Prokuroria: Ngjarja e Doshit e sajuar. Te arrestohen deputetët Doshi e Frroku

[par]

E vërteta e atentatit ndaj Tomë Doshit

Tom Doshin e “vranë” në 24 qershor 2013, të nesërmen e ditës së zgjedhjeve, që i dhanë pushtetin partisë që ai mendonte se ishte e tija. Thellë-thellë Tomës në mendjen e tij që atë ditë iu krijua përshtypja se sytë e “shokëve”, të cilët deri atëherë e shikonin me miqësi të shtirur, befas nisën t’ u ngjajnë tytave të armëve. Të shikoje ata sy, ishte njëjtë si të shikoje në thellësi të grykës së një arme. Kur shikimi i Tomës u ndesh me atë të Edi Ramës, sytë e këtij të fundit, sikur deshën t’ i thonë: “Pse je ende gjallë o njeri? Ti duhet të kishe vdekur në 21 janar 2011, në trotuarin përpara ndërtesës së Kryeministrisë. Unë prandaj të çova atje që të bëje kinse se po e përmbaje turmën. Unë shpresoja që të të vrisnin ty dhe pastaj me trupin tënd mbi supe malësorët që kishe sjellë ti në Tiranë, të hynin brenda në ndërtesë për të kapur Sali Berishën, i cili për të shpëtuar duhet të bënte një mal me kufoma, siç kisha parashikuar unë një ditë më parë, në Top Story të Sokol Ballës. Më zhgënjeve Tomë që nuk u vrave atë ditë. Unë e bëra Megi Ajtyresën zëdhënëse të partisë, dhe e udhëzova që të fliste në gegërishte shkodranishte të theksuar, që të ishte ajo që do ta njoftonte vdekjen tënde se kështu do të përjetohej më fuqishëm në Veri. Ndoshta ti e kuptove se nuk u riktheve te muri rrethues i Kryeministrisë, si Besnik Bare. Nëse ti Tomë do të ishe vrarë atë ditë, unë do të kisha eliminuar Berishën dhe Metën dhe sot fitorja jonë do të ishte krejt e ndryshme, jo e helmuar si kjo e 23 qershorit, rezultati i së cilës na mban peng të LSI-së.”
Kodet e komunikimit që veprojnë në Partinë Socialiste që nga origjina e saj në 8 nëntor 1941, bënë që të gjithë në parti ta kuptojnë që në 24 qershor se midis kryetarit dhe Tomës diçka e pariparueshme ishte thyer. Kështu që Toma u gjend befasisht para një skuadre “pushkatimi” të përbërë nga shokët e deridjeshëm. E vranë me shikime ma zi se plumbi. Toma, burri i fortë malësor katolik, verior, u duhej në Partinë Socialiste sa kohë që Sali Berisha ishte në pushtet. Tashmë që Berisha kishte humbur pushtetin, Toma nuk u duhej më. Nuk kishte vend për Tomën në PS-në në pushtet. Te shikimet e “shokëve” kishte ndryshuar diçka. Këta shikime ishin si smoking guns plumbat e të cilave kishin qëlluar trupin e Tomës. Ata e qëlluan të gjithë Edi Rama, Saimir Tahiri, Gramoz Ruçi, Elisa Spiropali, Erion Veliaj, Dash Peza. Ilir Meta qeshte. Toma i ndjeu “plumbat” e shokëve një nga një në trup. Tashmë për Partinë Socialiste, për kryetarin e saj, Tomë Doshi që kishte ekzistuar deri në 23 qershor kishte vdekur. Nëse ai do ta pranonte këtë shndërrim të tij, dhe do të përshtatej me gjendjen e re, aq më mirë. Nëse jo, aq më keq për të. Pra Tomës i kërkuan që të jetonte politikisht si zombie.
Ashtu si ata personazhet e filmave horror të cilët mendojnë se janë ende gjallë pasi i kanë qëlluar për vdekje, edhe Toma mendoi se vazhdonte të ishte ende gjallë politikisht ai Toma që kishte qenë, politikani më i fuqishëm socialist i Veriut. Duke menduar se vazhdonte të ishte ende gjallë politikisht ai i fliste Kryeministrit Rama, ministrave socialistë me autoritetin e Tomës së dikurshëm. Për një periudhë ata e dëgjonin, por duke e parë me habi, ashtu siç shihet një njeri për të cilin kemi qenë të sigurt se ka vdekur tashmë. Me kalimin e kohës, ata nisën të mos i përgjigjen Tomës kur ai iu telefononte dhe kjo iu dukej si gjëja më normale në botë. Të vdekurit nuk telefonojnë. Aq më pak të vdekurit politikisht.
Kur Toma mësoi se ndaj tij ishte organizuar një atentat, ai thellë-thellë në mendjen e tij, u lumturua. Kjo provonte se ishte ende gjallë Toma i dikurshëm. Ajo që nuk kuptonte Toma ishte se kur ai përpiqej të sillte prova se ndaj tij ishte organizuar një atentat, nuk bënte gjë tjetër veçse vërtetonte se Toma i para 24 qershorit 2013 nuk jetontë më. Kur Toma përpiqej t’ i provonte Edi Ramës se kishte dashur ta vriste Ilir Meta, Edi Rama e shikonte si t’ i thoshte: “Çfarë je duke folur o njeri?! E ku është parë e dëgjuar që të vriten të vdekurit. Ty të vramë në 24 qershor 2013!”
Tjetër gjë thoshte goja e Edi Ramës, tjetër gjë thoshin sytë e tij. Kur Toma thoshte se kishin dashur ta vrisnin njerëzit e Berishës, Edi Rama dhe Saimir Tahiri qeshnin duke menduar se Berisha nuk mund të vriste një të vdekur.
Vetë fakti që vrasësi i paguar për ta vrarë Tomën u pendua dhe vendosi që të heqë dorë nga atentati, një detaj ky me të cilin Edi Rama e ka ironizuar shumë Tomën, në fakt, fiton koherencë logjike nëse kihet parasysh se edhe vrasësi i paguar e dinte se Toma i dikurshëm nuk jetontë më. Në një moment ai i ka thënë vetes: “Çfarë je duke bërë o njeri, ke marrë para për të vrarë një njeri i cili nuk jeton më?!”
-Por, i pandehur, a mund të na thuash se përse kur të takoi Tom Doshi i bëre ato pohime që gjenden në videoregjistrimin e tij?- E pyesin prokurorët vrasësin.
-Si t’ u them, zoti prokuror. Ai ishte Toma dhe nuk ishte Toma. Unë mendova se është e parrezikshme që të thuash se të kanë paguar për të vrarë një njeri i cili nuk jeton më. Në të vërtetë, edhe kur Toma më takoi me Ministrin e Punëve të Brendshme dhe Drejtorin e Përgjithshëm të Policisë, e ndjeva se ata nuk iu besonin fjalëve të mia, pikërisht se nuk besonin që Toma ishte ende gjallë. Aq sa mua më erdhi që t’ i them Tomës: Tomë që këta të më besojnë mua, ti duhet t’ i bindesh se je gjallë!
Nga deponimi në Prokurori i deputetit Mark Frroku:
-Z. deputet, a i keni thënë ju z. Doshi vitin e kaluar se ndaj tij është organizuar një atentat?
-Më falni zoti prokuror, por miku im z. Doshi nuk jeton më që nga 24 qershori i vitit 2013. Si mund t’ ia thosha unë një gjë të tillë atij në vitin 2014?
-Këtë e dimë të gjithë z. deputet, por kemi urdhër që të bëjmë një hetim për këtë çështje. Edhe pse na duket se po merremi me okultizëm, do ta çojmë hetimin deri në fund.
Nga deponimi në Prokurori i Sali Berishës:
-Z. Berisha, ju keni thënë që keni qenë prej disa muajsh në dijeni të atentatit të organizuar ndaj z. Doshi. A mund të na thoni se si keni ardhur në dijeni?
-Më ndëgjoni me vëmendje mue ju zotërinj prokurorë. Ju e dini se ka një gjuhë juridike dhe një gjuhë politike. Unë e di se Tom Doshi nuk jeton më që prej 24 qershorit 2013, por politikisht më intereson që të shtirem sikur besoj se ai jeton ende. Jo, ju lutem, më thoni ju mue se çfarë ligji kam shkelur në këtë rast. Edi Rama dhe Saimir Tahiri thonë se janë të bindur që ndaj Tomës nuk është organizuar një atentat, por nuk e thonë se kjo bindje ju vjen për shkak se për ta Toma nuk jeton më që prej 24 qershorit 2013. Jo, ju lutem shumë, këtu është çelësi i kësaj historie. Përse nuk e pohojnë ata këtë dhe të sqarohet çdo gjë! Tani më thoni ju mue, se a nuk kemi ne të drejtë si opozitë, që këtë ngatërresë që ka bërë qeveria ta përdorim politikisht. E keni dëgjuar ju këngën për Tomën ku ai më drejtohet mua duke më thënë “T’ u rritë jeta Sali Berisha/qeverinë sonte ta prisha!” Është kënduar në natën e 23 qershorit duke u gdhirë 24 kjo këngë. Më kanë ardhur të gjitha të dhënat mue! Toma nuk e dinte se ata për llogari të të cilëve e prishi qeverinë time, pas kësaj do ta prishnin vetë Tomën. Dhe e shikoni se çfarë kërkon të bëjë tani Edvin Kristaq Rama? Pasi e vrau Tomën e para 23 qershorit në korridorin e selisë së PS-së, tani kërkon që ta “varrosë” politikisht në oborrin e SHQUP, më falni të selisë së PD-së. Jo, ju lutem shumë, pse nuk bëni hetime ju për këtë. I kam dhënë mbështetje të palëkundur Prokurorisë për hetimin e kësaj çështjeje, por nuk mund të hesht para këtyre të vërtetave të mëdha. Tani që e nisët këtë hetim, i shkoni deri në fund. Ju garantoj unë juve se në fund do të vërtetoni se Tomë Doshi për herë të fundit është parë duke hyrë në zyrën e Edvin Kristaq Ramës në 24 qershor 2013, dhe që andej nuk ka dalë më.
Nga ripyetja e z. Doshi në Prokurorinë e Krimeve të Rënda, pas pyetjes së politikanëve të lartë:
-Z. Doshi, ky hetim mund të përfundojë në dy mënyra. E para, është ajo kur do të konkludohet se fakti nuk ekziston, domethënë se meqënse Tomë Doshi nuk ekziston më që nga 24 qershori 2013, nuk mund të jetë organizuar atentat ndaj tij në 2014. Mënyra e dytë është që hetimi të konkludojë se ju me vetëdije keni dashur të sajoni historinë e një atentati kundër jush, me ç’ rast keni konsumuar disa vepra penale, që dënohen me burg. Përvec dëmshpërblimit që keni detyrim t’ u paguani të dëmtuarve që kanë të drejtë të ngrenë padi civile ndaj jush për dëm moral. Tani zgjidhni e merrni se cilën mënyrë pëlqeni ju.
Nga biseda e dy pleqve të moçëm në Mal të Kolajt, Shkodër, vendlindja e Tom Doshit, duke dëgjuar këngën për Tom Doshin, gjatë fushatës zgjedhore të qershorit 2013:
“Për Tom Doshin kndohet kanga/T’u rritë jeta o Edi Rama./Fitoren e kena n’ dorë,/kena me pa në 23 qershor!”
-Si po të duket kjo besa që ka lidhë djali i Gjekë Doshit me Edi Ramën o Dedë! Thonë se asht krahu i djathtë i Edi Ramës, e se ky i ka thanë se kur të jetë ai kryeministër, është njëjtë si me qenë edhe Toma bashkë me të.
-Çka me të thanë o Pal, ua ka thënë ma bukur Prek Cali atyre që donin të merreshin vesh me komunistët se me lidhë na katolikët besë me atë parti, që ka në krye Edi Ramën sot, është si me lidhë gjarpnin si shall rreth qafës. E tash të shohim se sa mirë ka me i ndejt Tomës në qafë ky shall me të cilin ashtu tuj u krekosë, Veç të shohim se mos nis e pisket se ia bani gjamën miku./
Kastriot Myftaraj

[Neteorm]

Tani po qe po behet filmi interesant. Prokuroria i thote Kuvendit te Ilir Metes e Edi Rames, a do votoni per heqjen e imunitetit te Doshit e Frrokut qe une ti arrestoj me policat e Tahirit e ti fus ne burg.

Dy pyetje kam une per ju shoket e Rilindjes Socialiste:

1. Do te votoni ju qe t'iu heqin imunitetin ketyre te dyve me kartonat tuaj?
2. Po votuat per heqjen e imunitetit, a nuk po i fusni ne burg, dhe a nuk po hyni ne "gjak" me keta malesoret tane te pasur qe i kemi deputete te majte?

Na ka zene frika ne popullin socialist per ju shoket e Rilindjes. Kemi frike se mos na plas ndonje tritol e na vret ndonje nga dy rilindasit tane te dashur, shokun Meta e shokun Rama. E lumi qe na mori ne pastaj ne si popull. Ku te gjejme ne rilindesa si ju...

Shoku Rama, e shoku Meta!

Une them qe te dilni ne zgjedhje te parakohshme, qe ti hiqni keta "te fortet" me lezet nga Kuvendi. Se keta te "te fortet" e Kuvendit kane edhe 2-3 deputete te tjere aty ne krahun e mengjer qe mund te na bejne ndonje te pabere.

Nuk na duhet pushteti, ne na duhet qe t'iu shohim ju dy rilindesat tane gjalle, shendoshe e mire, si dy pellumba!

Degjojeni popullin e mos na thoni qe nuk ju paralajmeruam...

Albo

Bravo o Grida Duma.

[Albo]

Ambasa e SHBA mirëpret kërkesën e Prokurorisë për arrestimin e dy deputetëve



Ambasada e SHBA ka reaguar sot lidhur me vendimin e Prokurorisë për të arrestuar deputetët Tom Doshi dhe Mark Frrokun.

"Ambasada e SHBA mirëpret veprimin e Prokurorisë së Përgjithshme për të kërkuar miratimin e parlamentit për të arrestuar dy deputetë. Kjo është një mundësi e rëndësishme për të demonstruar se asnjë individ nuk qëndron mbi ligjin. Ritheksojmë thirrjen tonë për Prokurorinë e Përgjithshme, Parlamentin dhe institucionet gjyqësore që të përmbushin përgjegjësitë e tyre për të siguruar proces ligjor të rregullt në përputhje me ligjin",- thuhet në reagimin e Ambasadës.

Koha Jone

[Albo]

Rama pa koment për kërkesën e prokurorisë



Kryeministri Edi Rama, nuk ka pranuar që të bërtë asnjë koment në lidhje me kërkesën e bërë nga Prokuroria e Përgjithshme për arrestimin e deputetëve, Tom Doshi dhe Mark Frroku.

Kryeministri është pyetur nga gazetarët në momentin që ishte duke hyrë në një aktivitet të organizuar nga Bektashinjtë.

Ai ka preferuar që të heshtë, ndërsa tani pritet një vendim nga Kuvendi.

Koha Jone

[Albo]

Kërkesa për arrestim.Plani amerikan për spastrimin e deputetëve të fortë

Pas tërmetit që po ndodh me deputetët e parlamentit shqiptar të cilët rrezikojnë vendin e tyre në kuvend ndihet dora e ShBA. Përfaqësuesit e misionit diplomatik amerikan kanë qenë prezent në dy fronte. Së pari ata kanë mbikëqyrur nga afër hetimet e prokurorisë për cështjen e vrasjes me pagesë të cilat po rrezultojnë me kërkesën për arrestimin e deputetëve Tom Doshi dhe Mark Frroku. “Nga tërësia e veprimeve hetimore, kriijohen dyshime të arsyeshme se ngjarja e kallëzuar publikisht nga ana e deputetit Doshit, dhe e pohuar prej tij para organit procedues, ka qenë e sajuar” thuhet në letrën që prokurori i përgjithshëm i con kuvendit për të përligjur arrestimin e Doshit. Ndërsa për deputetin Frroku, në të njëjtën kërkesë thuhet se ai ka bërë një deklarim të rremë përpara prokurorit.

Por pyetja që shrohet është: a mund të arrinte prokuroria në këto përfundime nëse nuk do të kishte mbështetjen e “Big Brother”? Ambasada amerikane reagoi shumë egër dhe në mënyrë arrogante në rastin e përjashtimit të Tom Doshit nga PS-ja. Më pas ajo përsëriti të njëjtin akt për deputetët e kriminalizuar që merrnin pjesë në grupin e miqësisë me ShBA-në.

Të njëjtën gjë po bëjnë këtë herë në hije dhe jo publikisht përfaqësuesit e ShBA-së edhe në rastin e dy deputetëve Arben Ndoka dhe Pjerin Ndreu që po gjykohen në Gjykatën e Lartë për rrahjen e deputetit Gent Strazimiri. Burime diplomatike bëjnë të ditura për Lapsi.al se procesi ndaj dy deputetëve po ndiqet nga afër dhe se një dënim që do conte edhe përjashtimin e dy deputetëve të PS-së nga parlamenti, është fare pranë. Me sa duket me sponsorizim nga përtej Atlantikut ka filluar të realizohet edhe në Shqipëri, plani Rumuno- Bullgar, që spastroi nga parlamentet e këtyre vendeve deputetët me të shkuar kriminale.

Koha Jone

[Albo]

Basha: Prokuroria vetëm shtoi PSE-të, s’ka hetim pa dorëheqje të Metës



Kërkesa për arrestimin e deputetëve Doshi dhe Frroku, për opozitën vetëm sa ka shtuar dyshimet mbi ngjarjen. Shefi i demokratëve, Lulzim Basha, është skeptik për shpejtësinë në daljen e konkluzioneve dhe kohën kur vjen kjo kërkesë e organit të akuzës.
“Asgjë nuk mund të dalë në dritë ndërkohë që i akuzuari kryesor vazhdon të ushtrojë pushtetin e numrit 2 në vend. Ajo që ka ndodhur është ajo që porositi kryeministri Rama, zoti Meta, që paralajmëroi Saimir Tahiri, një mbyllje të shpejtë të hetimit.
Pyetjet mbeten nëse Rama-Meta-Tahiri e dinin këtë para gjashtë muajsh. Pse nuk e bënë këtë para 6 muajsh, pse nuk e kërkuan transparencën para 6 muajsh dhe çështja do të mbyllej. Pse e lanë Fatjon Skënderaj të ikte në Gjermani kur ishte në listën e të kërkuarve dhe shkuan pastaj e rikthyen vete.
Ka shumë pse, veprimi i sotëm vetëm i shton pse-të. Vecanërisht në një kohë kur thirrjet e faktorit ndërkombëtar për njën hetim të besueshëm dhe hapjen rrugë hetimit përmes largimit nga posti numër 2 i Ilir Metës janë shtuar.Vinë këto hapa në kohën kur kërkesa për dorëheqjen e Ilir Metës ka kaluar kufinjtë e Shqipërisë, është një kërkesë që është intensifikuar. E sotja nuk zgjidh asgjë, shton pikëpyetjet dhe vërteton atë që ne u kemi thënë shqiptarëve që sakohë i akuzuari kryesor në këtë aferë vazhdon të ushtrojë pushtetin e numrit 2 në bashkëpunim me numrin 1 të ekzekutivit e vërteta do të mbetet e strukur”.
Dhe pse i mendimit se çdokush duhet të jetë i barabartë para ligjit, Basha thotë se nuk mund të ketë hetim të aferës Doshi për sakohë i akuzuari kryesor Ilir Meta nuk jep dorëheqjen nga posti i kryeparlamentarit.
“Unë përshëndes çdo vendim të institucioneve të vendit që nhuk pengohen për të trajtuar të barabartë para ligjit këdo. Ne jemi parti e shtetit ligjor, është e paimagjinueshme për ne që të hedhim çdo hap që mund të bllokonte hetimet.
Hetimet duhet të bëhen të plota, çdokush përgjegjës për këtë aferë duhet të japë llogari para drejtësisë ndaj dhe e kemi nisur dhe vazhdojmë me një mbështetje të plotë për drejtësinë që të bëjë punën e saj pa u ndikuar.
Por kjo nuk ka për ndodhur, nuk po ndodh dhe nuk do të ndodhë sakohë që i akuzuari kryesor do të vazhdojë të ushtrojë pushtetet e numrit 2 në vend”.
Basha theksoi se do të vazhdojnë të kërkojnë dorëheqjen e Metës me protesta.
“Pa pikë dyshimi po. Sesi mund ti shërbejmë sovranitetit ndërkhë që i akuzuari kryesor bashkë me aleatin e tij Kryeministër për të mbuluar të vërtetën, përveçse me dorëheqjen e tij nuk shoh asnjë rrugë tjetër”.
Thirrja ndaj qytetarëve për t’iu bashkuar protestave të PD vjen dhe për dekriminalizimin dhe një sërë çështjesh të tjera që lidhen me sigurinë dhe situatën sociale në vend.
“Protestat e PD dhe qytetarëve shqiptarë do të vazhdojnë edhe me të fuqishme për kauzën e dekriminalizimit, që akoma nuk e kanë shqiptuar dot as Edi Rama dhe as Ilir Meta. Nuk kanë sesi, sepse kjo që bëjnë sot është një larje hesapesh mes Ramës, Metës, tahirit, Doshit dhe Frrokut. Por kjo aferë shkon përtej këtyre 5 individëve apo atyre 12-13 të tjerëve me rekorde kriminale në kuvend. Nuk janë pazaret e pista të tyre para 23 qershorit dhe pas gushtit të vitit të kaluar që jemi ngritur në protesta.
Është kauza që bashkon të majtë dhe të djathtë, kauza e pasigurisë se krimi është ngritur në sistem, kauza e arbitraritetit dhe padrejtësisë që po merr jetë të pafajshme njerëzish se krimi ëhstë ulur në poltronet e shtetit. Është kauza e papunësisë, e varfërisë, e mjerimit, apërgjegjshmërisë, e rritjes së energjisë dhe taksave kur premtuan uljen. Ne do tu bëjmë thirrje shqiptarëve të bashkohen më shumë se kurrë, duke filluar me nesër me Durrësin”.

ORA NEWS

[Albo]

Frroku për arrestimin: S’kam konfirmim zyrtar, s’i ndryshoj asnjë presje dëshmive



Është njohur përmes mediave me kërkesën e Prokurisë së Përgjithshme por ende nuk ka një konfirmim zyrtar nga organi i akuzës për këtë çështje.
Deputeti Mark Frroku në një reagim për Ora News, tha se sapo të ketë konfirmim zyrtar do ti përgjigjet Prokurorisë.
“Nuk kam asnjë konfirmim zyrtar. Në momentin që do të kem konfirmim zyrtar do ti përgjigjem Prokurorisë dhe gjithë institucioneve në Shqipëri”.
Në këto kushte, ai nuk e mendon as lënien e mandatit të deputetit.
“Nuk bëhet fjalë për lënie mandati në këto momente, përderisa unë nuk kam një konfirmim zyrtar”.
Përkundër akuzave për dëshmi të rreme në Prokurori, deputeti Frroku thotë se nuk u ndryshon asnjë presje deklaratave të tij në organin e akuzës.
“Sa herë të jetë e nevojshme, ose saherë Prokuroria apo organet përkatëse do të më thërrasin unë do të jem i pranishëm.Unë jam shumë i qetë, vijoj jetën time politike dhe private, ato që kam thënë nuk ndryshojnë me pikë as me presje”.

ORA NEWS

[Albo]

Kërkesa e Prokurorisë,Meta pritet të mbledhë Këshillin të shtunën

Këshilli për Rregulloren, Mandatet dhe Imunitetin, pritet të mblidhet të shtunën rreth orës 17: 00 për të shqyrtuar kërkesën Prokurorisë së Përgjithshme për ti hapur rrugë arrestimit të deputetit Tom Doshi dhe Mark Frroku.
Ky Këshill i cili drejtohet nga kryeparlamentari Ilir Meta, brenda 4 javëve, harton një raport për në seancën plenare, në të cilin rekomandon rrëzimin ose miratimin e dhënies së autorizimit për arrestimin ndaj deputetëve.
Raporti i Këshillit u shpërndahet deputetëve, ndërsa në seancë plenare fjala i jepet në fillim deputetit, ndaj të cilit është paraqitur kërkesa, për të dhënë shpjegime ose për t’iu përgjigjur pyetjeve të deputetëve.
Më pas Kuvendi vendos me votim të fshehtë nëse do të jepet ose jo autorizimi për arrestimin e deputetëve Doshi dhe Frroku.
Në njoftimin e prokurorisë thuhet: Prokuroria e Përgjithshme kërkon nga Kuvendi i Republikës së Shqipërisë autorizimin për arrestimin e deputetevë të Kuvendit të Shqipërisë, Tom Doshi dhe Mark Frroku, bazuar në nenin 73/2 të Kushtetutës së Republikës së Shqipërisë.
“Dy deputetët janë të dyshuar për konsumimin e elementëve të veprave penale; “Kallzimi i rremë”, “Kanosja për deklarime a dëshmi, ekspertim ose përkthim të rremë”, dhe “Deklaratat e rreme përpara Prokurorit”, parashikuar nga neni 305, 312/a dhe 305/a të Kodit Penal” thuhet në njoftimin e Prokurorisë.



ORA NEWS

[Albo]

Kërkohet arrestimi, Doshi: Pasi dështoi vrasja, duan t’më burgosin. Frroku: Kërkesa jozyrtare



TIRANË- Tom Doshi thyen heshtjen disa orë pas publikimit në media të kërkesës sëProkurorisë për arrestimin e tij dhe të Frrokut, duke e cilësuar këtë kërkesë një përpjekje për të bërë burgosje politike në vitin 2015.

“Sapo dëgjova nga media për një kërkesë të Prokurorisë së Përgjithshme për arrestimin tim. Nuk e kam marrë akoma kërkesën zyrtare të prokurorisë për tu njohur me detajet e akuzës, por mund të them që ky lajm është i pabesueshëm për mua.
Po përpiqen të bëjnë burgosje politike në Shqipëri në vitin 2015.
Po përpiqen të më mbyllin gojën për denoncimin e një krimi ku është i përfshirë Kryetari i Kuvendit të Shqipërisë. Në Rusi ndodh që Vladimir Putin vret dhe burgos kundërshtarët politikë. Na doli një Ilir Meta dhe në Shqipëri që kontrollon gjithë pushtetet dhe kërkon të burgosë deputetë politikisht. Pasi dështoi t’më vriste, Ilir Meta po kërkon t’më burgosë, duke bërë bashkëpunëtor në këtë krim gjithë strukturat e shtetit, përfshirë dhe Parlamentin”, sqaron Doshi në një status të tijin në Facebook.

FRROKU
Deputeti Mark Frroku shprehet se do të reagojë kur të marrë zyrtarisht kërkesën nga Prokuroria për arrestimin e tij.

“Do të reagoj kur të marr zyrtarisht kërkesën”, u shpreh Frroku për News24.

“Nuk kam marrë asnjë konfirmim zyrtar. Do të vijoj i qetë jetën time politike. Nuk flas për lënie mandati për sa kohë që nuk kam asnjë kërkesë. Nuk mund të bëj deklarata më gjatë, në momentin që marr njoftim zyrtar do bëj deklarat për ju dhe për publikun”.

(ma.ar/d.b/BalkanWeb)

[Duke_Of_Arberia]

Keto akuzat per Frrokun dhe Doshin jane aperitiv duke pare akuzat qesharake qe prokuroria ka ngritur.
Duke pare gjykatat tona te korruptuara, mbrenda disa muajsh ata do dalin te pafajshem dhe do vazhdojne veprimtarine e tyre politike!

Po per Baba Takun qe vajti ne Gjermani per te sjellur Tonin e kombinatit do denohen dikush?
Po per faktin qe po ky shtet e la te lire Tonin e kombinatit te dilte jashte shqiperise ndonese kishte nje urdher arresti, kush do mbaje pergjegjesi?
Po per faktin tjeter qe Saja pret e percjell ne zyren e tij kriminel dhe i le te lire pastaj, kush denohet?
Po per faktin qe organet me te larta te mazhorances ishin 6 muaj rrjesht ne dijeni te kesaj situate dhe u kujtuan te hetojne mbas nje gjysem viti, kush do merret me keta? Jo per gje por ligji i procedures penale ketu eshte shkelur me dy kembe, sepse ne momentin qe ka nje akuze duhet hetuar rasti mbrenda 3 muajsh, gje qe s'ka ndodhur!
Po me tabulatet do merret prokuroria apo jo?


Denojini dhe shporrini nga politika Doshin me Frrokun & co, por jepini pergjigje dhe ketyre me larte!

Se po doli prape shtangist poliglotist Likja serisht i pafajshem, pastaj zere se i kemi menderosur siper atdheut!