Zhduket Ervis Martinaj, koka e lojrave të fatit në Shqipëri

[Albo]

Gjykimi i Jeton Lamit/ Si u varros dosja e Ervis Martinajt

Me vendimin që mori gjykata e Lezhës për të dënuar me 2 vite e 10 muaj burg Jeton Lamin, efektivin e Operacionales që shoqëronte Ervis Martinajn, janë zeruar shanset që policia dhe prokuroria të zbulojë çfarë ndodhi me zhdukjen e tij. Dënimi, pa rrëfimin e rolit të Jeton Lamit, praktikisht ka varrosur dosjen e zhdukjes së Martinajt, një histori që ngerthen majat e krimit, politikës dhe biznesit qindra miliona euro të kumarit.

Efektivi i Operacionales Jeton Lami ishte njeriu kyç që mund të zbërthente të vërtetën për Ervis Martinajn, që nga lëvizjet e tij, kontaktet në politikë, pagesat për shefat e korruptuar të policisë apo destinacionin e fundit për ku u nis për të mos u kthyer asnjëherë.

Por gjyqi për Jeton Lamin u mbyll me shpejtësi. është lënë të kalohet fakti se 28-vjeçari nuk tregoi asgjë nga ato që di për zhdukjen e bosit të kumarit.

Në fakt, pasi u arrestua në 24 Gusht të vititi të kaluar, Jeton Lami pranoi të rrëfehet vetëm tek një njeri; Drejtorin e atëhershëm të Policisë, Gledis Nano. Për disa orë, ata qëndruan bashkë në qeli dhe Nano dëgjoi me veshët e tij gjithçka që dinte Jeton Lami. Mësoi jo vetëm për hasmëritë e Martinajt, por edhe për destinacionin e tij të fundit dhe çka është më e rëndësishme, u njoh me emrat e shefave të policisë që ishin në listë-pagesën e biznesit të kumarit.

Ky rrëfim duket se i kushtoi karrierën. Fill pas bisedës me Jeton Lamin, Drejtori i Përgjithshëm i Policisë së Shtetit, Gledis Nano u takua me Ministrin e Brendshëm, Bledi Çuçi tek i cili raportoi gjithçka kishte mësuar, që nga lëvizjet e Martinajt tek emrat e policëve të korruptuar.

Bledi Çuçi i premtoi një përgjigje ditën e hënën. Dhe ashtu ndodhi.

Në takimin e radhës, të hënën e datës 29 Gusht Lapsi.al raportoi një takim të tensionuar në zyrën e Çuçit. Aty, Gledis Nano mori ftesën për të dhënë dorëheqjen nga posti i Drejtorit të Përgjithshëm të Policisë.

“Arsyeja” që i dha Çuçi ishin rezultatet e dobëta për rendin dhe sigurinë gjatë sezonit turistik.

I tensionuar nga përgjigjia e Çuçit, Drejtori i Përgjithshëm i Policisë takoi kryeministrin Edi Rama. Shpresa e tij naive ishte se Rama do t’i jepte një përgjigje tjetër nga ministri.

Lapsi.al mësoi se Rama u tregua i mirëkuptueshëm me Gledis Nanon, por në fund i tha të vepronte siç e kishte këshilluar ministri. Në fund të fundit, urdhri për shkarkimin kishte ardhur direkt nga Rama.

I vendosur për të kërkuar të dretën e tij, Gledis Nano pati një takim në ambasadën amerikane. Lapsi.al mësoi se Gledis Nano tregoi në ambasadë edhe një herë dëshminë e Jeton Lamit, për përfshirjen e shefave të policisë në listë-pagesat e Ervis Martinajt, për këshillën për t’u dorëhequr dhe për faktin se i kishte pranuar Ramës dorëheqjen, e cila pritej të zyrtarizohej në datën 31 Gusht në mbledhjen e qeverisë, të mërkurën.

Një burim i Lapsi.al tha se përpjekjet e ambasadores amerikane për ta mbajtur në detyrë Gledis Nanon ranë në vesh të shurdhër.

Vetë Rama më vonë gjatë një interviste në Opinion tha se në këtë takim, Gledis Nano ia konfirmoi dorëheqjen, por më pas ndryshoi mendje.

“Ai ma kishte konfirmuar mua dorëheqjen. Iu kërkua dorëheqja sepse situata e kohës së fundit ishte problematike. Kjo kërkonte një ndryshim të lidershipit të saj në krye të policisë së shtetit” – është shprehur Rama gjatë intervistës në Opinion.

Me largimin e Gledis Nanos nga drejtimi i policisë, mori fund edhe ajo pak përpjekje për zbardhjen e të vërtetës mbi Ervis Martinajn. Drejtori i ri, Muhamet Rrumbullaku kur u pyet nga gazetarët mbi këtë çështje në dhjetor të vitit të kaluar tha se “policia e Shtetit është në rrugë të mbarë për hetimin e rastit”. Por me kalimin e kohës kuptohet se çështja u varros për të mos u diskutuar më asnjëherë.

Në vend se të gjurmonin bandat kriminale që zhdukën Ervis Martinajn, policia i është vënë pas familjes së tij.

Disa aksione të forcave speciale janë zhvilluar për të kontrolluar shtëpitë e Martinajve në Fushë-Kuqe ku janë gjetur armë dhe municione. Një nga operacionet u zhvillua natën e Krishtlindjeve dhe dy javë më pas u bastisën vilat që Vis Martinaj kishte marrë me qira në Surrel, përballë shtëpisë së kryeministrit Edi Rama.

Familjarët e Martinajt akuzojnë pikërisht Edi Ramën si ideator dhe ekzekutor të zhdukjes së nipit të tyre.

Xhaxhai i Ervisit, Faik Martinaj tha se Edi Rama ishte sponsor politik i rrëmbimit dhe zhdukjes së nipit të tij, duke u shprehur 100% i bindur për akuzat.

Sipas tij zhdukja e Ervis Martinajt nuk ishte thjesht përplasje mes bandash, por një ekzekutim i organizuar nga nivelet e larta të politikës dhe të biznesit, në shërbim të të cilëve u vunë 6 banda.

Gjatë një interviste në Report Tv, Faik Martinaj e quajti Edi Ramën “organizator”, “ideator” dhe “iniciator” të vrasjes së Ervis Martinajt.

“Ato ishin 6 banda të lidhura me qeverinë me mbështetje politike kundërshtare. Kaq është e vërteta” u shpreh xhaxhai i Ervis Martinajt. “Hasmi të vret, nuk e zhduk kufomën” tha ai, duke bërë dallimin për vrasjet mes bandave.

Një tjetër moment ku familja Martinaj i bazon akuzat ndaj kryeministrit është një thirrje që Edi Rama e ka bërë në miting gjatë fushatës për zgjedhjet e 25 Prillit 2021, kur ai thotë se “ia dimë targat një drejtori të basteve”.

“Edi Rama na e ka dhënë mesazhin që në fushatën e vitit të kaluar, që i ka thënë se “i them atij drejtorit të basteve” dmth që atëherë na ka kërcënuar, se “ia dimë targën e makinës” e kështu dmth. Unë e di zhdukjen e nipit tim, është kryeministri, organizatori është kryeministri Edi Rama me bandat e tij edhe me gjithë oligarkët që i kanë interesat nga bregdeti i jugut” u shpreh Faik Martinaj.

Që nga zhdukja e Ervis Martinajt, në gusht të vitit 2022 ka pasur shumë deklarata nga policia se së shpejti do të dilet me një version zyrtar, por ende nuk ka asnjë rezultat. Në vend të kësaj, i është hapur rrugë vendimit të qeverisë për biznesin e basteve, që ishte edhe fusha ku sundonte Martinaj.


Lapsi.al

[Albo]

Urdhër-arresti i ri për Ervis Martinajn, edhe pse dyshohet se e kanë vrarë

Lëshohet urdhër-arresti i ri për Ervis Martinajn, edhe pse ai është i zhdukur që prej gushtit të vitit të kaluar.

Akoma nuk dihet asgjë për fatin e tij, Martinaj dyshohet për vepra penale të urdhërimit të vrasjeve, ndërsa ende nuk jepen detaje se për çfarë është nxjerrë konkretisht urdhër-arresti i ri.

Ervis Martinaj ishte i shpallur në kërkim ndërkombëtar në kuadër të operacionit “Plumbi i Artë”. Ai ishte mbreti i lojërave të fatit. Ndërsa tani kur flitet se e kanë vrarë është lëshuar urdher arresti.

Koha Jone

[Albo]

Taulant Ballës i shpëton goja fatin e për Ervis Martinajt: Dimë vendin ku…



Ministri i Brendshëm Taulant Balla është pyetur në emisionin “Opinion” për fatin e të shumëkërkuarit Ervis Martinaj i cili u shpall i zhdukur nga familja më shumë se një vit më parë. Balla tha se së fundmi policia ka gjetur prova të reja dhe se ka tashmë një pistë për fatin e “bosit të lojërave të fatit”. Balla tha se nuk mund të japë më shumë detaje për ngjarjen dhe vendin ku sipas tij mund të jetë kryer një vepër penale duke lënë të kuptohet për vrasje.

“Policia e shtetit e ka këtë një detyrë prioritare këtë çështje dhe mund t’ju them se ka shumë informacion të ri, por do t’ju kërkoja që deri në konkludimin, qoftë për vendin ku është kryer… nëse është kryer një vepër penale, unë të mos jap detaje. Policia ka një pistë të rëndësishme dhe të besueshme, por unë e kam të pamundur t’ju jap më shumë. Mendoj se policia është në rrugën e duhur për të zbardhur këtë ngjarje” – tha Balla.

Ministri i Brendshëm tha se qytetet me më shumë problematike mbi krimin janë Shkodra, Durrësi, Elbasani dhe Vlora. Ai tha se policia ka nisur një aksion kundër shpërndarësve të drogës dhe personave të shpallur në kërkim. Sipas tij në 15 ditë janë arrestuar 3315 persona. Balla u pyet edhe për akuzat e opozitës se ai vetë ka pasur një telefon të enkriptuar, Sky ECC. Ministri i Brendshëm e mohoi këtë.

“Kam kërkuar që çdo punonjës policie të bëjë një deklaratë nëse ka qenë përdorues i këtyre telefonave. Nëse unë këtë gjë po ia kërkoj çdo punonjësi policie. Nëse do ta kisha nuk do isha këtu me ju. E kam marrë vesh këtë gjë vetëm kur ai u zbërthye nga 2021 dhe kur në Europë pati qindra arrestime. Tani di shumë gjëra, për shkak se jam ministër, por atëherë nuk kisha idenë” – tha Taulant Balla.

©LAPSI.al

[Albo]

Balla: Polumbarët e RENEA kërkuan 2 muaj në det trupin e Ervis Martinajt



Polumbarët e RENEA, kanë kërkuar për gati 2 muaj në det për trupin e Ervis Martinajt në një zonë detare në jug të vendit. Deklaratën e ka bërë ministri i Brendshëm Taulant Balla në emisionin “Top Story” në TCH. Ai shtoi se nga kërkimet nuk ka pasur rezultat duke shtuar se “ndoshta kërkimet vazhdojnë diku tjetër”.

“Kërkimet aty kanë vazhduar 2 muaj, jo 6 ditë, por ndoshta kërkimet vazhdojnë diku tjetër. Policia shtetit ka një pistë (për Ervis Martinaj). Ka disa deklarime të disa personave që kanë njohuri dhe informacion që duhet të ndërlidhen” – tha Balla.

Ervis Martinaj u shpall i zhdukur nga familjarët në gusht të vitit 2022. Që nga ajo kohë ka pasur shumë variante për fatin e tij, që nga vrasja deri tek operacionet plastike që ai mund të ketë bërë.

Lapsi

[Albo]

Kush pagoi 3 milionë euro për të vrarë Ervis Martinaj?



Akoma nuk ka përgjigje zyrtare nga ministria e brendshme për Ervis Martinaj. Por gazetarët investigues janë të bindur se Ervis Martinaj është ekzekutuar.

Gazetari i njohur Ferdinand Dervishi shprehet se janë paguar 3 milionë euro për eleminimin e Ervis Martinajt.

“Në Shqipëri kanë qenë më të ulëta se 10 mijë euro për njerëz të kategorisë së fundit. Për Vis Martinaj janë paguar deri në 3 milionë euro.

Kjo histori është shumë përvëluese. Kemi një ministër që e pyesin gazetarët dhe nuk jep dot përgjigje. Është një histori përtej fuqisë së ministrit.

Janë të përfshira disa grupe kriminale. Dhe bëhet fjalë çështje realisht përtej fuqive të ministrave dhe drejtorëve.

Policia ka qenë prapa me këtë ngjarje”, thotë Dervishi për Report TV.

Dervishi zbuloi një detaj mjaft të rëndë dhe në lidhje me killerin Julian Sinanajn për të cilin ka patur oferta edhe nga politika e lartë në vend.

“P.sh Julian Sinanaj pasi u arrestua, iu kap një arsenal i vogël armësh, që ai i bënte vetë. Por rast i tij ishte shumë i veçantë.

Vrasjet i kryente si njeri që ishte marrë gjithë jetën me atë punë. Në momentin kur u shfaq në Shqipëri dhe u mor vesh se ka ardhur një vrasës i tillë në Shqipëri, kërkesat ndaj tij kanë qenë të shumta.

Edhe persona nga maja e politikës kanë qenë të interesuar për shërbimet e tij. Pastaj nuk është realizuar”- tha Dervishi.

Ministria e Brendshme duhet ta dijë se kush ka paguar 3 milionë euro për të ekzekutuar Ervis Martinaj. Pikëpyetje të mëdha ka se pse nuk e deklarojnë zyrtarisht vrasjen e tij.

Koha Jone

[Albo]

Eksperti: Vis Martinaj është gjallë. Mund të ketë bërë operacione plastike



Ervis Martinaj është një nga personazhet më të diskutuar në vend, për shkak se vijon që të jetë i zhdukur, edhe pse për të ka shumë hipoteza se çfarë mund të ketë ndodhur.

Eksperti i sigurisë, Fatjon Softa thotë se Martinaj mund të jetë gjallë, përderisa nuk është gjendur një kufomë. Eksperti shton më tej se ai edhe mund ti jetë nënshtruar operacioneve plastike.

”Mund të ketë bërë edhe operacione plastike. Ndoshta të gjitha palët mund të jenë të interesuar që mos ta gjejnë. Nuk është se grupi i tij apo strukturat e tij mungojnë. Nëse do të depërtoj policia mund të kemi të dhëna që mund të ndihmojnë hetimin. Për aq kohë sa nuk ka kufomë ai është gjallë”.

Koha Jone

[Albo]

Zbardhet lista e gjatë me pronat e Ervis Martinajt, SPAK kërkon konfiskimin e tyre



Njoftimi nga SPAK

Prokuroria e Posaçme kundër Korrupsionit dhe Krimit të Organizuar ka dorëzuar në Gjykatën e Posaçme të Shkallës së Parë, kërkesën për konfiskimin e pasurive të sekuestruara në kuadër të procedimit pasuror nr.1 të vitit 2023.

Prokuroria e Posaçme regjistroi procedimin e mësipërm, për hetimin pasuror të shtetasit Ervis Martinaj, i dyshuar për veprat penale: “Sigurimi i kushteve dhe i mjeteve materiale për të kryer vrasje”, në dëm të shtetasit Indrit Dokle, kryer në bashkëpunim të posaçëm të grupit të strukturuar kriminal, “Grupi i strukturuar kriminal”, “Kryerja e veprave penale nga grupi i strukturuar kriminal dhe organizata kriminale”, parashikuar nga nenet 80, 28/4, 333/a/1, 334 të Kodit Penal si dhe personave të lidhur me të.

Mbi bazën e dispozitave të ligjit nr.10192 datë 03.12.2009, “Për Parandalimin dhe Goditjen e Krimit të Organizuar, Trafikimit, Korrupsionit dhe Krimeve të tjera nëpërmjet Masave Parandaluese kundër Pasurisë”, ndryshuar me ligjin nr.70/2017, janë identifikuar dhe sekuestruar* pasuritë e luajtshme dhe të paluajtshme të personit nën hetim pasuror dhe personave të lidhur me të.

Në përfundim të hetimit pasuror rezulton se pasuritë e sekuestruara janë të pajustifikuara nga burime të ligjshme dhe për pasojë prezumohet se janë rezultat i veprimtarisë kriminale të personave të hetuar dhe të personave të lidhur me ta.

Pasuritë e sekuestruara për të cilat kërkohet konfiskimi janë:

Shoqëria “KING KASINO” sha, me aksioner 100% Ervis Martinaj- Statusi pezulluar.
50% te aksioneve dhe aseteve te shoqërisë “ALBA TELECOMMUNICATION” shpk, të zotëruara nga shtetasi Ervis Martinaj.
Shoqëria “M…. U…..” shpk, me aksioner me 100% shtetasin M.M.- Statusi Aktiv.
Shoqëria “M………E.M” shpk, aksioner shtetasin M.M. – Statusi aktiv.
Subjekti “Ervis Martinaj”.
Shoqëria “REAL FENIX” shpk, me aksioner 100% shtetësja M. – Status aktiv.
Subjekti “D…………M….”, PF – Status aktiv.
Subjekti “V……K…..” PF. -Status aktiv
Shoqëria “S.P.E E…….” shpk, me aksioner 100% V.K. – Status aktiv.
21% të aksioneve dhe aseteve të shoqëria “S.P.E Gj….” shpk, të zotëruara nga shoqëria “S.P.E E……”, në të cilën shtetasi V.K. është aksioner me 100% të aksioneve.
5 (pesë) automjete të markave të ndryshme.
Pasuria apartament me sip.82 m2, me adresë lagjja “Pavarësia” Vlorë, në pronësi të shtetases D.M..
Pasurie me sip.245 m2, e llojit “Arë”, me adresë Piqeras Sarandë, në pronësi të shtetasve E.M. dhe R.M..
Pasuri e llojit “Njësi”, me sip. 137 m2, Tiranë, në pronësi të shtetases V.M..
Pasuria e llojit ullishte, me sip.9800 m2, me adresë Dobresh, Tiranë, e cila disponohet nga shoqëria “M……. EM shpk”.
Pasuria e llojit arë, me sip. 3815 m2, me adresë Fushë-Kuqe, Kurbin, në emër të M.M.
Pasuria e llojit arë, me sip.7000 m2, me adresë Patok, Kurbin, në emër të M.M. dhe V.M.
Pasuria e llojit arë, me sip.12145 m2, me adresë Fushë-Kuqe, Kurbin, në emër të shtetases V.M.
Pasuria e llojit arë, me sip.1973 m2, me adresë Patok, Kurbin, në emër të M.M. dhe V.M.
Pasuria e llojit arë, me sip.7050 m2, me adresë Patok, Kurbin, në emër të V.M.
Pasuria e llojit arë + truall, me sip.1975 m2, nga e cila 815.34 m2 ndërtesë, me adresë Fushë-Milot, Kurbin.
Pasuria e llojit arë, me sip.1632 m2, me adresë Fushë-Milot, Kurbin.
Pasuri e llojit truall + ndërtesë, me sip.300 m2, nga e cila 119.67 m2 ndërtesë.
Pasuri e llojit arë, me sip. 2543 m2, me adresë Fushë-Kuqe, Kurbin.
Pasuri e llojit arë + ndërtesë, me sip.410 m2, me sipërfaqe ndërtimi 136.74 m2 (baza) dhe sip. ndërtimi gjithsej 540.29 m2, adresë Fushë-Kuqe, Kurbin.
Pasurinë e llojit “Arë” me sip.120 m2 , Tiranë.
Pasurinë e llojit “Truall + Ndërtesë”, me sip.580 m2 dhe ndërtesë sip 123.3 m2, Tiranë.
Pasurinë e llojit “Apartament”, me sip.105 m2, me adresë rruga “Dervish Hima” Tiranë.
Pasuria e llojit “Ullishte”, me sipërfaqe 2000 m2, e ndodhur në fshati Gjilekë-Dhërmi, në vendin e quajtur “Gosqea”, kati i dytë dhe përbën ½, pjesë e një magazine.
Pasuri me e llojit Vilë me vendodhje në Surrel, Tiranë.
Llogari bankare në vlerën e 1.878.299 lekë (një milionë tetëqind e shtatëdhjetë e tetë e dyqind e nëntëdhjetë e nëntë lekë) ne emër të shtetasit A.K.

Koha Jone

[Albo]

SPAK: Grupi i Leonard Dukës planifikoi vrasjet e Ervis Martinajt



SPAK ka përfunduar hetimet paraprake dhe ka dorëzuar kërkesën për dërgimin në gjyq të 14 të pandehurve, pjesëtarë të një grupi të strukturuar kriminal, në kuadër të procedimit penal nr. 59/1, të vitit 2022. Prokuroria e Posaçme ka zbardhur disa ngjarje kriminale mes të cilave dhe kur përfshihet emri i Leonard Dukës.

Në njoftim thuhet se Leonard Duka, me masë sigurie “Arrest në burg”, akuzohet për sigurimin e kushteve dhe mjeteve materiale për të kryer vrasje, në dëm të Ervis Martinaj dhe Erigers Mihasi, kryer në bashkëpunim në kuadër të grupit të strukturuar kriminal. Duka po ashtu akizohet për, krijimi dhe drejtimi i grupit të strukturuar kriminal, kryerja e veprave penale nga grupi i strukturuar kriminal.

Ndërkohë, Drianto Bardhi, me masë sigurie “Arrest në burg”, akuzohet për të njëjtat vepra penale në kuadër të grupit të drejtuar nga Leonard Duka. Sipas hetimeve të kryera nga SPAK, është provuar se gjatë muajve qershor-shtator 2020, Leonard Duka dhe Drianto Bardhi, në bashkëpunim me persona të tjerë, kanë siguruar kushtet dhe mjetet materiale për të realizuar vrasjen e Ervis Martinajt dhe Erigers Mihasit, si pjesë e veprimtarisë së një grupi kriminal.

LAPSI

[Albo]

Emiljano Shullazi, Leonard Duka/ SPAK mbyll hetimet, çon për gjykim 14 të pandehur



Prokuroria e Posaçme ka përfunduar hetimet për 14 të pandehur, që akuzohen si pjesë e një grupi të strukuruar kriminal të përfshirë në atentate mafioze në vend. Pjesë e listës së kërkesës së SPAK për dërgimin e çështjes në gjyq janë: Astrit Avdyli, Emiljano Shullazi, Naim Stafuka, Blerim Abazi, Besian Xhixha, Enver Diva, Robert Laçi, Leonard Duka, Drianto Bardhi, Gjergji Cukali, Viktor Imeraj, Satilno Basho, Xhelal Rraja dhe Miri Bruli. Sipas njoftimit të SPAK të pandehurit janë përfshirë në ngjarje kriminale si ato të zbardhura mëposhtë:

Astrit Avdyli, Emiljano Shullazi dhe Blerim Abazi, gjatë muajve janar-korrik 2020 dhe i pandehuri Naim Stafuku, gjatë muajit gusht 2020 në bashkëpunim me persona të tjerë, me veprimet e tyre të kundraligjshme dhe të drejtëpërdrejta, të kryera me dashje në kuadër të një grupi të strukturuar kriminal kanë siguruar kushtet dhe mjetet materiale për të kryer vrasje, në dëm të shtetasve Durim Bami dhe Valter Bami.

Besian Xhixha, Enver Diva dhe Robert Laçi në bashkëpunim me persona të tjerë, me veprimet e tyre të kundraligjshme dhe të drejtëpërdrejta, të kryera me dashje gjatë muajve gusht-shtator 2020, në kuadër të një grupi të strukturuar kriminal kanë siguruar kushtet dhe mjetet materiale për të kryer vrasje, në dëm të shtetasit Preng Gjini.

Leonard Duka dhe Drianto Bardhi, në bashkëpunim me persona të tjerë, me veprimet e tyre të kundraligjshme dhe të drejtëpërdrejta, të kryera me dashje gjatë muajve qershor-shtator 2020 në kuadër të një grupi të strukturuar kriminal, të drejtuar nga i pandehuri Leonard Duka kanë siguruar kushtet dhe mjetet materiale për të kryer vrasje, në dëm të shtetasve Ervis Martinaj dhe Erigers Mihasi.

Gjergji Cukali, në bashkëpunim me persona të tjerë, me veprimet e tij të kundraligjshme dhe të drejtëpërdrejta, të kryera me dashje gjatë muajve korrik-shtator 2020 në kuadër të një grupi të strukturuar kriminal kanë siguruar kushtet dhe mjetet materiale për të kryer vrasje, në dëm të shtetasve Elvis Gacaj dhe Altin Gega.

Viktor Imeraj (alias Viktor Bajraktari), gjatë muajve qershor-dhjetor 2020, si dhe i pandehuri Satilno Basho, gjatë muajve mars-maj 2021, në bashkëpunim me persona të tjerë, me veprimet e tij të kundraligjshme dhe të drejtëpërdrejta të kryera me dashje në kuadër të një grupi të strukturuar kriminal kanë siguruar kushtet dhe mjetet materiale për të kryer vrasje, në dëm të shtetasve Fatmir Hyseni dhe Armando Hyseni.

Xhelal Rraja, në bashkëpunim me persona të tjerë, me veprimet e tij të kundraligjshme dhe të drejtëpërdrejta, të kryera me dashje gjatë muajit Janar 2021 në kuadër të një grupi të strukturuar kriminal kanë siguruar kushtet dhe mjetet materiale për të kryer vrasje, në dëm të shtetasit Arben Ndoka.

Emiljano Shullazi, në bashkëpunim me persona të tjerë, me veprimet e tij të kundraligjshme dhe të drejtëpërdrejta, të kryera me dashje gjatë katërmujorit të parë të vitit 2019, si dhe veprimtari e konkretizuar më datë 23.04.2019, 2021, në kuadër të një grupi të strukturuar kriminal të drejtuar prej tij ka goditur një pjesëtar të familjes së një gjyqtareje, anëtare e një trupe gjykuese në Gjykatën e Apelit për Krime të Rënda, e cila gjykonte një cështje penale ndër të tjera edhe në ngarkim të këtij të pandehuri. Ky i fundit, për këtë çështje gjyqësore, kishte kërkuar përjashtimin e kësaj gjyqtareje.

Astrit Balliu (alias Astrit Sulejmani, alias Astrit Avdyli), me veprimet e tij të kundraligjshme dhe të drejtëpërdrejta, të kryera me dashje dhe të konstatuara më datë 29.06.2024, ka mbajtur në banesë pa lejen e organeve kompetente shtetërore një armë zjarri pistoletë dhe një sasi të konsiderueshme municionesh luftarakë.

Astrit Balliu (alias Astrit Sulejmani, alias Astrit Avdyli) dhe Miri Bruli, në bashkëpunim edhe me persona të tjerë, me veprimet e tyre të kundraligjshme dhe të drejtëpërdrejta të kryera me dashje dhe të konkretizuar më datë 03.07.2020, kanë ndihmuar një shtetas në kërkim për kalim të paligjshëm të kufijve nga Mali i Zi për në Shqipëri nëpërmjet liqenit të Shkodrës.

Astrit Balliu (alias Astrit Sulejmani, alias Astrit Avdyli), me veprimet e tij të kundraligjshme dhe të drejtëpërdrejta të kryera me dashje dhe të konstatuara më datë 17.05.2024, duke qenë me një masë sigurimi “arrest në shtëpi”, të parashikuar nga nenit 237 i K. Pr. Penale, të caktuar me vendimin nr.33, datë 26.07.2021 të Gjykatës së Posaçme të Shkallës së Parë për Korrupsionin dhe Krimin e Organizuar, është larguar nga banesa ku duhej të qëndronte si i paraburgosur, duke mos u gjetur në banesën e tij nga shërbimet e Komisariatit të Policisë, Shijak dhe Durrës.

Astrit Balliu (alias Astrit Sulejmani, alias Astrit Avdyli) dhe Emiljano Shullazi, me veprimet e tyre të kundraligjshme dhe të drejtëpërdrejta, të kryera me dashje dhe të konstatuara gjatë periudhës Janar-Korrik 2020, kanë mbajtur secili prej tyre në mënyrë të paligjshme në institucionet burgimi sende të ndaluara telefona celularë me të cilët kanë komunikuar me persona të tjerë jashtë institucionit të ekzekutimit të dënimit me burgim, ku mes të tjerash kanë komunikuar edhe me disa persona që kanë qenë bashkëpunëtorë në kryerjen e një sërë veprash penale, për të cilat ata akuzohen.

LAPSI