Policia padit ish deputetin Myslim Murrizi: Pastrim parash dhe transferta të dyshimta bankare

[Albo]

DETAJET/ Fshehje e pasurisë dhe pastrim parash, policia çon në prokurori ish-deputetin Myslim Murrizi. Mijëra euro transaksione, shoqëri tregtare e llogari bankare. Aksione dhe në media



Policia e Shtetit ka dërguar për hetim ish-deputetin Myslim Murrizi me akuzën për dy vepra penale. Gazetarja Klodiana Lala raportoi për “BalkanWeb” se Policia e Shtetit i ka dërguar ditën e sotme prokurorisë së Tiranës një kallëzim penal për ish-deputetin Myslim Murrizi, i cili dyshohet për fshehje të pasurisë dhe pastrim parash.

Në referimin që disponon “BalkanWeb” thuhet se në vitin 2006 shtetasi Myslim Murrizi rezulton të jetë dënuar nga Apeli i Durrësit me 3 vite burgim për mitmarrje, që është konvertuar në shërbim prove. Një vit më vonë, në 2007 Gjykata e Lartë e ka pushuar çështjen penale me argumentin se fakti nuk parashikohet si vepër penale.

Sipas kallëzimit, thuhet se Murrizi, ish-deputet i Kuvendit të Shqipërisë ka përfituar në forma joligjore në kohën që ushtronte funksionin e zyrtarit të lartë në KLSH duke investuar para të pista në blerjen e pasurive të paluajtshme. Myslim Murrizi si dhe familjarët e tij, vetë ose nëpërmjet subjekteve tregtare kanë kryer transkasione të shumta dhe të dyshimta në disa nga bankat tregtare që operojnë në vendin tonë.

Si e ka kryer veprën penale murrizi sipas policisë?
Janë pafund shoqëri tregtare, por edhe numra të llogarive bankare. Në qershor 2007-shtator 2008, sipas referimit rezulton se janë depozituar apo transferuar nga një llogari tjetër e Myslim Murrizit brenda bankës, në një nga bankat e nivelit të dytë në total 249 751 euro, të cilat 248 mijë e 710 janë mbajtur cash nga ana e z. Murrizi. Ndërkohë në vitin 2010 ish-deputeti i Kuvendit të Shqipërisë, i zgjedhur fillimisht në siglën e PD-së ka depozituar cash në llogarinë e shoqërisë ‘Murrizi 2009’, 60 mijë euro. Sipas referimit të Policisë së Shtetit bërë në prokurori, rezulton se sipas tyre ka gjasa që kjo shumë nuk është deklaruar në institucionin e lartë të deklarimit dhe kontrollit të pasurive apo konfliktit të interesave. Sipas ligjit, z. Murrizi në momentin që ka marrë mandatin e deputetit duhet ta deklaronte këtë shumë. Ai rezulton të jetë aksioner në disa shoqëri, përfshirë edhe shoqëri mediatike dhe universitare si dhe shoqëri ndërtimi, por duke qenë se nuk është aksioner në masën 100% dhe ka edhe persona të tjerë që nuk kanë aspak lidhje me dyshimet për aktivitet kriminal, News24 do të bëjë të ditura hap pas hapi të gjithë rezultatet që do të dalin nga ky hetim.

A është regjistruar çështja penale?
Sot ka mbërritur materiali në Prokurorinë e Tiranës. Akoma nuk ka një regjistrim të procedimit penal sepse sipas ligjit, Prokuroria do duhet ta studiojë paraprakisht materialin dhe më pas të vendosë për regjistrimin e procedimit penal. Por sa herë Policia e Shtetit ka kërkuar hetimin e cilitdo, jo vetëm zyrtar, prokuroria është e detyruar konform ligjit ta regjistrojë. Në këtë rast z. Murrizi akuzohet për dy vepra penale, fshehje e pasurisë dhe pastrim i produkteve të veprës penale dhe duhet parë nëse kjo çështje do të mbahet nga ana e Prokurorisë së Tiranës. Kjo, pasi dyshohet se z. Murrizi e ka fshehur pasurinë në kohën që ishte deputet, nuk e ka deklaruar të paktën në masën e 60 mijë eurove dhe nga ana tjetër ka kryer dhjetëra transaksione dhe hetimi mund t’i kalojë dhe Prokurorisë së Posaçme.

Balkanweb

[Albo]

“Neveri”, Myslim Murrizi reagon në News24 për akuzat: Pasuria ime e deklaruar, ish-sigurimsat që drejtojnë Policinë e Shtetit s’mund të më intimidojnë

Ish-deputeti Myslim Murrizi ka mohuar akuzat e ngritura nga policia në një lidhje telefonike për News24. Murrizi tha se pasuria e tij është e deklaruar dhe nëse do kishte ndonjë paqartësi apo dyshim për mosdeklarim pasurie do të kishte qenë ILDKPI që do kishte reaguar apo kallëzuar rastin në prokurori. Sa i përket vendimit të Gjykatës së Apelit në vitin 2006, ku e dënonte për mitmarrje, ai deklaroi se ka marrë pafajësinë nga Gjykata e Lartë.

“Desha të di kush është e vërteta e policisë. Unë nuk kam njoftim zyrtar. Myslim Murrizi nuk kryen transaksione, është një nga dy aksionerët e ‘Murrizi 2009’. Nuk jam administrator dhe nuk kam tagër të bëj transaksione. Çdo mosdeklarim i imi nëse ka ndodhur në kohën që kam qenë deputet nuk është tagër i krimit ekonomik, por ILDKPI-së. Nëse do mendonte se Murrizi kishte fshehur lëvizjet bankare do kishte një kallëzim nga ILDKPI.

Ju ftoj të mos e merrni të mirëqenë deklarimin tim, por të pyesni ILDKPI a ka pasur probleme deklarimi im i pasurisë.
Gjatë kohës që unë kam qenë deputet, nuk është subjekt i Tonin Vocit dhe atij halabakut që drejton krimin ekonomik, sekseri Memushi. Deputeti është subjekt i Gjykatës së Lartë kur ka çështje, i SPAK dhe i GJKKO në institucionet e reja të drejtësisë dhe pasuria verifikohet nga ILDKPI, jo nga sigurimsat.
Paratë e kujt kam pastruar? Rama me Bashën i kanë lavatriçet e tyre. Në 31 vite aty kam qenë dhe kam qenë dhe herë tjetër i verifikueshëm. Ajo që shoh, është një dashakeqësi e një grushti fundërrinash. Unë figurokam i dënuar, zagari Tonin Voci…Ju ftoj të shikoni vendimin e Gjykatës së Lartë që është pafajësia e Murrizit. Ka qenë një ngjarje tjetër e stisur nga fëlliqësirat e asaj kohe. Unë kam marrë pafajësinë në Gjykatën e Lartë. Nuk i jam fshehur Gjykatës së Lartë me leje lindje si Basha apo me imunitetin e kryetarit të opozitës si Rama.
Murrizi është aksioner 50% tek firma ‘Murrizi 2009’. Kam qenë aksioner tek Justiniani I. Kam qenë aksioner në një televizion. Të gjithë pasurinë time e kam deklaruar. Murrizi në 30 vite nuk ka konkurruar dhe as ka fituar nga paratë publike. Dy shoqëritë ku kam qenë aksioner kontrolloheshin nga Tatimet.
Me neveri i refuzoj ato akuza. A ka ndonjë biznes legal zoti Vocaj që ka studiuar e bija 4 vjet në Francë, si mund ta çojë?!”, tha Murrizi.

Lidhur me motivet e këtij kallëzimi, nëse ka diçka pas tij, ai tha se nuk është beteja e parë e tij dhe se nuk intimidohet.
“Nuk di se çfarë të them. Po në 30 vite nuk është beteja e parë dhe nuk do hesht. Murrizi ka ikur nga KLSH në 2005 dhe për atë kallëzim që policia i referohet kam marrë pafajësi.
Gjykata e Lartë i ka dhënë pafajësi Murrizit dhe unë nuk kam qenë deputet.
Mirëpres çdo lloj kallëzimi të kujtdo fundërrine që mendon se mund t’i mbyllë gojën Murrizit. Do bëj gati menjëherë një padi për atë që deklarojnë se kam qenë i dënuar. Nuk fshihem, si ata që janë dënuar jashtë shtetit dhe fshihen si qen. I kam deklaruar të gjitha në formularin e dekriminalizimit. Kam qenë i qartë në atë që kërkonte ligji dhe i qetë sepse s’kam asnjë dënim në RSH.
Kësaj policie që i mbushen kontejnerët me drogë, që i vriten qytetarët, që grabiten fonde të BE-së, që nuk guxon të merret me ish-ministra, por paska kohë të merret me 60 mijë euro e përçmoj me neveri.
Ish-sigurimsi Tonin Vocaj, i grupit çiftelia, Mond Rizai, Rebani Memushi dhe ata ish-sigurimsa që drejtojnë Policinë e Shtetit nuk mund të më intimidojnë”, tha Murrizi.

Balkanweb

[Albo]

Transaksion e depozitime cash të dyshimta/ Në dy llogari bankare të ish-deputetit Myslim Murrizi qarkulluan 734 mijë euro



TIRANË
Në kallëzimin e policisë ndaj ish- deputetit Myslim Murrizi, thuhet se ai dhe familjarët e tij, vetë ose përmes subjekteve që zotërojnë kanë kryer transaksione të shumta dhe të dyshimta në disa banka që operojnë në vend.

Në kallëzim thuhet gjithashtu se për periudhën Dhjetor 2008 – Qershor 2021, natyra e transaksioneve të kryera në llogarinë e tij bankare në euro, është në disa lloje veprimesh bankare, si depozitime cash nga vetë shtetasi apo nga të tretë, kalime mes llogarive të shtetasi, kalime në favor të subjektit të administruar prej tij, ‘Murrizi 2009’ shpk dhe tërheqje Cash. Përkatësisht:

-Më 15/01/2014 Mysli Murrizi ka kryer transferta 78 mijë euro në favor të subjektit T***për blerje makine.
-Në 6.10.2014, llogaria e tij është kredituar në vlerën 515 000 euro me përshkrimin, ‘Justiniani I’,kalim fondi për Myslim Murrizin, shpërndarje e plotë dividenti. Në të njëjtën datë, shtetasi Myslim Murrizi nga sasia e kredituar, në emër të tij ka tërhequr shumë prej 425 000 euro.
-Në 31.08.2016, llogaria e tij është kredituar në vlerën 11 000 euro, për Myslim Murrizin ja kalon si këst i fundit për blerje apartamenti.

2-Në në tjetër llogari bankare po në monedhën euro, për periudhën ( prill – Maj 2021), evidentohen të jenë kryer transaksionet e mëposhtme:
– Më 29.04.2021 Murrizi ka depozituar në cash shumën 10 mijë euro, dhe me pas ka transferuar në favor të shoqërisë A** S* A** me përshrkimin kalim pjesor, sipas kontratës shitje pasuri e luajtshme për blerje automjeti
– Më 04.05.2021 Myslim Murrizi ka përfituar një transfertë prej 30 mijë euro nga subjekti Murrizi 2009 shpk.
– Më datë 11 maj 2021 Murriz ka transferuar 30000 euro në favor të shoqërisë “A*S*A”, me përshkrim “Kalim përfundimtar sipas kontratës për blerje automjeti.
Shoqëria “Murrizi 2009” shpk është bërë klient i nje banke të nivelit te dytw që prej muajit nëntor 2016 dhe disponon dy llogari rrjedhëse në monedhat “lek” dhe “Euro”, ku përgjithësisht vihen re që transaksionet e kryera janë me natyrë biznesi dhe konsistojnë në:

depozitime cash nga shtetasit Besnik, Agron dhe Roland Murrizi; këmbime valutore; kalime nga/për të tretë me qëllim likuidim detyrimesh; shitblerja pasurish të paluajtshme; tërheqje në cash si dhe pagesa operacionale (si tarifa pastrimi, taksa etj). Nga tërësia e transaksioneve veçojmë se:

Në datë 12.12.2017, Murrizi ka kaluar në llogari të shoqërisë “Murrizi 2009” shpk shumën 20000 euro si ‘kalim ortaku’.
Në datë 21 tetor 2019, subjekti “Murrizi 2009” shpk ka kaluar 60000 euro në favor të shtetasit Myslim Murrizi, me përshkrimin “Murrizi 2009” shpk për Myslim Murrizi kthim kontribute të mëparshme’.

Në datë 4 maj 2021, llogaria në Euro është kredituar në vlerën 35000 euro nga shoqëria “V*R*” shpk me përshkrim “V*R*’ shpk për ‘Murrizi 2009’ shpk lik fat nr.71 dt.28.02.2021 shitje sipas situacionit”. Në të njëjtën datë, janë transferuar 30000 euro në favor të shtetasit Mylsim Murrizi, me përshkrimin ‘Murrizi 2009 shpk për Myslim Murrizi kthim kontribute të mëparshme’.

Balkanweb