Prokuroria mbyll hetimet per Mega vjedhjen ne Banken e Shqiperise

[benseven11]

Aurora Koromani
Prokuroria e Tiranës mbyll hetimet për tre të akuzuarit për vjedhjen e Bankës së Shqipërisë. Organi i akuzës ka dërguar në gjyq dosjen për Ardian Bitrajn, Mimoza Bruzian dhe Klevis Bejtajn, për të cilët rezulton se janë përgjegjës për vjedhjen e një sasie shumë të madhe parash në Bankën e Shqipërisë. Nga hetimet e prokurorisë, rezulton se Bitraj, ish-përgjegjës sektori në Bankën e Shqipërisë, konsiderohet personi përgjegjës për vjedhjen e mbi 7 milionë dollarëve nga ky institucion. Nga hetimi është provuar se pjesa më e madhe e parave të vjedhura në Bankën e Shqipërisë janë shpenzuar nga Ardian Bitraj në pikat e lotove të sportit të shpërndara në qytetin e Tiranës. Sipas organit të akuzës, këto pika janë identifikuar, krahas veprimeve të tjera hetimore, edhe nëpërmjet qelizave të tabulateve telefonike të të pandehurit Ardian Bitraj gjatë periudhës që ai ishte i punësuar në Bankën e Shqipërisë. Sipas informacionit të dërguar nga kompania përkatëse celulare, Bitraj pas largimit nga puna shpenzonte një sasi të gjatë kohe në pikat e loto sportit në qytetin e Tiranës. Mimoza Bruzia, ish-përgjegjëse në Bankën e Shqipërisë, rezulton nga hetimi se ka qenë në dijeni të plotë të vjedhjes në vazhdimësi që kryente Bitraj, madje e ka lejuar që të kryente këtë vjedhje në sektorin që ajo kishte në ngarkim. Ndërsa i afërmi i Bitrajt, rezulton se ka qenë në dijeni të plotë që kushëriri i tij kryente vjedhjen e parave në Bankën e Shqipërisë. Është provuar se i pandehuri Bejtaj, pasi telefonohej nga i pandehuri Bitraj, shkonte me makinën e tij në objektin ku punonte Bitraj dhe merrte qeset me para që i vidhte ky i fundit në Bankën e Shqipërisë.
Dosja
“Departamenti ka në strukturën e tij organizative njësitë e mëposhtme: 1-Sektorin e Emisionit, Administrimit të Parasë dhe Analizës së përbërë nga: Zyra e Emisionit dhe administrimit të Parasë, Zyra e qendrës Kombëtare të Analizës. 2-Sektorin e Arkës për Veprim dhe të Përpunimit të Fondeve, të përbërë nga: Zyra e Arkës për Veprim dhe zyra e Arkës Stok. Arka për Veprim është vendi në të cilin mbahen kartëmonedha e monedha metalike të emetuara nga Banka e Shqipërisë, që përdoren nga Banka për aktivitetin ditor me degët e saj dhe bankat e nivelit të dytë, si dhe kartëmonedha e monedha të huaja që mbahen nga Banka për mbulimin e shpenzimeve administrative. Arka Stok është vendi në të cilin mbahen kartëmonedha e monedha metalike kombëtare në pritje për t’u futur në qarkullim, si dhe metale të çmuara, si ar, argjend, platin, stoli dhe gurë të çmuar në pronësi të Bankës së Shqipërisë dhe në ruajtje për llogari të të tretëve. Departamenti i Emisionit drejtohet nga drejtori, i cili drejton dhe bashkërendon punën me përgjegjësit e strukturave organizative të Departamentit, ku ndër to bëjnë pjesë, përgjegjësi i Zyrës së Arkës për Veprim dhe Përgjegjësi i Arkës Stok. Të tre këta punonjës kanë në ruajtje dhe administrim vlerat monetare që gjenden në të dyja arkat. Më datë 21.07.2014 Banka e Shqipërisë ka depozituar një material kallëzues në ngarkim të Ardian Bitrajt. Sipas materialit kallëzues, ky i fundit, në cilësinë e Përgjegjësit të Arkës për Veprim e më pas të Përgjegjësit të Arkës Stok, ka përvetësuar ndër vite shuma të mëdha parash nga të dyja arkat. Nga viti 2005 deri në vitin 2011, Ardian Bitraj ka ushtruar detyrën e Përgjegjësit të Arkës për Veprim. Me urdhrin, datë 12.09.2011 të Guvernatorit, Ardian Bitraj është emëruar Përgjegjës i Arkës Stok dhe në datën 22.11.2011 ka marrë detyrën së bashku me vlerat monetare. Është pyetur fillimisht si deklarues e në vijim si person nën hetim, Ardian Bitraj, i cili ka pranuar se ka vjedhur shuma parash në vendin ku ishte përgjegjës për ruajtjen dhe administrimin e tyre, si dhe ka shpjeguar në detaje mekanizmin e vjedhjes. Ai ka deklaruar se nga muaji maj apo qershor i vitit 2010, gjatë kohës që ushtronte detyrën e Përgjegjësit të Arkës për Veprim ka arritur që të përvetësonte sasi të konsiderueshme parash nga kjo arkë. Edhe gjatë kohës që nuk ka qenë përgjegjësi i kësaj arke, ka vazhduar që të përvetësojë sasi të konsiderueshme parash, pasi në mirëbesim futej në ambientet e saj. Sipas tij, sasia e parave të vjedhura nga Arka për Veprim ishte 600 milionë. Ardian Bitraj ka deklaruar se ka arritur që të marrë shuma nga 1.500.000 deri në 2.000.000 (dy milionë) lekë. Në ditë të caktuara ka arritur të marrë nga Arka për Veprim dhe 10 milionë lekë, duke i fshehur në rrobat e trupit. Arkat e prekura, i mbushte me libra, me qëllim që të mos humbisnin peshën. I pandehuri ka deklaruar se gjatë muajve maj-qershor të vitit 2014, ka arritur që të përvetësojë rreth 120 milionë lekë të dëmtuara, të programuara për t’u asgjësuar me urdhër të zv.guvernatores. Të gjithë sasinë e parave të vjedhura në Bankën e Shqipërisë, i pandehuri ka deklaruar se e ka shpenzuar në pikat e loto-sportit. Ky fakt është pranuar dhe nga e pandehura Mimoza Bruzia, e cila ka deklaruar se që në vitin 2010, ka konstatuar se i pandehuri Ardian Bitraj ka përvetësuar shuma të mëdha parash në ambientet e Arkës për Veprim, ku ajo ushtronte detyrën e specialistes së ngarkuar me vlera nga viti 2009 deri në vitin 2014. Nga procesverbali i këqyrjes së vendeve të datës 22.07.2014, të shoqëruar me fotografitë përkatëse, u provua se rrethanat dhe mekanizmi i shpjeguar nga i pandehuri Ardian Bitraj, përputhen plotësisht me konstatimet e bëra në këqyrje. Nga këqyrja në vend e arkave të drurit ku ruhen vlerat monetare në Arkën për Veprim ka rezultuar se 8 arka i kishin kapakët të hapur dhe nuk kishin ndonjë element sigurie”, thuhet në dosjen e prokurorisë.
Dëmtimi i
arkave
“Nga procesverbali i këqyrjes në Arkën për Veprim të datës 04.08.2014 ka rezultuar se arkat e prekura, janë ato me prerje 5 mijë lekëshe, ku secila prej tyre si rregull mban një sasi prej 20 mijë kartëmonedhash të prerjes 5 mijë lekëshe. Nga këqyrja e mëtejshme ka rezultuar se numrat identifikues të arkave të prekura janë: AR297 ka në brendësi 3 mijë kartëmonedha të prerjes 5 mijë lekëshe; AN133 ka në brendësi 4 mijë kartëmonedha të prerjes 5 mijë lekëshe; AN136, ka në brendësi 16 mijë kartëmonedha të prerjes 5 mijë lekëshe; AR266, ka në brendësi 13 mijë kartëmonedha të prerjes 5 mijë lekëshe; AN135, ka në brendësi 10 mijë kartëmonedha të prerjes 5 mijë lekëshe. Ndërsa kutitë me kode AM91 dhe AE11 dhe AP180 nuk kanë kartëmonedha në brendësi, pra është vjedhur e gjithë shuma. Po kështu, me procesverbalin e sekuestrimit të datës 22.07.2014 janë sekuestruar në Arkën Stok sende, si kartonë, kuti të ndryshme ambalazhi të vendosura brenda stivës së kartëmonedhave të prerjeve 5-mijëshe. I pandehuri i kishte vendosur këto sende, me qëllim që stiva ku ruheshin këto para të ishte në dukje normale. Gjithashtu, pas konstatimit të faktit të vjedhjes, bazuar në urdhrin e zv.guvernatorit të parë të Bankës së Shqipërisë, datë 21.07.2014, është kryer një proces inventarizimi për vlerat materiale e monetare në Departamentin e Emisionit dhe konkretisht në zyrën e Arkës Stok e asaj për Veprim. Komisioni i ngritur pas inventarizimit të kryer ka konstatuar se diferenca në të dyja arkat është 713 milionë lekë.
Bazuar në procesverbalin e mbajtur më datë 22.07.2014, lidhur me inventarizimin e Arkës për Veprim nga Komisioni i Inventarizimit Fizik, ku janë identifikuar kodet e arkave të drurit të rezultuara me diferenca në Arkën për Veprim, ka rezultuar se 5 nga 8 arkat e drurit të rezultuara me diferenca, rezultojnë të jenë pjesë e shënimeve të mbajtura nga ish-punonjësja e ngarkuar me vlera pranë Arkës Stok, Myzejen Belba. Këto shënime përmbajnë të dhëna në lidhje me kodet e kutive të kartëmonedhave për disa nga prerjet e tyre, si dhe disa data të hyrje-daljeve të këtyre kutive për në Arkën Stok e anasjelltas. Në këto dokumente të sekuestruara me cilësinë e provës materiale u konstatuan disa shënime në lidhje me daljet nga Arka Stok për në Arkën për Veprim të kutive me kartëmonedha të prerjes 5 mijë lekëshe, mes të cilave dhe disa kode që u përkisnin kutive të rezultuara të vjedhura në Arkën për Veprim, sipas procesverbalit të këqyrjes së datës 22.07.2014. Nuk gjenden në këto shënime informacione në lidhje me lëvizjen e tri arkave të tjera të drurit të rezultuara me diferenca në inventarin fizik të datës 22.07.2014 (kutitë me kode AR 266, AR 297 dhe AP 180)”, citohet në dosje.
Punonjësit
“Punonjësit që kanë bërë hyrje në Arkën Stok më datë 22.04.2009 vlera monetare të reja të prodhuara të prerjes 5000 lekë emetim i vitit 2007 (përfshirë 8 arkat me kodet AP 180, AE 11, AM 91, AN 133, AN 135, AN 136, AR 266, AR 297) janë Lefter Dhimo, Myzejen Belba dhe Lavdim Cani. Punonjësit pranë Arkës Stok që kanë dorëzuar në datën 21.10.2011 vlerat monetare të prerjes 5000 lekë emetim i vitit 2007 (kutitë me kod AE 11 dhe AM 91): Lefter Dhimo, Myzejen Belba dhe Lavdim Cani, ndërsa punonjësit pranë Arkës për Veprim që i kanë marrë në dorëzim këto vlera monetare janë Ardian Bitraj, Mimoza Bruzia dhe Foto Kallfani. Punonjësit pranë Arkës Stok që kanë dorëzuar në datë 05.04.2012 vlerat monetare të prerjes 5000 lekë emetim i vitit 2007 janë: Ardian Bitraj, Myzejen Belba dhe Lavdim Cani dhe punonjësit pranë Arkës për Veprim që i kanë marrë në dorëzim këto vlera monetare janë Petrit Ramohitaj, Mimoza Bruzia dhe Foto Kallfani”, thuhet në dosje.
Gjendja e bankës
“Gjendja kontabël e Arkës për Veprim më datë 22.07.2014 ka qenë 18’243′-100’787 lekë, ndërkohë gjendja fizike e Arkës për Veprim më datë 22.07.2014 ka qenë 18’813’100’787 lekë, duke rezultuar kështu në një diferencë më pak në gjendjen fizike prej 570,000,000 lekë. Gjendja Kontabël e Arkës Stok më datë 22.07.2014 ka qenë 206,668,-654,910 lekë, ndërkohë gjendja fizike e Arkës Stok më datë 22.07.2014 ka qenë 206,525,-654,910 lekë, duke rezultuar kështu një diferencë më pak në gjendjen fizike prej 143,000,000 lekësh. Nga sa më sipër, Arka për Veprim rezulton me një diferencë më pak në vlera monetare gjendje fizike për vlerën totale prej 570,000,000 copë kartëmonedha të gatshme të qarkullimit të prerjes 5,000 lekë. Arka Stok rezulton me një diferencë më pak në vlera monetare gjendje fizike për vlerën totale prej 143,000,000, e përbërë nga 28,600 copë kartëmonedha të dëmtuara të gatshme për asgjësim, të prerjes 5 mijë lekë. Diferencat më pak në vlerat monetare të munguara gjithsej në arkën Stok dhe për Veprim janë 713,000,000 lekë. Evidentimi i numrave serialë të kartëmonedhave të gatshme të qarkullimit të bëra hyrje apo që qarkullojnë midis Arkave (Stok dhe për Veprim), Degëve të Bankës së Shqipërisë dhe bankave tregtare, nuk përbën detyrim ligjor, rregullativ apo procedurial të Bankës së Shqipërisë. Në vijim, nga ana e organit procedues, është arritur të provohet dhe mënyra se si janë përvetësuar nga i pandehuri Ardian Bitraj vlerat monetare në të dyja arkat. Nga këqyrja e kamerave të sigurisë, që mbikëqyrin ambientet e brendshme të godinës së Departamentit të Emisionit, ka rezultuar se i pandehuri Ardian Bitraj, gjatë orarit të punës dhe konkretisht në datën 15.07.2014, rreth orës 08:45 ka hapur i vetëm derën kasafortë të zyrës stok (tranzit). Ky veprim i tij është në kundërshtim me udhëzimin Nr.741, datë 28.03.2014 “Mbi administrimin dhe përdorimin e çelësave dhe kodeve numerike të dyerve në Bankën e Shqipërisë”. Sipas këtij udhëzimi, konkretisht nenit 5, pika 2, “përdorimi dhe administrimi i çelësave aktivë dhe kodeve të kombinatorëve numerikë”, çelësat e dhomës së tranzitimit, përdoren dhe administrohen nga të ngarkuarit me vlera në Departamentin e Emisionit. Referuar pamjeve filmike, procesverbalit të këqyrjes së tyre si dhe shpjegimeve të të pandehurit Ardian Bitraj në cilësinë e përgjegjësit të Arkës Stok, ka rezultuar se kjo procedurë nuk është zbatuar dhe kjo ka sjellë për pasojë që i pandehuri Ardian Bitraj të përfitojë nga kjo situatë dhe të përvetësojë shuma të konside-rueshme parash. Nga hetimet e kryera ka rezultuar e provuar se në këtë aktivitet kriminal ka qenë e përfshirë dhe e pandehura Mimoza Bruzia, e cila nga viti 2009 deri në vitin 2014 ka ushtruar detyrën e specialistes së ngarkuar me vlera pranë Arkës për Veprim. E pandehura ka qenë e ngarkuar me administrimin e vlerave monetare që disponoheshin pranë Arkës për Veprim, dhe në këtë cilësi ka bashkëpunuar me të pandehurin Ardian Bitraj për të vjedhur shuma të konsiderueshme parash, veprime të cilat janë kryer në një hark kohor prej katër vitesh. Nga këqyrja e tabulateve telefonike ka rezultuar se midis të pandehurve ka pasur komunikime të vazhdueshme gjatë dhe pas orarit të punës. Nga hetimi është provuar se e pandehura ka konstatuar faktin e vjedhjes së lekëve nga ana e të pandehurit Ardian Bitraj, gjatë kohës që ky ushtronte detyrën e Përgjegjësit të Arkës për Veprim. E pandehura Mimoza Bruzia ka vazhduar t´i krijojë të pandehurit Ardian Bitraj kushtet për të vazhduar vjedhjen. E pandehura Mimoza Bruzia me veprime konkludente ka lejuar që i pandehuri të vazhdojë i sigurt për vite me radhë aktivitetin kriminal të vjedhjes së parave të Bankës së Shqipërisë, në një kohë që detyra e saj ishte ruajtja dhe administrimi i këtyre vlerave monetare. Këto veprime e mosveprime të së pandehurës Mimoza Bruzia kanë vazhduar për të gjithë periudhën 2010-2014. Ndihma dhe përkrahja e ndërsjellë që autorët Ardian Bitraj dhe Mimoza Bruzia i kanë dhënë njëri-tjetrit, ka krijuar mundësinë për ardhjen e rezultatit të dëshiruar. Rezulton e provuar se veprimet e personit nën hetim Mimoza Bruzia, lidhur me krijimin e kushteve për kryerjen e vjedhjes janë kryer në një hark të gjatë kohor, duke dhënë një kontribut të rëndësishëm në përmbushjen e veprimtarisë kriminale: vjedhjes së parave në Bankën e Shqipërisë. Më tej, nga hetimet e kryera dhe të dhënat e grumbulluara nga burimet e provave, ka rezultuar e provuar se person tjetër i përfshirë në këtë aktivitet kriminal është dhe i pandehuri Klevis Bejtaj. Sipas pamjeve filmike të realizuara nga kamerat e sigurisë së bankës, ka rezultuar e provuar se i pandehuri Klevis Bejtaj afronte makinën në afërsi të godinës së Bankës së Shqipërisë, në një distancë që sipas tij nuk vëzhgohej nga kamerat e sigurisë. Pas kësaj, tek ai shkonte i pandehuri Bitraj, ku pasi qëndronte disa sekonda, kthehej sërish në ambientet e bankës.

[benseven11]

Vjedhja në BSH, jepet vendimi për grupin e parë të të akuzuarve. Nis seanca për Bitrajn
Gjykata e Tiranës shpalli fajtorë dhjetë të pandehurit e parë të Bankës së Shqipërisë. Në total, gjyqtari Martin Dedaj i dënoi ata me 11 vjet heqje lirie për veprën penale të “shpërdorimit të detyrës” pasi me veprimet dhe mosveprimet e tyre i kanë krijuar kushte të pandehurit Ardian Bitraj, që të vidhte fare i qetë shumën e 713 milionë lekëve në Departamentin e Emisionit.

Që nga ish-drejtori i Departamentit të Emisionit deri tek ish-përgjegjës të arkave dhe inventarizues, që llogarisnin apo qarkullonin vlerat monetare nga arka stok në arkën për veprim, përfituan nga aplikimi i gjykimit të shkurtuar, duke marrë nga drejtësia dënime minimale, nga 8 muaj deri në 18 muaj.

Në këtë mënyrë, operatori vëzhgues Dhimitër Davidi, i cili dyshohet se kishte parë veprimet e Bitrajt duke nxjerrë lekë me thasë, por nuk i kishte raportuar ato, u dënua me dy vjet e 4 muaj burg, por sikurse deklaroi gjyqtari, sipas gjykimit të shkurtuar atij i zbritet vuajtja e dënimit në 18 muaj burgim.

Në aplikim të gjykimit të shkurtuar, Lavdim Çani, Myzejen Belba dhe Liljana Tusha u dënuan secili me nga një vit e 4 muaj heqje lirie, ish-drejtori i Departamentit të Thesarit Dorian Çollaku, Bahri Allushi e Mehdi Marku, u dënuan me nga një vit burg, ndërsa Gentjan Jahja e Fatbardha Gurthi me nga 8 muaj heqje lirie.

Ndërkohë që ish-shefi i Arkës në Veprim, Bashkim Xhilaga, u dënua me një vit e 4 muaj heqje lirie, por që për shkaqe shëndetësore ai duhet të lërë qelitë.

“Urdhërohet pezullimi i ekzekutimit të vendimit për dënimin me burgim për pjesën e pakryer të dënimit, për arsye shëndetësore, dhe lihet i lirë me kusht për 2 vjet i pandehuri Bashkim Xhilaga, në mënyrë që të mos kryejë vepër tjetër penale”, u shpreh gjyqtari Martin Deda.

Vendimi i gjykatës u prit në heshtje nga familjarët e të pandehurve. Por jashtë sallës pati edhe komente.

“Akuza është qesharake. Disa aty u dënuan pa të drejtë. Dikë e akuzojnë se nuk ka hartuar rregulloren, ndërsa të tjerë i akuzojnë se nuk kanë zbatuar rregulloren. Është diçka kontroverse”.

Në të njëjtën ditë një trupë tjetër gjyqësore tentoi të çelte procesin ndaj të pandehurve kyç në vjedhjen e 713 milionë lekëve, por mungesa e Mimoza Bruzias u bë shkak që gjyqi të dështojë. Ardian Bitraj u shfaq i qetë, së bashku me Klevis Bejtjajn, duke deklaruar vetëm të dhënat personale.

Në këtë proces, Banka e Shqipërisë depozitoi kërkesën që të jetë palë së bashku me Avokaturën e Shtetit, për të kërkuar në mënyrë civile në fund të gjyqit kthimin e shumës së vjedhur, e cila sipas Prokurorisë është shpenzuar në lojërat e fatit nga Ardian Bitraj. / Top Channel