Miliona euro shpërblime për Tatimet. Vendimi i qeverisë; taksidarët do marrin 6 paga shtesë çdo vit
Edhe pse në korrik e shkurtoi me mbi 220 milionë dollarë buxhetin për shkak të ecurisë së thellë negative në mbledhjen e të ardhurave, Qeveria ka vendosur të japë shpërblime të majme për administratën tatimore.
Një vendim i fundit i Këshillit të Ministrave i jep të drejtën Drejtorisë së Përgjithshme të Tatimeve të përdorë për deri në 2 për qind të të ardhurave vjetore që ajo mbledh, për investime të brendshme dhe shpërblime për punonjësit.
Sipas vendimit këto shpërblime do të shpërndahen nëse, brenda një periudhe 6-mujore të vitit kalendarik, pra janar-qershor ose korrik-dhjetor, administrata tatimore e tejkalon planin e të ardhurave tatimore, për të paktën 3 muaj.
“Me plotësimin e këtij kriteri, drejtori i Përgjithshëm i Tatimeve udhëzon drejtorët e drejtorive në aparatin e DPT-së dhe drejtorët rajonalë që të propozojnë listën e punonjësve që duhet të marrin shpërblim,” thuhet në vendimin e Këshillit të Ministrave të botuar në fletoren e fundit zyrtare.
Miliona euro për luks
Administrata Tatimore mbledh mesatarisht 150 miliardë lekë në vit të ardhura. Kjo do të thotë se përmes këtij vendimi, qeveria i ka dhënë të drejtën Drejtorisë së Tatimeve të përdorë për investime dhe shpërblime rreth 3 miliardë lekë ose rreth 23 milionë dollarë amerikanë në vit.
Sipas vendimit, do të jetë ministri i Financave që përmes një udhëzimi do të përcaktojë se ç’pjesë e fondit do të përdoret për investime dhe ç’pjesë për shpërblimin e tatimorëve, ndërsa ndarja e shpërblimeve do të jetë atribut i Drejtorit të Përgjithshëm të Tatimeve. Qeveria ka vendosur që të drejtën për shpërblime ta kenë vetëm tatimet, ndërsa doganat nuk do të përfitojnë nga ky shpërblim.
Nga ana tjetër vendimi për shpërblimet vjen në një kohë kur qeveria në korrik u detyrua të ulte me 22.3 miliardë lekë planin e të ardhurave nga tatimet dhe doganat për shkak të ecurisë së dobët në mbledhjen e tyre, gjatë gjysmës së parë të vitit.
Syri
Krijoni Kontakt