Mediat britanike: Gruaja e Toni Blair u pagua 493 mijë sterlina nga qeveria Rama

[Albo]

Mediat britanike: Skandali me Shqipërinë, bashkëshortja e Toni Blair merr 493 mijë sterlina nga qeveria



Firma ligjore “Omnia Strategy” në pronësi të bashkëshortes së ish-kryeministrit britanik Toni Blair përfitoi në total 493 mijë sterlina nga qeveria e Shqipërisë.

Lajmit i është dhënë jehonë e madhe edhe nga mediat e Britanisë së Madhe ndërsa “Daily Mail” shkruan se kjo kompani përfiton këtë shumë për të shërbyer si këshilltare e Shqipërisë në mosmarrëveshje ligjore me kompaninë britanike për skanime në dogana.

Kontrata fillestare e “Cherie Blair” ishte 378.000 sterlina ndërsa më vonë asaj ju shtuan edhe 115.000 sterlina të tjera.

Mediat britanike raportojnë se dhënia e kësaj kontrate është një aferë e madhe pasi Tony Blair ka shërbyer si këshilltar i kryeministrit të Shqipërisë, Edi Rama.

Gjatë vitit 2014 qeveria Rama angazhoi “Omnia Strategy” për të zgjidhur çështjen ligjore me firmën “Rapiscan”, me qendër në Redhill, Surrey.

“S2 Albania” së bashku me “Rapiscan” përfituan një kontratë 15-vjeçare me vlerë 250 milionë sterlina për sistemin e sigurisë që do të instalohet në kufijtë e Shqipërisë.

“Daily Mail” shkruan se kjo marrëveshje është zgjidhur vetëm një muaj pas zgjedhjeve të qershorit në viti 2013 në Shqipëri.

“Rapiscan” dhe “S2 Albania” paditën qeverinë shqiptare dhe kjo çështje shkoi deri në Dhomën Ndërkombëtare të Tregtisë në Vjenë.

Ndërsa me ndihmën e firmës “Omnia” qeveria e Shqipërisë në prill të vitit 2015 zgjidhi këtë çështje ligjore.

Syri