Rrëzohet një helikopter me drogë në Spanjë, piloti një Major i Ushtrisë Shqiptare

[Albo]

Një helikopter që transportonte drogë është rrëzuar në Spanjë. Mësohet se helikopteri drejtohej nga një major i forcave ushtarake shqiptare, Sokol Feka, dhe transportonte drogë nga Maroku drejt Spanjës.

Lajmi është konfirmuar nga Kryeministri Edi Rama, gjatë seancës së sotme në Kuvendit. Ai tha se njoftimi i palës shqiptare është bërë nga Ministria e Jashtme Spanjolle, e cila ka njoftuar Ministrinë e Jashtme Shqiptare. Kryeministri tha se Majori, punonte prej 18 vjetësh në Forcat e Armatosura Shqiptare. Ai është graduar Major në vitin 2009.



"Majori që drejtonte helikopterin e nisur nga Maroku, ishte pjesëtar i Forcave të Armatosuradhe ishte graduar në vitin 2009", u shpreh Rama.

Ndërkohë mediat spanjolle e kanë raportuar së fundmi këtë ngjarje, duke saktësuar se në bordin e helikopterit ndodheshin dy persona, të cilët transportonin rreth 1 tonë hashash. Po sipas mediave spanjolle të dy personat në bord kanë vdekur. Majori Feka mësohet se ka qenë në Spanjë për arsye personale dhe jo me shërbim.

Helikopteri i ngarkuar me drogë është përplasur me një shtyllë tensioni në Cortes de la Frontera të Malagës. Ngjarja ka ndodhur në të gdhirë të ditës së martë, sipas gazetave ‘Diario Sur’ dhe ‘Malaga Hoy’.
Helikopteri ishte lyer me të zezë, gjë që bëhet për të mos u pikasur gjatë fluturimit natën.

Koha Jone

[Albo]

Rrëzimi i helikopterit, Basha: U njollos emri i Shqipërisë

Kryetari i Partisë Demokratike, Lulzim Basha, reagoi pas lajmit se një helikopter me një pilot të Forcave të Armatosura, u rrëzua duke transportuar hashash në Spanjë.

“Perfshirja e efektivit te FA ne trafikun nderkombetar te droges ashtu si avionet e droges nje vit me pare ne aeroportin ushtarak te Gjadrit, njollosin rende emrin e Ministrise se Mbrojtjes dhe te Shqiperise ne arenen nderkombetar.

Paaftesia per te zbuluar trafikun ne zemer te vendit dhe te institucioneve tradhton syshkeljen qeveritare ndaj narkotrafikut. Keto fakte dhe pasioni per emerimin e boseve te krimit dhe droges ne parlament, qeveri dhe administrate publike jane kembanat e perballjes me kriminalizimin e shtetit shqiptar.

Kjo eshte fytyra e te keqes, qe te gjithe se bashku duhet ta shkulim me rrenje,” shkruan Basha në FB.

Koha Jone

[Albo]

MINISTRIA E MBROJTJES: SOKOL FEKA, INSTRUKTOR NË BAZËN AJRORE FARKË. ISHTE ME LEJE JO NE DETYRE



Ministria e Mbrojtjes është informuar në rrugë zyrtare nga Ministria e Punëve të Jashtme të Republikës së Shqipërisë se një ngjarje e pakëndshme ka ndodhur gjatë ditës së djeshme në Spanjë. Guardia civile Spanjolle njoftoi se është rrëzuar një mjet fluturues akoma i paidentifikuar, i dyshuar se po merrej me aktivitet të paligjshëm. Nga verifikimet paraprake, helikopteri udhëtonte nga Maroku në Spanjë.

Si pasojë e rrëzimit të avionit piloti ka rezultuar i vdekur. Bazuar në dokumentet e gjetur mendohet se ky person të jetë shtetasi shqiptar Sokol Feka major, me detyrë instruktor në bazën ajrore të Farkës. Ministra Mbrojtjes është duke bërë verifikimet nëse dokumentet e gjetura përkojnë me shtetasin në fjalë.

Major Feka është pjesë e Forcave të Armatosura prej 18 vitesh dhe mban gradën major që nga viti 2009. Me informacionin që Ministria e Mbrojtjes disponon, shtetasi Feka ka marrë lejen e zakonshme për periudhën 12- 31 janar 2015, por nuk ka aplikuar për leje për të dalë jashtë vendit, duke shkelur rregullat e parashikuara në ligjin për Statusin e ushtarakut në Republikën e Shqipërisë. Përmes një shkresë zyrtare, Ministria e Mbrojtjes i ka kërkuar verifikimin urgjent të lëvizjeve të shtetasit Feka, Ministrisë së Brendshme dhe Drejtorisë së Përgjithshme të Policisë Shtetit.

Balkanweb

[Albo]

Topalli: FA e përfshirë në trafik, ministrja të dorëhiqet. Kodheli: Dhëndri yt bënte videoklipe me mjetet e Forcave Detare

TIRANE- Deputetja e PD-së, Jozefina Topalli ka deklaruar sot në sallën e Kuvendit se përfshirja e një majori të Forcave të Armatosura Shqiptare në trafik droge është një alarm për të cilin ministrja e Mbrojtjes, Mimi Kodheli duhet të japë dorëheqjen.
“Majori mori leje nga Ministria e Mbrojtjes, çfarë prisni që Mimi Kodheli të japë dorëheqjen kur ushtria përfshihet në trafik droge. Këta të gjithë janë fshehur si lepuj, por unë them që kjo është emergjencë ndërkombëtare. Nëse s’ju bën përshtypje ju qofshi, por po e çoni vendin drejt greminës”-deklaroi Topalli.

KODHELI: DHËNDRI I TOPALLIT BËNTE VIDEOKLIPE ME MJETET E FLOTËS

Në përgjigje të akuzave të deputetes Topalli, Ministrja e Mbrojtjes, Mimi Kodheli theksoi se prej shtatorit të vitit 2013 askush nuk mund të abuzojë me Forcat e Armatosura. Sipas Kodhelit, gjatë qeverisjes së të djathtëve, dhëndri këngëtar i zonjës Topalli shëtiste dhe bënte videoklipe me mjetet e Flotës Detare.

“Në datën 15-16 shtator të vitit 2013 kur unë kam hyrë në zyrën e Ministrisë së Mbrojtjes është ngritur një përfaqësues i lartë i forcave detare që ka thënë, zonjë s’kemi asnjë litër naftë për të patrulluar detin. E dini pse mungonte nafta zotërinj, përveçse abuzohej me të, sepse dhëndri i zonjës dhe dhëndurët shëtisnin me mjetet e flotës, bënin videoklipe.”- deklaroi Kodheli.

TOPALLI-KODHELIT: A KANË FLUTURUAR HELIKOPTERË USHTARAK NË KAKAVIJË?

Më pas ministrja Kodheli është larguar nga salla, teksa deputetja Topalli ka drejtuar disa pyetje lidhur me fluturimin e helikopterëve ushtarakë në pikën e kalimit kufitar të Kakavijës.
“A kanë fluturuar helikopterë ushtarak në Kakavijë dhe Gjirokastër të hënën dhe të martën që kaloi? Kush janë pilotët, kush janë këta helikopterë? Pse ikën kryeministri, ministrja, pse jeni fshehur të gjithë? Të kthehet menjëherë ministrja që avulloi dhe t’i përgjigjet menjëherë pyetjes që sapo ju bë?- deklaroi Topalli.

(ma.ar/er.nu/BalkanWeb)

[Albo]

Deklarata e plotë e Kryeministrit Edi Rama:

“E mora fjalën se para pak minutash Ministria e Jashtmje është njoftuar për një ngjarjen të rëndë në Spanjë, ku strukturat e gardës civile spanjolle kanë rrëzuar një helikopter që transportonte drogë nga Maroku drejt Spanjës dhe piloti i helikopterit është një Major i Forcave të Armatosura të Republikës së Shqipërisë”. Ky major është në strukturat e Forcave të Armatosura prej 18 vitesh. Një ndër pilotët më të besuar. Çfarë sensi ka që ne t’i hyjmë një grindjeje a është majori juaj apo i yni? Duke marrë shkas nga kjo kam një pyetje shumë të thjeshtë. Ky Major është në strukturat e FA prej 18 vitesh, gradën e Majorit e ka marrë në 2009 dhe është një nga pilotët më të besuar të FA. Tani çfarë sensi ka që ne ti hyjmë një grindje a është Majori juaj, a është Majori ynë? Dhe këtë pyetje e bëj për të shkuar pak më tutje lidhur me diskutimin absurd që u zhvillua këtu dhe me përpjekjen absurde për të mohuar një avancim serioz të vendosur dhe të gjithëpranuar botërisht të Shqipërisë në një luftë të paepur të shtetit me krimin dhe posaçërisht me drogën.Sigurisht që të gjitha qeveritë edhe qeveria paraardhëse mund të rendisin rezultatet e tyre. Dhe sigurisht që lufta me krimin dhe lufta me drogën nuk ka filluar në 23 qershor të 2013, por e ka shoqëruar rrugën e përpjekjes së shtetit prej vitesh. Ama është e paimagjinueshme që të mund të vihet në diskutim se me votën e 1 milion shqiptarëve dhe me krijimin e qeverisë së Alencës për Shqipërinë Europiane beteja me krimin dhe drogën ka hyrë në një fazë të panjohur më parë.”

Balkanweb

[Albo]

Berisha: Majori cau ferrën dhe tregti ndërkombëtare droge. Kodheli: Je dekompozim i politikës. Piloti doli pa leje, theu disiplinën

TIRANË-Lidhur me ngjarjen në Spanjë, deputeti Sali Berisha deklaroi se, një major cau ferrën dhe bëri tregti ndërkombëtare droge duke i shpëtuar rregullave ushtarake.
“Kur e deklaruam se bazat ushtarake u bënë baza të transportit të drogës, çfarë nuk thanë këtu Gjeneral Trafiku dhe ndrikulla e Ministrisë së Mbrojtjes. Tani del një major, që i shpëtoi shoshitjes së këtyre dhe çan ferrën, majori i Gjeneral Trafikut dhe bën tregti ndërkombëtare”, u shpreh Berisha nga parlamenti.

KODHELI

Ministrja e Mbrojtjes Mimi Kodheli, replikoi menjëhërë me Berishën: “Nuk kam ndërmend të flas këtu për dikë që është në dekompozim politik, ndërsa po të tregoj këtu se çfarë thoshte DASH për atë që kishin bërë me ushtrinë, do t’i vinte turp çdo shqiptari. Vijmë tek Majori. Majori ka dalë pa leje nga Shqipëria. ka qënë me leje të zakonshme dhe për leje të zakonshme dhe ka dalë nga Shqipëria pa leje. Ju siguroj se të gjithë ushatrakët e larguar nga FA të mbrojtur nga kypodium ju siguroj se më së shumti kanë dalë se kanë jashtë shtetit pa leje. Të tjerat pastaj do të dalin nga investigimi spanjoll. Edhe ushtarakët janë njerëz që mund të gabojnë sikurse mund të ketë gabuar edhe ky zotëria. Por të denigrojnë ushtrinë, atë që e kishin mbytur ushtrinë me korrupsion, është ofensivë kundër FA. Ndaj të mateni para se të dilni këtu e të flisni”, u shpreh Kodheli.

(d.b/ar.sh/BalkanWeb)

[SERAFIM DILO]

Ndonje dekorate nuk ka ministria,apo duhet pritur 29 nentori.

[Albo]

Jeta e Majorit Sokol Feka, si u bë pilot



Majori Sokol Feka, 41 vjeç ka lindur në Kuçovë dhe prej vitesh është pjesë e Forcave të Armatosura të Republikës së Shqipërisë.

Piloti Feka ishte pjesë e Forcave të Armatosura prej 18 vitesh.

Mësohet se ai ka qenë ushtar pranë Shkollës së Aviacionit dhe më pas ka filluar studimet për pilot.

Ishte në mesin e pilotëve më të mirë që kishin Forcat e Armatosura, pasi ishte trajnuar disa vite në vende të ndryshme në kuadër të Ushtrisë, ku kohët e fundit kryente detyrën e instruktorit për piltotët e rinjë në repartin e Helikopterëve në Farkë.

CV-ja e pilotit Feka është mjaft e pasur në lidhje me trajnimet e kryera, në drejtim të cilit rezulton se kanë investuar edhe Forcat e Armatosura.

Nga të dhënat e MInistrisë së Mbrojtjes, mësohet se Feka ka kryer me sukses të lartë trajnimin disa mujor në Itali për helikopterët.

Më pas bashkë me 12 pilotë të tjerë të Ushtrisë ka qenë në trajnim në Mbretërinë e Bashkuar ku janë trajnuar për të fluturuar me instrumenta.

Pas këtij trajnimi disa mujor, Sokol Feka ishte në mesin e pilotëve të trajnuar në Francë për helikopterët e rinj, COUGAR ku është stërvitur për të pilotuar ato në kohë të ndryshme.

Ndërsa në vitin 2009 është graduar me gradën Major dhe kryente detyrën e instruktorit.

Feka baba i 3 fëmijëve:

Përveç trajnimeve brenda dhe jashtë vendit, mësohet se piloti Sokol Feka ishte i martuar dy herë, ku me bashkëshorten e parë ka dy fëmijë dhe me të dytën një.

Pas orarit zyrtar të punës pranë repartit të Helikopterëve, Feka kishte një kompani private që merrej me pastrim.

Sipas këtyre burimeve, kompania e pilotit Feka bënte pastrimin e disa kazinove dhe lojrave të fatit në Tiranë prej vitesh, ku siç duket gjatë këtij aktiviteti mund të jetë njohur me persona që kryejnë aktivitete të paligjshme, të cilët e kanë angazhuar në misionin e tranportit të lëndës narkotike, ku edhe gjeti vdekjen.

Koha Jone

[Albo]

Rrëzimi i helikopterit, Shefi i Shtabit Bazo: Majori iku pa leje jashtë vendit

Shefi i Shtabit të Përgjithshëm të Ushtrisë, Jeronim Bazo, ka reaguar përmes një deklarate për shtyp pas publikimit të lajmit se një helikopter me 1 ton drogë, që drejtohej nga majori shqiptar Sokol Feka është rrëzuar në Spanjë.

Bazo ka bërë një kronologji të shkurtër të majorit të ndjerë që në fillimet e tij në Forcat e Armatosura Shqiptare. “I është bashkuar ushtrisë shqiptare që në vitin 1993 kur ka qenë student dhe pas përfundimit të shkollës, ai kreu trajnimet e nevojshme për t’u specializuar në fushën e pilotimit. Pas diplomimit, ai ka kryer detyrat e pilotit dhe të instruktorit të pilotimit, – ka vazhduar Baze. – Në këto detyra, ai ka rezultuar me performancë të mirë”.

Bazo më pas ka sqaruar se majori Feka ka qenë me leje të zakonshme dhe se nuk ka njoftuar në FA për largimin e tij jashtë shtetit siç e kërkon edhe ligji ushtarak.

“Komanda e Farkës ka miratuar lejen e tij nga 12 janari, deri më 31 janar, por në asnjë rast ai nuk ka kërkuar ta kryejë lejen jashtë vendit, – vazhdoi Baze. – Bazuar edhe në informacionet e agjencive të huaja, del se ai është larguar jashtë vendit pa marrë leje, duke u marrë me veprimtari të paligjshme. Për më shumë, ne po mbajmë kontakte me autoritetet spanjolle”, – përfundoi Shefi i Shtabit të Përgjithshëm.

Shqip

[Albo]

Enigmat mbi pilotin e drogës, si u rekrutua Sokol Feka?



Shumë enigma pritet të zbardhen pas rrëzimit të helikopterit me drogë në Spanjë dhe me në bord një
ushtarak shqiptar, shkruan sot Top Channel. E para ka lidhje me Shërbimin Informativ Ushtarak dhe Policinë Ushtarake. A e kanë bërë detyrën e tyre si duhet këto dy strukura tepër të rëndësishme në Forcat e Armatosura, të cilat janë përgjegjëse mes të tjerash edhe për kontrollin dhe lëvizjet
e ushtarakëve, përfshirë këtu edhe pilotin e repartit të Farkës, Sokol Feka?
Pavarësisht se piloti kishte marrë lejen e zakonshme dhe pas ngjarjes deklarohet se ai kishte ikur pa leje jashtë Shqipërisë, cili organ duhet të kontrollonte daljet e tij, apo ushtarakëve të tjerë nga Shqipëria pa leje? Policia e Shtetit thotë se nga kontrolli paraprak i sistemit Tims del që piloti ka dalë jashtë vendit më datë 20 janar, ndërkohë që Sokol Feka aktivizohet edhe në llogarinë e tij në rrjetin social Facebook më datë 27 janar, kur edhe ka ndryshuar foton e tij të profilit.
Disa nga të njohurit komentojnë shumë për lëvizjet e tij të shpeshta jashtë vendit, por ende nuk ka një version përfundimtar se sa herë piloti ka udhëtuar jashtë Shqipërisë. E mbi të gjitha, një pyetje që pritet të zbardhet nga pala shqiptare është se, përveçse një ushtarak i dekoruar pesë
herë me Dekoratë Karriere dhe Shërbimi, kush janë lidhjet e panjohura të pilotit me një histori 18­vjeçare në detyrë?
Si është rekrutuar ai? A është kjo hera e parë që ai transportonte drogë me helikopter?
Sokol Feka, pohojnë shokët e tij, njihej si një tip i shkathët, kishte dështuar në martesën e pare dhe ishte në një tjetër lidhje. Pavarësisht se kishte në pronësi edhe një firmë të vogël private, ai vazhdonte të jetonte me qera në një zonë periferike të kryeqytetit. Edhe pse ndoshta duhet të kishte nisur vetë hetimet, duke marrë shkas nga ngjarja, Prokuroria shqiptare thotë se po pret çfarë do t’i kërkohet nga autoritetet spanjolle. Burime nga prokuroria thonë se nuk ka ende një kërkesë nga autoritetet spanjolle për të mësuar të kaluarën e Sokol Fekës, ose lidhjet e tij, në mënyrë që të zbardhet edhe pyetja më e madhe: kujt i shërbente Sokol Feka? Kush është njeriu që e punësoi atë si pilot të helikopterit me gati 800 kg kanabis?

(ma.ar/BalkanWeb)