PBDNJ braktis koalicionin e Rilindjes Socialiste, bashkohet me opozitën

[Albo]

Vangjel Dule: Nuk kemi më punë me PS-në



Kryetari i Partisë Bashkimi për të Drejtat e Njeriut, Vangjel Dule, deklaroi nga studioja e lajmeve të Top Channel se partia që ai drejton “de facto” nuk është më pjesë e koalicionit qeverisës.

“De facto PBDNJ-ja nuk është më pjesë e koalicionit, por “de jure” nevojitet edhe kongresi për këtë vendimmarrje. Unë do i propozoj kongresit daljen nga ky koalicion”, – tha Dule.

Në lidhje me takimin që pati të martën me kreun e Partisë Demokratike, Lulzim Basha, Dule theksoi: “Është normale takimi i krerëve të dy forcave politike. Unë as nuk i afrohem as nuk i largohem koalicioneve duke u nisur se kush bën pjesë në koalicione. Ne jemi të përqendruar te politika”.

Dule shpjegoi se po i largohet koalicionit qeverisës për arsye se ky koalicion i është larguar frymës që e karakterizonte.

“Ne po i largohemi një koalicioni që i është larguar frymës me të cilën erdhi në pushtet. Erdhi me dëshirë për reforma, por dështoi me taksat, dështoi me shëndetësinë dhe dështoi në lidhje me zgjedhjet e lira dhe të ndershme”, tha Dule.

Top Channel

[Albo]

Lulzim Basha takohet me Vangjel Dulen në selinë e PD

Kryetari i Partisë Demokratike, Lulzim Basha është takuar mesditën e sotme me kryetarin e PNDNJ Vangjel Dule. Takimi mes Bashës dhe Dules është zhvilluar në selinë blu, rreth 1 orë pas konferencës ‘Korrupsioni Zgjedhor’, ku kreu i demokratëve ishte i pranishëm në tryezë.

Nuk dihet tema e diskutimit mes kryetarit të PD Lulzim Basha dhe atij të PBDNJ Vangjel Dule. Takimi mes tyre zgjati disa minuta. Kujtojmë se Dule është larguar nga koalicioni me mazhorancën, pasi në zgjedhjet e fundit vendore hyri e vetme në garën elektorale. Tashmë, duket se Dule i është bashkuar opozitës.

Syri