Zgjedhjet e pjesshme lokale: Shtëpia e Lirisë fiton, opozita e ambasadës amerikane humbet

[Albo]

Zgjedhjet/ PS dominon Vorën, Berisha dominon Bashën me vota



Nga Arbër Kaceli

Bashkinë e parë për të cilën doli rezultati i zgjedhjeve të pjesshme vendore, atë të Vorës, e fitoi kandidati socialist Blerim Shera. Me gjithë rëndësinë që ka zakonisht emri i fituesit në zgjedhje, këto të ditës së sotme ishin ndryshe. Në këto zgjedhje fokusi i publikut është zhvendosur pothuajse në mënyrë të barazvlefshme tek vendi i dytë apo i tretë në garë. Kjo për shkak të krisjes së Partisë Demokratike dhe ëndjes së publikut për të kuptuar njëherë e mirë se kush është shumica e vërtetë në opozitë.

Edhe pse dy kandidatët e opozitës për Bashkinë e Vorës janë humbës përballë kandidatit socialist, i cili ishte shkëputur me gati 5 mijë vota nga vendi i dytë, rezultati i shpallur mbrëmjen e sotme për Vorën tregon një hendek të madh mes opozitës së Sali Berishës dhe asaj të Lulzim Bashës.

Rezultati flet vetë. 2598 vota për Lulzim Vranën e “Shtëpisë së Lirisë”, ndërsa vetëm 687 vota për Ymer Markun e PD-së zyrtare. Diferenca në vota është 3.7 herë më e lartë në favor të kandidatit të Sali Berishës, pothuajse 4 herë më e lartë.

Edhe pse janë pesë bashki të tjera për të cilat pritet të dalë rezultati, kjo e para jep një mesazh të fortë. PD-ja zyrtare në Vorë u vendos në pozicionin e një partie që zë fundin e një koalicioni opozitar. Ndërsa koalicioni “Shtëpia e Lirisë” e Sali Berishës non-grata dhe LSI-së së rrudhur e konsumuar mori formën e partisë prijëse të opozitës.

Ky rezultat me këtë diferencë të thellë vulos, të paktën në një bashki, atë që ithtarët e Sali Berishës e trumpetonin prej kohësh. Karrigia e kryetarit të PD-së nuk i përket Lulzim Bashës dhe se ai është një e keqe që duhet hequr me çdo kusht.

Momentalisht, kjo diferencë stratosferike provon tezën se acarimi që shfaqi Lulzim Basha dhe klani i tij kur Presidenti Meta i shpalli papritur zgjedhjet dy muaj më parë, vinte nga frika e një përballje me Berishën në terren. Ky rezultat provon edhe se relativizimi që i bëri Lulzim Basha këtyre zgjedhjeve me një fushatë në hije, duke mos i vënë gjoksin siç bëri Sali Berisha, ishte një manovër për të nënvlersuar rezultatin që sot, në pamje të parë, ai dukej se i frikësohej.

Megjithatë, pjesëmarrja e ulët ditën e sotme nuk duhet anashkaluar. As fakti që Vora është një bashki e vogël dhe mund të mos japë indiciet më të sakta të pozicionimit të faktorëve politikë krahasuar me zgjedhje në shkallë më të gjerë. Përpos këtyre, është ende herët për ta vulosur plotësisht nëse Sali Berisha përfaqëson mazhorancën opozitare të vendit, pasi janë edhe pesë bashki të tjera për të cilat priten rezultatet.

Rezultatet e ditës së nesërme do ta vërtetojnë këtë. Për momentin, klani Basha është në disfavor. Dhe nëse ky rezultat projektohet edhe në pesë bashkitë e tjera, ato të Durrësit, Dibrës, Shkodrës, Lushnjës e Rrogozhinës, atëherë mes 20% të shqiptarëve (përqindja e shqiptarëve që jetojnë në këto 6 bashki) Basha del jashtë loje si kryeopozitar.

Sa i përket rezultatit për pesë bashkitë e tjera, kreu i KQZ, Ilirjan Celibashi bëri me dije se rezultatet për to do të shpallen ditën e nesërme.

©LAPSI.AL

[Albo]

VIDEO/ Qytetarët e Shkodrës mbushin rrugët, në festë për fitoren e Bardh Spahisë



Qytetarët shkodranë kanë festuar fitoren e Bardh Spahisë si kryetar i bashkisë Shkodër.

Ata kanë mbushur rrugët me makina dhe flamujt e 'Shtëpisë së Lirisë'.

Spahia është pritur me ovacione në rrugët e Shkodrës, ku pas përfundimit të numërimit iu drejtua ambienteve të shtabit elektoral.

Bardh Spahia, kandidat i koalicionit opozitar 'Shtëpia e Lirisë', fitoi bashkinë e Shkodrës me 20 125 vota, ose 43.67%.

Majlinda Angoni e PS, doli e dyta me 18 205 vota, ose 39.51%.

Ndërsa kandidati i Lulzim Bashës, Xhemal Bushati, u rendit i treti me vetëm 7 749 vota, ose 16.82%.

SYRI

[Albo]

Rezultati në zgjedhje, Basha flet për herë të parë: 6 marsi nuk është normalitet, por është anormalitet i një anormaliteti. Asgjë nuk ka ndryshuar nga 25 prilli



TIRANË

Kreu i PD Lulzim Basha ka folur për herë të parë pas zgjedhjeve të 6 marsit në 6 bashki në vend, ku PD deri tani është renditur e treta forcë politike në shumicën prej tyre. Basha tha se procesi i 6 marsit ishte anomali e një anomalie dhe se ka nevojë për një reformë të thellë.

“Së pari, dua që procesi të përfundojë dhe i bëj thirrje të gjithë numëruesve të vazhdojnë deri në fund procesin e numërimit. Procesi i 6 marsit ishte anomali e një anomalie. Anomalia e parë votimet moniste të qershorit, anomalia tjetër kryebashkiakët me të shkuar kriminale. Kur nuk ka asnjë reflektim për anomalitë, besoj se shumica dërrmuese e shqiptarëve e ka kuptuar nevojën për një reformë të thellë”, deklaroi Basha.

Balkanweb