Lajmet e dites.........

[Vinjol]

Manjani: Ndryshimet kushtetuese janë të rëndësishme, jo luks


Ministri i Drejtësisë Ylli Manjani është takuar me studentë të Fakultetit Ekonomik të Elbasanit. Lidhur me ndryshimet e fundit kushtetuese, referuar dhe reformës në drejtësi, ministri Manjani tha se ato janë të rëndësishme dhe jo luks.

“Hera e pestë që ndryshohet Kushtetuta që nga 1998, problem ka qenë gjithnjë konsensusi. Reformat e suksesshme kërkojnë energji dhe pasion. Duhet ta reformojmë sistemin e drejtësisë. Sistemi ka defekte që duhen ndrequr në mënyrë që drejtësia t’i shërbejë njerëzve. Shteti i sotëm dhe gjykatat kanë defekte pasi askush nuk beson më tek ky sistem”, ka thënë ministri para studentëve.

Minsitri i Drejtësisë tha se qëllimi i shtetit nuk është të mbushë burgjet, por të rrisë mirëqenien.

“Nuk është qëllimi i një shteti të mbushë burgjet, por të rrisë mirëqenien. Nëse nuk analizojmë shkaqet e vjedhjeve, nuk e zgjidhim problemin. Të parandalojmë vjedhjet, burgu nuk është zgjidhje”, tha Manjani.

[Vinjol]

Gazetari i “Corriere...”: Shqipëria, rreziku terrorist për Italinë


Shqipëria po bëhet dhe është bërë zyra lokale e xhihadistëve të ISIS, shkruan në një kronikë të tijën gazetari i “Corriere della Serra”, Antonio Ferrari.

Për rreth 6 minuta ai shpjegon arsyen se përse tashmë Shqipëria përbën një rrezik për Italinë, dhe çfarë ka vënë në alarm NATO-n, SHBA-në, Rusinë, dhe në veçanti Italinë? Ai thotë se janë gati një mijë persona që kanë pranuar t’i bashkohen trupave terroriste.

“Siç bëjnë të ditur shërbimet tona sekrete, rekrutuesit po kërkojnë të rinj vullnetarë duke ofruar 2 mijë euro në muaj për kontrata me kohë të pacaktuar. Klauzolat janë dy, guximidhe njohja e gjuhës italiane”, thotë Ferrari.

Italia ka frikën se Shqipëria mund të bëhët një rrugë kalimi për Shtetin Islamik në Europë, njësoj thotë gazetari, si Belgjika për Francën në sulmet e 13 nëntorit. “Rreziku është më serioz sa na thuhet. Në disa zona të Shqipërisë tregu klandestin i armëe që i ofrohet kujtdo që paguan, si ISIS si formacioenve të xhihadistëve, duke shitur armë për 600 euro”, thotë Antonio Ferrari.

[Vinjol]

“Shqipëria tjetër”, grekët kërkojnë Vorio Epir në Lunxhëri

Përballë Gjirokastrës, krahina e Lunxhërisë qëndron e derdhur në fshatrat e saj. Shpërndarë malit të Lunxhit, ato vështirë se të japin përshtypjen e një zone që po kalon jo pak vështirësi.

“Lunxhëria është një nga ato zona, që ka pasuri të pafundme jo thjesht natyrore, por edhe kulturore e historike. Një ndërthyrje, që do të duhej ta kthente në një destinacion të rëndësishëm turistik, e që në fakt sot e gjen në një pikë ku jetojnë vetëm të moshuarit, e ku të rinjtë duan thjesht të largohen”.

Kryeqendra e Lunxhërisë, Dhoksati është vetëm 14 kilometra nga qyteti i gurtë, e megjithatë, ajo që të bën përshtypje sapo mbërrin është heshtja e qetësia jo normale, për një fshat që ngrihet imponueshëm, me shtëpitë që duken si kala të vogla.

“Kjo gjendje na godet, ndoshta na plak para kohe, sepse njeriun e mban të ri edhe gjallëria, edhe fshati, e mban edhe marrëdhënia njerëzore”, thotë Koço Vasili.

Rrugicat janë të vetmuara, pragjet pa njerëz, dyert më së shumti të fshehura pas drynëve e shtëpi të tjera, që janë gjunjëzuar nga braktisja. Kalldrëmet janë shqyer dukshëm nga mosmirëmbajtja, ndërsa hapat tona nuk kanë bashkëshoqërues.

Deri në vitin 1990, Dhokasati ka pasur rreth 615 banorë. Sot ka rreth 130. Shumë janë larguar e vazhdojnë të largohen, duke i dhënë fshatit një pamje të shkretë…

“Fushat janë kthyer në moçale me pyje. Duhet të fillosh nga e para që të zbukurosh fushën. Pastaj edhe vlera e mjeteve të punës dhe e naftës është rritur shumë. Në këtë mënyrë kostoja e prodhimit rritet shumë, kështu që njerëzit më mirë emigrojnë sesa të fitojnë shumë më pak”, thotë Koço Naci.

Shkolla 9-vjeçare, që dikur mbante mbi 150 nxënës, sot s’ka më asnjë zëth fëmije. Këtu, ata dikur hynin e dilnin, ndërsa sot rrënojat s’mundet të flasin.

“Sot këtu është shkretë. Kam tërë ditën që pres këtu, sepse mora vesh që do të vijë Marini. Pres këtu, por s’ka shkuar asnjëri nga kjo rrugë. S’ka njerëz, kush do të kalojë?”, thotë Foto Prifti.

Shtëpitë janë në masë monumente kulture të kategorisë së parë. Çdonjëra prej tyre ka historinë e saj. Fillimet i kanë që në vitet 1801, e shumë të tjera edhe në 1850 e më pas. E megjithatë, askush nuk ka ardhur t’i restaurojë, apo të ndihmojë qoftë edhe me diçka të vogël, familjet që ende jetojnë në këto shtëpi, siç është rasti i Çuçajve që thonë se u dergjën në premtime boshe pafund.

“Më ra tavani, kështu që vajta mora borxh te shokët e te miqtë që kisha për të hapur shtëpinë. Më shumë më ndihmoi vëllai im, që ishte doktor e që tani nuk rron më. Ai më ndihmoi, më dha gjysmat e lekëve, gjysmat e tjera i mora nëpër shok e nëpër miq, duke shtuar edhe ato pak që kisha vet, dhe e rregullova”, thotë Vasil Çuçi.

Këllëzi, fshat tjetër i Lunxhërisë, është vetëm pak më tej, por gjendja edhe këtu nuk ndryshon. Është e çuditshme sesi janë lënë në braktisje të plotë fshatra kaq të mbarë, me njerëz punëtorë e të njohur në histori për patriotizmin e tyre.

“Po Këllëzi, si të gjithë fshatrat e tjerë. Në emigracion kanë ikur njerëzit. Ka rreth 100 frymë, rreth 25-30 shtëpi. Pak moshë të re”, thotë Vasil Puleri.

Jo larg nga Këllëzi janë marrë edhe gurët e zinj, me të cilët janë ndërtuar shtëpitë e mëdha të zonës. Dikur, sepse sot kohët kanë ndryshuar. Të rinjtë ikin, duke lënë pas veç kujtime, asgjë tjetër.

“Më theu një lopë këmbën atje në pyll, me kë ta merrja e ta sillja? Mbeti lopa në pyll ndonjë javë. Më në fund e morën disa djem e disa pleq, me të mbledhur nga fshatrat e tjerë nga një e nga dy, sepse këtu s’kishte njeri”, thotë Thoma Kushta.

Lunxhëria dikur kishte një bujqësi të zhvilluar, duke arritur edhe të eksportonte prodhimet e saj jashtë vendit, ashtu si vreshtarinë e blegtorinë, që sot shumë të reduktuara përbëjnë të vetmet mundësi që kanë banorët e mbetur.

Stacioni i fundit do të jetë i famshmi, fshati Qestorat. Vendi ku u lind një patriot i madh si Koto Hoxhi, mësues e prijës i shumë prej figurave qendrore patriotike shqiptare, por nga ku vjen edhe Jorgo Zografi, renegati që organizoi autonominë e të ashtuquajturit nga grekët Vorio Epir në 1914.

Busti i Koto Hoxhit është aty. I thyer disa herë nga njerëz të paidentifikuar, për rregullimin e tij kanë menduar vet ata, disa banorë të fshatit, askush tjetër. Pas, shkolla e dikurshme greke e hapur nga Zografët. Sipas disa banorëve, për të kanë ardhur e janë interesuar vitet e fundit jo pak zyrtarë grekë.

“Ka ardhje të shpeshta të titullarëve të institucioneve të akredituara në Shqipëri. Vijnë e bëjnë vizitë këtu në shesh, ku ndodhet busti. Qëllimi i tyre për atë punë është...”, thotë Aleksandër Basho.

“Më shumë janë interesuar grekët, të them të drejtën, për Kristaq efendinë edhe për shkollën. Ata thoshin se këtu është Vorio Epir, politikë hesapi, kurse për Koto Hoxhin, jo mor jo, nuk interesohet njeri”, thotë Nesto Papa.

Shumë të tjerë nuk duan të flasin, por pranojnë nën zë se është përhapur një fjalë, që mesa duket kërkon fillimisht të testojë reagimin e banorëve mbi vënien e bustit të Zografëve në Qestorat. Në fakt, edhe gjatë procesit të debatit për ndarjen e re territoriale, me mbështetjen edhe të pushtetit lokal të para pak kohësh, zyrtarët grekë kërkuan shpalljen edhe të Lunxhërisë si zonë minoritare, çfarë u kundërshtua fort, në radhë të parë nga banorët,siç ata na thonë.

E megjithatë, mjafton të ecësh pak më tej, për të kuptuar sa dhimbshëm është katandisur sot shtëpia e dikurshme e Koto Hoxhit. E tillë është mënyra sesi respektohen figura të tilla…

Sot kjo zonë, që përfshin edhe shumë fshatra të tjerë, ka humbur gjallërinë e saj, edhe pse mundësitë i ka të jashtëzakonshme. E në këto kushte, askush nuk duhet të habitet, që zyrtarë grekë zbresin edhe këtej e hedhin farën e përçarjes. Tentojnë të rikthejnë Zografon, sa kohë shteti shqiptar nuk arrin të ruajë e respektojë siç duhet, Koto Hoxhin e të gjithë figurat e tjera të Lunxhërisë: Pandeli Sotiri në Selckë, Petro Poga në Erind e Urani Rumbo në Stegopul. Katër figura, që sot janë lënë krejtësisht në harresë, ashtu si Lunxhëria, që kërkon e meriton shumë më shumë.

[Vinjol]

Dt 19.1.016

Tahiri letër CdS dhe Daily Mirror: Shkrimi, një tullë në murin e mosbesimit

Pas publikimit të shkrimeve për Shqipërinë, tek Corriere TV në Itali dhe Daily Mirror në Britani, ministri i Brendshëm Saimir Tahiri u ka dërguar letër redaksive të lajmeve të të dy mediave.

“Jam i bindur që nuk jam i vetmi shqiptar që ndihet keq nga të pavërtetat që u pasqyruan, siç besoj se çdo italian apo qytetar i çdo vendi të botës që ka pasur mundësinë të njohë sadopak Shqipërinë, është ndier keq nga pasqyrimi thelbësisht i shtrembëruar i realitetit shqiptar në reportazhin tuaj”, shkruan ministri.

Ministri Tahiri i quan shpikje shkollat për militantët e ISIS apo mbi 1 mijë rekrutë të paguar e të gatshëm për luftë, duke i quajtur një tullë në murin e mosbesimit.

“Në këtë rast, të pavërtetat e raportuara prej jush për Shqipërinë, duke shpikur shkolla për militantët e ISIS apo mbi 1000 rekrutë të paguar e të gatshëm për luftë, janë një tullë më shumë në murin e mosbesimit që na bën gjithmonë e më të paaftë për të fituar kohën që kemi humbur duke parë si kërcënim njëri-tjetrin, e kësisoj, të paaftë për të fituar kundër kërcënimit terrorist”, nënvizon ministri i Tahiri.

Ai shton se Shqipëria ka një popullsi me shumicë muslimane, por është verbëri të mjaftohesh me kaq për të imagjinuar rrezik terrorizmi në vendin tonë.

“Ndaj, i nderuar, më lejoni t’ju siguroj se shqiptarët krenohen me vlerat e çmuara të tolerancës dhe bashkëjetesës fetare, një shembull unik që veç krenarisë, ka rrënjosur tek çdo qytetar shqiptar vullnetin për të mos pranuar frikën dhe kërcënimin e terrorit, por kurajon e forcën për të ndërtuar bashkëpunimin me çdo shoqëri të lirë që luftën kundër terrorizmit e fiton më së pari me vlera e besim, pastaj me armë”, shkruan Tahiri.

[Vinjol]

Buxheti, Komisioni i Ekonomisë miraton dy aktet normative


Komisioni Parlamentar i Ekonomisë miratoi dy aktet normative përmes të cilave qeveria ndryshoi buxhetin dy herë gjatë muajit dhjetor.

Akti i parë ishte ai që rialokoi një pjesë të fondeve për investime nga projektet me ecuri të ngadaltë tek ato me realizim më të mirë, duke krijuar edhe një fond të posaçëm shpronësimesh prej 5 miliardë lekësh.

Ndërsa përmes aktit të dytë, qeveria e ndryshoi buxhetin më datë 28 dhjetor për të paguar 1.53 miliardë lekë si shpërblime për festat e fundvitit dhe 1 miliard lekë të tjera si mbështetje për KESH.

Ministri i Financave, Shkëlqim Cani tha se ndryshimi i buxhetit ndihmoi ekonominë, por opozita akuzoi për abuzim dhe keqmenaxhim të financave publike.

/ Top Channel

[Vinjol]

Shqipëri-Itali-Serbi, takimi i radhës më 20 janar në Tiranë

Më 20 janar në Tiranë do të zhvillohet takimi i dytë trepalësh Shqipëri-Itali-Serbi, me tre vendet që do të përfaqësohen nga ministrat e Jashtëm përkatës, Ditmir Bushati, Paolo Gentiloni dhe Ivica Daçiç.

Lajmi bëhet i ditur nga Ministria e Jashtme shqiptare, përmes një njoftimi për shtyp ku thuhet se, ky takim synon shkëmbimin e pikëpamjeve dhe diskutimin e një sërë çështjesh të rëndësishme si për të tre vendet, për rajonin dhe me gjerë.

“Ecuria e procesit të integrimit evropian dhe intensifikimi i bashkëpunimit rajonal në frymën e procesit të Berlinit, duke pasur parasysh edhe Konferencat e Ballkanit Perëndimor në Paris 2016 dhe Romë 2017, do të jenë në fokus të këtij takimi të rëndësishëm, objektiv parësor i të cilit do të jetë përforcimi i urave të komunikimit konstruktiv mbi baza mirëkuptimi”, thuhet në njoftimin zyrtar.

Gjatë takimit, ministrat e Jashtëm të Shqipërisë, Italisë dhe Serbisë do të diskutojnë edhe për projekte të përbashkëta konkrete në fushat e ekonomisë, infrastrukturës, energjisë, turizmit, arsimit, kulturës, bashkëpunimit rinor, etj.

Takimi tripalësh do të paraprihet nga takime të veçanta të ministrit Bushati me homologët Gentiloni dhe Daçiç, vijon më tej njoftimi.

/ Top Channel

[Vinjol]

Totozani në Elbasan: Urat i shembi korrupsioni

Avokati i Popullit kërkoi hetim për të gjitha urat e reja të cilat janë shembur gjatë reshjeve të javëve të kaluara. Sipas tij shembja ka ndodhur për shkak të korrupsionit dhe jo kushteve të motit.

Këtë deklaratë Avokati e bëri ndërsa ka parë nga afer urën e Broshkës, Bashkia Peqin, e cila u shemb një javë më parë nga vërshimi i Shkumbinit duke lënë të izoluar më shumë se 5 mijë banorë.

“Sa herë që prishen ura apo rrugë mban era korrupsion. Kjo situatë ngërçi ligjor duhet të marrë fund menjeherë. Janë banorët e zonave, ata që vuajnë pasojat e këtij izolimi absurd”, tha Igli Totozani, Avokat i Popullit.

Avokati i Popullit e cilësoi justifikim mungesën e fondeve për riparimin e dëmeve. Ai tha se se po shkelen të drejtat e njeriut ku mijëra banorë e kanë të pamundur komunikimin me pjesën tjetër të vendit ndërkohë që fëmijëve u është ndërprerë arsimimi.

/ Top Channel

[Vinjol]

Durrës, pranga të dyshuarit si vrasës me pagesë

Jozyrtarisht mësohet se nga ana e forcave të Policisë së Durrësit, është prangosur një shtetas, i dyshuar si vrasës me pagesë.

Arrestimi i këtij shtetasi, identiteti i të cilit nuk bëhet ende publik, ka ndodhur këtë të martë në qytetin bregdetar.

Burime nga Policia e Durrësit bëjnë me dije se rreth këtij personi po hetohet nëse ka lidhje apo përfshirje në disa prej vrasjeve të fundit të ndodhura në qytetin bregdetar.

/ Top Channel

[Albo]

Mos sill lajmet ne te njejten teme. Ne forumin e shtypit te dites nuk postojme cdo lajm qe lexojme ne gazeta, vetem lajmet me kryesore. Dhe cdo lajm shkon ne nje teme te vecante. Mund te hapesh nje teme te re per lajm, nese nje teme ekzistuese nuk ekziston per ate ceshtje, lajme. Ne kete menyre anetaret ndjekin rrjedhen e ngjarjeve e zhvillimeve mbi ate lajm me kohen.

Tema u mbyll.
Albo