Nano e ka shitur Edi Ramën

[ALBA]

Nënkryetarja e demokratëve flet për strategjinë e opozitës për rrëzimin e qeverisë, bashkimin e së djathtës dhe kandidatët për Tiranën

Topalli: Nano e ka shitur Edi Ramën

Topalli: Mocioni synon largimin e Nanos
“Në aktivin e Tiranës që do të shpallte ndonjë kandidaturë, nuk u bë fjalë. Ndoshta, ky ishte edhe momenti i parë i shitjes së kryeministrit Nano për kryebashkiakun Edi Rama.”


TIRANE- Nënkryetarja e Partisë Demokratike Jozefina Topalli, deklaroi dje në intervistë për “Shekullin” se kryeministri Fatos Nano duhet të japë dorëheqjen. Në të kundërt, nënkryetarja demokrate paralajmëroi se opozita do të denoncojë qeverinë “Nano” jo vetëm në rrugë parlamentare, por edhe gjatë kontakteve me ndërkombëtarët. Ndërsa për idenë e bashkimit të opozitës, Topalli siguroi se kjo ide aktualisht po përçohet përmes qëndrimeve unike që grupet parlamentare të opozitës po mbajnë në Kuvend.


Zj.Topalli, cilat janë çështjet që grupi parlamentar do të prekë në datën 14 prill për të mbështetur mocionin për debat me kryeministrin Fatos Nano?
Nxitja që ka shërbyer për të përshpejtuar këtë mocion për debat ka qenë raporti i Bashkimit Europian, por po ta shohësh më gjerë, janë një sërë faktorësh të tjerë. Parimisht është e qartë për çdo qytetar, se kur një qeveri është e paaftë, mjafton kaq që të ikë dhe të lëshojë karrigen. Mirëpo kjo është vetëm gjysma e së keqes në rast se do të lexojmë këtë raport, i cili është dokumenti i fundit në ngritjen e shqetësimit ndaj një realiteti aktual në të cilën ndodhet Shqipëria. Me këtë dua të them se para këtij raporti, ka pasur edhe raporte të tjera të ndërkombëtarëve. Kam parasysh raportin konfidencial të Europës, Fondit Monetar Ndërkombëtar, Departamentit të Shtetit për shkeljen e të drejtave të njeriut, raportet e Bankës Botërore, raportin e Prokurorit të Përgjithshëm që lëshon alarmin se krimi i organizuar ka përkulur shtetin, raportin e Shërbimit Civil, raportin e Avokatit të Popullit. Kur kam dëgjuar në media se kryeministri Nano kishte urdhëruar ministrat që të mbronin veten e tyre, kam rilexuar raportin e fundit për të gjetur ndonjë fakt pozitiv, por në asnjë rresht nuk gjeta ndonjë fjalë të mirë, përjashtuar momentin e zgjedhjes së Presidentit të Republikës gati një vit më parë. Brenda një viti u ndërruan tre qeveri, njëra sepse ishte e korruptuar siç tha Nano, e dyta sepse ishte e paaftë dhe e treta, që premtoi reformë por vetëm reforma nuk bëri. Një qeveri, që sipas raportit të Bashkimit Europian, nuk ka ditur të bëjë luftën kundër korrupsionit, nuk ka ditur dhe nuk ka dashur të luftojë krimin e organizuar, nuk ka plotësuar kuadrin e legjislacionit të kujtuar dhe të programuar. Në këto kushte, çdo opozitë ka detyrën morale që t’i bjerë këmbanave, jo për kryeministrin Fatos Nano sepse e ka të qartë sesa në pozicion të minuar e ka futur veten, por për një inkurajim më të madh të shoqërinë shqiptare për të reaguar.

Grupi parlamentar i PD-së a do ta shoqërojë mocionin për debat me një mocion mosbesimi ndaj kryeministrit Fatos Nano?

Natyrisht që morali i gjithë kësaj është që ai të lëshojë karrigen dhe vendi të përgatitet për një zgjidhje të re.

Në aktivin e fundit të PS-së Tiranë, kryeministri Nano paralajmëroi një mandat të gjatë qeverisës i kryesuar nga vetë ai. Çfarë do të bëjë opozita përballë këtij fakti?
Ndjesia e parë që më krijoi kur dëgjova fjalimin e tij në aktivin e Tiranës është mentaliteti i personit që e di veten se sa në vështirësi personale dhe sa probleme ka më vete dhe me njerëzit që e rrethojnë. Këmbëngulja e tij jo në pak raste në vendet që janë të përfshira nga krimi i organizuar pushtetin nuk e kanë lëshuar me votë të lirë. Duke mbetur sërish tek pyetja juaj unë besoj se hapi i parë i opozitës është realizimi i reformës zgjedhore. Unë mendoj gjithashtu se shoqëria shqiptare në një farë mënyre po maturohet dhe ndërgjegjësohet për nevojën e një reagimi dhe detyra e opozitës është që të nxisë akoma më shumë këtë reagim demokratik.
Përmes cilave rrugë?
Përmes debateve parlamentare, takimeve të ndryshme dhe pse jo edhe me forma të tjera.
Tashmë ka filluar puna e komisionit hetimor “Rama”. Duke u bazuar në veprimtarinë e deritanishme, sa mendoni se ky komision do të realizojë qëllimin për të cilin u ngrit?
Për mua, e rëndësishme është që shqiptarët dhe parlamentarët të mësohen të respektojnë ligjin themelor të shtetit dhe kjo kërkon ndërhyrjen e të gjitha palëve të brendshme dhe të jashtme. Mosrespektimi i Kushtetutës ishte një provë e keqe për kryeministrin Nano. Së dyti, e rëndësishme është që të njihet e drejta e opozitës për të drejtën e kontrollit në bazë të një principi që duhet të qëndronte prej kohësh në bazën e funksionimit të shtetit shqiptar, ajo e barazisë së pushteteve. Ndërsa për të tjerat besoj se nuk me takon mua meqënëse komisioni aktualisht po merret me këto probleme.
A kanë filluar të vihen në lëvizje strukturat e selisë blu për të etiketuar kandidatët e mundshëm që do të konkurrojnë kryebashkiakun Edi Rama?
Nuk ka filluar ende faza e emrave, por ka filluar puna në drejtim të ndezjes së motorëve në strukturat e partisë, sepse momenti i parë është mbrojtja e votës dhe momenti i dytë, energjizimi i këtyre strukturave. Kur këto faktorë janë në performancën e duhur, atëherë mbetet vetëm problemi i emrit, që është hapi tjetër i rëndësishëm për të cilën nuk ka filluar ende diskutimi.
Kur do të fillojë ky proces?
Kemi 6 muaj në dispozicion. Gjatë kësaj periudhe ne kemi gjithë kohën e duhur për të gjetur figurën e duhur, për të cilën unë nuk dyshoj që do të jetë shumë i mirë.
PS e ka shpallur tashmë kandidaturën e saj…..
Për hir të së vërtetës, PS nuk ka shpallur kandidaturën për kryetar bashkie. Ka qenë një moment që Sekretari i Përgjithshëm i PS -së, Gramoz Ruçi personalisht ka shprehur preferencat e tij dhe me pas kur mendohej se në aktivin e Tiranës do të shpallte ndonjë kandidaturë, nuk u bë fjalë. Ndoshta ky ishte edhe momenti i parë i shitjes së kryeministrit Nano për kryebashkiakun Edi Rama.
Zj. Topalli po flitet shumë për mundësinë e dështimit të bashkimit të opozitës. Ju ndani të njëjtin opinion?
Unë nuk konvergoj me këtë përshtypje sepse nuk kam menduar asnjëherë se procesi i zgjerimit të koalicionit është i thjeshtë dhe i lehtë. E kam menduar gjithnjë që është një ide pozitive. Unë mendoj se tavolinat dhe vazhdimi i bashkëpunimit në Kuvend me gjithë grupet parlamentare të opozitës është një inkurajim dhe një hap në drejtimin e duhur.
Legalistët dhe ballistët kanë paralajmëruar daljen vetëm në zgjedhjet e ardhshme lokale. Cili është komenti juaj?
Unë në fakt nuk i kam dëgjuar këto deklarata por besoj se do të gjendet gjuha e përbashkët për të ditur dhe për të bashkëpunuar. E rëndësishme është që sot të ketë një opozitë të bashkuar dhe kjo i shërben si të vegjëlve, ashtu edhe Partisë Demokratike.







Copyright 2002 Shekulli

[ornament]

Bravo miushe shume bukur, nje gje s'kuptoj, çfare vlere ka "Copyright" ne fund te faqes, qe ne mos ta kopjojme artikullin apo qe ti s'duhet ta kopioje, me sa shoh nuk jemi tek Shekulli ketu.

Si dhe diçka, ka mundesi me ma shpjegu ket fjali qe gjeta ne te, se une s'kuptoj, ka mundesi e kam harru shqipen.

"Këmbëngulja e tij jo në pak raste në vendet që janë të përfshira nga krimi i organizuar pushtetin nuk e kanë lëshuar me votë të lirë."