Ne Greve Urie per Parate e Firmave Piramidale

[Redi]

Gratë greviste janë ato që po sakrifikohen për hir të kësaj indiference të theksuar të shtetit

Ministri Dervishi injoron grevistët

Ndërkohë që familjarët prisnin zotin Dervishi, ky i fundit ka devijuar dhe i është shmangur kontaktit të tyre, duke shfrytëzuar një tjetër hyrje të Ministrisë së Rregullimit të Territorit

Mirela Veliu

Greva e urisë e nëntë grave ka hyrë sot në ditën e saj të dhjetë. Përfaqësues të familjeve që kanë humbur paratë ose shtëpitë në firmat piramidale janë solidarizuar dje me gratë dhe për t'iu bërë atyre krah, kanë kërkuar takim me ministrin e Rregullimit të Territorit dhe Turizmit Besnik Dervishi. Megjithë këmbënguljen e këtyre të fundit, ministri i Rregullimit të Territorit dhe Turizmit Dervishi, ka refuzuar të takohet dje me përfaqësues të familjeve të pastreha. Që në orët e para të mëngjesit të djeshëm, përfaqësues të kësaj kategorie kanë zënë vend para kësaj ministrie. Ata prisnin ministrin Dervishi për të zhvilluar një takim për problemin e tyre shumëvjeçar ende të pazgjidhur dhe që ka detyruar nëntë nëna të vetëflijohen. Ndërkohë që familjarët prisnin zotin Dervishi, ky i fundit ka devijuar dhe i është shmangur kontaktit të tyre, duke shfrytëzuar një tjetër hyrje të ministrisë. Përfaqësues të këtyre familjeve që e kanë parë ministrin Dervishi kanë reaguar mjaft ashpër, duke thënë se shteti tashmë nuk denjon as t'i presë e jo më të zgjidhë problemin e tyre. Kështu në shenjë proteste, të afërm të grave greviste, si dhe përfaqësues të familjeve të pastreha kanë bllokuar për disa minuta "Rrugën e Dibrës". Kështu, prej shtatë vjetësh, shqiptarët presin të marrin lekët e tyre, të vetmen pronë që iu përket me të drejtë, por deri tani i ka shoqëruar vetëm heshtja. Janë rreth njëqind familje që kanë humbur shtëpitë e tyre në firmat piramidale, të cilat prej disa muajsh protestojnë, duke kërkuar këtë herë jo shtëpitë, por një ndihmë nga shteti. Të gjitha këto familje jetojnë në shtëpi me qera, por gjendja ekonomike e dobët e bën të pamundur përballimin e qerasë. Krahas grevës së urisë ata kanë thënë se në ditët e ardhshme do të përshkallëzohen protestat e tyre. Ata kanë përsëritur sërish shprehjen "kërkojmë nga qeveria atë që na premtoi kur na kërkoi votat në vitin '97". Njëri prej përfaqësuesve shprehet për gazetën se, ata kanë disa ditë që kërkojnë takim me ministrin e Rregullimit të Territorit, por ky i fundit nuk i ka pranuar në takim. Ndërkohë që përfaqësuesja e kësaj ministrie Doris Andoni, e cila ka kontaktuar me gratë greviste iu ka kërkuar të dalin nga greva dhe sigurisht përfundimi dihet, të vazhdohet ashtu siç është vazhduar edhe këto shtatë vjet të tjera, me premtime dhe gënjeshtra. Në anën tjetër, gratë greviste janë ato që po sakrifikohen për hir të kësaj indiference të theksuar të shtetit. Ato kanë hyrë sot në ditën e dhjetë të grevës dhe gjendja e tyre vazhdon të rëndohet. Kanë qenë nëntë gra që kanë ndërmarrë një inisiativë, e cila nuk dihet se si do të përfundojë, derisa askush nuk po reagon. Njëra prej tyre, pikërisht para dy ditësh është shtruar në spitalin psikiatrik për shkak të një depresioni të rëndë mendor. Tashmë të mbetura vetëm tetë, ato janë të shqetësuara për fatin e shoqes së tyre, megjithatë shprehen se askush nuk do të mund t'i kthejë nga qëllimi i tyre i shenjtë. Gjendja po rëndohet nga dita në ditë, megjithatë 20 familjeve më problematike nuk iu është është dhënë asnjë zgjidhje nga përfaqësuesit e qeverisë


=============================================