Pogradec: Rilindasi dhunon për vdekje biznesmenin Eglantin Proga. Policia mbulon krimin.

[Albo]

Vrasja në Pogradec, Prokuroria akuzon një inspektor policie për shpërdorim detyre

Prokuroria e Korçës akuzon një inspektor të Patrullës se nuk mori asnjë masë për të dokumentuar shkakun e vdekjes së Eglantin Progës në Pogradec, ndërsa raporti paraprak për prokurorin e gatshëm përmbante të dhëna të pavërteta.

Nga Edmond Hoxhaj


Eglantin Proga u dhunua për vdekje më 10 gusht në Pogradec. Foto: Facebook.

E vënë nën shenjestër për “lehtësim të akuzës” nga kryeministri Edi Rama dhe kreu i Policisë së Shtetit, Muhamet Rrumbullaku, Prokuroria e Korçës u kundërpërgjigj të mërkurën me marrjen nën hetim të një inspektori policie për shpërdorim detyre në Pogradec, me pretendimin se nuk kishte marrë asnjë masë për të dokumentuar apo bërë prezent shkakun e vdekjes së 42-vjeçarit Eglantin Proga më 10 gusht.

Sipas njoftimit për shtyp të Prokurorisë, inspektori me inicialet A.L i trupës së shërbimit në Patrullën e Përgjithshme dyshohet se ka shpërdoruar detyrën, pasi ka raportuar tek kolegët të dhëna të pavërteta, duke pretenduar se viktima kishte qenë i dehur dhe kishte rënë në tokë, pa marrë parasysh rrëfimin e një dëshmitari okular, i cili i ka thënë se ndaj 42-vjeçarit ishte ushtruar dhunë.

Në njoftim sqarohet se pas mbërritjes së policisë, i ndjeri është transportuar në spital pa shenja jetë. Një prej dëshmitarëve në momentin e ngjarjes, kushëri i viktimës, ka shpjeguar para hetuesvve se ka dëgjuar inspektorin A.L., i cili i ka komunikuar se një person është i pirë dhe është rrëzuar. Dëshmitari ka shpjeguar se i ka thënë punonjësit të policisë se kushëriri i tij ishte goditur, por inspektori i ka thënë ‘ore ik andej'.

Prokuroria e Korçës thekson gjithashtu se në raportin paraprak që i kishte dorëzuar policia, viktima konsiderohej gabimisht si i dehur dhe ngjarja si aksidentale.

“…Rezulton e provuar, se prokurorit të gatshëm i është raportuar paraprakisht fakti se nga salla operative është marrë njoftim se një person i dehur i moshës rreth 37 vjeç është rrëzuar dhe për pasojë ka ndërruar jetë në Spitalin Rajonal të Pogradecit”, konstaton prokuroria, duke shtuar se si pasojë e veprimeve të punonjësit të policisë nuk është bërë i mundur dokumentimi real i ngjarjes së ndodhur.

Dyshimet për një tentativë manipulimi të ngjarjes u denoncuan publikisht edhe nga familjarët e viktimës, duke shkaktuar irritim dhe revoltë në rrjetet sociale. Por të mërkurën, këto dyshime u hodhën poshtë nga kreu i Policisë së Shtetit, Muhamet Rrumbullaku dhe kryeministri Edi Rama, të cilët sulmuan mediat për dizinformim me ngjarjen.

Pas qëndrimit të kryeministrit Edi Rama, edhe institucionet e drejtësisë u vendosën në një radhë të pazakontë për të reaguar.

Drejtori i Përgjithshëm i Policisë, Muhamet Rrumbullaku deklaroi se punonjësit e policisë vendore në Pogradec i kishin kryer si duhet gjithë veprimet hetimore dhe se në kohë rekord kishin zbardhur ngjarjen.

Ai tha se policia e kishte dërguar materialin hetimor në prokurori për “Vrasje me dashje” dhe se nëse organi i akuzës kishte kërkuar një tjetër masë ndaj autorit, kjo ishte çështje që nuk nuk u takonte dhe se as nuk kishin tagrin ta komentonin.

Rreth një orë pas konfrencës së Rrumbullakut, kryeministri Edi Rama nëpërmjet një postimi në rrjetin X, mbrojti Policinë e Shtetit dhe Urgjencën Kombëtare, duke u shprehur se këto institucione dhanë publikisht provat që hedhin poshtë akuzat e pabazuara se u tentua të fshihej ngjarja.

“‘Vrasja nga pakujdesia' e ngritur si akuzë nga prokuroria, e cila tingëllon e pakuptueshme për këdo që është njohur me dinamikën e kësaj ngjarjeje tragjike, nuk ka asnjë lidhje me Policinë e Shtetit apo me punonjësit e urgjencës, të cilët kanë kryer detyrën me profesionalizëm dhe integritet të plotë ligjor e moral”, shkroi Rama në rrjetin social X.

Edhe Inspektoriati i Lartë i Drejtësisë deklaroi në mbrëmje se kishte nisur verifikimet për rastin, ndërsa ndaj të akuzuarit për ngjarjen pati lehtësim të akuzës nga “vrasja me dashje” në vrasje nga pakujdesia”.

BIRN

[Albo]

Kreu i Policisë së Shtetit sulmon mediat për vrasjen e 42-vjeçarit në Pogradec

Drejtori i Përgjithshëm, Muhamet Rrumbullaku mori në mbrojtje policinë e Pogradecit dhe pasi akuzoi gazetarët për “dizinformim të qëllimshëm” me vrasjen në Pogradec, paralajmëroi kallëzime penale në adresë të mediave.

Nga Edmond Hoxhaj


Drejtori i Përgjithshëm i Policisë së Shtetit, Muhamet Rrumbullaku duke folur për mediat pas prezantimit të një projekti të OSBE kundër trafikimit të qenieve njerëzore. | Foto: LSA

Kreu i Policisë së Shtetit, Muhamet Rrumbullaku mori në mbrojtje punonjësit e komisiariatit të Pogradecit dhe sulmoi mediat dhe gazetarët për “fabrikime dhe akuza të neveritshme në adresë të Policisë së Shtetit” lidhur me pikëpyetjet e ngritura mbi vdekjen tragjike të 42-vjeçarit Egli Proga si pasojë e dhunës së ushtruar mbi të më 10 gusht në qytetin e Pogradecit.

Rrumbullaku shkoi edhe më tej, duke pohuar se struktura të Policisë po hulumtonin rrjetet sociale dhe po përgatisnin kallëzime penale në raport me “këtë dizinformim të qëllimtë e keqdashës ndaj Policisë së Shtetit”.

“Aludimi se është tentuar të fshihet ngjarja nga shefi i Komisariatit të Policisë Pogradec është i pabazuar në asnjë dyshim të arsyeshëm, provë apo fakt konkret dhe si i i tillë është skandaloz. Në asnjë moment dhe në asnjë rrethanë, nga asnjë punonjës i Policisë së Komisariatit të Policisë Pogradec, nuk është tentuar të fshihet apo minimizohet ngjarja e rëndë,” tha Rrumbullaku, duke renditur procedurat e kryera nga policia.

“Drejtoria e marrëdhënieve me median në Policinë e Shtetit dhe departamentet respektive që merren me ndjekjen penale po hulumtojnë gjithë rrjetet sociale dhe po përgatisin kallëzimin penal në lidhje me çdo individ dhe çdo rrjet social në raport me këtë dizinformim të qëllimtë…,” shtoi Rrumbullaku.

Egli Proga, baba i dy fëmijëve u dhunua pasditen e 10 gushtit ndërsa po punonte në një lokal të marrë me qira. Policia arrestoi Denis Meçen, 29 vjeç për krimin, por ai po përballet me gjykatën me akuzën e vrasjes nga pakujdesia. Tre persona të tjerë u ndaluan për moskallëzim krimi dhe veprime që pengojnë zbulimin e së vërtetës.

Proga ndërroi jetë në spital, ndërsa familjarët e tij ngritën dyshime për mbërritjen me vonesë të ambulancës dhe reagimin e policisë.

Motra e të ndjerit, Jonida Proga ngriti akuza për hetim të paplotë të kësaj ngjarje, duke filluar nga punonjësit e policisë dhe deri te gjykata. Dyshimet e familjarëve dhe të dhëna të tjera mbi ngjarjen u raportuan nga gazetarët, por kreu i Policisë së Shtetit pretendoi se ata nuk i ishin referuar njoftimit zyrtar të policisë për ngjarjen.

Kushtetuta e Republikës së Shqipërisë, në nenin 22 përcakton se, liria e shprehjes, e shtypit, e radios dhe e televizionit është e garantuar. Deklarata e Rrumbullakut për mundësinë e kallëzimeve penale ndaj mediave kanë shkaktuar shqetësime mes organizatave të mbrojtjes së gazetarëve.

Isa Myzyraj, kryetari i Asociacionit të Gazetarëve të Shqipërisë, e cilëson deklaratën e Rrumbullakut intimiduese dhe frikësuese për gazetarët.

“Z. Rrumbullaku orientoi gabimisht mediat duke u bërë thirrje se vetëm lajmet e zyrës së shtypit janë të vërteta,” thotë Myzyraj, duke kujtuar se ndryshe nga zëdhënësit, gazetarët kanë për detyrë që në mënyrë të pavarur të verifikojnë disa burime.

“Është gjithashtu skandaloze akuza që bëri z.Rrumbullaku për mediat teksa deklaroi: Çdo lajm që hidhet nga ju për opinionin publik dëmton hetimet. Kjo është tërësisht e pavërtetë, intimiduese dhe frikësuese për gazetarët,” shtoi Myzyraj.

Drejtori i Përgjithshëm i Policisë së Shtetit, Muhamet Rrumbullaku dhe Drejtori i Marrdhënieve me Median, Elton Metaj nuk iu përgjigjën deri në publikimin e këtij shkrimi pyetjeve se ku janë bazuar për kryerjen e verifikimeve në rrjetet sociale mbi mënyrën e raportimit mbi këtë ngjarje.

BIRN

[Albo]

Rama: Dizinformime për të helmuar opinionin publik. Vetëdorëzimi i autorit ndodhi si pasojë e policisë



Në një reagim të dytë për vrasjen në Pogradec dhe të akuzave që Policia po fsheh krimin, kryeministri Edi Rama thotë se kemi të bëjë me dizinformime për të helmuar sa më shumë opinionin publik. Rama shkruan në X, se nuk ka asnjë kontraditë në këtë ngjarje dhe se vetëdorëzimi i autorit ndodhi si pasojë e policisë. ‘‘Faktet janë në dosjet e të dyja institucioneve, madje Urgjenca Kombëtare i ka në një regjistër digjital minutat e sekondat e thirrjeve përkatëse, mu si një pasqyrë kokëfortë për të parë realitetin e të gjithë reagimit shtetëror dhe dallimin e tij me filmin e neveritshëm të të njëjtëve sharlatanë të paudhë që maskaradat i kanë profesion në politikë e në media”,-shkruan Rama në X.

Postimi i plotë i Edi Ramës:

Ata që kanë krijuar çorbën e pistë kundër policisë dhe urgjencës tani flasin për deklarata kontradiktore të shtetit apo për vetëdorëzim të autorit, ndërkohë që s’ka pasur asnjë deklaratë kontradiktore apo a thua se vetëdorëzimi brenda pak orësh i autorit dhe arrestimi i tij, janë gjëra kontradiktore, kur në fakt vetëdorëzimi sikundër e tregon qartë e gjithë dinamika e reagimit përkatës është rezultat i punës së policisë e jo një akt vullnetar nga hiçi i vrasësit!

Ky është rasti tipik i një maskarade të krijuar qëllimisht dhe si provë e maskaradës mjafton vetëm fakti se askush nga nxitësit dhe komentatorët e maskaradës nuk iu referua asnjë çast komunikatës së Policisë Vendore të Korçës, po së bashku iu referuan dizinformimeve e keqinformimeve të njëri-tjetrit për të helmuar sa më shumë opinionin publik.

Prandaj nuk do as mend e as kalem për të kuptuar se dalja publike e niveleve më të larta të Policisë së Shtetit dhe të Urgjencës Kombëtare, as nuk do të kishte pse të ndoshte nëse burimet e dizinformimit e të keqinformimit do t’i ishin referuar fakteve dhe jo sajesave të njëri-tjetrit.

Dhe faktet janë në dosjet e të dyja institucioneve, madje Urgjenca Kombëtare i ka në një regjistër digjital minutat e sekondat e thirrjeve përkatëse, mu si një pasqyrë kokëfortë për të parë realitetin e të gjithë reagimit shtetëror dhe dallimin e tij me filmin e neveritshëm të të njëjtëve sharlatanë të paudhë që maskaradat i kanë profesion në politikë e në media.

Koha Jone

[Albo]

“Do bëj drejtësi”, Motra e Egli Progës: Flisni, ata mund të vrasin vëllezërit tuaj!



Në Pogradec ashtu si edhe në qytete të tjera të vendit, janë mbajtur mbrëmjen e së mërkurës homazhe për Egli Progën, 42-vjeçarin e vrarë barbarisht disa ditë më parë në Pogradec.

Dhjetëra qytetarë dhe familjarë të 42-vjeçarit kanë vendosur lule dhe kanë ndezur qirinj në vendin ku ai u gjet i dhunuar për vdekje mbrëmjen e 9 gushtit.

Motra e viktimës tha para të pranishmëve dhe mediave se nuk do të heqë dorë derisa të vërë në vend drejtësinë për vëllanë e saj.

Ajo iu bëri thirrje qytetarëve të Pogradecit dhe kujtdo që ka dijeni për ngjarjen të flasë, të tregojë gjithçka di për njerëzit që i vranë barbarisht vëllanë, pasi siç tha të njëjtët mund të vrasin nesër të afërmit e tyre.

“Të gjithë ata që i kanë mbyllur gojën këtij qyteti dhe vëllait tim duke i mbyllur jetën do të shkojnë në burg, të gjithë pa asnjë përjashtim. Si ata plehra që e dhunuan dhe ja morën jetën këtu dhe ata që të pashpirt që kërkuan ta mbyllin këtë vrasje makabre me heshtje apo me letra. Kam vetëm një kërkesë për të gjithë pogradecarët; flisni, mos kini frikë, tregoni të vërtetat tuaja për banditët që morën jetën e Eglit, dëshmoni, se ata mund të vrasin vëllezërit tuaj nëse shpëtojnë paq, tregoni kush i mbron, kush janë kriminelët pas tyre. Kërkoj nga sistemi i drejtësisë, avokatë, prokurorë, gjyqtarë, këtë herë nuk ka para, miq, ndërhyrje. Mos bëni gabim ta godisni me shkelma dhe grushte vëllain tim siç bënë barbarët që do përpiqen t’ju blejnë, kërkoj vetëm drejtësi, por jo vetëm si shprehje, e kërkoj si vepër”, tha ajo.

Euronews

[Albo]

Homazhe për Egli Progën në Tiranë dhe qytetet kryesore të vendit



Mbrëmjen e së mërkurës është mbajtur pranë shkallëve të Muzeut Kombëtar në Tiranë një manifestim homazh për 42-vjeçarin Egli Proga i vrarë në Pogradec të shtunën në darkën e 9 gushtit.

Qytetarët kanë dalë dhe kanë vendosur një qiri dhe lule për Eglin.

Thirrje për homazhe janë bërë në të gjithë qytetet kryesore të vendit, Tiranë, Berat, Durrës, Elbasan Shkodër, Pogradec, Vlore, Korçe, Fier.

Me slogan “kundër mafies dhe gjobëvënies”, qytetarët bëjnë thirrje për protestë në formë homazhesh për 42-vjeçarin e vrarë.

Euronews

[Albo]

Berisha: Vrasja e Egli Progës në Pogradec, vrasje shtetërore

VIDEO

Kryetari i PD-së, Sali Berisha në fjalën e tij u shpreh se vrasja e Egli Progës në Pogradec është vrasje shtetërore.

Berisha: Mirëmbrëma dhe përshëndetjet më të përzemërta.
Mirënjohjen më të pakufishme ndaj jush, qëndrestarëve dhe qëndrestareve, guximtareve dhe guximtarëve të pamposhtur të kauzës së drejtë të çdo shqiptari, të shoqërisë dhe kombit shqiptar.

Të dashur miq, le të përshëndesim ne qëndresën, guximin e të gjithë banorëve të Thumanës, Fushë Krujës dhe Krujës për të drejtat e tyre më legjitime përkundër ndëshkimit antiligjor dhe antikushtetues që Edi Rama me Lubi Ballukun në një akt racizmi kriminal u kanë bërë atyre me rrugën, e cila duhej të ishte një mirësi e madhe për banorët e zonës, por edhe një shpërblim i madh sepse u ndërtua mbi tokat e tyre.

Kjo që zhvillohet në Thumanë është dëshmia tjetër më autentike e karakterit çnjerëzor, e qëndrimit racist dhe përçmues të qeveritarëve ndaj qytetarëve të thjeshtë.

Të ndëshkosh me rrugë qytetarët e një zone, t’ua falimentosh atyre biznesin, t’ua nxisësh ditën e tregut, t’u bllokosh atyre turizmin është një ndëshkim që nuk ua ka bërë asnjë pushtim, asnjë regjim.

Ndaj dhe unë u bëj thirrje të gjitha rretheve të veriut, në Thumanë është beteja juaj.
Në Thumanë luftohet për çdo banor nga Fushë Kruja në Vermosh dhe Valbonë.

Në Thumanë luftohet kundër arbitraritetit të një qeverie që përçmon, që shkelmon mbi ta.
Në Thumanë luftohet kundër një diskriminimi të tmerrshëm që u bëhet banorëve më të varfër të Shqipërisë me një taksë të re për të ardhur në kryeqytetin e tyre.

U bëj thirrje ngrihuni, mos pranoni poshtërimin, mos pranoni ndëshkimin.
I jipni këtij pushtuesi atë që i keni dhënë çdo pushtuesi në kohëra.

Asgjë nuk mund të mposhtë kauzën e drejtë të qytetarëve të Krujës, kauzën e drejtë të qytetarëve të të gjitha qarqeve të veriut.

Edi Rama është një armik i egër, një armik i lindur i veriut.
Ai është padrino i mafies së veriut, armik i qytetarëve.

Ndaj dhe qëndroni të pamposhtur se e drejta, ligji, Kushtetuta është me ju, jo me Edi Ramën dhe Lubi Ballukun.
Të dashur miq, sonte qytetarët e Pogradecit po nderojnë me një protestë të heshtur dhe po ndezin qirinj në vendin ku i morën shpirtin, ku vrasësi gjobëvënës i sojit kriminal të Rilindjes, i mori shpirtin Egli Progës.
Unë përshëndes protestën e qytetarëve të Pogradecit.

Drama, tragjedia e Egli Progës dhe familjes së tij është në tërësi një dramë shqiptare e madhe, që luhet sot kudo në çdo qytet, në çdo fshat, në çdo vend.

Sundimi i krimit mbi qytetarin, shteti i krimit mbi shtetin ligjor, kjo është Shqipëria sot.
Pas kaq ditësh nga kjo ngjarje që tronditi thellë ndërgjegjen njerëzore të qytetarëve të Pogradecit dhe Shqipërisë, më në fund foli edhe padrinoja, Edi Rama.

Lexojeni miq se çfarë turpi, çfarë fytyre ka kriminel që në një çarçaf të tërë nuk gjen dot një hapësirë sado të vogël për t’i shprehur ngushëllim familjes Proga.

Që në pamfletin e tij të turpit, apologji e krimit, nuk thotë një fjalë të vetme për dënimin e kriminelit.
Përkundrazi, bën apologjinë e policisë që bëri gjithçka të fshihet krimin me dëshmitarë.
Bën apologjinë e urgjencës që e la të shtrirë në 300 metra distancë mbi 30 minuta.
Kjo është Shqipëria, ky është Edi Rama!

Po pse mediat paskan interes dhe sot bashkë me kryepolicin e tij, Met Rrumbullaku, vunë në shënjestër median.
Sigurisht mediat kanë meritë të jashtëzakonshme sepse ato që në minutat e para u bënë avokate të të vërtetës të tmerrshme të vrasjes për gjobëvënie të Egli Progës nga vrasësi gjobëvënës i Rilindjes së krimit, punonjës i shtetit, i sojit të rilindjes, Denis Meçe.

Po pse do gënjente motra e të ndjerit, në një kohë kur polici me uniformë i thotë se u rrëzua në shkallë dhe publikut i thonë sherr banal.
Sherr banal se nuk pranoi të jepte gjobën? Hero i vërtetë i shqiptarëve, i familjes së tyre.
Mënyra se si silleni, del qartë se kjo është një vrasje shtetërore.

E kapi policia, kur ai u dorëzua vetë kur i doli emri në të katër anët e Pogradecit.

U dorëzua vetë kur doli se i kishte kërkuar xhiron e ditës të ndjerit, heroit të familjes së tij.

Pra, e paskan fajin gazetarët që u thonë shqiptarëve të vërtetat që i fsheh dhe i rrumbullakos Edi Rama me rrumbullakët e tij.
Çdo qytetar shqiptar duhet të dijë se Egli që u vra se nuk dha gjobën është i disati qytetar, biznesmen.

Në vend që kjo të shqetësojë shtetin, e vërsul atë kundër gazetarëve, kundër qytetarëve, vetëm e vetëm se është narkoshtet dhe nuk ka normë dhe moral.
Bën gjithçka për të fshehur krimet e tij, krimet e sojit të tij, sojit të Rilindjes.

Të dashur miq, a nuk ndodhi një vit më parë në Vlorë, gjobëvënësi i anëtares së KLP-së, që i kishte premtuar biznesmenit marrëveshje me mamanë e tij për vendimin, i mori jetën para kamerave.
Ku është sot Korba Sahiti? Korba Sahiti është në KLP.

A ka hetim, a ka standard në këtë botë? I biri i mori jetën tjetrit, kurse Korba e Vrasësit rri në KLP.
A ka turp, a ka drejtësi, a ka moral?
Ky është narkoshteti!

A ndodh në botë që të qëndrojë në krye të piramidës së drejtësisë nëna e një vrasësi?
Jo vetëm kaq, por vrasësi mund të jetë i lirë sot sepse ia zbutën.
Çfarë tregojnë këto? Kjo është fytyra e vërtetë e drejtësisë së re miq.
Kjo është drejtësia e narkoshtetit.

Vrasjen për gjoba i quan grindje për motive të dobëta. I quan vrasje pa dashje.
Qytetarë dhe qytetare, jeta e asnjë njeriu të ndershëm në këtë vend nuk është e sigurt.
Ndaj dhe ju ftoj të vazhdojmë betejën tonë me protesta të fuqishme.

Ditën e enjte para bashkisë së Tiranës, të premten në Thumanë, të tjerat në Pogradec, në Maliq, në Lushnje, në mbarë Shqipërinë.
Shqipëria në protestë është rruga e drejtë, është rruga e fitores, rruga e qeverisë teknike, zgjedhjeve të lira.
Rrofshi ju, rroftë Shqipëria.
Fitore, fitore, fitore!

ORA NEWS

[Albo]

‘Qëndrim çnjerëzor i kryetarit të rilindjes së Pogradecit ndaj viktimës së gjobëvënësit vrasës’



Kryetari i Partisë Demokratike, Sali Berisha vazhdoi denoncimet për ngjarjen e rëndë në Pogradec.

Berisha tha se kryetari i PS në këtë qytet, që është edhe përgjegjës për spitalin, ka vonuar qëllimisht ambulancën.

Ndërkohë, Egli Proga qëndroi për gjysmë orë i plagosur rëndë në rrugë duke pritur ambulancën.

POSTIMI I PLOTË

Qëndrim çnjerëzor i kryetarit të rilindjes së Pogradecit ndaj viktimës të gjobëvënësit vrasës Denis Meçe.

Lexoni denoncimin e qytetarit dixhital për Erion Thëngjillin, Kryetarin e Partisë së krimit në Pogradec.

Egli Proga humbi jetën pak ditë më parë për shkak të dhunës brutale që 29-vjeçari Denis Meçe ushtroi ndaj tij. 42-vjeçari, baba i dy fëmijëve, u la më shumë se 30 minuta i plagosur rëndë në rrugë, në pritje të ambulancës.

Familjarët e të ndjerit akuzojnë policinë dhe ambulancën për vdekjen e tij dhe kjo, jo pa të drejtë.

Si fillim, Policia ishte e para që u mundua ta trajtojë ngjarjen e rëndë si diçka krejt normale dhe i vuri 42-vjeçarit damkën e një pijaneci, që s’i mbajnë këmbët dhe rrëzohet vend e pa vend. Efektivët e policisë nuk raportuan ngjarjen e vërtetë duke i dhënë mundësi vrasësit Denis Meçe të arratisej për disa orë të mira.

Ndërkohë që ambulanca vonoi mbi 30 minuta për të mbërritur në vendngjarjen që është 300 metër larg spitalit.

Qytetarët pogradecarë kanë treguar për JOQ ALBANIA se ambulanca e spitalit të Pogradecit që drejtohet nga Erion Thëngjilli, kryetari Partisë Socialiste në këtë qytet, bëri lojëra fjalësh kur e telefonuan për Eglin, dhe jo vetëm.

Sipas tyre, ambulancat e spitalit u vonuan qëllimisht të shtunën, dhe sikur të mos mjaftonte kjo, efektivët e policisë në vendngjarje nuk lejuan familjarët që ta transportonin 42-vjeçarin në spital me mjetet e tyre.

Por përveç vonesës në mbërritjen e ambulancës, Erion Thëngjilli po sigurohet që familjarët e Eglit të mos kenë në duar certifikatën e vdekjes së tij edhe pse kanë kaluar 3 ditë që nga ngjarja e rëndë.

Këto vendime të Thëngjillit njëri pas tjetrit, shpjegojnë më së miri kapjen e shërbimit shëndetësor nga pushteti dhe paratë.

Duke ditur se daja i Denisit, socialisti Valter Gora është emër i njohur dhe me pushtet në qytetin e Pogradecit, nuk është aspak çudi që Thëngjilli t’i ketë bërë qokën, ashtu siç Elton Halili, drejtori i Komisariatit ia bëri i pari duke fshehur ngjarjen e vërtetë.

Epo pas hetimeve për Komisariatin e Pogradecit, mbetet që radhën ta ketë edhe kryetar Erioni.

Syri

[Albo]

Dalin PAMJET/ Ngjarja e Pogradecit drejt një SKANDALI: "Burri i prokurores, shok i ngushtë me avokatin e vrasësit të Egli Progës"



Një zhvillim i ri tronditës është bërë publik sot nga redaksia e JOQ Albania, e cila ka siguruar një foto ekskluzive që tregon një lidhje të dyshimtë midis burrit të prokurores së çështjes Vasjana Postol dhe njërit prej avokatëve mbrojtës të të akuzuarve në rastin e vrasjes së Egli Progës.

Në foton e siguruar, Ervin Xhihani, bashkëshorti i prokurores Vasjana Postol, shihet duke ngrënë drekë me avokatin Budjon Hoxha që po mbron njërin prej bashkëpunëtorëve të vrasësit Budjon Hoxha, i cili është akuzuar për vrasjen brutale të Egli Progës. Sipas burimeve ekskluzive për JOQ, të dy janë shokë të ngushtë prej shumë vitesh. Kjo foto ka ngritur dyshime të forta për integritetin e procesit gjyqësor dhe pavarësinë e hetimeve.

Koincidencë apo diçka më shumë? Ditën e sotme, prokurorja e çështjes Vasjana Postol zbuti ndjeshëm akuzën ndaj Denis Meçes. Ndërsa policia e kishte referuar ngjarjen si një vrasje me dashje – një akuzë që do të dënohej me 10 deri në 20 vjet burg – Postol e riformuloi veprën penale si “vrasje nga pakujdesia.” Kjo akuzë është shumë më e lehtë dhe dënohet me gjobë ose burgim deri në 5 vjet.

Gjithashtu kërkoi “detyrim paraqitje” për 3 të tjerët me akuzën për moskallëzim krimi; Voltan Shulkun, 40 vjeç, Arian Manellarin 55 vjeç, dhe Leonidha Guçen, 47 vjeç. Voltan Shulku është gjithashtu pronari i lokalit ku ka ndodhur dhunimi i Egli Progës. Pikërisht Budjon Hoxha që shfaqet në foto me burrin e prokurores, është avokati mbrojtës i Voltan Shulkut, pronarit të lokalit ku ndodhi ngjarja e rëndë.

Ky ndryshim i papritur në akuzë ka shkaktuar zemërim dhe dyshime, duke ngritur pyetje serioze rreth ndikimit të mundshëm që lidhjet personale mund të kenë pasur në vendimin e prokurores. Fotografia e zbuluar sot mund të përforcojë këto dyshime dhe të shtojë presionin ndaj sistemit të drejtësisë për të rishikuar rrethanat që kanë çuar në zbutjen e akuzës.






JOQ Albania

[Albo]

DOSJA E PROKURORISË/ Dëshmia e Denis Meçes: E qëllova vetëm me një grusht Egli Progën



Detaje të reja janë zbuluar nga Prokuroria e Korçës, për ngjarjen e rëndë në Pogradec ku mbeti i vdekur Egli Proga. Në njoftimin për mediat zbulohet edhe dëshmia e autorit të dyshuar, Denis Meçe, i cili është i arrestuar. Sipas njoftimit, ai ka deklaruar se nuk ka arritur të godasë viktimën pasi ai është rrëzuar.

“Ai është shprehur nuk ka patur si qëllim vrasjen e shtetasit E.P., ka tentuar ta godasë, por nuk e ka goditur, pasi ai është rrëzuar direkt vetë në tokë. Më pas i çorientuar është larguar. Këto janë provat që janë përcjellë nga policia pranë Prokurorisë Korçë”, thuhet në njoftim.

Më tej, Prokuroria rendit arsyet pse është regjistruar procedimi për veprën penale “Vrasje nga pakujdesia”, duke theksuar se “autori i dyshuar e ka goditur vetëm një herë me grusht viktimën), nuk tregon vullnetin e viktimës për të vrarë një person, përndryshe prej tij do të ishte zgjedhur me shumë mundësi një send tjetër për të realizuar qëllimin e tij kriminal”.

Njoftimi i Prokurorisë:

Reagim i Prokurorisë Korçë në lidhje me ngjarjen e ndodhur më 10.08 në Pogradec ku humbi jetën shtetasi E.P.

Për të sqaruar opinionin publik dhe duke ju përgjigjur interesit të lartë të medias dhe shoqërisë civile në lidhje me ngjarjen e ndodhur më 10.08.2024, ku shtetasi E.P., është gjetur pa shenja jete në qytetin e Pogradecit, Prokuroria e Shkallës së Parë të Juridiksionit të Përgjithshëm Korçë bën me dije se ka regjistruar procedimi penal nr.980 për veprën penale “Vrasje nga pakujdesia”, parashikuar nga neni 85 i Kodit Penal në ngarkim të shtetasit D.M.

Nga materiali i referuar nga Drejtoria Vendore e Policisë Korçë, bëhet me dije se në datë 10.08.2024, rreth orës 19:00, është marrë njoftim se në afërsi të vendit të quajtuar “Axhensia”, tek rreth-rrotullimi, lagjia nr.2 në Pogradec, është gjetur një shtetas i shtrirë pa ndjenja, i cili pas mbërritjes së punonjësve të policisë lokale, është identifikuar shtetasi E.P.

Menjëherë janë marrë deklarimet e shtetasit A.B., kushëriri i viktimës, i cili deklaroi se ka qënë në një largësi rreth 30 metra kur ka parë që një person ka qëlluar me grusht një person tjetër dhe ai u rrëzua në tokë. Ai deklaroi se nuk u afrua po pa që doli pronari i lokalit, shtetasi V. Sh. dhe i ofroi ndihmë të dëmtuarit.

Po kështu, u morën deklarimet e shtetasit A.Sh., i pranishëm në ambjentet e brendshme të lokalit, i ulur në të njëjtën tavolinë me viktimën, i cili deklaroi se, kur ka ardhur viktima në lokal dukej në gjendje në dehur, fillimisht të dy me të dyshuarin po bënin shaka me njëri-tjetrin, dhe më pas viktima filloi të përdorte fjalë ofenduese ndaj të dyshuarit dhe ky i fundit i tha të dilnin pak jashtë të sqaroheshin. Ai deklaroi se pa nga xhami i lokalit që i dyshuari e goditi me grusht viktimën i cili ra fillimisht në anën e një makine dhe më pas në tokë.

U morën deklarimet e shtetasve V.Sh, A. M. dhe L. G. të cilët deklaruan se nuk e panë ngjarjen po shkuan pranë viktimës pasi dëgjuan të bërtitura. Gjithashtu u krye këqyrja e jashtme e viktimës, gjatë së cilës u konstatuan dëmtime në pjesën e fytyrës, në krahun dhe këmbën e majtë, por nuk përcaktohet shkaku i këtyre dëmtime, nëse është si rezultat i goditje me grushta, me sende të tjera, apo nga rrëzimi i trupit të lirë të viktimës në trotuar dhe mundësia e përplasjes ndërkohë me ndonjë send. Në lidhje me këtë çështje priten përgjigje nga Instituti i Mjekësisë Ligjore.

Pasi u bë identifikimi i shtetasit D.M., si autor i dyshuar që dëmtoi shtetasin E. P., u kryen veprime operative dhe teknike të tjera me qëllim gjetjen e vendndodhjes së tij, deri në momentin që ai u paraqit vetë pranë Komisariatit të Policisë Pogradec.

Në deklarimin e tij, shtetasi D. M., shprehet se nuk ka patur si qëllim vrasjen e shtetasit E.P., ka tentuar ta godasë, por nuk e ka goditur, pasi ai është rrëzuar direkt vetë në tokë. Më pas i çorientuar është larguar. Këto janë provat që janë përcjellë nga policia pranë Prokurorisë Korçë.

Në bazë të nenit 244 të K.Pr.Penale, seanca e zhvilluar nga gjykata ka qënë për vleftësimin e arrestimit dhe caktimin e masës së sigurimit personal për shtetasit nën hetim, seancë gjatë së cilës vleftësohet nevoja për caktimin e një mase sigurimi ndaj personit, për të siguruar që nuk do të prishë provat, nuk do të largohet, apo nuk do të kryeje vepra të tjera penale.

Në këto kushte, ndaj shtetasit D. M., që nga provat e deritanishme rezulton autor i ngjarjes, u kërkua dhe caktua masa e sigurimit ‘arrest në burg’. Ndërsa për personat e tjerë të arrestuar për moskallëzim krimi (vepër e dënueshme deri në 3 vjet burgim), në kushtet kur provat kanë qënë të pakta në ngarkim të tyre, u caktua masa e sigurimit detyrim për t’u paraqitur në policinë gjyqësore.

Në rastin konkret, Prokuroria pranë Gjykatës së Shkallës së Parë të Juridiksionit të Përgjithshëm, Korçë, po kryhen ende veprime hetimore për sqarimin e plotë të rrethanave të ngjarjes, veprimeve të ndërmarra ndaj viktimës, nga çdo person që mund të ketë qënë i përfshirë, që mund të jenë edhe persona të tjerë nga ata që janë referuar nga Policia.

Nga Prokuroria do të merren të gjitha provat e nevojshme për të konkluduar me akuzë ndaj shtetasve nën hetim të cilët do të merren si të pandehur, për vepra penale që mund të jenë të ndryshme nga ato për të cilat është regjistruar procedimi penal. Ndryshimi në regjistër i veprës penale mund të kryhet në çdo moment nga Prokurori në bazë të provave që do të merren. Theksojmë që ende nuk është administruar në dosjen hetimore akti i ekspertimit mjekoligjor, provë thelbësore për ngjarjen, si dhe po punohet në lidhje me pamjet filmike. Gjithashtu nga Prokuroria po punon intensivisht për kryerjen e veprimeve të nevojshme hetimore të sqaruar të gjitha rrethanat e ngjarjes dhe personat e pëfshirë dhe rolin e tyre.

Nga Prokuroria fillimisht është regjistruar procedimi për veprën penale “Vrasje nga pakujdesia”, parashikuar nga neni 85 i Kodit Penal, kjo edhe në referim të praktikës gjyqësore në raste të ngjashme, duke vlerësuar që nga materialet e referuara nga policia, goditja me grusht (siç ka rezultuar nga dëshmitë, autori i dyshuar e ka goditur vetëm një herë me grusht viktimën), nuk tregon vullnetin e viktimës për të vrarë një person, përndryshe prej tij do të ishte zgjedhur me shumë mundësi një send tjetër për të realizuar qëllimin e tij kriminal, por vetëm për ta dëmtuar atë, ndërsa vrasja me dashje kërkon qëllimin e viktimës për ta vrarë personin, duke marrë edhe sendet e nevojshme per ta realizuar qëllimin e tij.

Nga aktet e para të administruara në dosje dyshimi krijohej për veprën penale “Vrasje nga pakujdesia”, parashikuar nga neni 85 i Kodit Penal. Sqarojmë se, në momentin që materialet e policisë përcillen në Prokurori, prokurori i vlerëson ato dhe e regjistron procedimin për veprën penale që ka dyshim në atë moment dhe vetëm mbi provat e para që janë marrë.

Nga provat që do të merren në vijim, do të bëhet edhe regjistrimi përfundimtar i veprës penale si dhe do të njoftohet akuza personave të pandehur”, mbyllet njoftimi i Prokurorisë.

ORA NEWS

[Albo]

Zbulohet e shkuara e errët e Denis Meçes, vrasësi i dyshuar i Eglantin Progës me precedentë të tjerë penalë



Denis Meçe i arrestuar si autor i vrasjes së Eglantin Progës në qytetin e Pogradecit, nuk ka qenë i panjohur për blutë e qytetit liqenor.

Burime zyrtare nga policia e bëjnë të ditur se 29-vjeçari Meçe ka pasur precedentë të mëhershme penale, kryesisht në veprat penale që cënojnë rendin dhe sigurinë publike, ndër to dhe plagosje të shtetasve të tjerë apo edhe kundërshtim të forcave të policisë.

Edhe për vetë banorët e Pogradecit, ky shtetas është njohur si person tepër problematik, i cili merrej me veprimtari të dyshimta dhe kishte shpesh herë sjellje agresive në qytet.

Gjatë viteve 2014, 2016 dhe 2020 shtetasi Denis Meçe rezulton i proceduar disa herë nga policia, por sipas të dhënave ai asnjëherë nuk është dënuar nga gjykata, ndërsa 29-vjeçari ka arritur të shpëtojë nga procedimet penale.

Ndërkohë prej 11 gushtit 2024 ndodhet i arrestuar pasi akuzohet se vrau Eglantin Progën (emri i shkurtuar Egli).

Prokuroria e akuzon për ‘vrasje nga pakujdesia’ , që nënkupton një masë dënimi më të ulët sesa vepra penale që kishte referuar dosjen policia ‘vrasje me dashje’

Për t’i shpëtuar ‘arrestit me burg’ Meçe ofroi 10 milionë lekë të vjetra garanci për të ndryshuar masën e sigurisë në ‘arrest shtëpie’ por gjykata e Korçës refuzoi.

Gjithashtu për t’i shpëtuar qelisë Meçe dhe avokati i tij pretendoi se Meçe nuk i është arratisur për disa orë policisë, por duke qenë se ishte në gjendje të dehur, është larguar nga vendi i krimit, ka fjetur në makinë e kur është përmendur ka shkuar në polici.

SYRI