Lajmet e dites.........

[Vinjol]

Tiranë, plagoset me thikë gjyqtari Artan Gjermeni

Gjyqtari Artan Gjermeni është plagosur me 4 goditje thike në rrethana ende të pasqaruara plotësisht. Ndërkohë që ai ka pohuar një version pak të besueshëm për ngjarjen.

Gjermeni, i shoqëruar nga një tjetër person, ka shkuar për ndihmën e parë mjekësore në QSUT. Pas njoftimit, policia dhe një prokuror i gatshëm janë paraqitur në spital, por janë hasur në variantin krejt të çuditshëm të gjyqtarit Gjermeni.

Ai ka thënë se është prerë me një mjet llamarine në ambientet e shtëpisë së tij, version që edhe për policinë nuk ka qenë aspak bindës.

Në fakt, ngjarja e mistershme pritet të zbardhet pas hetimeve që do të kryhen nga policia lidhur me plagosjen e gjyqtarit.

Artan Gjermeni prej 10 vjetësh është gjyqtar në Gjykatën e Tiranës. Ai ka mbajtur pozicionin e anëtarit të Këshillit të Lartë të Drejtësisë dhe është një prej gjyqtarëve që vazhdimisht ka prodhuar lajm. Madje në CV-në e tij profesionale është edhe dhënia e pafajësisë ndaj ish-guvernatorit Fullani. Vendim që mbeti i pandryshuar më pas edhe nga Gjykata e Apelit.

/ Top Channel

[Vinjol]

Artikulli në “The Economist”, qeveria: U pagua për të tërhequr investime të huaja

Pas akuzave të opozitës, se qeveria reklamon me paratë e shqiptarëve arritje të pavërtetuara vetëm e vetëm sa për të lavdëruar vetveten, ka ardhur edhe reagimi i qeverisë së Shqipërisë, që nuk e ka mohuar pagesën për këtë publicitet në “The Economist”, por ndryshe nga opozita, e quan atë si promovim të vendit për të nxitur në këtë mënyrë investimet e huaja.

Përmes deklaratës së shpërndarë për mediat, qeveria e ka vlerësuar mundësinë e shpërndarjes së numrit special të revistës prestigjioze “The Economist” në Samitin e Davosit, si një oportunitet të paçmuar për të pasur aty një reportazh për të promovuar vendin përpara investitorëve dhe vendimmarrësve të rëndësishëm, në mënyrë që të tërhiqen investime të huaja, që do të sjellin si pasojë edhe krijimin e më shumë vendeve të reja të punës, nxitjen e turizmit dhe të prodhimit vendas.

Për këtë arsye, qeveria nuk e mohon të ketë paguar për atë reportazh të shfaqur në revistën britanike, por thotë se për atë - ashtu siç kanë vepruar edhe qeveritë e vendeve të tjera të rajonit, si Maqedonia, Kroacia, Turqia apo Serbia, - ka nënshkruar një kontratë prej 36 milionë lekësh për publikimin e atij reportazhi të zgjeruar mbi Shqipërinë.

Sa i përket faktit të supozuar se, revista nuk mban përgjegjësi për atë mbi të cilën bëhet publicitet në këmbim të pagesës, qeveria thotë se “The Economist”, si një prej revistave më prestigjioze dhe me lexueshmëri të lartë në shkallë botërore, nuk mund të publikojë asnjë informacion që nuk është i vërtetë, i paverifikuar, apo që nuk është shkruar nga gazetarë të certifikuar të saj.

Në vazhdën e reagimit qeveritar është edhe akuza drejtuar opozitës së sotme për kohën kur ishte në qeveri, në lidhje me shpenzimet e miliona dollarëve nga paratë publike për të transmetuar reklama qeveritare apo për të lobuar, që në thelb të tyre kishin përhapjen në mbarë botën të baltës dhe shpifjeve të ish-kryeministrit Berisha ndaj ish-opozitës socialiste të vendit. Sipas qeverisë, ka ardhur koha që Partia Demokratike të zhvishet nga lëkura e qeverisë së vjetër dhe të bëhet opozita e re, që i ka munguar Shqipërisë prej dy vitesh e gjysmë.

/ Top Channel

[Vinjol]

Programi i PD: Në qendër ekonomia, punësimi, rend e luftë ndaj korrupsionit



Me anë të një deklarate për shtyp Partia Demokratike ka bërë të ditur se ka përfunduar fazën e parë të hartimit të programit, sipas të cilës është një ofertë për shqiptarët që parashikon zhvillim ekonomik, lehtësi fiskale, punësim, stimuj ekonomik, zhvillim të bujqësisë, infrastrukturës, arsimit dhe shëndetësisë.

“Taksat e ulëta, zbritje e TVSH në nivelin 15 përqind, futja e taksës së sheshtë më të ulën në Ballkan në nivelin 9 përqind, janë disa nga pikat e platformës, që do ta bëjnë Shqipërinë vendin më atraktiv të rajonit për investime. Prioritet do të jetë po ashtu zbatimi i ligjit dhe lufta ndaj korrupsionit”, shkruan PD.

Partia Demokratike thotë se deri në fund të muajit janar, do të bëhet edhe konsultimi final me specialistë të fushës, për t’i pasuruar më tej këto dokumente me ekspertizën dhe idetë më të mira.
Në muajin shkurt, programi i secilit prej 22 departamenteve do t’i nënshtrohet diskutimit të hapur me grupet e interesit, në funksion të përmirësimit dhe përfshirjes së çdo opinioni të vlefshëm. Pas kësaj, në muajin mars, programet e departamenteve sipas fushave që mbulojnë, që janë dhe alternativa e Partisë Demokratike për zgjedhjet e ardhshme, do të bëhen publike.

“Puna e hartimit të programeve për secilin departament, ka nisur prej 4 muajsh. Ekspertët më të mirë të fushës, bashkë me drejtuesit politikë të departamenteve kanë dhënë kontributin e tyre për të hartuar alternativën që ofron zgjidhjet më të mira për secilin sektor të jetës”.

Më tej në deklaratën e lëshuar nga Partia Demokratike thuhet se këto platforma janë një projekt i detajuar dhe i plotë në ekonomi, rend, siguri, shteti i së drejtës, bujqësi, turizëm, infrastrukturë, e shumë fusha të tjera, janë zgjidhje për daljen nga kriza.

“Projektet e detajuara, që sjellin punësim e zhvillim, do të prezantohen si në rastin e prezantimit të platformës së taksave të Partisë Demokratike, një muaj më parë”, mbyllet deklarata e PD.

/ Top Channel

[Vinjol]

Olli: Reshjet shkaktojnë dëme, pushtetarët me pushime

Kryetari i këshilltarëve demokratë në Bashkinë e Tiranës, Leonard Olli ka akuzuar institucionet e shtetit dhe drejtuesit e tyre se, “si gjithmonë shkojnë me pushime, duke i braktisur qytetarët”.

“Në njësinë numër 6, në Kombinat, një pemë ka rënë prej disa orësh, duke zënë nën të një makinë, por strukturat e Bashkisë së Tiranës dhe kryetari Veliaj shijojnë fundjavën, pas pushimeve të gjata të fillmvitit në Sri Lanka”, thotë Olli në një reagim të tijin.

Sipas tij, një tjetër pemë, në afërsi të një qendre tregtare ka bllokuar aksin nacional Tiranë-Elbasan, por sërish askush nga institucionet përgjegjëse nuk ka shkuar në vendngjarje.

“Gjithçka në kolaps, me qindra automjete të bllokuara. Edhe pse reshjet janë në parametra normale, shteti është dorëzuar dhe qytetarët janë lënë në dorë të motit dhe mëshirës së fatit”, ka thënë Olli.

Ai vlerëson se, kur kjo paaftësi dhe neglizhencë vrastare shfaqet kaq arrogante dhe cinike në kryeqytet, çdokush kupton lehtësisht se çfarë ndodh në pjesën tjetër teëterritorit të vendit.

“Qytetarët vijojnë të mbeten me sytë nga qielli dhe t’i luten zotit t’i ndihmojë, pasi ata që u besuan me votë për të drejtuar qeverinë dhe bashkinë janë të fokusuar vetëm te mirëqënia personale”, ka thënë më tej Olli.

/ Top Channel

[Vinjol]

Vështirësitë nga bora, disa akse të kalueshme vetëm me zinxhirë


I gjithë vendi është i mbërthyer nga i ftohti, reshjet e dëborës dhe temperaturat e ulëta. Problemet kanë qenë gjatë natës në pjesën më të madhe të vendit.

Reshjet e dendura të dëborës kanë mbuluar gjithë Veriun, Verilindjen, Juglindjen e vendit, por edhe shumë zona të tjera në të gjithë Shqipërinë.

Raportohet se në disa zona të thella, trashësia e borës arrin deri në 1 metër. Si pasoje, ka pasur probleme te shumta ne disa akse kryesore rrugore, ku është dashur ndërhyrja e mjeteve borëpastruese, për të normalizuar qarkullimin e automjeteve, të cilat janë të detyruara të udhëtojnë me zinxhirë, për shkak të pranisë së akullit në rrugë.

Në këto momente raportohet se në pjesën më të madhe të territorit, reshjet e borës kanë pushuar ose janë në nivele shumë të ulëta, por pritet që në orët në vijim temperaturat të ulen akoma më shumë, çka mund të sjellë prani më të madhe të ngricave në të gjithë territorin e vendit.

Autoriteti Rrugor Shqiptar, në njoftimin e orës 19:00 thotë se të gjitha akset janë të kalueshme, pavarësisht se në disa zona ka prani akulli dhe rënie masivesh guri.

Ndërkaq, bëhet e ditur se probleme ka pasur dhe me furnizimin me energji elektrike. Sipas OSHEE, në buletinin e fundit të shpërndarë për mediat, raportohet se aktualisht janë vetëm 5 fidra pa energji, ndërsa në terren janë 1867 punonjës. Zonat pa energji elektrike, sipas OSHEE janë disa fshatra dhe komuna në Burrel, në Kukës, Shkodër, Korçë, Elbasan, Berat, Vlorë e Tiranë.

/ Top Channel

[Vinjol]

Serbia në zgjedhje të parakohshme

Serbia do të shkojë në zgjedhje të parakohshme vetëm një vit pas zgjedhjeve të fundit.

Kryeministri serb, Aleksandar Vuçiç, në një mbledhje partiake ka thënë se ka marrë vendim për zgjedhje, pasi duhet konfirmuar politika e shtetit. Pas presionit nga Shtetet Perëndimore, për njohjen e Kosovës, por edhe zgjidhjes mes Rusisë dhe Bashkimit Europian, Vuçiç kërkon një mandate për të kryer reformat e nisura.

“Serbisë i duhet një mandate katër vjeçar në mënyrë që proceset integruese e demokratike të mos kenë më kthim, pasi pas këtyre katër viteve nuk do të ketë kthim në të kaluarën. Serbisë i duhet një mandat i plotë para vendimeve të vështira dhe t’i bashkohet Bashkimit Europian si një partner i fuqishëm”, tha Vuçiç.

Serbia është përballur edhe me kërkesa për ndryshime kushtetuese kur mund të pasoj heqja e Kosovës nga preambula kushtetuese, por edhe një orientim më i qartë drejt Bashkimit Europian.

Vuçiç vendos për zgjedhje në momentet kur opozita serbe mezi vërehet, por edhe në një kohë kur po përballet me kritika për kontroll të fortë ndaj mediave.

/ Top Channel

[Vinjol]

Tiranë, përplasje më armë zjarri në rrugën “Bardhyl”

Persona ende të paidentifikuar kanë qëlluar me armë zjarri gjatë orëve të pasdites së kësaj të diele në rrugën “Bardhyl” në kryeqytet .

Nga të dhënat e para dyshohet se ka pasur shkëmbim zjarri pas një konflikti mes disa të rinjsh pranë një pike karburanti, ndërsa nuk ka pasur persona të lënduar.

Forca të shumta policore kanë mbërritur menjëherë në vendin e ngjarjes, ndërsa po punohet për identifikimin e personave të përfshirë në këtë ngjarja. Policia ka ngritur pika të shumta kontrolli për kapjen e autorëve.

/ Top Channel

[Vinjol]

Lajmet m e dAte 18.1.016


Peqin, shpërthen bombula e gazit, 3 të plagosur

Një bombul gazi ka shpërthyer paraditen e kësaj të hëne në një banesë në Peqin, duke lënë të plagosur 3 anëtarë të një familjeje.

Lajmin e bëjnë të ditur autoritetet lokale, sipas të cilave 3 të plagosurit janë dërguar për mjekim në spitalin e Elbasanit.

Nga të dhënat e fundit mësohet se personat në fjalë nuk ndodhen në rrezik për jetën.

/ Top Channel

[Vinjol]

PD: Beqaj, rimbursime fiktive miqve të tij

Partia Demokratike ka hedhur këtë të hënë përsëri akuza për korrupsion ndaj ministrit të Shëndetësisë, Ilir Beqaj.

Në një deklaratë për mediat, deputetja Albana Vokshi ka akuzuar ministrin se qindra milionë lekë për të varfërit dhe të pastrehët i kanë çuar në xhepat e miqve të tij.

“Beqaj u ka bërë rimbursime fiktive miqve të tij. 10 farmaci të këtyre miqve, me vlera më të mëdha janë përjashtuar qëllimshëm nga kontrollet. Këto farmaci u kanë vjedhur miliarda lekë shqiptarëve”, ka deklaruar Vokshi duke treguar edhe disa dokumente.

/ Top Channel

[Vinjol]

Komisioni i reformës zgjedhore, gati depozitimi i emrave të anëtarëve

Komisioni për reformën zgjedhore tashmë ka mbetur tek emrat, tha kreu i grupit parlamentar demokrat, Edi Paloka, ku bëri publik edhe emrat e opozitës për këtë komision.

“Emrat kanë mbetur për t’u paraqitur, në komision bashkëkryetar do të jetë Oerd Bylykbashi, anëtar Arben Ristani, Gent Strazimiri, Eduard Halimi dhe një anëtar i takon republikanëve”, tha Paloka.

Z. Paloka bëri të ditur pas mbledhjes se opozita do të ndjekë rrugën e duhur, duke depozituar rezolutën për medaljet në administratën e Kuvendit, ku dhe do të presë votimin.

Lidhur me reformën në drejtësi, kreu i grupit parlamentar demokrat tha se nuk pati diskutime në konferencën e kryetarëve pasi tashmë është në dorë të maxhorancës, që sipas tij duhet të zbatojë rekomandimet e Venecias.

/ Top Channel