Inagurohet tuneli i ri i Llogarasë

[Albo]

Tuneli i Llogarasë/ A e afron vërtetë jugun me pjesën tjetër të vendit



Tuneli i Llogarasë, një vepër infrastrukturore e një rëndësie të lartë, u inaugurua ditën e sotme me premtimin se do të afrojë jugun për cilindo pushues që do të shijojë bukuritë e tij.

Por a është e vërtetë kjo?

Është e vërtetë që ky tunel e afron rivierën me pjesën tjetër të vendit. Nga Dukati në Palasë nuk do të duhen më 40 minuta, por 5 minuta për të kaluar. Turistët nuk do të lodhen në qafën e gjatë të Llogarasë, ku pavarësisht pamjeve spektakolare, rruga është cfilitëse. Punëtorët e shërbimit do të udhëtojnë lirshëm. Urgjencat mjekësore do të funksionojnë më shpejt. Vlora do të jetë më afër, Tirana gjithashtu.



(Qafa e Llogarasë)
Por si për të mos prishur traditën e të mos bërit asnjë pune pa lënë një shije të hidhur, qeveria nuk zhgënjeu as këtë herë.

Edhe pse i ndërtuar me paratë e taksapaguesve, pa asnjë formë financimi privat, PPP ose koncesion, ky tunel nga viti i ardhëm do të jetë me pagesë. Ndonëse edhe nëse duhet apo nuk duhet të jetë me pagesë ka vend për diskutim, absurditeti më i madh vjen në pikën kur mëson shifrën se sa do të duhet të paguajnë shqiptarët nga vera tjetër.

Zv.kryeministrja dhe ministrja e Energjisë dhe Infrastrukturës Belinda Balluku mbrëmjen e djeshme dha këtë shifër në një intervistë për Top Story.


(Intervista ku Belinda Balluku zbulon tarifën e traut për tunelin e Llogarasë)

“Tuneli i Llogarasë është një vepër me pagesë, pasi do të ketë një mirëmbajtje me kosto të larta. Përllogaritet diku të 5 euro, por bëhet fjalë për vitin e ardhshëm, jo për këtë vit”, tha ministrja Balluku.

Pra 5 euro për të kaluar në një tunel të vetëm gjashtë kilometra. Me një krahasim tepër të thjeshtë mund të kuptojmë se abuzimi me këtë shifër është stratosferik.

Ky që shikoni në foton poshtë është tuneli i Kalimashit në Rrugën e Kombit.


(Tunelet e Kalimashit në Rrugën e Kombit)

Është një tunel autostrade me dy tuba, dhe është vetëm 100 metra më i shkurtër se ai i Llogarasë. Megjithatë, e gjithë rruga e Kombit, mbi 100 kilometra, me dy tunele sa ai i Llogarasë, me dhjetra vepra arti e ura të mëdha, ka një tarifë kalimi prej 5 eurosh.

Ky krahasim i thjeshtë midis dy veprave infrastrukturore nxjerr zbuluar abuzimin e qeverisë për të tarifuar me një shifër absurde tunelin e jugut të Shqipërisë.

Tarifë pas tarife

Nëse një qytetar i Kukësit do të vendosë të udhëtojë për të pushuar në Dhërmi, sa do ti duhet të paguajë?

5 euro për rrugën e Kombit, ndërkohë që ajo ishte ndërtuar me paratë e taksapaguesve shqiptarë dhe jo me koncesion, njëlloj si tuneli i Llogarasë.

Në autostradën aktuale 11 kilometërshe të Milotit do të vendoset tra. Tarifa nuk dihet ende, por minimumi do të jetë 1 euro në raport me kilometrat që përshkohen. Segmentit i sapo inauguruar 21 kilometërsh Thumanë-Kashar kushton 2.1 euro.

Vazhdojmë tek autostrada e re që pritet të fillojë të ndërtohet, Kashar – Lekaj (Rrogozhinë). Tarifa pritet të jetë 3.2 euro. Dhe e fundit, rindërtimi i autostradës Lekaj – Fier me një tarifë prej 2 eurosh.


(Autostradat me pagesë)

Pra nëse mbledhim këto shifra, tarifa finale del 18.3 euro. Një qytetari nga Kukësi që të mbërrijë në Palasë, Drimadhë, Dhërmi e tutje, do ti duhet 18.3 euro për secilin kalim. Gati 37 euro vetëm tarifa rruge për të shkuar dhe për të ardhur nga bregdeti i jugut.

Situata do të jetë e njëjtë edhe për ata udhëtarë nga Shkodra. Në të ardhmen, me ndërtimet e dy autostradave lidhëse Milot – Balldren dhe Balldren – Muriqan, ata do të paguajnë pakashumë të njëjtën shifër finale.

Pra vërtetë shkurtojnë kohë, por tarifat e këtyre autostradave të reja apo të ribëra që listuam sipër më së paku ia vështirësojnë shqiptarit me ekonomi mesatare një udhëtim në jug.

Për t’iu kthyer tunelit të Llogarasë, një tarifë e tillë e shtrenjtë, ku një hyrje-dalje në portën e jugut do të kushtojë 10 euro, vjen në vazhdën e akuzave ndaj qeverisë se me politikat e saj, me shtytjen për investitorët strategjikë, me izolimin e bizneseve të vogla, po ia rezervon vetëm një klase të pasur të shqiptarëve pjesën më të bukur të bregdetit shqiptar. Edhe kjo tarifë vjen si barriera e radhës për shqiptarin mesatar që të pushojë në plazhet jonianë të vendit të tij.

©Lapsi.al

[Albo]

Llogara/Rama: Hapja e tunelit më të gjatë në Shqipëri, një ëndërr e kahershme



Kryeministri Edi Rama ka qenë sot në Llogara të Vlorës ku është inauguruar tuneli më i gjatë në Shqipëri. Rama u prit me iso dhe me daulle, ndërsa disa qytetarë i uruan dhe ditëlindjen kreut të qeverisë, i cili festoi një ditë më parë 60-vjetorin e lindjes. Më pas u ngjit në autobusin me qytetarë për të përshkuar tunelin 6 km.

“Llogara, Vlorë – Hapja e tunelit më të gjatë në Shqipëri, një ëndërr e kahershme dhe premtim bajat i tërë fushatave elektorale të partive, që sot bëhet realiteti i jetës së përditshme të një prej zonave më spektakolare të atdheut tonë, si edhe një motor i ri me shumë kuaj fuqi për industrinë e re të turizmit, të cilës në fund të vitit do t’i shtohet edhe motori i fuqishëm i aeroportit ndërkombëtar të Vlorës”, shkruan Rama në Facebook.





VIDEO



Koha Jone

[Albo]

Berisha: Tuneli i Llogarasë vepra e dytë më e madhe korruptive pas djegësave



Tuneli i Llogarasë vepra e dytë më e madhe korruptive pas djegësave, ka kushtuar 12 mijë euro për çdo turist apo banor që jeton në atë zonë

DEKLARATA E KRYETARIT TË PD-së, SALI BERISHA:

Të dashur, qytetarë dhe qytetare, zonja dhe zotërinj.

Jam sot këtu për të denoncuar tunelin e Llogarasë si veprën publike më korruptive pas djegësave, në 32 vitet e fundit në Shqipëri.

Tuneli i Llogarasë, u ka kushtuar taksapaguesve shqiptarë, dy rroga mujore të çdo shqiptari, 180 mln euro, por e llogaritur për banorë dhe shtretërit turistik, ky del tuneli më i paleverdishëm, më i kushtueshëm i planetit.

Në rast se këtë shumë e llogarisim për 8 mijë shtretër turistik në maksimum, që ka zona nga Palasa në Qeparo, në një kohë që në të gjithë Shqipërinë janë gjithsej 109 mijë shtretër, i bie që për një shtrat turistik të jenë investuar, 22500 euro.

Por në rast se e llogarisim për banorë, pra tu shtojmë këtyre shtretërve edhe numrin e banorëve që banojnë gjithë vitin në këtë zonë, që nuk arrin kurrë në 4 mijë, atëherë i takon që për çdo frymë të jetë investuar në këtë tunel, 12 mijë euro.

Rikujtoj këtu se në tunelin e Kalimashit se në tunelin e Kalimashit kaluan vjet, 4.4 mln udhëtarë.

Por unë krahasimin do ta bëj sot me tunelin e Krrabës. Ky tunel që ka kushtuar gjithsej 14 mln euro për kilometër, ka në anën tjetër të vet, zonën e Shqipërisë së mesme dhe Shqipërisë juglindore, Maqedonin e Veriut, një pjesë të madhe të saj, pra rreth 2 mln banorë.

Në këtë kontekst, rezulton se investimi në tunelin e Krrabës është gjithsej 32 euro për banor, kundrejt 12000 euro për banorë që është tuneli i Llogarasë.

Rrjedhimisht investimi për banor për tunelin e Krrabës është 375 herë më i vogël se sa për tunelin e Llogarasë, i cili tejkalon çdo lloj standardi të pranueshëm në rrafshin ekonomik dhe e bën atë një megaaferë korruptive Rama-Balluku, sa një mal.

Sot natyrisht kjo megaaferë e dyta më e madhja, pa aferës së djegësave, mbyllet, amnistohet nga Zamani dhe Skapi i partisë.

Garantoj shqiptarët se drejtësia, vonon dhe nuk harron, dhe se ky akt do të ndëshkohet me të gjithë forcën e ligjit.

Koha Jone

[Albo]

Tuneli i Llogorasë, Belinda Balluku: 48 orë nga hapja, 22 mijë automjete kanë kaluar përmes tij



Pak orë nga hapja e tunelit të Llogorasë, fluksi i qarkullimin të automjeteve të rrugës Orikum-Dukat ka shënuar shifra tejet të larta.

Zëvendëskryeministrja Belinda Balluku, njëherësh dhe ministre e Infrastrukturës dhe Energjisë ndau në rrjete sociale momente të qarkullimit të automjeteve në tunelin e LLogorasë, ku shihet fluk i shtuar mjetesh që qarkullojnë në kushtet e një rruge të ndërtuar sipas standardeve më të mira.

“Tuneli i Llogorasë, 48 orë nga hapja, 22 mijë automjete kanë kaluar përmes tij”, shkroi Balluku.

Tuneli i Llogorasë në Vlorë, me gjatësi 5.9 km, është vepra më e rëndësishme infrastrukturore në jug të vendit, që shkurton ndjeshëm kohën e udhëtimit drejt bregdetit të jugut.

Ky investim i jep një frymëmarrje të re turizmit dhe ekonomisë së zonës.

Hyrja për në tunel nis nga Dukati duke shmangur kthesat e Llogorasë dhe del në fshatin Palasë. Distanca e udhëtimit në këtë segment llogaritet 7-10 minuta, nga rreth 40 minuta që përshkohej nga Qafa e Llogorasë.

Koha Jone

[Albo]

VIDEO/ Berisha: Inauguruan tunelin e vetëm në botë, që kushton 45 mijë euro për banor. Sot radha ishte 1 orë, sepse njërin tub e vodhën

Kryedemokrati Sali Berisha u ndal edhe te inaugurimit të tunelit të Llogarasë, një tjetër vepër korruptive e qeverisë së Edi Ramës, që i ka kushtuar shqiptarëve më shumë se 170 milionë euro.

‘Inauguruan tunelin e vetëm në botë, që kushton 45 mijë euro për banor. Sot radha ishte 1 orë, sepse njërin tub e vodhën dhe hapën vetëm një tub’, denoncoi Berisha gjatë fjalës së tij te ‘Rruga e Shpresës’

Berisha: Miq!

Dje inauguruan me dajre dhe daulle tunelin e vetëm në botë, që kushton 45 mijë euro për banor.

45 mijë euro për banor sepse Edi Rama duhet të mbushte valixhet me euro.

Sepse Edi Rama duhet të afronte pronat e tij.

Sepse për Edi Ramën qytetarët nuk ekzistojnë.

Gjysmën e Shqipërisë, nga Miloti në Vermosh e lë gjithsej me 60 mln euro investime në 10 vite. Kurse në tunelin e Llogarasë duke investuar 45 mijë euro për banor, nga Palasa në Himarë, sepse banorët e Qeparoit, Borshit dhe fshatrave të tjera, kanë rrugën e lumit të Vlorës, tre herë më të përshtatshme se sa rrugën e bregut.

Dje inauguruan, kurse sot radha tek tuneli tejkaloi dhe 1 orë. Nuk ka rëndësi se sa funksional është, sepse njërin tub e vodhën dhe e futën në xhep dhe hapën vetëm një tub.

Nuk ka rëndësi se kushtoi 2.5 herë më shtrenjtë se Elbasani.

Rëndësi ka që u mbushën baulet e Edi Ramës.

Rëndësi ka që u afrua ai me pronat e veta, dhe bëri ndaj shqiptarëve atë që as Spiro Koleka nuk ua bëri dot kurrë. Ti gjobisë ata në një mënyrë të tillë, siç i gjobiti Edi Rama.

11 korriku është dita e drejtësisë, dita e të vërtetës, është dita e betejës.

Shqiptarët në 11 korrik të gjithë në Tiranë, nga mbarë Shqipëria dhe kudo që ndodhen.

O sot o kurrë.

Fitore, fitore, fitore!


Syri

[Albo]

Rrugët me pagesë, Duleviç: Qytetarët tarifohen dy herë, njëherë për çdo litër naftë dhe pastaj për çdo kalim që bëjnë



Inxhinieri Azmer Duleviç në rubrikën “Çështja e Ditës” të gazetarit Klevin Muka në News24 tha se kostoja për tunelin e Llogarasë nuk duhej të shkonte më shumë se 103 mln euro, kurse këtu ka shkuar 170 mln euro.

Ai tha se kur hyn në tunel janë krijuar dy xhepa që mund të bëhen burim aksidentesh, për shkak se krijojnë iluzionin se tuneli është më iu gjerë në një kohë që është më i ngushtë.

“Qytetarët do të paguajnë një tarifë 5 euro, që do të rëndojë xhepat e banorëve të atyre zonave. Një qytetar që shkon nga jugu deri në Kosovë do të paguajë disa herë në rrugët që do të kalojë, çka janë kosto të shtuara. Mund të ishin aplikuar abone për rrugët me pagesë.

VIDEO

Ne paguajmë për çdo litër naftë 28-30 lekë dhe tani do të paguajmë edhe për mirëmbajtjen e rrugës. Janë marrë dy herë lekë nga xhepat e qytetarëve. Duhet të ketë një reagim, sepse njëherë paguhet te nafta, edhe pastaj paguhet për kalim në këto rrugët me pagesë”, tha Duleviç.

Ai tha se kompanitë që kanë në menaxhim këto rrugë duhet t’i krijojnë mundësi qytetarëve që të bëjnë pagesat online, duke shmangur në këtë mënyrë flukset e pritjes në kabinat e pagesës. “Nëse kjo nuk zgjidhet atëherë pyetja që shtrohet është se çfarë fituan qytetarët në aspektin e kohës, nëse vijojnë të presin në rradhë për të bërë pagesën?”, tha Duleviç.


Balkanweb

[Albo]

SYRI TV/ Tuneli 'mbyll' bizneset në parkun e Llogarasë, pronarët e restoranteve: Tuneli na falimentoi

VIDEO

Ndërtimi i tunelit të Llogarasë ka cuar në kolaps bizneset të cilat ndodhen në aksin e vjetër të rrugës që kalon nga parku kombëtar.

Pronarët e dhjetra bizneseve që operojnë në këtë zonë ankohen se vënja në punë e tunelit ka shkaktuar një bllokim total të aktivitetit të tyre. Ata thonë se po shkojnë drejt falimentimit pasi klientët e tyre tashmë janë zhdukur tërësisht.

Dhjetra biznese të cilat ndodhen në parkun kombëtar të Llogarasë thonë se po shkojnë drejt falimentimit pas hapjes së tunelit. Pronaret e njësive tregtare deklarojnë se pas hapjes së tunelit, klientela e tyre është zhdukur thuajse tërësisht.

Në aksin e vjetër që të con drejt zonës turistike të jugut dhe që kalonte në parkun e llogarasë përvec dhjetra restoranteve ka edhe banorët të fshatrave përreth të cilët si burim të ardhurash për familjet e tyre kanë produktet që kultivojnë në tokat e tyre dhe i tregtonin në anë të rrugës.

Banorët dhe pronarët e bizneseve apelojnë që shteti të investojë në rrugën e vjetër në mënyrë që turistët të kenë si alternativë edhe kalimin përmes këtij aksi, duke iu rikthyer mundësinë e tregëtisë dhe rikthimin e të ardhurave për familjet e tyre.

Syri

[SERAFIM DILO]

Kur lexon shokun Berisha e vetmja pyetje qe te vjen ne mendje eshte : Tuneli po te ishte bere ne kohen e shokut Sali do kishte kushtuar me pak apo do kishte kushtuar me shume ?

Eshte kjo shkalle krahasimi me te shkuaren fati i vertete i Rames.

[Albo]

Tunelit duhet t'ia ndryshojnë emrin nga Tuneli i Llogarasë në Tuneli i Llogarisë!

- 170 milion euro investim për një tunel që shkurton 30 minuta rrugë?
- 170 milion euro investim për një tunel që do të kushtojë 5 euro shoferëve në çdo drejtim të kalojnë?
- 170 milion euro investim në një nga zonat më pak të populluara të vendit sipas censit të fundit?

E kupton me lajme të tilla se cilat janë prioritetet e Qeverisë së Qametit! Prioriteti asnjëherë nuk është qytetari shqiptar, por klientët e krimit e drogës që duan të pastrojnë paranë e drogës duke ngritur resorte turistike në rivierën shqiptare. Këta klientë të Ramës që kanë bërë pagesën me përqindje në xhepin e tij, gëzojnë pa masë sot pasi turistët e pasur nga Tirana dhe ata turistët e huaj, do ta kenë më të lehtë për të shkuar në resortet e tyre. Investimin në infrastrukturë e bën Rama, faturën ua jep taksapaguesve shqiptarë, dhe baronët e drogës bëjnë biznes me turizmin. Belerin e futëm në burg dhe e ndaluam të bëhet kryetar bashkie, pasi donte të na nxirrte në shesh vjedhjet e pronave të himariotëve nga Rama e shokët e tij socialistë. Tunelin e ndërtuam. Resortet i kemi dhënë lejet jo vetëm anësdetit por edhe në mes të parkut të Butrintit e në Sazan. Tani presim vetëm që të mbushim xhepat me fitimet e biznesit të resorteve turistike.

Kurse ju pensionistët që jetoni në atë vend, që jeni sot shumica e qytetarëve në Shqipëri, ju vrini mendjen, çfarë të blini me ato paratë e pensionit që nuk u dalin: bukë apo ilaçe? Kushedi sa janë gëzuar pensionistët e buxhetorët e vendit kur e kanë parë tunelin në televizor. Qeveria ka para per tunelet por nuk ka para per ne? Pa le ata banorët e zonës, bizneset e vogla të të cilëve do të falimentojnë, kushedi sa do gëzohen nga tuneli i ri. Me se do të rrojmë ne tani që rrugën e vjetër nuk e frekuenton më njeri?

Albo

[Albo]

Goli 30 milionë euro i Erdogan në Tunelin e Llogarasë

Nga Klodian Tomorri



Kjo është tarifa më e madhe e suksesit që është regjistruar ndonjëherë në një punë publike në Shqipëri. Një gol 30 milionë euro, që u gatua në hotelet e Ankarasë. Atëherë kur qeveria udhëtonte shpesh në viset e Anadollit duke i thënë popullit se ishte me mision patrotik për të gjetur vaksinat.

Ekipi kombëtar i Turqisë humbi shansin e kualifikimit historik në gjysmëfinalen e Europianit të futbollit teksa u mund me rezultatin e ngushtë 2 me 1 nga Holanda. Por golin që nuk arritën ta bënin dot të zgjedhurit e Montelës, e realizuan dy kompani turke në Shqipëri.

Madje në minutat shtesë. Dhe ky ishte një gol me vlerë 30 milionë euro.

Në mars të vitit 2021, qeveria shqiptare tenderoi për herë të parë ndërtimin e tunelit të Llogarasë me fond limit 19 miliardë lekë ose 190 milionë euro me kursin e sotëm. Në tender u paraqitën 6 oferta ku më e ulëta ishte ajo e kompanisë shqiptare Gjoka Konstruksion me 14 miliardë lekë ose 140 milionë euro. Por ministria e Infrastrukturës e anulloi tenderin me arsyen zyrtare se asnjëra nga ofertat nuk ishte e përshtatshme.

Tuneli i ritenderua në korrik të vitit 2021. Qeveria shpalli fitues të garës bashkimin e dy kompanive turke, por këtë herë me vlerën 17 miliardë lekë ose 170 milionë euro. Pra 30 milionë euro më shumë se oferta në tenderin e parë që u anullua. Ajo që ndodhi më pas është manual i pastër brokerimi në punët publike.

Kapitali analizoi bilancet e shoqërisë ndërtuese të tunelit të Llogarasë nga fillimi i punimeve në vitin 2021 dhe deri në fund të vitit të kaluar. Numrat e bilancit janë reflektim i pastër i asaj që ndodhi me dy tenderat.

Në vitin 2021 shoqëria Intekar-ASL faturoi 5.85 milionë euro të ardhura nga buxheti i shtetit për ndërtimin e tunelit. Në po të njëjtin vit shpenzimet totale të saj ishin 4.7 milionë euro, ndërsa diferenca prej 1.1 milionë euro ishte fitimi.

Por nga 4.7 milionë euro shpenzime, 99.9 për qind ishin të klasifikuara në zërin e shpenzimeve të tjera. Këto janë nënkontraktimet. Pra praktikisht kompania vetëm ka marrë para nga shteti dhe ka nënkontraktuar punën.

E njëjta situatë rezulton edhe në vitin e dytë të ndërtimit. Për vitin 2022, shoqëria Intekar-ASL faturoi 53 milionë euro të ardhura nga buxheti i shtetit. Shpenzimet totale të saj ishin 43.5 milionë euro. Diferenca prej 9.4 milionë euro ishte fitimi i realizuar nga kompania. Edhe në këtë vit nga 43.5 milionë euro shpenzime totale, 43 milionë euro ishin sërish në zërin e shpenzimeve të tjera. Pra 99 për qind nënkontraktim.

Për vitin e tretë të operimit, kompania faturoi 73 milionë euro nga shteti. Shpenzimet totale të saj rezultuan 60 milionë euro dhe diferenca prej 13 milionë eurosh ishte fitimi. Sërish edhe në këtë bilanc kompania klasifikoi në zërin e shpenzimeve të tjera, 58.5 milionë euro ose 97.5 për qind e totalit të shpenzimeve.

Numrat e tregojnë të gjithë historinë. Në tre vitet 2021-2023, kompania ndërtuese e tunelit ka shpenzuar gjithsej për rrogat e punëtorëve të saj që po ndërtojnë veprën vetëm 2.1 milionë euro ose 1.6 për qind e totalit të të ardhurave të faturuara nga shteti. Për të kuptuar se çfarë do të thotë kjo mjafton vetëm një krahasim me një tjetër kompani turke, në një tjetër vepër të madhe publike në Shqipëri.

Në vitin 2009, konsorciumi turko-amerikan Bechtel-Enka, që ndërtoi rrugën e Kombit, shpenzoi 53 milionë euro si rroga për punonjësit e saj ose 16.5 për qind të të ardhurave dhe nënkontraktoi vetëm 39 milionë euro punime tek të tretët ose rreth 12 për qind të të ardhurave. Këto diferenca kanë vetëm një arsye. Bechtel-Enka ndërtonte vet kurse Intekar-ASL thjesht nënkontrakton. Për ironi tek kompania, që dha ofertën më të ulët në tenderin e parë të anulluar, të cilën e detyruan të tërhiqej.

Dhe tani llogaria e tarifës së suksesit. Në tre vitet e operimit të tij, konsorciumi turk ka regjistruar 24 milionë euro fitime. Bilanci i 2024-ës duhet ende të mbyllet. Por ruajtja e raporteve tregon se fitimi total i Intekar-Asl në tunelin e Llogarasë do të shkojë rrumbullak 30 milionë euro. Pikërisht sa diferenca mes vlerës me të cilën këto dy kompani fituan kontratën dhe ofertës më të ulët në tenderin e parë të anulluar.

Pra, me pak fjalë, ajo që ka ndodhur është kjo. Tuneli i Llogarasë u ndërtua nga kompania që dha ofertën 140 milionë euro në tenderin e parë të anulluar. Vetëm me një ndryshim. Qytetarët shqiptarë paguan 170 milionë euro, pasi 30 milionë shkuan si divident në Ankara.

Kjo është tarifa më e madhe e suksesit që është regjistruar ndonjëherë në një punë publike në Shqipëri. Një gol 30 milionë euro, që u gatua në hotelet e Ankarasë. Atëherë kur qeveria udhëtonte shpesh në viset e Anadollit duke i thënë popullit se ishte me mision patrotik për të gjetur vaksinat.

Pamfleti