Institucionet e Kosoves midis besimit dhe pergjegjesise

[Brari]

29.04.2003 - Trepca.net

Shkruan Besim Krasniqi.



INSTITUCIONET E KOSOVËS MIDIS BESIMIT DHE PËRGJEGJËSISË

Moshapja e zyrave të Kosovës në diasporë "inkurajon" shqiptarët drejt ambasadave serbe




Të gjithë ne jemi të vetëdijshëm për problemet e mëdha që i kanë kapluar institucionet tona për t'i quar proceset e pavarësimit deri në fund, të gjithë jemi poashtu të vetëdijshëm mbi mungesën e kompetencave te shumë institucione për të realizuar çështje të ndryshme që i kërkon koha, mirëpo mërgimtarët tanë habiten me institucionet tona se si nuk është ndërmarë së paku një iniciativë në Parlamentin e Kosovës e cila do të tregonte faktin se ato janë të interesuara për fatin e mërgimtarëve dhe për zgjidhjen e problemeve jetike siç janë dokumentet e udhëtimit dhe nënshtetësia. Një joseriozitet i tillë i institucioneve të Kosovës kundrejt bashkadhetarëve tanë, ka bërë që turmat e lartëpërmendura të bashkatdhetarëve tanë të "inkurajohen" drejt ambasadave dhe konzulatave serbe, për t'a njohur pa dëshirën dhe vullnetin e tyre shtetin antishqiptar e kriminal serb.

29 prill 2003 / Shkruan: Besim KRASNIQI

Përkundër të gjitha kërkesave tashmë të artikuluara të bashkadhetarëve tanë në mërgim drejtuar institucioneve të Kosovës nëpërmes artikujve gazetaresk, nëpërmes përfaqsuesve të partive politike që veprojnë në diaspore dhe nëpërmes formave tjera, për të hapur sa më parë nga një "Zyre të Kosovës" nëpër disa nga shtetet demokratike të perëndimit, ku jeton një numër i madh i bashkadhetarëve tanë, deri më sot ato kërkesa kanë hasur siç po shihet në vesh të shurdhër, pa e ditur ose pa dashur ta dijnë institucionet tona se çfarë dëmi po i sjellim vetvetes (shtetit të Kosovës) kur mërgimtarët tanë detyrohen të bëhen banorë të një shteti më antishqiptar siç është Serbia.

Mërgimtarët shqiptarë dhe nënçmimi i tyre!

Jemi dëshmitarë të rradhëve të gjata të shqiptarëve të Kosovës që presin me orë të tëra për një dokument udhëtimi apo ndonjë dokument tjetër "zyrtar", pasiqë ato u kërkohen nga institucionet vendore të shtetit ku ata jetojnë, kështu që në pamundësi tjera (mungesa e "Zyrës së Kosovës") bashkatdhetarët tanë duhet të paguajnë shuma të larta të të hollave, që tregon qartë se Serbia po ua merr shqiptarëve edhe në perëndim "haraçin" vetëm pse janë shqiptarë, duke ua bërë me dije shqiptarëve se "ata janë dhe do të mbeten gjithnjë nën vartësinë serbosllave". A nuk është ky nënçmim i shqiptarit deri në pafundësi? A nuk është poshtërsim i bashkadhetarit, i cili u tregua i gatshëm me vite të tëra t'i shërbejë shtetit të ardhshëm të Kosovës qoftë me mjete financiare apo qoftë edhe me pjesëmarje aktive në luftën çlirimtare? Ku po mbetet dinjiteti i shqiptarëve derisa ata duhet të presin para dyerve të ambasadave dhe konzulatave serbe një dokument udhëtimi, të vulosur me vulat e shtetit kriminal serbosllav dhe i shkruar në alfabetin sllav cirilik? Athua, për këtë ditë janë përpjekur me vite të tëra mërgimtarët tanë...?!

Përgjegjësinë e bartin institucionet e Kosovës!

Besojmë se çdo koment është më se i tepërt, mirëpo përsëri detyrimisht shtrohen pyetjet: kush e mban përgjegjësinë për këtë dukuri tepër nënçmuese për bashkatdhetarët tanë? Kush duhet t'i përgjigjet kërkesave të mërgatës, e cila me vite të tëra e tregoi veten si fuqi integruese shqiptare drejt krijimit të shtetit shqiptar të Kosovës? Mbi kënd bie barra e përgjegjësisë për të gjithë ata shqiptarë që i "dhurohen" Serbisë me dy duar? Padyshim mbi askënd tjetër veqse mbi institucionet e Kosovës, krijimin e të cilave e kemi pritur me dekada të tëra. Ne të gjithë jemi të vetëdijshëm për problemet e mëdha që i kanë kapluar institucionet tona për t'i quar proceset e pavarësimit deri në fund, të gjithë jemi poashtu të vetëdijshëm mbi mungesën e kompetencave te shumë institucione për të realizuar çështje të ndryshme që i kërkon koha, mirëpo asgjë nuk i arsyeton institucionet tona pse nuk kanë ndërmarë së paku një iniciativë në Parlamentin e Kosovës, e cila do të tregonte faktin se ato janë të interesuara për fatin e mërgimtarëve dhe për zgjidhjen e problemeve jetike siç janë dokumentet e udhëtimit dhe nënshtetësia. Një joseriozitet i tillë i institucioneve të Kosovës kundrejt bashkadhetarëve tanë, ka bërë që turmat e lartëpërmendura të bashkatdhetarëve tanë të "inkurajohen" drejt ambasadave dhe konzulatave serbe, për t'a njohur pa dëshirën dhe vullnetin e tyre shtetin antishqiptar e kriminal serb.

Hapja e Zyrave të Kosovës si domosdoshmëri

Të gjithë bashkadhetarët janë të mendimit se hapja e "Zyrave të Kosovës" nëpër kryeqendrat e botës, sidomos aty ku jetojnë shumë shqiptarë, do të zgjidhte fatlumësisht shumë probleme kyçe, do të përfundonin krajatat e shqiptarëve me administratat serbosllave të ambasadave antishqiptare si dhe do t'i vinte fundi regjistrimit të shqiptarëve si banorë të Serbisë. Me këtë do të rikthehej edhe besimi i mërgimtarëve ndaj institucioneve të Kosovës, të cilat deri më sot nuk kanë bërë asgjë që mërgimtarët ta ndiejnë veten si qytetarë të Kosovës! Duam të shpresojmë që kërkesat e bashkatdhetarëve të artikuluara në forma të ndryshme drejt institucioneve të Kosovës, sikurse edhe ky artikull nuk do të vazhdon të hasë në vesh të shurdhër institucional, sepse do të vije dita kur kjo papërgjegjësi dhe ky "non sens" i institucioneve tona do t'iu kthehet atyre në bumerang, por atëherë do të jetë tepër vonë!



.......