një vendimi të Gjykatës së Posaçme, qëllimi i vërtetë ishte përgatitja e një koncesioni për sterilizimin e pajisjeve kirurgjikale në favor të biznesmenit Rrapaj.

Koncesioni i sterilizimit është kontrata më e shtrenjtë e partneritetit publik privat e qeverisë ‘Rama' në sektorin e shëndetësisë, e cila u ka kushtuar taksapaguesve shqiptarë rreth 76 milionë euro deri në fund të vitit 2022.

Pasi hetoi për 3 vjet, Prokuroria e Posaçme, SPAK, kërkoi në gjykatë arrestimin e ish-zv.ministrin e Shëndetësisë, Klodian Rrjepaj dhe biznesmenit Ilir Rrapaj dhe masa më të buta sigurie për gjashtë anëtarët e komisionit të dhënies së koncesionit.

Emri i Ilir Beqjajt mungonte në kërkesën e SPAK, por pasi shqyrtoi provat, gjyqtari Erion Bani i Gjykatës së Posaçme çmoi se shkeljet e akteve ligjore dhe nënligjore ngrihen në nivelin e përgjegjësisë penale për ish-ministrin e Shëndetësisë.

Ai vlerësoi gjithashtu se hetimet ishin të paplota dhe ndjekja penale duhet të zgjerohej edhe ndaj ish-ministrit të Financave, Shkëlqim Cani dhe katër anëtarëve të Komisionit të Prokurimeve Publike, KPP, që kishin rrëzuar më parë një ankesë ndaj fituesve.

Sipas vendimit, shkeljet e ligjit në procedurat e dhënies së koncesionit ishin bërë me “qëllimin e vetëm për shpalljen fitues” të kompanive që u përkasin Ilir Rrapajt dhe ortakut të tij italian, Umbro Staccini.

Lista e shkeljeve përmban një studim fizibiliteti me të dhëna të rreme në kundërshtim me ligjin; hartimi i kritereve në mënyrë të tillë që t'u përshtateshin gjendjes reale të kompanive të përzgjedhura paraprakisht si dhe mosveprimin e Beqajt për zgjidhjen e konfliktit të interesit mes Rrjepajt si kryetar i komisionit të koncesionit dhe Rrapajt si përfitues i tij.

Shkelje ligjore janë gjetur edhe gjatë negocimit të kontratës koncesionare, që sipas gjyqtarit kanë qenë “dukshëm në favor të kompanisë së shpallur fituese, në dëm të interesave të shtetit”.

Gjykata çmon gjithashtu se dy prokurorët e çështjes, Edvin Kondili dhe Ened Nakuçi kanë qenë dorështrënguar edhe me veprat penale; ndërsa vlerëson se ka indicie të mjaftueshme për të hetuar për korrupsion aktiv dhe pasiv si dhe pastrim të produkteve të veprës penale.

“Nga ana e prokurorisë duhet të bëhet një hetim i plotë dhe i gjithanshëm në këtë drejtim, fakt i cili nuk rezulton nga fashikulli hetimor,” arsyeton gjyqtari Bani, i cili sugjeron se “për këtë nevojitet hetim pasuror”.

Provat kundër ish-ministrit Beqaj


Ilir Rrapaj, Klodian Rrjepaj dhe Ilir Beqaj më dt. 19 Dhjetor 2013,gjatë vizitës zyrtare të Ministrit të Shëndetësisë në Peruxhia. | Foto nga : Facebook

Në shkurt të vitit 2014, ministri i Shëndetësisë, Ilir Beqaj mori një kërkesë nga drejtoresha e QSUT, Ogerta Manastirliu – sot ministre e Shëndetësisë, për të vënë në punë një qendër moderne sterilizimi që flinte prej vitesh në spitalin e ri të urgjencës, por kërkesa mbeti pa përgjigje.

Kapaciteti i qendrës së sterilizimit mbulonte rreth 60 mijë ndërhyrje kirurgjikale në vit nga 50 mijë që raportoheshin se ishin kryer në vitin 2013, por nuk ishte vënë në punë për shkak se nevojitej trajnimi i stafit mbështetës.

Por edhe pse u vu në dijeni për investimin e kryer, ministri Beqaj i hapi dritën jeshile vazhdimit me procedurat e koncesionit. Sipas një auditi të mëvonshëm të Kontrollit të Lartë të Shtetit, qendra publike e sterilizimit parashikohej të funksiononte me 96 milionë lekë në vit ose gati 5 herë më pak nga vlera prej 558 milionë lekësh që kompania koncesionare faturoi në vitin 2016 për të njëjtin shërbim.

Sipas Gjykatës së Posaçme, Beqaj nuk mori asnjë masë për vënien në punë të qendrës së sterilizimit, pasi e kishte marrë paraprakisht vendimin për dhënien e shërbimit me koncesion.

“Nga analiza e të gjithë provave të para në unitetin e tyre, gjykata çmon se ish-ministri i Shëndetësisë, Ilir Beqaj, në bashkëpunim me personin në hetim, Klodian Rrjepaj e kishin marrë vendimin e dhënies së shërbimit të sterilizimit me koncesion dhe kishin përzgjedhur paraprakisht se kush do ta fitonte këtë koncesion…,” arsyeton gjyqtari Bani, duke shtuar se fituesit e paracaktuar ishin Ilir Rrapaj dhe shtetasi Italian Umbro Staccini.

Sipas dosjes, Beqaj ishte në dijeni të marrëdhënies së ngushtë miqësore mes zëvendësit të tij dhe Rrapajt si dhe të përfshirjes së këtij të fundit në përgatitjen e studimit të fizibilitetit, që i hapi më pas rrugën fitores së tij.

Nga sekuestrimi i postës elektronike të Rrjepajt, hetuesit veçojnë dy emaile të dërguara nga Ilir Rrapaj në shkurt dhe mars të vitit 2014, përmes së cilave i dërgon dy studime të universitetit të Peruxhias, që u përfshinë më pas në studimin e fizibilitetit.

“I dashur Fra'! Ky është teksti që të paralajmërova, për të cilin Vanesa më shkruante. Hidhi një sy dhe na çoni haber. Shpresoj të të ketë lëshuar sadopak dhimbja e veshit tanimë,” i shkruante Rrapaj zv.ministrit Rrjepaj.

Në të njëjtën ditë, më 17 mars 2014, zv.ministri ia pason emailin shefit të tij, Ilir Beqaj në emailin zyrtar dhe atë privat.

Gjithashtu brenda një jave në qershor 2014, Rrapaj dhe ortaku i tij Italian kanë ardhur në Tiranë dhe janë kthyer në Itali, ndërsa dy krerët e Ministrisë së Shëndetësisë, Beqaj dhe Rrjepaj kanë udhëtuar gjithashtu drejt Italisë.

Më 15 qershor 2014, Beqaj, Rrjepaj dhe Rrapaj janë kthyer së bashku në Tiranë nga Roma me të njëjtën linjë avioni.

“Vetëm një muaj pas udhëtimit me avion, Rrapaj krijon në Prishtinë shoqërinë Investital, e cila do të bëhej më pas fituese me 40% e koncesionit. Kjo kompani u themelua gjithashtu vetëm një muaj përpara se të dilte urdhri i Ministrit të Shëndetësisë “Për ngritjen e komisionit të dhënies së koncesionit” dhe ka pasur vetëm një të punësuar, Ilir Rrapajn,” thuhet në vendim.

Hetimet kanë zbuluar gjithashtu komunikime dhe udhëtime të përbashkëta të ministrit Beqaj me përfituesit pas dhënies së koncesionit, që sipas gjyqtarit Bani duhej të përbënin indicie për hetime të mëtejshme në drejtim të veprës penale të korrupsionit.

Më 25 shtator 2016, ish-ministri Beqaj dhe administratori i kompanisë koncesionare, Admir Daca kanë udhëtuar me të njëjtin avion të “Austrian Airlines” drejt Vienës, ndërsa më 23 maj 2017, Beqja dhe Rrjepaj janë kthyer në Shqipëri nga Roma me të njëjtin avion me Ilir Rrapajn dhe Umbro Staccini.

Udhëtimi i fundit në dosje është identifikuar më 13 mars 2018, kur Beqaj, Rrjepaj, Rrapaj dhe Staccini kthehen me të njëjtën makinë nga dogana e Morinit mes Shqipërisë dhe Kosovës.

Falsifikimi i kostove


Ilir Rrapaj dhe kryeministri Edi Rama gjatë një takimi në pallatin e Brigadave në kuadrin e nismës “Thuaji Po Shqipërisë” | Foto nga : Facebook

Përveç paracaktimit të fituesve dhe përfshirjes së tyre në përgatitjen e studimit të fizibilitetit, Gjykata e Posaçme argumenton në vendim se kostot e procesit të sterilizimit janë fryrë në mënyrë artificiale, për ta prezantuar koncesionin si një procedurë më të favorshme se sa prokurimi publik.

Në llogaritjen e kostove të shërbimit janë përfshirë edhe shpenzime për medikamente mjekësore, të cilat i kanë fryrë shifrat me 56%. Gjithashtu, gjykata vlerëson se në studimin e fizibilitetit është ulur qëllimisht numri i ndërhyrjeve të parashikuara nga 63 mijë në 50 mijë operacione në vit, duke sjellë si pasojë rritjen e çmimeve për secilin nga intensitetet e ndëhyrjeve në pasqyrat financiare.

Mungesa e verifikimit të të dhënave në studimin e fizibilitetit nga Ministria e Financave është një nga arsyet se pse gjyqtari Bani e ka orientuar prokurorinë drejt hetimit të rolit të ish-ministrit të Financave, Shkëlqim Cani.

Në nëntor të vitit 2014, Cani refuzoi të jepte dakordësinë për koncesionin me arsyetimin se “nuk ka argumentim të qartë pse dhënia me koncesion është procedurë më e favorshme se sa prokurimi publik”. Gjithashtu, ai kërkoi që analiza krahasuese duhej të kryhej në mënyrë të qartë dhe të dallueshme për secilin shërbim të planifikuar për t'u dhënë me koncesion.

Por një muaj e gjysmë më vonë, Cani e miratoi në parim propozimin për financim, ndonëse nuk pati asnjë ndryshim në studimin e fizibilitetit.

“Po ashtu, mbetet e paqartë përgjigja e Ministrisë së Financave lidhur me faktin se ajo e shikon dokumentacionin vetëm nga pikëpamja formale. Nëse kjo e fundit e shikon dokumentacionin vetëm nga pikëpamja formale, a mund të konsiderohet formalisht në rregull një dokument i panënshkruar,” ngre pikëpyetje gjyqtari Bani, duke iu referuar faktit se studimi i fizibilitetit nuk ishte i firmosur nga anëtarët e komisionit të dhënies së koncesionit.

Pas një séance pyetjesh në Prokurori të enjten, Cani u tha gazetarëve se e kishte dhënë miratimin pasi ishin plotësuar kriteret ligjore dhe mohoi të kishte njohje me biznesmenin Ilir Rrapaj, ndërsa ish-ministri Ilir Beqja nuk iu përgjigj një kërkese për koment të BIRN.

Në vendimin prej 348 faqesh, hetimet e SPAK vihen në pikëpyetje edhe sa i përket veprave penale të regjistruara apo mungesës së hetimit pasuror, për të cilat gjyqtari i orienton prokurorët që t'i vazhdojnë hetimet.

Sipas Banit, nga aktet e administruara ka indicie të mjaftueshme që Prokuroria e Posaçme të vazhdojë hetimet edhe për veprat penale të korrupsionit aktiv dhe pasiv si dhe ato të pastrimit të produkteve të veprës penale.

“Kjo do të provojë nëse e gjithë veprimtaria kriminale e paramenduar në detaje nga personat në hetim është bërë thjesht për shkak të marrëdhënieve të ngushta të personave nën hetim, Klodian Rrjepaj dhe Ilir Rrapaj si dhe për shkak të njohjeve personale të këtij shtetasi… me ministrin e Shëndetësisë, Ilir Beqaj apo për rrjedhojë të përfitimit të parregullt që rrjedh nga korrupsioni i zyrtarëve që kanë marrë pjesë në këtë procedurë,” përfundon Bani në vendim.


BIRN

[Albo]

VOA: SPAK mund të arrestojë një numër të madh zyrtarësh për koncensionin e sterilizimit



-Zëri i Amerikës-

Në Tiranë, hetimet e Prokurorisë së Posaçme SPAK për koncensionin 10-vjeçar të sterilizimit mund të përfshijnë një numër më të madh zyrtarësh për shpërdorim detyre.

Gjykata e Posaçme për Korrupsionin dhe Krimin e Organizuar e orientoi Prokurorinë e Posaçme që të shtrijë hetimet edhe mbi përgjegjësitë e 6 personave të tjerë; për ish ministrin e Shëndetësisë Ilir Beqaj, ish ministrin e Financave Shkëlqim Cani, si dhe për katër komisionerë të prokurimeve.

Në vendimin prej 348 fletëve mbi arrestet me burg për ish zëvendës ministrin e Shëndetësisë, Klodian Rrjepaj, dhe biznesmenin Ilir Rrapaj, Gjykata thekson se provat e SPAK-ut evidentojnë shkelje ligjore edhe nga dy ish ministrat dhe 4 komisionerët.

Arrestimi i ish zëvendës ministrit të Shëndetësisë, Klodian Rrjepaj dhe biznesmenit të sterilizimeve spitalore Ilir Rrapaj nën akuzat e mashtrim, falsifikim dhe shpërdorim detyre në bashkëpunim.

Por kjo duket se është vetëm fillimi i pjesës së dukshme të aferës korruptive të koncensionit 100 milionë dollarë të nënshkruar në dhjetor 2015 nga ish ministri i Shëndetësisë Ilir Beqaj.

Dy prej protagonistëve të procesit, Rrapaj dhe Rrjepaj, janë tashmë në arrest me burg, dy të tjerë – drejtorët ekonomikë dhe juridikë janë në arrest shtëpie, katër komisionerë të koncensionit në detyrim paraqitje, ndërsa GJKKO e ka orientuar SPAK të zgjerojë hetimet edhe ndaj ish ministrit Ilir Beqaj dhe ish ministrit të financave Shkëlqim Cani.

Gjykata e Posaçme për Korrupsionin dhe Krimin e Organizuar thekson në vendim se “pavarësisht qëndrimit të prokurorisë, nga analiza e provave të administruara dhe të para në unitetin e tyre, në to evidentohen shkelje të akteve ligjore e nënligjore, të cilat ngrihen në nivelin e përgjegjësive penale për ish ministrin e Shëndetësisë Beqaj dhe ish ministrin e Financave Cani, si dhe për katër komisionerë të prokurimit publik”.

GJKKO vëren se nga moria e të dhënave hetimore del se fituesi i këtij koncensioni ishte paracaktuar nga drejtuesit e ministrisë së shëndetësisë para se të nisnin procedurat formale, madje fituesit parapërgatitën dokumente dhe përshtatën kriteret ligjore në mënyrë që të siguronin fitoren.

Hetimet kanë vërejtur shkeljen e barazisë së konkurrentëve në garë, fryrje artificiale dhe shumëfishimin e kostove dhe çmimeve, falsifikimin e dokumenteve dhe shifrave statistikore, kalimin e qendrës së re të sterilizimeve të QSUT-së në përdorim të koncensionarit, llogaritje të pasakta ekonomike dhe shkelje ligjore, gjë që ka nxitur dyshimet për korrupsion pasiv të funksionarëve të lartë shtetërorë.

Në vendimin e GJKKO-së mbi masat e arrestit të tyre dhe 6 zyrtarëve të shëndetësisë thuhet se ish ministri Beqaj dhe zëvendësi i tij Rrjepaj kishin njohje dhe takime të vazhdueshme qysh nga dhjetori i vitit 2013 me biznesmenin Rrapaj, pra dy vjet para se ky të fitonte koncensionin e sterilizimeve spitalore.

Gjykata e Posaçme për Korrupsionin dhe Krimin e Organizuar vërejti gjatë hetimeve se, në emailet mes tyre ish zëvendësministri Rrjepaj merr udhëzime nga biznesmeni Rrapaj për veprimet, që duhet të kryejë në rajonin e Umbrias, pjesë nga studimi i fizibilitetit me logot dhe adresat e kompanisë Investital, në komunikime ku tregohet se ata të dy kanë njohje dhe marrëdhënie të afërt miqësore me njëri-tjetrin.

Ata kanë studiuar për mjekësi në të njëjtat vite, i kanë ndërprerë ato në të njëjtin vit dhe i kanë rinisur në të njëjtin vit.

Biznesmeni Rrapaj, ish ministri i Shëndetësisë Beqaj dhe zëvendësi i tij Klodian Rrjepaj kanë udhëtuar së bashku me avion nga Italia në qershorin e 2014, periudhë që sipas hetimeve përkon me veprimet përgatitore të koncensionit.

Po ashtu biznesmeni Rrapaj dhe ish zëvendës ministri Rrjepaj udhëtuan së bashku me avion drejt Italisë në mars 2015, periudhë që përkon me shpalljen e njoftimit të tenderit brenda afatit të dorëzimit të ofertave, vërejnë hetuesit.

Kompanitë operatore fituese ishin informuar për detaje të koncensionit të patën 6 muaj para se të shpallej kontrata 10-vjeçare, madje ata e dinin më herët se kjo procedurë do të ishte koncension dhe jo prokurim i zakonshëm.

Rrapaj bëri një regjsitrim formal të kompanisë së tij në Prishtinë si subjekt tatimor, ku deklaroi si punëtor të vetëm të kompanisë veten e tij me pagë 200 euro, ndërsa ajo nuk ka si veprimtari dizinfektimin e sallave kirurgjikale.

SPAK vëren se operatorët fitues kanë patur dijeni të plotë për procedurat e koncensionit dhe kanë parapërgatitur dokumentacionin para se kontrata të shpallej më 13 shkurt 2015.

Ilir Rrapaj mbante kontakte të vazhdueshme me ministrinë e Shëndetësisë, dhe sipas hetimeve ai e regjistroi kompaninë e tij Investital LLC në Prishtinë një muaj pasi fluturoi në Itali me dy drejtuesit e ministrisë së shëndetësisë, Beqaj e Rrjepaj, dhe një muaj para se të dilte urdhëri i ministrit për ngritjen e komisionit mbi dhënien e koncensionit.

Rrapaj ka udhëtuar edhe me automjetet e zyrtarëve drejtues të ministrisë së shëndetësisë, mes të tjerave, edhe drejt Kosovës.

Pasi ish ministri Beqaj dhe biznesmeni Rrapaj nënshkruajnë kontratën e koncensionit 10 vjeçar për afro 100 milionë dollarë në dhjetor 2015, një varg fluturimesh ajrore të tjera drejt Italisë kanë kryer ata, si dhe ish zëvendësministri Klodian Rrjepaj së bashku me administratorë të kompanisë fituese në vitin 2016 dhe 2017.

Ndërsa koncensioni është duke u zbatuar në vitin e tetë të tij, dhe 8 persona janë në hetim, GJKKO-ja orientoi SPAK-un që krahas masave të deritanishme, të zgjerojë hetimet mbi përgjegjësitë penale të dy ish ministrave Beqaj dhe Cani si dhe 4 komisionerëve të prokurimeve.

VOA

[Albo]

Vonesa për arrestimet për koncesionin e sterilizimit? Flet prokurori Kondili: Ishte taktika jonë, pasi…



Ish-ministri i Shëndetësisë, Ilir Beqja dhe ai i Financave, Shkëlqim Cani janë nën hetim nga Prokuroria e Posaçme për koncesionin kontrovers të sterilizimit të pajisjeve kirurgjikale, ndërkohë që ish-zv.ministri Klodian Rrjepaj dhe biznesmeni Ilir Rrapaj u arrestuan të enjten në zbatim të masave të arrestit të firmosura nga Gjykata e Posaçme thuajse dy muaj më parë.

Sipas njoftimit zyrtar të SPAK, Rrjepaj akuzohet për veprat penale të “falsifikimit të dokumenteve” dhe “shpërdorimit të detyrës”, ndërsa biznesmeni Ilir Rrapaj për mashtrim me pasoja të rënda, parashikuar nga neni 143/3 i Kodit Penal. SPAK njoftoi gjithashtu se ishin ekzekutuar gjashtë masa të tjera sigurie ndaj anëtarëve të komisionit të dhënies së koncesionit, dy prej të cilëve me arrest shtëpie dhe katër të tjerë me detyrim paraqitje pranë oficerit të Policisë Gjyqësore.

Drejtuesit ekonomikë dhe juridikë të ministrisë së Shëndetësisë, Saimir Kadiu dhe Marsela Serjanaj u lanë në arrest shtëpie, ndërsa rektori i Universitetit të Mjekësisë, Arben Gjata dhe tre anëtarët e tjerë të komisionit, Petref Mersini, Genc Burazeri dhe Naile Ajazi do të hetohen në masën e detyrimit të paraqitjes. Koncesioni i sterilizimit të pajisjeve kirurgjikale është një nga katër projektet e Partneritetit Publik Privat të qeverisë “Rama” në sektorin e shëndetësisë, i cili i ka kushtuar taksapaguesve shqiptarë rreth 7.9 miliardë lekë [76 milionë euro] deri në fund të vitit 2022.

Ajo është një ndër dosjet e para të denoncuara në Prokurorinë e Posaçme që prej vitit 2019, ndërkohë që vendimmarrja vjen pas më shumë se katër vitesh hetime. Në njoftimin për shtyp, SPAK bëri me dije se kishte regjistruar procedimin penal në janar të vitit 2020 dhe se i ishte drejtuar gjykatës për masat e arrestit në qershor 2023, pasi kishte kryer “një numër jashtëzakonisht të madh veprimesh hetimore”. Masat e sigurisë u miratuan nga Gjykata e Posaçme më 23 qershor, por SPAK nuk sqaron në njoftim ekzekutimin e tyre thuajse pas dy muajsh.

I pyetur nga BIRN, prokurori i çështjes, Edvin Kondili e lidhi vonesën e ekzekutimit të masave të sigurisë me faktin që biznesmeni nën akuzë, Ilir Rrapaj nuk ndodhej në Shqipëri. “Ka qenë një taktikë e jona, sepse e dinim që do të vinte edhe personi tjetër nën hetim,” tha ai, duke nënkuptuar se arrestimi i ish-zv.ministrit Rrjepaj mund të sillte si pasojë largimin e biznesmenit Ilir Rrapaj. Kërkesa e SPAK për masat e sigurisë ndaj tetë personave nën akuzë, pa përfshirë ish-ministrin e Shëndetësisë, Ilir Beqja dhe atë të Financave, Shkëlqim Cani është vlerësuar si minimale nga gjykata.

“Unë pashë që kishte vepra të tjera penale dhe persona, përfshi edhe dy ish-ministrat dhe e kam orientuar prokurorinë që të hetojë në këtë drejtim,” tha në një bisedë telefonike gjyqtari Erion Bani, i cili shqyrtoi masat e sigurisë. Prokurori i çështjes, Kondili i tha BIRN se ish-ministrat Ilir Beqja dhe Shkëlqim Cani janë nën hetim për rolin e tyre në dhënien e koncesionit të sterilizimit.

Beqja, i cili drejton sot Agjencinë Shtetërore të Programit Strategjik të Koordinimit të Ndihmës, nuk iu përgjigj një kërkese për koment të BIRN, ndërsa ish-ministri Shkëlqim Cani deklaroi pas një séance pyetjesh në SPAK të enjten se kishte dhënë miratimin pas plotësimit të kërkesave sipas ligjit. “Unë nuk jam ministri që kam bërë pagesat. Kur ka filluar koncesioni unë jam larguar nga detyra,” tha Cani, ndërsa mohoi të kishte njohje me biznesmenin Rrapaj.

Në një investigim të publikuar në vitin 2015, BIRN zbuloi se Ilir Rrapaj, një ish-emigrant shqiptar në Itali, u bë përfituesi kryesor i koncesionit të sterilizimit pasi vendosi kontakte me ish-ministrin Ilir Beqja dhe zyrtarë të tjerë socialistë. Përmes kompanisë së tij të vogël me kapital 1 mijë euro të regjistruar në Prishtinë, Investital LLC, Rrapaj mori 40% të aksioneve në konsorciumin që fitoi koncesionin. Aksionet e tjera zotëroheshin nga kompanitë italiane Servizi Italia me 30%, Tecnosanimed me 15% dhe U.Jet me 15%. Kontrata koncesionare shkaktoi ‘dhimbje koke’ në Ministrinë e Shëndetësisë pas nisjes së zbatimit të saj për shkak të kostove të larta, çka e detyroi ministrinë që ta rinegocionte atë.

BIRN

[Albo]

Koncesioni i sterilizimit! Ç’tregonte sistemi TIMS për ish-zv.ministrin dhe biznesmenin. Detaje nga GJKKO: Rrezik largimi i tyre



Rreziku i largimit nga Shqipëria për tiu shmangur hetimeve, ka qenë argumenti kryesor me të cilin SPAK ka kërkuar në gjykatë, arrestimin e ish-zv.ministrit të shëndetësisë Klodian Rrjepaj dhe biznesmenit fitues të koncesionit të sterilizimit, Ilir Rrapaj ky i fundit i akuzuar për mashtrim me pasoja të rënda.

“Gjykata vlerëson se kemi të bëjmë me frikë, mendim dhe dyshim të arsyeshëm se të dyshuarit po të lihen pa masë mund të largohen për të pamundësuar apo penguar qëllimisht zhvillimin normal të procedimit penal, duke pasur parasysh pasojat e veprës dhe marzhin e dënimit të veprës penale që dyshohet se kanë konsumuar që dënohet në 7 dhe 10 vjet burgim. Gjithashtu gjykata çmon se ekziston rreziku që personat nën hetim Ilir Rrapaj dhe Klodian Rrjepaj të largohen duke iu shmangur drejtësisë. Është për t’u përmendur fakti që këta persona në të shumtën e kohës qëndrojnë jashtë shtetit dhe nuk ndodhen në Shqipëri sipas sistemit TIMS. Këta persona janë me mundësi të larta financiare, mund të largohen lehtësisht nga territori shqiptar për të jetuar jashtë shtetit. Në këto rrethana rreziku i largimit dhe i fshehjes është tepër i lartë”, shkruhet në vendimin e gjyqtarit Erjon Bani.

Kujtojmë se tetë persona u vunë nën masa sigurie nga GJKKO, tetë vite pas firmosjes së koncensionarit të sterilizimit dhe tre vite pasi çështja u kallëzua në SPAK. Ish-zëvendës ministri i Shëndetësisë, Klodian Rjepaj në cilësinë e kryetarit të komisionit për koncensionarin me vlerë fillstare 9.6 miliardë lekë përfundoi nën arrest me burg për shpërdorim detyre. Së bashku me të edhe biznesmeni Ilir Rrapaj, që dyshohet për mashtrim me pasoja të rënda dhe që kryeson konsorciumin.

Veç tetë personave, GJKKO i ka sugjeruar SPAK-ut që të ushtrojë ndjekje penale edhe për gjashtë persona të tjerë, përfshirë edhe ish ministrin e Shëndetësisë, Ilir Beqja dhe ish-ministrin e Financave, Shkëlqim Cani.

Koha Jone

[Albo]

Koncesioni i sterilizimit dhe aksioni nga SPAK, reagon Ilir Beqaj: E vërteta për baltën e hedhur



Nga Ilir Beqaj, ish-ministër i Shëndetësisë

Prej disa ditësh opinioni publik e ka vëmendjen kryesore te e ashtuquajtura afere e “sterilizimit”. Duke qënë se çështja është ende në hetim e gjykim nuk e parë të udhës të shprehem publikisht. Aq më tepër që kam marrë vesh nga media që gjyqtari ka kërkuar që të hetohem edhe unë. Por për çfarë po i ofrohet publikut ndjej se duhet informoj për disa gjëra që në fakt janë përsëritje të atyre gjërave që kam thënë në publik në vite.

Nuk është fjala për një koncesion. Nuk është një drejtë apo e mirë publike që iu dha një privati për ta shfrytëzuar për të bërë biznes për qëlllime të tij. Eshtë një patneritet publik – privat ku një operator privat (në këtë rast një bashkim operatorësh privatë) kontrakohet që të ofrojë një shërbim që shteti duhet ta kryejë për qytetarët e vet.

Kontrata nuk përbën thjesht dhe vetëm vënie në punë të një centrali sterilzimi në QSUT. Kontrata i kërkon një operatori privat që për të gjithë sallat operatore në Shqipëri ku shërbejnë çdo ditë rreth 430 kirurgë të ofrohet për çdo ndërhyrje kirurgjikae një set instrumenatsh kirurgjikalë i personalizuar sipas asaj klase dhe tipi ndërhyrje kirurgjikale STERILË, një set me veshje njëpërdorimësh të tipit TNT për shtratin operator dhe trupën mjekësore, dezisfektimi i sallës së operacionit dhe trajtimi i mbetjeve të rrezikshme që krijohen nga veshjet që përdoren dhe përpunimi i tyre në mbetje urbane të parrezikshme. I janë dhënë një operatori të vetëm për të patur vetëm një PËREGJEGJËS për rrezikun e infeksionit spitalor.

Zbatimi i sukseshëm i kësaj kontrate në vite ka sjellë që në sallat e kirurgjisë të spitaleve publike shqiptare të ulet ndjeshëm infeskioni spitalor dhe të ulet me tëpaktën 1,8 ditë ditëqëndrimi i një pacienti në spital.

Nuk ëshyë vetëm centrali i QSUT-së, por një rrjet centralesh që ka atë të QSUT-së si primar.

Kontrata ka furnzuar të gjithë kirurgjinë shqiptare me më shumë se 100 mijë instrumenta kirugjikal të rinj e modernë.

Në shtator 2013 kur unë kam marrë detyrën e Ministrit, vendimi që sterlizimi në QSUT do të kryhej jashtë sallave të opereacionit ishte marrë prej vitesh. Në spitalin e ri të ndërtuar në 2009 me konsulence të marrë nëpërmjet Bankës së Këshillit të Europës ishte lënë në katet nëntokë një mjedis për të instaluar një central, ndërsa po prej disa vitesh ishte blerë një central. Nuk ishte inaguruar sepse të inagurohet do të thotë të fillojë punë. Nuk ishte vënë ndonjëherë në punë dhe në shtator 2013 pajisjet kishin dalë edhe nga periudha e garancisë.

Për zbatimin e kontratës kontraktori ka të punësuar rreth 250 vetë nga të cilat në centralin e QSUT-së janë vetëm 30 vetë. Kjo dëshmon se kontrata merr përsipër shumë më tepër sesa vënia në punë e centralit. Por përveç vënies në punë të centralit, nuk ishte parashikuar se si do të shkonin instrumenta sterilë nga godina e centralit në kirurgjinë pedriatrike, në neurokirurgji, kardiokirurgji, në kirurgjinë onokologjike etj. Për atje kalohet nga ambjentet e jashtme QSUT. Kush do i transportonte dhe me se do i transportonte pa cënuar sterilitetin e instrumentave kirurgjikalë. Kush do I kthente përsëri në central për sterilizuar t’I rishtaz.

Meqënse se po thuhet se centrali i sterlizimit i QSUT i plotëson të gjitha nevojat e Shqipërisë, kush dhe me se do i transprtotonte instrumentat e sterlizuar për tek spitali I Traumës, tek seicili nga dy maternitetet, tek spitali Shefqet Ndroqi. Kush do i sillte dhe me se do i sillte përqëri në central për t’u sterilizuar rishtaz. Nga zbatimi i kontratës rezulton se vetëm në QSUT përdoren 935 kontenierë për instrumenta, 22 tavolina lëvizëse dhe 80 dollapë për depozitimin e kontenierëve të set-eve pranë depozitave të çdo salle operatore. Në të gjithë vendin janë 3500 kontenierë instrumentash, 53 tavolina lëvizëse dhe 190 dollapë.

Meqënse se po thuhet se centrali i sterlizimit i plotëson të gjitha nevojat e Shqipërisë, kush dhe me se do i transportonte instrumentat e sterlizuar për tek spitali i Durrësit, Fierit, Shkodrës, Korçës, Sarandës, Vlorës, Elbasanit etj, etj. Kush do i sillte dhe me se do i sillte përsëri në central për t’u sterilizuar rishtaz.

Kush do i përballonte shpeznimet e këtij sterilzimi dhe trasporti? QSUT për të gjithë Shqipërinë? Sa duhet të paguanin spitalet e tjera për këtë shërbim? Spitalet në Shqipëri nuk janë realtete ekonomikë që ofrojnë shërbime për spitale të tjerë.

Prandaj ishte e nevojshme një Operator i vetëm.

Në vitin 2014 nuk i kishim as dijet, as njohuritë dhe as paratë për ta bërë vetëm një sipërmarrje të tillë. Në vitin 2014 qëllimi kryesor ishte ndalimii rrënimit të asaj çfarë gjetëm dhe shlyrja e 40 milionë USD borxhe të trashëguara nga qeverisja e mëparshme.

Siç e thashë edhe më lart, janë të punësuar rreth 250 vetë. Vetëm shpenzimet e shpërblimit të tyre kushtojnë rreth 250 milionë lekë në vit. Dhe nëse shërbehen rreth 60 mijë operacione më vit, rezulton që vetëm shpenzime personeli për një ndërhyrje kirurgjikale janë reth 4 mijë lek.

Megjithatë më mirë se vetë mjekët askush nuk e kupton çfarë ndryshimi ka sjellë ky shërbim në kirurgjinë shqiptare.

Në vijim janë dëshmitë e disa mjekëve të nderuar e të respektuar. I kërkoj ndjesë që po i përdor pa lejen e tyre por gjenden lirshëm nëse kërkon në Google. Po i ripostoj në vijim të këtij shënimi.

Dhe së fundmi diçka lidhur me udhëtimet e mija jashtështetit me “miqtë” e mi Umbro Staccini e Ilir Rrapaj. I njoh të dy. I kam njohur pasi jam bërë ministër dhe në zbatim të detyrës sime si ministër. Nuk kam zhvilluar ndonjë miqësi të veçantë. Gjatë kohës si ministër kam takuar e jam njohur me siparmarrës të ndryshëm, të huaj dhe shqiptarë, dhe për nevoja pune kam fimosur kontrata me ta.

Të udhëtosh Tiranë – Romë apo Romë – Tiranë si dhe Tiranë – Vjenë apo Vjenë Tiranë është gjëja më normale nëse do të udhëtosh nga Tirana për në Europë apo për në botë. Këto janë rrugët ajrore të Shqipërisë (në atë kohë nuk ishte Wizzair). Mund të qëlloj që në ato fluturime të jenë miq, shokë, kontraktorë, bashkëpunëtorë etj. Vetëm pse je në atë fluturim kjo nuk besoj se është indicia për fajësi.

Në shtator 2016 është e vërtetë se kam udhëtuar për në Vjenë. Sipas hetimit paska qënë edhe Admir Daca. Mundet. E kam njohur vetëm ditën që kam firmosur kontratën. Unë vetë kam fluturar për në Vjenë për një vizitë pune në ANEA (Agjencia e Energjisë Atomike e Kombeve të Bashkuara). Bëni një kërkim “Ilir Beqaj në ANEA” në Google dhe ju del lajmi i asaj vizite. Pse kam qënë dhe me kë kam qënë. Por po e ripostoj.

Në maj 2017 nuk kam udhëtuar jashtë shtetit sepse kam qënë në qarkun e Dibrës në fushatë elektorale.

Tema

[Albo]

Duhet revoltë qytetare për sterilizimin, Berisha: Zhdukja e kontratës origjinale, banditizëm për të fshehur vjedhjen



Teksa thotë se duhet një revoltë qytetare për çështjen e sterilizimit, zhdukjen e kontratës origjinale të koncesionit të sterilizimit, Sali Berisha e konsideron banditizëm për të fshehur provat e vjedhjes.

Në një reagim në Facebook, Berisha akuzon ish-ministrin e Shëndetësisë Ilir Beqaj se ka zhdukur kontratën origjinale të koncesionit të sterilizimit dhe e ka zëvendësuar atë me një kontratë të falsifikuar.

“Zhdukja e kontratës origjinale të sterilizimit nga Beqja është banditizëm ekstrem. Ky akt ngjason me atë të vrasësit, që për të zhdukur gjurmët e krimit djeg trupin e viktimës pasi e ka ekzekutuar atë“.

Postimi i plotë

Zhdukja e kontratës origjinale të sterilizimit nga Beqja është banditizëm ekstrem. Ky akt ngjason me atë të vrasësit, që për të zhdukur gjurmët e krimit djeg trupin e viktimës pasi e ka ekzekutuar atë.

Të dashur miq! Kriminel me mandat ministri, anëtarë qeverie si Beqja, për të fshehur gjurmët e vjedhjeve të tij të tmerrshme, prej qindëra milionë euro me koncesionet e tij, ka zhdukur origjinalin e kontratës së sterilizimit.

Zhdukja e origjinalit të kontratës së sterilizimit, por dhe kontratave të tjera nga kasaforta e ministrit, që e ka firmosur atë pasi gjendet se vetëm me sterilizimin ai ka vjedhë dhjetëra milionë euro, është një akt kriminal i shëmtuar, i ngjashëm me atë të një vrasësi, që për të fshehur vrasjen dhe zhdukur gjurmët e krimit të vet, djeg kufomën e viktimës së tij. Me zhdukjen e kontratës origjinale dhe zëvendësimin e saj me një kontratë të falsifikuar, Beqja kërkon të fsheh të gjitha klauzolat e kontratës, në të cilat është bazuar vjedhja e hapur e parave publike nga koncesionari i tij.

Të dashur qytetar dhe qytetare, shikoni pra se kush janë ata që drejtojnë Ministritë e vendit dhe ulen në karrigen e anëtarit të qeverisë. Duke dënuar me forcën më të madhe këtë akt të rëndë kriminal shtetëror, ju bëj thirrje qytetarëve shqiptarë, që të ngrihemi sot ose kurrë kundër kësaj organizate kriminale, që quhet qeveri dhe kryesohet nga Edi Rama dhe nuk ndalet para asnjë krimi për plaçkitjen e qytetarëve shqiptarë.

Vetëm revolta qytetare e qëndrueshme gjerë në dëbimin nga pushteti të këtyre kriminelëve me mandat, është rruga e vetme e shpëtimit të çdo qytetari të ndershëm dhe Shqipërisë nga kthetrat e tyre.

Koha Jone

[Albo]

Kontrata e sterilizimit “u zhduk” nga arkiva e Ministrisë së Shëndetësisë, SPAK pas dy ditësh: E gjetëm, ishte në…/ Beqaj do rimerret në pyetje për udhëtimet me biznesmenin

Ilir Beqja është vendosur të thirret sërish për të dëshmuar. Ky fakt ka dalë ditën e djeshme nga vetë Prokuroria e Posaçme që ka në duar dosjen e koncesionit të ‘sterilizimit’ prej afro tre vjetësh dhe që veprimet konkrete u zhvilluan vetëm pak ditë më parë.



Beqja do të ripyetet konkretisht për rolin e tij të dalë në lidhjet miqësore mes dy biznesmenëve, ndërkohë që Gjykata e Posaçme edhe kërkoi që hetimet të orientoheshin edhe në anën e të gjithë praktikës së ndjekur nga vetë ish-ministri si titullari i institucionit ku janë kryer veprimet.

Po ndërkohë që në pranga janë vendosur vartësi i asaj kohe i Beqjas dhe biznesmeni që përfitoi koncesionin, SPAK ditën e djeshme ka treguar se ka gjetur kontratën origjinale të sterilizimit. SPAK, në fakt, ditën e shtunë bëri me dije zyrtarisht se në sekuestrimin e dokumentacionit të bërë 3 vjet më parë në ministrinë e Shëndetësisë nuk ishte kjo kontratë, por dje treguan se kontratën e kishin gjetur nëpër institucionet e tjera, por pa treguar se në çfarë godine ka qenë e lënë kjo kontratë.

DOSJA

Zhvillime të reja janë bërë me dije për dosjen e koncesionit të sterilizimit që po hetohet nga SPAK, teksa ndodhen pas hekurave një ish-zv.ministër Shëndetësie dhe një biznesmen. SPAK do të rimarrë në pyetje ish-ministrin e Shëndetësisë, Ilir Beqja, në lidhje me udhëtimet me biznesmenët Ilir Rrapaj dhe Umbro Staçini. Ende nuk është vendosur se kur do të thirret për t’u ripyetur ish-ministri, pasi GJKKO orientoi SPAK të hetonte rreth rolit të tij. Dje ishministri deklaroi se të udhëtosh Tiranë – Romë apo Romë – Tiranë si dhe Tiranë – Vjenë apo Vjenë Tiranë është gjëja më normale dhe vetëm pse je në atë fluturim kjo nuk besoj se është indicie për fajësi.

Udhëtime dhe njohje të mëparshme deri në dhënien e një koncesioni me vlerë 100 milionë euro janë në brendësi të dosjes së Prokurorisë së Posaçme për koncesionin e sterilizimit të pajisjeve kirurgjikale.

Në dosjen thuhet se Ilir Beqja, atë kohë ministër i Shëndetësisë, dhe biznesmeni Ilir Rrapaj, si dhe administratori i shoqërisë koncesionare Sani Service kanë kryer udhëtime së bashku. Ashtu siç zbulohen edhe udhëtimet e ishzv.ministrit të Shëndetësisë, Klodian Rjepaj me biznesmenin Rrapaj.

Gjatë hetimeve paraprake, më datë 15 nëntor 2021 është bërë këqyrje e sistemit TIMS për të dhënat e shtetasve Ilir Rrapaj, administrator i Investal, Klodian Rjepaj, kryetar i Komisionit të procedurës së komisionit të dhënies së Koncesionit, Umbro Staccini, shtetas italian, administrator i Tecnosanimed dhe një nga aktorët kryesorë të Koncesionarit Sani Service, Ilir Beqja, titullari i Autoritetit kontraktor dhe Admir Daca, administrator i Sani Service.

Nga procesverbali, u vërejtën edhe hyrjet dhe daljet e këtyre personave nga territori i Republikës së Shqipërisë ku rezultoi se:

Shtetasit Ilir Rrapaj, Ilir Beqja dhe Klodian Rjepaj kanë hyrë në Shqipëri në pikën e kalimit kufitar Rinas, nga Italia, më datë 15 qershor 2014 përkatësisht në orën 21:12, 21:14 dhe 21:10.

Nga këqyrja e të dhënave nga faqja zyrtare e Ministrisë së Shëndetësisë dhe Mbrojtjes Sociale rezulton se më datë 15 qershor 2014 është bërë postim mbi takimet e kryera nga Ministri i Shëndetësisë Ilir Beqaj dhe Klodian Rjepaj më datë 13 qershor 2014. Kjo periudhë përkon me veprimet përgatitore të Koncesionit.

– Shtetasit Ilir Rrapaj dhe Klodian Rjepja kanë dalje nga Shqipëria në pikën e kalimit kufitar Rinas, me linjë ajrore Romë, në datë 26 mars 2015, përkatësisht në orën 16:34 dhe 16:25 (kjo periudhë përkon me shpalljen e njoftimit të tenderit brenda afatit të dorëzimit të ofertave).

Për këtë udhëtim Klodian Rjepaj, ka marrë “autorizim për shërbimin jashtë vendit”, datë 18 mars 2015 për të marrë pjesë në një vizitë pune në rajonin e Umbrias, Itali, për takime zyrtare me autoritetet e larta shëndetësore të rajonit në zbatim të marrëveshjes midis rajonit të Umbrias dhe Ministrisë së Shëndetësisë.

“Kemi gjetur edhe kontratën origjinale të ‘Sterilizimit’”

SPAK, ditën e djeshme (21 Gusht) ka bërë një sqarim për kontratën e koncesionit të sterilizimit. Kontrata është gjendur në institucione të tjera dhe jo në Ministrinë e Shëndetësisë. Nisur nga lajmi i bërë publik dy ditë më parë se skandali shkon edhe më tej kur rezulton se në Ministrinë e Shëndetësisë nuk ka një kontratë origjinale të këtij koncesioni.

Në dosjen e SPAK-ut thuhet se në datën 8 tetor të vitit 2021 është marrë vendimi i sekuestrimit të dokumenteve të këtij investimi partneritet publik-privat.

“Origjinali nuk u gjet në Ministrinë e Shëndetësisë. Disponojmë kontratën origjinale të koncesionit të sterilizimit. Kontrata origjinale u gjet në institucione të tjera. Origjinali është edhe në institucione të tjera. Kotrata origjinale u sekuestrua tek koncesionari”, thuhet ndër të tjera në njoftimin e SPAK.

NJOFTIMI I SPAK

“Në zbatim të këtij vendimi, oficerët e Policisë Gjyqësore kanë sekuestruar dosjen e koncesionit pranë Ministrisë së Shëndetësisë. Gjithashtu duhet theksuar se me gjithë kërkimet në institucion dhe arkivën e ministrisë së Shëndetësisë, zyrtarët e këtij institucioni nuk gjetën dhe nuk venë në dispozicion kontratën origjinale të koncesionit dhe as anekset përkatëse. Dokumentacioni i sekuestruar është origjinal i kopjes së njehsuar të dërguar nga ministria e Shëndetësisë për sa i përket procedurës së dhënies së koncesionit me shkresën numër 910/1, datë 19 shkurt 2020”.

Panorama

[Albo]

‘Kosto të papërballueshme’: Ministria e Shëndetësisë bëri një vesh shurdh për ankesat e spitaleve

Të dhënat e siguruara nga hetimi tregojnë se zbatimi i kontratës së sterilizimit shkaktoi konflikte mes koncesionarit dhe spitaleve rajonale dhe lokale dhe i ngarkoi këto të fundit me kosto shtesë të faturave të energjisë dhe të ujit, ndërsa ankesat e tyre nuk morën zgjidhje nga Ministria.

Nga Edmond Hoxhaj


Ministrja e Shëndetësisë Ogerta Manastirliu dhe ish ministri Ilir Beqaj, gjatë një vizite në shërbimin e Hemodinamikës në QSUT, ku është përuruar një pajisje e re e angiografisë që monitoron enët e gjakut që furnizojnë zemrën. | Foto nga : LSA

Më 24 gusht 2018, Spitali Rajonal i Durrësit i shkroi Ministrisë së Shëndetësisë dhe kërkoi ndihmën e saj për “zgjidhjen e problematikës” me koncesionarin e sterilizimit të pajisjeve kirurgjikale.

Shërbimi i koncesionarit në Durrës kishte filluar në mars 2018, por drejtuesit e spitalit nuk kishin pasur asnjë informacion lidhur me mënyrën e funksionimit të kësaj kontrate. Pas mbërritjes së kontratës dhe anekseve të saj me email në korrik, Spitali Rajonal i Durrësit kishte vërejtur se instrumentet e përdorura në mikrokirurgji nuk ishin pjesë e kësaj kontrate.

“Duke qenë se kompania në fjalë ka marrë të gjitha ambientet e përdorura më parë për proceset e sterilizimit dhe duke kërkuar heqjen e instrumenteve të përdorura në mikrokirurgji, në këtë repart ka vazhduar aktiviteti duke përdorur setet e mësipërme,” thuhet në shkresën e cituar në vendimin e gjykatës.

Spitali Rajonal i Durrësit informonte më tej se kishte vendosur që ta kryente vetë sterilizimin për pajisjet e mikrokirurgjisë, por druhej se ky veprim mund të sillte kontradikta me koncesionarin, ndaj kërkonte “ndërhyrjen e Autoritetit për zgjidhjen e problematikës”.

Spitali Rajonal i Durrësit nuk ishte i vetmi që pati probleme me zbatimin e kontratës koncesionare që u ka kushtuar taksapaguesve shqiptarë rreth 76 milionë euro deri në fund të vitit 2022.

Të dhënat e siguruara nga vendimi i Gjykatës së Posaçme për kontratën PPP të sterilizimit tregojnë se mosllogaritja e saktë e numrit të ndërhyrjeve kirurgjikale nga komisioni i dhënies së koncesionit ka sjellë tejkalimin e tavaneve buxhetore në favor të kompanisë koncesionare Sani Service, duke e vënë të gjithë sistemin shëndetësor nën presion.

Më 8 gusht 2018, Sekretari i Përgjithshëm i Ministrisë së Shëndetësisë, u ka kërkuar spitaleve ku ofrohet shërbimi i koncesionit të ndiqen propozimet e dhëna në memo nga grupi i punës. Pesë ditë më vonë, Fondi i Sigurimit të Detyrueshëm të Kujdesit Shëndetësor, FSDKSH i është drejtuar atij, duke e informuar se “financimi i kontatës koncesionare po bëhej i papërballueshëm”.

Ankesat për faturat e energjisë dhe ujit

Hetimet 3-vjeçare të prokuorëve Edvin Kondili dhe Ened Nakuçi e mbyllën rrethin e të akuzuarve me ish-zëvendësministrin e Shëndetësisë, Klodian Rrjepaj dhe anëtarët e komisionit, por gjyqtari Erion Bani arsyetoi se ka indicia se ish-Ministri Ilir Beqaj paracktoi fituesit, nuk ndaloi konfliktin e interesit dhe bëri udhëtime me përfituesit e konçesionit, prej nga ngrihen dyshime dhe për veprën penale të korrupsionit.

Sipas dosjes hetimore, aktiviteti i kompanisë koncesionare, Sani Service u shkaktoi spitaleve publike kosto të shtuara të faturave të energjisë dhe të ujit, duke rënduar gjendjen financiare të tyre.

Këto kosto iu ngarkuan spitaleve publike gjatë procesit të negocimit të kontratës koncesionare, sipas gjykatës në shkelje të studimit të fizibilitetit dhe planit të biznesit të koncesionarit.

Përveç problemeve me instrumentet e mikrokirurgjisë, në spitalin rajonal të Durrësit ka pasur konflikte edhe për operimin e centralit të sterilizimit dhe faturat e energjisë dhe të ujit.

Spitali i Durrësit ka njoftuar Ministrinë e Shëndetësisë se SaniService kryente aktivitetin e tij prodhues pa pagesë qiraje dhe pa paguar konsumin e energjisë elektrike dhe të ujit që shërbejnë për funksionimin e procesit produktiv të centralit të sterilizimit, në kundërshtim me projektin teknik të kontratës. Operatori koncesionar ka refuzuar gjithashtu një kërkesë të Spitalit Durrës për të instaluar matësit e energjisë elektrike dhe të ujit me qëllim monitorimin e konsumit që rridhte prej aktivitetit të tij.

Në këto kushte, Spitali i Durrës ka instaluar me shpenzimet e veta matësin, prej nga ka rezultuar se konsumi nga operatori ka qenë rreth 550 mijë lekë në muaj, vlerë që është cilësuar e pamundur për t'u përballuar.

Në janar 2019, Ministria e Shëndetësisë ka marrë një kërkesë edhe nga Spitali i Lushnjes për të likujduar kostot e shpenzimeve për energji elektrike dhe ujë që shpenzonte koncesionari.

“Me matës të veçantë, shpenzimet për ujë dhe energji elektrike faturohen në muaj me vlerë 600,000 lekë, ose në vlerë vjetore 7-8 milionë lekë me këtë konsum. Kërkohet ndërhyrje nga Autoriteti Kontraktor për dhënien e fondeve për këto shpenzime,” shkruante asokohe Spitali i Lushnjes.

Në përgjigjen për Spitalin e Lushnjes, Ministria e Shëndetësisë justifikohet se është e detyruar të zbatojë përcaktimet kontraktuale të parashikuara në kontratë.

“Kjo pikë do të negociohet me SaniService, por përsa kohë nuk ka përfunduar ky proces, do të vazhdojnë me të njëjtat kushte,” citohet përgjigja e Ministrisë në vendim.

Faturimi i energjisë dhe ujit në kurriz të spitaleve publike është vlerësuar si favorizim për kompaninë koncesionare dhe dëm ekonomik edhe gjatë një auditi të Kontrollit të Lartë të Shtetit.

Sipas raportit, ky problem nuk u amendua në kontratë pas negociatave të kryera nga Ministria e Shëndetësisë me kompaninë koncesionare, duke vazhduar në të njëjtën gjendje.

Kostot e sterilizimit

Në fund të vitit 2018, rritja e kostove të procesit të sterilizimit përtej parashikimeve buxhetore në kontratë ka shkaktuar dhimbje të shtuara koke për Ministrinë e Shëndetësisë dhe Fondin e Sigurimit të Detyrueshëm të Kujdesit Shëndetësor.

Kjo i ka detyruar spitalet që të nxjerrin në punë autoklavat e vjetra për të mbajtur nën kontroll kostot, por kjo ka shkaktuar konflikte shtesë me kompaninë koncesionare.

Më 18 tetor 2018, spitali “Shefqet Ndroqi” iu drejtua Ministrisë së Shëndetësisë, ku i kujton se në takimet e kryera më parë për problemet e shfaqura pas mbërritjes së koncesionarit, është këmbëngulur për përdorimin e burimeve të brendshme të vetë strukturës për sterilizimin me atoklavë.

Gjithashtu, drejtuesit e spitalit “Shefqet Ndroqi” e kanë njoftuar Ministrinë se në takimet me SaniService, këta të fundit kanë pretenduar se përdorimi i autoklavës me avull për sterilizim të paketimeve të mjekimit me temperaturë të ulët ‘konsiderohet shkelje e kontratës së koncesionit”.

“Kërkohet konfirmim ose jo të sterilizimit të paketimit të mjekimit me autoklavë me avull të vetë institucionit,” shkruante spitali “Shefqet Ndroqi”.

Edhe kompania koncesionare është ankuar në Ministrinë e Shëndetësisë se disa prej spitaleve publike nuk e marrin shërbimin e seteve të personalizuara për disa prej ndërhyrjeve që konsiderohen si mikrokirurgji.

“Në disa spitale nuk rezulton përdorimi i rregullt i seteve kirurgjikale të vendosura në dispozicion sipas kontratës koncesionare. Kërkohet ndërhyrja e MSHMS për verifikimin e shkaqeve që sjellin mospërdorimin e setit të personalizuar,” citohet në vendim letra e kompanisë SaniService.

Edhe QSUT i ka kërkuar Ministrisë së Shëndetësisë që të lejojë sterilizimin e seteve kirurgjikale që disponohen nga vetë shërbimet për t'u përdorur si paketime të mjekimit të plagëve për pacientët që paraqiten në urgjencë.

Por, ministria i ka kthyer përgjigje duke thekusar se shërbimi i sterilizimit të seteve kirurgjikale është një nga shërbimet që ofron koncesionari SaniService.

Gjykata thekson se kërkesat e spitaleve për përdorimin e seteve të vjetra me qëllim përballimin e numrit në rritje të ndërhyrjeve kirurgjikale, nuk kanë marrë një pëgjigje të saktë nga ana e Ministrisë së Shëndetësisë, e cila u ka kërkuar vetëm që të mos kalohet numri i ndërhyrjeve dhe buxheti.

“Nuk janë marrë masat nga Autoriteti Kontraktor për zgjidhjen e problematikave dhe në shumicën e rasteve, janë lënë pa përgjigje kërkesat e spitaleve…,” thuhet në vendimin e Gjykatës.

Kërkesat e spitaleve nuk janë reflektuar gjithashtu në negociatat e Ministrisë së Shëndetësisë me kompaninë koncesionare dhe sipas vendimit të gjykatës, nuk kanë qenë pjesë e amendimit të kontratës.


BIRN

[Albo]

Ilir Beqaj mbrohet nga hetimet e SPAK me emisionin e paguar nga PPP-ja e ‘sterilizimit’

Ish-ministri nën hetim ka hedhur në rrjet disa video në mbrojtje të PPP-së së sterilizimit të instrumenteve kirurgjikale, të marra nga një emision televiziv për të cilën kompania koncesionare ‘Sani Service’ paguante 5 mijë euro në muaj.

Nga Vladimir Karaj

Skedarët e Bashkëngjitur 182089
Ish-ministri i Shëndetësisë, Ilir Beqaj

Ish-ministri i Shëndetësisë, Ilir Beqaj ka reaguar ndaj lajmeve në media se është marrë nën hetim nga SPAK në lidhje me rolin e tij në skandalin e kontratës të partneritetit publik privat për sterilizim e instrumenteve kirurgjikale.

Beqaj ka postuar në faqjen e tij në Facebook një seri intervistash, ku shfaqen mjekë të njohur, përfshirë edhe rektori i Universitetit të Mjekësisë, Arben Gjata, ndërsa ngrenë lart me superlativa kontratën PPP për menaxhimin e integruar të instrumenteve kirurgjikale.

“Më mirë se vetë mjekët, askush nuk e kupton çfarë ndryshimi ka sjellë ky shërbim në kirurgjinë shqiptare,” shkruan Beqaj, në një postim që shoqëron intervistat.

Intervistat janë marrë nga emisioni televiziv ‘Hipokrati' në Top Channel, i transmetuar në shkurt të vitin 2020. Ajo që Beqaj dështon t'i shpjegojë ndjekësve të tij në Facebook dhe opinionit publik është fakti që ky emision kishte gjatë kohës së transmetimit një kontratë sposorizimi 6 mujore me kompaninë koncesionare ‘Sani Service' shpk me vlerë 5 mijë euro në muaj.

Gjithashtu, Beqaj nuk përmend faktin se producent i emsionit ‘Hipokrati' është Raimond Cimbi, një ish-drejtor prokurimesh në Ministrinë e Shëndetësisë gjatë kohës që Beqaj ishte ministër.

I pyetur nga BIRN mbi shpërdarjen e videove propagandistike nga një emision që përmban ‘reklama të fshehura', për PPP e sterilizimit, Ilir Beqaj deklaroi se fakti që ato ishin paguar nga ‘Sani Service' nuk i hidhte poshtë.

“Mjekët e vënë theksin tek instrumentet e rinj modernë, materialet e buta trup e shtrat njëpërdorimësh, dezinfektim steril të sallave. Evidentojnë statistika të sakta dhe ulje ditëqëndrimi në spital,” tha ai.

Të enjten, Prokuroria e Posaçme kundër Korrupsionit dhe Krimit të Organizuar njoftoi arrestimin e ish.zëvendës ministrit të Shëndetësisë, Klodian Rrjepaj dhe një prej pronarëve të kompanisë koncesionare ‘Sani Service', Ilir Rrapaj.

Sipas njoftimit zyrtar të SPAK, Rrjepaj akuzohet për veprat penale të “falsifikimit të dokumenteve” dhe “shpërdorimit të detyrës”, ndërsa biznesmeni Ilir Rrapaj për mashtrim me pasoja të rënda, parashikuar nga neni 143/3 i Kodit Penal.

SPAK njoftoi gjithashtu se ishin ekzekutuar gjashtë masa të tjera sigurie ndaj anëtarëve të komisionit të dhënies së koncesionit, dy prej të cilëve me arrest shtëpie dhe katër të tjerë me detyrim paraqitje pranë oficerit të Policisë Gjyqësore, një prej tyre ndaj rektorit e Universitetit të Mjekësisë, Arben Gjata.

Por gjyqtari i masës së sigurisë, Erion Bani çmoi se provat në dosje ishin të mjaftueshme për të inicuar ndjekje penale edhe ndaj ish-ministrit të Shëndetësisë, Ilir Beqaj dhe atij të Financave, Shkëlqim Cani.

I pyetur për këtë fakt, prokurori Edvin Kondili i tha BIRN se hetimet për dy ish-ministrat po vazhdonin nga SPAK.

Në faqen 145 të vendimit të Gjykatës së Posaçme për masat e sigurisë ndaj Rrjepajt, Rrapajt dhe të tjerëve, shkruhet se në 1 nëntor 2019, kompania koncesionare ‘Sani Service' lidhi një kontratë me “Inov Production”, me administrator Raimond Cimbi, për bashkëpunimin në kuadër të emisionit “Hipokrati” që transmetohet në Top Channel.

“Pagesa që do të kryhet nga SaniService është 5000 euro në muaj nga data 01.11.2019 deri në datë 31.04.2020 (muaji prill ka 30 ditë)”, citohet kontrata në vendimin e gjykatës.

Beqaj nuk iu përgjigj pyetjeve mbi ligjshmërinë dhe etikën e këtij transaksioni që transferonte paratë e taksapaguesve për sterilizimin e mjeteve kirurgjikale në pagesa reklamash për kompaninë e produksionit të ish-zyrtarit të ministrisë së Shëndetësisë.

Ai ndërkohë pranoi se e njihte producentin e emisionit ‘Hipokrati'.

“Gjatë kohës që unë kam qenë ministër i Shëndetësisë, R.Cimbi (Raimond Cimbi) ka punuar si drejtor drejtorie në MSH(Ministrinë e Shëndetësisë”, shkroi Ilir Beqaj nëpërmjet aplikacionit ‘Whatsapp'.

Ilir Beqaj, i cili drejton sot Agjencinë Shtetërore të Programit Strategjik të Koordinimit të Ndihmës, po hetohet nga SPAK me lidhje me veprimit dhe mosveprimet e tij dhe shkeljet e procedurave të dhënies së koncesionit të sterilizimit kompanisë ‘Sani Service', në pronësi të biznesmenit shqiptar Ilir Rrapaj dhe ortakut të tij italian, Umbro Staccini.

Lista e shkeljeve përmban një studim fizibiliteti me të dhëna të rreme në kundërshtim me ligjin; hartimi i kritereve në mënyrë të tillë që t'u përshtateshin gjendjes reale të kompanive të përzgjedhura paraprakisht si dhe mosveprimin e Beqajt për zgjidhjen e konfliktit të interesit mes Rrjepajt si kryetar i komisionit të koncesionit dhe Rrapajt si përfitues i tij.

Shkelje ligjore janë gjetur edhe gjatë negocimit të kontratës koncesionare, që sipas gjykatës kanë qenë “dukshëm në favor të kompanisë së shpallur fituese, në dëm të interesave të shtetit”.


BIRN

[Albo]

“Sterilizimi”/ Një nga të dyshuarit, kushëri i parë i ish-ministrit, anëtar i komisionit të dhënies së koncesionit. SPAK nën hetim Beqjan



Një prej anëtarëve të komisionit të dhënies së koncesionit të sterilizimit me vlerë 100 milionë euro është kushëri i parë me ish-ministrin e Shëndetësisë, Ilir Beqaj. Bëhet fjalë për Genc Byrazerin, për të cilin me kërkesë të prokurorisë Gjykata e Posaçme caktoi masën e sigurisë “detyrim paraqitje” për të, nën dyshimet për veprat penale të falsifikimit të dokumenteve dhe shpërdorimit të detyrës.

Byrazeri u caktua anëtar i komisionit të koncesionit me urdhrin nr.359 të datës 18 gusht 2014, firmosur nga kushëri i tij i parë, ministri i shëndetësisë së kohës, Ilir Beqaj, i cili sipas orientimit të gjykatës, po hetohet nga SPAK nën dyshimet se ka favorizuar dukshëm kompaninë fituese, kjo në dëm të interesave të shtetit.

Komisioni pjesë e të cilit ishte dhe Byrazeri, kishte detyrë të përgatiste studimin e fizibilitetit, që nga hetimet e SPAK rezultoi se përmbante të dhëna të rreme.

Si shkelje të rëndë, SPAK evidenton edhe fshehjen e konfliktit të interesit mes Ilir Rrapaj, biznesmenit tashmë nën arrest që me kompaninë e tij zotëron 40 për qind të koncesionit me ish zv.ministrin e shëndetësisë, Klodian Rjepaj, ndërkohë në asnjë moment nuk përmendet fakti që Beqaj dhe një prej anëtarëve të komisionit janë kushërinj të parë. Ky aspekt, ngre edhe me shumë dyshime për rolin e Beqajt në këtë koncesion që dyshohet se u paracaktua. në lidhje me koncesionin e sterilizimit me urdhër të SPAK u arrestua biznesmeni Ilir Rrapaj, si dhe ish zv.ministri Klodian Rjepaj, dy zyrtarë u dërguan në ‘arrest shtëpie’, 4 të tjerë përfshirë dhe kushëririn e ish ministrit do të hetohen nën masën e detyrimit për paraqitje.

Balkanweb

[Albo]

Rama: Sterilizimi një nga punët më të bukura që kemi bërë



Kryeministri Edi Rama gjatë konferencës së sotme për media deklaroi se koncesioni i sterilizimit është një nga punët më të bukura të qeverisë së tij

Gjatë fjalës së tij, ai tha sa i përket atyre që kanë shkelur kontratën apo janë nën akuzë, do paguajnë.

Duke iu referuar sërish kësaj çështje ai thotë ka shumë që i rezistojnë tundimeve por ka dhe nga ato që bien pre, pasi pushteti është një kafshë e egër që do shumë punë për tu zbutur.

“100 herë të kthehesha mbrapa, 100 herë do të mbështesja këto PPP që kemi bërë. 100 herë. Sepse veprat janë ato që mbeten, ndërkohë që sigurisht problemet e korrupsionit janë të lidhura me ata që kanë gjëra në dorë, nuk janë të lidhura me ata që s’kanë gjë në dorë. Kur ne kemi bërë reformën në drejtësi dhe kur kam thënë që dua një drejtësi që të godasë majtas, djathtas dhe të ecë vetëm drejt nuk kam bërë propagandë, e kam ditur këtë qe vjen.

Nuk e kam ditur kujt do t’i ndodhë, por e kam ditur këtë që vjen. Shumë socialistë të korruptuar? Socialistët janë 1 mln kurse të korruptuarit janë shumë pak, janë asgjë në raport me fuqinë e PS. E rëndësishme është që sterilizimi është një nga punët më të bukura që ne kemi bërë. Shkoni pyesni mjekët nëpër spitale. Kam marrë mesazhet pa fund nga profesorë, mjekë që ishin të shqetësuar se mos kontrata do të sekuestrohej që s’ishte rasti. Dhe pse? Sepse me atë kontratë dhe me atë transformim ne kemi ndryshuar mjekësinë shqiptare në hallkën më delikate që janë ndërhyrjet në trupin e njerëzve.

Nëse në procesin e asaj kontrate individë të caktuar kanë hyrë në gjynah me popullin ose atdheun do paguajnë. Kështu funksionon. Kur ne zgjedhim ne nuk i kalojmë njerëzit në sallën e torturave për të marrë vesh se çfarë bëjnë ata në të ardhmen. Pushteti është një lloj kafshe shumë e egër. Është shumë e vështirë ta mbash të zbutur dhe të mos biesh pre e dhëmbëve të veta. Ka shumë që e mbajnë, ka shumë që nuk e mbajnë.

Por, s’mund të bëjmë parashikime paraprake se kush do i rezistojë tundimit dhe kush jo. Në proces njerëzit janë natyra të ndryshme. Ka disa më të fortë, e disa më të dobët. Ka nga ata që pyesin dhe ata që s’pyesin për ato që pushteti ta jep si tundim. Them se duhet ta shohim si diçka pozitive dhe përgjegjësi individuale që dikush nuk e mban dot peshën e tundimeve për të bërë 1 rrugë e 2 punë dhe rezultateve të punës. Ndaj ju them, për sterilizimin shkoni dhe pyesni ata që përdorin instrumentet mjekësore se çfarë thonë. Keni pasur një sistem të ndërhyrjeve kirurgjikale mesjetare, keni kaluar nga epoka bronzit në epokën e sotme”, tha Rama.

Koha Jone

[Albo]

Pronarë e punëtorë të “Sterilizimit”, hapën kompani për mbifaturim të vetvetes



Një skenar i ngjashëm, ashtu siç përshkruhet tek libri “Financieri” ka ndodhur dhe tek koncesioni i sterilizimit të pajisjeve kirurgjikale, ku pronari shqiptar Ilir Rrapaj dhe ata italianë, por dhe drejtorët e kompanisë koncesionare, hapën një seri kompanish duke faturuar vetveten.

Faturimi i vetvetes dhe lidhja e kontratave të shërbimit me kompani të treta të hapura nga vetë pronarët e koncesionit, ishte në kundërshtim me kontratën e sterilizimit, pasi firma “Sani Service” në pikën 4 të kontratës ka pretenduar se:

”…ka të gjithë informacionin, pajisjet, sistemet dhe personalin e nevojshëm dhe të kualifikuar me qëllim zbatimin e detyrimeve që rrjedhin nga kjo kontratë…”

E veç hapjes së kompanive, rezulton në dosjen e SPAK se vetë pronarët e koncesionit, kanë lidhur kontrata shërbimi dhe shpërblimi me vetveten, duke faturuar qindra mijëra euro në llogaritë e tyre.

Një skemë mjaft e dyshimtë që krijon bindjen për pastrim parash, fshehje të ardhurash dhe korrupsion, duke krijuar metastaza niptesh tatimorë, ku qëllimi ka qenë mbifaturimi financiar i vetvetes

“Ora News” mëson se një gjë e tillë është kryer duke përdorur kartat e identitet për hapjen e kompanive në emër të pronarëve të koncesionit, punëtorëve të koncesionit, fëmijëve të tyre, nipave dhe grave.

Skema është e qartë: vetë shisnin, vetë blinin.

Sindromës për hapjen e një kompanie tregtare, nuk i ka shpëtuar dhe ish-zv/ministri i Shëndetësisë, Klodian Rjepaj, i cili në datën 18 qershor 2018 ka themeluar nipt fizik me emrin tregtar “Health Protection International.

Sipas dosjes së SPAK, miliardat e buxhetit të shtetit kanë kërcyer dhe qarkulluar nga xhepi në xhep, mes një grushti të vogël njerëzish që punonin dhe kishin pronësinë e koncesionit të sterilizimit të pajisjeve kirurgjikale.

Kërcitja me “top” të parave publike, është vënë re që në 25 nëntor 2015, plot 15 ditë para se Ilir Beqaj të firmoste kontratën e sterilizimit me vlerë 100 milion euro.

Pronari kryesor i koncesionit me 40 për qind të aksioneve në “Sani Service”, Ilir Rrapaj, ka vendosur të shpërblejë veten e tij me 120 mijë euro.

Shpërblimi ka ardhur përmes një kontrate konsulence që Ilir Rrapaj ka bërë me kompaninë koncesionare “Sani Service” të Ilir Rrapaj.

I njëjti mekanizëm është bërë dhe me Elisabetta Anzanello, e cila është Drejtoreshë në “Sani Service” dhe njëherësh gruaja e italianit aksioner në “Sani Service”, Umbro Staçini. Anzanello, ka fituar shpërblim 162 mijë euro, ndërsa burri i saj Umbro, ka faturuar 120 mijë euro.

Ky skenar është përdorur dhe për të faturuar 198 mijë euro nga “Sani Service” tek kompania mëmë e saj dhe pronarja “Ujet S.R.L”

Pra që në hapat e para të koncesionit, pronarët kanë shpërblyer financiarisht pronarët me shifra mbi 100 mijë euro.

Ndërsa në kohët në vijim vetë pronarët dhe punëtorët e koncesionit rezultojnë të kenë hapur një zinxhir kompanish, për të faturuar me miliarda lekë vetveten.

Mes dhjetëra kontratave është zbuluar një dokument ku shfaqet bashkëpunimi profesional me shoqërinë shqiptare “Eumedica Senior” me administrator Umbro Staçini, pronar i “Sani Service” për ofrimin e shërbimit të mbikëqyrjes dhe koordinimin e aktiviteteve të planifikimit dhe projektimit të kompleteve proceduriale të instrumenteve kirurgjikale, identifikimin e furnitorëve të instrumenteve kirurgjikale dhe shërbime tjera konsulence organizative, me afat një vjeçar me ripërtëritje në heshtje nëse nuk parashikohet ndryshe, kundrejt shpërblimit me tarifë fikse vjetore 120 mijë Euro pa TVSH.

Ndërsa për vitin 2019, do të jetë 50 mijë euro për pesë muaj. Kjo tarifë fikse është përveç kostove dhe rimbursimeve të shpenzimeve, si dhe bonusit të parashikuar sipas formulës përkatëse.

Ilir Rrapaj, pronari kryesor i koncesionit të sterilizimit “Sani Service”, hapi dy kompani të tjera si “Globalsher” dhe “AlbaMed 2014”, ku në këtë të fundit 40 për qind aksioneve është Drejtoresha e kompanisë së sterilizimit Elisabetta Anzanello.

Përmes faturave fizike të shitjeve që gjenden në dosjen penale kuptohet qartazi se “Globalsher” e Ilir Rrapaj është faturuar nga “SaniService” e Ilir Rrapaj, për shërbimet e mirëmbajtjes “Full Risk” të instrumenteve, aparatura procesi, impiante, mirëmbajtje vjetore në vlerën 696.752.500 lekë dhe 321.811 euro.

Por koncensionarin ka deklaruar në paragrafin 4 të Kontratës Koncesionare, pika e se:”…ka të gjithë informacionin, pajisjet, sistemet dhe personelin e nevojshëm dhe të kualifikuar me qëllim zbatimin e detyrimeve që rrjedhin nga kjo kontratë…”.

Pra edhe pse ka deklaruar këtë, vërehet se janë nënshkruar kontrata dhe kryer pagesa për shërbime konsulence profesionale për Ilir Rrapaj, Umbro Staçini, “Servizi Italia”, “Tecnosanimed”, “Ujet”, “Eumedica Senior”, “AlbaMed 2014”, “GlobalSher”, “Gama Service”, “Steralb” dhe “Sitec”, ndërkohë që këta janë ortakët e vetë firmës konçesionare “SaniService”.

Këto kontrata shërbimi janë në vlera të konsiderueshme dhe janë të vazhdueshme përgjatë kohëzgjatjes së koncesionit, duke qenë në fuqi edhe tani.

Por SPAK dhe oficerët e Byrosë Kombëtare të Hetimit, nuk kanë gjendur dokumentacion justifikues për shërbimet konkrete që koncensionari “Sani Service”, ka marrë nga vetë shoqëritë apo individët, që janë pjesë e organikës së tij.

Sipas vendimit të gjyqtarit Erjon Bani, shërbimet e mirëmbajtjes për impiantet, aparaturat e procesit dhe instrumentet kirurgjikale janë nënkontraktuar tek “Globalsher” që sapo ishte formuar dhe nuk kishte asnjë kapacitet ekonomik, teknik dhe profesional që të kryente këto shërbime.

“…ndërkohë që koncensionari ka parashikuar në dokumentet e ofertës në plan biznes se për mirëmbajtjen do të ngrihej një qendër teknike nga koncensionari. Një gjë e tillë nuk është realizuar…”-thuhet në vendimin e gjykatës së posaçme.

Ndërkohë pas nënkontraktimit të kontratës nga “SaniService” i Ilir Rrapaj dhe “Globalsher” i Ilir Rrapaj, ky i fundit i ka dhënë shërbimet me nënkontraktim tek subjektet të tjera si “Florjan Biçaku PF”, “Servet Biçaku PF”, “Me-Sys s.r.l”, “Comfort Sh.p.k”. etj.

Këto subjekte kanë faturuar rreth 44.000.000 lekë “Globalsher” për të njëjtat shërbime që kjo kompani e Ilir Rrapaj, i fundit ka faturuar konsencionarin SaniService të Ilir Rrapaj shumën prej 696.752.500 lekë dhe 321.811 euro.

Në vendimin e gjykatës thuhet se nuk ka dokumentacion që të provojë mirëmbajtjen e bërë nga “Alba light” e Altin Nervaj. Gjithashtu, në deklarimet e bëra në SPAK nga Servet Bicaku dhe Florian Bicaku, rezulton se mirëmbajtja e impjanteve dhe aparaturave të procesit është bërë nga ata në të gjitha centralet e sterilimit në të gjithë Shqipërinë.

Në deklarimin e bërë nga Bledar Rrokaj, mirëmbajtja e instrumenteve bëhet nga kompania “Me-Sys s.r.l”. Po ashtu, Bledari ka shpjeguar se kur instrumentet kirurgjikale të dërguara tek “Me-Sys s.r.l”, për riparime nuk riparohen dot, atëherë zëvendësimi i instrumenteve bëhet nga “SaniService” dhe jo nga “Globalsher”.

“…Kjo do të thotë se nuk kemi të bëjmë me një shërbim “Full Risk” të marrë nga “GlobalSher”….-thuhet në vendimin e gjykatës së posaçme.

Gjithashtu nga Raporti i Kontrollit Tatimor i datës 18 Maj 2018, konstatohet se dhe shërbimet e furnizimit që “Globalsher” ka bërë për “SaniService”, janë shërbime që futen në kategorinë e konsulencës.

Pasi “Globalsher” i Ilir Rrapaj furnizon “SaniService” të Ilir Rrapaj me produkte që nuk i disponon, por i merr nga kompani të tjera. Në këtë rast “Globalsher”, konstatohet se shërben vetëm si ndërmjetëse.

Sipas dokumenteve, Artan Lleshi veç rrogës mujore prej 4 milion e 564 mijë lekë të vjetra si Drejtor i Shërbimit Tregtar në këtë koncesion, ka mundur të përfitojë mbi 1.1 miliard lekë dhe përmes kompanisë “Gama Service”.

Lleshi, hapi kompaninë “Gama Service” duke prerë fatura tatimore me vlerë 1 miliard e 169 milionë lekë tek kompania konçesionare, ku ai ishte emëruar drejtor, pikërisht nga shoku i tij i klasës, Ilir Rrapaj.

Të gjitha këto shitje i ka bërë vetëm me “SaniService”. Ky subjekt ka bërë blerje gjithsej në vlerën 85.692.575 lekë. Nga këto blerje, ka kryer edhe me subjektin “Eumedica Senior” të Umbro Staçini, në vlerën 15.008.804 lekë nga muaji Korrik 2020 deri Dhjetor 2021, si dhe “Steralb” i Xhon Çaushaj, nip i Ilir Rrapaj në vlerën 14.239.057 lekë nga muaji Tetor 2020 dhe Dhjetor 2021.

Po kështu kompania “Albamed 2014″ me ortak Ilir Rrapaj 60% dhe Elisabetta Anzanello 40%, vërehet se ka të deklaruara fatura shitje në vlerën gjithsej në vlerën 38.659.793 lekë. Nga këto shitje i ka bërë vetëm me “SaniService”.

Ky subjekt ka bërë blerje në një total në vlerën 54.872.150 lekë, kryesisht nga “Neëster Systems srl” shoqëri italiane, në vlerën 8.424.906 lekë nga muaji Prill 2017 deri në Mars 2019.

Nga “Tecnosanimed srl” shoqëri italiane, në vlerën 25.1563519 lekë nga muaji Qershor 2016 deri në muajin Janar 2019. Nga “Geonet Sistemi srl” shoqëri italiane, në vlerën 17.933.512 lekë në muajin Dhjetor 2016.

Gjithashti “Eumedica Senior” kompania e Umbro Staçini ka deklaruar fatura shitje gjithsej në vlerën 358.817.451 lekë. Këto shitje i ka bërë tek kompania e tij “SaniService”, në vlerën 49.368.240 lekë, “Gamaservice” e Ilir Rrapaj në vlerën 1 14.561.815 lekë, “Martin Italia srl” shoqëri italiane në vlerën 274.307.237 lekë dhe “Santelara Global M” shoqëri turke, në vlerën 10.337.079 lekë.

Umbro Staçini është ortak me “Tecnosanimed” tek subjekti konçesionar “SaniService” dhe ka qenë ortak tek “Eumedica Senior”, aktualisht administrator dhe tek “Albamed 2014”.

Ndërsa Artan Lleshi është Drejtor i “SaniService” dhe ortak i “Gama Service”. Po kështu vajza e Artan Lleshit, Bora Lleshi ka hapur një kompani duke u bërë ortake e vetme aktuale e subjektit “SITEC”.

Ndërkohë më parë ortak i këtij subjekti ka qënë Mitat Rrapaj, vëllai i Ilir Rrapaj. Të gjitha kompanitë e regjistruara kanë si adrresë të njëjtë “SaniService”.

Po kështu nga verifikimet e “Ora News” del qartë se Drejtori i Komunikacionit në këtë koncesion, Altin Biba, i cili paguhet me një rrogë mujore prej 1 milion e 775 mijë lekë të vjetra, ka kapur një Nipt si person fizik. Nip-ti rezulton të jetë hapur në 23 Maj 2017.

Me të njëjtin objekt veprimi si Altin Biba është hapur dhe një nip-t tjetër fizik me emrin Kleanti Lumi, i cili rezulton të jetë punonjës në kompaninë koncesionare, duke mbajtur detyrën e nënpunësit të Transportit të Mallrave, duke u paguar me një rrogë mujore prej 1 milionë e 200 mijë lekë të vjetra.

Lumi ka hapur nip-tin në 18 qershor 2018, por lista e hapjes së nip-teve të dyshimtë deri në këtë fazë, vijon me Borana Beqirin, teknike-operatore në “Sani Service”. Beqiri paguhen me një rrogë prej 1 milionë e 260 mijë lekë të vjetra si operatore.

Lista vijon me Kristi Timkon, teknik i proceseve të teknologjisë së informacionit në “Sani Service”, i cili merr një rrogë prej 1 milionë e 775 mijë lekë të vjetra.

ORA NEWS

[Albo]

Sterilizimi/ Rama del garant për pagesat e biznesmenit të burgosur Ilir Rrapaj

Kur vendosi burgosjen e zv.ministrit Klodian Rrjepaj dhe biznesmenit Ilir Rrapaj për abuzimet me paratë e koncensionit të sterilizimit, Gjykata e Posaçme kundër Krimit të Organizuar dhe Korrupsionit kërkoi ndërprerjen e koncesionit para afatit. Në vendimin e firmosur nga gjyqtari Erion Bani abuzimet në tenderin 100 milionë euro ishin të tilla që sterilizimi duhet ndalur menjëherë.

Në pikën 20 të vendimit, gjykatësi sugjeron se një kopje t’i dërgohet Inspektoriatit të Lartë të Deklarimit dhe Kontrollit të Pasurisë për “marrjen e masave për ndjekjen e rrugës ligjore për konstatimin e pavlefshmërisë së kontratës koncesionare datë 2 dhjetor 2015 të lidhur mes Ministrisë së Shëndëtësisë, përfaqësuar nga Ministri Z.Ilir Beqaj dhe shoqërisë “Sani Service” sh.p.k. të përfaqësuar nga administrator Admir Daca”

Vendimi i Banit, që përfshin nisjen edhe nisjen e hetimit për Ilir Beqajn dhe Shkëlqim Canin u pasqyrua gjerësisht në media.

Udhëzimi që jepet në këtë vendim për ta ndërprerë sterilizimin u kundërshtuan nga kryeministri Edi Rama, që ishte sot në ambjentet e spitalit Shefqet Ndroqi. Bashkë me mjekët ai vizitoi një nga 17 centralet e reja të krijuara falë PPP-së së sterilizimit, ku ri-investimi i instrumenteve të rinj pritet kryhet në vitin e 7-të të këtij partneritetit, pra këtë vit.

“Kur ndodhi në fillim ajo që u lajmëruan masat e sigurisë, për atë grupin që ka bërë procesin, kam marrë disa mesazhe. Por më shumë sesa pak mesazhe nga mjekë, që edhe ndonjë as nuk e njihja, se ishin të gjithë të shqetësuar se mos sekuestrohet dhe mos bllokohet kjo gjë. Dhe, ku do shkojmë? Dhe kjo nuk është fare pjesë e kësaj gjëje. Dhe nuk ka shanse, sepse qëllimi jonë i përbashkët dhe arsyeja që e kemi bërë këtë, ka qenë që t’ju japim, ju në dorë instrumentet e klasit më të lartë sot dhe janë të klasit më të lartë sot. Nuk ka qenë që hajde të bëjmë këtë dhe pastaj ju kapni ça të kapni. Kush sheh me këtë rast ‘’kapni ça të kapni’’, ka tjetër drejtim, atje ku e dimë” – u shpreh Rama.

Me këtë vizitë, Rama jep një mesazh të dyfishtë. Në njërën anë për drejtuesin e ILDKP, që të mos i bindet urdhrit të gjykatës. Në anën tjetër për biznesmenin e burgosur Ilir Rrapaj që paratë të vazhdojnë të kalojnë tek ai dhe ortakët e tij.

Video

Ky qëndrim i Ramës, që këmbëngul se paratë e taksave tona duhet të vazhdojnë të kalojnë tek biznesmeni i burgosur Ilir Rrapaj, të kujton të njëjtën situatë me atë të inceneratorëve.

Edhe pse Klodian Zoto, Mirel Mërtiri dhe Stela Gugallja ishin shpallur në kërkim, qeveria Rama nuk i ndali pagesat deri kur inceneratori i Tiranës u vu nën sekuestro nga SPAK.

Vetëm se në Sharrë nuk ekziston asnjë incenerator dhe sa më parë të ishin ndërprerë pagesat, aq më shumë para do të ishin kursyer nga buxheti i shtetit. Kostot e fryra të sterilizmit kanë qenë shpeshherë problem për spitalet dhe Ministrinë e Shëndetësisë.

Për vitin 2018 kompanisë private iu paguan 17 milionë euro, nga 10 milionë që ishte parashikuar në kontratë. Për këtë, në vitin 2019 të gjithë spitalet e vendit u urdhëruan të ulin operacionet e planifikuara, në dëm të pacientëve që kishin nevojë për t’u operuar.

Lapsi

[Albo]

“Rrjepaj dhe Rrapaj ishin shokë shkolle”, gazetarja e BIRN: Ilir Beqaj duhet të procedohej penalisht, ka dijeni për…



Gazetarja e BIRN Aleksandra Bogdani, e ftuar në studion e emisionit “Open” ka folur në lidhje me aferën e sterilizimit dhe hetimet e SPAK në lidhje me të.

Bogdani u shpreh se të akuzuarit Ilir Rrapaj dhe Klodian Rrjepaj kanë pasur njohje me njëri-tjetrin, gjë që ka sjellë konflikt të pastër interesi në dhënien e këtij koncesioni.

Ajo shtoi se edhe ish-ministri i Shëndetësisë Ilir Beqaj do duhet të ishte proceduar penalisht nga drejtësia pasi ka pasur dijeni për komunikimet mes vartësit të tij dhe biznesmenit Rrapaj dhe njohjen e tyre.

Video

“Sterilizimi është dosja që është mbajtur më gjatë në SPAK. Kësaj dosje i mungon hetimi pasuror dhe është prekur shumë pak ndjekja e parave të sterilizimit. Kreu i komisionit të dhënies së koncesionit, Rrjepaj ishte shok klase i vjetër me Ilir Rrapajn që përfitoi koncesionin. Ky ishte konflikt i pastër interesi.

Kompania është favorizuar edhe gjatë procedurave të negociatave duke zhytur në borxhe spitalet për faturat e energjisë. Hetimet janë të paplota. Nga të dhënat e dosjes Beqja duhet të ishte nën procedim penal. Nuk ka marrë asnjë veprim për zgjidhjen e konfliktit të interesit mes Rrapajt dhe Rrjepajt. Ai ka qenë në dijeni të qartë që këta persona kishin lidhje miqësore të vjetër”, u shpreh ajo.

Video

Balkanweb

[Albo]

Koncesioni “i ndotur” i sterilizimit/ Si u zbulua abuzimi nga SPAK, miqësia e zv.ministrit me biznesmenin, nga “Mjekësia”, te afera 100 mln euroshe



Emisioni “Në Shënjestër” i gazetares Klodiana Lala në News24 ka sjellë detaje të reja nga dosja e SPAK për koncesionin e sterilizimit që solli disa urdhra arresti.

Një koncesion që në letra, dukej i qepur pastër, ashtu si edhe vetë sterilizimi i setit të pajisjeve kirurgjikale, nëpër spitale.

Aty ku kishin hedhur firmën në dokumente, por që pas hetimeve të gjata disavjeçare të kryera nga SPAK, ky koncesion në fakt do të rezultonte të ishte më i ndotur se edhe vetë sallat operatore, që po ata kishin tenderuar për t’i shpëtuar nga mikrobet.

Në pranga këtë herë do të përfundonin vetë zv/ministri i Shëndetësisë Klodian Rjepaj dhe CEO i koncesionit të sterilizimit të pajisjeve kirurgjikale në spitale, biznesmeni Ilir Rrapaj.

Po cilat ishin gjetjet e SPAK lidhur mbi koncesionin e Sterilizimit dhe përse ky tender i aq shumë lëvduar nga vetë kryeministri Rama, përfundoi ashtu si shumë sivëllezër të tij të ngjashëm në dyert e drejtësisë?

Cila është lidhja e zv.ministrit të Shëndetësisë Rjepaj me biznesmenin Rrapaj, dhe çfarë i nxori ata zbuluar në këtë marrëdhënie?

A është Klodian Rjepaj, i vetmi zyrtar madhor, i përfshirë në këtë mega aferë, që përfundoi në bisturinë e sterilizuar tashmë të drejtësisë?

Po për të kuptuar më mirë se si ‘Sterilizimi’ përfundoi në prangat e SPAK, është me vend të kthehemi shumë pas në kohë, pikërisht 10 vite më parë.

Në vitin 2013, periudha kur në qeverisje, rikthehet Partia Socialiste, e cila mori pushtetin pas një mungese 8-vjeçare me divizën e duarve të pastra.

Ardhje në pushtet ku fillojnë dhe bien në sy edhe disa marrëdhënie klienteliste, midis ministrave të rinj dhe biznesmenëve deri në këtë kohë të panjohur për tregun shqiptar.

Raporte të padukshme që shpejt do të konkretizoheshin me marrëveshje bashkëpunimi dhe koncesione të majme për cilindo biznesmen që do të dorovitej me të tilla shuma parash.

Një histori e tillë e ngjashme duket të jetë edhe kjo e koncesionit të ‘Sterilizimit’

prej 9.6 miliardë lekësh i dhënë nga Ministria e Shëndetësisë në vitin 2015, që prej 4 vitesh ka përfunduar në duart e SPAK.

Tenderi i dyshimtë sot i gllabëron buxhetit të shtetit mesatarisht rreth 1.6 miliardë lekë ose 13 milionë euro në vit.

Sipas dosjes së siguruar nga emisioni ‘Në Shënjestër’, gjithçka nis e merr jetë në vitin 2013, periudhë në të cilën ministër i Shëndetësisë do të emërohet Ilir Beqaj, një ish-basketbollist i Dinamos të viteve ‘80, që një pjesë të mirë të aktivitetit të tij sportiv, e kishte ndarë me Edi Ramën, shoku i tij i rinisë së hershme, që në vitin 2013 do të zgjidhej kryeministër i Shqipërisë.

Në kabinetin e tij do të bënte vend, në postin e Ministrit të Shëndetësisë, edhe për mikun e vjetër, Ilir Beqaj.

Ndër operacionet e tij të para që do të ndërmerrte si ministër, do të ishte edhe ai për kurimin rrënjësor të Shëndetësisë.

Në këtë kuadër, bisturia e parë për ta shpëtuar tashmë njëherë e mirë këtë shëndetësi nga lëngimi i thellë, ku sipas socialistëve e kishin lënë demokratët, do të ishte ai i sterilizimit të pajisjeve kirurgjikale nëpër spitale.

Madje, për ta bërë sa më të besueshme divizën e tyre se epoka kur shëndetësia ishte lënë pas dore kishte marrë fund, më 22 nëntor të vitit 2013, qeveria Rama organizoi në pallatin e Brigadave në Tiranë edhe Nismën “Thuaj po Shqipërisë”.

Të pranishëm në këtë tubim ishin profesionistët më të mirë shqiptarë në fushën e mjekësisë, të thirrur në këtë sallë nga vende të ndryshme të botës.

Por ndërsa në sallë binin tek-tuk në sy emra të njohur të shkencës së mjekësisë, midis tyre vihet re si pjesëmarrës i ulur në radhët e para të karrigeve, një personazh deri në këtë moment i panjohur për publikun, që për kohën nuk duket se prodhonte ndonjë lajm kush e di se çfarë.

Por në vazhdim do të përbënte edhe fillesën e një hetimi të gjatë, nga ku do të rezultonte se personi i ulur përballë kryeministrit Rama dhe drejtuesve të lartë të Shëndetësisë, nuk do të ishte edhe aq rastësisht i përzgjedhur të qëndronte në radhët e para të karrigeve. Ky personazh, do të ishte Ilir Rrapaj, një biznesmen që punët e tij si afarist deri në këtë kohë i kishte zhvilluar në Peruxhia të Italisë.

Aty ai ishte pronar i një agjencie ndërmjetësimi si edhe i një kompanie modeste ndërtimi, sipërmarrje që rezultonte të kishte vetëm një të punësuar, vetë biznesmenin Ilir Rrapaj.

“Më datë 20 nëntor 2021 nga kërkimet e kryera në faqen zyrtare të Ministrisë së Shëndetësisë dhe Mbrojtjes Sociale, rezulton se nga postimi i datës 27 Nëntor 2013 me titull ‘Thuaji Po Shqipërisë’, vërehet një album me fotografi të aktivitetit sipërcituar.

Në këto fotografi bie në sy se në disa prej tyre është fokusuar shtetasi Ilir Rrapaj, i cili ndodhet në praninë edhe të Ministrit të Shëndetësisë Ilir Beqaj, si dhe Zvmministrit Klodian Rjepaj”, thuhet në dosjen hetimore.

Do të ishte pikërisht Ilir Rrapaj, njeriu që deri në këtë moment qëndronte në krah të ministrit të Shëndetësisë Ilir Beqaj dhe numrit dy të dikasterit, Klodian Rjepaj, që pas aktivitetit ‘Thuaj Po Shqipërisë’, do të ishte në vitin 2015, fitues i koncesionit 100 milionë euro të Sterilizimit nëpërmjet kompanisë ‘SaniService’

Disi e habitshme po të mendosh kapitalin dhe sipërmarrjen që Ilir Rrapaj kishte në Itali, koncesion që pas kallëzimit të Nismës ‘Thurje’ në dhjetor të vitit 2019, përfundoi në SPAK.

Por prania e biznesmenit Ilir Rrapaj në krah të dy drejtuesve të lartë të Shëndetësisë në tubimin mjekësor “Thuaj po Shqipërisë”, nuk do të ishte e para, por as edhe e vetmja në vazhdim.

Këtë herë ai do të shfaqej në praninë e tyre, vetëm dy javë më pas, në një pritje që Universiteti i Peruxhias, kishte organizuar për ministrin Beqaj.

“Më datë 18 dhjetor 2013, ministri i Shëndetësisë Ilir Beqaj dhe zv/ministri Klodian Rjepaj, janë takuar me drejtues akademikë të Universitetit të Peruxhias.

Koordinatorë shkencorë për dy institucionet janë caktuar Ilir Beqaj dhe Prof. Gianni Bidini.

Gjatë një kontrolli të kryer në faqen e ‘facebook’ të Ministrisë së Shëndetësisë vërehet postimi i një albumi fotografik me të njëjtin titull dhe në të njëjtën datë.

Në këto fotografi vërehet shtetasi Ilir Rrapaj në krah të zv.ministrit të Shëndetësisë Klodian Rjepaj, në anën e delegacionit të Ministrisë së Shëndetësisë ku ndodhet dhe ministri Ilir Beqaj”, thuhet në dosjen e Prokurorisë së Posaçme.

Kjo foto duket se shërbeu për SPAK edhe si një indicie për të ndjekur të gjithë linjën e afeksionit që lidhi më pas ministrin e Shëndetësisë dhe zëvendësin e tij me biznesmenin që në vitin 2015 do të fitonte koncesionin shumëmiliardësh të ‘Sterilizimit’.

Pikërisht në këtë foto, në sallë ndodhet i ulur edhe një tjetër personazh, i cili do të rezultojë nga hulumtimet e SPAK, se është një tjetër aktor i rëndësishëm i kompanisë ‘SaniService’, kompania, që siç thamë në vitin 2015 do të fitonte koncesionin e sterilizimit.

Ky person del të jetë Umbro Staccini (Umbro Staçini), njeriu që siç shikohet edhe në këtë foto të siguruar nga emisioni “Në Shënjestër” në vitin 2018, i jepet nga Departamenti i Kirurgjisë në Fakultetin e Mjekësisë, certifikata e mirënjohjes, për kontributin e çmuar që sipas këtij Fakulteti ai ka dhënë në dhurimin dhe sigurimin e pajisjeve kirurgjikale në Shërbimet Universitare të Kirurgjisë.

“Në njërën nga fotografitë në dukje të një salle me karrige ku ndodhen të ulur ministri Ilir Beqaj, zv/ministri Klodian Rjepaj, shtetasi Ilir Rrapaj, vërehet dhe një person tjetër, në dukje si shtetasi Umbro Staccini. Këta janë aktorët me të rëndësishëm të koncensionarit ‘SaniService’. Gjithashtu vërehet në dukje edhe Prof. Gianni Bidini”, thuhet më tej në dosje.

Umbro Staccini, duket se ka pasur një rol të rëndësishëm edhe në takimet që më pas Ministri i Shëndetësisë Ilir Beqaj, do të zhvillojë në Umbria të Italisë me drejtues të rëndësishëm të këtij rajoni.

Siç ishte edhe pritja që drejtuesja e këtij rajoni, i bëri ministrit Beqaj, në fund të vitit 2014, ku edhe në këtë takim, sipas fotove të verifikuara nga SPAK, nuk mungon biznesmeni Ilir Rrapaj që duket se ka shërbyer si një lloj xholi midis drejtuesve të lartë shqiptarë të shëndetësisë dhe Umbro Staccinit, që nga ana e tij ka shfrytëzuar lidhjet me politikën vendase, me qëllim për të konkretizuar marrëveshje të rëndësishme në fushën shëndetësore midis Shqipërisë dhe Italisë.

Menjëherë pasi është firmosur ky memorandum bashkëpunimi midis Shqipërisë dhe Rajonit të Umbrias, sipas dokumentacionit që ka siguruar SPAK, në muajin prill 2014 ministri Ilir Beqaj thërret në takim shefat e shërbimit të Kirurgjisë.

Qëllim i takimit del të jetë mundësia e ofrimit të shërbimit të sterilizimit të instrumenteve mjekësore për sallat e operacionit.

Marrëveshja ndërkohë u dërgohet edhe katër dikastereve të tjerë ministrorë që firmosin pa hezitim.

“Me shkresën Nr. 2202 Prot., datë 2 Prill 2014 të Ministrit të Shëndetësisë llir Beqaj, drejtuar Shefave të Shërbimit të Kirurgjisë, u kërkohet atyre takim në Ministrinë e Shëndetësisë më datë 4 Prill 2014 ora 16:00, për strategjinë e Sistemit Shëndetësor, ku në bashkëpunim me Universitetin e Peruxhias Itali, organizojnë një takim në lidhje me mundësinë e ofrimit të shërbimit të sterilizimit të instrumenteve mjekësore për sallat e operacionit”, thotë dosja hetimore.

Në muajin maj të vitit 2014, duket se tashmë se gjithçka është e kopsitur për sa i përket marrëveshjes së sterilizimit midis Ministrisë shqiptare të Shëndetësisë në njërën anë dhe rajonit të Umbrias në Itali në krahun tjetër.

Madje sipas dokumentacionit të siguruar nga SPAK, në Shqipëri vjen edhe vetë Presidentja e Rajonit të Umbrias, për të cilën shtrohet edhe një pritje zyrtare.

Por ndërsa memorandumi i bashkëpunimit kishte si synim pjesëmarrjen e 20 kompanive italiane të interesuara për të ofruar shërbimet e tyre në sektorin e shëndetësisë në Shqipëri, çuditërisht në vendin tonë vjen vetëm njëra prej këtyre kompanive.

Sipas dosjes hetimore “më 21 deri më 23 Janar 2014 në Shqipëri vjen delegacioni italian me kryesues Prof.Gianni Bidini të Universitetit të Peruxhias, si pjesë e marrëveshjes së bashkëpunimit nënshkruar në datat 16-18 Dhjetor 2013”.

“Ku nga këqyrja e e-mail eve të zv/ministrit të Shëndetësisë, Klodian Rjepaj rezulton se pjesë e këtij delegacioni italian kanë qenë edhe Ilir Rrapaj dhe Umbro Staccini. Dokument që është përkthyer dhe është futur në dosjen e përgatitjes së projektit të koncesionit, por në të cilin janë hequr emrat e llir Rrapaj dhe Umbro Staccinit, si pjesë e delegacionit”.

Por ndërsa ishin bërë gjithë këto ecejake ministrore për të formuluar një studim fizibiliteti cilësor dhe të qëndrueshëm për të siguruar sterilizimin e duhur të pajisjeve kirurgjikale në spitale, duket se Ministria shqiptare e Shëndetësisë, zgjodhi rrugën më të shkurtër për ta bërë sa më shpejt këtë studim.

Duke përdorur pjesë të studimit të fizibilitetit të përgatitur po vetë nga delegacioni italian i mbërritur në Tiranë, ku pjesë e këtij delegacioni ishin edhe Ilir Rrapaj dhe Umbro Staccini, dy partnerët kryesorë të ‘SaniService’, që në vitin 2015 do të fitonin koncesionin prej 100 milionë euro të sterilizimit, çka rriti dyshimin te SPAK, mbi një klientelizëm të mundshëm midis tyre dhe drejtuesve të Ministrisë Shqiptare të Shëndetësisë; si dhe një paracaktim të fituesit të koncesionit.

“Dokumenti është përkthyer dhe është futur në dosjen e përgatitjes së projektit të koncesionit, por në të janë hequr emrat e llir Rrapaj dhe Umbro Staccini si anëtarë të delegacionit.

Gjithashtu pjesë të këtij dokumenti janë bërë edhe pjesë e Studimit të Fizibilitetit të procedurës së dhënies se koncesionit”, thotë dosja. Por ato që do ta nxirrnin zbuluar zv/ministrin e Shëndetësisë, Klodian Rjepaj, do të ishin komunikimet e tij me e-mail me biznesmenin Ilir Rrapaj, komunikime të cilat i përkasin viteve 2013-2014, ku del se është ky i fundit që e udhëzon zv/ministrin e Shëndetësisë se çfarë duhet të bëjë për koncesionin e sterilizimit.

“Nga të dhënat e e-maileve të periudhës dhjetor 2013-Mars 2014 midis Klodian Rjepaj dhe Ilir Rrapaj, vihet re se Rjepaj merr udhëzime nga Ilir Rrapaj për veprimet që duhet të kryejë në lidhje me Rajonin Umbria.

Po kështu nga komunikimet del se zv.ministri i Shëndetësisë ka marrë nga Rrapaj edhe draftet e studimit të Universitetit të Peruxhias, që më pas janë bërë pjesë e studimit të fizibilitetit.

Në këto komunikime Ilir Rrapaj në e-mailet e dërguara ka të shënuar se është ‘Promotor biznesi-Confimi Italia’ dhe adresë e-mail info@investital.com, website www.investital.com.

Në fundin e këtyre e-maileve gjendet logo e kompanisë Investital ashtu siç është edhe në dokumentet e ofertës së bërë nga bashkimi i operatorëve ekonomikë të kryesuar nga Servizi Italia.

Në tekstin e dërguar nga Ilir Rrapaj për Klodian Rjepaj kuptohet se kanë njohje dhe marrëdhënie të afërt miqësore me njëri tjetrin”, thuhet në dosje.

Janë pikërisht këto marrëdhënie miqësore dhe kjo shpirtmadhësi e treguar nga ministria e kohës e Shëndetësisë, që çoi SPAK drejt një tjetër investigimi, atë, të gjetjes së fijeve të padukshme të këtij flirtimi që i siguroi biznesmenit Ilir Rrapaj, koncesionin prej 100 milionë euro të Sterilizimit.

Hulumtim rezultoi surprizues edhe për vetë hetuesit, të cilët zbuluan se si zv/ministri i ardhshëm i Shëndetësisë, Klodian Rjepaj kishte përfunduar studimet në të njëjtin auditor me biznesmenin Ilir Rrapaj.

Rjepaj rezulton po kështu se studimet i ka kryer në intervale të ndryshme kohore, madje duke përsëritur edhe vitin akademik.

“Me vendimin e datës 2 Nëntor 2021, në Universitetin e Mjekësisë u krye këqyrja e dokumenteve të mbajtura për ndjekjen e studimeve nga shtetasi Klodian Rjepaj.

Nga kjo këqyrje rezultoi se Klodian Rjepaj ka ndjekur studimet në vitet akademike 1990-1998, të ndara ne dy periudha. Fillimisht ai rezulton se ka ndjekur studimet në vitet 1990-1994. Në vitin akademik 1994-1995 ai del se nuk ka frekuentuar studimet. Një vit më pas në sezonin 1995-1996, Rjepaj ka shënimin ‘Përsërit vitin’.

Po kështu për vitin 1996-1997, ai nuk ka shënime në regjistër.

Nga këqyrja e mëtejshme rezulton se Klodian Rjepaj ka kryer studimet në vitet akademike 1996-1997, 1997-1998 kur dhe është diplomuar.

Ajo që bie në sy në këto regjistra është se në këto vite ka ndjekur studimet akademike në mjekësi edhe shtetasi Ilir Fejzo Rrapaj, nga ku del se në ‘Regjistri 8 Mjekësi’, ku ndodhet emri i shtetasit Klodian Rjepaj, dy rreshta mbi të është i shënuar emri i shtetasit Ilir Rrapaj, të cilët për vitet akademike 1991-1992, 1992-1993, 1993-1994, kanë ndjekur bashkë vitet akademike”, thuhet në dosje.

Interesant është në hetimin e kryer nga oficerët e policisë gjyqësore, fakti që dy studentët Klodian Rjepaj dhe Ilir Rrapaj, i kanë vazhduar dhe ndërprerë studimet në mjekësi në të njëjtën periudhë. Ndërkohë që miqësia e tyre studentore, si në një simbiozë vëllezërish gjaku, përsëritet edhe në vazhdim, kur të dy rezultojnë se kanë përsëritur sezonin akademik, në Fakultetin e Mjekësisë, në të njëjtin vit.

“Për vitin akademik 1994-1995 ashtu si Klodian Rjepaj, edhe shtetasi Ilir Rrapaj nuk ka frekuentuar studimet.

Po kështu në vitin akademik 1995-1996 ashtu si Klodian Rjepaj edhe shtetasi Ilir Rrapaj ka shënimin ‘Përsërit vitin’. Edhe për vitin akademik 1996-1997 nuk ka shënime në regjistër”, deklaron Prokuroria në dosje.

Por ky regjistër ka rezultuar një xhevahir i vërtetë për gjetjet e SPAK, pPasi ndërsa kërkonin për emrat e Klodian Rjepaj dhe Ilir Rrapaj, përpara tyre shfaqet edhe një tjetër zbulim ngazëllues, një emër që duket se plotëson trion e atij që 18 vite më pas do të ishte koncesioni i Sterilizimit.

Ky emër do të ishte Artan Lleshi. Edhe ky në të njëjtin kurs studentësh me Rjepaj dhe Rrapaj.

“Në ‘Regjistrin 7’, ku ndodhet emri i shtetasit Ilir Rrapaj, tre rreshta më sipër vërehet emri i shtetasit Artan Lleshi, i cili ka përfunduar studimet në vitin akademik 1994-1995.

Artan Lleshi rezulton të jetë Drejtor në kompaninë koncesionare ‘SaniService’ që nga krijimi i saj.
Gjithashtu, ai është Administrator i kompanisë ‘Gamaservice’, kompani e cila ka transaksione në shitjet e kryera nga koncesionari ‘SaniService’ për periudhën prill 2020-dhjetor 2021”.

Në lidhje me njohjen e Klodian Rjepaj dhe Ilir Rrapaj, SPAK mori në pyetje edhe një bashkëstudente dhe kolege të ish-zv/ministrit të Shëndetësisë, Klodian Rjepaj.

D.N, pohoi se Rjepaj dhe Rrapaj ishin të dy nga Vlora.

Miqësi që duket se ka lindur në këtë qytet dhe është përforcuar më pas edhe në kohën e studimeve.

“Më datë 22 dhjetor 2021 në cilësinë e personit që ka dijeni për veprën penale u pyet edhe shtetasja D. N.

Ajo deklaron se: ‘Klodianin e kam pasur shok gjatë kohës së ndjekjes së studimeve universitare në Universitetin e Mjekësisë në vitet 1990-1992.

Në dijeninë time Klodiani është larguar një vit në Greqi dhe është rikthyer përsëri më vonë për të kryer studimet. Klodiani është nga Vlora dhe ka bërë shkollën fillore me bashkëshortin tim. Ilir Rrapajn e njoh pasi është nga Vlora dhe kemi qenë studentë bashkë në fakultet. Iliri ka qenë në një brez me mua dhe Klodianin”, thuhet në dëshminë e bashkëstudentes.

Pra, tashmë për Prokurorinë e Posaçme ishte e qartë, se miqësia e hershme midis Rjepaj dhe Rrapaj që datonte nga koha kur ata ishin shokë në qytetin e Vlorës dhe më pas në të njëjtin kurs studimi në Fakultetin e Mjekësisë, kishte ushqyer më pas koncesionin e Sterilizimit.

Rjepaj, në cilësinë e zv/ministrit të Shëndetësisë kishte rigjetur pas 18 vitesh edhe njëherë shokun e vjetër të bankave të shkollës, tashmë biznesmen, për të krijuar këtë lidhje klienteliste.

(BalkanWeb)

[Albo]

Sterilizimi/ Xama: Dosja tregon dëmin ekomomik dhe inkriminim e zyrtarëve të lartë në korrupsion. Sako: U ul numri i operacioneve me qëllim…



Gazetarja Ola Xama dhe eksperti i ekonomisë Pano Sako, të ftuar në studion e emisionit “Në Shënjestër”, nga gazetarja Klodiana Lala, në News24, diskutuan për koncesionin e sterilizimit.

Xama tha se dosja e sterilizimit ndahet në dy pjesë, ajo ekonomike dhe inkriminimi i zyrtarëve të lartë në këtë çështje.

Ndërsa Sako foli për shqetësimet dhe dyshimet e para për koncesionin e sterilizimit dhe për denoncimin e bërë nga Nisma Thurje në SPAK. Ai argumentoi se dyshimet u bënë më të qarta nga ulja e numrit të operacioneve në mënyrë të kujdesshme me qëllim që tarifën ta mbanin të lartë por edhe të mos e kalonin kufirin.

Pjesë nga diskutimi në studio:

Ola Xama: Do e ndaja dosjen në dy pjesë, pjesa ekonomike dhe provat, faktet që SPAK ka zbuluar për inkriminim e zyrtarëve të lartë. Cili është konflikti që SPAK ka ngritur? Sterilizimi është zierja në temperaturë të lartë të mjeteve kirurgjikale që ulin riskun për infeksione. Sipas SPAK dhe auditit, e ofronin vetë qendrat spitalore.

U vendos që sterilizimin do bëhej me koncesion. Rrjepaj me Beqajn kanë zhvilluar takime në Itali, ku SPAK ka zbuluar se pjesëmarrës kanë qenë pronarët e ardhshëm. Kompania ka deklaruar se nuk ka pasur asnjë njohje dhe konflikt interesi, por hetimi ka treguar të kundërtën.

Pano Sako: Shqetësimi ka nisur në vitin 2018. Çfarë është kjo gjë që pengon kryerjen e operacioneve? Këtu morëm spunton dhe pamë disa njolla të errëta. E para ishte që qendra e sterilizimit ishte dhënë falas koncesionarit. E para kemi mjekët që pengohen për kryerjen e operacioneve dhe kjo nuk është normale. Spitalet nuk kishin mjaftueshëm para për ta bërë këtë. Dyshimet ishin, por nuk kishim prova dhe fakte e ndaj bëmë denoncim pranë SPAK-ut. Na bëri përshtypje fakti që kompania ishte regjistruar në Kosovë. Aty e kuptuam se këto skema kanë të njëjtën panoramë, marrë shakë së edhe nga skandali i inceneratorëve. U kujdesën që të ulnin numrin e operacioneve me qëllim që tarifën ta mbanin të lartë por edhe të mos e kalonin kufirin. Kjo ishte skema e zbërthyer. Falsifikimi i numrit të operacioneve u bë për të mos kaluar kufirin e shpenzimeve.

Xama: Ka edhe një mendim subjektiv. Çfarë do të kisha bërë unë? Nëse do kisha njohje me një kompani të madhe që do zgjidhet problem, njohja nuk do ishte problem nëse do jepte shërbim të madh. Unë nuk mënoj se nuk ka njeri budalla që të bëjë burg për shokun apo të pasurojë shokun dhe jo veten. Nuk kemi hetim pasuror. Kam parë bilancet e Sunny Service, ku në 4 vite ka dalë me fitim dhe 4 vite me humbje. Prokuroria ka marrë bilancet, kontratat dhe rezulton se 70-80% të shërbimeve i nënkontraktojnë. Pra nuk është e aftë të kryejë sterilizimin. Kjo kompani nuk ka qenë e aftë të jepte shërbimet.

(BalkanWeb)