Korrupsioni: PD: "Ja si Edi Rama e Artan Lame po vjedhin miliona me ALUIZNI"

[Albo]

Jamarbër Malltezi denoncon Artan Lamen se "nuk po vjedh as me lezet..."

Më poshtë lexoni të plotë deklaratën e kreut të Deparatamentit të Turizmit dhe Mjedisit në PD, Jamarbër Malltezi.

Tanimë nuk po mbajnë as premtimin për të vjedhur me lezet. Njoftojmë Prokurorinë se një akt vjedhje shumë i rëndë prej qindra milionësh po ndodh këto ditë në zyrat e ALUIZNI-t.

Rama dhe Lamja po organizojnë një vjedhje ashiqare miliona eurosh duke dhënë para për kinse konsulenca për të dhëna që ekzistojnë në serverat e ALUIZNI-t prej shumë vitesh. Po shpallin tendera me objekti i prokurimit: “Evidentimi faktik në terren i ndërtimeve pa leje…”

ALUIZNI i kish kryer matjet në terren për thuajse të gjithë objektet që ishin në proces legalizimi qysh para 2013 dhe këto të dhëna gjenden në serverat e ALUIZNI-t. Sikur të mos mjaftonte kjo, në intervistat në dy vitet e fundit Rama-Lamja janë vetëmburrur se kanë bërë gjithë matjet me një shpejtësi të madhe.

Kështu, me 4 korrik 2014 z. Lame deklaroi në gazetën e partisë së tij se në 4 muaj kishin kryer 20,400 matje në terren.

9 muaj më pas, me 28 Mars 2015, z. Lame deklaroi për fletushkën e Koços se (Citoj):

ALUIZNI ka “40 grupe pune, rreth 100 specialistë, që punojnë në terren vetëm në qytetin e Tiranës me matjet e ndërtimeve informale të vetëdeklaruara”

Por nga vetëmburrjet e para pak muajve, tani po shohim sesi Rama-Lamja po shkojnë tek ndarja e miliona eurove mes tyre për punë që ekzistojnë.

Buletini nr. 33 datë 24 Gusht 2015 i Agjensisë së Prokurimeve Publike:

Shpallet tenderi “Shërbimi i evidentimit faktik të ndertimeve pa leje në Durrës”

500 milionë lekë pa TVSH ose 650 milionë lekë me TVSH për një punë 80 ditore.

Buletini nr 39, date 5 Tetor 2015 i APP njofton për fituesin e tenderit dhe se në Shtator 2015 është lidhur kontrata me kompanine private.

Tender konsulence për 600,000 USD që kryet për 2 javë?! Në Gusht shpallet tenderi dhe në Shtator është lidhur kontrata prej 600,000 dollarësh?!

Kush specialist prokurimesh garanton pastërtinë e këtij procesi? Pyesni një specialist prokurimesh të Bankës Boterore dhe ju tregon ai/ajo se çfarë do të thotë dhe sa procedura ka për një tender të tillë prej 600,000 dollarësh për konsulencë.
Ku qenkan kompanitë e konsulencës që paskan mbi 200 punonjës të trainuar dhe me experiencë që të tejkalojnë ritmet e ALUIZNI-t që kish mbi 100 punonjës në terren vetëm në Tiranë?
Kush kompani konsulence paguhet 8,000 dollarë në ditë? 8,000 dollarë/dita nuk e kanë as studiot më të mëdha urbanistike të Europës, por mos vallë Shqipëria e Ramës është më të pasur se Europa?!
Pse duhen bërë këto matje nga firma private, kur ALUIZNI e ka strukturën të ngritur prej vitesh, me qindra punonjës me eksperiencë?
Kjo është një aferë kuterbuese që e paditen vetë nëpunësit seriozë të ALUIZNI-t pasi nuk pranojnë të jenë pjesë e kësaj vjedhjeje.

Kërkohet urgjentisht ndërhyrja e prokurorisë për të shpëtuar paratë publike. Kjo pasi Rama-Lamja edhe javën e shkuar që Shqipëria ishte e përmbytur vijuan lojën e përlarjes së parave dhe kanë përmbyllur tendera të tjerë qindra milionësh edhe për shumë qytete të tjera të vendit apo për zona të Tiranës. 0 lekë për dëmin nga përmbytjet që ju shkaktuan banorëve të Vlorës dhe Fierit, ndërsa përlahen miliona euro për punë të kryera prej vitesh.

Qeveria në turravrapin të vjedhë ç’të mundet nuk po pyet me as për premtimin e saj solemn për të vjedhur me lezet. Nuk besoj të ketë as socialist të ndershëm që t’i quajë “me lezet” vjedhjet 600 miliona eurosh me CEZ, koncesionet miliona euroshe në shëndetësi, vjedhjet 150 milionë eurosh në dogana dhe tatime, apo vjedhjen miliona euroshe përmes ALUIZNI-t. Shqiptarët nuk meritojnë këtë qeveri hajdutë.

Koha Jone

[Albo]

Legalizimi/ 45 mijë dosje të paplota, Lame: Procedurat nisin nga e para, falas!

E premte, 04 Korrik 2014 20:27

Kyetari i Agjencisë së Legalizimit dhe Urbanizimit e Integrimit të Zonave Ndërtimeve Informale (ALUIZNI), Artan Lame, deklaroi se janë 45 mijë dosje të mbartura nga vitet e e tjera, për të cilat nuk mund të emetohet leja e legalizimit pasi në të cilat rezultojnë vetëm faturat dhe asnjë domumentacion e matje në terren.

Në një konferencë për shtyp, kreu i ALUIZNI-t, Lame theksoi se “dosjet janë të paplota, pasi kanë vetëm faturat që kanë paguar qytetarët dhe asnjë dokument tjetër, sepse nuk u është bërë asnjë veprim tjetër qytetarëve dhe kjo krijon reagim nga qytetarët e tjerë, të cilët thonë se ne kemi paguar pse nuk mbarojmë punë. Qytetarëve u janë mbledhur paratë dhe nuk u është bërë asnjë lloj shërbimi”.

Lame i bëri thirrje qyetarëve që kanë një dosje të tillë të paraqiten pranë zyrave të ALUIZNI-t dhe do u ribëhen matjet pa paguar asnjë gjë shtesë. “Këto dosje do të fillojnë nga fillimi. Mungesa totale e përgjegjshmërisë së qeverisë së shkuar sidomos në 2013, kur u thuhej paguani faturat për letrat. Shohim e bëjmë na kanë vënë në këtë situatë. U bëjmë thirrje qytetarëve të vijnë dhe ta pranojnë këtë situatë. Do bëhen matjet, sepse nuk ka asnjë letër”, nënvizoi Lame. Kreu i ALUIZNI-t u shpreh se “hyri në fuqi ligji i ri i legalizimeve, por hyri në fuqi në mënyrë të heshtur, pasi Presidenti i Republikës nuk e dekretoi duke mbetur mes dilemës të dekretonte këtë ligj që e prisnin me qindra mijëra qytetarë për efektet që do të jepte apo t’i bindej urdhrit të zotit Berisha për të sabotuar deri në fund procesin e legalizimeve”.

Këto ditë, vijoi Lame, në sportelet tona në gjitha qytetet e vendit dhe të gjitha qarqet e vendit po përballojnë një fluks të paimagjinueshëm qytetarësh, të cilët kërkojnë të ndjekin mbarëvajtjen e dosjeve të tyre, apo të aplikojnë për legalizimin e banesave.

“Duke patur parasysh edhe këtë javën që kaloi qeveria miratoi një shtesë tjetër personeli për të gjitha drejtoritë rajonale të ALUZINI-t në të gjithë territorin për ta çuar më tej shërbimin ndaj qytetarëve. Ndaj përfitoj për t’i bërë thirrje qytetarëve që të presin ekipet e ALUIZNI-t, të cilët do të trokasin derë më derë në shtëpitë dhe zonat informale”, tha Lame duke shtuar se drejtorirë rajonale të ALUIZNI-t në të gjithë vendin tashmë kanë marrë edhe formularin mbi bazën e të cilit do të mirëpriten edhe kërkesat e qytetarëve për të aplikuar në zonat informale.

Drafti i ri

Sipas tij, mbi bazën e këtij formulari ka filluar dhe do të vazhdojë edhe në vijim të bëhen aplikimet edhe për ato objekte, të cilat përfitojnë rishtazi nga ndryshimet dhe përfshirjet e kategorive te tjera në ligjin e legalizimeve, kategori të cilat ishin jashtë deri më sot pa përfituar. “Në qeveri është dërguar projekt vendimi mbi bazën e të cilit do të përcaktohen çmimet për të cilat duhet të paguhet parcela ndërtimore, aty ku qytetarët duhet ta paguajnë dhe siç e kemi thënë aty ku trualli është i tyre qyetarët nuk do të paguajnë asgjë”, sqaroi Lame. Ai shtoi se në këtë projekt vendim që është çuar në qeveri janë përcaktuar të gjitha përfitimet, procedurat, zbritjet e kategoritë që përfitojnë nga ligji i ri i legalizimeve, procedura dhe përfitime të cilat për fat të keq edhe këto u përfolën shumë gjatë diskutimeve në Kuvend që gjoja do të ishin mashtrime të qeverisë. “Pas disa ditësh edhe ky vendim do të hyjë në fuqi. Miratimi i këtij vendimi do të bëjë të mundur pastaj përllogaritjen e faturave të truallit sipas çmimeve të reja dhe pagesën e tyre nga qytetarët”, u shpreh Lame.

Kreu i ALUIZNI-t tha se “pas riorganizimit të ALUIZNI-t procesi i ndarjes së ekipeve tona në terren riflloi në 1 mars të këtij viti , gajtë kësaj periudhe katër mujore ekipet tona në terren kanë azhornuar 20 400 objeket dhe kanë përgatitur dokumentacionin e plotë për 17 mijë prej tyre.Kujtoj që PD-së iu deshën 8 vjet për të dhenë 21 800 leje legalizimi. Kjo është ajio që kemi bërë ne në katër muaj, 20 400 objekte të matura në terren. Të gjithë këta qytetarë presin miratimin e kësaj VKM për çmimet e truallit dhe për përllogaritjet e zbritjeve nga të cilat përfitojnë për të përfunduar pastaj gjithë procesin e legalizimit”.

Në të njëtën kohë, shtoi Lame, nga drejtorirë e ALUZINI-t në qarqe po punohet në terren edhe për dendësinë e shtrirjes në terren të zonave informale dhe për të çuar propozimet e reja për zonat e tjera informale apo për ndryshimet e kufijve të zonave informale ekzistuese në të gjithë vendin . “Deri tani janë propozuar nga qarqet 84 zona informale te tjera dhe është një proces që do të vazhojë duke u finalizuar në Këshillin Kombëtar të Territorit ku do të bëhet edhe miratimi i tyre”, tha Lame.

Kreu i ALUIZNI-t u kërkoi qytetarëve që të mos bien pre e spekulantëve. Ai theksoi që çdo qytetar t’u kërkojë personave që u paraqiten në shtëpi kartën e ALUIZNI-t. “Mos bini pre e lloj, lloj spekulantësh. Mos pranoni persona që kundrejt pagesës mund t’u përshpejtojnë procedurat. Kërkojuni personave që u vinë te shtëpia kartën e ALUIZNI-t”.

Zeri i Popullit
http://www.zeri-popullit.com/index.p...sta&Itemid=128

[Albo]

Lame: Zgjidhje për 14 mijë ndërtime informale të penalizuara

Skedarët e Bashkëngjitur 169014

Drejtori i Përgjithshëm i ALUIZNI-t, Artan Lame, ishte sot pranë disa zyrave të ALUIZNI-t për të ndjekur nga afër punën në terren të grupeve të punës që bëjnë matjet shtëpi më shtëpi. Lame u ndal fillimisht në zonën e Ali Demit, ku mori pjesë në matjet që grupet e punës së specialistëve të ALUIZNI-t po bënin në ndërtimet informale në këtë zonë. Më pas Lame u ndal në zyrën e ALUIZNI-t në Bathore ku sqaroi për mediet hartën e zonave informale në Tiranë dhe se si ALUIZNI po punon për ta çuar procesin e legalizimeve përpara.

Drejtori i Përgjithshëm i ALUIZNI-t bëri të ditur se “pritet t’u jepet zgjidhje rreth 14 mijë ndërtimeve pa leje të penalizuara nga parashikimet absurde të Planeve Urbanistike të Bashkisë Tiranë dhe Bashkisë Kamëz”.

ALUIZNI ka 40 grupe pune, rreth 100 specialistë, që punojnë në terren vetëm në qytetin e Tiranës me matjet e ndërtimeve informale të vetëdeklaruara. Këto grupe pune po shfrytëzojnë edhe fundjavat për të bërë matje masive. Tirana është një nga qytetet me numrin më të madh të ndërtimeve informale me rreth 45 mijë vetëdeklarime.

Shekulli
http://www.shekulli.com.al/p.php?id=234511

[Albo]

PD akuzon Lamen për tendera, ALUIZN-i: Ishte tender për shërbime, jo konsulencë



Kreu i ALUIZNI-t Artan Lame është vënë sërish në shënjestër të akuzave selia blu për afera me tenderat për matjet e bëra.
Në një deklaratë për mediat deputeti Gent Strazimiri tha se kriteret e tenderit ishin vendosur në mënyrë që të paracaktohej fituesi.
Gent Strazimiri: Lamja që nuk linte vend pa dhënë mendimin e tij të vyer, nga kangjellat e Presidences e deri tek pllaka ne kalanë e Lezhes, ka disa ditë që ka humbur! Për 1.5 milionë dollarët në fjalë …nuk ka mendim…
ALUIZN-i nga ana tjetër ka hedhur poshtë akuzat e PD me pretendimin se tenderi i të cilit i referohet selia blu nuk është për konsulencë.
“Vazhdojnë t’i bien të njëjtës teneqeje me tre pyetje resht duke thënë tender me konsulencë. Ndërsa në fakt është tender për shërbime. Evidentim, matje në terren, plotësimi i dosjes së subjektit. Mjaft që zoti Strazimiri ti referohet ligjit të prokurimit publik për të bërë dallimin mes shërbimit në terren dhe konsulencës nëpër botë.” thuhet ne reagimin e ALUIZN-it.
Procedurat e prokurimeve si dhe matjet në terren janë bërë ditën e fundit objekt debati mes ALUIZN-it dhe PD, e cila e ka cuar këtë cështje edhe në Prokurori.
Demokratët kanë dorëzuar një dosje që sipas tyre vërteton se një nga drejtoreshat e ALUIZN-it i ka dhënë tenderin 65 mln lekë bashkëshortit të saj.

ORA NEWS